Taaɖaŋ, yele nɛ pamɩyɩsɩ-ŋ lɩm

1. Lɩmaɣza kɩbana wena yɔɔ pɩwɛɛ se ŋha ña-tɩ nɛ pamɩyɩsɩ-ŋ lɩm?

ŊSƆƆLƖ Ɛsɔ Yehowa weyi ɛlabɩ-ŋ kʋjɔŋ kɩbaŋ tɩŋa, pɩkpɛndɩnɩ wezuu yɔ? Ŋsɔɔlaa se ŋwɩlɩ-ɩ ñɔ-sɔɔlɩm na? Nʋmɔʋ kɩbaŋʋ ŋgʋ kɩ-yɔɔ ŋpɩzɩɣ ŋtɩŋna nɛ ŋla mbʋ yɔ, ŋgʋ lɛ se ŋha-ɩ ña-tɩ nɛ pʋwayɩ lɛ, ŋyele nɛ pamɩyɩsɩ-ŋ lɩm. Ye ŋkpɛzɩ nɩŋgbanzɩ nzɩ yɔ piyeki nɛ ŋpɩsɩ Yehowa hɔʋ taa tʋ. Mbʋ pɩlɩɣ pɩ-taa yɔ lɛ se ña-Caa nɛ ña-Taabalʋ Yehowa kaɣ-ŋ ɖiyuu nɛ ɛcɔnɩ ñɔ-yɔɔ mbʋ pʋyɔɔ yɔ ŋpɩsɩ ɛ-pʋyʋ. (Keɣ. 73:24; Iza. 43:​1, 2) Alɩwaatʋ ndʋ ŋhaɣ ña-tɩ Ɛsɔ nɛ ŋyele nɛ pamɩyɩsɩ-ŋ lɩm yɔ, piyeki ɖɔɖɔ se ŋwɛɛnɩ wezuu maatɛŋ lidaʋ.—1 Pɩy. 3:21.

2. Ɛbɛ ɖɩkaɣ naʋ tɔm ñʋʋ kʋnɛ kɩ-taa?

² Nabʋyʋ wɛɛ nɛ pɩɖɩkɩ-ŋ nʋmɔʋ se ŋtaaha ña-tɩ nɛ pamɩyɩsɩ-ŋ lɩm na? Ye mbʋ yɔ, pɩtɩkɛ ñe-ɖeke. Ɛyaa miiliyɔɔwaa mba pɛtɛm haʋ pa-tɩ nɛ pamɩyɩsɩ-wɛ lɩm yɔ, pɩɩpɔzaa se pɛlɛɣzɩ pɛ-wɛtʋ nɛ pa-lɩmaɣza nɛ pɩsa nɛ patalɩ kaɖʋwa ŋga. Lɛɛlɛɛyɔ, pɛsɛɣ Yehowa nɛ taa leleŋ nɛ kpekpeka. Ɛbɛ ŋpɩzɩɣ nɛ ŋkpɛlɩkɩ ɛyaa mba paaha pa-tɩ kajalaɣ pɩnzɩ mɩnʋʋ taa nɛ pamɩyɩsɩ-wɛ lɩm yɔ pa-taa nabɛyɛ cɔlɔ? Iyele nɛ ɖɩna mbʋ pɩɖɩkaɣ-wɛ nʋmɔʋ yɔ nɛ mbʋ pa-kɩɖaŋ pɩzɩɣ nɛ ɩkpɛlɩkɩ-ɖʋ yɔ.

PAMƖYƖSƖ SAMAARII MBA LƖM

3. Ɛbɛ pɩzaɣ se pɩɖɩɣ nʋmɔʋ Samaarii mba nabɛyɛ se pataamɩyɩsɩ-wɛ lɩm?

³ Yesu alɩwaatʋ taa, Samaarii mba Ɛsɔ sɛtʋ kaakɛ kɩjaʋ yɔɔ ɛgbɛyɛ naɖɩyɛ. Pa-taa sakɩyɛ kaawɛ Sekɛɛm tɛtʋ cɔlɔ kpɛɛɛ nɛ Samaarii taa, nɛ tɛtʋ ndʋ tɩ-naalɛ tɩɩwɛ Yuudee hayo kiŋ. Pʋcɔ nɛ pamɩyɩsɩ Samaarii mba lɩm lɛ, pɩɩwɛɛ se pɛkpɛlɩkɩ Ɛsɔtɔm tɩŋa nɛ pitisi tɩ-yɔɔ. Samaarii mba maɣzaɣ se Bibl taa kajalaɣ takayɩsɩ 5 ɖeke (kpaɣnɩ Kiɖe Tɛɛ Tɔm nɛ piwolo Wayɩ Wayɩ Paɣtʋ), nɛ pɩtɩla Yozuwee takayaɣ ɖɔɖɔ, fezuu kiɖeɖeu ɖiyaa nɛ pama. Ɛlɛ paaɖaŋaa se Mesiya kaɣ kɔm ɛzɩ Ɛsɔ labʋ tamaɣ Wayɩ Wayɩ Paɣtʋ 18:​18, 19 taa yɔ. (Yoh. 4:25) Pɩsa nɛ pamɩyɩsɩ-wɛ lɩm lɛ, pɩɩwɛɛ se petisi se Yesu kɛnɩ Mesiya weyi ɛ-tɔm paayɔɔdaa yɔ. Nɛ mbʋ «Samaarii mba sakɩyɛ» laba. (Yoh. 4:39) Pɩtɩla, pɩɩwɛɛ se lalaa ɩñaɣ pana nɛ pɛlɛɣzɩ lɩmaɣza kɩdɛkɛda wena paawɛnɩ Yuuda mba yɔɔ yɔ.—Luka 9:​52-54.

