«Ɩlɩzɩ . . . weyi ɩkaɣ sɛʋ yɔ»

1. (a) Ɛbɛ pɩwɛɛ se ɖɩla nɛ ɖihiɣ taa leleŋ siŋŋ? (b) Nɛ ɛbɛ yɔɔ? (Izaayii 48:​17, 18)

ÐA-CAA weyi ɛwɛ ɛsɔdaa yɔ, ɛsɔɔlɩ-ɖʋ siŋŋ, nɛ ɛsɔɔlaa se ɖɩnɩɩ wezuu leleŋ lɛɛlɛɛyɔ nɛ cee wayɩ. (Ekl. 3:​12, 13) Ɛlɩzɩ-ɖʋ lɛ, ɛha-ɖʋ lɛɣtʋ sakɩyɛ, ɛlɛ ɛtɩha-ɖʋ lɛɣtʋ ndʋ tiyeki se ɖa-maɣmaɣ ɖiɖiyi ɖa-tɩ nɛ piɖeni-ɖʋ yɔ yaa ɖa-maɣmaɣ ɖɩlɩzɩ mbʋ pɩkɛ kɩbam yaa kɩdɛkɛdɩm yɔ. (Ekl. 8:9; Yer. 10:23) Ɛnawa se pʋcɔ nɛ ɖihiɣ taa leleŋ siŋŋ lɛ, pɩwɛɛ se ɖɩsɛɛ-ɩ nɛ ɖɩɖɔ ɛ-paɣtʋ yɔɔ.—Kalɩ Izaayii 48:​17, 18.

2. (a) Tɔm ndʋ Sataŋ sɔɔlaa se ɖɩmaɣzɩ? (b) Ɛzɩma Yehowa wɩlaa se Sataŋ kɛ cɛtɩyʋ?

² Sataŋ sɔɔlaa se ɖɩmaɣzɩ se paa ɖɩɩsɛɣ Yehowa yɔ ɖɩpɩzɩɣ nɛ ɖihiɣ taa leleŋ, yaa ɖɩmaɣzɩ se ɛyaa pɩzɩɣ nɛ peɖiyi pa-tɩ nɛ piɖeni-wɛ. (Kiɖe 3:​4, 5) Pɩsa nɛ Yehowa wɩlɩ se Sataŋ kɛ cɛtɩyʋ lɛ, ɛha ɛyaa nʋmɔʋ se peɖiyi pa-tɩ alɩwaatʋ natʋyʋ. Pɩtɩcɛyɩ se ɖɩñɩnɩ nɛ ɖiwolo poliŋ pʋcɔ nɛ ɖɩna se ɛyaa ɩɩpɩzɩɣ kpa nɛ peɖiyi pa-tɩ nɛ piɖeni-wɛ. Ɛlɛ Bibl yɔɔdɩ abalaa nɛ halaa sakɩyɛ tɔm se pehiɣ taa leleŋ siŋŋ Yehowa sɛtʋ taa. Pa-taa weyi ehiɣ taa leleŋ nɛ pɩkɩlɩ yɔ ɛnʋ lɛ Yesu Krɩstʋ. Kajalaɣ lɛ, iyele nɛ ɖɩna lɩmaɣza wena a-yɔɔ ɛlɩzaa se ɛsɛɣ Yehowa yɔ. Pʋwayɩ lɛ, ɖɩkaɣ naʋ mbʋ pʋyɔɔ ɖa-Caa weyi ɛwɛ ɛsɔdaa yɔ ɛmʋnaa se ɖɩsɛɛ-ɩ yɔ. Kɛdɛzaɣ lɛ, ɖɩkaɣ naʋ lɩmaɣza wena a-yɔɔ ɖɩlɩzaa se ɖɩsɛɣ Yehowa yɔ a-taa naayɛ.

LƖMAƔZA WENA YƆƆ YESU LƖZAA SE ƐSƐƔ YEHOWA?

3. (a) Sataŋ heyi Yesu se ɛhaɣ-ɩ we? (b) Nɛ ɛbɛ Yesu laba?

