MWBR19 03 Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
4-10 MARS
ÑƖM MBƲ PƖWƐ ƐSƆTƆM TAA YƆ | ROMA MBA 12-14
“Ɛzɩma ɖɩpɩzɩɣ nɛ ɖɩlɩzɩ Krɩstʋ mba sɔɔlɩm nɛ ɖɩwɩlɩ?”
(Roma mba 12:10) Koobiye sɔɔlɩm nʋmɔʋ taa lɛ, ɩsɔɔlɩ ɖama nɛ sɔɔlɩm sɔsɔm. Ðama hɩɖɛ ɖʋʋ nʋmɔʋ taa lɛ, ɩkɛ mba pɛɖɛɣ nɔɔ yɔ.
it-1 53
Sɔɔlɩm
Koobiye sɔɔlɩm (Grɛɛkɩ kʋnʋŋ taa lɛ, philadelphiʹa; tɔm piye nɖɩ, ɖɩ-tɔbʋʋ ɖɔɖɔ lɛ se “sɔɔlɩm wɛnʋʋ koobu yɔɔ”). Pɩwɛɛ se sɔɔlɩm mbʋ, pɩwɛɛ Krɩstʋ ɛgbɛyɛ taa mba tɩŋa hɛkʋ taa. (Rom 12:10; Ebr 13:1; kalɩ ɖɔɖɔ 1Pɩ 3:8.) Ye mbʋ, taabalɩyɛ nɖɩ ɖɩwɛ ɛgbɛyɛ taa mba hɛkʋ taa yɔ, pɩwɛɛ se ɖɩwɛɛ ɖoŋ nɛ ɖɩcɛyɩsɩ ɛzɩ taabalɩyɛ nɖɩ ɖɩwɛɣ hɔʋ taa mba hɛkʋ taa yɔ. Paa ɛgbɛyɛ taa mba ɩtɛm ɖama paɣzʋʋ koobiye sɔɔlɩm wɩlʋʋ yɔ, apostoloo Pɔɔlɩ seɣti-wɛ se pañaɣ pana nɛ pala mbʋ nɛ pɩkpaɖɩ.—1Te 4:9, 10.
Grɛɛkɩ tɔm piye philoʹstorgos tɔbʋʋ lɛ se “sɔɔlɩm sɔsɔm wɛnʋʋ.” Nɛ palakɩnɩ-ɖɩ tʋmɩyɛ nɛ pɔyɔɔdʋʋnɩ ɛyʋ weyi taabalɩyɛ sɔsɔyɛ naɖɩyɛ wɛ ɛ nɛ nɔɔyʋ pɛ-hɛkʋ taa yɔ ɛ-tɔm. Ðoŋ ɖoŋ lɛ, palakɩnɩ tɔm piye nɖɩ ɖɩ-hɔɔlʋʋ sterʹgo tʋmɩyɛ nɛ pɔyɔɔdʋʋnɩ sɔɔlɩm mbʋ pɩwɛ hɔʋ taa mba hɛkʋ taa yɔ pɩ-tɔm. Apostoloo Pɔɔlɩ seɣti Krɩstʋ mba se pañaɣ pana nɛ pɛwɛɛnɩ wɛtʋ kɩbandʋ ndʋ. (Rom 12:10) Pɔɔlɩ wɩlaa ɖɔɖɔ se kɛdɛzaɣ kɩyakɩŋ taa lɛ, ɛyaa ɩɩkaɣ “wɛnʋʋ sɔɔlɩm” (Grɛɛkɩ tɔm piye aʹstorgoi), nɛ ɛyɔɔdɩ se ɛyaa mba, sɩm pɩkaɣ-wɛ tɛmnʋʋ.—2Ti 3:3; Rom 1:31, 32.
(Roma mba 12:17-19) Ɩtaahɛyɩ nɔɔyʋ kɩdɛkɛdɩm kɩdɛkɛdɩm lone taa. Ɩmaɣzɩɣ mbʋ pɩwɛ ɖeu ɛyaa tɩŋa ɛsɩndaa yɔ pɩ-labʋ yɔɔ. 18 Ye pɩsaŋ, nɛ ye pɩlɩɣnɩ mɩ-cɔlɔ na yɔ, mɩ nɛ ɛyaa tɩŋa ɩwɛɛ laŋhɛzɩyɛ taa. 19 Man-kʋsɔɔlaa, mɩ-maɣmaɣ ɩtaakpa kɩmɩyɛ, ɩha nʋmɔʋ pana; mbʋ pʋyɔɔ yɔ pamawa se: “‘Matɩnɩ kɩmɩyɛ kpaʋ; makaɣnɩ hɛyʋʋ,’ Yehowa tɔŋna.”
w09 15/10 8 § 3
“Mɩ nɛ ɛyaa tɩŋa ɩwɛɛ laŋhɛzɩyɛ taa”
3 Kalɩ Roma mba 12:17. Pɔɔlɩ lɩzɩ pɩ-taa se ye nɔɔyʋ ɛlabɩ-ɖʋ mbʋ pɩtɩtʋʋzɩ yɔ, pɩfɛyɩ se ɖɩkpa-ɩ pɩ-kɩmɩyɛ. Pɩcɛyaa kpem se ɛyʋ ɛɖɔ lɔŋ tasʋʋ pʋnɛ pɩ-yɔɔ, kɔzɩ kɔzɩ hɔʋ ŋgʋ kɩtayɩ Ɛsɔ sɛtʋ hɔɔlʋʋ taa yɔ kɩ-taa. Pɩwɛɛ se Krɩstʋ tʋ ɛɖɔkɩ ɛ-tɩ nɛ ye ɛ-tɛŋga ɛyɔɔdɩ-ɩ tɔm kɩdɛkɛdɩtʋ natʋyʋ yaa ɛlabɩ-ɩ kɩdɛkɛdɩm nabʋyʋ yɔ, ɛtaahɛyɩ-ɩ pi-lone taa. ‘Kɩdɛkɛdɩm hɛyʋʋ kɩdɛkɛdɩm lone taa’ ɛɛlʋlʋʋ pee kɩbana naayɛ. Ye ɖɩlabɩ mbʋ yɔ, pɩtɛzɩɣ tɔm wɛɛkʋʋ kɩwɛɛkʋ.
w07 1/7 24-25 § 12-13
“Ɩtaahɛyɩ nɔɔyʋ kɩdɛkɛdɩm kɩdɛkɛdɩm lone taa”
12 Pɔɔlɩ tasɩ yɔɔdʋʋ wɛtʋ ndʋ pɩwɛɛ se ɛyʋ ɛwɛɛnɩ koobiya nɛ mba patɩkɛ koobiya yɔ pɔ-yɔɔ yɔ tɩ-tɔm nɛ ɛtɔ se: “Ɩtaahɛyɩ nɔɔyʋ kɩdɛkɛdɩm kɩdɛkɛdɩm lone taa.” Nɛ tɔm ndʋ tɩlakɩ nɔɔ kʋɖʋmaɣ nɛ ndʋ ɛɛtɛm yɔɔdʋʋ yɔ; ɛɛyɔɔdaa se: “Ikizi mbʋ pɩkɛ kɩdɛkɛdɩm yɔ.” Ye nɔɔyʋ ɛkpakɩɣ kɩdɛkɛdɩm nɛ ɛkpaɣnɩ lalaa kɩmɩyɛ, ɛzɩma ɛpɩzɩɣ nɛ ɛyɔɔdɩ se toovenim taa lɛ, ekizi mbʋ pɩkɛ kɩdɛkɛdɩm yɔ? Ye nɔɔyʋ ɛlakɩ mbʋ yɔ, ɛpɩzɩɣ nɛ ɛyɔɔdɩ se ɛ-sɔɔlɩm tɩkɛ “pɩ-tɛɛ nɛ pɩ-yɔɔ sɔɔlɩm” na? Pʋwayɩ lɛ, Pɔɔlɩ yɔɔdɩ se: “Ɩmaɣzɩɣ mbʋ pɩwɛ ɖeu ɛyaa tɩŋa ɛsɩndaa yɔ pɩ-labʋ yɔɔ.” (Roma mba 12:9, 17) Ɛzɩma ɖɩpɩzɩɣ nɛ ɖɩɖɔ tɔm tʋnɛ tɩ-yɔɔ?
13 Pɔɔlɩ maɣaɣ Kɔrɛntɩ mba takayaɣ kajalaɣ taa lɛ, ɛɛtɛm yɔɔdʋʋ nazɩm mbʋ apostoloowaa kataa yɔ pɩ-tɔm. Ɛyɔɔdaa se: “Mbʋ pʋyɔɔ yɔ ɛjaɖɛ, nɛ Ɛsɔ tiyiyaa nɛ ɛyaa ɛsɩndaa lɛ, ɖɩpɩsɩ ɛzɩ mba pɔcɔŋnɩ-wɛ aleɣya ɖɩlaɖɛ taa yɔ. . . . Patʋʋ-ɖʋ lɛ, ɖɩwazɩɣ kɩwazʋ; panazɩɣ-ɖʋ lɛ, ɖɩɖɔkʋʋ ɖa-laŋa nɛ suuɖu; palakɩ-ɖʋ kɔlɔmɔtʋ lɛ, ɖicosuuni nɔɔ kɩbaŋa.” (1 Kɔrɛntɩ mba 4:9-13) Sɔnɔ, mbʋ ɖɔɖɔ ɛjaɖɛ yɔɔ mba wɛɛ nɛ pɔcɔŋnɩ Krɩstʋ mba toovenim ñɩma. Ye palakɩ-ɖʋ mbʋ pɩtɩtʋʋzɩ yɔ nɛ ɖɩwɛɛnɩ lakasɩ kɩbanzɩ yɔ, pɩpɩzɩɣ piyele nɛ mba pɔcɔ-ɖʋ nɛ pata yɔ, pitukuni-wɛ nɛ petisi nɛ pamʋ tɔm ndʋ ɖisusuu-wɛ yɔ.—1 Pɩyɛɛrɩ 2:12.
