Lɩm mɩyɩsʋʋ kɛ kaɖʋwa ŋga kɔ-tɔm cɛyaa yɔ!

Yesu wɩlaa se pɩpɔzʋʋ se pamɩyɩsɩ Krɩstʋ mba lɩm. (Kalɩ Maatiyee 28:19, 20.) Ɛlɛ ɛbɛ lɩm mɩyɩsʋʋ kɛnaa? Nɛ ɛbɛ pɩwɛɛ se ɛyʋ ɛla nɛ ɛtalɩ kaɖʋwa ŋga?

1. Ɛbɛ lɩm mɩyɩsʋʋ kɛnaa?

Grɛɛkɩ tɔm piye nɖɩ pɛɖɛzaa se «lɩm mɩyɩsʋʋ» yɔ, ɖɩ-tɔbʋʋ lɛ se «petisi nabʋyʋ lɩm tɛɛ.» Paamɩyɩsɩ Yesu lɩm lɛ, paatisi e-tomnaɣ kpeekpe lɩm tɛɛ nɛ pʋwayɩ lɛ, ‘ɛlɩɩnɩ lɩm tɛɛ.’ (Maarɩkɩ 1:9, 10) Mbʋ ɖɔɖɔ alɩwaatʋ ndʋ pamɩyɩsɩɣ toovenim Krɩstʋ mba lɩm yɔ, petisiɣ po-tomnasɩ kpeekpe lɩm tɛɛ.

2. Lɩm mɩyɩsʋʋ tɔbʋʋ lɛ suwe?

Pamɩyɩsɩɣ ɛyʋ lɩm lɛ, pɩwɩlɩɣ se ɛkpaɣ ɛ-tɩ nɛ ɛha Ɛsɔ Yehowa. Ɛbɛ ɛyʋ lakɩ nɛ ɛwɩlɩ se ɛha ɛ-tɩ Yehowa? Pʋcɔ nɛ pamɩyɩsɩ ɛyʋ lɩm lɛ, ɛlakɩ adɩma naayɛ nɛ eheyi Yehowa se ɛsɔɔlaa se ɛla Ɛsɔ sɔɔlɩm e-wezuu caɣʋ kpeekpe. Ɛlakɩ tamaɣ se ɛsɛɣ Yehowa ɖeke nɛ eheyi-i se e-wezuu caɣʋ taa lɛ, Ɛsɔ sɔɔlɩm labʋ tɔm kaɣnɩ cɛyʋʋ nɛ pɩkɩlɩ. Ɛkpakɩɣ lɩmaɣzɩyɛ se ‘ekiziɣ ɛ-tɩ nɛ ɛwɛɛ Yesu wayɩ tɩŋʋʋ yɔɔ;’ ɛlakɩnɩ tʋmɩyɛ Yesu wɩlɩtʋ nɛ ɛmaɣzɩɣnɩ ɛ-kɩɖaʋ. (Maatiyee 16:24) Ɛyʋ haɣ ɛ-tɩ Ɛsɔ nɛ pamɩyɩsɩ-ɩ lɩm lɛ, mbʋ haɣnɩ-ɩ waɖɛ se taabalɩyɛ kɩbanɖɛ ɛwɛɛ ɛ nɛ Yehowa nɛ Yehowa sɛyaa lalaa pɛ-hɛkʋ taa.

3. Ɛbɛ pɩpɔzʋʋ se ɛyʋ ɛla nɛ ɛtalɩ lɩm mɩyɩsʋʋ kaɖʋwa?

