Luka 1:37—«Mbʋ pʋyɔɔ yɔ nabʋyʋ fɛyɩ se Ɛsɔ ɛɛpɩzɩɣ pɩ-labʋ»

«Mbʋ pʋyɔɔ yɔ tɔm natʋyʋ fɛyɩ se Ɛsɔ ɛɛpɩzɩɣ nɛ ɛla tɩ-yɔɔ.»—Luka 1:37, Ɛjaɖɛ kɩfaɖɛ tɔm ɖɛzʋʋ.

«Mbʋ pʋyɔɔ yɔ nabʋyʋ fɛyɩ se Ɛsɔ ɛɛpɩzɩɣ pɩ-labʋ.»—Luka 1:37, Takayaɣ Kiɖeɖea, Kinshasa, Verbum Bible.

Luka 1:37 tɔbʋʋ nɩʋ

Ɛsɔ Ðoŋ Tɩŋa Tʋ pɩzɩɣ nɛ ɛla mbʋ ɛyʋ maɣzɩɣ se paapɩzɩɣ nɛ pala yɔ. Nabʋyʋ ɛɛpɩzɩɣ nɛ pɩɖɩɣ-ɩ nʋmɔʋ se ɛtaala tɔm ndʋ ɛyɔɔdaa se ɛlakɩ yaa tamasɩ nzɩ ɛlakɩ yɔ sɩ-yɔɔ.

Kiɖe tɛɛ kʋnʋŋ pʋ-tɔbʋʋ se Grɛɛkɩ kʋnʋŋ taa lɛ, tɔm piye nɖɩ pɛɖɛzaa se «tɔm» yɔ ɖɩpɩzɩɣ nɛ ɖɩwɩlɩ «tɔm ndʋ nɔɔyʋ yɔɔdʋʋ yɔ» yaa «tɔm ndʋ pɔyɔɔdaa yɔ;» nɛ hɔɔlʋʋ ŋgʋ kɩ-taa lɛ tɩlɩnɩ Ɛsɔ cɔlɔ. Ðɩpɩzɩɣ ɖɔɖɔ nɛ ɖɩwɩlɩ mbʋ pɩlɩ Yehowaa tɔm yɔɔdʋʋ taa yɔ. Mbʋ pʋyɔɔ yɔ Ɛsɔ yɔɔdʋʋ tɔm ndʋ yɔ paa ɛzɩmtaa lɛ tɩlakɩ. Papɩzɩɣ ɖɔɖɔ nɛ pɛɖɛzɩ Luka 1:37 se: «Tamasɩ nzɩ Ɛsɔ lakɩ yɔ paa pɩɩkpawa nɛ pitii yɔ sɩlakɩ» yaa se «Ɛsɔ lɛ, nabʋyʋ fɛyɛ se ɛɛpɩzɩɣ pɩ-labʋ.» Ye pɛɖɛzɩ Grɛɛkɩ kʋnʋŋ taa tɔm ndʋ mbʋ yɔ, pɩlakɩ nɔɔ kʋɖʋmaɣ nɛ lɩmaɣzɩyɛ sɔsɔɖɛ nɖɩ ɖɩwɛ tɔm loyaɣ ŋga ka-taa yɔ; nɖɩ yɔ: Ɛsɔ ɛɛpɩzɩɣ nɛ ɛyɔɔdɩ tɔm natʋyʋ yaa ɛla tamaɣ nakɛyɛ nɛ pɩtɩla ɛzɩ ɛsɔɔlʋʋ yɔ.—Izaayii 55:10, 11.

Bibl hɔɔlɩŋ weyi ɩ-taa pɔyɔɔdɩ Yehowa tamasɩ tɔm yɔ, palabɩnɩ tʋmɩyɛ tɔm loyisi nzɩ sɩ-ɖɔndɩ. Abraham halʋ Saara kaakɛ kaalʋlaɣ, nɛ Yehowa tɩŋnɩ e-tiyiyu yɔɔ nɛ ɛyɔɔdɩ se Saara kaɣ haɣʋ hoɣa ɛ-akpadɩyɩtʋ taa. Ɛsɔ sɔzaa se: «Ɛzɩ nabʋyʋ wɛɛ se pɩkpaɖɩ Yehowa se ɛɛpɩzɩɣ pɩ-labʋ na?» (Kiɖe Tɛɛ Tɔm 18:13, 14) Yɔɔb kpaɣ alɩwaatʋ nɛ ɛmaɣzɩ Ɛsɔ wondu kɩlɩzɩtʋ yɔɔ nɛ pɩtɛ lɛ ɛyɔɔdɩ se: «Mbʋ payɩ ŋɖʋ ña-taa se ŋlakɩ yɔ, pɩ-taa nabʋyʋ fɛyɩ se ŋŋpɩzɩɣ pɩ-labʋ.» (Yɔɔb 42:2) Nɛ alɩwaatʋ ndʋ Yesu wayɩ tɩŋɩyaa pɩtaɣ se paapɩzɩɣ nɛ pamʋna nɛ Ɛsɔ ya pa-ñʋʋ lɛ, Yesu tɔzɩ-wɛ se «Ɛsɔ ñapɩzɩɣ nɛ ɛla pɩtɩŋa.»—Maatiyee 19:25, 26.b

