Pamɩyɩsɩɣ-ŋ lɩm nɛ pɩtɛ lɛ, wɛɛ nɛ ŋtɩŋɩɣ Yesu wayɩ

1-2. Pamɩyɩsɩɣ nɔɔyʋ lɩm nɛ pɩtɛ lɛ, wazasɩ nzɩ ehikiɣ?

ÐA-TAA kaalabɩ leleŋ alɩwaatʋ ndʋ pamɩyɩsɩ-ɖʋ lɩm nɛ ɖɩsʋʋ Yehowa hɔʋ taa yɔ. Pɩkɛnɩ-ɖʋ hɩɖɛ ɖʋʋ se taabalɩyɛ kɩbanɖɛ wɛ ɖa nɛ Yehowa ɖɛ-hɛkʋ taa. Nɛ ɖitisiɣ keɣa maɖʋ tɔm tʋnɛ tɩ-yɔɔ: «Koboyaɣ tʋ lɛ ɛyʋ weyi [ña Yehowa] ŋlɩzɩɣ-ɩ nɛ ŋkɔnɩ-ɩ se ɛwɛɛ ña-kadaɣ taa yɔ.»—Keɣ. 65:4.

² Yehowa ɛɛhaɣ paa anɩ waɖɛ se ɛsʋʋ ɛ-kadaɣ taa. Ɛzɩ ɖɩnaʋ tɔm ñʋʋ ŋgʋ kɩɖɛwa yɔ kɩ-taa yɔ, ɛñɔtʋʋnɩ mba pawɩlɩɣ se pɔsɔɔlaa se taabalɩyɛ kɩbanɖɛ ɛwɛɛ ɛ nɛ wɛ pɛ-hɛkʋ taa yɔ. (Yak. 4:8) Alɩwaatʋ ndʋ ŋha ña-tɩ Yehowa nɛ pamɩyɩsɩ-ŋ lɩm yɔ, mɩ-taabalɩyɛ pɩsɩ ŋgee pʋyʋ. Ña-taa pɩzɩɣ nɛ pɩtɛ se ña-lɩm mɩyɩsʋʋ wayɩ, Yehowa kaɣ pɩyʋʋ ñɔ-yɔɔ «wazaɣ pɩkɔɔ pɩsɩɩnɩ alɩwaatʋ ndʋ nabʋyʋ [ɛɛtasɩɣ-ŋ] tɛɖʋʋ yɔ.»—Mal. 3:10; Yer. 17:​7, 8.

3. Sʋʋtʋ ndʋ Krɩstʋ ñɩma mba paha pa-tɩ nɛ pamɩyɩsɩ-wɛ lɩm yɔ pɛwɛna? (Eklezɩyasɩtɩ 5:​4, 5)

³ Lɩm mɩyɩsʋʋ kɛnɩ ñɛ-Ɛsɔ sɛtʋ ɖɩbazɩyɛ. Ŋkpɛzɩɣ nɩŋgbaŋaɣ ŋga nɛ pɩtɛ lɛ, ŋkaɣ sɔɔlʋʋ se ŋla mbʋ payɩ ŋpɩzɩɣ yɔ nɛ ŋcaɣ wezuu nɛ pɩla nɔɔ kʋɖʋmaɣ nɛ ɖuutu ndʋ ŋɖuwaa yɔ, pɩkpɛndɩnɩ alɩwaatʋ ndʋ pɩtakɩɣ ñe-tisuu yɔ. (Kalɩ Eklezɩyasɩtɩ 5:​4, 5.) Ŋpɩsɩ Yesu tɔmkpɛlɩkɩyʋ, pʋyɔɔ lɛ ŋkaɣ labʋ mbʋ payɩ ŋpɩzɩɣ yɔ nɛ ŋmaɣzɩnɩ Yesu nɛ ŋɖɔ ɛ-paɣtʋ yɔɔ. (Mat. 28:​19, 20; 1 Pɩy. 2:21) Tɔm ñʋʋ kʋnɛ kɩkaɣ-ŋ sɩnʋʋ nɛ ŋla mbʋ.