³ Yesu kaawɛ tɛtʋ yɔɔ lɛ, pɩɩwɛɛ se ɛlɩzɩ weyi ɛsɔɔlaa se ɛsɛɣ yɔ. Pamɩyɩsɩ Yesu lɩm nɛ pitileɖi lɛ, Sataŋ heyi-i se ɛkaɣ-ɩ haʋ tɛtʋ yɔɔ kewiyisi kpeekpe ye etisaa nɛ ɛsɛɛ-ɩ tam kʋɖʋm yɔ. Yesu cosi-i se: «Ðɛɛ mɔ-yɔɔ, Sataŋ! Mbʋ pʋyɔɔ yɔ pamawa se: “Ñɛ-Ɛsɔ Yehowa pɩwɛɛ se ŋsɛɛ, nɛ e-ɖeke koŋ pɩwɛɛ se ŋla tʋmɩyɛ kiɖeɖeye.”» (Mat. 4:​8-10) Ɛbɛ yɔɔ Yesu lɩzaa se ɛsɛɣ Yehowa? Iyele nɛ ɖɩna lɩmaɣza wena a-yɔɔ ɛlabɩ mbʋ yɔ a-taa naayɛ.

4-5. Lɩmaɣza wena yɔɔ Yesu lɩzaa se ɛsɛɣ Yehowa?

⁴ Lɩmaɣzɩyɛ sɔsɔɖɛ nɖɩ ɖɩ-yɔɔ Yesu lɩzaa se ɛsɛɣ Yehowa yɔ nɖɩ lɛ sɔɔlɩm. Yesu kaasɔɔlɩ ɛ-Caa siŋŋ. (Yoh. 14:31) Pɩtasɩ lɛ, Yesu sɛ Yehowa mbʋ pʋyɔɔ yɔ ɛnawa se mbʋ pɩmʋnaa se ɛla. (Yoh. 8:​28, 29; Natʋ 4:11) Ɛnawa se Yehowa cɔlɔ wezuu hiɖe wɛɛ nɛ ɛmʋnaa se pataa-ɩ liu nɛ ɛkɛ kʋjɔʋ tʋ. (Keɣ. 33:4; 36:9; Yak. 1:17) Paa ɛzɩmtaa lɛ, Yehowa heyiɣ Yesu toovenim nɛ ɛnʋ hanɩ-ɩ mbʋ payɩ ɛwɛna yɔ. (Yoh. 1:14) Ɛlɛ Sataŋ ñɛwɛ ndɩ kpem nɛ Yehowa. Etuyi ɛyaa nɛ pala kɩwɛɛkɩm nɛ pasɩkɩ. Ɛkɛ cɛtɩyʋ, ɛsa naɣ naɣ tʋ nɛ piɖeni men-ɖeke tʋ. (Yoh. 8:44) Yesu kaasɩm Yehowa camɩyɛ nɛ ɛsɩm ɖɔɖɔ Sataŋ camɩyɛ, pʋyɔɔ ɛtaasɔɔlɩ kpa se ɛkaɖɩnɩ Yehowa ɛzɩ Sataŋ labʋ yɔ.—Filp. 2:​5-8.

⁵ Lɩmaɣzɩyɛ lɛɛɖɛ nɖɩ ɖɩ-yɔɔ Yesu lɩzaa se ɛsɛɣ Yehowa yɔ nɖɩ yɔ: Ɛɛkam ɛ-lɩmaɣza mbʋ e-siɣsiɣ wɛtʋ kaɣ kɔnʋʋ yɔ pɩ-yɔɔ. (Ebr. 12:2) Ɛɛnawa se ye ɛɖɔkɩ e-siɣsiɣ wɛtʋ yɔ, ɛkaɣ ñalʋʋ ɛ-Caa hɩɖɛ yɔɔ nɛ piyeki nɛ kʋñɔmɩŋ weyi Eleeu kɔnaa yɔ ɩsɩɩ tɩnaɣ.

LƖMAƔZA WENA YƆƆ YEHOWA MƲNAA SE ÐƖSƐƐ-Ɩ?

6-7. (a) Ɛbɛ yɔɔ ɛyaa sakɩyɛ ɩɩsɛɣ Yehowa sɔnɔ? (b) Ɛlɛ ɛbɛ yɔɔ Yehowa mʋnaa se ɖɩsɛɛ-ɩ?

