MWBR19 02 Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
4-10 FÉVRIER
ÑƖM MBƲ PƖWƐ ƐSƆTƆM TAA YƆ | ROMA MBA 1-3
“Wɛɛ ŋfalɩsɩɣ ñɛ-ɛhʋyɛ”
(Roma mba 2:14, 15) Mbʋ pʋyɔɔ yɔ alɩwaatʋ ndʋ ajɛɛ taa ñɩma mba pɛfɛyɩnɩ paɣtʋ yɔ pɔɖɔŋ paɣtʋ yɔɔ yɔ, ɛyaa mba, paa pɛfɛyɩnɩ paɣtʋ yɔ, pɛkɛ paɣtʋ pa-maɣmaɣ pa-tɩ. 15 Pa-maɣmaɣ pawɩlɩɣna se pama paɣtʋ taa tɔm pa-laŋa taa, nɛ pɛ-ɛhʋyɛ ɖɔɖɔ lɩzɩɣ aseɣɖe, nɛ pa-maɣmaɣ pa-lɩmaɣza kʋʋ pɔ-tɔm yaa awɩlɩɣ-wɛ se pɛwɛnɩ toovenim.
Ðɩwɛɛnɩ ɛhʋyɛ kɩbanɖɛ Ɛsɔ ɛsɩndaa
6 Halɩ ɛyaa mba paasɩŋ Yehowa yɔ, panawa se lakasɩ nasɩyɩ kɛ kɩbanzɩ nɛ lɛɛsɩ ñɛkɛ kɩdɛkɛdɩsɩ. Bibl yɔɔdaa se: “Pa-laŋa ana ɖɔɖɔ awɩlɩɣnɩ-wɛ tɔm kɩbandʋ yaa tɔm kɩdɛkɛdɩtʋ ndʋ pɔyɔɔdʋʋ . . . yɔ.” (Roma mba 2:14, 15) Ɛyaa sakɩyɛ nawa se ɛyaa kʋʋ nɛ mɩlɩm pɩfɛyɩ ɖeu. Ye mbʋ, paa pa-maɣmaɣ patɩtɩlɩ yɔ, pɛwɛɛ nɛ pewelisiɣni ɛhʋyɛ nɖɩ Yehowa ha-wɛ se pɩsa nɛ patɩlɩ kɩbam nɛ kɩdɛkɛdɩm yɔ. Pɛwɛɛ nɛ palakɩnɩ tʋmɩyɛ ɖɔɖɔ [Ɛsɔ] paɣtʋ kila wena Yehowa ha-ɖʋ se asɩnɩ-ɖʋ nɛ ɖɩkpakɩɣ lɩmaɣza camɩyɛ ɖe-wezuu caɣʋ taa yɔ.
(Roma mba 2:15) Pa-maɣmaɣ pawɩlɩɣna se pama paɣtʋ taa tɔm pa-laŋa taa, nɛ pɛ-ɛhʋyɛ ɖɔɖɔ lɩzɩɣ aseɣɖe, nɛ pa-maɣmaɣ pa-lɩmaɣza kʋʋ pɔ-tɔm yaa awɩlɩɣ-wɛ se pɛwɛnɩ toovenim.
Ðɩwɛɛnɩ ɛhʋyɛ kɩbanɖɛ Ɛsɔ ɛsɩndaa
8 Ɛyaa nabɛyɛ maɣzɩɣ se ye pɔtɔm se ɛyʋ ewelisini ɛ-ɛhʋyɛ yɔ, pʋ-tɔbʋʋ lɛ se ɛla mbʋ ɛ-laŋɩyɛ tuyuu-i se ɛla yɔ. Pamaɣzɩɣ se papɩzɩɣ nɛ pala mbʋ payɩ pɔsɔɔlaa yɔ, ye pɩwɛ ɖeu pɛ-ɛsɩndaa yɔ. Ɛlɛ ɖa-laŋɩyɛ tɩtalɩ pilim nɛ ɖɩpɩzɩɣ nɛ ɖipeɣzi-ɖʋ. Ða-lɩmaɣza pɩzɩɣ nɛ awɛɛnɩ ɖoŋ siŋŋ ɖɛ-ɛhʋyɛ yɔɔ. Bibl yɔɔdaa se: “Laŋɩyɛ kɛ peɣziyu pɩkɩlɩ pɩtɩŋa . . ., apɩzɩɣ nɛ ɛna ɖɩ-taa?” (Yereemii 17:9, nwt) Ye mbʋ ɖɩpɩzɩɣ nɛ ɖɩmaɣzɩ se nabʋyʋ wɛ ɖeu ŋgʋ toovenim taa lɛ, pɩfɛyɩ ɖeu. Ðɩkpaɣ Pɔɔlɩ kɩɖaʋ. Pʋcɔ nɛ ɛpɩsɩ Krɩstʋ tʋ lɛ, ɛnazɩ Ɛsɔ samaɣ pɩdɩɩfɛyɩ, nɛ ɛmaɣzaɣ se kɩbam ɛlakaɣ. Ɛmaɣzaɣ se ɛwɛnɩ ɛhʋyɛ kɩbanɖɛ. Ɛlɛ ɛkɔma nɛ ɛyɔɔdɩ pʋwayɩ se: “Mɔn-tɔm hʋyʋ lɛ [Yehowa].” (1 Kɔrɛntɩ mba 4:4; Tʋma Labʋ 23:1; 2 Timootee 1:3) Pɔɔlɩ kɔma nɛ ɛtɩlɩ ndʋ Yehowa maɣzɩɣ pɩlɩɩnɩ ɛ-lakasɩ yɔɔ lɛ, ɛnɩɩ pɩ-taa se pɩpɔzʋʋ se ɛlɛɣzɩ e-wezuu caɣʋ. Pʋyɔɔ lɛ, pʋcɔ nɛ ɖɩla nabʋyʋ lɛ, pɩwɛɛ se ɖɩpɔzɩ ɖa-tɩ se: ‘Ɛbɛ Yehowa sɔɔlaa se mala?’