Tɔm ndʋ tɩcɔ Luka 1:37 nɛ tɩta yɔ

Ɛsɔ tiyiyu weyi payaɣ se Gabrɩyɛɛlɩ yɔ, eheyi Yuuda pɛlɛ weyi payaɣ se Maarɩɩ nɛ ɛtɩtɩlɩ abalʋ yɔ tɔm ndʋ tɩwɛ Luka 1:37 taa yɔ. Alɩwaatʋ pazɩ pʋcɔ nɛ eheyiɣ-i tɔm ndʋ tɩwɛ mayaɣ ŋga ka-taa yɔ lɛ, ɛɛtɛmɩ-ɩ heyuu se ɛkaɣ lʋlʋʋ «Kɩlɩm Pɩyalʋ» nɛ ‘ɛyaa-ɩ se Yesu.’ Ɛnʋ kaɣnɩ pɩsʋʋ Ɛsɔ Kewiyaɣ wiyaʋ, nɛ kewiyaɣ ŋga kakaɣ wɛʋ tam.—Luka 1:26-33; Natʋ 11:15.

Maarɩɩ pɔzaa se ɛzɩma pɩpɩzɩɣ nɛ pɩla mbʋ, mbʋ pʋyɔɔ yɔ ɛtaaɖɔkɩtɩ nesi nɛ ‘ɛtaatɩlɩtɩ abalʋ.’ (Luka 1:34, 35) Gabrɩyɛɛlɩ heyi-i se Ɛsɔ kaɣ labɩnʋʋ tʋmɩyɛ e-fezuu kiɖeɖeu yaa ɖoŋ weyi ɛlakɩnɩ tʋmɩyɛ yɔ. Alɩwaatʋ ndʋ tɩ-taa lɛ Yesu kaakɛ Ɛsɔ tiyiyu ɛsɔdaa. Yehowa labɩnɩ tʋmɩyɛ e-fezuu kiɖeɖeu nɛ ɛɖʋ-ɩ Maarɩɩ lotu taa. (Yohanɛɛsɩ 1:14; Filiipi mba 2:5-7) Pɩtɩŋnɩ piti lakasɩ nzɩ sɩ-yɔɔ nɛ Maarɩɩ haɣ hoɣa. Pɩsa nɛ Ɛsɔ tiyiyu sɩnɩ-ɩ nɛ ɛ-taa tɛ nɛ pɩkɩlɩ se Ɛsɔ wɛnɩ ɖoŋ se ɛla mbʋ lɛ, eheyi-i se ɛ-hɔʋ taa tʋ Elizaabɛɛtɩ haɣ hoɣa «ɛ-akpadɩyɩtʋ taa» nɛ ɛkaɣ lʋlʋʋ abalɩbɩɣa. Elizaabɛɛtɩ nɛ ɛ-walʋ Zakarii pataawɛɛnɩ pɩɣa mbʋ pʋyɔɔ yɔ Elizaabɛɛtɩ kaakɛ kaalʋlaɣ. (Luka 1:36) Pa-pɩyalʋ ɛnʋ ɛpɩsɩnɩ Yohanɛɛsɩ Lɩm Mɩyɩsɩyʋ, nɛ Yehowa kaayɔɔdɩ ɖɔɖɔ ɛ-Ɛsɔ sɛtʋ tʋmɩyɛ tɔm.—Luka 1:10-16; 3:1-6.

Pʋwayɩ lɛ Ɛsɔ tiyiyu Gabrɩyɛɛlɩ yɔɔdɩ tɔm ndʋ tɩwɛ Luka 1:37 taa yɔ, nɛ pɩtɩla yɔ Maarɩɩ nɛ Elizaabɛɛtɩ pɔ-yɔɔ ɛmaɣzaɣ. Tɔm kʋɖʋmtʋ ndʋ, tɩsɩɣnɩ Yehowa sɛyaa mba pɛwɛ sɔnɔ yɔ nɛ pa-taa tɛŋ se ɛkaɣ wobu pɩ-yɔɔ nɛ ɛlakɩ ɛ-tamasɩ yɔɔ. Tamasɩ nzɩ sɩ-taa nakɛyɛ lɛ se ɛ-Pɩyalʋ Yesu Krɩstʋ kaɣ tɔɔʋ kewiyitu siɣsiɣ ɛyaa kominawaa lone taa, ɛnʋ kɛnɩ Ɛsɔ Kewiyaɣ Wiyaʋ. —Danɩyɛɛlɩ 2:44; 7:13, 14.

Cɔnɩ video cikpeluu kʋnɛ nɛ ŋtɩlɩ Luka takayaɣ taa lɩmaɣza sɔsɔna.