4. Ɛzɩ Tʋma Labʋ 8:​5, 6, 14 yɔɔdʋʋ yɔ, ɛzɩma Samaarii mba nabɛyɛ laba alɩwaatʋ ndʋ Filiipu susi-wɛ tɔm yɔ?

⁴ Ɛbɛ sɩnɩ Samaarii mba nɛ peyele nɛ pamɩyɩsɩ-wɛ lɩm? Alɩwaatʋ ndʋ tɔm kɩbandʋ susuyu Filiipu susi Samaarii mba «Krɩstʋ yɔɔ tɔm» yɔ, pa-taa nabɛyɛ «mʋ Ɛsɔ tɔm.» (Kalɩ Tʋma Labʋ 8:​5, 6, 14.) Filiipu kaakɛ Yuuda tʋ, ɛlɛ patikizi-i welisinuu. Pɩtɩla, pɔtɔzɩ masɩ nzɩ sɩyɔɔdʋʋ se Ɛsɔ ɛɛtʋkʋʋ ɛyaa taa yɔ sɩ-yɔɔ. (Wp. 10:​17-19) ‘Pewelisi tɔm ndʋ Filiipu yɔɔdaɣ Krɩstʋ yɔɔ yɔ camɩyɛ’ lɛ, peɖiɣzini kpayɩ kpayɩ se Ɛsɔ fezuu kaawɛ ɛ-yɔɔ. Filiipu lakaɣ ɖɔɖɔ maamaaci lakasɩ sakɩyɛ, nɛ sɩ-taa nasɩyɩ lɛ se ɛwa kʋdɔndɩnaa nɛ ɛɖɔɔnɩ aleewaa.—Tʋma 8:7.

5. Lɔŋ weyi ŋpɩzɩɣ nɛ ŋkpɛlɩkɩ Samaarii mba cɔlɔ?

⁵ Samaarii ñɩma mba, papɩzaɣ se pekizi welisinuu Filiipu, mbʋ pʋyɔɔ yɔ ɛkɛ Yuuda tʋ yaa mbʋ pʋyɔɔ yɔ wiɖiyi patɩnɩtɩ tɔm ndʋ esusaɣ yɔ. Ɛlɛ patɩla mbʋ. Alɩwaatʋ ndʋ Samaarii mba taa tɛma se Filiipu wɛɛ nɛ esusuu-wɛ toovenim tɔm yɔ, patɩɖaŋ; peyeba nɛ pamɩyɩsɩ-wɛ lɩm kpaagbaa. Bibl taa kɛdaɣ ŋga, kɔyɔɔdʋʋ se: «Filiipu susi tɔm kɩbandʋ Ɛsɔ Kewiyaɣ yɔɔ nɛ Yesu Krɩstʋ hɩɖɛ yɔɔ lɛ, abalaa nɛ halaa tisi, nɛ pamɩyɩsɩ-wɛ lɩm.» (Tʋma 8:12) Ña-taa tɛma se Ɛsɔtɔm kɛ toovenim na? Nɛ ña-taa tɛma ɖɔɖɔ se Yehowa Aseɣɖe Tɩnaa ñakɩ pana nɛ pawɩlɩɣ ɖama sɔɔlɩm mbʋ Yesu yɔɔdaa se toovenim Krɩstʋ mba kaɣ ɖama wɩlʋʋ yɔ? (Yoh. 13:35) Ye mbʋ yɔ taaɖaŋ, yele nɛ pamɩyɩsɩ-ŋ lɩm. Ña-taa pɩzɩɣ nɛ pɩtɛ se Yehowa kaɣ-ŋ wazʋʋ.

6. Ɛzɩma Ruben kɩɖaʋ pɩzɩɣ nɛ kɩsɩnɩ-ŋ?