(Roma mba 12:20, 21) Ɛlɛ “ye ñɔɔsɩ ɛwɩɣ ño-koyindu yɔ, ha-ɩ nɛ ɛtɔɔ, ye lɔkɔtʋ ɛɖɛ-ɩ yɔ, ha-ɩ nabʋyʋ nɛ ɛñɔɔ; mbʋ pʋyɔɔ yɔ ŋŋlakɩ mbʋ lɛ, ŋkpeɣliɣ ɛ-ñʋʋ taa miŋ mamala.” 21 Taayele ña-tɩ nɛ kɩdɛkɛdɩm wabɩ-ŋ, ɛlɛ wɛɛ nɛ ŋwakɩ kɩdɛkɛdɩm pɩtɩŋnɩ kɩbandʋ labʋ yɔɔ.
w12 15/11 29 § 13
Ikpeɣ ɖama faaa
13 Pɩtɩla nabʋyʋ taa ŋpɩzɩɣ nɛ ŋsɩnɩ ɛyʋ weyi ɛlabɩ-ŋ kɩdɛkɛdɩm nabʋyʋ yɔ nɛ ɛna se Krɩstʋ mba wezuu caɣʋ wɛ ɖeu. Apostoloo Pɔɔlɩ mawa se: “‘Ye ñɔɔsɩ ɛwɩɣ ño-koyindu yɔ, ha-ɩ nɛ ɛtɔɔ, ye lɔkɔtʋ ɛɖɛ-ɩ yɔ, ha-ɩ nabʋyʋ nɛ ɛñɔɔ; mbʋ pʋyɔɔ yɔ ŋŋlakɩ mbʋ lɛ, ŋkpeɣliɣ ɛ-ñʋʋ taa miŋ mamala.’ Taayele ña-tɩ nɛ kɩdɛkɛdɩm wabɩ-ŋ, ɛlɛ wɛɛ nɛ ŋwakɩ kɩdɛkɛdɩm pɩtɩŋnɩ kɩbandʋ labʋ yɔɔ.” (Roma 12:20, 21) Ye nɔɔyʋ ɛca-ŋ tɔm, ɛlɛ ña ñalabɩ-ɩ camɩyɛ lakasɩ yɔ, pɩpɩzɩɣ piyele nɛ ɛlɛɣzɩ wɛtʋ nɛ ɛpaɣzɩ lakasɩ kɩbanzɩ labʋ. Ye ŋnɩɣ weyi ɛca-ŋ tɔm yɔ ɛ-tɔm taa, ŋnɩɣ ɛ-wɩzasɩ nɛ ŋnaɣ ɛ-pʋtɔdɩyɛ yɔ, pɩtala ŋpɩzɩɣ ŋsɩnɩ-ɩ nɛ ɛkpɛlɩkɩ Bibl taa toovenim tɔm. Paa pɩtɩɩkɛ suwe yɔ, ña-camɩyɛ lakasɩ haɣ weyi ɛca-ŋ tɔm yɔ waɖɛ se ɛmaɣzɩ ñɔ-ɖɔnɛ kɩbanɖɛ yɔɔ.—1 Pɩy. 2:12; 3:16.
Ðɩñɩnɩ fezuu taa ñɩm
(Roma mba 12:1) Ye mbʋ, koobiya, mentendiɣ-mɩ pɩtɩŋnɩ Ɛsɔ pʋtɔdɩyɛ naʋ yɔɔ se ɩcɛlɩ mi-tomnasɩ ɛzɩ kɩlaʋ ŋgʋ kɩwɛ wezuu, kɩkɛ kiɖeɖeu nɛ kɩkɛdɩnɩ Ɛsɔ yɔ, se pɩsa nɛ ɩlabɩ-ɩ tʋmɩyɛ kiɖeɖee nɛ mɩ-ñʋʋ taa maɣzɩm.
Ɛzɩma pɩwɛɛ se ɖɩlɩzɩ aleɣya wena ɖɩlakɩ yɔ
5 Mbʋ payɩ ɖɩlakɩ yɔ, pɩwɛnɩ ɖoŋ ɖɛ-Ɛsɔ sɛtʋ yɔɔ. Pɔɔlɩ lɩzɩ tɔm ndʋ tɩ-taa alɩwaatʋ ndʋ ɛyɔɔdaa se: “Ɩpɩsɩ mɩ-tɩ wezuu kɩlaʋ kiɖeɖeu, ŋgʋ kiɖeni Ɛsɔ yɔ.” (Roma mba 12:1) Yesu yɔɔdaa se: “Ŋŋsɔɔlɩ [Yehowa], ñɛ-Ɛsɔ nɛ ña-laŋɩyɛ pilim, ñe-ciyam pilim, nɛ ñe-fezuu pilim nɛ ño-ɖoŋ kpeekpe.” (Maarkɩ 12:30) Paa ɛzɩmtaa lɛ, ɖɩsɔɔlaa se ɖɩha Yehowa mbʋ pɩkɩlɩ ɖeu yɔ. Caanaʋ taa Izrayɛɛlɩ ɛjaɖɛ taa lɛ, pɔpɔzaɣ samaɣ se kakpaɣ kpɩna wena awɛ alaafɩya camɩyɛ yɔ nɛ kalaa Yehowa kɩlaʋ. Yehowa ɛɛmʋʋ kɩlaŋ weyi palakɩnɩ kpɩna wena atɩmʋna yɔ. (Levitiki 22:18-20) Mbʋ ɖɔɖɔ Yehowa pɩzɩɣ nɛ ekizi se ɛɛmʋʋ ɖɛ-sɛtʋ. Ɛzɩma tɩyɛ?
6 Yehowa heyi-ɖʋ se: “Ɩkaɣ kɛʋ kiɖeɖema, mbʋ pʋyɔɔ yɔ, ma, mɛnkɛ kiɖeɖeu.” (1 Pɩyɛɛrɩ 1:14-16; 2 Pɩyɛɛrɩ 3:11) Ye ɖɛ-sɛtʋ ɛfɛyɩ kele kele yɔ, Yehowa ɛɛpɩzɩɣ nɛ ɛmʋ-tʋ. (Wayɩ Wayɩ Paɣtʋ 15:21) Ye ɖɩlakɩ mbʋ Yehowa paɖɩɣ yɔ, ɛzɩ kʋzʋʋ kɩdɛkɛdʋʋ, puuyaɣ lakasɩ yaa feziŋ kɩdɛkɛdɩŋ yaʋ mbʋ yɔ yɔ, ɖɛ-sɛtʋ ɛɛpɩzɩɣ nɛ tɩwɛɛ kele kele. (Roma mba 6:12-14; 8:13) Pɩtasɩ lɛ, ye ɖɩlakɩ aleɣya wena a-taa lakasɩ nzɩ sɩwɛɛ yɔ, pɩɩkɛdɩɣnɩ ɖɔɖɔ Yehowa. Piyeki nɛ ɖɛ-Ɛsɔ sɛtʋ ɛɛtasɩɣ wɛʋ kele kele nɛ pʋyɔɔ lɛ, Yehowa ɛɛpɩzɩɣ nɛ etisi nɛ ɛmʋ-tʋ. Pɩtasɩ lɛ, aleɣya ana awɛɛkɩɣ ɖa nɛ Yehowa ɖa-taabalɩyɛ siŋŋ.
(Roma mba 13:1) Paa ɛyʋ weyi lɛ, eluzi ɛ-tɩ ñʋndɩnaa sɔsaa tɛɛ, mbʋ pʋyɔɔ yɔ ɖoŋ nɩɩyɩ fɛyɩ nɛ pɩtɩkɛ Ɛsɔ cɔlɔ ɩlɩnaa; ñʋndɩnaa mba pɛwɛɛ yɔ, Ɛsɔ hanɩ-wɛ nʋmɔʋ se pɛwɛɛ lona ndɩ ndɩ wena a-ɖoŋ wɛnɩ tɩnaɣ yɔ a-taa.
w08 15/6 31 § 4
Roma mba takayaɣ taa lɩmaɣza sɔsɔna
13:1—Ɛbɛ yɔɔ pɔtɔŋ se “Ɛsɔ ɖʋnɩ, VB” ñʋndɩnaa sɔsaa “se pɛwɛɛ lona ndɩ ndɩ wena a-ɖoŋ wɛnɩ tɩnaɣ yɔ a-taa”? “Ɛsɔ ɖʋnɩ” ɛjaɖɛ ñʋndɩnaa sɔsaa “se pɛwɛɛ lona ndɩ ndɩ wena a-ɖoŋ wɛnɩ tɩnaɣ yɔ a-taa” pʋ-tɔbʋʋ lɛ se Ɛsɔ hanɩ-wɛ nʋmɔʋ se pɔtɔɔ kewiyitu. Halɩ Ɛsɔ kaana ɛzɩma awiya naayɛ kɔŋaɣ kewiyitu tɔɔʋ yɔ ɖooo lɔŋ pʋcɔ nɛ awiya ana apaɣzɩ tɩ-tɔɔʋ. Tɔm ndʋ Bibl kaayɔɔdɩ awiya naayɛ yɔɔ yɔ, tɩñɩkɩɣ niye tɔm ndʋ tɩ-yɔɔ.