9 Ye ŋsɔɔlɩ nɔɔyʋ yɔ, ŋŋlakɩ mbʋ pɩɩkɛdɩɣnɩ-ɩ yɔ. Ðɩsɔɔlɩ Yehowa nɛ pʋyɔɔ lɛ, ɖɩtɩsɔɔlɩ se ɖɩla mbʋ pɩɩkɛdɩɣnɩ-ɩ yɔ. Pɩpɔzʋʋ se sɔɔndʋ ndʋ ɖɩwɛna se ɖɩtaamaanɩ Yehowa paɣtʋ yɔɔ yɔ, tɩwɛɛ ɖoŋ. Nehemiya ha-ɖʋ kɩɖaʋ kɩbaŋʋ hɔɔlʋʋ ŋgʋ kɩ-taa. Eɖiyaɣ Yehowa samaɣ, ɛlɛ ɛtaañɩnɩɣ se ɛtɩŋnɩ pɩ-yɔɔ nɛ ɛpɩsɩ ñɩm tʋ. Ɛbɛ yɔɔ? Ɛlɩzɩ pɩ-taa se: “Menseɣaɣ Ɛsɔ sɔɔndʋ.” (Nehemiya 5:15) Nehemiya taasɔɔlɩ kaaʋ se ɛla mbʋ pɩɩkɛdɩɣnɩ Yehowa yɔ. Ɛzɩ Nehemiya yɔ, ɖa ɖɔɖɔ ɖɩtɩsɔɔlɩ se ɖɩla mbʋ pɩɩkɛdɩɣnɩ Yehowa yɔ. Bibl kalʋʋ sɩɣnɩ-ɖʋ nɛ ɖɩtɩlɩ mbʋ ɖɩla nɛ pɩkɛdɩnɩ Yehowa yɔ.—Kalɩ Tɩnaɣ yɔɔ tɔm 6.
Ðɩñɩnɩ fezuu taa ñɩm
(Roma mba 3:4) Kpa! Ɛlɛ Ɛsɔ ɛkɛ toovenim tʋ paa ɛyaa tɩŋa ɩkɛ cɛtɩyaa yɔ, ɛzɩ pamaʋ yɔ se: “Pɩsa nɛ ŋpɩzɩ ŋwɩlɩ se ŋwɛ siɣsiɣ ñɔ-yɔɔdaɣ taa nɛ ŋpɩzɩ ŋwa alɩwaatʋ ndʋ pahʋʋnɩ-ŋ tɔm yɔ.”
w08 15/6 30 § 5
Roma mba takayaɣ taa lɩmaɣza sɔsɔna
3:4. Alɩwaatʋ ndʋ ɛyaa tɔm kaɖɩɣnɩ Ɛsɔtɔm ndʋ tɩwɛ Bibl taa yɔ, ɖɩtaɣ Ɛsɔtɔm liu nɛ ɖɩlakɩ ɛzɩ ɛsɔɔlʋʋ yɔ nɛ ɖiyeki se “Ɛsɔ ɛkɛ toovenim tʋ.” Ye ɖisusuu Kewiyaɣ tɔm nɛ kpekpeka nɛ ɖɩlakɩ kpɛlɩkɩyaa yɔ, ɖɩpɩzɩɣ nɛ ɖɩsɩnɩ ɛyaa lalaa nɛ pana se Ɛsɔ kɛ toovenim tʋ.