⁶ Payaɣ koobu abalɩñɩnʋ nɔɔyʋ se Ruben. Ɛwɛ Caama ɛjaɖɛ taa. Yehowa Aseɣɖe Tɩnaa hɔʋ taa ɛcaɣaa nɛ ɛpaɣlɩ. Ɛlɛ alɩwaatʋ ndʋ ɛɛkɛ pɩɣa evelaɣ yɔ, ɛ-taa taatɛ se Ɛsɔ wɛɛ. Ɛbɛ sɩnɩ-ɩ? Ɛkɔm nɛ eɖiɣzina se ɛɛsɩŋ tɔm sakɩyɛ tɔm ndʋ tɩ-yɔɔ lɛ, ɛkpaɣ lɩmaɣzɩyɛ se ɛkpɛlɩkɩɣ nɛ ɛtɩlɩ nɛ pɩkɩlɩ. Ɛyɔɔdaa se: «Malabɩ tɩ yɔɔ kpɛlɩkʋʋ se pɩsa nɛ mantɩlɩ mbʋ pɩkɛ toovenim nɛ mbʋ pɩkɛ cɛtɩm yɔ. Mɛnkpɛlɩkɩ évolution yɔɔ tɔm tam sakɩyɛ.» Ɛkalɩ Y a-t-il un Créateur qui se soucie de vous ? takayaɣ. Takayaɣ ŋga kaawɛnɩ ɖoŋ Ruben yɔɔ kpem. Ɛyɔɔdaa se: «Waaʋ! Toovenim taa lɛ, Yehowa wɛɛ.» Ruben woba nɛ ekilimi ɖa-tʋmɩyɛ ɖɩlaɖɛ sɔsɔɖɛ taa nɛ ɛna nɔɔ kʋɖʋmaɣ ŋga kɛwɛ ɛjaɖɛ kpeekpe yɔɔ koobiya hɛkʋ taa yɔ lɛ, pɩkɛdɩnɩ-ɩ siŋŋ. Ruben pɩsɩ Caama ɛjaɖɛ taa lɛ, ɛha ɛ-tɩ nɛ pamɩyɩsɩ-ɩ lɩm alɩwaatʋ ndʋ ɛɛwɛnɩ pɩnzɩ 17 yɔ. Ye ŋpɩtɩɣ tɔm ndʋ ŋkpɛlɩkaa yɔ tɩ-yɔɔ yɔ, ñɩnɩ tɔm ɛgbɛyɛ takayɩsɩ taa nɛ pɩsɩnɩ-ŋ nɛ ŋnɩɩ tɩ-taa nɛ pɩkɩlɩ. «Sɩmtʋ toovenim ñɩndʋ» pɩzɩɣ tɩsɩnɩ-ŋ nɛ ŋwa abʋta. (Efɛz. 4:​13, 14) Nɛ ŋwɛɣ nɛ ŋnɩɣ sɔɔlɩm nɛ nɔɔ kʋɖʋmaɣ ŋga kɛwɛ Yehowa samaɣ taa ɛjaɖɛ hɔɔlɩŋ ndɩ ndɩ taa yɔ kɔ-tɔm, nɛ ŋnaɣ sɔɔlɩm nɛ nɔɔ kʋɖʋmaɣ ŋga ñɛ-ɛgbɛyɛ taa lɛ, pɩkaɣ-ŋ sɩnʋʋ nɛ ŋsɔɔlɩ ɛjaɖɛ kpeekpe yɔɔ koobiya nɛ pɩkɩlɩ.

PAMƖYƖSƖ TAARƖSƖ TƲ SƆƆLƖ LƖM

7. Suwe Sɔɔlɩ maɣzaɣ nɛ pɩpɔzɩ se ɛlɛɣzɩ ɛ-maɣzɩm?

⁷ Iyele nɛ ɖɩna Taarɩsɩ tʋ Sɔɔlɩ kɩɖaʋ. Ɛɛwɛɛ nɛ ewokini ɛsɩndaa Yuuda mba Ɛsɔ sɛtʋ taa camɩyɛ nɛ ɛ-hɩɖɛ kaasɛ Yuuda mba hɛkʋ taa. (Gal. 1:​13, 14; Filp. 3:5) Sɔɔlɩ kaanazɩ Krɩstʋ mba siŋŋ alɩwaatʋ ndʋ Yuuda mba sakɩyɛ kpakaɣ-wɛ se pɛkɛ tisuu yebiyaa yɔ. Ɛmaɣzaɣ se ɛwɛɛ nɛ ɛlakɩ Ɛsɔ sɔɔlɩm, ɛlɛ ɛtaawɛɛnɩ toovenim. (Tʋma 8:3; 9:​1, 2; 26:​9-11) Pɩsa nɛ Sɔɔlɩ tisi Yesu yɔɔ nɛ eyele nɛ pamɩyɩsɩ-ɩ lɩm nɛ ɛpɩsɩ Krɩstʋ tʋ lɛ, pɩɩwɛɛ se etisi nɛ panazɩ-ɩ.

8. (a) Ɛbɛ sɩnɩ Sɔɔlɩ nɛ eyele nɛ pamɩyɩsɩ-ɩ lɩm? (b) Ɛzɩ Tʋma Labʋ 22:​12-16 yɔɔdʋʋ yɔ, ɛzɩma Anaanɩyaasɩ sɩnɩ Sɔɔlɩ? (Cɔnɩ ɖɔɖɔ kɩlɛmʋʋ.)