⁶ Sɔnɔ, ɛyaa sakɩyɛ ɩɩsɛɣ Yehowa mbʋ pʋyɔɔ yɔ patɩtɩlɩ ɛ-wɛtʋ kɩbandʋ nɛ patɩtɩlɩ ɖɔɖɔ kɩbam mbʋ payɩ ɛlabɩ-wɛ yɔ. Ɛyaa mba, pɛwɛ ɛzɩ Atɛɛnɩ ñɩma mba Pɔɔlɩ kaasusi tɔm yɔ. Paba ɖɔɖɔ pataatɩlɩ Ɛsɔ.—Tʋma 17:​19, 20, 30, 34.

⁷ Pɔɔlɩ heyi Atɛɛnɩ mba se Ɛsɔ toovenim tʋ haɣnɩ «ɛyaa tɩŋa wezuu nɛ fezuu nɛ wondu kpeekpe.» Ɛtasɩ yɔɔdʋʋ se: «Ɛ-yɔɔ ɖɩwɛ wezuu nɛ ɖiciɣdiɣ nɛ ɖɩwɛɛ.» Ɛsɔ kɛnɩ Lɩzɩyʋ weyi «ɛtɩŋnɩ ɛyʋ kʋɖʋm yɔɔ nɛ ɛla ajɛɛ ndɩ ndɩ taa ɛyaa» yɔ, pʋyɔɔ lɛ, ɛmʋnaa se ɖɩsɛɛ-ɩ.—Tʋma 17:​25, 26, 28.

8. Ɛbɛ Yehowa ɛɛkaɣ labʋ kpa? Lɩzɩ pɩ-taa.

⁸ Yehowa kɛnɩ wondu tɩŋa Lɩzɩyʋ nɛ Kɩlɩm kedeŋa kpeekpe yɔɔ, pʋyɔɔ lɛ ɛpɩzaɣ se ɛkpa ɛyaa nɛ ɖoŋ se pɛsɛɛ-ɩ. Paa mbʋ yɔ, Yehowa ɛɛkaɣ labʋ mbʋ kpa. Ɛlɛ eyeba nɛ ɖɩtɩlɩ se ɛwɛɛ, nɛ ɛsɔɔlɩ ɖa-taa paa anɩ siŋŋ. Ɛsɔɔlaa se ye pɩsaŋ yɔ, ɛyaa tɩŋa ɩpɩsɩ ɛ-taabalaa tam. (1 Tim. 2:​3, 4) Pʋyɔɔ Yehowa falɩsɩ-ɖʋ se ɖɩwɩlɩ ɛyaa lalaa ɛ-tamasɩ yɔɔ tɔm nɛ ɖiheyi-wɛ kɩbam mbʋ ɛkaɣ ɛyaa labʋ cee wayɩ yɔ pɩ-tɔm. (Mat. 10:​11-13; 28:​19, 20) Ɛha-ɖʋ agbaa wena a-taa ɖɩpɩzɩɣ nɛ ɖɩsɛɛ-ɩ yɔ, nɛ ɛha-ɖʋ ɖɔɖɔ ɛzʋtʋyaa se pɔcɔnɩ ɖɔ-yɔɔ nɛ sɔɔlɩm.—Tʋma 20:28.

9. Ɛbɛ wɩlɩɣ kpayɩ kpayɩ se Yehowa sɔɔlɩ ɛyaa tɩŋa?

