Ye ŋlabɩ kɩwɛɛkɩm sɔsɔm nabʋyʋ yɔ, ɛbɛ pɩwɛɛ se ŋla?

Paa ŋsɔɔlɩ Yehowa pɩdɩɩfɛyɩ nɛ ŋñakɩ pana siŋŋ se ŋla mbʋ pɩkɛdɩɣnɩ-ɩ yɔ, pɩkaɣ-ŋ coɖuu nabʋyʋ taa. Ɛlɛ kɩwɛɛkɩm fɛyɩ kɩmaŋ. (1 Kɔrɛntɩ mba 6:9, 10) Ye ŋlabɩ kɩwɛɛkɩm sɔsɔm nabʋyʋ yɔ, tɔzɩ se Yehowa eeyeki-ŋ sɔɔlʋʋ; ɛlɛ ɛsɔɔlaa se ekpeɣ-ŋ faaa.

1. Ɛbɛ pɩwɛɛ se ɖɩla nɛ Yehowa kpaɣ nɛ ekpeɣ-ɖʋ?

Mba pɔsɔɔlɩ Yehowa yɔ, ye palabɩ kɩwɛɛkɩm sɔsɔm nabʋyʋ yɔ, pɩhaɣ-wɛ laŋwɛɛkɩyɛ siŋŋ. Ɛlɛ Yehowa labɩ tamaɣ nakɛyɛ ɛ-samaɣ nɛ tamaɣ ŋga kɛhɛzɩɣ ɛ-samaɣ laŋɩyɛ. Tamaɣ ŋga yɔ: «Paa mɩ-kɩwɛɛkɩm ɩsɛ cɩɩɩ ɛzɩ calɩm yɔ, pɩkaɣ hʋlʋmʋʋ ɛzɩ ɖɔmbɛɛ yɔ.» (Izaayii 1:18) Ye ɖikpiɖi ɖa-kɩwɛɛkɩm yɔɔ toovenim yɔ, Yehowa kpakɩɣ nɛ ekpeɣ-ɖʋ. Ɛzɩma ɖɩpɩzɩɣ nɛ ɖɩwɩlɩ se ɖikpiɖaa? Pɩwɛɛ se kɩwɛɛkɩm mbʋ ɖɩlaba yɔ pɩha-ɖʋ laŋwɛɛkɩyɛ siŋŋ nɛ pituyi-ɖʋ nɛ ɖiyele pɩ-labʋ nɛ ɖɩpɔzɩ ɖɔɖɔ Yehowa se ɛkpaɣ nɛ ekpeɣ-ɖʋ. Pʋwayɩ lɛ ɖɩñaɣ pana nɛ ɖɩlɔ maɣzɩm nɛ lakasɩ nzɩ siyeba nɛ ɖɩla kɩwɛɛkɩm mbʋ yɔ. Pɩpɔzʋʋ ɖɔɖɔ se ɖɩñaɣ pana nɛ ɖe-wezuu caɣʋ la nɔɔ kʋɖʋmaɣ nɛ Yehowa paɣtʋ.—Kalɩ Izaayii 55:6, 7.

2. Ɛzɩma Yehowa tɩŋɩɣnɩ ɛgbɛyɛ taa ɛzʋtʋyaa yɔɔ nɛ ɛsɩɣnɩ-ɖʋ alɩwaatʋ ndʋ ɖɩlakɩ kɩwɛɛkɩm yɔ?

Ye ɖɩlabɩ kɩwɛɛkɩm sɔsɔm yɔ, Yehowa heyiɣ-ɖʋ se ɖɩyaa «ɛgbɛyɛ taa ɛzʋtʋyaa.» (Kalɩ Yakubu 5:14, 15.) Ɛzʋtʋyaa mba, pɔsɔɔlɩ Yehowa nɛ e-heɣsi. Pamʋnaa se pasɩnɩ-ɖʋ nɛ ɖɩñɔɔzɩ ɖa nɛ Yehowa ɖa-taabalɩyɛ.—Galaatii mba 6:1.