⁸ Ɛbɛ sɩnɩ Sɔɔlɩ nɛ eyele nɛ pamɩyɩsɩ-ɩ lɩm? Alɩwaatʋ ndʋ Yesu lɩ Sɔɔlɩ yɔɔ yɔ, ñalɩmɩyɛ naɖɩyɛ yeba nɛ Sɔɔlɩ pɩsɩ yʋlʋm. (Tʋma 9:​3-9) Ɛhɔkɩ nɔɔ kɩyakɩŋ 3, nɛ pɩtʋʋ fɛyɩ se ɛmaɣzɩ mbʋ pɩtalɩ-ɩ yɔ pɩ-yɔɔ. Sɔɔlɩ taa kaatɛma se Yesu kaakɛnɩ Mesiya nɛ ɛ-wayɩ tɩŋɩyaa kaakɛnɩ toovenim Ɛsɔ sɛyaa. Pɩtɩla, Sɔɔlɩ kaakpiɖaa se ɛɖʋ nesi nɛ pakʋ Etiyɛɛnɩ. (Tʋma 22:20) Kɩyakɩŋ 3 tɛma lɛ, tɔmkpɛlɩkɩyʋ weyi payaɣ se Anaanɩyaasɩ yɔ ewolo Sɔɔlɩ cɔlɔ nɛ ekuli ɛ-ɛsa nɛ eseɣti-i se eyele nɛ pamɩyɩsɩ-ɩ lɩm kpaagbaa. (Kalɩ Tʋma Labʋ 22:​12-16.) Sɔɔlɩ luzi ɛ-tɩ nɛ etisi nɛ pasɩnɩ-ɩ nɛ ɛpaɣzɩ wezuu kɩfalʋʋ caɣʋ.—Tʋma 9:​17, 18.

9. Lɔŋ weyi ɖɩpɩzɩɣ nɛ ɖɩkpɛlɩkɩ Sɔɔlɩ kɩɖaʋ taa?

⁹ Ðɩpɩzɩɣ nɛ ɖɩkpɛlɩkɩ lɔŋ sakɩyɛ Sɔɔlɩ kɩɖaʋ taa. Ɛpɩzaɣ se eyele nɛ tɩ kpazʋʋ yaa ɛyʋ sɔɔndʋ seu ɖɩɣ-ɩ nʋmɔʋ se ɛtaaha ɛ-tɩ nɛ pamɩyɩsɩ-ɩ lɩm. Ɛlɛ ɛtɩla mbʋ. Sɔɔlɩ luzi ɛ-tɩ nɛ etisi faaa nɛ ɛlɛɣzɩ e-wezuu caɣʋ se pɩsa nɛ ɛpɩsɩ Yesu wayɩ tɩŋɩyʋ. (Tʋma 26:​14, 19) Sɔɔlɩ kaatisi faaa se ɛpɩsɩɣ Krɩstʋ tʋ paa ɛɛnawa se pakaɣ-ɩ nazʋʋ yɔ. (Tʋma 9:​15, 16; 20:​22, 23) Ɛ-lɩm mɩyɩsʋʋ wayɩ, ewobi pɩ-yɔɔ nɛ ɛtaɣ Yehowa liu se ɛkaɣ-ɩ sɩnʋʋ nɛ ɛɖɔkɩ ɛ-tɩ nazɩm ndɩ ndɩ taa. (2 Kɔr. 4:​7-10) Ye ŋyeba nɛ pamɩyɩsɩ-ŋ lɩm nɛ ŋpɩsɩ Yehowa Aseɣɖe Tʋ yɔ, pɩpɩzɩɣ piyele nɛ ŋkatɩ nazɩm yaa takɩm. Ɛlɛ ña-taa pɩzɩɣ nɛ pɩtɛ se paa ɛzɩmtaa lɛ, Ɛsɔ nɛ Krɩstʋ pakaɣ-ŋ sɩnʋʋ nɛ ŋkaɖɩnɩ-pʋ nɛ ŋwɛɛ siɣsiɣ.—Filp. 4:13.

10. Ɛzɩma Anna kɩɖaʋ pɩzɩɣ nɛ kɩsɩnɩ-ŋ?