⁹ Ðɩnaɣ Yehowa sɔɔlɩm kpayɩ kpayɩ wondu kɩbandʋ ndʋ ɛhaɣ mba palɩzaa se paasɛɣ-ɩ yɔ tɩ-taa. Maɣzɩ tɔm tʋnɛ tɩ-yɔɔ: Ɛyaa sakɩyɛ lɩzʋʋ se paaɖɔŋ Yehowa paɣtʋ yɔɔ ɛlɛ palakɩ mbʋ pɔsɔɔlaa yɔ, pɩlakɩ pɩnzɩ kudokiŋ sakɩyɛ yɔ. Paa mbʋ yɔ, Yehowa haɣ-wɛ mbʋ pɩpɔzʋʋ-wɛ yɔ nɛ sɔɔlɩm se pɩsa nɛ pacaɣ wezuu nɛ panɩɩ ki-leleŋ. (Mat. 5:​44, 45; Tʋma 14:​16, 17) Ɛha-wɛ waɖɛ se pɛwɛɛnɩ taabalaa mba pɔsɔɔlɩ-wɛ yɔ, pɛwɛɛnɩ hɔŋ, pala tʋmɩyɛ nɛ pehiɣ taa leleŋ pee wena tʋmɩyɛ nɖɩ ɖɩlʋlʋʋ yɔ a-taa. (Keɣ. 127:3; Ekl. 2:24) Pɩnaɣ kpayɩ kpayɩ se ɖa-Caa weyi ɛwɛ ɛsɔdaa yɔ ɛsɔɔlɩ ɛyaa tɩŋa. (Ejl. 34:6) Lɛɛlɛɛyɔ lɛ, iyele nɛ ɖɩna lɩmaɣza wena a-yɔɔ ɖɩlɩzaa se ɖɩsɛɣ Yehowa yɔ a-taa naayɛ nɛ ɛzɩma ɛwazɩɣ-ɖʋ yɔ.

LƖMAƔZA WENA YƆƆ ÐƖLƖZAA SE ÐƖSƐƔ YEHOWA?

10. (a) Lɩmaɣzɩyɛ sɔsɔɖɛ nɖɩ yɔɔ ɖɩsɛɣ Yehowa? (Maatiyee 22:37) (b) Ɛzɩma Yehowa suuɖu ɖʋʋ wazɩ-ŋ? (Keɣa 103:​13, 14)

¹⁰ Ɛzɩ Yesu yɔ, lɩmaɣzɩyɛ sɔsɔɖɛ nɖɩ ɖɩ-yɔɔ ɖɩsɛɣ Yehowa yɔ, nɖɩ lɛ se ɖɩsɔɔlɩ-ɩ siŋŋ. (Kalɩ Maatiyee 22:37.) Alɩwaatʋ ndʋ ɖɩkpɛlɩkɩɣ nɛ ɖɩtɩlɩ Yehowa wɛtʋ kɩbandʋ yɔ, piseɣtiɣ-ɖʋ se ɖɩñɔtɩnɩ-ɩ. Iyele nɛ ɖɩna ɛzɩma Yehowa ɖʋʋ-ɖʋ nɛ suuɖu yɔ. Alɩwaatʋ ndʋ Izrayɛɛlɩ mba taañamɩ-ɩ yɔ, eheyi-wɛ se: «Mentendi-mɩ, iyele mɩ-nʋmɔŋ kɩdɛkɛdɩŋ nɛ ɩpɩsɩ.» (Yer. 18:11) Yehowa tɔzʋʋ se ɖɩtɩtalɩ pilim nɛ ɛtɔzʋʋ ɖɔɖɔ se ɖɩkɛ mʋzʋʋ. (Kalɩ Keɣa 103:​13, 14.) Alɩwaatʋ ndʋ ŋmaɣzɩɣ Yehowa suuɖu nɛ ɛ-wɛtʋ kɩbandʋ lɛɛtʋ yɔɔ yɔ, piiseɣtiɣ-ŋ se ŋwolo pɩ-yɔɔ nɛ ŋsɛɣ-ɩ tam?

11. Lɩmaɣza lɛɛna wena yɔɔ ɖɩlɩzaa se ɖɩsɛɣ ɖa-Caa weyi ɛwɛ ɛsɔdaa yɔ?

¹¹ Ðɩsɔɔlaa ɖɔɖɔ se ɖɩsɛɛ Yehowa mbʋ pʋyɔɔ yɔ mbʋ pɩmʋnaa se ɖɩla. (Mat. 4:10) Pɩtasɩ lɛ, ɖɩsɩm mbʋ ɖe-siɣsiɣ wɛtʋ kaɣ kɔnʋʋ yɔ. Alɩwaatʋ ndʋ ɖɩɖɔkʋʋ ɖe-siɣsiɣ wɛtʋ yɔ, ɖɩñalɩɣ Yehowa hɩɖɛ yɔɔ, ɖɩwɩlɩɣ se Eleeu kɛ cɛtɩyʋ nɛ ɖiyeki se ɖa-Caa taa ɛla leleŋ. Nɛ ye sɔnɔ ɖɩlɩzaa se ɖɩsɛɣ Yehowa yɔ, ɖɩwɛɣnɩ lidaʋ se ɖɩkaɣ-ɩ sɛʋ tam.—Yoh. 17:3.

