Saɖakawaɣ, 4 septembre
Habɩyɛ sɔsɔɖɛ naɖɩyɛ kaɣ wɛʋ peeɖe, ɛɛɛ, habɩyɛ nɖɩ payaɣ se Kele kele wɛtʋ habɩyɛ yɔ.—Iza. 35:8.
Pɩɩwɛɛ se Yuuda ñɩma mba pakʋyɩ Babilɔɔnɩ yɔ pɛkɛ «ɛyaa samaɣ kiɖeɖeɣa» pɛ-Ɛsɔ. (Wp. 7:6) Ɛlɛ pɩtɩwɩlɩ se pɩtaapɔzɩ se pɛlɛɣzɩ pɛ-wɛtʋ nɛ pɔ-tɔm kɛdɩnɩ Yehowa. Babilɔɔnɩ palʋlɩ Yuuda ñɩma hɔɔlʋʋ sɔsɔʋ, nɛ pɩwɛ ɛzɩ Babilɔɔnɩ mba maɣzɩm nɛ pa-lakasɩ kaawɛnɩ ɖoŋ pɔ-yɔɔ yɔ. Yuuda ñɩma mba pacalɩ pɩsʋʋ Izrayɛɛlɩ yɔ, papɩsaa nɛ pɩla pɩnzɩ sakɩyɛ pʋwayɩ lɛ, pɩɖɩɣzɩ ñʋʋdʋ Nehemiya alɩwaatʋ ndʋ ɛnɩwa se piya nzɩ palʋlɩ Izrayɛɛlɩ ɛjaɖɛ taa yɔ, sɩɩnɩɣ Yuuda mba kʋnʋŋ. (Wp. 6:6, 7; Neh. 13:23, 24) Ebree kʋnʋŋ taa paakɩlɩ maʋ Ɛsɔtɔm; ye mbʋ ɛzɩma piya nzɩ sɩpɩzɩɣ nɛ sɩsɔɔlɩ Yehowa nɛ sɩsɛɛ-ɩ ye sɩɩnɩɣ kʋnʋŋ ŋgʋ yɔ? (Ɛsd. 10:3, 44) Ye mbʋ pɩɩpɔzaa se Yuuda ñɩma mba, pala lɛɣzɩtʋ sɔsɔtʋ; ɛlɛ pɩkaɣ-wɛ wɛʋ kɛlɛʋ se pala lɛɣzɩtʋ ndʋ Izrayɛɛlɩ ɛjaɖɛ taa nɛ pɩkɩlɩ, mbʋ pʋyɔɔ yɔ pɛwɛɛ nɛ paɖaɣnɩɣ pɩsɩnʋʋ Ɛsɔ sɛtʋ kele kele ñɩndʋ peeɖe pazɩ pazɩ.—Neh. 8:8, 9. w23.05 15 § 6-7
Kemeɣa, 5 septembre
Yehowa sɩɣnɩ mba payɩ peɖiɣni tɔlʋʋ yɔ nɛ ɛkʋsʋʋ mba payɩ pɛwɛ kʋñɔŋ taa yɔ.—Keɣ. 145:14.
Pɩlabɩ pʋtɔdɩyɛ se paa ɖɩwɛnɩ sɔɔlɩm ɛzɩma nɛ paa ɖɩɩmalɩsɩ ɖa-tɩ ɛzɩma yɔ nabʋyʋ pɩzɩɣ pɩla nɛ piyele nɛ pɩwɛɛ-ɖʋ kaɖɛ se ɖɩtalɩ ɖa-kaɖʋwa. Kɩɖaŋ nɩɩyɩ yɔ: «Kʋñɔŋ» yaa mbʋ ɛyʋ tɩɖʋna yɔ pɩzɩɣ piyele nɛ ɖɩɩwɛɣnɩ alɩwaatʋ se ɖɩla mbʋ pɩpɔzʋʋ se ɖɩla nɛ ɖɩtalɩ ɖa-kaɖʋwa yɔ. (Ekl. 9:11) Ðɩpɩzɩɣ nɛ ɖɩkatɩ kaɖɛ naɖɩyɛ nɛ pitibi-ɖʋ yɔɔɔ nɛ ɖɩɩwɛɣnɩ ɖoŋ sakɩyɛ. (Adu. 24:10) Ðɩtɩtalɩ pilim nɛ pʋyɔɔ lɛ, ɖɩpɩzɩɣ nɛ ɖɩla lakasɩ nasɩyɩ nɛ sɩɩsɩɣnɩ-ɖʋ se ɖɩtalɩ ɖa-kaɖʋwa. (Roma 7:23) Yaa pɩtɩla yɔ pɩnɩ-ɖʋ. (Mat. 26:43) Ɛbɛ pɩzɩɣ pɩsɩnɩ-ɖʋ nɛ ɖɩwa mbʋ pɩpɩzɩɣ piyele se ɖɩtaatalɩ ɖa-kaɖʋwa yɔ? Tɔzɩ se ye nabʋyʋ ɛlaba nɛ pɩɖɩkɩ-ŋ nʋmɔʋ se ŋtaatalɩ ña-kaɖʋwa yɔ, pɩtɩwɩlɩ se ŋŋpɩzɩɣ nɛ ŋtalɩ-kɛ. Bibl yɔɔdʋʋ se ɖɩpɩzɩɣ nɛ ɖɩkatɩɣ kala ɖoŋ ɖoŋ. Ɛlɛ kɩwɩlɩɣ ɖɔɖɔ kpayɩ kpayɩ se Yehowa pɩzɩɣ nɛ ɛsɩnɩ-ɖʋ nɛ ɖɩtalɩ ɖa-kaɖʋwa. Ɛɛɛ, ye ŋwobi pɩ-yɔɔ nɛ ŋñakɩ pana se ŋtalɩ ña-kaɖʋwa halɩ pɩkpɛndɩnɩ alɩwaatʋ ndʋ ŋkatɩɣ kala yɔ, ŋwɩlɩɣ Yehowa se ŋsɔɔlaa se ñɔ-tɔm ɛkɛdɩnɩ-ɩ. Alɩwaatʋ ndʋ Yehowa naɣ-ŋ ŋwɛɛ nɛ ŋñakɩ pana se ŋtalɩ ña-kaɖʋwa yɔ, ɛ-taa lakɩ leleŋ siŋŋ! w23.05 30 § 14-15
Mazaɣ, 6 septembre
Ɩpɩsɩ mba pahaɣ ewiɖe kɩɖaŋ kɩbaŋ yɔ.—1 Pɩy. 5:3.
Nʋmɔʋ lɩzʋʋ tʋmɩyɛ sɩɣnɩ evebu se ɛkpɛlɩkɩ ɛzɩma ɛ nɛ ɛyaa ndɩ ndɩ pɛkpɛndɩ nɛ pala tʋmɩyɛ nɔɔ kʋɖʋmaɣ taa yɔ. Ðɩsɩɣnɩ-ɩ ɖɔɖɔ nɛ ɛkpɛlɩkɩ ɛzɩma ɛlabɩnɩ liidiye nɖɩ ehikiɣ yɔ tʋmɩyɛ camɩyɛ nɛ ɛtaawɛɛkɩ-ɖɩ yem yɔ. (Filp. 4:11-13) Ye ŋcaɣ se ŋla alɩwaatʋ tɩŋa Ɛsɔ sɛtʋ tʋmɩyɛ yɔ, ŋpɩzɩɣ ŋpaɣzɩnɩ nʋmɔʋ lɩzʋʋ sɩnʋʋ tʋmɩyɛ. Pɩsɩɣnɩ-ŋ nɛ ŋpaɣzɩ paa ɖooye nʋmɔʋ lɩzʋʋ tʋmɩyɛ. Paa ɖooye nʋmɔʋ lɩzʋʋ tʋmɩyɛ pɩzɩɣ pɩsɩnɩ-ŋ nɛ ŋla alɩwaatʋ tɩŋa Ɛsɔ sɛtʋ tʋma lɛɛna; a-taa naayɛ lɛ Ɛsɔ sɛtʋ kuduyuŋ maʋ yaa Betɛɛlɩ taa tʋmɩyɛ labʋ. Pɩwɛɛ se koobiya abalɩñɩma ɩɖʋ pa-tɩ kaɖʋwa se pañakɩ pana nɛ papɩsɩ ɛgbɛyɛ taa ɛzʋtʋyaa nɛ pasɩnɩ po-koobiya. Bibl yɔɔdʋʋ se abalaa mba pañɩnɩɣ se patalɩ kaɖʋwa ŋga yɔ, «[pɔsɔɔlɩ] tʋmɩyɛ kɩbanɖɛ.» (1 Tim. 3:1) Pʋcɔ nɛ koobu abalɩñɩnʋ pɩsɩ ɛgbɛyɛ taa ɛzʋtʋyʋ lɛ, pɩpɔzʋʋ se ɛkɛ ɛgbɛyɛ taa tʋmlaɖʋ. Ɛgbɛyɛ taa tʋmlaɖaa sɩɣnɩ ɛgbɛyɛ taa ɛzʋtʋyaa hɔɔlɩŋ sakɩyɛ taa. Ɛgbɛyɛ taa ɛzʋtʋyaa nɛ ɛgbɛyɛ taa tʋmlaɖaa pasɩɣnɩ po-koobiya nɛ tɩ luzuu nɛ posusuu tɔm nɛ kpekpeka. w23.12 28 § 14-16