Akaɣ yabʋ mba patɩkɛ sɔɔjanaa yɔ pa-ñʋʋ?—Suwe Bibl yɔɔdʋʋ?

ONU yɔɔdɩnɩ-tʋ

• Kpaɣnɩ 7 octobre nɛ piwolo 23 octobre 2023, you ŋgʋ kɩlakɩ Izrayɛɛlɩ nɛ Gaazaa pɛ-hɛkʋ taa yɔ kiyeba nɛ pakʋ ɛyaa 6 400 nɛ pɩɖʋ heŋ ɛyaa 15 200; pa-taa sakɩyɛ tɩkɛ sɔɔjanaa. Pɩtasɩ lɛ, pɛkɛzɩ ɛyaa kudokiŋ mɩnɩŋ sakɩyɛ tɛtʋ.

• Pɩtalʋʋnɩ 24 septembre 2023 wiye yɔ, you ŋgʋ kɩlakɩ Rusii nɛ Ukrɛɛnɩ pɛ-hɛkʋ taa yɔ, kiyeba nɛ mba patɩkɛ sɔɔjanaa yɔ pa-taa ɛyaa 9 701 sɩ nɛ pɩɖʋ heŋ ɛyaa 17 748 Ukrɛɛnɩ ɛjaɖɛ taa.

Mba you yeba nɛ panɩɣ siziŋ yɔ, Bibl haɣ-wɛ lidaʋ nakʋyʋ yaa we?

Mbʋ pɩwɩlɩɣ se lidaʋ wɛɛ yɔ

Bibl kaatɛm yɔɔdʋʋ se Ɛsɔ kaɣ sɩnzʋʋ «yoŋ tɛtʋ kpeekpe yɔɔ.» (Keɣa 46:9) Ɛkaɣ yebu nɛ ɛsɔdaa Kewiyaɣ yaa ɛsɔdaa komina lɛɣzɩ ɛyaa kominawaa lone taa. (Danɩyɛɛlɩ 2:44) Ɛsɔ Kewiyaɣ kaɣ yebu nɛ ɛyaa hɛzɩ.

Cɔna mbʋ Ɛsɔ Kewiyaɣ Wiyaʋ Yesu Krɩstʋ kaɣ labʋ yɔ:

• «Ɛkaɣ holuu kʋñɔndʋ weyi ekou se pasɩnɩ-ɩ yɔ, nɛ ɛkaɣ holuu ɖɔɖɔ ɛjam nɛ weyi ɛfɛyɩnɩ sɩnɩyʋ nɔɔyʋ yɔ. Ɛkaɣ naʋ ɛjam nɛ kʋñɔndʋ pa-pʋtɔdɩyɛ, nɛ ɛkaɣ yabʋ kʋñɔndɩnaa weziŋ ñʋʋ. Ɛkaɣ-wɛ holuu nazɩm nɛ puuyaɣ lakasɩ taa, nɛ pa-calɩm kaɣ mʋʋ ñɩm ɛ-ɛsɩndaa.» (Keɣa 72:12-14)

Ɛsɔ kaɣ tɩŋnʋʋ e-Kewiyaɣ yɔɔ nɛ eyele nɛ kʋñɔndʋtʋ nɛ tanɩm mbʋ you nɛ ñam ñam lakasɩ pɔkɔnaa yɔ, pamʋʋ caɣ caɣ.

• «Ɛkaɣ hɩzʋʋ ɛsɩtɛɣlɩm kpeekpe pɛ-ɛsɩndaa, nɛ sɩm ɛɛkaɣ tasʋʋ wɛʋ, kʋñɔwiye nɛ kubusi mabʋ nɛ wɩzasɩ paakaɣ tasʋʋ wɛʋ ɖɔɖɔ. Wondu kɩbɩndʋ mʋwaa.» (Natʋ 21:4)

Pɩkazɩ pazɩ Ɛsɔ Kewiyaɣ kaɣ kɔnʋʋ lɛɣzɩtʋ sakɩyɛ tɛtʋ yɔɔ. Bibl kaayɔɔdaa se ɖɩkaɣ «nɩʋ yoŋ taŋ» nɛ mbʋ ɖiɣnini labʋ sɔnɔ. (Maatiyee 24:6) Lakasɩ sɩnɛ nɛ lakasɩ lɛɛsɩ wɩlɩɣ se ɖɩwɛ ɛyaa kewiyitu tɔɔʋ «kɛdɛzaɣ kɩyakɩŋ taa.»—2 Timootee 3:1.