Pɩsa nɛ ŋñɔɔzɩ ña-tɩ nɛ pamɩyɩsɩ-ŋ lɩm lɛ, pɩpɔzʋʋ se ŋkpɛlɩkɩ Yehowa tɔm nɛ ŋwɛɛnɩ tisuu siŋŋ ɛ-yɔɔ. (Kalɩ Ebree mba 11:6.) Ŋkpɛlɩkɩɣ nɛ ŋɖɛɛnɩ ɛsɩndaa nɛ ñe-tisuu cɛyɩsɩ nɛ pɩkɩlɩ lɛ, ŋsɔɔlʋʋ ɖɔɖɔ Yehowa nɛ pɩkɩlɩ. Pɩtʋʋ fɛyɩ se ŋkaɣ sɔɔlʋʋ se ŋsusi Yehowa tɔm nɛ ŋcaɣ ɖɔɖɔ wezuu ŋgʋ kɩlakɩ nɔɔ kʋɖʋmaɣ nɛ ɛ-paɣtʋ yɔ. (2 Timootee 4:2; 1 Yohanɛɛsɩ 5:3) Ŋwɛɣnɩ «ɖɔnɛ nɖɩ ɖɩmʋnɩ Yehowa yɔ, se pɩsa nɛ [ñɔ-tɔm] kɛdɩnɩ-ɩ pɩtɩŋa pɩ-taa» lɛ, pɩtʋʋ fɛyɩ se pituyuu-ŋ se ŋha ña-tɩ Ɛsɔ nɛ pamɩyɩsɩ-ŋ lɩm.—Koloosi mba 1:9, 10.a

TAZƖ NƐ PILIMI

4. Mbʋ Yesu lɩm mɩyɩsʋʋ kpɛlɩkɩɣ-ɖʋ yɔ

Ɩkalɩ Maatiyee 3:13-17 nɛ ɩna Yesu lɩm mɩyɩsʋʋ yɔɔ tɔm lɛɛtʋ. Pʋwayɩ lɛ, ɩtazɩ tɔm tʋnɛ tɩ-taa:

• Yesu kaakɛ pɩɣa cɩɩɩ alɩwaatʋ ndʋ pamɩyɩsɩ-ɩ lɩm yɔ?

• Ɛzɩma pamɩyɩsɩ-ɩ lɩm? Pamɩzɩ ɛ-yɔɔ lɩm kɩmɩzʋ na?

Pamɩyɩsɩ Yesu lɩm lɛ, ɛpaɣzɩ labʋ ŋgee tʋmɩyɛ nɖɩ Ɛsɔ ɖʋ-ɩ se ɛla tɛtʋ yɔɔ yɔ. Ɩkalɩ Luka 3:21-23 nɛ Yohanɛɛsɩ 6:38, nɛ pʋwayɩ lɛ ɩtazɩ tɔm tʋnɛ tɩ-taa:

• Pamɩyɩsɩ Yesu lɩm nɛ pɩtɛ lɛ, tʋmɩyɛ nɖɩ ɛsɩ kajalaɣ lone taa e-wezuu caɣʋ taa?

5. Lɩm mɩyɩsʋʋ kɛnɩ kaɖʋwa ŋga ŋpɩzɩɣ nɛ ŋtalɩ-kɛ yɔ

Kiɖe tɛɛ lɛ sɔɔndʋ pɩzɩɣ nɛ tɩkpa-ŋ se ŋha ña-tɩ Ɛsɔ nɛ pamɩyɩsɩ-ŋ lɩm. Ɛlɛ ŋwɛɣ nɛ ŋɖɛɣnɩ ɛsɩndaa fezuu taa pazɩ pazɩ lɛ, nɩŋgbanzɩ nzɩ sɩ-kpɛzʋʋ ɛɛtasɩɣ-ŋ labʋ kaɖɛ. Pɩsa nɛ ɩna mba papɩzaa nɛ pala mbʋ yɔ pa-taa nabɛyɛ lɛ, ɩcɔnɩ VIDEO.

VIDEO: Yele nɛ taabalɩyɛ kɩbanɖɛ wɛɛ ña nɛ Yehowa mɩ-hɛkʋ taa (1:11)

Ɩkalɩ Yohanɛɛsɩ 17:3 nɛ Yakubu 1:5, nɛ pʋwayɩ lɛ ɩtazɩ tɔm tʋnɛ tɩ-taa:

• Ɛbɛ pɩzɩɣ nɛ pɩsɩnɩ nɔɔyʋ nɛ ɛñɔɔzɩ ɛ-tɩ nɛ pamɩyɩsɩ-ɩ lɩm?

1. Ðɩhaɣ ɖa-tɩ Yehowa alɩwaatʋ ndʋ ɖiheyiɣ-i adɩma naayɛ taa se ɖɩsɔɔlaa se ɖɩsɛɛ-ɩ ɖe-wezuu kpeekpe yɔ.