WƐƐ YESU «WAYƖ TƖŊƲƲ YƆƆ» PAA ŊKATƖƔ KALA NƐ TAKƖM YƆ

4. Ye pɔtɔm se Yesu tɔmkpɛlɩkɩyʋ ɛkpaɣ «ɛ-nazɩm sizika» yɔ, pʋ-tɔbʋʋ lɛ suwe? (Luka 9:23)

⁴ Taamaɣzɩ se pamɩyɩsɩɣ-ŋ lɩm nɛ pɩtɛ lɛ, ŋŋkaɣ katʋʋ kala ñe-wezuu caɣʋ taa. Halɩ Yesu lɩzɩ pɩ-taa kpayɩ kpayɩ se ɛ-tɔmkpɛlɩkɩyaa taa paa weyi kaɣ kpaɣʋ «ɛ-nazɩm sizika.» Toovenim taa lɛ, pakaɣ labʋ mbʋ «paa kɩyakʋ ŋgʋ.» (Kalɩ Luka 9:23.) Ɛzɩ Yesu tɔm ndʋ tɩwɩlɩɣ se ɛ-wayɩ tɩŋɩyaa kaɣ wɛʋ nɛ palakɩ kʋñɔŋ paa ɛzɩmtaa? Aayɩ. Ɛlɛ tɩwɩlɩɣ se pɩtasɩnɩ wazasɩ nzɩ pakaɣ hiɣu yɔ lɛ, pakaɣ katʋʋ kʋñɔmɩŋ. Halɩ kʋñɔmɩŋ ɛnɩ ɩ-taa nɩɩyɩ pɩzɩɣ iyele nɛ panɩɩ siziŋ siŋŋ.—2 Tim. 3:12.

5. Tamaɣ ŋga Yesu labɩ mba palaɣ kɩlaŋ yɔ?

⁵ Pɩtɩla, ñɔ-hɔʋ taa mba tɛmɩ-ŋ kaɖɩnʋʋ nɛ pɩɖɛɛ yaa pɩtɩla yɔ ŋha siɣye tomnaɣ yɔɔ wondu natʋyʋ se pɩsa nɛ ŋsɩɩ Kewiyaɣ wondu kajalaɣ ɖeɖe. (Mat. 6:33) Ye mbʋ yɔ, ña-taa pɩzɩɣ nɛ pɩtɛ se Yehowa na mbʋ payɩ ŋlaba yɔ. (Ebr. 6:10) Pɩtʋʋ fɛyɩ se ŋɖiɣzinaa se Yesu tɔm tʋnɛ tɩkɛ toovenim. Ɛtɔm se: «Weyi eyeki ɖɩɣa yaa ɖalaa yaa newaa yaa kɔɔnaa yaa ɖoo yaa caa yaa piya yaa hayɩm mɔ-yɔɔ nɛ tɔm kɩbandʋ yɔɔ yɔ, ɛkaɣ hiɣu mbʋ eeyeba yɔ tam 100 alɩwaatʋ tʋnɛ tɩ-taa: ɖɩsɩ, ɖalaa, newaa, kɔɔnaa, ɖoonaa, piya nɛ hayɩm, nɛ pɩtasɩnɩ nazɩm, nɛ wezuu maatɛŋ ɛjaɖɛ nɖɩ ɖɩkaɣ kɔm yɔ ɖɩ-taa.» (Mark. 10:​29, 30) Wazasɩ nzɩ ŋhiɣaa yɔ, toovenim taa lɛ sɩɖɔwa nɛ pɩcɛzɩ kɩlaŋ weyi payɩ ŋlawa yɔ.—Keɣ. 37:4.

