Ezekɩyɛɛlɩ
35 Yehowa tɔm tasɩ-m talʋʋ se: 2 «Ɛyʋ pɩyalʋ, kɛzɩ ñɛ-ɛsa nɛ Seyiri pʋŋ egeetiye yɔɔ,+ nɛ ŋyɔɔdɩ mbʋ pɩkaɣ-ɖɩ talʋʋ yɔ pɩ-natʋ tɔm.+ 3 Heyi-ɖɩ se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Oo Seyiri pʋŋ egeetiye, na, mankʋyʋʋ ñɔ-yɔɔ, nɛ mankaɣ sezuu me-nesi ñɔ-yɔɔ nɛ mala nɛ ŋpɩsɩ kañɩmbusuu ŋgʋ kɩ-taa nɔɔyʋ fɛyɩ yɔ.+ 4 Mankaɣ labʋ nɛ ñɛ-tɛtʋ pɩsɩ njaa, nɛ ŋkaɣ pɩsʋʋ kañɩmbusuu ŋgʋ kɩ-taa nɔɔyʋ fɛyɩ yɔ;+ nɛ toovenim taa lɛ ŋkaɣ tɩlʋʋ se ma lɛ Yehowa. 5 Mbʋ pʋyɔɔ yɔ ŋwɩlɩ paɖɩyɛ kaahɛzaɣ,+ nɛ ŋɖʋzɩ Izrayɛɛlɩ mba laɣɖɛ nesi tɛɛ pa-asɛyʋʋ alɩwaatʋ taa, pɛ-kɛdɛzaɣ nɩŋgbaŋʋʋ hɔm alɩwaatʋ taa.’”+
6 «“Pʋyɔɔ lɛ, mañɩtʋʋ nɛ mɛwɛɛ wezuu yɔ, mankaɣ-ŋ ñɔɔzʋʋ nɛ mansɩɩ se pɛkpɛdɩ ña-calɩm, nɛ calɩm kpɛdʋʋ kaɣ ɖʋʋ ña-wayɩ.+ Calɩm ŋpaɖaɣ, pʋyɔɔ lɛ calɩm kpɛdʋʋ kaɣ ɖʋʋ ña-wayɩ.+ 7 Mankaɣ labʋ nɛ Seyiri pʋŋ egeetiye pɩsɩ kañɩmbusuu ŋgʋ kɩ-taa nɔɔyʋ fɛyɩ yɔ,+ nɛ mankaɣ ɖɩzʋʋ mba payɩ patɩŋɩɣ kɩ-taa yɔ nɛ mba payɩ papɩsɩɣ kɩ-taa yɔ,” Kɩbaɣlʋ Kɩlɩm Yehowa yɔɔdʋʋna. 8 “Mankaɣ labʋ nɛ mba pakʋ-wɛ yɔ posu kɩ-pʋŋ yɔɔ; nɛ mba pakʋ-wɛ nɛ laɣɖɛ yɔ, pakaɣ tɔlʋʋ ñe-piyisi yɔɔ, ñɛ-fɛɛŋ taa nɛ ñe-lemisi kpeekpe taa. 9 Mankaɣ labʋ nɛ ŋpɩsɩ njɛyɛ tam, nɛ nɔɔyʋ ɛɛkaɣ wɛʋ ñɛ-tɛtʋ ndɩ ndɩ taa;+ nɛ toovenim taa lɛ ɩkaɣ tɩlʋʋ se ma lɛ Yehowa.”
10 «Ŋyɔɔdaa se: “Ajɛɛ anɛ a-naalɛ nɛ tɛtʋ tʋnɛ tɩ-naalɛ, pɩkaɣ kɛʋ man-pʋyʋ, ɖɩkaɣ pɩtɩŋa mbʋ yɔ mʋʋ nɛ pɩpɩsɩ ɖa-pʋyʋ,”+ ŋgʋ Yehowa maɣmaɣ kaawɛ peeɖe, 11 “pʋyɔɔ lɛ, mañɩtʋʋ nɛ mɛwɛɛ wezuu yɔ, ŋpaɖaɣ-wɛ nɛ ŋwɩlɩ-wɛ pana nɛ sʋsɩ wɩlʋʋ mbʋ yɔ, mbʋ ɖeyi ɖeyi mankaɣ-ŋ labʋ;+ nɛ mankaɣ yebu nɛ patɩlɩ-m pɛ-hɛkʋ taa alɩwaatʋ ndʋ mahʋʋnɩ-ŋ tɔm yɔ,” Kɩbaɣlʋ Kɩlɩm Yehowa yɔɔdʋʋna. 12 “Ðɩnɛ ɛlɛ, ŋkaɣ tɩlʋʋ toovenim taa se, ma Yehowa, ma-maɣmaɣ manɩ kaañamtʋ tɔm ndʋ payɩ ŋyɔɔdaa pɩlɩɩnɩ Izrayɛɛlɩ pʋŋ yɔɔ yɔ. Ŋtɔm se: ‘Pʋŋ ɛnɩ, ɩpɩsɩ njaa nɛ pɛcɛlɩ-ɖʋ ɩ se ɖɩtɔɔ.’* 13 Nɛ ɩyɔɔdɩ mɔ-yɔɔ tɔm kɩdɛkɛdɩtʋ nɛ tɩ kpazʋʋ, ɩyɔɔdɩ mɔ-yɔɔ tɔm kɩdɛkɛdɩtʋ sakɩyɛ.+ Manɩ tɩ-tɩŋa.”
14 «Tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Tɛtʋ kpeekpe taa kaɣ labʋ leleŋ alɩwaatʋ ndʋ malakɩ nɛ ŋpɩsɩ kañɩmbusuu ŋgʋ kɩ-taa nɔɔyʋ fɛyɩ yɔ. 15 Ɛzɩ ña-taa kaalabʋ leleŋ alɩwaatʋ ndʋ Izrayɛɛlɩ ɖɩɣa ñɩm kaapɩsɩ njɛyɛ yɔ, mbʋ ɖɔɖɔ mankaɣ-ŋ labʋ.+ Oo Seyiri pʋŋ egeetiye, ɛɛɛ, Edom kpeekpe,+ ŋkaɣ pɩsʋʋ njɛyɛ nɖɩ ɖɩ-taa nɔɔyʋ fɛyɩ yɔ; nɛ toovenim taa lɛ pakaɣ tɩlʋʋ se ma lɛ Yehowa.”»