2. Alɩwaatʋ ndʋ pamɩyɩsɩɣ-ɖʋ lɩm yɔ ɖɩwɩlɩɣ lalaa se ɖɩha ɖa-tɩ Ɛsɔ.

6. Pamɩyɩsɩɣ ɛyʋ lɩm lɛ, ɛsʋʋ Yehowa hɔʋ taa

Pamɩyɩsɩɣ-ɖʋ lɩm lɛ, ɖɩsʋʋ ɛjaɖɛ kpeekpe yɔɔ hɔʋ ŋgʋ kɩwɛ nɔɔ kʋɖʋmaɣ taa yɔ kɩ-taa. Paa le ɖɩtɩɩlɩnaa yɔ, ɖɩka tisuu nɛ ɖɩwɛnɩ wezuu caɣʋ yɔɔ paɣtʋ kʋɖʋmtʋ. Ɩkalɩ Keɣa 25:14 nɛ 1 Pɩyɛɛrɩ 2:17, nɛ pʋwayɩ lɛ ɩtazɩ tɔm tʋnɛ tɩ-taa:

• Ðoŋ weyi ña-lɩm mɩyɩsʋʋ wɛnɩ ña nɛ Yehowa mɩ-taabalɩyɛ nɛ ña nɛ ɛyaa lalaa mɩ-taabalɩyɛ yɔɔ?

TOBI LƐ

Yesu wɩlaa se pɩpɔzʋʋ se pamɩyɩsɩ Krɩstʋ mba lɩm. Pʋcɔ nɛ pamɩyɩsɩ nɔɔyʋ lɩm lɛ, pɩpɔzʋʋ se e-wezuu caɣʋ ɛla nɔɔ kʋɖʋmaɣ nɛ Ɛsɔ paɣtʋ nɛ ɛkpaɣ ɛ-tɩ nɛ ɛha-ɩ.

Tɔm taa tazʋʋ

• Ɛbɛ lɩm mɩyɩsʋʋ kɛnaa nɛ ɛbɛ yɔɔ pɩ-tɔm cɛyaa?

• Nɔɔ kʋɖʋmaɣ ŋga wɛ tɩ haʋ nɛ lɩm mɩyɩsʋʋ pɛ-hɛkʋ taa?

• Nɩŋgbanzɩ nzɩ pɩpɔzʋʋ se ɛyʋ ɛkpɛzɩ pʋcɔ nɛ ɛha ɛ-tɩ Ɛsɔ nɛ pamɩyɩsɩ-ɩ lɩm?

WONDU LƐƐTƲ

Kalɩ nɛ ŋna mbʋ lɩm mɩyɩsʋʋ kɛnaa nɛ mbʋ pɩtɩkɛna yɔ.

«Qu’est-ce que le baptême?» (Intɛrnɛɛtɩ yɔɔ tɔm ñʋʋ)

Ðaɣnɩ tazʋʋ nɩŋgbanzɩ nzɩ pɩwɛɛ se ɛyʋ ɛkpɛzɩ nɛ pamɩyɩsɩ-ɩ lɩm yɔ sɩ-taa.

«Sɔɔlɩm nɛ ɛsɩmɩyɛ nɖɩ ŋwɛnɩ Yehowa yɔɔ yɔ piseɣtiɣ-ŋ se ŋha-ɩ ña-tɩ nɛ pamɩyɩsɩ-ŋ lɩm» (Feŋuu Tilimiye, mars 2020)

Kalɩ nɛ ŋna ɛzɩma abalʋ nɔɔyʋ kpaɣ lɩmaɣzɩyɛ ɛ-maɣmaɣ se eyeki nɛ pamɩyɩsɩ-ɩ lɩm yɔ.

«Ils voulaient que je découvre la vérité par moi-même» (La Tour de Garde, 1^er février 2013)

Kalɩ nɛ ŋna ɛzɩma lɩm mɩyɩsʋʋ kɛ kaɖʋwa ŋga kɔ-tɔm cɛyaa yɔ nɛ ɛzɩma ŋpɩzɩɣ nɛ ŋtalɩ-kɛ yɔ.

«Ðevrais-je me faire baptiser?» (Les jeunes s’interrogent —Réponses pratiques, Volume 2, chapitre 37)