Alɩwaatʋ ndʋ Yehowa ɖʋwa yɔ tɩtalaa lɛ, sɔɔlɩm tuyi-i nɛ etiyi ɛ-pɩyalʋ tɛtʋ yɔɔ se ɛwɩlɩ ɛyaa Kewiyaɣ tɔm nɛ ɛcɛlɩ e-wezuu se pɩya ɖa-ñʋʋ kɩdɛkɛdɩm nɛ sɩm pe-nesi tɛɛ. Pʋwayɩ lɛ efezi Yesu nɛ ɛlɛ kpa ɛsɔdaa nɛ ɛpɩsɩ Ɛsɔ Kewiyaɣ Wiyaʋ. Tɔm ndʋ tɩwɛ Bibl taa yɔ ɖɩpɩzɩɣ nɛ ɖikpeɣli-tʋ ɛzʋnɔ: Yehowa kaɣ ñalʋʋ ɛ-hɩɖɛ yɔɔ, ɛkaɣ tɩŋnʋʋ e-Kewiyaɣ yɔɔ nɛ eyele nɛ tamaɣ ŋga ɛwɛnɩ tɛtʋ yɔɔ yɔ kala. Nɛ Krɩstʋ kɛnɩ Kewiyaɣ ŋga ka-ñʋʋdʋ. Yehowa tamaɣ ɛɛkaɣ lɛɣzʋʋ kpa. Ɛlabɩ tamaɣ se pɩtɩŋa payɩ pɩkaɣ labʋ ɛzɩ ɛyɔɔdʋʋ yɔ. (Iza. 46:​10, 11; Ebr. 6:​17, 18) Alɩwaatʋ talɩɣ lɛ, tɛtʋ kaɣ pɩsʋʋ paradisuu nɛ Aɖam nɛ Ɛva pa-lʋlʋʋ taa ñɩma mba pɛwɛ siɣsiɣ yɔ, pakaɣ talʋʋ pilim nɛ panɩɩ «wezuu leleŋ tam» kɩ-taa. (Keɣ. 22:26) Ɛlɛ pɩtɩkɛ pi-ɖeke Yehowa kaɣ labʋ. Tamaɣ ŋga ɛwɛna yɔ, ka-kaɖʋwa sɔsɔɔ lɛ se eyele nɛ nɔɔ kʋɖʋmaɣ wɛɛ ɛ-sɛyaa mba pɛwɛ ɛsɔdaa yɔ nɛ mba pɛwɛ tɛtʋ yɔɔ yɔ pɛ-hɛkʋ taa. Pʋwayɩ lɛ, mba payɩ pakaɣ wɛʋ siɣsiɣ yɔ pakaɣ luzuu pa-tɩ ɛ-tɛɛ nɛ ɛkɛ pe-Wiyaʋ. (Efɛz. 1:​8-11) Nʋmɔʋ kɩbaŋʋ ŋgʋ kɩ-yɔɔ Yehowa tɩŋɩɣna nɛ eyeki se ɛ-tamaɣ ɛla yɔ kɩwɛ piti kpem. w23.10 20 § 7-8

Yuuda ñɩma mba paacaɣ Babilɔɔnɩ yɔ, patalɩ Yeruzalɛm lɛ, papaɣzɩ kala ndɩ ndɩ katʋʋ. Pɩɩwɛ-wɛ kaɖɛ se pɔcɔnɩ pɔ-hɔŋ yɔɔ, ñam ñam lakasɩ ɖɔɖɔ kaawɛ Pɛrɩsɩ Kewiyaɣ taa; pɩtasɩ lɛ ajɛɛ wena aacɔ-wɛ nɛ ata yɔ akaɖaɣnɩ-wɛ. Piyeba nɛ pɩwɛɛ pa-taa nabɛyɛ kaɖɛ se paka ñʋʋ nɛ Yehowa templo maʋ tʋmɩyɛ. Pʋyɔɔ Yehowa tiyi nayʋ Agee nɛ nayʋ Zakarii ɛ-samaɣ cɔlɔ; etiyi-wɛ se pasɩnɩ samaɣ nɛ kaɖaɣnɩ wɛʋ kpekpeka Yehowa sɛtʋ taa. Nɛ tʋmɩyɛ nɖɩ ɖɩlʋlɩ pee kɩbana. (Agee 1:1; Zak. 1:1) Ɛlɛ pɩñɔtɩnɩ pɩnzɩ 50 mbʋ yɔ pʋwayɩ lɛ, pɩɖaɣnɩ pɔzʋʋ se pakpazɩ Yuuda ñɩma mba ɖoŋ. Peeɖe Ɛsɩdrasɩ lɩnɩ Babilɔɔnɩ nɛ ɛkɔɔ Yeruzalɛm se ɛkpazɩ Ɛsɔ samaɣ ɖoŋ nɛ kasɩɩ Yehowa sɛtʋ kajalaɣ ɖeɖe ke-wezuu caɣʋ taa. Ɛɛkɛ takayɩsɩ mayʋ weyi ɛɛwɛ niye yɔ. (Ɛsd. 7:​1, 6) Natʋ tɔm ndʋ Agee nɛ Zakarii peheyi Ɛsɔ samaɣ caanaʋ taa yɔ, tɩsɩnɩ-kɛ nɛ kataa Yehowa liu alɩwaatʋ ndʋ pakaɖaɣnɩ-kɛ yɔ. Natʋ tɔm ndʋ tɩpɩzɩɣ ɖɔɖɔ nɛ tɩsɩnɩ-ɖʋ sɔnɔ nɛ ɖɩtaa Yehowa liu se ɛkaɣ-ɖʋ sɩnʋʋ kaɖɛ alɩwaatʋ taa.—Adu. 22:19. w23.11 14-15 § 2-3

Ɛzɩma ɖɩpɩzɩɣ nɛ ɖɩwɩlɩ ɖo-koobiya sɔɔlɩm? Nʋmɔʋ ŋgʋ kɩ-yɔɔ ɖɩpɩzɩɣ nɛ ɖɩtɩŋna nɛ ɖɩla mbʋ yɔ lɛ se ɖɩhɛzɩ pa-laŋa. Ye ɖɩnaɣ lalaa pʋtɔdɩyɛ yɔ, ɖɩkaɣ pɩzʋʋ nɛ ‘ɖiwolo pɩ-yɔɔ nɛ ɖɩhɛzɩ pa-laŋa.’ (1 Tes. 4:18) Ɛbɛ ɖɩpɩzɩɣ nɛ ɖɩla nɛ sɔɔlɩm mbʋ ɖɩwɛnɩ lalaa yɔɔ yɔ pɩwɛɛ ɖoŋ tam? Pɩwɛɛ se ye payʋsɩnɩ-ɖʋ yɔ, ɖɩla mbʋ payɩ ɖɩpɩzɩɣ yɔ nɛ ɖikpeɣ-wɛ. Ɛbɛ yɔɔ pɩcɛyaa kpem se ɖɩwɩlɩ ɖama sɔɔlɩm sɔnɔ? Iyele nɛ ɖɩna lɩmaɣzɩyɛ naɖɩyɛ, ɖɩwɛ tɔm ndʋ Pɩyɛɛrɩ yɔɔdaa yɔ tɩ-taa; ɛyɔɔdaa se: «Wondu tɩŋa tɛmtʋ ñɔtaa. Pʋyɔɔ lɛ, . . . ɩsɔɔlɩ ɖama siŋŋ.» (1 Pɩy. 4:​7, 8) Ɛjaɖɛ kɩdɛkɛdɩyɛ ɖɩnɛ ɖɩ-tɛm wɛɣ nɛ pɩñɔtʋʋ nɛ pɩkɩlɩɣ lɛ, ɛbɛ ɖɩpɩzɩɣ nɛ ɖɩɖaŋ? Yesu yɔɔdaɣ ɛ-wayɩ tɩŋɩyaa tɔm lɛ, ɛtɔm se: «Ajɛɛ kpeekpe kaɣ-mɩ paɖʋʋ ma-hɩɖɛ yɔɔ.» (Mat. 24:9) Pɩsa nɛ ɖɩɖɔkɩ ɖe-siɣsiɣ wɛtʋ paa papaɖɩɣ-ɖʋ yɔ, pɩpɔzʋʋ se ɖɩwɛɛ nɔɔ kʋɖʋmaɣ taa tam. Ye ɖɩsɔɔlɩ ɖo-koobiya yɔ, pana wena Sataŋ ñakɩ se ɛtayɩ ɖɛ-hɛkʋ taa yɔ akaɣ kɛʋ falaa.—Filp. 2:​1, 2. w23.11 13 § 18-19