Bibl kalʋʋ
(Roma mba 13:1-14) Paa ɛyʋ weyi lɛ, eluzi ɛ-tɩ ñʋndɩnaa sɔsaa tɛɛ, mbʋ pʋyɔɔ yɔ ɖoŋ nɩɩyɩ fɛyɩ nɛ pɩtɩkɛ Ɛsɔ cɔlɔ ɩlɩnaa; ñʋndɩnaa mba pɛwɛɛ yɔ, Ɛsɔ hanɩ-wɛ nʋmɔʋ se pɛwɛɛ lona ndɩ ndɩ wena a-ɖoŋ wɛnɩ tɩnaɣ yɔ a-taa. 2 Pʋyɔɔ lɛ, weyi ɛkaɖɩɣnɩ ñʋʋdʋ yɔ, ɛkaɖɩnɩ ɖʋtʋ ndʋ Ɛsɔ ɖʋwa yɔ; ɛyaa mba pakaɖɩnɩ-tʋ yɔ, pakaɣ kɔnʋʋ tɔm hʋʋ pa-maɣmaɣ pɔ-yɔɔ. 3 Mbʋ pʋyɔɔ yɔ ñʋndɩnaa mba, pɩtɩkɛ lakasɩ kɩbanzɩ yɔɔ pɛkɛ sɔɔndʋ pʋyʋ, ɛlɛ kɩdɛkɛdɩsɩ yɔɔ. Ŋsɔɔlaa se sɔɔndʋ ɛtaakpa-ŋ nɛ ñʋʋdʋ na? Wolo pɩ-yɔɔ nɛ ŋlakɩ kɩbandʋ, ŋkaɣ mʋʋ samtʋ ɛ-cɔlɔ; 4 mbʋ pʋyɔɔ yɔ ɛkɛ Ɛsɔ lɩmɖʋyʋ ñɔ-yɔɔ se piɖeni-ŋ. Ɛlɛ ye ŋwɛɛ nɛ ŋlakɩ mbʋ pɩfɛyɩ ɖeu yɔ, wɛɛ sɔɔndʋ taa, mbʋ pʋyɔɔ yɔ pɩtɩkɛ yem nɛ ɛɖɔkɩ laɣɖɛ. Ɛkɛ Ɛsɔ lɩmɖʋyʋ, kɩmɩyɛ kpayʋ se ɛwɩlɩ pana weyi ɛlakɩ mbʋ pɩfɛyɩ ɖeu yɔ. 5 Pʋyɔɔ pɩcɛyaa kpem se iluzi mɩ-tɩ, pɩtaakɛ pana ana a-ɖeke a-yɔɔ ɛlɛ mɩ-ɛhʋyɛ yɔɔ ɖɔɖɔ. 6 Pʋyɔɔ ɩhɛyɩɣ ɖɔɖɔ lambuu; mbʋ pʋyɔɔ yɔ pɛkɛ Ɛsɔ lɩmɖʋyaa samaɣ taa nɛ palakɩ tʋmɩyɛ tam kaɖʋwa ŋga kɔ-yɔɔ. 7 Ɩcɛlɩ paa weyi mbʋ pɩpɔzʋʋ se pɛcɛlɩ-ɩ yɔ: weyi ɛpɔzʋʋ lambuu yɔ, lambuu; weyi ɛpɔzʋʋ tikee yɔ, tikee; weyi ɛpɔzʋʋ se pese-i sɔɔndʋ yɔ, pese-i sɔɔndʋ; weyi ɛpɔzʋʋ hɩɖɛ ɖʋʋ yɔ, paɖʋ-ɩ hɩɖɛ. 8 Ɩtaatɔɔ nɔɔyʋ kɩmɩyɛ naɖɩyɛ ye pɩtɩkɛ ɖama sɔɔlʋʋ yɔ; mbʋ pʋyɔɔ yɔ weyi ɛsɔɔlʋʋ ɛyʋ lɛlʋ yɔ, ɛɖɔm paɣtʋ yɔɔ. 9 Mbʋ pʋyɔɔ yɔ paɣtʋ ndʋ pamawa se: “Taala acɛyɛ, taakʋ ɛyʋ, taamɩlɩ, taaɖʋ ɛsɩyɛ,” nɛ tɔm lɛɛtʋ ndʋ payɩ pɔyɔɔdɩ paɣtʋ taa yɔ, pekpeɣli-tʋ tɔm tʋnɛ tɩ-taa: “Sɔɔlɩ ña-taabalʋ ɛzɩ ña-maɣmaɣ yɔ.” 10 Sɔɔlɩm ɛɛlakɩ ɛyʋ lɛlʋ kɩdɛkɛdɩm; ye mbʋ, sɔɔlɩm kɛnɩ paɣtʋ yɔɔ ɖɔm. 11 Nɛ ɩla mbʋ, mbʋ pʋyɔɔ yɔ ɩsɩm alɩwaatʋ, se ñɩɣyʋʋ tɛm talʋʋ se ifemni ɖom yɔɔ, mbʋ pʋyɔɔ yɔ lɛɛlɛɛyɔ ɖa-ñʋʋ yabɩtʋ ñɔtaa nɛ pɩkɩlɩ alɩwaatʋ ndʋ ɖɩpɩsɩ mba pɛwɛnɩ tisuu yɔ. 12 Ðoo ɖɛwa; tɛʋ wɩzɩ fem. Ye mbʋ, ɖɩlɔ cɩkpɛndʋʋ tɛɛ tʋma nɛ ɖɩkpaɣ ñalɩmɩyɛ you wondu nɛ ɖisuu. 13 Ðɩɖɔ camɩyɛ ɛzɩ wɩsɩ taa yɔ, pɩtaakɛ kazandʋ ndʋ tɩ-taa pɛɖɛlɛsɩɣ niye yɔ nɛ sʋlʋm kpaŋʋʋ pa-taa, pɩtaakɛ kʋzʋʋ kɩdɛkɛdʋʋ nɛ lakasɩ nzɩ sɩwɛ fɛyɛ yɔ sɩ-taa, pɩtaakɛ you nɛ sʋsɩ pa-taa. 14 Ɛlɛ ɩkpaɣ Kɩbaɣlʋ Yesu Krɩstʋ nɛ isuu, nɛ ɩtaawɛɛ nɛ ɩlakɩ ɖʋtʋ tomnaɣ kɔɖɛyɩ yɔɔ.
11-17 MARS
ÑƖM MBƲ PƖWƐ ƐSƆTƆM TAA YƆ | ROMA MBA 15-16
“Pɩsɩnɩ Yehowa yɔɔ nɛ ŋhiɣ laŋɩyɛ ɖɔkʋʋ nɛ laŋɩyɛ hɛzʋʋ”
(Roma mba 15:4) Mbʋ pʋyɔɔ yɔ mbʋ payɩ paama ɖooo lɔndaa yɔ, pama-pʋ se pawɩlɩ-ɖʋ lɔŋ, se pɩsa nɛ pɩtɩŋnɩ ɖa-laŋɩyɛ ɖɔkʋʋ nɛ laŋɩyɛ hɛzʋʋ mbʋ pɩlɩnɩ Masɩ taa yɔ pɩ-yɔɔ lɛ, ɖɩpɩzɩ nɛ ɖɩwɛɛnɩ lidaʋ.
“Mɩ nɛ mba pewiɣ yɔ, ɩkpɛndɩ iwii”
11 Tɔm ndʋ Bibl yɔɔdaa pɩlɩɩnɩ ɛzɩma Yesu nɩ siziŋ Lazaarɩ sɩm yɔɔ yɔ, tɩhɛzɩɣ ɖa-laŋa siŋŋ. Pɩtasɩnɩ tɔm ndʋ lɛ, Bibl hɔɔlɩŋ lɛɛŋ sakɩyɛ wɛɛ nɛ ɩhɛzɩɣ ɖɔɖɔ ɖa-laŋa kʋñɔmɩŋ ndɩ ndɩ taa. Nɛ ɖɩɩpɩtɩɣ se “tɔm ndʋ pama-tʋ lɔndaa yɔ, pama-tʋ ti-kpeekpe se pawɩlɩ-ɖʋ tʋ nɛ ɖihiɣ abalɩtʋ nɛ laŋhɛzɩyɛ nɖɩ Takayaɣ Kiɖeɖeɣa haɣ yɔ, nɛ ɖɩwɛɛnɩ lidaʋ.” (Roma 15:4) Ye ŋwɛ laŋwɛɛkɩyɛ taa yɔ, Bibl masɩ nzɩ sɩpɩzɩɣ nɛ sɩhɛzɩ ña-laŋɩyɛ yɔ sɩ-taa nasɩyɩ yɔ:
▪ “[Yehowa] ñɔtɩnɩ laŋa wena apɛlaa yɔ, nɛ ɛyakɩ ‘pɩɖɛmwaa’ ñʋʋ.”—Keɣa 33:19, 20.
▪ Man-kʋñɔmɩŋ kɩlɩ-m nɛ pihuuzuu mɔ-yɔɔ lɛ, ñɔkɔmna nɛ ŋhɛzɩ man-laŋɩyɛ yɔɔ yɔɔ.”—Keɣa 93:19.
▪ “Ða-Kɩbaɣlʋ Yesu Krɩstʋ nɛ ɖa-Caa Ɛsɔ weyi ɛsɔɔlɩ-ɖʋ nɛ ɛha-ɖʋ tam tam laŋɩyɛ hɛzʋʋ kʋjɔʋ nɛ koboyaɣ lidaʋ yɔ, pɛhɛzɩ mɩ-laŋa nɛ pakpazɩ-yɛ ɖoŋ tʋmɩyɛ kɩbanɖɛ kpeekpe taa nɛ tɔm yɔɔdʋʋ taa.”—2 Tes. 2:16, 17.
(Roma mba 15:5) Lɛɛlɛɛyɔ, tɛtɛ nɛ Ɛsɔ weyi ɛhaɣ laŋɩyɛ ɖɔkʋʋ nɛ laŋɩyɛ hɛzʋʋ yɔ, ɛla nɛ mɩ-tɩŋa ɩwɛɛnɩ maɣzɩm kʋɖʋmʋm mbʋ Krɩstʋ Yesu kaawɛna yɔ,
Yele nɛ tɩ ɖɔkʋʋ sɩnɩ-ŋ nɛ ŋwɛɛnɩ wɛtʋ kɩbandʋ
5 Pɔzɩ Yehowa se ɛsɩnɩ-ŋ. Yehowa kɛ Ɛsɔ weyi ɛhaɣ “abalɩtʋ [yaa tɩ ɖɔkʋʋ] nɛ laŋhɛzɩyɛ” yɔ. (Roma 15:5) E-ɖeke ɛpɩzɩɣna nɛ ɛtɩlɩ tɩlasɩ nzɩ ɖɩkatɩɣ yɔ camɩyɛ. Ɛnawa se mba pɛ-hɛkʋ taa ɖɩcaɣ nɛ ɖɩpaɣlɩ, ɖa-lɩmaɣza yaa wɛtʋ ndʋ tɩ-taa ɖɩwɛɛ yɔ, pɩtɩŋa pɩwɛnɩ ɖoŋ ɖɔ-yɔɔ. Ye mbʋ, tɩ ɖɔkʋʋ nʋmɔʋ taa lɛ, ɛnʋ pɩzɩɣna nɛ ɛsɩnɩ-ɖʋ nɛ pɩkɩlɩ. Bibl tɔŋ se: “Mba pañaŋɩ-ɩ yɔ, ɛhaɣ-wɛ mbʋ pe-liu wɛɛ yɔ, ɛnɩɣ po-kubusi nɛ ɛyakɩ pa-ñʋŋ.” (Keɣa 144:19) Ɛlɛ, adɩma wena ɖɩlakɩ se Ɛsɔ ɛsɩnɩ-ɖʋ nɛ ɖɩwɛɛnɩ tɩ ɖɔkʋʋ yɔ, ɛzɩma ecosuu a-yɔɔ?
(Roma mba 15:13) Ɛsɔ weyi ɛhaɣ lidaʋ yɔ, ɛla nɛ taa leleŋ nɛ laŋhɛzɩyɛ tɩŋa posu mɩ-taa ɖo mbʋ pʋyɔɔ yɔ ɩtaɣ-ɩ liu, se pɩsa nɛ mi-lidaʋ paɣlɩ pɩtɩŋnɩ fezuu kiɖeɖeu ɖoŋ taa.
w14 1/6 9 § 11
Sɔɔlɩ Yehowa ñɛ-Ɛsɔ
11 Yehowa ‘ha-ɖʋ lidaʋ ŋgʋ kiyeba se taa leleŋ nɛ laŋhɛzɩyɛ posu ɖa-taa ɖo yɔ.’ (Rom. 15:13) Lidaʋ ŋgʋ Ɛsɔ ha-ɖʋ yɔ, kɩsɩɣnɩ-ɖʋ se ɖɩɖɔkɩ ɖe-tisuu cɛzɩm taa. Pata-m numwaa mba ‘pɔɖɔkʋʋ pe-tisuu kpam nɛ pɩkɔɔ pɩtalɩ pa-sɩm wiye yɔ, papaŋ-wɛ wezuu hulaɣ ɛsɔdaa.’ (Natʋ 2:10) Mba pɛwɛnɩ lidaʋ se pakaɣ caɣʋ tɛtʋ yɔɔ yɔ, ye pɔɖɔkɩ pa-cɩŋgɩlɩm wɛtʋ kpam yɔ, pakaɣ hiɣu wazasɩ sɔsɔsɩ paradisuu taa tɛtʋ yɔɔ. (Luka 23:43, NW) Alɩwaatʋ ndʋ ɖɩmaɣzɩɣ Yehowa lidaʋ tɔm ndʋ tɩ-yɔɔ yɔ, ɛzɩma pɩlakɩ-ɖʋ? Taa leleŋ nɛ laŋhɛzɩyɛ posuu ɖa-taa ɖo, nɛ ɖɩsɔɔlɩ Weyi ɛ-cɔlɔ “paa pʋyʋ kɩbanʋ weyi, paa kʋjɔʋ kɩbaŋʋ ŋgʋ lɛ” palɩɣna yɔ.—Yak. 1:17.
Ðɩñɩnɩ fezuu taa ñɩm
(Roma mba 15:27) Toovenim taa lɛ, pɩkɛdɩnɩ-wɛ se pala mbʋ, nɛ toovenim taa lɛ, paatɔɔ-wɛ kɩmɩyɛ; mbʋ pʋyɔɔ yɔ ye patayɩnɩ ajɛɛ fezuu taa wondu yɔ, pɩwɛnɩ-yɛ ɖɔɖɔ se akpaɣ a-tomnaɣ yɔɔ wondu nɛ aɖʋnɩ-wɛ lɩm.
w89 1/12 24 § 3
“Mantakɩ mɩ-sɔɔlɩm nɛ mana se pɩkɛ toovenim na”
Pɩtʋʋ fɛyɩ se piiseɣti sɩɩnaa layaa mba papɩsɩ koobiya yɔ, se pasɩnɩ Krɩstʋ ñɩma mba paawɛ Yeruzalɛm yɔ pa-kʋñɔŋ taa. Toovenim taa lɛ, paatɔɔ ŋgee kɩmɩyɛ naɖɩyɛ Krɩstʋ ñɩma mba paawɛ Yeruzalɛm yɔ, mbʋ pʋyɔɔ yɔ Yeruzalɛm peeɖe tɔm kɩbandʋ lɩnaa nɛ tɩyɛlɩ nɛ tɩtalɩ sɩɩnaa layaa. Pʋyɔɔ Pɔɔlɩ yɔɔdaa se: “Toovenim taa lɛ, pɩkɛdɩnɩ-wɛ se pala mbʋ, nɛ toovenim taa lɛ, paatɔɔ-wɛ kɩmɩyɛ; mbʋ pʋyɔɔ yɔ ye patayɩnɩ ajɛɛ fezuu taa wondu yɔ, pɩwɛnɩ-yɛ ɖɔɖɔ se akpaɣ a-tomnaɣ yɔɔ wondu nɛ aɖʋnɩ-wɛ lɩm.”—Roma mba 15:27.
(Roma mba 16:25) Nɛ Ɛsɔ pɩzɩɣ ɛlabɩ-mɩ nɛ ɩka camɩyɛ pɩtɩŋnɩ tɔm kɩbandʋ ndʋ monsusuu Yesu Krɩstʋ yɔɔ yɔ; tɔm kɩbandʋ ndʋ, tɩlabɩ nɔɔ kʋɖʋmaɣ nɛ mɛsaɣ tɛɛ tɔm kiɖeɖetu ndʋ tɩ-yɔɔ pokulaa yɔ, ndʋ paamɛsɩ-tʋ ɖooo lɔŋ yɔ.
it-1 647 § 2
Cee yɔɔ sɩmtʋ, Ðooo lɔŋ ɖʋtʋ
Mesiya yaa Krɩstʋ kɛnɩ pʋlʋlaɣ ŋga kɔ-tɔm Ɛsɔ kaayɔɔdaa se ɛkaɣ kɔ-yɔɔ tɩŋnʋʋ nɛ ɛwazɩ ɛyaa siɣsiɣ tɩnaa tɩŋa tɛtʋ kpeekpe yɔɔ yɔ. (Gal 3:8, 14) Pakaɖɩnɩ Ɛsɔ Edɛɛnɩ kaɖaɣ taa nɛ pɩtɛ lɛ, ɛyɔɔdɩ “pʋlʋlaɣ” ŋga kɔ-tɔm kajalaɣ ɖeɖe; ɛlɛ alɩwaatʋ ndʋ ɛyɔɔdaɣ kɔ-tɔm yɔ, pataatɩɩlʋlɩtɩ Aabɛɛlɩ. (Kiɖe 3:15) Ɛsɔ yɔɔdɩ tɔm ndʋ nɛ pɩla pɩnzɩ 4000 pʋcɔ nɛ pokuli “mɛsaɣ tɛɛ tɔm kiɖeɖetu” yɔɔ nɛ ɛyaa tɩlɩ weyi “pʋlʋlaɣ” ŋga yaa Mesiya kɛnaa yɔ. Toovenim taa lɛ, pɩɩkɛ tɔm ndʋ “paamɛsɩ-tʋ ɖooo lɔŋ yɔ.”—Rom 16:25-27; Efɛ 1:8-10; 3:4-11.
Bibl kalʋʋ
(Roma mba 15:1-16) Ɛlɛ, ɖa mba ɖɩwɛ ɖoŋ yɔ, pɩwɛɛ se ɖɩsɩɣlɩ mba pɛfɛyɩ ɖoŋ yɔ pɛ-ɛjandʋ, nɛ ɖɩtaalakɩ mbʋ pɩkɛdɩɣnɩ ɖa-maɣmaɣ yɔ. 2 Iyele nɛ ɖa-taa paa weyi lɛ, ɛla mbʋ pɩkɛdɩɣnɩ ɛyʋ lɛlʋ yɔ se pɩwazɩ-ɩ, se pɩkpazɩ-ɩ ɖoŋ. 3 Mbʋ pʋyɔɔ yɔ, halɩ Krɩstʋ maɣmaɣ tɩla e-liu sɔɔlɩm, ɛlɛ ɛzɩ pamaʋ yɔ: “Mba patʋʋ-ŋ yɔ, pa-tʋtʋ tɔlɩ mɔ-yɔɔ.” 4 Mbʋ pʋyɔɔ yɔ mbʋ payɩ paama ɖooo lɔndaa yɔ, pama-pʋ se pawɩlɩ-ɖʋ lɔŋ, se pɩsa nɛ pɩtɩŋnɩ ɖa-laŋɩyɛ ɖɔkʋʋ nɛ laŋɩyɛ hɛzʋʋ mbʋ pɩlɩnɩ Masɩ taa yɔ pɩ-yɔɔ lɛ, ɖɩpɩzɩ nɛ ɖɩwɛɛnɩ lidaʋ. 5 Lɛɛlɛɛyɔ, tɛtɛ nɛ Ɛsɔ weyi ɛhaɣ laŋɩyɛ ɖɔkʋʋ nɛ laŋɩyɛ hɛzʋʋ yɔ, ɛla nɛ mɩ-tɩŋa ɩwɛɛnɩ maɣzɩm kʋɖʋmʋm mbʋ Krɩstʋ Yesu kaawɛna yɔ, 6 se pɩsa nɛ ɩkpɛndɩ nɛ ɩsa ɖa-Kɩbaɣlʋ Yesu Krɩstʋ tɛ Ɛsɔ nɛ ɛ-Caa nɔɔ kʋɖʋmaɣ taa. 7 Pʋyɔɔ lɛ, ɩmʋ ɖama ɛzɩ Krɩstʋ ɖɔɖɔ mʋʋ-mɩ yɔ, nɛ piyele nɛ pasa Ɛsɔ. 8 Mbʋ pʋyɔɔ yɔ, meheyiɣ-mɩ se Krɩstʋ pɩsɩ mba pɛpɛlɩ-wɛ yɔ pa-lɩmɖʋyʋ, Ɛsɔ weyi ɛyɔɔdʋʋ toovenim yɔ ɛ-yɔɔ, se pɩsa nɛ ɛwɩlɩ se lidaʋ tɔm ndʋ Ɛsɔ kaaheyi pɔ-cɔzɔnaa yɔ, tɩkɛ toovenim, 9 nɛ ajɛɛ pɩzɩ nɛ asa Ɛsɔ ɛ-pʋtɔdɩyɛ naʋ yɔɔ. Ɛzɩ pamaʋ yɔ: “Pʋyɔɔ mankaɣ-ŋ sam kaɣlaa ajɛɛ hɛkʋ taa, nɛ mankaɣ teu ña-hɩɖɛ samtʋ hendu.” 10 Nɛ ɛtasɩ yɔɔdʋʋ se: “Ɩwɛɛ taa leleŋ taa, mɩ ajɛɛ, nɛ ɛ-samaɣ.” 11 Nɛ ɛtasɩ se: “Ɩsa Yehowa, mɩ ajɛɛ tɩŋa payɩ, nɛ ɛyaa tɩŋa ɩsamɩ-ɩ.” 12 Nɛ Izaayii ɖaɣnɩ yɔɔdʋʋ se: “Yesee liɖe kaɣ lɩʋ, weyi ɛkaɣ kʋyʋʋ nɛ eɖiyi ajɛɛ yɔ; ajɛɛ kaɣ ɖʋʋ a-lidaʋ ɛ-yɔɔ.” 13 Ɛsɔ weyi ɛhaɣ lidaʋ yɔ, ɛla nɛ taa leleŋ nɛ laŋhɛzɩyɛ tɩŋa posu mɩ-taa ɖo mbʋ pʋyɔɔ yɔ ɩtaɣ-ɩ liu, se pɩsa nɛ mi-lidaʋ paɣlɩ pɩtɩŋnɩ fezuu kiɖeɖeu ɖoŋ taa. 14 Mon-koobiya, men-keem mentisaa nɛ mɛntɛ man-taa mɩ-yɔɔ se kɩbandʋ labʋ ɖɔɖɔ su mɩ-maɣmaɣ mɩ-taa ɖo, nɛ sɩmtʋ tɩŋa su mɩ-taa ɖo, nɛ man-taa tɛma ɖɔɖɔ se ɩpɩzɩɣ nɛ ɩtasɩ ɖama lɔŋ. 15 Ɛlɛ, mama-mɩ tɔm kpayɩ hɔɔlɩŋ nɩɩyɩ taa nɛ pɩkɩlɩ, se mɔntɔzɩ-mɩ tɔm lɛɛtʋ yɔɔ; nɛ malabɩ mbʋ lootiye nɖɩ Ɛsɔ ha-m 16 se mɛnkɛ Krɩstʋ Yesu samaɣ taa lɩmɖʋyʋ ajɛɛ taa yɔ ɖɩ-yɔɔ. Mɛwɛɛ nɛ malakɩ Ɛsɔ tɔm kɩbandʋ tɛ tʋmɩyɛ kiɖeɖee, se pɩsa nɛ ajɛɛ ana akɛ haɖɛ nɖɩ ɖɩkɛdɩnɩ Ɛsɔ yɔ, nɖɩ ɖɩpɩsɩ kele kele pɩtɩŋnɩ fezuu kiɖeɖeu yɔɔ yɔ.
18-24 MARS
ÑƖM MBƲ PƖWƐ ƐSƆTƆM TAA YƆ | 1 KƆRƐNTƖ MBA 1-3
“Tomnaɣ yɔɔ ɛyʋ yaa fezuu taa ɛyʋ ŋkɛnaa?”
(1 Kɔrɛntɩ mba 2:14) Ɛlɛ tomnaɣ yɔɔ ɛyʋ ɛɛmʋʋ Ɛsɔ fezuu wondu, mbʋ pʋyɔɔ yɔ tɩkɛ-ɩ kɩmɛlɛndʋ tɔm; nɛ ɛɛpɩzɩɣ se ɛtɩlɩ-tʋ, mbʋ pʋyɔɔ yɔ fezuu taa patazɩɣ tɩ-taa.