6. Pamɩyɩsɩɣ-ŋ lɩm nɛ pɩtɛ lɛ, ɛbɛ yɔɔ pɩkaɣ pɔzʋʋ se ŋwolo pɩ-yɔɔ nɛ ŋlʋkɩnɩ «tomnaɣ sɔɔlɩm»?

⁶ Ña-lɩm mɩyɩsʋʋ wayɩ, pɩkaɣ pɔzʋʋ se ŋwolo pɩ-yɔɔ nɛ ŋlʋkɩnɩ «tomnaɣ sɔɔlɩm.» (1 Yoh. 2:16) Mbʋ pʋyɔɔ yɔ ŋkɛ ɛyʋ mantɩtalɩ pilim mbʋ. Pɩtɩla nabʋyʋ taa, pɩlakɩ-ŋ ɛzɩ pɩɩlabʋ apostoloo Pɔɔlɩ yɔ. Ɛmawa se: «Man-taa lakɩ leleŋ siŋŋ nɛ Ɛsɔ paɣtʋ ma-laŋɩyɛ taa, ɛlɛ manaɣ mon-tomnaɣ taa paɣtʋ lɛɛtʋ nɛ tiyouni ma-maɣzɩm paɣtʋ nɛ tiwokini-m kɩwɛɛkɩm paɣtʋ ndʋ tɩwɛ mon-tomnaɣ taa yɔ ti-yomiye taa.» (Roma 7:​22, 23) Pɩtɩla pitiki-ŋ yɔɔɔ, mbʋ pʋyɔɔ yɔ ŋwɛɛ nɛ ŋlʋkɩnɩ kɔɖɛyɩ kɩdɛkɛdʋʋ nakʋyʋ. Ɛlɛ ye ŋmaɣzɩɣ ɖuutu ndʋ ŋɖuu Yehowa ɛsɩndaa alɩwaatʋ ndʋ ŋha-ɩ ña-tɩ yɔ tɩ-yɔɔ yɔ, pɩkaɣ-ŋ kpazʋʋ ɖoŋ nɛ ŋtɛ ña-taa se ŋlʋkɩnɩ takɩm. Toovenim taa lɛ, ɖuutu ndʋ ŋɖuwaa yɔ, tɩkaɣ-ŋ sɩnʋʋ alɩwaatʋ ndʋ pɩtakɩɣ-ŋ yɔ. Ɛzɩma tɩyɛ?

7. Ye ŋha ña-tɩ Yehowa yɔ, ɛzɩma pɩkaɣ-ŋ sɩnʋʋ nɛ ŋɖɔkɩ ñe-siɣsiɣ wɛtʋ ɛ-ɛsɩndaa?

⁷ Alɩwaatʋ ndʋ ŋhaɣ ña-tɩ Yehowa yɔ, ŋkiziɣ ña-tɩ. Pʋ-tɔbʋʋ lɛ se ŋkiziɣ ñɔ-sɔɔlɩm nɛ ña-kaɖʋsɩ nzɩ sɩɩkɛdɩɣnɩ Yehowa yɔ. (Mat. 16:24) Piyeki nɛ alɩwaatʋ ndʋ ŋkatɩɣ takɩm yɔ, ŋŋkɩlɩɣ maɣzʋʋ se ŋna se ɛbɛ pɩwɛɛ se ŋla, mbʋ pʋyɔɔ yɔ ŋtɛm sɩm mbʋ ŋkaɣ labʋ yɔ; mbʋ lɛ se ŋkaɣ ɖɔkʋʋ ñe-siɣsiɣ wɛtʋ Yehowa ɛsɩndaa. Ŋkaɣ tɛm ña-taa kpem se ŋyeki nɛ ñɔ-tɔm kɛdɩnɩ Yehowa. Piyeki nɛ ŋnɩɣzɩnɩ Yɔɔb. Paa Yɔɔb kaakatɩ tɩlasɩ sɔsɔsɩ yɔ, ɛyɔɔdaa se: «Maakaɣ yebu man-cɩŋgɩlɩm wɛtʋ.»—Yɔɔb 27:5.

8. Ye ŋmaɣzɩɣ adɩma wena ŋlaba nɛ ŋha ña-tɩ Yehowa yɔ a-yɔɔ yɔ, ɛzɩma pɩpɩzɩɣ pɩsɩnɩ-ŋ nɛ ŋlʋbɩnɩ takɩm?

⁸ Ye ŋmaɣzɩɣ adɩma wena ŋlaba nɛ ŋkpaɣ ña-tɩ nɛ ŋha Yehowa yɔ a-yɔɔ yɔ, ŋkaɣ wɛnʋʋ ɖoŋ nɛ ŋkaɖɩnɩ paa takɩm mbʋ. Kɩɖaʋ nakʋyʋ yɔ: Ŋŋkaɣ cɛbɛlɩnʋʋ ɛyʋ weyi ɛtɛm nesi ɖɔkʋʋ yɔ kpa, mbʋ pʋyɔɔ yɔ ŋtɛm ɖuunuu Yehowa se ŋŋkaɣ labʋ mbʋ. Ye ŋŋcɛbɛlɩɣnɩ weyi ɛtɛm nesi ɖɔkʋʋ yɔ yɔ, ŋkaɣ fɛʋ siziŋ weyi ɛyʋ nɩɣ alɩwaatʋ ndʋ ɛlʋkɩnɩ kɔɖɛyɩ kɩdɛkɛdʋʋ ŋgʋ kɩtɛm kam lila ɛ-taa yɔ. Ŋkaɣ haʋ «siɣye . . . kañatʋ tɩnaa nʋmɔʋ.»—Adu. 4:​14, 15.