(Roma mba 3:24, 25) nɛ Ɛsɔ tɩŋnɩ e-lootiye yɔɔ nɛ ɛlabɩ-wɛ kʋjɔʋ falaa nɛ ɛyaa-wɛ se siɣsiɣ tɩnaa pɩtɩŋnɩ ɛzɩma Krɩstʋ Yesu kɩhɛyʋʋ pʋ-ñʋʋ taa holi-wɛ yɔ pɩ-yɔɔ. 25 Ɛsɔ kpaɣ-ɩ nɛ ɛcɛlɩ ɛzɩ kɩlaʋ ŋgʋ kɩhɩzɩɣ kɩwɛɛkɩm yɔ pɩtɩŋnɩ ɛ-calɩm yɔɔ tisuu yɔɔ. Ɛsɔ labɩ mbʋ se ɛwɩlɩ ɛ-maɣmaɣ e-siɣsiɣ wɛtʋ, mbʋ pʋyɔɔ yɔ ɛ-tɩ ɖɔkʋʋ yɔɔ lɛ, ekpeɣaɣ kɩwɛɛkɩm mbʋ pɩɩlaba nɛ pɩɖɛɛ yɔ.
w08 15/6 29 § 6
Roma mba takayaɣ taa lɩmaɣza sɔsɔna
3:24, 25—Ɛzɩma tɩyɛ “Krɩstʋ Yesu kɩhɛyʋʋ pʋ-ñʋʋ taa” pɩzaɣ se pihuuzi “kɩwɛɛkɩm mbʋ pɩɩlaba nɛ pɩɖɛɛ yɔ” pɩ-yɔɔ? Mesiya yɔɔ kajalaɣ natʋ ndʋ tɩwɛ Kiɖe Tɛɛ Tɔm 3:15 taa yɔ, tɩlabɩ pɩnaɣ 33 taa, alɩwaatʋ ndʋ pakʋ Yesu nazɩm sizika yɔɔ yɔ. (Gal. 3:13, 16) Alɩwaatʋ ndʋ Yehowa kaayɔɔdɩ natʋ tɔm ndʋ yɔ, ɛ-ɛsɩndaa lɛ pɩɩwɛ ɛzɩ paatɛm hɛyʋʋ kɩhɛyʋʋ pʋ-ñʋʋ taa yɔ, mbʋ pʋyɔɔ yɔ nabʋyʋ ɛɛpɩzɩɣ nɛ pɩɖɩɣ ɛ-kaɖʋwa nʋmɔʋ. Pʋyɔɔ lɛ, pɩtɩŋnɩ kɩlaʋ ŋgʋ Yesu kaɣaɣ labʋ yɔ kɩ-yɔɔ lɛ, Yehowa pɩzaɣ se ekpeɣ Aɖam lʋlʋʋ taa piya nzɩ sɩɩwɛnɩ tisuu natʋ tɔm ndʋ tɩ-yɔɔ yɔ sɩ-kɩwɛɛkɩm. Kɩhɛyʋʋ pʋ-ñʋʋ taa haɣ waɖɛ ɖɔɖɔ se pefezi caanaʋ taa ñɩma mba paasɩba pʋcɔ nɛ palʋlʋʋ Yesu tɛtʋ yɔɔ yɔ.—Tʋma 24:15.
Bibl kalʋʋ
(Roma mba 1:1-17) Ma Pɔɔlɩ, Krɩstʋ Yesu yom weyi paya-ɩ se ɛkɛ apostoloo yɔ, palɩzɩ-ɩ nɛ hɔɔlʋʋ Ɛsɔ tɔm kɩbandʋ yɔɔ, 2 ndʋ Ɛsɔ tɩŋnɩ ɛ-nayaa yɔɔ nɛ ɛlɛyɩ yɔɔdʋʋ Masɩ kiɖeɖesi taa yɔ. 3 Tɔm kɩbandʋ ndʋ titukuuni ɛ-Pɩyalʋ, weyi ɛlɩnɩ Daviid liɖe taa tomnaɣ taa yɔ, 4 ɛlɛ pɩtɩŋnɩ fezuu kiɖeɖeu ɖoŋ taa nɛ payaa-ɩ se Ɛsɔ Pɩyalʋ alɩwaatʋ ndʋ pefezi-i nɛ sɩɖaa taa yɔ—ɛɛɛ, ɛnʋ lɛ ɖa-Kɩbaɣlʋ Yesu Krɩstʋ. 