Ɛzɩma ɛgbɛyɛ taa ɛzʋtʋyaa sɩɣnɩ-ɖʋ alɩwaatʋ ndʋ ɖɩlakɩ kɩwɛɛkɩm sɔsɔm nabʋyʋ yɔ? Ɛgbɛyɛ taa ɛzʋtʋyaa naalɛ yaa naadozo tɩŋɩɣnɩ Masɩ yɔɔ nɛ pawɩlɩ-ɖʋ mbʋ pʋyɔɔ mbʋ ɖɩlaba yɔ pɩkɛ kɩwɛɛkɩm yɔ. Patasɩɣ-ɖʋ ɖɔɖɔ lɔŋ weyi ɩsɩɣnɩ-ɖʋ se ɖɩtaatasɩ kɩwɛɛkɩm mbʋ labʋ yɔ. Ye Krɩstʋ tʋ nɔɔyʋ ɛlabɩ kɩwɛɛkɩm sɔsɔm nɛ ekizi se eekpiɖiɣ yɔ, ɛgbɛyɛ taa ɛzʋtʋyaa lɩzɩɣ-ɩ ɛgbɛyɛ taa se pɩsa nɛ pakandɩyɩ ɛgbɛyɛ yɔɔ nɛ ɛ-lakasɩ kɩdɛkɛdɩsɩ ɛtaawɛɛnɩ ɖoŋ ɛgbɛyɛ taa koobiya yɔɔ.

TAZƖ NƐ PILIMI

3. Ye ɖikuli ɖa-kɩwɛɛkɩm yɔɔ yɔ, pasɩɣnɩ-ɖʋ nɛ ɖɩñɔɔzɩ ɖa nɛ Yehowa ɖa-taabalɩyɛ

Kɩwɛɛkɩm mbʋ payɩ ɖɩlakɩ yɔ pɩɖʋʋ Yehowa ɖɩwɩzɩyɛ; pʋyɔɔ lɛ, pɩpɔzʋʋ se ɖikuli ɖa-kɩwɛɛkɩm yɔɔ ɛ-ɛsɩndaa. Ɩkalɩ Keɣa 32:1-5, nɛ pʋwayɩ lɛ ɩtazɩ tɔm tʋnɛ tɩ-taa:

• Ɛbɛ yɔɔ pɩkɩlɩɣ ɖeu se ɖɩtaañaɣ pana se ɖɩmɛsɩ ɖa-kɩwɛɛkɩm, ɛlɛ ɖikuli pɩ-yɔɔ nɛ ɖiheyi Yehowa?

VIDEO: «Mba Yehowa sɔɔlɩ-wɛ yɔ, ɛsɩɣzɩɣ-wɛ lɔŋ» (3:01)

• Ɛzɩma ɛgbɛyɛ taa ɛzʋtʋyaa sɩnɩ Canon nɛ ɛpɩsɩ Yehowa cɔlɔ?

Pɩpɔzʋʋ se ɖiheyi toovenim tɩŋa ɛgbɛyɛ taa ɛzʋtʋyaa, pa-kaɖʋwa lɛ se pasɩnɩ-ɖʋ. Ɩkalɩ Yakubu 5:16, nɛ pʋwayɩ lɛ ɩtazɩ tɔm tʋnɛ tɩ-taa:

• Ye ɖiheyi ɛzʋtʋyaa toovenim tɩŋa yɔ, pɩwɛɣ-wɛ kɛlɛʋ se pasɩnɩ-ɖʋ. Ɛbɛ yɔɔ?

4. Yehowa naɣ kɩwɛɛkɩm laɖaa pʋtɔdɩyɛ

Ye nɔɔyʋ ɛlabɩ kɩwɛɛkɩm sɔsɔm nabʋyʋ nɛ ekizi se ɛɛñaŋ Yehowa paɣtʋ yɔ, palɩzɩɣ-ɩ ɛgbɛyɛ taa. Palɩzɩɣ-ɩ ɛgbɛyɛ taa, ɖɩɩtasɩɣ-ɩ ɖʋʋ nɛ taabalɩyɛ. Ɩkalɩ 1 Kɔrɛntɩ mba 5:6, 11, nɛ pʋwayɩ lɛ, ɩtazɩ tɔm tʋnɛ tɩ-taa:

• Ye pakpaɣ lɔlɔm pazɩ nɛ paɖʋ mʋtʋ taa yɔ, mʋtʋ ñɩŋɩɣ. Mbʋ ɖɔɖɔ, ye ɛgbɛyɛ ɛɖʋʋ taabalɩyɛ nɛ weyi ɛlabɩ kɩwɛɛkɩm nɛ etikpiɖi yɔ ɖoŋ weyi pɩwɛɣnɩ ɖɩ-yɔɔ?

Wɛtʋ ndʋ Yehowa wɛnɩ kɩwɛɛkɩm laɖaa yɔɔ yɔ ɛzɩma tɩwɩlɩɣ se ɛkɛ weyi ɛnɩɣ tɔm taa, ɛnaɣ pʋtɔdɩyɛ, nɛ ɛwɛnɩ sɔɔlɩm yɔ?