9. Ye ŋmaɣzɩɣ adɩma wena ŋlaba nɛ ŋha ña-tɩ Yehowa yɔ a-yɔɔ yɔ, ɛzɩma pɩpɩzɩɣ pɩsɩnɩ-ŋ nɛ ŋwolo pɩ-yɔɔ nɛ ŋsɩɣ fezuu taa tʋma kajalaɣ ɖeɖe?

⁹ Ɛbɛ ŋkaɣ labʋ ye ŋhiɣ tʋmɩyɛ naɖɩyɛ ɛlɛ ɖɩɩhaɣ-ŋ alɩwaatʋ se ŋwoki kediɣzisi ɖoŋ ɖoŋ? Ŋtɛm sɩm mbʋ pɩwɛɛ se ŋla yɔ. Mbʋ pʋyɔɔ yɔ pʋcɔ nɛ ŋhikiɣ tʋmɩyɛ nɖɩ lɛ, ŋŋtɛm kpaɣʋ lɩmaɣzɩyɛ se ŋŋtisiɣ nɛ ŋla tʋmɩyɛ nɖɩ ɖɩɖɩkɩ-ŋ nʋmɔʋ se ŋtaawolo kediɣzisi yɔ. Ye mbʋ, ŋŋkaɣ tɔm se ŋtisiɣ nɛ ŋla tʋmɩyɛ nɖɩ nɛ pʋwayɩ lɛ, ŋñɩnɩ nʋmɔŋ weyi ɩ-yɔɔ ŋpɩzɩɣ ŋtɩŋna nɛ ŋsɩɩ Yehowa sɛtʋ kajalaɣ lone taa yɔ. Ye ŋmaɣzɩ Yesu kɩɖaʋ yɔɔ yɔ, pɩkaɣ-ŋ sɩnʋʋ. Ɛɛtɛm ɛ-taa se eyeki nɛ ɛ-tɔm kɛdɩnɩ ɛ-Caa. Ɛzɩ Yesu yɔ, pɩwɛɛ se ŋtɛ ña-taa se ŋkiziɣ mbʋ payɩ pɩɩkɛdɩɣnɩ Ɛsɔ weyi ŋkpaɣ ña-tɩ nɛ ŋha yɔ.—Mat. 4:10; Yoh. 8:29.

10. Ɛzɩma Yehowa kaɣ-ŋ sɩnʋʋ nɛ ŋwɛɛ Yesu wayɩ tɩŋʋʋ yɔɔ ña-lɩm mɩyɩsʋʋ wayɩ?

¹⁰ Toovenim taa lɛ, takɩm mbʋ ŋkatɩɣ yɔ, pɩhaɣ-ŋ waɖɛ se ŋwɩlɩ se ŋtɛm ña-taa se ŋwɛɣ Yesu «wayɩ tɩŋʋʋ yɔɔ.» Ye ŋlabɩ mbʋ yɔ, ña-taa pɩzɩɣ nɛ pɩtɛ se Yehowa kaɣ-ŋ sɩnʋʋ. Bibl yɔɔdʋʋ se: «Ɛsɔ wɛ siɣsiɣ, nɛ ɛɛkaɣ yebu se pɩtakɩ-mɩ nɛ pɩcɛzɩ mbʋ ɩpɩzɩɣ nɛ ɩkaɖɩna yɔ, ɛlɛ alɩwaatʋ ndʋ takɩm kɔŋ yɔ, ɛkaɣ-mɩ wɩlʋʋ nʋmɔʋ ŋgʋ kɩ-yɔɔ pɩwɛɛ se ɩtɩŋna yɔ nɛ ɩpɩzɩ nɛ ɩɖɔkɩ mɩ-laŋɩyɛ pɩ-taa.»—1 Kɔr. 10:13.

ƐBƐ ŊPƖZƖƔ ŊLA NƐ ŊWƐƐ YESU WAYƖ TƖŊƲƲ YƆƆ?