5 Ɛ-yɔɔ pɩtɩŋnaa nɛ ɖihiɣ lootiye nɛ apostoloo tʋmɩyɛ se pɩsa nɛ ɛ-hɩɖɛ yɔɔ lɛ, ɛyaa pɩzɩ nɛ pɛwɛɛnɩ tisuu nɛ ñamtʋ ajɛɛ tɩŋa taa, 6 ajɛɛ ana a-taa payanɩ-mɩ ɖɔɖɔ se ɩkɛ Yesu Krɩstʋ pʋyʋ— 7 mamaɣnɩ takayaɣ kanɛ mba payɩ pɛwɛ Room nɛ pɛkɛ Ɛsɔ ɛyaa kʋsɔɔlaa yɔ, mba paya-wɛ se pɛkɛ ɛyaa kiɖeɖema yɔ: Ɩwɛɛnɩ lootiye nɛ laŋhɛzɩyɛ nɖɩ ɖɩlɩnɩ ɖa-Caa Ɛsɔ nɛ Kɩbaɣlʋ Yesu Krɩstʋ pɔ-cɔlɔ yɔ. 8 Kajalaɣ lɛ, mɛnsɛɣ mɛ-Ɛsɔ mɩ-tɩŋa mɩ-yɔɔ se ɛlabaɣ lɛ pɩtɩŋnɩ Yesu Krɩstʋ yɔɔ, mbʋ pʋyɔɔ yɔ pɔyɔɔdʋʋ mi-tisuu tɔm ɛjaɖɛ kpeekpe yɔɔ. 9 Mbʋ pʋyɔɔ yɔ Ɛsɔ weyi malakɩ-ɩ tʋmɩyɛ kiɖeɖee nɛ ma-laŋɩyɛ pilim alɩwaatʋ ndʋ monsusuu ɛ-Pɩyalʋ yɔɔ tɔm kɩbandʋ yɔ, ɛkɛ-m aseɣɖe tʋ ɛzɩma maayeki mɩ-yɔɔ tɔzʋʋ ma-adɩma taa paa ɛzɩmtaa, 10 nɛ mentendiɣ Ɛsɔ se lɛɛlɛɛyɔ lɛ, ye pɩkɛ ɛ-sɔɔlɩm yɔ manpɩzɩ nɛ mɔnkɔɔ mɩ-cɔlɔ yɔ. 11 Mbʋ pʋyɔɔ yɔ, me-liu wɛɛ pɩŋŋ se mana-mɩ, nɛ manpɩzɩ maha-mɩ fezuu taa kʋjɔʋ nakʋyʋ se pɩsa nɛ ɩka camɩyɛ; 12 yaa se ɖɩpɩzɩ nɛ ɖɩkpazɩ ɖama tisuu ɖoŋ, mi-tisuu nɛ ma-ñɩmbʋ. 13 Ɛlɛ koobiya, mantɩsɔɔlɩ se ɩwɛɛ nɛ ɩɩsɩŋ se malabɩ lɩmaɣzɩyɛ tam sakɩyɛ se mɔnkɔŋ mɩ-cɔlɔ—ɛlɛ pɩtɩha-m nʋmɔʋ halɩ nɛ sɔnɔ—se pɩsa nɛ mehiɣ pee kɩbana naayɛ mɩ-hɛkʋ taa ɖɔɖɔ ɛzɩ mehiɣu ajɛɛ lɛɛna taa yɔ. 14 Mɔntɔɔ kɩmɩyɛ Grɛɛkɩ mba nɛ agɔma, lɔŋsɩnɖaa nɛ kɩmɛlɛmɩŋ; 15 pʋyɔɔ lɛ, me-liu wɛɛ siŋŋ se monsusi tɔm kɩbandʋ mɩ mba ɩwɛ ɖɔɖɔ Room peeɖe yɔ. 16 Mbʋ pʋyɔɔ yɔ fɛyɛ ɛɛkpaɣ-m nɛ tɔm kɩbandʋ; toovenim taa lɛ, tɩkɛ Ɛsɔ ɖoŋ, weyi ɩ-yɔɔ ɛtɩŋɩɣna se ɛya mba payɩ pɛwɛnɩ tisuu yɔ pa-ñʋʋ yɔ, kajalaɣ lɛ Yuuda mba nɛ pʋwayɩ lɛ Grɛɛkɩ mba. 17 Mbʋ pʋyɔɔ yɔ mba pɛwɛnɩ tisuu yɔ, panaɣ se Ɛsɔ tɩŋɩɣnɩ tɔm kɩbandʋ yɔɔ nɛ ɛlɩzɩɣ e-siɣsiɣ wɛtʋ nɛ ɛwɩlɩɣ, nɛ pɩkpazɩɣ pe-tisuu ɖoŋ, ɛzɩ pamaʋ yɔ se: “Ɛlɛ tisuu yɔɔ ɛyʋ siɣsiɣ tʋ kaɣ wɛʋ wezuu.”
11-17 FÉVRIER
ÑƖM MBƲ PƖWƐ ƐSƆTƆM TAA YƆ | ROMA MBA 4-6
“Ɛsɔ wɩlɩɣ-ɖʋ ɛ-maɣmaɣ ɛ-sɔɔlɩm”
(Roma mba 5:8) Ɛlɛ ɛzʋnɔ Ɛsɔ wɩlɩɣ-ɖʋ ɛ-maɣmaɣ ɛ-sɔɔlɩm: Alɩwaatʋ ndʋ ɖɩɩkɛ kɩwɛɛkɩm laɖaa yɔ, Krɩstʋ sɩbɩ ɖɔ-yɔɔ.
