Ɛzɩ ɛjaɖɛ tɛm ñɔtaa? Ɛbɛ ɛjaɖɛ tɛm mbʋ pɩ-tɔm Natʋ takayaɣ yɔɔdʋʋ yɔ pɩkɛnaa?
Alɩwaatʋ ndʋ ŋnɩɣ ɛjaɖɛ tɛm mbʋ pɩ-tɔm Natʋ takayaɣ yɔɔdʋʋ yɔ pɩ-tɔm lɛ, ɛbɛ yɔɔ ŋmaɣzɩɣ? Pɩtɩla ŋmaɣzɩɣ kɛgbɛdɩsaɣ ŋga kapɩzɩɣ nɛ katalɩ kedeŋa kpeekpe yɔ, yaa ŋga keyeki nɛ mbʋ pɩwɛ wezuu tɛtʋ yɔɔ yɔ pɩtɩŋa pɩsɩɩ tɩnaɣ yɔ kɔ-yɔɔ. Nabɛyɛ maɣzɩɣ se piileɖiɣ lɛ, mbʋ kaɣnɩ labʋ, kɔzɩ kɔzɩ alɩwaatʋ ndʋ panɩɣ tɔm kususutu ɛzɩ ndʋ tɩkɔŋ yɔ:
“Bɔmbɩwaa—Paa pɩtɩɩkɛ se paɖʋ kɩɖʋʋ yaa picoɖi kicoɖuu yɔ, pɩkɔŋ labʋ mbʋ.”—Bulletin of the Atomic Scientists.
“Pɩnzɩ hiu nzɩ sɩɖɛwa yɔ sɩ-taa asɛyɩŋ ɩnɛ ɩlabɩ kedeŋa yɔɔ nɛ pɩkpaɖɩ: Helim sɔsɔm, miŋ sɔsɔŋ weyi ɩñaɣ lakɩŋ yɔ, wɩlɩŋ, corail waa kʋdɔŋ ŋgʋ kiyeki nɛ pahʋlʋmʋʋ yɔ, lɩm hola wena asa miŋ yɔ nɛ lɩm wadʋʋ.”—National Geographic.
“Pɩnzɩ hiŋ sakɩyɛ yɔ, kudoloŋ wɛʋ nɛ kɩwɛɛkɩɣ wondu kpem Afrika ajɛɛ taa yɔ.”—The Associated Press.
Ɛzɩ wiɖiyi tɛtʋ kaɣ ɖɩm yem tuda? Suwe Bibl yɔɔdʋʋ?
Ɛzɩ tɛtʋ kaɣ ɖɩm na?
Aayɩ. Bibl, heyiɣ-ɖʋ se tɛtʋ kaɣ wɛʋ tam. (Eklesɩyastɩ 1:4) Ɛsɔ ɛɛɖɩzɩɣ tɛtʋ ndʋ ɛ-maɣmaɣ ɛlɩzaa yɔ, ɛlɛ ɛkaɣ ‘ɖɩzʋʋ mba pɛwɛɛkɩɣ tɛtʋ yɔ.’—Natʋ 11:18.
Ɛzɩ ɛjaɖɛ tɛm ñɔtaa?
Bibl taa lɛ, “ɛjaɖɛ” nɖɩ pakaɣ ɖɩzʋʋ yɔ, ɖɩsɩŋnɩ ɛyaa mba pabaa fɛyɩnɩ Ɛsɔ nɛ palakɩ mbʋ pa-maɣmaɣ pe-liu wɛɛ yɔ. Ɛzɩ Ɛsɔ kaalabʋ Noowa alɩwaatʋ taa yɔ, mbʋ ɖɔɖɔ ɛkaɣ ɖɩzʋʋ “ɛyaa mba paañaŋ Ɛsɔ yɔ pɛ-ɛjaɖɛ.”—2 Pɩyɛɛrɩ 2:5; 3:7.
1 Yohanɛɛsɩ 2:17 yɔɔdaa se “ɛjaɖɛ ɖiɣni ɖɛʋ nɛ ɖɩ-kɔɖɛyɩ ɖɔɖɔ.” Mayaɣ kanɛ kawɩlɩɣ se pɩtɩkɛ tɛtʋ ndʋ tɩ-yɔɔ ɛyaa wɛɛ yɔ, tɩ-maɣmaɣ Ɛsɔ kaɣ ɖɩzʋʋ, ɛlɛ ɛyaa mba pɔñɔnɩ kɩdɛkɛdɩm labʋ yɔ, mba pakaɣ ɖɩzʋʋ.
Ɛzɩmtaa ɛjaɖɛ kaɣ tɛm?
