Pɛwɛɛ nɛ pɛwɛɛkɩɣ tɛtʋ—Suwe Bibl yɔɔdʋʋ?

«Ɛyaa wɛɛ nɛ palakɩ lakasɩ sakɩyɛ nzɩ piileɖiɣ lɛ sɩkɔŋnɩ asɛyɩŋ yɔ. Lɩm kaɣ wadʋʋ tɛtʋ sɔsɔtʋ sakɩyɛ yɔɔ. Soŋaɣ kaɣ labʋ nɛ pɩkɩlɩ ɖooo lɛ. Helim sɔsɔm kaɣ mabʋ nɛ pɩkɩlɩ. Lɩm kaɣ labʋ kɛdɛɖaɣ. Ñɩtʋ, tɩŋ nɛ kpɩna sakɩyɛ kaɣ ɖɩm. Pɩtɩkɛ tɔm kulubutu nɛ pɩtɩkɛ niye mɛnɖɛlɛsɩɣ. Tɔm ndʋ lɛɣtʋ ñɩnɩyaa heyiɣ-ɖʋ se pɩkaɣ labʋ ye kominawaa ɩtɩlɛɣzɩ ɛzɩma palakɩnɩ kedeŋa yɔɔ miŋ ɖoŋ tʋmɩyɛ yɔ.» (Ajɛɛ kɩkpɛndʋʋ ɛgbɛyɛ nɖɩ payaɣ se ONU yɔ ɖɩ-takayaɣ taa mayʋ António Guterres yɔɔdɩnɩ tɔm ndʋ alɩwaatʋ ndʋ ajɛɛ ndɩ ndɩ taa ɛyaa mba palɩzaa se pɔcɔŋnɩ ɛzɩma ɛsɔdaa wɛtʋ lɛɣzɩɣ yɔ palabɩ akɔnta 4 avril 2022 yɔ).

«Lɛɣtʋ ñɩnɩyaa wɛɛ nɛ papakɩ ɛyaa se ɛzɩma pɛwɛɛ nɛ pɛwɛɛkɩɣ ɛsɔdaa wɛtʋ yɔ pʋyɔɔ lɛ pɩkaɣ kɔnʋʋ kaɖɛ kaɖasɩ 423 nzɩ sɩwɛ Etaazuunii yɔ sɩ-taa hɔɔlʋʋ sɔsɔʋ pɩnzɩ nzɩ sɩkɔŋ yɔ sɩ-taa. Mbʋ pɩkaɣ wɛɛkʋʋ yɔ pɩnɩɣzɩnɩ asɛyɩŋ weyi Bibl yɔɔdʋʋ se ɩkaɣ kɔm yɔ: miŋ nɛ lɩm wadʋʋ, ɖɔmbɛɛ yɔlʋʋ, teŋgunaa wadʋʋ nɛ soŋaɣ sɔsɔɔ.»—«Lɩm wadʋʋ Yellowstone, kɛ yʋsaɣ ŋga kawɩlɩɣ asɛyɩŋ weyi ɩkaɣ kɔm yɔ», The New York Times, 15 juin 2022.

Ɛzɩma pɛwɛɛ nɛ pɛwɛɛkɩɣ tɛtʋ yɔ papɩzɩɣ nɛ paya tɩ-ñʋʋ na? Ye ɛɛɛ yɔ, apɩzɩɣ nɛ ɛyaa tɩ-ñʋʋ? Na tɔm ndʋ Bibl yɔɔdʋʋ yɔ.

Bibl kaayɔɔdaa se pakaɣ wɛɛkʋʋ tɛtʋ

Bibl yɔɔdaa se Ɛsɔ kaɣ ‘ɖɩzʋʋ mba pɛwɛɛkɩɣ tɛtʋ yɔ.’ (Natʋ 11:18) Bibl mayaɣ ŋga kɛkpɛlɩkɩɣ-ɖʋ lɔŋ 3:

1. 1. Ɛyaa lakasɩ kaɣ wɛɛkʋʋ tɛtʋ siŋŋ.

2. 2. Tɛtʋ wɛɛkʋʋ kaɣ sɩʋ tɩnaɣ.

3. 3. Ɛsɔ kaɣnɩ yabʋ tɛtʋ ñʋʋ pɩtɩkɛ ɛyaa.

Tɛtʋ wɛnɩ cee wayɩ kɩbaŋʋ

Bibl yɔɔdʋʋ se «tɛtʋ wɛɣ ti-ɖeɖe tam.» (Eklezɩyasɩtɩ 1:4) Ɛyaa kaɣ wɛʋ tɩ-yɔɔ tam.

• «Tɛtʋ kaɣ pɩsʋʋ ɛyaa siɣsiɣ tɩnaa ñɩm, nɛ pakaɣ caɣʋ tɩ-yɔɔ tam.»—Keɣa 37:29.

Ɛsɔ kaɣ yebu nɛ tɛtʋ ɖaɣnɩ wɛʋ wɛtʋ kɩbandʋ taa ɛzɩ kiɖe tɛɛ yɔ.

• «Kañɩmbusuu nɛ wɩlɩŋ ɛjaɖɛ pakaɣ mɛyʋʋ amɛya, nɛ kañɩmbusuu kɛdɛɛŋa kaɣ wɛʋ taa leleŋ taa nɛ kakpaɣ hɛtʋ ɛzɩ hɛɖʋʋ ŋgʋ payaɣ se safɩraŋ yɔ.»—Izaayii 35:1.