11. Nʋmɔʋ kɩbaŋʋ ŋgʋ yɔɔ ŋpɩzɩɣ ŋtɩŋna nɛ ŋwolo pɩ-yɔɔ nɛ ŋtɩŋɩɣ Yesu wayɩ? (Cɔnɩ ɖɔɖɔ kɩlɛmʋʋ.)

¹¹ Yesu kaawɛ kpekpeka, nɛ ɛɛtɩŋnɩ adɩma yɔɔ nɛ ɛñɔtɩnɩ Yehowa. (Luka 6:12) Ña ɖɔɖɔ pamɩyɩsɩɣ-ŋ lɩm nɛ pɩtɛ lɛ, mbʋ pɩwɛɛ se ŋla nɛ ŋwɛɛ Yesu wayɩ tɩŋʋʋ yɔɔ yɔ pɩ-taa nabʋyʋ yɔ: mbʋ pɩsɩɣnɩ-ŋ se ŋñɔtɩnɩ Yehowa yɔ, wolo pɩ-yɔɔ nɛ ŋlabɩ-pʋ nɛ pɩkɩlɩ. Bibl yɔɔdʋʋ se: «Paa ɖitiiwobini ɛsɩndaa ɛzɩma yɔ, iyele nɛ ɖiwolo pɩ-yɔɔ nɛ ɖɩɖɔ ɖɔnɛ nɖɩ ɖɩtʋʋzaa yɔ nʋmɔʋ kʋɖʋmʋʋ ŋgʋ kɩ-taa.» (Filp. 3:16) Ðoŋ ɖoŋ lɛ, ŋkaɣ nɩʋ koobiya nabɛyɛ tɔm se pakpaɣ lɩmaɣzɩyɛ se pawalɩsɩɣ pɛ-Ɛsɔ sɛtʋ tʋmɩyɛ. Pɩtɩla yɔ powobi Kewiyaɣ tɔm susuyaa sukuli yaa powobi ɖenɖe pɩpɔzʋʋ tɔm susuyaa nɛ pɩkɩlɩ yɔ. Ye ñɛ-wɛtʋ ɛhaɣ-ŋ nʋmɔʋ yɔ, ŋpɩzɩɣ nɛ ŋɖʋ ña-tɩ kaɖʋsɩ nzɩ. Yehowa sɛyaa ñɩnɩɣ nʋmɔŋ ndɩ ndɩ se patɩŋnɩ ɩ-yɔɔ nɛ pawalɩsɩ pɛ-Ɛsɔ sɛtʋ tʋmɩyɛ. (Tʋma 16:9) Ɛlɛ, ye ñɛ-wɛtʋ ɛɛhaɣ-ŋ nʋmɔʋ se ŋɖʋ ña-tɩ kaɖʋsɩ nzɩ lɛɛlɛɛyɔ yɔ, ɛbɛ pɩwɛɛ se ŋla? Taamaɣzɩ se mba papɩzɩɣ nɛ paɖʋ pa-tɩ kaɖʋsɩ nzɩ yɔ pakɩlɩ-ŋ. Mbʋ pɩ-tɔm kɩlɩ cɛyʋʋ yɔ lɛ se ŋwolo pɩ-yɔɔ nɛ ŋɖɔkɩ ña-laŋɩyɛ. (Mat. 10:22) Taasɔɔ se ye ŋlakɩ mbʋ ñɛ-wɛtʋ haɣ-ŋ nʋmɔʋ se ŋla yɔ, Yehowa taa kaɣ labʋ leleŋ siŋŋ. Pɩkɛ nʋmɔʋ kɩbaŋʋ ŋgʋ kɩ-yɔɔ ŋpɩzɩɣ ŋtɩŋna nɛ ŋwolo pɩ-yɔɔ nɛ ŋtɩŋɩɣ Yesu wayɩ ña-lɩm mɩyɩsʋʋ wayɩ yɔ.—Keɣ. 26:1.

12-13. Ye kpekpeka ŋga ŋŋwɛna yɔ kapaɣzɩ pasʋʋ yɔ, ɛbɛ ŋpɩzɩɣ nɛ ŋla? (1 Kɔrɛntɩ mba 9:​16, 17) (Kalɩ ɖɔɖɔ aɖakaɣ «Wɛɛ seya yɔɔ.»)