¹⁰ Anna nɛ ɛ-hɔʋ taa mba pɛkɛ Kurde mba nɛ pɛwɛ Erɔɔpɩ wɩsɩ ɖɩlɩyɛ taa. Pamɩyɩsɩ Anna ɖoo lɩm nɛ pɩtɛ lɛ, Anna caa ha-ɩ nʋmɔʋ se ɛpaɣzɩ Bibl kpɛlɩkʋʋ; alɩwaatʋ ndʋ lɛ ɛɛwɛnɩ pɩnzɩ 9. Ɛlɛ Anna hɔʋ taa ñɩma lalaa mba pa nɛ wɛ paawɛ ɖɩɣa kʋɖʋmaɣ taa yɔ, panɩwa se Anna paɣzɩ Bibl kpɛlɩkʋʋ lɛ, papaɣzɩ-ɩ kaɖɩnʋʋ. Pamaɣzaɣ se pɔ-sɔnzɩ taa lɛ, ye nɔɔyʋ eyebi pɔ-cɔzɔnaa Ɛsɔ sɛtʋ yɔ pɩɖʋʋ ɛ-hɔʋ fɛyɛ. Anna kaawɛnɩ pɩnzɩ 12 lɛ, ɛpɔzɩ ɛ-caa se ɛha-ɩ nʋmɔʋ nɛ pamɩyɩsɩ-ɩ lɩm. Ɛ-caa pɔzɩ-ɩ se ɛ-maɣmaɣ ɛkpaɣnɩ lɩmaɣzɩyɛ nɖɩ yaa nɔɔyʋ ñɩɣnɩ ɛ-yɔɔ. Nɛ Anna cosi se: «Mɔnsɔɔlɩ Yehowa.» Ðɩnɛ ɛlɛ, ɛ-caa tisi se pamɩyɩsɩ-ɩ lɩm. Pamɩyɩsɩ-ɩ lɩm nɛ pɩtɛ lɛ, ɛ-hɔʋ taa ñɩma mba, powolo pɩ-yɔɔ nɛ powoŋuu-i nɛ palakɩ-ɩ kañatʋ pɩdɩɩfɛyɩ. Halɩ, ɛ-hɔʋ taa tʋ nɔɔyʋ heyi-i se: «Ye ŋŋcakaɣ wezuu kɩdɛkɛdʋʋ, yaa ŋŋñɔwaɣ sɩgaa yɔ pɩɩwɛ weewee nɛ pɩkɩlɩ se ŋpɩsɩ Yehowa Aseɣɖe Tʋ.» Ɛzɩma Anna lʋbɩnɩ wɛtʋ ndʋ? Ɛyɔɔdaa se: «Yehowa kpazɩ-m ɖoŋ; pɩtasɩ lɛ mon-ɖoo nɛ man-caa paɖʋ-m nesi kpem.» Anna ma hɔɔlɩŋ weyi ɩ-taa Yehowa sɩnɩ-ɩ e-wezuu caɣʋ taa yɔ nɛ ɛsɩɩ. Nɛ ɖoŋ ɖoŋ lɛ, ɛcɔŋnɩ ndʋ ɛɛmawa yɔ se pɩsa nɛ ɛtɔzʋʋ ɛzɩma Yehowa kaasɩnɩ-ɩ yɔ pɩ-yɔɔ. Ye sɔɔndʋ ɛkpaɣ-ŋ se pakaɣ-ŋ nazʋʋ yɔ, tɔzɩ se Yehowa kaɣ ña ɖɔɖɔ sɩnʋʋ.—Ebr. 13:6.

PAMƖYƖSƖ KƆƆRNƐƐYƖ LƖM

11. Ɛbɛ pɩzaɣ se pɩɖɩɣ Kɔɔrnɛɛyɩ nʋmɔʋ se ɛtaaha ɛ-tɩ nɛ pamɩyɩsɩ-ɩ lɩm?

¹¹ Ðɩpɩzɩɣ nɛ ɖɩkpɛlɩkɩ lɔŋ Kɔɔrnɛɛyɩ kɩɖaʋ taa. Ɛɛkɛ Roma «sɔɔja sɔsɔ nɔɔyʋ» nɛ eɖiyaɣ sɔɔjanaa ɛzɩ 100 mbʋ yɔ. (Tʋma 10:1) Nɛ pʋyɔɔ lɛ, pɩtɩla ɛ-hɩɖɛ kaasɛ ɛ-ɛjaɖɛ taa nɛ sɔɔjanaa hɛkʋ taa. «Ɛlakaɣ samaɣ pʋtɔdɩyɛ naʋ kʋjɔŋ sakɩyɛ.» (Tʋma 10:2) Yehowa tiyi apostoloo Pɩyɛɛrɩ se esusi-i tɔm kɩbandʋ. Ɛzɩ lone nɖɩ Kɔɔrnɛɛyɩ kaawɛna yɔ ɖɩɖɩɣ-ɩ nʋmɔʋ se ɛtaaha ɛ-tɩ nɛ pamɩyɩsɩ-ɩ lɩm na?

12. Ɛbɛ sɩnɩ Kɔɔrnɛɛyɩ nɛ eyele nɛ pamɩyɩsɩ-ɩ lɩm?