(Roma mba 5:12) Pʋyɔɔ pɩtɩŋnɩ ɛyʋ kʋɖʋm yɔɔ nɛ kɩwɛɛkɩm lɩɩ ɛjaɖɛ yɔɔ nɛ sɩm ñatɩŋnɩ kɩwɛɛkɩm yɔɔ nɛ pɩlɩɩ, nɛ piyele sɩm wadɩ ɛyaa kpeekpe yɔɔ, mbʋ pʋyɔɔ yɔ pa-tɩŋa palabɩ kɩwɛɛkɩm—.
w11 15/6 12 § 5
Ɛsɔ wɩlɩɣ-ɖʋ ɛ-sɔɔlɩm
5 Pɔɔlɩ yɔɔdaɣ tɔm ndʋ lɛ, ɛpaɣzɩnaa se: “Pɩtɩŋnɩ ɛyʋ kʋɖʋm yɔɔ nɛ kɩwɛɛkɩm lɩɩ ɛjaɖɛ yɔɔ nɛ sɩm ñatɩŋnɩ kɩwɛɛkɩm yɔɔ nɛ pɩlɩɩ, nɛ piyele sɩm wadɩ ɛyaa kpeekpe yɔɔ, mbʋ pʋyɔɔ yɔ pa-tɩŋa palabɩ kɩwɛɛkɩm.” (Roma 5:12) Ðɩpɩzɩɣ nɛ ɖɩnɩɩ tɔm ndʋ tɩ-taa, mbʋ pʋyɔɔ yɔ Ɛsɔ yeba nɛ pama ɛzɩma ɛyaa wezuu caɣʋ paɣzaa yɔ pɩ-tɔm Bibl taa. Yehowa kaalɩzɩ ɛyaa naalɛ, Aɖam nɛ Ɛva. Lɩzɩyʋ talɩ pilim, mbʋ ɖɔɖɔ Aɖam nɛ Ɛva paatalɩ pilim. Ɛsɔ kaaɖʋ-wɛ paɣtʋ kʋɖʋmtʋ nɛ eheyi-wɛ se ye pamanɩ tɩ-yɔɔ yɔ, pɩkɔŋnɩ-wɛ sɩm. (Kiɖe 2:17) Ɛlɛ pɩlabɩ pʋtɔdɩyɛ se pamanɩ Ɛsɔ paɣtʋ ndʋ tɩɩmʋnaa nɛ tɩwɛɛ kɛlɛʋ yɔ tɩ-yɔɔ nɛ pawɩlɩ se pekizi-i se ɛtaakɛ pa-Paɣtʋ Ðʋyʋ nɛ pe-Wiyaʋ Kɩlɩm.—Wp. 32:4, 5.
(Roma mba 5:13, 14) Mbʋ pʋyɔɔ yɔ kɩwɛɛkɩm wɛ ɛjaɖɛ yɔɔ pʋcɔ nɛ Paɣtʋ kɔɔ, ɛlɛ paakpakɩɣ kɩwɛɛkɩm nɛ pasʋʋ nɔɔyʋ alɩwaatʋ ndʋ paɣtʋ natʋyʋ fɛyɩ yɔ. 14 Paa mbʋ yɔ, sɩm tɔɔ kewiyitu kpaɣnɩ Aɖam nɛ pɩkɔɔ pɩtalɩ Moyizi, halɩ pɩtɔɔ kewiyitu mba patɩla kɩwɛɛkɩm ɛzɩ Aɖam manʋʋ paɣtʋ yɔɔ yɔ pɔ-yɔɔ, ɛnʋ weyi ɛkɛ weyi ɛkaɣ kɔm yɔ ɛ-lɛzʋʋ yɔ.