¹² Ye ŋɖiɣzinaa se adɩma wena ŋlakɩ yɔ aalɩɣnɩ ña-laŋɩyɛ taa yaa ŋŋhikiɣ taa leleŋ ñɔ-tɔm susuu taa ɛzɩ ɖooo lɛ yɔ, ɛbɛ pɩwɛɛ se ŋla? Yaa ye ŋŋhikiɣ taa leleŋ ñe-Bibl kalʋʋ taa ɛzɩ ɖooo lɛ yɔ, ɛbɛ pɩwɛɛ se ŋla? Ye ŋkatɩɣ wɛtʋ ndʋ ña-lɩm mɩyɩsʋʋ wayɩ yɔ, taamaɣzɩ se ŋtɩtasɩ wɛnʋʋ Yehowa fezuu kiɖeɖeu. Ðɩtɩtalɩ pilim, nɛ pʋyɔɔ lɛ nabʋyʋ taa kpekpeka ŋga ɖɩɩwɛna yɔ kapɩzɩɣ nɛ kapasɩ. Ye kpekpeka ŋga ŋŋwɛna yɔ kɛwɛɛ nɛ kapasɩɣ yɔ, maɣzɩ apostoloo Pɔɔlɩ kɩɖaʋ yɔɔ. Ɛɛñaɣ pana se ɛmaɣzɩnɩ Yesu, paa mbʋ yɔ ɛɛnawa se nabʋyʋ taa, pɩɩkaɣ-ɩ seɣtuu se ɛla mbʋ ɛsɔɔlaa yɔ. (Kalɩ 1 Kɔrɛntɩ mba 9:​16, 17.) Ɛyɔɔdaa se: «Paa maalakɩ mbʋ nɛ laŋɩyɛ faaa yɔ, pɩkpɛndɩ pɩkɛ ɖɩɣa yɔɔ cɔnʋʋ tʋmɩyɛ nɖɩ paɖʋzɩ me-nesi tɛɛ yɔ.» Tobi lɛ, Pɔɔlɩ kaatɛm ɛ-taa se ɛlakɩ ɛ-tɔm susuu tʋmɩyɛ paa piiseɣtiɣ-i se ɛla mbʋ yɔ.

¹³ Ɛzɩ Pɔɔlɩ yɔ, taayele nɛ ña-mantɩtalɩ pilim wɛtʋ wɛɛnɩ ɖoŋ lɩmaɣza wena ŋkpakɩɣ yɔ a-yɔɔ. Tɛ ña-taa se ŋkaɣ labʋ mbʋ pɩwɛ ɖeu yɔ paa piiseɣtiɣ-ŋ se ŋla mbʋ yɔ. Ye ŋwobi pɩ-yɔɔ nɛ ŋlakɩ mbʋ pɩwɛ ɖeu yɔ, alɩwaatʋ kaaɖɛɣ lɛ, ŋkaɣ ɖaɣnʋʋ wɛʋ kpekpeka. Paa pɩtɩɩkɛ suwe yɔ, ye ŋlakɩ fezuu taa tʋma ɖoŋ ɖoŋ ɛzɩ ña-tɩ yɔɔ kpɛlɩkʋʋ, adɩma, kediɣzisi wobu nɛ tɔm susuu mbʋ yɔ yɔ, pɩkaɣ-ŋ sɩnʋʋ nɛ ŋwɛɛ Yesu wayɩ tɩŋʋʋ yɔɔ ña-lɩm mɩyɩsʋʋ wayɩ. Ño-koobiya naɣ ɛzɩma ŋɖɔkɩ ña-laŋɩyɛ kpam Yehowa sɛtʋ taa yɔ lɛ, pɩkaɣ-wɛ kpazʋʋ ɖoŋ.—1 Tes. 5:11.