Ye pɔtɔm se nɔɔyʋ kɛ fezuu taa ɛyʋ, pʋ-tɔbʋʋ lɛ suwe?
4 Ðɩcalɩnɩ yɔɔdʋʋ tomnaɣ yɔɔ ɛyʋ wɛtʋ tɔm. Tomnaɣ yɔɔ ɛyʋ wɛnɩ ɛjaɖɛ yɔɔ mba lɩmaɣza nɛ ɛkaŋ ɛ-lɩmaɣza tomnaɣ sɔɔlɩm labʋ yɔɔ. Pɔɔlɩ yɔɔdaa se tomnaɣ yɔɔ ɛyʋ wɛnɩ ‘ɛjaɖɛ fezuu ŋgʋ kɩlakɩ tʋmɩyɛ mba palʋkɩ’ yaa mba pɛkɛ kaañamtʋ piya yɔ pa-taa. (Efɛz. 2:2) Fezuu ŋgʋ kɩwɛnɩ ɖoŋ ɛyaa sakɩyɛ yɔɔ nɛ kiseɣtiɣ-wɛ se pala mbʋ ɛyaa lalaa sɔɔlɩ labʋ yɔ. Pakaŋ pa-lɩmaɣza tomnaɣ yɔɔ wondu ɖeke yɔɔ. Mbʋ yebina nɛ ɛyaa sakɩyɛ lakɩ mbʋ pa-maɣmaɣ pamaɣzɩɣ se pɩwɛ ɖeu yɔ nɛ pa-paa fɛyɩnɩ Ɛsɔ paɣtʋ kila. Ðoŋ ɖoŋ lɛ, mbʋ pɩ-tɔm kɩlɩ cɛyʋʋ tomnaɣ yɔɔ ɛyʋ ɛsɩndaa yɔ lɛ hɩɖɛ sɛʋ nɛ tomnaɣ yɔɔ wondu ñɩnʋʋ kadadayaɣ yaa mbʋ ɛmaɣzɩɣ se pɩkɛ ɛ-wala yɔ, pɩ-yɔɔ lʋbʋ.
5 Ɛbɛ ɖɔɖɔ papɩzɩɣ nɛ patɩlɩnɩ tomnaɣ yɔɔ ɛyʋ? Ɛyʋ ɛnʋ, ɛsɔɔlɩ labʋ “tomnaɣ lakasɩ” nzɩ Bibl yɔɔdʋʋ sɩ-tɔm yɔ, sɩ-taa paa nzɩ. (Gal. 5:19-21) Pɔɔlɩ maɣaɣ ɛ-kajalaɣ takayaɣ Kɔrɛntɩ ñɩma lɛ, ɛyɔɔdɩ wɛtʋ ndʋ patɩlɩɣnɩ tomnaɣ yɔɔ ɛyaa yɔ tɩ-taa lɛɛtʋ tɔm. Tomnaɣ yɔɔ ɛyaa wɛtʋ ndʋ tɩ-taa natʋyʋ yɔ: Pɔkɔŋnɩ tayʋʋ ɛyaa hɛkʋ taa, patɩnɩɣ lalaa yɔɔ, peseɣtiɣ ɛyaa se [pakaɖɩnɩ] lalaa, powokini ɖama awiya tɛ, paañaŋ ñʋndɩnaa, pɛwɛ hiluu nɛ pɔsɔɔlɩ sʋlʋm kpaŋʋʋ. Tomnaɣ yɔɔ ɛyaa ɩɩlʋkɩnɩ takɩm ɛlɛ peyeki pa-tɩ nɛ pɔtɔlʋʋ pɩ-taa. (Adu. 7:21, 22) Yuudi kaatɛm yɔɔdʋʋ se ɛyaa wɛtʋ kaɣ wɛɛkʋʋ siŋŋ nɛ halɩ paakaɣ wɛnʋʋ fezuu taa “lɔŋ.”—Yud. 18, 19.
(1 Kɔrɛntɩ mba 2:15, 16) Ɛlɛ fezuu taa ɛyʋ tazɩɣ wondu tɩŋa taa, ɛlɛ ɛ-maɣmaɣ lɛ, ɛyʋ nɔɔyʋ ɛɛtazɩɣ ɛ-taa. 16 Mbʋ pʋyɔɔ yɔ “apɩzaa nɛ ɛtɩlɩ Yehowa maɣzɩm, se pɩsa nɛ ɛwɩlɩ-ɩ tɔm?” Ɛlɛ, ɖa lɛ, ɖɩwɛnɩ Krɩstʋ maɣzɩm.
Ye pɔtɔm se nɔɔyʋ kɛ fezuu taa ɛyʋ, pʋ-tɔbʋʋ lɛ suwe?
6 Lɛɛlɛɛyɔ, ɖɩyɔɔdɩ ‘fezuu taa ɛyʋ’ tɔm. Ye pɔtɔm se nɔɔyʋ kɛ fezuu taa ɛyʋ yɔ, pʋ-tɔbʋʋ lɛ se ɛsɔɔlɩ Ɛsɔ nɛ ɛ-wɛtʋ wɛ ndɩ siŋŋ nɛ tomnaɣ yɔɔ ɛyʋ ñɩndʋ. Fezuu taa ɛyʋ ñakɩ pana se ‘ɛkpaɣ Ɛsɔ’ yaa ɛmaɣzɩnɩ-ɩ. (Efɛz. 5:1) Pɩwɩlɩɣ se ɛñakɩ pana se ɛwɛɛnɩ Yehowa lɩmaɣza hɔɔlɩŋ tɩŋa taa nɛ ɛla ɛzɩ ɛlɛ sɔɔlʋʋ yɔ. Ɛ-ɛsɩndaa lɛ, Ɛsɔ wɛɛ keekee. Ɛfɛyɩ ɛzɩ tomnaɣ yɔɔ ɛyʋ yɔ, ɛlɛ ɛñakɩ pana se ɛɖɔ Yehowa paɣtʋ yɔɔ ɛ-nʋmɔŋ tɩŋa taa. (Keɣsi 118:33; 142:10) Ekiziɣ tomnaɣ lakasɩ nɛ ɛñakɩ pana ɖɔɖɔ se ɛwɛɛnɩ “fezuu lakasɩ” yaa ɛlʋlɩ fezuu piye.—Gal. 5:22, 23.
Ye pɔtɔm se nɔɔyʋ kɛ fezuu taa ɛyʋ, pʋ-tɔbʋʋ lɛ suwe?
15 Ɛzɩma ɖa-taa paa anɩ pɩzɩɣ ɛla nɛ ɛmaɣzɩnɩ Krɩstʋ? Bibl heyiɣ-ɖʋ 1 Kɔrɛntɩ 2:16 se ɖɩwɛɛnɩ “Krɩstʋ maɣzɩm.” Nɛ Roma 15:5 ñɔyɔɔdʋʋ ɖɔɖɔ se: “Ɩwɛɛnɩ maɣzɩm mbʋ Yesu Krɩstʋ kaawɛna ɖɔɖɔ yɔ.” Ye mbʋ, ye ɖɩñɩnɩɣ se ɖɩmaɣzɩnɩ Krɩstʋ yɔ, pɩwɛɛ se ɖɩñaɣ pana nɛ ɖɩtɩlɩ ɛ-lɩmaɣza nɛ ɛ-ɛyʋtʋ camɩyɛ; nɛ pʋwayɩ lɛ ɖɩtɩŋ ɛ-nɩŋgbanzɩ taa. Yesu kaaɖʋ ɛ-lɩmaɣza tɩŋa ɛ nɛ Ɛsɔ pa-taabalɩyɛ yɔɔ. Ye mbʋ, ye ɖɩmaɣzɩɣnɩ Yesu yɔ, piyeki nɛ ɖɩñɔtɩnɩ Yehowa nɛ pɩkɩlɩ. Pʋyɔɔ lɛ, pɩcɛyaa se ɖɩkpɛlɩkɩ nɛ ɖɩtɩlɩ Krɩstʋ maɣzɩm nɛ ɖɩñaɣ pana nɛ ɖɩwɛɛnɩ-pʋ.
Ðɩñɩnɩ fezuu taa ñɩm
(1 Kɔrɛntɩ mba 1:20) Le lɔŋsɩnɖʋ wɛɛ? Le paɣtʋ wɩlɩyʋ wɛɛ? Le ɛjaɖɛ yɔɔ ɖʋtʋ tʋnɛ tɩ-tɛ ndɔnjɔɔlɩyɛ laɖʋ wɛɛ? Ɛzɩ Ɛsɔ tɩpɩsɩ ɛjaɖɛ lɔŋsɩnɖɛ kɩmɛlɛndʋ na?
it-2 854 § 5
Lɔŋsɩnɖɛ
Ɛjaɖɛ maɣzɩɣ se ɖɩsɩm lɔŋ nɛ pʋyɔɔ ɖikizi kʋjɔʋ ŋgʋ Ɛsɔ tɩŋnɩ Krɩstʋ yɔɔ nɛ ɛla ɛyaa yɔ mbʋ pʋyɔɔ yɔ ɛjaɖɛ maɣzɩɣ se kʋjɔʋ ŋgʋ kɩkɛ kɩmɛlɛndʋ pʋyʋ; pɩtɩla ɛjaɖɛ ñʋndɩnaa kaatɔɔ kewiyitu ɛzɩ pɩpɔzʋʋ yɔ nɛ pala siɣsiɣ lakasɩ nasɩyɩ, ɛlɛ paa mbʋ yɔ ‘pakʋ Kɩbaɣlʋ sɔsɔ.’ (1Kɔ 1:18; 2:7, 8) Ɛlɛ lɛɛlɛɛyɔ, Ɛsɔ ñeɖiɣni ɛjaɖɛ yɔɔ lɔŋsɩnɖaa fɛyɛ ɖʋʋ nɛ ɛwɩlɩɣ se ɛjaɖɛ lɔŋsɩnɖɛ kɛnɩnɩ kɩmɛlɛndʋ. Ɛzɩma tɩyɛ? Eɖiɣni tʋmɩyɛ labɩnʋʋ e-wondu ndʋ ɛjaɖɛ maɣzɩɣ se tɩkɛ “kɩmɛlɛndʋ pʋyʋ yɔ” nɛ pɩkpɛndɩnɩ ɛyaa mba ɛjaɖɛ kpakɩɣ se pɛkɛ ‘kɩmɛlɛmɩŋ, ajamaa nɛ patɩlɩɩ pʋyʋ yɔ’ se eyele nɛ ɛ-kaɖʋwa la. (1Kɔ 1:19-28) Pɔɔlɩ tɔzɩ Kɔrɛntɩ Krɩstʋ mba se “ɛjaɖɛ yɔɔ ɖʋtʋ tʋnɛ tɩ-lɔŋsɩnɖɛ,” nɛ “ɛjaɖɛ yɔɔ ɖʋtʋ tʋnɛ tɩ-ñʋndɩnaa [lɔŋsɩnɖɛ]” kaɣ pɩsʋʋ kpɛɖɛ, nɛ lɔŋsɩnɖɛ nɖɩ ɖɩtaawɛɛ fezuu taa tɔm ndʋ apostoloo yɔɔdaɣ yɔ tɩ-taa. (1Kɔ 2:6, 13) Ɛpaɣ Krɩstʋ ñɩma mba paawɛ Koloosi yɔ se pakpa pa-tɩ nɛ “ɛjaɖɛ yɔɔ lɔŋsɩnɖɛ [philosophiʹas, pʋ-tɔbʋʋ lɛ se Lɔŋsɩnɖɛ sɔɔlʋʋ.]” Ɛpaɣ-wɛ ɖɔɖɔ se pakpa pa-tɩ nɛ “pɔbɔtʋ tɔm ndʋ tɩɩwazɩɣ pʋyʋ yɔ . . . ɛzɩ ɛyaa sɔnzɩ pɔzʋʋ yɔ.”—Kol 2:8; kpaɣ-tʋ ŋmaɣzɩnɩ kalɩtʋ 20-23.
