Ɛbɛ yɔɔ ɛyaa ɩɩpɩzɩɣ nɛ pɔkɔnɩ laŋhɛzɩyɛ?—Suwe Bibl yɔɔdʋʋ?

Ɛjaɖɛ yɔɔ ɖiyiyaa nɛ agbaa tɩpɩzɩ nɛ pɔkɔnɩ laŋhɛzɩyɛ ɛjaɖɛ yɔɔ. Kpaɣnɩ Caama You naalɛ ñɩŋgʋ, yoŋ weyi ɩkʋʋ ɛyaa pɩdɩɩfɛyɩ yɔ, ɩɖɔ sɔnɔ kpem nɛ pɩkɩlɩ weyi ɩɖɛwa yɔ. Ɛyaa mba yoŋ ɛnɩ itukuuna yɔ, patalɩ ɛzɩ miiliyaarɩwaa 2 mbʋ yɔ, pʋ-tɔbʋʋ se ye patayɩ ɛyaa mba pɛwɛ ɛjaɖɛ yɔɔ yɔ hɔɔlɩŋ 4 taa yɔ, yoŋ ɛnɩ itukuuni hɔɔlʋʋ kʋɖʋmʋʋ.

Ɛbɛ yɔɔ ɛyaa ɩɩpɩzɩɣ nɛ pɔkɔnɩ laŋhɛzɩyɛ? Suwe Bibl yɔɔdʋʋ?

Lɩmaɣza 3 wena a-yɔɔ ɛyaa ɩɩpɩzɩɣ nɛ pɔkɔnɩ laŋhɛzɩyɛ yɔ

1. 1. Ɛyaa wɛnɩ wɛtʋ ndʋ tiiyeki se pañaɣ pana nɛ pala laŋhɛzɩyɛ yɔ. Bibl yɔɔdaa se ɖa-alɩwaatʋ taa, «ɛyaa kaɣ pa-tɩ sɔɔlʋʋ, pakaɣ liidiye sɔɔlʋʋ, pakaɣ wɛnʋʋ agʋnda, pakaɣ pa-tɩ kpazʋʋ, . . . paakaɣ wɛʋ siɣsiɣ, . . . paakaɣ tisuu se pa nɛ lalaa panɩɩnɩ ɖama, . . . paakaɣ wɛnʋʋ tɩ ɖɔkʋʋ, pakaɣ wɛʋ ñaŋ, . . . pakaɣ kɛʋ ñʋʋ taa ɖoŋ tɩnaa, tɩ kpazʋʋ kaɣ suu pa-taa.»—2 Timootee 3:2-4.

2. 2. Ɛyʋ nɔɔyʋ yaa ɛyaa nabɛyɛ ɩɩpɩzɩɣ nɛ pɔcɔnɩ ɛyaa kala ɖeɖe ye pa-Lɩzɩyʋ Ɛsɔ Yehowaa ɛtɩsɩnɩ-wɛ yɔ. Bibl yɔɔdʋʋ se «ɛyʋ weyi eɖiɣni ɖɔm yɔ, pɩtɩkɛ ɛ-maɣmaɣ pɩwɛɛ se eɖiyi ɛ-nɩŋgbanzɩ.»—Yereemii 10:23.

3. 3. Ɛjaɖɛ wɛ Sataŋ Eleeu nesi taa. Ɛkɛ ɖiyiyu kɩdɛkɛdʋ nɛ ɖoŋ tʋ «weyi eɖiɣni peɣzuu tɛtʋ tɩŋa yɔ.» (Natʋ 12:9) Nɛ alɩwaatʋ ndʋ payɩ «ɛjaɖɛ kpeekpe [wɛɣ] kañatʋ tʋ nesi taa» yɔ, yoŋ nɛ ɖama kɩɩnɩnʋʋ kaɣ wɛʋ ɛyaa hɛkʋ taa.—1 Yohanɛɛsɩ 5:19.

Apɩzɩɣ nɛ ɛkɔnɩ laŋhɛzɩyɛ?

Bibl yeki se ɖa-taa ɛtɛ se Ɛsɔ kaɣnɩ kɔnʋʋ laŋhɛzɩyɛ, pɩtɩkɛ ɛyaa.

• «“Mbʋ pʋyɔɔ yɔ mansɩm lɩmaɣza wena menɖiɣni labʋ mɩ-yɔɔ yɔ camɩyɛ; laŋhɛzɩyɛ lɩmaɣza, pɩtɩkɛ asɛyʋʋ lɩmaɣza, se maha-mɩ cee wayɩ kɩbaŋʋ nɛ lidaʋ,” Yehowa yɔɔdʋʋna.»—Yereemii 29:11.

Ɛbɛ Ɛsɔ kaɣ labʋ nɛ tamaɣ ŋga kala? «Ɛsɔ weyi ɛhaɣ laŋhɛzɩyɛ yɔ, ɛkaɣ tɔyɩtʋʋ Sataŋ.» (Roma mba 16:20) Ɛsɔ kaɣ tɩŋnʋʋ ɛsɔdaa komina nakʋyʋ yɔɔ nɛ ɛkɔnɩ laŋhɛzɩyɛ ɛjaɖɛ kpeekpe yɔɔ. Komina ŋgʋ Bibl yaɣ se «Ɛsɔ Kewiyaɣ.» (Luka 4:43) Alɩwaatʋ ndʋ Kewiyaɣ ŋga ke-Wiyaʋ Yesu Krɩstʋ kaɣ tɔɔʋ kewiyitu tɛtʋ yɔɔ yɔ, ɛyaa kaɣ kpɛlɩkʋʋ ɛzɩma pacaɣ wezuu laŋhɛzɩyɛ taa yɔ.—Izaayii 9:6, 7.

• Ye ŋsɔɔlaa se ŋtɩlɩ nɛ pɩkpaɖɩ yɔ, kalɩ tɔm ñʋʋ «Que fera le royaume de Dieu ?»