5. Ye ɖikpiɖi ɖa-kɩwɛɛkɩm yɔɔ yɔ, Yehowa kpakɩɣ nɛ ekpeɣ-ɖʋ

Yesu tɩŋnɩ eduuye naɖɩyɛ yɔɔ nɛ ɛwɩlɩ-ɖʋ ɛzɩma pɩlakɩ Yehowa alɩwaatʋ ndʋ kɩwɛɛkɩm laɖʋ nɔɔyʋ kpiɖiɣ ɛ-kɩwɛɛkɩm yɔɔ yɔ. Ɩkalɩ Luka 15:1-7, nɛ pʋwayɩ lɛ ɩtazɩ tɔm tʋnɛ tɩ-taa:

• Ɛbɛ tɔm tʋnɛ tɩkpɛlɩkɩɣ-ŋ Yehowa yɔɔ?

Ɩkalɩ Ezekɩyɛɛlɩ 33:11, nɛ pʋwayɩ lɛ ɩtazɩ tɔm tʋnɛ tɩ-taa:

• Nɩŋgbanzɩ nzɩ pɩwɛɛ se ɛyʋ ɛkpɛzɩ nɛ ɛwɩlɩ se ekpiɖi ɛ-kɩwɛɛkɩm yɔɔ toovenim?

TOBI LƐ

Ye ɖɩlabɩ kɩwɛɛkɩm sɔsɔm nabʋyʋ ɛlɛ ɖɩwɩlɩ se ɖikpiɖi toovenim nɛ ɖɩɖʋ ɖa-taa se ɖɩɩtasɩɣ-pʋ labʋ yɔ, Yehowa kpakɩɣ nɛ ekpeɣ-ɖʋ.

Tɔm taa tazʋʋ

• Ye ɖikuli ɖa-kɩwɛɛkɩm yɔɔ nɛ ɖiheyi Yehowa yɔ, wazasɩ nzɩ ɖihikiɣ?

• Ɛbɛ pɩpɔzʋʋ se ɖɩla nɛ pekpeɣ-ɖʋ ɖa-kɩwɛɛkɩm?

• Ye ɖɩlabɩ kɩwɛɛkɩm sɔsɔm nabʋyʋ yɔ, ɛbɛ yɔɔ pɩwɛɛ se ɖiyele nɛ ɛgbɛyɛ taa ɛzʋtʋyaa sɩnɩ-ɖʋ?

WONDU LƐƐTƲ

Cɔnɩ video nɛ ŋna ɛzɩma abalʋ nɔɔyʋ kɔma nɛ ɛna se Yehowa naɣ ɛyaa pʋtɔdɩyɛ toovenim ɛzɩ ɛlabʋ tamaɣ Izaayii 1:18 taa yɔ.

Taapɩtɩ Yehowa kpaɣʋ nɛ kpeɣu yɔɔ kpa (5:02)

Pɩtasɩnɩ weyi palɩzɩɣ-ɩ ɛgbɛyɛ taa yɔ lɛ, anɩ ɖɔɖɔ ɖʋtʋ ndʋ tɩwazɩɣ?

Ɛzɩma ɛgbɛyɛ taa ɛzʋtʋyaa wɩlɩɣ kɩwɛɛkɩm laɖaa sɔɔlɩm nɛ panaɣ pa-pʋtɔdɩyɛ?» (Feŋuu Tilimiye, août 2024)

Kalɩ nɛ ŋna ɛzɩma ŋpɩzɩɣ nɛ ŋsɩnɩ weyi ɛtɩkɛ Aseɣɖe Tʋ yɔ nɛ ɛtɩlɩ mbʋ ɛgbɛyɛ taa lɩzʋʋ ɖʋtʋ kɛnaa yɔ.

Ɛzɩma ɛzʋtʋyaa pɩzɩɣ nɛ pasɩnɩ mba palɩzɩ-wɛ ɛgbɛyɛ taa yɔ?» (Feŋuu Tilimiye, août 2024)

Kalɩ tɔm ñʋʋ «Il fallait que je revienne vers Jéhovah» nɛ ŋna ɛzɩma abalʋ nɔɔyʋ posini toovenim ɛlɛ pʋwayɩ lɛ ɛkɔɔ nɛ eɖiɣzina se Yehowa yaɣ-ɩ se ɛpɩsɩ yɔ.

«La Bible transforme des vies» (La Tour de Garde, 1^er avril 2012)