«Ñe-Kewiyaɣ ɛkɔɔ»

Yehowa labɩ tamaɣ se: “Kubusi mabʋ, wɩzasɩ, kʋdɔmɩŋ yaa sɩm paakaɣ tasʋʋ wɛʋ. Mahɩzɩɣ ɛsɩtɛɣlɩm kpeekpe ɛyaa ɛsɩndaa. Paatasɩɣ tɔzʋʋ mbʋ pɩɖɛwa yɔ pɩ-yɔɔ.”

Yehowa labɩ Aɖam nɛ Ɛva nɛ ɛsɩɩ-wɛ Edɛɛnɩ kaɖaɣ taa se pacaɣ wezuu koboyaɣ nɛ laŋhɛzɩyɛ pa-taa. Pɩɩwɛɛ se pɛsɛɛ pa-Caa weyi ɛwɛ ɛsɔdaa yɔ nɛ palʋlɩ piya nɛ pisu tɛtʋ yɔɔ. Aɖam nɛ Ɛva pamanɩ Yehowa paɣtʋ yɔɔ, ɛlɛ ɛtɩlɛɣzɩ ɛ-kaɖʋwa. Ðɩna takayaɣ kanɛ ka-taa se mbʋ mbʋ Ɛsɔ ɖʋʋ se ɛlakɩ yɔ ɛlakɩ-pʋ. E-Kewiyaɣ kaɣ kɔnʋʋ wazasɩ sakɩyɛ tɛtʋ yɔɔ, ɛzɩ ɛɛlabʋ tamaɣ Abraham yɔ.

Pɩkazɩ pazɩ, Sataŋ, aleewaa nɛ ɛyaa kɩdɛkɛdaa kpeekpe paatasɩɣ wɛʋ. Ɛyaa mba pɩkazɩɣ yɔ, Yehowa ɖeke pakaɣ sɛʋ. Pɩɩkaɣ ɖa-taa nɔɔyʋ wɩʋ nɛ nɔɔyʋ ɛɛkaɣ sɩbʋ ɖɔɖɔ. Ɛlɛ, paa ɖooye ɖifeŋ lɛ, ɖa-taa kaɣ wɛʋ leleŋ se ɖɩwɛ wezuu nɛ ɖa nɛ ɖo-ɖoŋ. Tɛtʋ kpeekpe kaɣ pɩsʋʋ paradisuu. Paa weyi ɛkaɣ tɔɔʋ tɔɔnaɣ kɩbaŋa nɛ ɛwɛɛ ɛ-maɣmaɣ ɛ-ɖɩɣa taa kaalɛyɩtʋ. Ɛyaa kpeekpe kaɣ wɛnʋʋ wɛtʋ kɩbandʋ nɛ nɔɔyʋ ɛɛkaɣ tasʋʋ wɛʋ ñaŋ yaa puuyaɣ. Tɛtɛgbɩna ɩɩtasɩɣ-ɖʋ seu sɔɔndʋ nɛ ɖɩɩtasɩɣ-yɛ seu sɔɔndʋ ɖɔɖɔ.

Alɩwaatʋ ndʋ Yehowa paɣzɩɣ fezuu sɩɖaa yɔ, pɩkaɣ wɛʋ kajʋka pɩdɩɩfɛyɩ. Ðɩkaɣ mʋʋ caanaʋ taa mba ɛzɩ Aabɛɛlɩ, Noowa, Abraham, Saara, Moyizi, Ruti, Ɛsɩtɛɛrɩ nɛ Daviid mbʋ yɔ nɛ taa leleŋ. Ða nɛ wɛ ɖɩkaɣ kpɛndʋʋ nɛ ɖɩla tʋmɩyɛ nɛ tɛtʋ kpeekpe pɩsɩ paradisuu. Paa ɛzɩmtaa lɛ ɖɩkaɣ labʋ tʋma sakɩyɛ nɛ akaɣ-ɖʋ kɛdɩnʋʋ.

Yehowa sɔɔlaa se ŋsʋʋ paradisuu taa. Ŋkaɣ kpɛlɩkʋʋ nɛ ŋtɩlɩ-ɩ camɩyɛ nɛ pɩcɛzɩ mbʋ pɩ-yɔɔ ŋpɩzɩɣ nɛ ŋmaɣzɩ yɔ. Tɛtɛ nɛ ɖɩñɔtʋʋnɩ Yehowa paa ɖooye, kpaɣnɩ sɔnɔ nɛ pɩɖɛɛ tam tam!