‘ƖWƐƐ NƐ ƖTAKƖƔ MƖ-TƖ . . . ƖWƐƐ NƐ IWILIƔ MƖ-TƖ’

14. Ɛbɛ taa pɩpɔzʋʋ se ŋtazɩɣ ɖoŋ ɖoŋ, nɛ ɛbɛ yɔɔ? (2 Kɔrɛntɩ mba 13:5)

¹⁴ Pamɩyɩsɩɣ-ŋ lɩm nɛ pɩtɛ lɛ, pɩcɛyaa se ŋtazɩɣ ña-taa ɖoŋ ɖoŋ. (Kalɩ 2 Kɔrɛntɩ mba 13:5.) Tazɩɣ ñe-wezuu caɣʋ nɛ ña-lakasɩ taa ɖoŋ ɖoŋ nɛ ŋna se ŋtɩmɩɣ paa kɩyakʋ ŋgʋ, ŋkalɩɣ Bibl nɛ ŋkpɛlɩkɩɣ-kʋ, ŋwoki kediɣzisi nɛ ŋsusuu tɔm na. Ñaɣ pana nɛ ŋna mbʋ ŋpɩzɩɣ ŋla nɛ fezuu taa tʋma ana aha-ŋ taa leleŋ nɛ awazɩ-ŋ nɛ pɩkɩlɩ yɔ. Ŋpɩzɩɣ nɛ ŋpɔzɩ ña-tɩ se: «Manpɩzɩɣ nɛ malɩzɩ nɔɔyʋ Bibl taa kajalaɣ wɩlɩtʋ taa? Nʋmɔŋ weyi yɔɔ manpɩzɩɣ nɛ mantɩŋna nɛ mehiɣ taa leleŋ mɔn-tɔm susuu taa nɛ pɩkɩlɩ? Mɔnpɔzʋʋ nabʋyʋ ɖeyi ɖeyi ma-adɩma taa? Nɛ awɩlɩɣ se mantaɣ Yehowa liu kiya? Mowoki kediɣzisi ɖoŋ ɖoŋ? Ɛbɛ manpɩzɩɣ mala nɛ ma-lɩmaɣza ɩtaayɛlɩ kediɣzisi alɩwaatʋ taa? Ɛbɛ pɩzɩɣ pɩsɩnɩ-m nɛ moncosi tɔm sɩ-taa nɛ pɩkɩlɩ?»

15-16. Koobu weyi ɛlʋbɩnɩ takɩm yɔ, ɛbɛ ɛ-kɩɖaʋ kpɛlɩkɩɣ-ŋ?

¹⁵ Pɩcɛyaa ɖɔɖɔ se ŋtɩlɩ ñɛ-ɛjandʋ. Payaɣ koobu abalɩñɩnʋ nɔɔyʋ se Robert. Ɛkɛdaa se: «Maañɔtɩnɩ pɩnzɩ 20 lɛ, malakaɣ tʋmɩyɛ naɖɩyɛ ɛlɛ mantaalakɩ-ɖɩ paa ɖooye. Kɩyakʋ nakʋyʋ tʋmɩyɛ tɛma lɛ, man-tʋmɩyɛ taa halʋ nɔɔyʋ ya-m se mowolo ɛ-tɛ. Eheyi-m se ɖɩkaɣ wɛʋ ɖe-ɖeke nɛ ‘ɖɩnɩɩ leleŋ.’ Kiɖe tɛɛ lɛ, menkizaa ɛlɛ mantaatɛ man-taa, ɛlɛ pʋwayɩ lɛ meheyi-i kpayɩ se aayɩ nɛ meheyi-i ɖɔɖɔ mbʋ pʋyɔɔ menkizaa yɔ.» Robert ɖɔkɩ ɛ-tɩ takɩm mbʋ pɩ-taa, nɛ ɛmʋnɩ samtʋ. Ɛlɛ pʋwayɩ, ɛmaɣzɩ mbʋ pɩlaba yɔ pɩ-yɔɔ lɛ, eɖiɣzina se ɛpɩzaɣ se ɛla nɛ pɩwɛɛ ɖeu nɛ pɩkɩlɩ. Ɛyɔɔdaa se: «Mantaatɛ man-taa nɛ menkizi kpayɩ yaa menkizi lɛɛ lɛɛ ɛzɩ Yosɛɛfʋ kaakizinuu Potifaarɩ halʋ yɔ. (Kiɖe 39:​7-9) Halɩ pɩɩɖɩɣzɩ-m se pɩlabɩ-m kaɖɛ se menkizi. Mbʋ pɩɩtalɩ-m yɔ, pɩsɩnɩ-m nɛ menɖiɣzina se pɩcɛyaa se mɛncɛyɩsɩ taabalɩyɛ nɖɩ ɖɩwɛ ma nɛ Yehowa ɖɛ-hɛkʋ taa yɔ.»

