Pʋʋ yɔɔ tɔm yɔɔdʋʋ

Yesu lɩzɩ apostoloowaa 12 nɛ pɩtɛ lɛ, ɛlɩɩnɩ pʋʋ yɔɔ peeɖe nɛ etii nɛ ewolo lone nɖɩ ɖɩ-taa samaɣ sɔsɔɔ nakɛyɛ kaakpeɣlaa yɔ. Ɛyaa samaɣ ŋga, kaalɩnɩ Galilee, Yuudee, Tiirɩ, Siidɔɔ, Siirii nɛ Yɔɔrdaŋ ageeta lɛɛna taa. Paakɔnɩ ɛyaa mba pɩwɩɣaɣ-wɛ yɔ nɛ aliikenaa nɛ Yesu waa pa-tɩŋa payɩ. Pʋwayɩ lɛ, Yesu caɣ pʋʋ hʋyʋʋ taa nɛ ɛpaɣzɩ-wɛ tɔm wɩlʋʋ. Ɛwɩlɩ-wɛ mbʋ pɩwɛɛ se ɖɩla, ye ɖɩñɩnɩɣ se ɖɩkɛ Ɛsɔ taabalaa kɔyɔ. Pɩwɛɛ se ɖiɖiɣzina se pɩpɔzʋʋ se Yehowa ɛsɩnɩ-ɖʋ nɛ ɖɩkpɛlɩkɩ ɛzɩma ɖɩla nɛ ɖɩsɔɔlɩ-ɩ yɔ. Ɛlɛ ye ɖɩtɩsɔɔlɩ ɛyaa lalaa yɔ, ɖɩɩpɩzɩɣ nɛ ɖɩtɔ se ɖɩsɔɔlɩ Ɛsɔ. Pɩwɛɛ se ɖɩla paa anɩ mbʋ pɩwɛ ɖeu yɔ, halɩ pɩkpɛndɩnɩ ɖo-koyindinaa.

Yesu yɔɔdaa se: “Taasɔɔlɩ ña-taabalaa ɖeke. Ɛlɛ pɩwɛɛ se ŋsɔɔlɩ ɖɔɖɔ ño-koyindinaa nɛ ŋkpakɩɣ ɛyaa lalaa kɩwɛɛkɩm nɛ ŋkpeɣu-wɛ nɛ ña-laŋɩyɛ pilim. Ye ŋnawa se nɔɔyʋ taa wɛnɩ-ŋ yɔ, wolo ɛ-cɔlɔ kpaagbaa nɛ ŋtendi-i nɛ ɩñɔɔzɩ tɔm. Mbʋ ŋsɔɔlaa se lalaa ɩlabɩ-ŋ yɔ, ña ɖɔɖɔ ñaɣ pana nɛ ŋlabɩ-wɛ pʋ.”

Pɩtasɩ lɛ, Yesu heyi samaɣ lɩmaɣza wena pɩwɛɛ se kɛwɛɛnɩ ɛjaɖɛ yɔɔ ñɩm yɔɔ yɔ. Ɛyɔɔdaa se: “Ye ɛyʋ ɛkɛ Yehowa taabalʋ yɔ, pɩwɛ ɖeu nɛ pɩkɩlɩ se ɛwɛɛnɩ liidiye sakɩyɛ. Mɩlʋ pɩzɩɣ nɛ ɛmɩlɩ mi-liidiye, ɛlɛ nɔɔyʋ ɛɛpɩzɩɣ nɛ ɛmɩlɩ taabalɩyɛ nɖɩ ɖɩwɛ mɩ nɛ Yehowa mɩ-hɛkʋ taa yɔ. Iyele nɩɣzʋʋ mbʋ pɩwɛɛ se ɩtɔɔ, ɩñɔɔ yaa isuu yɔ pɩ-yɔɔ. Ɩcɔnɩ sumasɩ nɛ ɩna. Ɛsɔ haɣ-sɩ tɔɔnaɣ paa ɖooye. Nɩɣzɛ ɩɩsɔzʋʋ ɛyʋ wezuu ɖaɣlɩkɩŋ, paa evemiye kʋɖʋmɖɩyɛ maɣmaɣ. Ɩtaasɔɔ se Yehowa sɩm mɩ-kɩcɛyɩm tɩŋa.”

Wiɖiyi samaɣ tɩna ɛyʋ nɔɔyʋ yɔɔdaa ɛzɩ Yesu yɔ. Pɛ-Ɛsɔ sɛtʋ agbaa ñʋndɩnaa taawɩlɩ-wɛ tɔm ndʋ. Ɛbɛ yɔɔ Yesu kaakɛ wɩlɩyʋ kɩbanʋ? Mbʋ pʋyɔɔ yɔ, tɔm ndʋ ɛyɔɔdaɣ payɩ yɔ, Yehowa cɔlɔ tɩlɩnaa.