12-13. Ɛbɛ Jane nɛ Pam pa-kɩɖaʋ kpɛlɩkɩɣ-ɖʋ?

¹² Ye ɖɩkɛ pɩɣa yɔ, ɖɩpɩzɩɣ nɛ ɖɩsɔɔlɩ Yehowa siŋŋ, nɛ ɖɩwɛɣ nɛ ɖɩpaɣlɩɣ lɛ sɔɔlɩm mbʋ pɩkaɣ wɛʋ nɛ pɩpaɣlɩɣ ɖɔɖɔ. Iyele nɛ ɖɩna koobiya halɩñɩma Jane nɛ Pam pa-kɩɖaʋ. Pɛkɛ ɛyʋ nɛ e-neu.a Papaɣzɩ Bibl kpɛlɩkʋʋ lɛ, Jane kaawɛnɩ pɩnzɩ 11 nɛ Pam ñɛwɛɛnɩ pɩnzɩ 10. Paa pa-lʋlɩyaa ɩtaasɔɔlɩ Bibl kpɛlɩkʋʋ yɔ, paha-wɛ nʋmɔʋ se pa nɛ Yehowa Aseɣɖe Tɩnaa pɛkpɛlɩkɩ Bibl, ɛlɛ pɩwɛɛ se patɩŋɩɣ pɔ-hɔʋ nɛ powoki cooci. Jane yɔɔdaa se: «Mbʋ Yehowa Aseɣɖe Tɩnaa kpɛlɩkɩ-m Bibl taa yɔ, pɩsɩnɩ-m se mantaañɔɔ tabakʋʋyaɣ yaa mantaacaɣ kʋzʋʋ kɩdɛkɛdʋʋ wezuu ɛzɩ mon-sukuli taa taabalaa sakɩyɛ yɔ.»

¹³ Pɩnzɩ nasɩyɩ wayɩ lɛ, pɛlaa mba pa-naalɛ papɩsɩ tɔm susuyaa. Pʋwayɩ lɛ papaɣzɩ nʋmɔʋ lɩzʋʋ tʋmɩyɛ paa paawɛɛ nɛ pɔcɔŋnɩ pa-lʋlɩyaa mba pakpadɩyaa yɔ pɔ-yɔɔ yɔ. Jane maɣzɩ mbʋ payɩ Yehowa labɩ-wɛ yɔ pɩ-yɔɔ lɛ, ɛyɔɔdɩ se: «Mɛnkpɛlɩkaa se Yehowa cɔŋnɩ ɛ-taabalaa yɔɔ camɩyɛ, nɛ ɛzɩ 2 Timootee 2:19 yɔɔdʋʋ yɔ, “Yehowa sɩm mba pɛkɛ ɛ-ñɩma yɔ.”» Pɩtʋʋ fɛyɩ se Yehowa cɔŋnɩ mba palɩzɩɣ se pɔsɔɔlʋʋ-ɩ nɛ pɛsɛɛ-ɩ yɔ pɔ-yɔɔ.

14. Ɛzɩma ɖɔ-yɔɔdaɣ nɛ ɖa-lakasɩ yeki se Yehowa hɩɖɛ yɔɔ ɛñalɩ? (Cɔnɩ ɖɔɖɔ kɩlɛmɩŋ.)