¹² Ɛbɛ sɩnɩ Kɔɔrnɛɛyɩ nɛ eyele nɛ pamɩyɩsɩ-ɩ lɩm? Bibl yɔɔdʋʋ se «ɛ nɛ ɛ-ɖɩɣa taa mba tɩŋa peseɣaɣ Ɛsɔ sɔɔndʋ.» Nɛ Kɔɔrnɛɛyɩ tendaɣ Ɛsɔ tam. (Tʋma 10:2) Alɩwaatʋ ndʋ Pɩyɛɛrɩ susi Kɔɔrnɛɛyɩ tɔm kɩbandʋ yɔ, ɛ nɛ ɛ-hɔʋ petisi Krɩstʋ yɔɔ kpaagbaa nɛ peyele nɛ pamɩyɩsɩ-wɛ lɩm. (Tʋma 10:​47, 48) Pɩtʋʋ fɛyɩ se Kɔɔrnɛɛyɩ kaasɔɔlaa se ɛla lɛɣzɩtʋ ndʋ payɩ pɩpɔzʋʋ yɔ nɛ pɩsa nɛ ɛ nɛ ɛ-hɔʋ pɛkpɛndɩ nɛ pɛsɛɛ Yehowa.—Yoz. 24:15; Tʋma 10:​24, 33.

13. Lɔŋ weyi ɖɩpɩzɩɣ nɛ ɖɩkpɛlɩkɩ Kɔɔrnɛɛyɩ kɩɖaʋ taa?

¹³ Ɛzɩ pɩɩwɛʋ Sɔɔlɩ hɔɔlʋʋ taa yɔ, Kɔɔrnɛɛyɩ pɩzaɣ se ɛha nʋmɔʋ lone nɖɩ ɛwɛna yɔ nɛ ɖɩɖɩɣ-ɩ nʋmɔʋ se ɛtaapɩsɩ Krɩstʋ tʋ. Ɛlɛ ɛtɩla mbʋ. Pɩpɔzʋʋ se ŋla lɛɣzɩtʋ sɔsɔtʋ natʋyʋ ñe-wezuu caɣʋ taa nɛ pɩsa nɛ ŋha ña-tɩ nɛ pamɩyɩsɩ-ŋ lɩm na? Ye mbʋ yɔ, Yehowa kaɣ-ŋ sɩnʋʋ. Ɛkaɣ-ŋ wazʋʋ ye ŋtɛm ña-taa se ŋsɛɣ-ɩ nɛ ŋyele nɛ ñe-wezuu caɣʋ la nɔɔ kʋɖʋmaɣ nɛ Bibl paɣtʋ kila yɔ.

14. Ɛzɩma Tsuyoshi kɩɖaʋ pɩzɩɣ nɛ kɩsɩnɩ-ŋ?

¹⁴ Payaɣ koobu abalɩñɩnʋ nɔɔyʋ se Tsuyoshi, ɛwɛ Japɔŋ ɛjaɖɛ taa. Ɛlabɩ lɛɣzɩtʋ natʋyʋ ɛ-tʋmɩyɛ taa se pɩsa nɛ ɛmʋna nɛ pamɩyɩsɩ-ɩ lɩm. Ɛɛkɛ Ikenobo sukuli ñʋʋdʋ sɩnɩyʋ. Pawɩlaɣ ɛyaa ɛzɩma pɔñɔɔzɩ tɩŋ hɛtʋ yɔ sukuli ŋgʋ kɩ-taa. Alɩwaatʋ ndʋ sukuli ñʋʋdʋ ɛɛpɩzɩɣ se ewolo sɩm sɔnzɩ nasɩyɩ taa yɔ, ɖoŋ ɖoŋ lɛ Tsuyoshi lɛɣzɩɣ e-lone taa nɛ ɛlakɩ Buuda mba sɔnzɩ. Ɛlɛ alɩwaatʋ ndʋ Tsuyoshi kpɛlɩkɩ sɩm yɔɔ toovenim tɔm yɔ, sɔnzɩ nzɩ sɩɖɩkaɣ-ɩ nʋmɔʋ se ɛtaaha ɛ-tɩ nɛ pamɩyɩsɩ-ɩ lɩm. Peeɖe ɛkpaɣ lɩmaɣzɩyɛ se ɛɛtasɩɣ labʋ Buuda mba sɔnzɩ nzɩ. (2 Kɔr. 6:​15, 16) Tsuyoshi wolo nɛ ɛyɔɔdɩnɩ sukuli ñʋʋdʋ. Ɛbɛ lɩ pɩ-taa? Tsuyoshi tʋmɩyɛ ñʋʋdʋ ha-ɩ nʋmɔʋ se ewolo ɛ-tʋmɩyɛ yɔɔ paa ɛɛtasɩɣ ɖʋʋ nesi sɔnzɩ nzɩ yɔ. Ɛpaɣzɩ Bibl kpɛlɩkʋʋ nɛ pɩla ɛzɩ pɩnaɣ kʋɖʋmaɣ mbʋ yɔ lɛ, ɛha ɛ-tɩ nɛ pamɩyɩsɩ-ɩ lɩm.a Ye pɩpɔzʋʋ se ŋla lɛɣzɩtʋ ña-tʋmɩyɛ taa nɛ pɩsa nɛ ñɔ-tɔm kɛdɩnɩ Ɛsɔ yɔ, ña-taa ɛtɛ se ɛkaɣ haʋ ña nɛ ñɔ-hɔʋ mbʋ pɩpɔzʋʋ-mɩ yɔ.—Keɣ. 127:2; Mat. 6:33.