(1 Kɔrɛntɩ mba 2:3-5) Nɛ maakɔm mɩ-cɔlɔ ɛjandʋ taa nɛ sɔɔndʋ taa nɛ maawɛɛ menseliɣ siŋŋ; 4 nɛ mɔ-yɔɔdaɣ nɛ tɔm ndʋ monsusaa yɔ patɩkɛ lɔŋsɩnɖɛ tɔm ndʋ tiyeba nɛ mawabɩ-mɩ yɔ, ɛlɛ pɛkɛ fezuu nɛ ɖoŋ wɩlʋʋ, 5 se pɩsa nɛ mi-tisuu ɛtaawɛɛ ɛyaa lɔŋsɩnɖɛ taa, ɛlɛ Ɛsɔ ɖoŋ taa.
w08 15/7 27 § 6
Kɔrɛntɩ mba takayɩsɩ taa lɩmaɣza sɔsɔna
2:3-5. Alɩwaatʋ ndʋ Pɔɔlɩ lɩzaɣ aseɣɖe Kɔrɛntɩ tɛtʋ ndʋ tɩ-taa pawɩlaɣ Grɛɛkɩ mba lɔŋsɩnɖɛ yɔ, pɩtɩla ɛpɔzaɣ ɛ-tɩ se, ‘Ɛzɩ mɔn-tɔm welisiyaa kaɣ mɔn-tɔm mʋʋ na?’ Paa mbʋ yɔ, ɛtaaha nʋmɔʋ ɛ-ɛjandʋ natʋyʋ yaa sɔɔndʋ se tɩɖɩɣ-ɩ nʋmɔʋ nɛ ɛtaala tʋmɩyɛ nɖɩ Ɛsɔ ɖʋ-ɩ yɔ. Ða ɖɔɖɔ pɩtɩmʋna se ɖɩha nʋmɔʋ wɛtʋ natʋyʋ nɛ tɩɖɩɣ-ɖʋ nʋmɔʋ nɛ ɖiyele Kewiyaɣ tɔm kɩbandʋ susuu. Ðɩpɩzɩɣ nɛ ɖɩtaa liu Yehowa se ɛsɩɣnɩ-ɖʋ ɛzɩ ɛɛsɩnʋʋ Pɔɔlɩ yɔ.
Bibl kalʋʋ
(1 Kɔrɛntɩ mba 1:1-17) Ma Pɔɔlɩ, weyi paya-ɩ se ɛkɛ Krɩstʋ Yesu tɛ apostoloo pɩtɩŋnɩ Ɛsɔ sɔɔlɩm yɔɔ yɔ, nɛ ɖo-koobu Sɔsɩtɛɛnɩ, 2 ɖamaɣnɩ takayaɣ kanɛ Ɛsɔ ɛgbɛyɛ nɖɩ ɖɩwɛ Kɔrɛntɩ yɔ, mɩ mba papɩsɩ-mɩ kele kele tɩnaa Krɩstʋ Yesu taa yɔ, nɛ payaa-mɩ se ɩkɛ kiɖeɖema yɔ, pɩkpɛndɩnɩ mba payɩ payaɣ ɖa-Kɩbaɣlʋ Yesu Krɩstʋ hɩɖɛ paa le yɔ, ɛnʋ weyi ɛkɛ pa-Kɩbaɣlʋ nɛ ɖa-Kɩbaɣlʋ yɔ: 3 Tɛtɛ nɛ ɩwɛɛnɩ lootiye nɛ laŋhɛzɩyɛ nɖɩ ɖɩlɩnɩ ɖa-Caa Ɛsɔ nɛ Kɩbaɣlʋ Yesu Krɩstʋ pɔ-cɔlɔ yɔ. 4 Mɛnsɛɣ mɛ-Ɛsɔ tam mɩ-yɔɔ se ɛlabaɣ lɛ, Ɛsɔ lootiye nɖɩ paha-mɩ Krɩstʋ Yesu taa yɔ ɖɩ-yɔɔ; 5 mbʋ pʋyɔɔ yɔ pɩtɩŋa pɩ-taa lɛ, papɩsɩ-mɩ ñɩm tɩnaa ɛ-taa, nɛ ɩwɛɛ niye siŋŋ yɔɔdaɣ taa, nɛ ɩwɛɛnɩ sɩmtʋ tɩŋa, 6 ɛzɩ Krɩstʋ yɔɔ aseɣɖe tɔm kam camɩyɛ mɩ-hɛkʋ taa yɔ, 7 nɛ pʋyɔɔ lɛ, ɩɩtɛɖɩɣ kʋjɔʋ nakʋyʋ paa ññɩɩ alɩwaatʋ ndʋ ɩwɛɛ nɛ ɩɖaŋɩɣ kpam ɖa-Kɩbaɣlʋ Yesu Krɩstʋ yɔɔ kuluu yɔ. 8 Ɛkaɣ yebu ɖɔɖɔ nɛ ɩka camɩyɛ nɛ pɩkɔɔ pɩtalɩ tɩnaɣ yɔɔ, se pɩsa nɛ pataana kɩdɛkɛdɩtʋ natʋyʋ mɩ-yɔɔ ɖa-Kɩbaɣlʋ Yesu Krɩstʋ kɩyakʋ wiye. 9 Ɛsɔ wɛ siɣsiɣ, ɛnʋ yanɩ-mɩ se mɩ nɛ ɛ-Pɩyalʋ, ɖa-Kɩbaɣlʋ Yesu Krɩstʋ, ɩkɛ taabalaa. 10 Lɛɛlɛɛyɔ lɛ koobiya, menseɣtiɣ-mɩ ɖa-Kɩbaɣlʋ Yesu Krɩstʋ hɩɖɛ taa, se mɩ-tɩŋa payɩ ɩkpɛndɩ yɔɔdaɣ, nɛ tayʋʋ ɛtaawɛɛ mɩ-hɛkʋ taa, ɛlɛ ɩla nɔɔ kʋɖʋmaɣ camɩyɛ maɣzɩm kʋɖʋmʋm taa nɛ ɩwɛɛnɩ lɩmaɣza kʋɖʋma. 11 Mbʋ pʋyɔɔ yɔ, mon-koobiya, Klowee ɖɩɣa taa mba nabɛyɛ heyi-m mɩ-tɔm se ɖama kɩɩnɩnʋʋ wɛ mɩ-hɛkʋ taa. 12 Tɔm ndʋ mancaɣ yɔɔdʋʋ yɔ, ndʋ lɛ se mɩ-taa paa weyi lɛ ɛtɔŋ se: “Ma yɔ, mɛnkɛ Pɔɔlɩ ñɩnʋ,” lɛlʋ se: “Ma lɛ, mɛnkɛ Apoloosi ñɩnʋ,” lɛlʋ ɖɔɖɔ se: “Ma lɛ, mɛnkɛ Sefaasɩ ñɩnʋ,” nɛ lɛlʋ ñɔtɔŋ se: “Ma lɛ, mɛnkɛ Krɩstʋ ñɩnʋ.” 13 Ɛzɩ patayɩ Krɩstʋ? Pɔɔlɩ pakam sizika yɔɔ mɩ-yɔɔ yaa we? Yaa Pɔɔlɩ hɩɖɛ taa pamɩyɩsɩ-mɩ lɩm? 14 Mɛnsɛɣ Ɛsɔ se ɛlabaɣ lɛ, mbʋ pʋyɔɔ yɔ mantɩmɩyɩsɩ mɩ-taa nɔɔyʋ lɩm nɛ pɩtasɩnɩ Krispuusi nɛ Gayuusi, 15 se pɩsa nɛ nɔɔyʋ ɛtaapɩzɩ nɛ ɛyɔɔdɩ se ma-hɩɖɛ taa pamɩyɩsɩ-mɩ lɩm. 16 Ɛɛɛ, mamɩyɩsɩ lɩm ɖɔɖɔ Stefanaasɩ ɖɩɣa taa mba. Piyele nɛ pɩkazɩ mba yɔ, maasɩŋ se mamɩyɩsɩ nɔɔyʋ lɩm yaa mantɩmɩyɩsɩ. 17 Mbʋ pʋyɔɔ yɔ Krɩstʋ titiyi-m se mamɩyɩsɩ ɛyaa lɩm, ɛlɛ se monsusi tɔm kɩbandʋ; nɛ maatɩŋɩɣnɩ lɔŋsɩnɖaa yɔɔdaɣ yɔɔ, se pɩtaala nɛ Krɩstʋ nazɩm sizika pɩsɩ mbʋ pɩfɛyɩ wazaɣ yɔ.
25-31 MARS
ÑƖM MBƲ PƖWƐ ƐSƆTƆM TAA YƆ | 1 KƆRƐNTƖ MBA 4-6
“Lɔlɔm pazɩ yem lakɩ nɛ mʋtʋ kpeekpe ñɩŋ”
(1 Kɔrɛntɩ mba 5:1, 2) Toovenim taa lɛ, pɛkɛdɩɣ se kʋzʋʋ kɩdɛkɛdʋʋ nakʋyʋ wɛ mɩ-hɛkʋ taa, nɛ kʋzʋʋ kɩdɛkɛdʋʋ ŋgʋ, halɩ kɩfɛyɩ ajɛɛ hɛkʋ taa—abalʋ nɔɔyʋ kpaɣ ɛ-caa halʋ. 2 Nɛ ɩkpazɩɣ mɩ-tɩ pɩ-yɔɔ? Ɛzɩ pɩtaawɛɛ se ɩwɛɛ kʋñɔwiye taa, nɛ abalʋ weyi ɛlabɩ lakasɩ nzɩ yɔ, palɩzɩ-ɩ mɩ-hɛkʋ taa yaa we?