¹⁴ Ðɩsɔɔlaa se ɖɩsɩnɩ lalaa nɛ patɩlɩ se tɔm kɩdɛkɛdɩtʋ ndʋ panɩ Yehowa yɔɔ yɔ, tɩtɩkɛ toovenim. Iyele nɛ ɖɩna kɩɖaʋ kʋnɛ: Kpaɣ se ŋwɛnɩ taabalʋ kɩbanʋ nɔɔyʋ nɛ ɛlakɩ camɩyɛ lakasɩ, ɛkɛ kʋjɔʋ tʋ nɛ ɛkpakɩɣ nɛ ekpeɣu. Kɩyakʋ nakʋyʋ lɛ, ŋnɩɩ nɔɔyʋ yɔɔdaa se ña-taabalʋ ɛnʋ ɛkɛ kañatʋ tʋ nɛ ɛfɛyɩ toovenim. Ɛzɩma ŋlakɩ? Ŋlʋkɩ ɛ-yɔɔ. Mbʋ ɖɔɖɔ alɩwaatʋ ndʋ Sataŋ nɛ mba pɔ-yɔɔ ɛwɛnɩ ɖoŋ yɔ pɔyɔɔdʋʋ cɛtɩm tɔm Yehowa yɔɔ se pepisi ɛ-hɩɖɛ yɔ, ɖɩyɔɔdʋʋ toovenim tɔm ɛ-yɔɔ nɛ ɖɩlʋkɩ ɛ-hɩɖɛ yɔɔ siŋŋ. (Keɣ. 34:1; Iza. 43:10) Ðɩwɩlɩɣ se ɖɩsɔɔlaa se ɖɩtɩŋnɩ ɖɔ-yɔɔdaɣ nɛ ɖa-lakasɩ yɔɔ nɛ ɖɩsɛɛ Yehowa nɛ ɖa-kalɩzaɣ pilim.

15. Apostoloo Pɔɔlɩ lɛɣzɩ ɛ-kaɖʋsɩ lɛ, wazasɩ nzɩ ehiɣaa? (Filiipi mba 3:​7, 8)

¹⁵ Ðɩsɔɔlɩ faaa se ɖɩlɛɣzɩ ɖa-kaɖʋsɩ se pɩsa nɛ ɖɔ-tɔm kɛdɩnɩ Yehowa yaa se ɖɩwalɩsɩ ɖɛ-Ɛsɔ sɛtʋ. Apostoloo Pɔɔlɩ lɩzaa se ekiziɣ lone sɔsɔɖɛ nɖɩ ɛɛwɛnɩ Yuuda mba Ɛsɔ sɛtʋ taa yɔ se pɩsa nɛ ɛtɩŋ Krɩstʋ wayɩ nɛ ɛsɛɛ Yehowa. (Gal. 1:14) Piyeba nɛ ɛla tʋma sakɩyɛ Yehowa sɛtʋ taa nɛ ehiɣ waɖɛ se ɛ nɛ Yesu pɔtɔɔ kewiyitu ɛsɔdaa. Etikpiɖi kaaʋ se ɛlɩzaa se ɛsɛɣ Yehowa, nɛ ɖa ɖɔɖɔ ɖɩɩkaɣ kpiɖuu kaaʋ.—Kalɩ Filiipi mba 3:​7, 8.

16. Ɛbɛ Julia kɩɖaʋ kpɛlɩkɩɣ-ŋ? (Cɔnɩ ɖɔɖɔ kɩlɛmɩŋ.)