PAMƖYƖSƖ KƆRƐNTƖ MBA LƖM

15. Ɛbɛ pɩzaɣ se pɩɖɩɣ Kɔrɛntɩ mba nʋmɔʋ se pataamɩyɩsɩ-wɛ lɩm?

¹⁵ Ɛyaa mba paawɛ caanaʋ taa Kɔrɛntɩ tɛtʋ taa yɔ, paasɔɔlɩ ñɩm nɛ pacakaɣ wezuu kɩdɛkɛdʋʋ. Pa-taa sakɩyɛ cakaɣ wezuu ŋgʋ kɩɩkɛdɩɣnɩ Ɛsɔ yɔ. Pɩtʋʋ fɛyɩ se pɩɩwɛ ɛyaa mba paawɛ tɛtʋ ndʋ tɩ-taa yɔ kaɖɛ kpem se pɛsɛɛ Yehowa. Ɛlɛ alɩwaatʋ ndʋ apostoloo Pɔɔlɩ wobi tɛtʋ ndʋ tɩ-taa nɛ esusi Krɩstʋ yɔɔ tɔm kɩbandʋ yɔ, «Kɔrɛntɩ ñɩma sakɩyɛ mba paawelisi tɔm kɩbandʋ yɔ, papaɣzɩ wɛnʋʋ tisuu nɛ pamɩyɩsɩ-wɛ lɩm.» (Tʋma 18:​7-11) Nɛ Kɩbaɣlʋ Yesu Krɩstʋ lɩɩ Pɔɔlɩ yɔɔ natʋ natʋyʋ taa nɛ ɛyɔɔdɩ se: «Mɛwɛnɩ ɛyaa sakɩyɛ tɛtʋ tʋnɛ tɩ-taa.» Pʋyɔɔ Pɔɔlɩ wobi pɩ-yɔɔ nɛ esusi tɔm peeɖe pɩnaɣ nɛ hɔɔlʋʋ.

16. Ɛbɛ kaasɩnɩ Kɔrɛntɩ mba nɛ pawa mbʋ pɩɖɩkaɣ-wɛ nʋmɔʋ se pataamɩyɩsɩ-wɛ lɩm yɔ? (2 Kɔrɛntɩ mba 10:​4, 5)

¹⁶ Ɛbɛ sɩnɩ Kɔrɛntɩ mba nɛ peyele nɛ pamɩyɩsɩ-wɛ lɩm? (Kalɩ 2 Kɔrɛntɩ mba 10:​4, 5.) Ɛsɔtɔm nɛ Ɛsɔ fezuu kiɖeɖeu ŋgʋ kɩwɛ ɖoŋ yɔ kɩsɩnɩ-wɛ nɛ pɛlɛɣzɩ pe-wezuu caɣʋ kiya. (Ebr. 4:12) Kɔrɛntɩ ñɩma mba paamʋ Krɩstʋ yɔɔ tɔm kɩbandʋ yɔ, papɩzaa nɛ peyele lakasɩ kɩdɛkɛdɩsɩ labʋ; peyebi sʋlʋm kpaŋʋʋ nɛ mɩlɩm, mba paka kʋzʋʋ pilinzi nɛ pasʋʋnɩ ɖama yɔ peyebi lakasɩ nzɩ ɖɔɖɔ.—1 Kɔr. 6:​9-11.b

17. Lɔŋ weyi ɖɩpɩzɩɣ nɛ ɖɩkpɛlɩkɩ Kɔrɛntɩ mba cɔlɔ?

¹⁷ Paa pɩɩwɛɛ se Kɔrɛntɩ mba ɩñaɣ pana nɛ pɛlɛɣzɩ pa-lakasɩ kɩdɛkɛdɩsɩ yɔ, patɩmaɣzɩ se pɩwɛɣ-wɛ kaɖɛ kpem se papɩsɩ Krɩstʋ mba. Pañaɣ pana siŋŋ nɛ patɩŋ nʋmɔʋ sɔɖɩɩɩ ñɩŋgʋ ŋgʋ kiwokini wezuu maatɛŋ taa yɔ. (Mat. 7:​13, 14) Ŋwɛɛ nɛ ŋlʋkɩ se ŋyele lakasɩ kɩdɛkɛdɩsɩ nasɩyɩ nɛ pɩsa nɛ pamɩyɩsɩ-ŋ lɩm na? Taayele lʋbʋ kpa. Tendi Yehowa se ɛha-ŋ e-fezuu kiɖeɖeu nɛ kɩsɩnɩ-ŋ nɛ ŋlʋbɩnɩ kɩdɛkɛdɩm.

18. Ɛzɩma Monika kɩɖaʋ pɩzɩɣ nɛ kɩwazɩ-ŋ?