w11 15/6 12 § 6
Ɛsɔ wɩlɩɣ-ɖʋ ɛ-sɔɔlɩm
6 Aɖam labɩ kɩwɛɛkɩm pʋcɔ nɛ ɛlʋlɩ piya. Ɛɖɛzɩ sɩ-tɩŋa payɩ kɩwɛɛkɩm nɛ mbʋ pɩlɩɣ kɩwɛɛkɩm taa yɔ. Toovenim lɛ, Aɖam piya tɩmaanɩ Ɛsɔ paɣtʋ yɔɔ ɛzɩ Aɖam labʋ yɔ, pʋyɔɔ lɛ patɩkʋ sɩ-tɔm kɩwɛɛkɩm mbʋ Aɖam laba yɔ pɩ-yɔɔ; nɛ pataaɖʋtɩ-sɩ paɣtʋ natʋyʋ. (Kiɖe 2:17) Paa mbʋ yɔ, Aɖam ɖɛzɩ e-piya kɩwɛɛkɩm. Pʋyɔɔ lɛ, kɩwɛɛkɩm nɛ sɩm pɔtɔɔ kewiyitu pɩkɔɔ pɩtalɩ alɩwaatʋ ndʋ Ɛsɔ kaaha Izrayɛɛlɩ piya paɣtʋ ndʋ tɩwɩlaɣ-sɩ kpayɩ kpayɩ se sɩkɛnɩ kɩwɛɛkɩm laɖaa yɔ. (Kalɩ Roma mba 5:13, 14.) Ðɩpɩzɩɣ nɛ ɖɩkpaɣ kɩwɛɛkɩm mbʋ Aɖam ɖɛzɩ-ɖʋ yɔ nɛ ɖɩmaɣzɩnɩ calɩm taa kʋdɔŋ ŋgʋ ɖa-lʋlɩyaa pɩzɩɣ nɛ pɛɖɛzɩ-ɖʋ yɔ. Paa hɔʋ taa piya nasɩyɩ ɩmʋʋ calɩm taa kʋdɔŋ ŋgʋ sɩ-lʋlɩyaa cɔlɔ yɔ, nabʋyʋ taa pɩtɩkɛ sɩ-tɩŋa sɩmʋʋnɩ-kʋ. Ɛlɛ pɩtɩkɛ mbʋ pɩwɛ kɩwɛɛkɩm hɔɔlʋʋ taa. Ða-tɩŋa payɩ, Aɖam ɖɛzɩ-ɖʋ kɩwɛɛkɩm, pʋyɔɔ ɖa-tɩŋa ɖɩsɩkɩ. Paa mbʋ yɔ, wiɖiyi ɖɩkaɣ pɩzʋʋ nɛ ɖɩwa kɩwɛɛkɩm na?
(Roma mba 5:18) Ye mbʋ, ɛzɩ kɩwɛɛkɩm kʋɖʋmʋm yebu nɛ pahʋʋnɩ ɛyaa ndɩ ndɩ nɛ pakʋ pɔ-tɔm yɔ, mbʋ ɖɔɖɔ siɣsiɣ lakasɩ kʋɖʋmsɩ kaɣ yebu nɛ payaa ɛyaa ndɩ ndɩ se siɣsiɣ tɩnaa nɛ pehiɣ wezuu.
(Roma mba 5:21) Ɛbɛ yɔɔ? Se pɩsa nɛ ɛzɩ kɩwɛɛkɩm nɛ sɩm pɔtɔɔʋ kewiyitu yɔ, lootiye ɖɔɖɔ pɩzɩ nɛ ɖɩtɔɔ kewiyitu pɩtɩŋnɩ siɣsiɣ wɛtʋ ndʋ tiwokini wezuu maatɛŋ taa, ɖa-Kɩbaɣlʋ Yesu Krɩstʋ yɔɔ yɔ tɩ-yɔɔ.
w11 15/6 13 § 9-10
Ɛsɔ wɩlɩɣ-ɖʋ ɛ-sɔɔlɩm
9 Grɛɛkɩ tɔm pee wena pɛɖɛzaa se “paya ɛyaa sakɩyɛ se siɣsiɣ tɩnaa” nɛ “payaa ɛyaa ndɩ ndɩ se siɣsiɣ tɩnaa” yɔ a-tɔbʋʋ lɛ suwe? Bibl ɖɛzɩyʋ nɔɔyʋ ma tɔm pee ana a-yɔɔ se: “Pɩkɛnɩ kpaɣʋ nɛ kɛdɩnʋʋ mbʋ palakɩnɩ tʋmɩyɛ tɔm ɖɩhʋyɛ yɔ. Nɛ kpaɣʋ nɛ kɛdɩnʋʋ mbʋ, pɩwɩlɩɣ ɛzɩma taabalɩyɛ nɖɩ ɖɩwɛ ɛyʋ nɔɔyʋ nɛ Ɛsɔ pɛ-hɛkʋ taa yɔ ɖɩlɛɣzɩɣ yɔ, pɩtɩkɛ lɛɣzɩtʋ ndʋ ɛyʋ lakɩnɩ ɛ-taa kiŋ yɔ . . . Kpaɣʋ nɛ kɛdɩnʋʋ mbʋ pɩ-taa lɛ, pakpaɣ Ɛsɔ ɛzɩ tɔm hʋyʋ yɔ. Nɛ weyi pɔkɔnɩ Ɛsɔ ɛsɩndaa se ɛhʋʋ ɛ-tɔm yɔ, pɔkɔnɩ-ɩ Ɛsɔ tɔm ɖɩhʋyɛ mbʋ pʋyɔɔ yɔ ɛfɛyɩ siɣsiɣ. Ɛlɛ Ɛsɔ na ɛ-pʋtɔdɩyɛ nɛ eɖezi ɛ-tɔm.”