¹⁶ Ye ɖɩsɩ Yehowa sɛtʋ kajalaɣ ɖeɖe ɖe-wezuu caɣʋ taa yɔ, ɛkaɣ-ɖʋ wazʋʋ lɛɛlɛɛyɔ nɛ cee wayɩ. Iyele nɛ ɖɩna koobu halɩñɩnʋ Julia kɩɖaʋ. Pʋcɔ nɛ ɛtɩlɩɣ toovenim lɛ, ɛɛwɛ e-cooci taa hendu teyaa taa kpaɣnɩ alɩwaatʋ ndʋ ɛɛkɛ pɩɣa peleɣa yɔ. Eteɣaɣ hendu camɩyɛ kpem nɛ halɩ papaɣzɩ-ɩ falɩsʋʋ se ɛpɩsɩ hendu teyu sɔsɔ. Pitileɖi lɛ, Julia hɩɖɛ sɛɛ nɛ ɛpaɣzɩ hendu teu lona sɔsɔna taa. Alɩwaatʋ ndʋ ɛɛwɛɛ nɛ ɛlakɩ sukuli se ɛpɩsɩ hendu teyu sɔsɔ yɔ, e-sukuli taa taabalʋ nɔɔyʋ paɣzɩ-ɩ susuu Ɛsɔ tɔm nɛ ɛwɩlɩ-ɩ se payaɣ Ɛsɔ se Yehowa. Pitileɖi lɛ, Julia paɣzɩ Bibl kpɛlɩkʋʋ tam nabʋlɛ kpɩtaʋ taa. Pʋwayɩ lɛ, ɛkpaɣ lɩmaɣzɩyɛ se mbʋ ɛzɩ ɛɛpɩsɩ hendu teyu sɔsɔ lɛ, ɛkpakɩɣ ɛ-alɩwaatʋ nɛ e-ɖoŋ nɛ ɛsɛɛnɩ Yehowa. Pɩtaawɛɛ kɛlɛʋ se ɛkpaɣ lɩmaɣzɩyɛ nɖɩ. Ɛyɔɔdaa se: «Ɛyaa sakɩyɛ heyi-m se pɩkɛnɩ kɩmɛlɛndʋ se meyele hendu teu nɛ mɛnsɛɛ Yehowa, ɛlɛ mañɩnaɣ se mɛnsɛɛ Yehowa kiya me-wezuu kpeekpe.» Ɛkpaɣʋ lɩmaɣzɩyɛ nɖɩ yɔ pɩcɛzɩ pɩnzɩ 30 yɔ; suwe ɛmaɣzɩɣ ɖɩ-yɔɔ sɔnɔ? Ɛyɔɔdaa se: «Mɛwɛnɩ maɣzɩm taa laŋhɛzɩyɛ, nɛ mɛwɛnɩ lidaʋ se Yehowa kaɣ-m haʋ mbʋ payɩ me-liu wɛɛ yɔ cee wayɩ.»—Keɣ. 145:16.

WOLO PƖ-YƆƆ NƐ ŊSƐƔ YEHOWA

17. Ɛjaɖɛ tɛm ñɔtɩ kpam. Ɛzɩma pitukuuni mba pakpaɣ lɩmaɣzɩyɛ se pɛsɛɣ Yehowa yɔ nɛ mba patɩkpaɣtɩ-ɖɩ yɔ?

¹⁷ Ɛjaɖɛ tɛm ñɔtɩ kpam. Apostoloo Pɔɔlɩ mawa se: «Mbʋ pʋyɔɔ yɔ pɩkazɩ “alɩwaatʋ pazɩ yem,” nɛ “weyi ɛkɔŋ yɔ ɛkaɣ talʋʋ nɛ ɛɛkaɣ caɣʋ wayɩ.”» (Ebr. 10:37) Tɔm ndʋ tɩ-tɔbʋʋ lɛ suwe? Alɩwaatʋ ndʋ tɩkazaa se mba paasɛɣ Yehowa yɔ palɩzɩ se pɛsɛɣ-ɩ yɔ tɩtɩɖɔɔ. Ye mbʋ, pɩwɛɛ se pakpaɣ lɩmaɣzɩyɛ kpɛdɛyɛ. (1 Kɔr. 7:29) Nɛ ye ɖɩtɛm kpaɣʋ lɩmaɣzɩyɛ se ɖɩsɛɣ Yehowa yɔ, ɖɩnawa se paa ɖɩkaɣ tɔɔʋ kʋñɔmɩŋ yɔ, «alɩwaatʋ pazɩ yem» ɖɩkaɣ-ɩ tɔɔʋ.

18. Ɛbɛ Yesu nɛ Yehowa pɔsɔɔlaa se ɖɩla?