(1 Kɔrɛntɩ mba 5:5-8) pɩwɛɛ se ɩɖʋzɩ abalʋ ɛnʋ Sataŋ nesi tɛɛ nɛ paɖɩzɩ tomnaɣ, se pɩsa nɛ fezuu hiɣ ñʋʋ yabɩtʋ Kɩbaɣlʋ kɩyakʋ wiye. 6 Mɩ-agʋnda fɛyɩ ɖeu. Ɩɩsɩŋ se lɔlɔm pazɩ yem lakɩ nɛ mʋtʋ kpeekpe ñɩŋ yaa we? 7 Ɩlɩzɩ lɔlɔm kɩbɩnʋʋ se pɩsa nɛ ɩkɛ mʋtʋ kɩfatʋ, mbʋ pʋyɔɔ yɔ mbʋ pɩñɩŋaa yɔ pɩfɛyɩ mɩ-taa. Mbʋ pʋyɔɔ yɔ toovenim taa lɛ, Krɩstʋ weyi ɛkɛ ɖɛ-tɛ Paska heɣa yɔ, pala-ɩ. 8 Pʋyɔɔ lɛ, iyele nɛ ɖɩtɔɔ kazandʋ, ɖɩtaatɔɔ-tʋ nɛ lɔlɔm kɩbɩnʋʋ, ɖɩtaatɔɔ-tʋ ɖɔɖɔ nɛ kɩdɛkɛdɩm nɛ kañatʋ lakasɩ lɔlɔm, ɛlɛ ɖɩtɔɔ-tʋ nɛ kpɔnʋ ŋgʋ kɩ-taa patɩɖʋ lɔlɔm nɛ kɩkɛ siɣsiɣ wɛtʋ nɛ toovenim kpɔnʋ yɔ.
(1 Kɔrɛntɩ mba 5:13) nɛ Ɛsɔ ñahʋʋnɩ awayɩ mba tɔm yaa we? “Ɩlɩzɩ ɛyʋ kɩdɛkɛdʋ mɩ-hɛkʋ taa.”
it-2 130
Lɔlɔm
Apostoloo Pɔɔlɩ labɩnɩ tʋmɩyɛ kɩɖaʋ kʋɖʋmʋʋ ŋgʋ alɩwaatʋ ndʋ eheyaɣ Kɔrɛntɩ Krɩstʋ ɛgbɛyɛ taa mba se palɩzɩ ɛyʋ weyi ɛcakaɣ wezuu kɩdɛkɛdʋʋ yɔ ɛgbɛyɛ taa yɔ. Ɛyɔɔdaa se: “Ɩɩsɩŋ se lɔlɔm pazɩ yem lakɩ nɛ mʋtʋ kpeekpe ñɩŋ yaa we? Ɩlɩzɩ lɔlɔm kɩbɩnʋʋ se pɩsa nɛ ɩkɛ mʋtʋ kɩfatʋ, mbʋ pʋyɔɔ yɔ mbʋ pɩñɩŋaa yɔ pɩfɛyɩ mɩ-taa. Mbʋ pʋyɔɔ yɔ toovenim taa lɛ, Krɩstʋ weyi ɛkɛ ɖɛ-tɛ Paska heɣa yɔ, pala-ɩ.” Pʋwayɩ Pɔɔlɩ lɩzɩ mbʋ ɛyaɣ se “lɔlɔm” yɔ pɩ-taa kpayɩ kpayɩ. Ɛtasɩ yɔɔdʋʋ se: “Pʋyɔɔ lɛ, iyele nɛ ɖɩtɔɔ kazandʋ, ɖɩtaatɔɔ-tʋ nɛ lɔlɔm kɩbɩnʋʋ, ɖɩtaatɔɔ-tʋ ɖɔɖɔ nɛ kɩdɛkɛdɩm nɛ kañatʋ lakasɩ lɔlɔm, ɛlɛ ɖɩtɔɔ-tʋ nɛ kpɔnʋ ŋgʋ kɩ-taa patɩɖʋ lɔlɔm nɛ kɩkɛ siɣsiɣ wɛtʋ nɛ toovenim kpɔnʋ yɔ.” (1Kɔ 5:6-8) Cɩnɛ lɛ, Pɔɔlɩ kpaɣ kpɔnʋ kɩtɩñɩŋʋʋ kazandʋ ndʋ tɩtɩŋaɣ Paska kazandʋ wayɩ kpaagbaa yɔ tɩ-kɩɖaʋ nɛ ɛlɩzɩnɩ tɔm taa. Ɛzɩ mʋtʋ kɩñɩŋɩtʋ pazɩ yem lakʋʋ nɛ mʋtʋ kpeekpe ñɩŋɩɣ yɔ, mbʋ ɖɔɖɔ ye patɩlɩzɩ ɛyʋ weyi ɛcakɩ wezuu kɩdɛkɛdʋʋ yɔ pɛ-hɛkʋ taa yɔ, ɛgbɛyɛ kpeekpe pɩsɩɣ azuluma pʋyʋ Yehowa ɛsɩndaa. Kpɔnʋ kɩtɩñɩŋʋʋ kazandʋ alɩwaatʋ taa pɩtaapɔzɩ se lɔlɔm ɛwɛɛ Izrayɛɛlɩ pɩɣa nakɛyɛ ɖɩɣa taa, mbʋ ɖɔɖɔ pɩcɛyaa se Kɔrɛntɩ ɛgbɛyɛ taa koobiya ɩlɩzɩ lɔlɔm pɛ-hɛkʋ taa.
it-2 903-904
Sataŋ
Pɔɔlɩ yɔɔdʋʋ se ‘paɖʋzɩ kɩwɛɛkɩm laɖʋ Sataŋ nesi tɛɛ nɛ paɖɩzɩ tomnaɣ’ yɔ, pʋ-tɔbʋʋ lɛ suwe?
Pɔɔlɩ yɔɔdaɣ mbʋ pɩwɛɛ se Kɔrɛntɩ ɛgbɛyɛ taa mba ɩla ɛyʋ weyi ɛsʋnɩ ɛ-caa halʋ yɔ lɛ, ɛmawa se: “Ɩɖʋzɩ abalʋ ɛnʋ Sataŋ nesi tɛɛ nɛ paɖɩzɩ tomnaɣ.” (1Kɔ 5:5) Pɔɔlɩ wɩlaɣ-wɛ se pɩwɛɛ se palɩzɩ ɛyʋ ɛnʋ ɛgbɛyɛ taa nɛ taabalɩyɛ naɖɩyɛ ɛtaatasɩ wɛʋ pa nɛ ɩ pɛ-hɛkʋ taa. (1Kɔ 5:13) Ye paɖʋzɩ-ɩ Sataŋ nesi tɛɛ yɔ, pɩwɩlɩɣ se palɩzɩ-ɩ ɛgbɛyɛ taa nɛ ɛwɛɛ ɛjaɖɛ nɖɩ Sataŋ kɛ ɖɩ-ɛsɔ nɛ ɖi-wiyaʋ yɔ ɖɩ-taa. Ɛzɩ “lɔlɔm pazɩ yem” “mʋtʋ kpeekpe” taa yɔ, mbʋ ɖɔɖɔ ɛyʋ ɛnʋ ɛkɛ “tomnaɣ” yaa tomnaɣ yɔɔ wonuu ŋgʋ kɩwɛ ɛgbɛyɛ taa yɔ, nɛ ye palɩzɩ ɛyʋ kɩdɛkɛdʋ ɛnʋ yɔ, ɛgbɛyɛ taa koobiya mba pɛkɛ fezuu taa ɛyaa yɔ, paɖɩzɩɣ “tomnaɣ” pɛ-hɛkʋ taa. (1Kɔ 5:6, 7) Mbʋ ɖɔɖɔ Pɔɔlɩ kaakpaɣ Imenee nɛ Alɛkɩsandrɩ nɛ ɛɖʋzɩ Sataŋ nesi tɛɛ, mbʋ pʋyɔɔ yɔ paalɔ tisuu nɛ ɛhʋyɛ kɩbanɖɛ nɖɩ paawɛna yɔ nɛ pe-tisuu ɖʋ lɩm.—1Ti 1:20.
(1 Kɔrɛntɩ mba 5:9-11) Mama-mɩ man-takayaɣ taa se iyele taabalɩyɛ ɖʋʋ nɛ mba pacakɩ kʋzʋʋ kɩdɛkɛdʋʋ wezuu yɔ, 10 maayɔɔdʋʋ se iposi mɩ-tɩ caɣ caɣ nɛ ɛjaɖɛ ɖɩnɛ ɖɩ-yɔɔ ɛyaa mba pacakɩ kʋzʋʋ kɩdɛkɛdʋʋ wezuu yɔ yaa ɛsa naɣ naɣ tɩnaa yaa mɔntɔkɩnɩ mon-ɖoŋwaa yaa sɩɩnaa layaa. Ye pɩɩkɛ mbʋ yɔ, toovenim taa lɛ, pɩɩpɔzaa se ɩkʋyɩ ɛjaɖɛ yɔɔ. 11 Ɛlɛ lɛɛlɛɛyɔ lɛ, mamaɣ-mɩ se iyele taabalɩyɛ ɖʋʋ nɛ weyi payaɣ-ɩ se koobu nɛ ɛcakɩ kʋzʋʋ kɩdɛkɛdʋʋ wezuu yɔ, yaa ɛyʋ weyi ɛwɛ ɛsa naɣ naɣ yɔ, yaa sɩɩnaa layʋ, yaa ɛyaa tʋyʋ, yaa sʋlʋm kpaŋɩyʋ, yaa mɔntɔkɩnɩ mon-ɖoŋ, halɩ mɩ nɛ ɛyʋ ɛnʋ ɩtaatɔɔ.
lvs 241, tɩnaɣ yɔɔ tɔm
Ɛyaa lɩzʋʋ ɛgbɛyɛ taa
Ye nɔɔyʋ ɛlabɩ kɩwɛɛkɩm sɔsɔm nɛ ekizi se eekpiɖiɣ pɩ-yɔɔ yɔ, ɛɛtasɩɣ pɩzʋʋ nɛ ɛwɛɛ Krɩstʋ ɛgbɛyɛ taa. Pɩpɔzʋʋ se palɩzɩ-ɩ ɛgbɛyɛ taa. Ye palɩzɩ nɔɔyʋ ɛgbɛyɛ taa yɔ, pɩwɛɛ se ɖɩcɛ ɖa nɛ ɩ ɖa-taabalɩyɛ nɛ ɖiyebi-i yɔɔdɩnʋʋ. (1 Kɔrɛntɩ mba 5:11; 2 Yohanɛɛsɩ 9-11) Ðʋtʋ ndʋ palaba se palɩzɩ ɛyaa ɛgbɛyɛ taa yɔ, tɩñalɩɣ Yehowa hɩɖɛ yɔɔ, nɛ tɩkandɩyɩɣ ɖɔɖɔ ɛgbɛyɛ taa ñɩma lalaa yɔɔ. (1 Kɔrɛntɩ mba 5:6) Ðʋtʋ ndʋ tɩpɩzɩɣ tɩsɩnɩ ɖɔɖɔ weyi ɛlabɩ kɩwɛɛkɩm yɔ nɛ ɛna se pɩpɔzʋʋ se ɛlɛɣzɩ ɛ-wɛtʋ nɛ ɛpɩsɩ Yehowa cɔlɔ.—Luka 15:17.
