Pʋpɔzʋʋ Ŋkpɛlɩkɩ Nɛ Ŋtɩlɩ Ɛsɔ

Pʋcɔ nɛ ŋkɛ Ɛsɔ taabalʋ lɛ, pʋpɔzʋʋ ŋtɩlɩ-ɩ camɩyɛ. Ña-taabalaa sɩm ña-hɩɖɛ nɛ payaɣ-ŋ nɛ ɖɩ? Ɛɛɛ, yaa we! Ɛsɔ sɔɔlaa se ŋtɩlɩ ɛ-hɩɖɛ nɛ ŋyaɣ-ɩ nɛ ɖɩ. Ɛsɔ hɩɖɛ lɛ Yahve yaa Yehowa. (Egipiti Lɩʋ 3:15; Maatiyee 6:9) Pʋpɔzʋʋ ɖɔɖɔ se ŋtɩlɩ mbʋ Ɛsɔ sɔɔlaa nɛ mbʋ ɛtɩsɔɔlɩ yɔ, mba pɛkɛ ɛ-taabalaa nɛ mba pɛkɛ e-koyindinaa yɔ. Pɩtɛkɛ kɩyakʋ kʋyʋmʋʋ pasɩŋnɩ ɛyʋ. Pʋyɔɔ yɔɔ Bibl tɔm se pʋwɛ ɖeu se ɖɩkpaɣ alɩwaatʋ nɛ ɖɩkpɛlɩkɩ nɛ ɖɩtɩlɩ Yehowa.—Efɛɛzɩ 5:15, 16.

Ɛsɔ taabalaa lakɩ mbʋ pɩkɛdɩna-ɩ yɔ. Maɣzɩ tʋnɛ: Ye ŋŋñaŋ ña-taabalaa yaa ŋlakɩ mbʋ patɩsɔɔlɩ yɔ, mɩ-taabalɩyɛ wokini ɛzɩdaa? Aayɩ. Mbʋ ɖɔɖɔ, ŋsɔɔlaa se ŋkɛ Ɛsɔ taabalʋ yɔ, pʋpɔzʋʋ ŋla mbʋ pɩkɛdɩna-ɩ yɔ.—Yohanɛɛsɩ 4:24.

Pɩtɛkɛ Ɛsɔ sɛtʋ agbaa tɩŋa wɩlɩɣnɩ-ŋ mbʋ pʋpɔzʋʋ ŋla nɛ ŋpɩsɩ Ɛsɔ taabalʋ yɔ. Yesu, Ɛsɔ taabalʋ kʋsɔɔlʋ, yɔɔdɩ nʋmɔŋ naalɛ tɔm. Kajalaɣ nʋmɔʋ walɩ wamm, ɛyaa sakɩyɛ ɖɔŋ kɩ-taa, ɛlɛ kiwoki sɩm taa. Nʋmɔʋ lɛɛkʋ wɛ kpɩyɩsaɣ nɛ mba pɔɖɔŋ kɩ-taa yɔ patɩɖɔɔ, ɛlɛ kiwoki wezuu maatɛŋ taa. Pʋ-tɔbʋʋ se, ye ŋsɔɔlaa se ŋkɛ Ɛsɔ taabalʋ yɔ, pʋpɔzʋʋ ŋkpɛlɩkɩ nɛ ŋtɩlɩ ɛzɩma ŋsɛɛ-ɩ camɩyɛ yɔ.—Maatiyee 7:13, 14.