¹⁶ Ye ŋtazɩɣ ña-taa ɛzɩ Robert labʋ yɔ, pɩpɩzɩɣ nɛ pɩwazɩ-ŋ. Paa ŋpɩzaa nɛ ŋlʋbɩnɩ takɩm nabʋyʋ yɔ, pɔzɩ ña-tɩ se: «Alɩwaatʋ ɛzɩma pɩkpaɣ-m pʋcɔ nɛ mɔntɔ se aayɩ?» Ye ŋɖiɣzinaa se pɩwɛɛ se ŋñɔɔzɩ hɔɔlʋʋ nakʋyʋ yɔ, pitaatibi-ŋ yɔɔɔ. Ña-taa ɛla leleŋ se lɛɛlɛɛyɔ ŋsɩm ñɛ-ɛjandʋ. Tɩmnɩ Yehowa ñɛ-ɛjandʋ ndʋ tɩ-yɔɔ, nɛ ŋla mbʋ pɩpɩzɩɣ pɩsɩnɩ-ŋ nɛ ŋtɛ ña-taa se ŋñaŋɩ-ɩ yɔ.—Keɣ. 139:​23, 24.

17. Mbʋ pɩtalɩ Robert yɔ, ɛzɩma pitukuni Yehowa hɩɖɛ?

¹⁷ Ðɩpɩzɩɣ nɛ ɖɩkpɛlɩkɩ lɔŋ lɛɛŋ mbʋ pɩtalɩ Robert yɔ pɩ-taa. Ɛtasɩ yɔɔdʋʋ se: «Menkizaa se maawoki halʋ ɛnʋ ɛ-tɛ lɛ, eheyi-m se: ‘Santaɖaʋ ŋgʋ manɖʋ-ŋ yɔ ŋhiɣ-kʋ.’ Peeɖe mɔnpɔzɩ-ɩ se suwe ɛcaɣ yɔɔdʋʋ. Nɛ ecosi se ɛ-taabalʋ nɔɔyʋ kaakɛ Yehowa Aseɣɖe Tʋ nɛ pɩɖɛɛ, ɛlɛ heyini-i se piya evelisi nzɩ sɩkɛ Aseɣɖe Tɩnaa yɔ, sɩ-tɩŋa sɩcakɩ wezuu kɩdɛkɛdʋʋ mɛsaɣ tɛɛ ye sihiɣ waɖɛ yɔ. Peeɖe eheyi ɛ-taabalʋ ɛnʋ se ɛtakɩɣ-m nɛ ɛna. Man-taa kaalabɩ leleŋ kpem se mantipisi Yehowa hɩɖɛ.»

18. Ɛbɛ ŋtɛm ña-taa se ŋlakɩ ña-lɩm mɩyɩsʋʋ wayɩ? (Kalɩ ɖɔɖɔ aɖakaɣ «Tɔm ñʋŋ weyi ɩkaɣ-ŋ kɛdɩnʋʋ yɔ.»)

¹⁸ Alɩwaatʋ ndʋ ŋha ña-tɩ Yehowa nɛ pamɩyɩsɩ-ŋ lɩm yɔ, ŋwɩlaa se paa ɛbɛ ɛtɩɩlakɩ yɔ ŋyeki nɛ ɛ-hɩɖɛ yɔɔ ñalɩ. Nɛ ña-taa pɩzɩɣ nɛ pɩtɛ se Yehowa sɩm kala wena ŋkatɩɣ yɔ nɛ takɩm mbʋ ŋwɛɛ nɛ ŋlʋkɩna yɔ. Ɛkaɣ-ŋ wazʋʋ pana wena ŋwɛɛ nɛ ŋñakɩ se ŋɖɔkɩ ñe-siɣsiɣ wɛtʋ ɛ-ɛsɩndaa yɔ a-yɔɔ. Ña-taa ɛtɛ se ɛkaɣ tɩŋnʋʋ e-fezuu kiɖeɖeu yɔɔ nɛ ɛha-ŋ ɖoŋ weyi pɩpɔzʋʋ yɔ nɛ ŋɖɔkɩ ñe-siɣsiɣ wɛtʋ. (Luka 11:​11-13) Yehowa kaɣ-ŋ sɩnʋʋ nɛ ŋwolo pɩ-yɔɔ nɛ ŋwɛɛ Yesu wayɩ tɩŋʋʋ yɔɔ ña-lɩm mɩyɩsʋʋ wayɩ.