▸ Ñʋʋ 3, tayʋʋ 19
Ðɩñɩnɩ fezuu taa ñɩm
(1 Kɔrɛntɩ mba 4:9) Mbʋ pʋyɔɔ yɔ pɩlakɩ-m ɛzɩ Ɛsɔ lem ɖa mba ɖɩkɛ apostoloowaa yɔ kɛdɛzaɣ ɖeɖe ɛzɩ mba pakʋ pɔ-tɔm se pamʋnɩ sɩm yɔ, mbʋ pʋyɔɔ yɔ ɛjaɖɛ, nɛ Ɛsɔ tiyiyaa nɛ ɛyaa ɛsɩndaa lɛ, ɖɩpɩsɩ ɛzɩ mba pɔcɔŋnɩ-wɛ aleɣya ɖɩlaɖɛ taa yɔ.
w09 15/5 24 § 16
Ɛsɔ tiyiyaa kɛnɩ “feziŋ weyi ɩlakɩ tʋmɩyɛ kiɖeɖee” yɔ
16 Alɩwaatʋ ndʋ Krɩstʋ mba wɛɣ takɩm taa lɛ, ‘Ɛsɔ tiyiyaa ɛsɩndaa lɛ, papɩsɩ ɛzɩ mba pɔcɔŋnɩ-wɛ aleɣya ɖɩlaɖɛ taa yɔ.’ (1 Kɔr. 4:9) Ɛsɔ tiyiyaa cɔŋna ɖe-siɣsiɣ wɛtʋ nɛ pɩkɛdɩɣnɩ-wɛ, nɛ halɩ ye kɩdɛkɛdɩm laɖʋ nɔɔyʋ ekpiɖi ɛ-lakasɩ yɔɔ kɔyɔ, pa-taa lakɩ leleŋ. (Luka 15:10) Ɛsɔ tiyiyaa naɣ wezuu kɩbaŋʋ ŋgʋ halaa Krɩstʋ mba cakɩ yɔ. Bibl wɩlɩɣ se “pɩwɛɛ se halʋ ɛwɛɛnɩ ɛ-ñʋʋ yɔɔ yʋsaɣ ŋga kawɩlɩɣ se ɛwɛ ñʋʋdʋ nɔɔyʋ tɛɛ yɔ, Ɛsɔ tiyiyaa yɔɔ.” (1 Kɔr. 11:3, 10) Toovenim lɛ, alɩwaatʋ ndʋ Ɛsɔ tiyiyaa naɣ halaa Krɩstʋ mba nɛ Ɛsɔ sɛyaa lalaa tɩŋa payɩ tɛtʋ yɔɔ nɛ pɔɖɔŋ teokrasɩ ɖʋtʋ nɛ sɔsɔtʋ ɖʋtʋ ndʋ Ɛsɔ laba yɔ tɩ-yɔɔ lɛ, pɩkɛdɩɣnɩ-wɛ. Ñamtʋ ndʋ tɩtɔzʋʋ Ɛsɔ tiyiyaa se pɩwɛɛ se paba ɖɔɖɔ poluzi pa-tɩ.
(1 Kɔrɛntɩ mba 6:3) Ɩtɩtɩlɩ se ɖɩkaɣ Ɛsɔ tiyiyaa tɔm hʋnʋʋ yaa we? Ye mbʋ, ɛbɛ yɔɔ ɖɩɩpɩzɩɣ nɛ ɖɩhʋʋ wezuu kʋnɛ kɩ-taa tɔm?
it-2 151
Paɣtʋ
Paɣtʋ ndʋ tɩ-yɔɔ Ɛsɔ tiyiyaa ɖɔŋ yɔ. Ɛsɔ tiyiyaa kɩlɩ ɛyaa, ɛlɛ poluzuu pa-tɩ Ɛsɔ paɣtʋ tɛɛ. (Ebr 1:7, 14; Keɣa 104:4, nwt) Halɩ Yehowa ɖʋ paɣtʋ e-koyindu Sataŋ nɛ ɛɖʋ-ɩ kamasɩ nzɩ sɩ-yɔɔ pɩtɩha-ɩ nʋmɔʋ se ɛtɛzɩ yɔ. (Yɔɔb 1:12; 2:6) Tiyiyaa ñʋʋdʋ Mikayɛɛlɩ ɖiɣzinaa se Yehowa kɛnɩ Tɔm Hʋyʋ Kɩlɩm nɛ eluzuu ɛ-tɩ ɛ-tɛɛ, pʋyɔɔ alɩwaatʋ ndʋ tɔm kaakɔm ɛ nɛ Eleeu pɛ-hɛkʋ taa yɔ, eheyi-i se: “Yehowa ɛhʋnɩ-ŋ tɔm.” (Yud 9; kpaɣ-tʋ ŋmaɣzɩnɩ Zek 3:2) Yehowa Ɛsɔ ɖʋ Yesu Krɩstʋ hɩɖɛ nɛ ɛha-ɩ ɖoŋ tiyiyaa tɩŋa yɔɔ. (Ebr 1:6; 1 Pɩy 3:22; Mt 13:41; 25:31; Fil 2:9-11) Pʋyɔɔ Yesu kaapɩzaa nɛ etiyi tiyiyu nɔɔyʋ Yohanɛɛsɩ cɔlɔ. (Nat 1:1) Paa mbʋ yɔ, apostoloo Pɔɔlɩ yɔɔdɩ 1 Kɔrɛntɩ mba 6:3 taa se Krɩstʋ koobiya fezuu taa mba kaɣ hʋnʋʋ tiyiyaa tɔm, mbʋ pʋyɔɔ yɔ Krɩstʋ koobiya mba, pakaɣ ɖʋʋ nesi nɛ pahʋʋnɩ tɔm feziŋ kɩdɛkɛdɩŋ.
Bibl kalʋʋ
(1 Kɔrɛntɩ mba 6:1-14) Ye nɔɔhɔnɖɛ naɖɩyɛ ɛwɛ mɩ-taa nɔɔyʋ nɛ lɛlʋ pɛ-hɛkʋ taa yɔ, ɛkatɩɣ se ewoni-i tɔm ɖɩhʋyɛ, ɛyaa mba pɛfɛyɩ siɣsiɣ yɔ pɛ-ɛsɩndaa, nɛ eewokini-i ɛyaa kiɖeɖema ɛsɩndaa? 2 Yaa ɩtɩtɩlɩ se ɛyaa kiɖeɖema kaɣnɩ ɛjaɖɛ tɔm hʋnʋʋ? Nɛ ye mɩkaɣnɩ ɛjaɖɛ tɔm hʋnʋʋ, ɩɩpɩzɩɣ nɛ ɩhʋʋ tɔm cikpetu ndʋ tɩtɩlɩɩ pʋyʋ yɔ? 3 Ɩtɩtɩlɩ se ɖɩkaɣ Ɛsɔ tiyiyaa tɔm hʋnʋʋ yaa we? Ye mbʋ, ɛbɛ yɔɔ ɖɩɩpɩzɩɣ nɛ ɖɩhʋʋ wezuu kʋnɛ kɩ-taa tɔm? 4 Nɛ ye pɩwɛɛ se ɩhʋʋ wezuu kʋnɛ kɩ-taa tɔm yɔ, ɛyaa mba peniŋ-wɛ ɛgbɛyɛ taa yɔ ɩkpakɩɣ se pɛkɛ tɔm hʋyaa yaa we? 5 Mɔyɔɔdʋʋ mbʋ se fɛyɛ ɛkpa-mɩ. Ɛzɩ lɔŋsɩnɖʋ kʋɖʋm maɣmaɣ fɛyɩ mɩ-hɛkʋ taa, weyi ɛpɩzɩɣ nɛ ɛhʋʋ tɔm e-koobiya hɛkʋ taa yɔ? 6 Ɛlɛ koobu wokini koobu tɔm ɖɩhʋyɛ, nɛ pɩtɩŋa mbʋ yɔ ɛyaa mba pɛfɛyɩnɩ tisuu yɔ pɔ-cɔlɔ! 7 Toovenim taa lɛ, alɩwaatʋ ndʋ ɩyaɣ ɖama tɔm yɔ pɩwɩlɩɣ se ɩtɛm tɔlʋʋ. Ɛbɛ yɔɔ ɩɩɖɔkʋʋ mɩ-tɩ alɩwaatʋ ndʋ palakɩ-mɩ mbʋ pɩfɛyɩ ɖeu yɔ? Ɛbɛ yɔɔ iiyeki mɩ-tɩ se pomuli-mɩ? 8 Ɛlɛ, ɩlakɩ mbʋ pɩfɛyɩ ɖeu yɔ nɛ imuluu, nɛ mi-koobiya ɩlakɩ mbʋ! 9 Yaa ɩɩsɩŋ se ɛyaa mba pɛfɛyɩ siɣsiɣ yɔ, paakaɣ hiɣu Ɛsɔ Kewiyaɣ? Itaapeɣzi mɩ-tɩ. Mba pacakɩ kʋzʋʋ kɩdɛkɛdʋʋ wezuu yɔ, sɩɩnaa layaa, acɛyɛ laɖaa, abalaa mba pɛcɛlɩɣ pa-tɩ se abalaa lalaa ɩsʋʋnɩ-wɛ yɔ, abalaa mba pasʋʋnɩ abalaa yɔ, 10 mɩlaa, ɛsa naɣ naɣ tɩnaa, sʋlʋm kpaŋɩyaa, ɛyaa tʋyaa nɛ mɔntɔkɩnɩ mon-ɖoŋwaa ɩɩkaɣ hiɣu Ɛsɔ Kewiyaɣ. 11 Paa mbʋ yɔ, mbʋ mɩ-taa nabɛyɛ kaawɛɛ. Ɛlɛ pɔsɔ-mɩ lɩm nɛ ɩwɛɛ kele kele; papɩsɩ-mɩ kiɖeɖema; paya-mɩ se siɣsiɣ tɩnaa Kɩbaɣlʋ Yesu Krɩstʋ hɩɖɛ taa nɛ pɩtɩŋnɩ ɖɛ-Ɛsɔ fezuu yɔɔ. 12 Paha-m nʋmɔʋ pɩtɩŋa pɩ-yɔɔ, ɛlɛ pɩtɩkɛ pɩtɩŋa pɩwɛnɩ wazaɣ. Paha-m nʋmɔʋ pɩtɩŋa pɩ-yɔɔ, ɛlɛ maayeki se nabʋyʋ ɛwɛɛnɩ ɖoŋ mɔ-yɔɔ. 13 Tɔɔnaɣ yɔɔ lotu wɛɛ nɛ lotu ñɛwɛɛ tɔɔnaɣ yɔɔ, ɛlɛ Ɛsɔ kaɣ pa-naalɛ ɖɩzʋʋ. Pɩtɩkɛ kʋzʋʋ kɩdɛkɛdʋʋ yɔɔ tomnaɣ wɛɛ ɛlɛ Kɩbaɣlʋ yɔɔ kɛwɛɛ, nɛ Kɩbaɣlʋ wɛɛ tomnaɣ yɔɔ. 14 Ɛlɛ Ɛsɔ fezi Kɩbaɣlʋ nɛ ɛkaɣ-ɖʋ fezuu ɖɔɖɔ nɛ sɩm taa pɩtɩŋnɩ e-ɖoŋ yɔɔ.