Bibl tiheyi-ɖʋ alɩwaatʋ ndʋ ɖeyi ɖeyi ɛjaɖɛ kaɣ tɛm yɔ. (Maatiyee 24:36) Ɛlɛ kɩha-ɖʋ yʋsasɩ nzɩ sɩwɩlɩɣ se ɛjaɖɛ tɛm ñɔtaa yɔ. Kiheyi-ɖʋ se:
Wɛtʋ ndɩ ndɩ ɛzɩ yoŋ, ñɔɔsɩ, kʋdɔmɩŋ, tɛtʋ ñamsʋʋ mbʋ pɩkɔŋnɩ asɛyʋʋ siŋŋ yɔ “pakaɣ lɩʋ lona ndɩ ndɩ taa.”—Maatiyee 24:3, 7, 14; Luka 21:10, 11; Natʋ 6:1-8.
Ɛyaa kaɣ wɛnʋʋ piɖeni men-ɖeke wɛtʋ kadadayaɣ. Kɩɖaŋ nɩɩyɩ yɔ se “pakaɣ liidiye sɔɔlʋʋ,” “paakaɣ wɛnʋʋ ɛsɩmɩyɛ” nɛ paakaɣ wɛnʋʋ tɩ-ɖɔkʋʋ.”—2 Timootee 3:1-5.
Ɛyaa sakɩyɛ tisaa se kpaɣnɩ pɩnaɣ 1914 taa, ɛjaɖɛ wɛtʋ labɩ nɔɔ kʋɖʋmaɣ nɛ tɔm ndʋ Bibl yɔɔdaa yɔ, nɛ pɩwɩlɩɣ se ɛjaɖɛ tɔm ñɔtaa. Ye ŋsɔɔlaa se ŋtɩlɩ nɛ pɩkpaɖɩ yɔ, kalɩ tɔm ñʋŋ “Que révèle la chronologie de la Bible sur l’année 1914?” nɛ “Quel est le signe des ‘derniers jours’?”
Ɛbɛ ɛjaɖɛ tɛm mbʋ pɩ-tɔm Natʋ takayaɣ yɔɔdʋʋ yɔ pɩkɛna?
Grɛɛkɩ kʋnʋŋ taa, tɔm piye nɖɩ palabɩnɩ tʋmɩyɛ pɩlɩɩnɩ ɛjaɖɛ tɛm yɔɔ yɔ, ɖɩ-tɔbʋʋ lɛ se “mbʋ pɩ-yɔɔ pokulaa nɛ pawɩlɩ yɔ” yaa “mbʋ patɩmɛsɩ-pʋ yɔ.” Ðoŋ ɖoŋ lɛ, pɩwɩlɩɣ mɛsaɣ tɛɛ tɔm ndʋ tɩ-yɔɔ pokulaa yɔ. Bibl yɔɔdʋʋ ɖɔɖɔ se pakaɣ ‘kuluu Yesu Krɩstʋ yɔɔ nɛ pawɩlɩ’ nɛ pɩkaɣ labʋ mbʋ alɩwaatʋ ndʋ pɩkaɣ kuluu nɛ pɩwɩlɩ se Yesu kɛnɩ weyi ɛwɛnɩ ɖoŋ se ɛɖɩzɩ kañatʋ lakasɩ nzɩ sɩwɛ tɛtʋ yɔɔ yɔ nɛ ɛwazɩ mba paañaŋ Ɛsɔ yɔ.—2 Tesalooniiki 1:6, 7; 1 Pɩyɛɛrɩ 1:7, 13.
Payaɣ Bibl taa kɛdɛzaɣ takayaɣ se Apokalupsis, yaa Natʋ, mbʋ pʋyɔɔ yɔ kɔyɔɔdʋʋ mbʋ pɩkaɣ labʋ cee wayɩ yɔ pɩ-tɔm. (Natʋ 1:1) Tɔm kɩbandʋ nɛ lidaʋ tɔm wɛ takayaɣ ŋga ka-taa. (Natʋ 1:3) Pɩwɩlɩɣ se Ɛsɔ kaɣ ɖɩzʋʋ mulum lakasɩ tɩŋa nɛ eyele nɛ tɛtʋ pɩsɩ paradisuu. Alɩwaatʋ ndʋ tɩ-taa lɛ, ɛyaa ɩɩkaɣ tasʋʋ siziŋ nɩʋ, paatasɩɣ kʋñɔŋ tɔɔʋ nɛ halɩ paatasɩɣ sɩbʋ.—Natʋ 21:3, 4.
Ŋsɔɔlaa se ŋtɩlɩ nɛ pɩkpaɖɩ pɩlɩɩnɩ lidaʋ tɔm kɩbandʋ tʋnɛ tɩ-yɔɔ? Yehowa Aseɣɖe Tɩnaa labɩ ɖʋtʋ nɛ pɛkpɛlɩkɩɣnɩ ɛyaa Bibl falaa nɛ pɩpɩzɩɣ nɛ pɩwazɩ-ŋ. Pɩɩwɛɣ ɖeu se ŋyɔɔdɩnɩ-wɛ sɔnɔ kpaagbaa?