¹⁸ Monika wɛ Jeyɔɔrjii ɛjaɖɛ taa. Ɛñaɣ pana kpem se eyele kʋzɔɔtʋ tɔm yɔɔdʋʋ nɛ aleɣya kɩdɛkɛda nɛ pɩsa nɛ ɛɖɛɛnɩ ɛsɩndaa nɛ pamɩyɩsɩ-ɩ lɩm. Ɛyɔɔdaa se: «Pʋcɔ nɛ pamɩyɩsɩ-m lɩm lɛ, adɩma kaasɩnɩnɩ-m nɛ mɛlɛɣzɩ me-wezuu caɣʋ. Yehowa kaanawa se mɔnsɔɔlaa se mala mbʋ pɩwɛ ɖeu yɔ nɛ ɛsɩɣaɣnɩ-m paa ɛzɩmtaa nɛ eɖiyiɣ-m.» Pamɩyɩsɩ Monika lɩm alɩwaatʋ ndʋ ɛɛwɛnɩ pɩnzɩ 16 yɔ. Ŋsɔɔlaa se ŋyele labʋ lakasɩ nasɩyɩ nɛ pɩsa nɛ ŋsɛɛ Yehowa ɛzɩ pɩpɔzʋʋ yɔ? Wolo pɩ-yɔɔ nɛ ŋpɔzʋʋ-ɩ se ɛha-ŋ ɖoŋ nɛ ŋpɩzɩ ŋlɛɣzɩ. Yehowa haɣ e-fezuu kiɖeɖeu faaa.—Yoh. 3:34.

ÑE-TISUU PƖZƖƔ NƐ PƖKPƐZƖ PƲŊ

19. Ɛbɛ pɩzɩɣ pɩsɩnɩ-ŋ nɛ ŋwa kala wena anɩɣzɩnɩ pʋŋ yɔ? (Cɔnɩ ɖɔɖɔ kɩlɛmʋʋ.)

¹⁹ Ña-taa pɩzɩɣ nɛ pɩtɛ se Yehowa sɔɔlɩ-ŋ nɛ ɛsɔɔlaa se ŋsʋʋ ɛ-hɔʋ taa paa ɛbɛ ɛtɩɩɖɩkɩ-ŋ nʋmɔʋ se pataamɩyɩsɩ-ŋ lɩm yɔ. Kajalaɣ pɩnzɩ mɩnʋʋ taa, Yesu heyi ɛ-tɔmkpɛlɩkɩyaa nabɛyɛ se: «Ye mi-tisuu ɛpaɣlaa nɛ pɩtalɩ piye cikpeɖe yɔ, ɩkaɣ heyuu pʋʋ kʋnɛ se: “Kpɛzɩ cɩnɛ nɛ ŋkɛɛ peeɖe yɔ,” nɛ kɩkaɣ kpɛzʋʋ, nɛ nabʋyʋ fɛyɩ se ɩɩkaɣ pɩzʋʋ nɛ ɩlabɩ-pʋ.» (Mat. 17:20) Mba paawɛ peeɖe nɛ panɩɩ tɔm ndʋ yɔ, pɩnzɩ nasɩyɩ pazɩ yem pa nɛ Yesu pacaɣaa, nɛ pʋyɔɔ lɛ, pɩpɔzaa se pe-tisuu ɛwɛɛ paɣlʋʋ yɔɔ. Ɛlɛ Yesu yeba nɛ pa-taa tɛ se ye peyeba nɛ pe-tisuu paɣlɩ yɔ, Yehowa kaɣ-wɛ sɩnʋʋ nɛ pawa kala wena anɩɣzɩnɩ pʋŋ yɔ. Yehowa kaɣ ña ɖɔɖɔ sɩnʋʋ nɛ ŋla mbʋ.

20. Kajalaɣ pɩnzɩ mɩnʋʋ taa nɛ ɖa-alɩwaatʋ taa Krɩstʋ ñɩma mba ɖɩyɔɔdɩ pɔ-tɔm tɔm ñʋʋ kʋnɛ kɩ-taa yɔ, ɛbɛ pa-kɩɖaŋ seɣti-ŋ se ŋla?

²⁰ Ye ŋsɩm kala wena aɖɩkɩ-ŋ nʋmɔʋ se pataamɩyɩsɩ-ŋ lɩm yɔ, la mbʋ pɩpɔzʋʋ yɔ kpɛdɛyɛ nɛ ŋwabɩ-yɛ. Yele nɛ kajalaɣ pɩnzɩ mɩnʋʋ taa nɛ ɖa-alɩwaatʋ taa Krɩstʋ mba kɩɖaŋ hɛzɩ ña-laŋɩyɛ nɛ ɩkpazɩ-ŋ ɖoŋ. Tɛtɛ nɛ pa-kɩɖaŋ sɩnɩ-ŋ nɛ iseɣti-ŋ nɛ ŋha ña-tɩ Yehowa nɛ pamɩyɩsɩ-ŋ lɩm. Lɩmaɣza wena payɩ ŋpɩzɩɣ nɛ ŋkpaɣ yɔ a-taa lɛ, nɖɩ kpaɖɩnɩ ɖeu.