10 Ɛbɛ yɔɔ “tɛtʋ kpeekpe tɔm hʋyʋ” weyi ɛwɛ siɣsiɣ yɔ, ɛpɩzaɣ se eɖezi ɛyʋ weyi ɛfɛyɩ siɣsiɣ yɔ ɛ-tɔm? (Kiɖe 18:25) Pɩsa nɛ Ɛsɔ la mbʋ lɛ, ɛsɔɔlɩ faaa nɛ etiyi ɛ-Pɩyalʋ ɛgbamɩyɛ tɛtʋ yɔɔ. Paa Yesu ɛɛkatɩ takɩm, paɖʋ-ɩ fɛyɛ nɛ pawɩlɩ ñaŋ yɔ, ɛlabɩ ɛ-Caa sɔɔlɩm ɖeyi ɖeyi. Ɛɖɔkɩ ɛ-cɩŋgɩlɩm wɛtʋ kpam nɛ halɩ ɛkɔɔ ɛsɩ nazɩm sizika yɔɔ. (Ebr. 2:10) Yesu kpaɣ e-wezuu ŋgʋ kɩtalɩ pilim yɔ nɛ ɛlaa kɩlaʋ se pɩkɛnɩ kɩhɛyʋʋ ŋgʋ kɩpɩzɩɣ se kɩlɩzɩ Aɖam liɖe taa piya kɩwɛɛkɩm nɛ sɩm pe-nesi taa yaa kɩya sɩ-ñʋʋ yɔ.—Mat. 20:28; Roma 5:6-8.
Ðɩñɩnɩ fezuu taa ñɩm
(Roma mba 6:3-5) Yaa ɩɩsɩŋ se ɖa mba payɩ pamɩyɩsɩ-ɖʋ Krɩstʋ Yesu taa yɔ, pamɩyɩsɩ-ɖʋ ɛ-sɩm taa yaa we? 4 Pʋyɔɔ lɛ, pepim ɖa nɛ ɩ pɩtɩŋnɩ ɛzɩma pamɩyɩsɩ-ɖʋ ɛ-sɩm taa yɔ, se pɩsa nɛ ɛzɩ pefezuu Krɩstʋ sɩɖaa taa pɩtɩŋnɩ Caa samtʋ yɔɔ yɔ, ɖa ɖɔɖɔ ɖɩɖɔ wezuu kɩfalʋʋ nʋmɔʋ taa. 5 Ye ɖa nɛ ɩ ɖɩkpɛndɩ kʋɖʋm nɛ ɖɩkaa sɩm mbʋ ɛsɩba yɔ, pɩtʋʋ fɛyɩ se ɖa nɛ ɩ ɖɩkaɣ kpɛndʋʋ kʋɖʋm nɛ ɖɩkaa femtu ndʋ efema yɔ.
w08 15/6 29 § 7
Roma mba takayaɣ taa lɩmaɣza sɔsɔna
6:3-5—Pɔtɔŋʋʋ se pamɩyɩsɩ Krɩstʋ Yesu taa nɛ pamɩyɩsɩ ɛ-sɩm taa yɔ pʋ-tɔbʋʋ lɛ suwe? Alɩwaatʋ ndʋ Yehowa taɣ Krɩstʋ wayɩ tɩŋɩyaa nabɛyɛ num nɛ fezuu kiɖeɖeu yɔ, pɛkpɛndɩɣ Yesu yɔɔ nɛ papɩsɩ ɛgbɛyɛ nɖɩ Krɩstʋ kɛ ɖɩ-ñʋʋ yɔ ɖɩ-taa mba. (1 Kɔr. 12:12, 13, 27; Kol. 1:18) Mbʋ wɩlɩɣna se pamɩyɩsɩ-wɛ Krɩstʋ Yesu taa. Pamɩyɩsɩɣ Krɩstʋ ñɩma patam numwaa Krɩstʋ sɩm taa ɖɔɖɔ, pʋ-tɔbʋʋ lɛ se pacakɩ kɩlaʋ wezuu nɛ peyeki tɛtʋ yɔɔ wezuu maatɛŋ lidaʋ ŋgʋ pɛwɛna yɔ kɩ-tɔm. Pʋyɔɔ lɛ, paa pa-sɩm ɛfɛyɩnɩ kɩhɛyʋʋ pʋ-ñʋʋ taa wazaɣ ɛzɩ Yesu sɩm yɔ, pa-sɩm kɛnɩ kɩlaʋ sɩm ɛzɩ Yesu sɩm yɔ. Pa-mɩyɩsʋʋ Krɩstʋ sɩm taa tɛŋ alɩwaatʋ ndʋ pasɩkɩ nɛ pefezi-wɛ se pacaɣ wezuu ɛsɔdaa yɔ.
(Roma mba 6:7) Mbʋ pʋyɔɔ yɔ ɛyʋ weyi ɛsɩba yɔ, ɛlɩ ɛ-kɩwɛɛkɩm taa.
w14 1/6 31 § 1
Lidaʋ ŋgʋ ɖaŋ mɔn-cɔzɔnaa?