¹⁸ Yesu tiseɣti ɛ-tɔmkpɛlɩkɩyaa yem se patɩŋ ɛ-wayɩ, ɛlɛ eseɣti-wɛ se pɛwɛɛ ɛ-wayɩ tɩŋʋʋ yɔɔ. (Mat. 16:24) Ye mbʋ, ɖɩwɛʋ nɛ ɖɩsɛɣ Yehowa yɔ, paa pɩlabɩ pɩnzɩ sakɩyɛ yɔ, ɖɩtɛ ɖa-taa se ɖiwoki pɩ-yɔɔ nɛ ɖɩsɛɣ-ɩ. Pɩwɛɛ se ɖɩñaɣ pana siŋŋ pʋcɔ nɛ ɖiwolo pɩ-yɔɔ nɛ ɖɩsɛɣ Yehowa. Pɩpɩzɩɣ nɛ pɩwɛɛ kaɖɛ, ɛlɛ ye ɖiwobi pɩ-yɔɔ nɛ ɖɩsɛɣ Yehowa yɔ ɖɩkaɣ hiɣu taa leleŋ nɛ wazasɩ lɛɛsɩ sakɩyɛ sɔnɔ sɔnɔ.—Keɣ. 35:27.

19. Ɛbɛ Gene kɩɖaʋ kpɛlɩkɩɣ-ɖʋ?

¹⁹ Ɛyaa nabɛyɛ maɣzɩɣ se ye pɛsɛɣ Yehowa yɔ paapɩzɩɣ nɛ panɩɩ wezuu leleŋ. Ye ŋkɛ pɩɣa evelaɣ yɔ, pɩlakɩ-ŋ ɛzɩ ŋwɛʋ nɛ ŋsɛɣ Yehowa yɔ nabʋyʋ wɛɛ nɛ pɩɖɛɣ ñɔ-yɔɔ? Payaɣ koobu abalɩñɩnʋ nɔɔyʋ se Gene; ɛkɛ pɩɣa evelaɣ. Ɛyɔɔdaa se: «Pɩlakaɣ-m ɛzɩ mɛnkɛʋ Yehowa Aseɣɖe Tʋ yɔ maapɩzɩɣ nɛ meleɣyi yɔ. Pɩlakaɣ-m ɛzɩ man-ɖaɣʋnaa nɩɣaɣ leleŋ kpem yɔ; pɔtɔkaɣ kazandʋ, paɖanɩɣ ɖama nɛ palakɩ video yɔɔ aleɣya wena a-taa puuyaɣ lakasɩ wɛɛ yɔ. Ɛlɛ ma lɛ pɩɩwɛɛ se mowolo kediɣzisi nɛ malɩɩ tɔm susuu.» Ðoŋ weyi lɩmaɣza ana aawɛnɩ Gene yɔɔ? Ɛyɔɔdaa se: «Manpaɣzɩ caɣʋ wezuu kɩdɛkɛdʋʋ mɛsaɣ tɛɛ, nɛ manɩ leleŋ alɩwaatʋ natʋyʋ. Ɛlɛ taa leleŋ ɛnɩ etileɖi. Manpaɣzɩ maɣzʋʋ wazasɩ nzɩ Bibl paɣtʋ yɔɔ ɖɔm kɔŋna yɔ sɩ-yɔɔ lɛ, mankpaɣ lɩmaɣzɩyɛ se mɛnsɛɣ Yehowa nɛ ma-laŋɩyɛ pilim. Kpaɣnɩ alɩwaatʋ ndʋ lɛ, pɩlakɩ-m ɛzɩ Yehowa cosi ma-adɩma tɩŋa yɔɔ yɔ.»

20. Ɛbɛ pɩwɛɛ se ɖɩtɛ ɖa-taa se ɖɩlakɩ?

²⁰ Keɣa maɖʋ nɔɔyʋ te Yehowa hendu se: «Koboyaɣ tʋ lɛ ɛyʋ weyi ŋlɩzɩɣ-ɩ nɛ ŋkɔnɩ-ɩ se ɛwɛɛ ña-kadaɣ taa yɔ.» (Keɣ. 65:4) Tɛtɛ nɛ ɖɩtɛ ɖa-taa se ɖiwoki pɩ-yɔɔ nɛ ɖɩsɛɣ Yehowa; nɛ ɛzɩ Yozuwee yɔ, ɖɩyɔɔdɩ se: «Piyele nɛ ma nɛ man-ɖɩɣa taa mba lɛ, Yehowa ɖɩkaɣ sɛʋ.»—Yoz. 24:15.