Pefeziɣ “kɩwɛɛkɩm laɖaa” lɛ, mbʋ palaba pʋcɔ nɛ pasɩkɩ yɔ pɩ-yɔɔ pakaɣ-wɛ tɔm hʋnʋʋ na? Aayɩ. Pɔyɔɔdɩ Roma 6:7 taa se: “Weyi ɛsɩba yɔ, ɛlɩ kɩwɛɛkɩm taa.” Alɩwaatʋ ndʋ “kɩwɛɛkɩm laɖaa” sɩkɩ lɛ, pɛhɛyɩ pa-kɩwɛɛkɩm yɔɔ. Ye mbʋ, pefeziɣ-wɛ nɛ pala mbʋ yɔ, pɩ-yɔɔ pakaɣ-wɛ tɔm hʋnʋʋ pɩtɩkɛ mbʋ paalabɩ kaasɩmtʋ taa pʋcɔ nɛ pasɩkɩ yɔ. Ɛzɩma pɩkaɣ-wɛ wazʋʋ?
Bibl kalʋʋ
(Roma mba 4:1-15) Ye pɩkɛ mbʋ, ɖɩkaɣ yɔɔdʋʋ se Abraham weyi ɛkɛ ɖɔ-cɔzɔ tomnaɣ taa yɔ ɛbɛ ehiɣaa? 2 Ye paaya Abraham se siɣsiɣ tʋ tʋma yɔɔ yɔ, ɛɛwɛnɩ mbʋ pɩ-yɔɔ ɛpɩzɩɣ nɛ ɛkʋndɩ yɔ, ɛlɛ ɛtaapɩzɩɣ se ɛkʋndɩ Ɛsɔ ɛsɩndaa. 3 Mbʋ pʋyɔɔ yɔ suwe mayaɣ yɔɔdʋʋ? “Abraham kaawɛnɩ tisuu Yehowa yɔɔ, nɛ pakpaɣ-ɩ se ɛkɛ ɛyʋ siɣsiɣ tʋ.” 4 Ɛyʋ weyi ɛlakɩ tʋmɩyɛ yɔ, paakpakɩɣ ɛ-kɩhɛyʋʋ ɛzɩ lootiye yɔ, ɛlɛ ɛzɩ mbʋ pɩmʋnaa se pɛhɛyɩ-ɩ yɔ. 5 Piyele nɛ ɛyʋ weyi ɛɛlakɩ tʋmɩyɛ, ɛlɛ ɛwɛɣnɩ tisuu Weyi ɛpɩsɩɣ ɛyʋ weyi ɛɛñaŋ Ɛsɔ yɔ siɣsiɣ tʋ yɔ ɛ-yɔɔ yɔ, pakpakɩɣ e-tisuu ɛzɩ mbʋ pɩwɛ siɣsiɣ yɔ. 6 Daviid ɖɔɖɔ yɔɔdaa se ɛyʋ weyi Ɛsɔ kpakɩɣ-ɩ se ɛkɛ siɣsiɣ tʋ, ɛlɛ pɩtɩtɩŋnɩ tʋma yɔɔ yɔ ehikiɣ koboyaɣ, ɛyɔɔdaa se: 7 “Koboyaɣ tɩnaa kɛlɛ mba pekpeɣ-wɛ pa-lakasɩ nzɩ sɩtɩla nɔɔ kʋɖʋmaɣ nɛ paɣtʋ yɔ nɛ mba pa-kɩwɛɛkɩm yɔɔ pohuuzaa yɔ; 8 koboyaɣ tʋ lɛ ɛyʋ weyi Yehowa ɛɛkaɣ kpaɣʋ ɛ-kɩwɛɛkɩm nɛ ɛlabɩnɩ tʋmɩyɛ kaaʋ yɔ.” 9 Ye mbʋ, ɛzɩ koboyaɣ ŋga, ɛyaa mba pɛpɛlɩ-wɛ yɔ pe-ɖeke pehikiɣni-kɛ yaa ɛyaa mba patɩpɛlɩ-wɛ yɔ pehikiɣ-kɛ ɖɔɖɔ? Mbʋ pʋyɔɔ yɔ ɖɩtɔŋ se: “Abraham tisuu yeba nɛ pakpaɣ-ɩ se ɛkɛ ɛyʋ siɣsiɣ tʋ.” 10 Wɛtʋ ndʋ taa pakpaɣ-ɩ ɛzɩ ɛyʋ siɣsiɣ tʋ yɔ? Alɩwaatʋ ndʋ pɛpɛlɩ-ɩ yɔ yaa alɩwaatʋ ndʋ patɩpɛlɩ-ɩ yɔ? Pɩtɩkɛ alɩwaatʋ ndʋ pɛpɛlɩ-ɩ yɔ, ɛlɛ ɛɛkɛ kɩdɩbɛlʋʋ lɛ. 11 Nɛ ɛmʋ yʋsaɣ nakɛyɛ—pʋ-tɔbʋʋ se pɛlɩtʋ—nɛ pɩkɛ siɣsiɣ wɛtʋ mayaɣ pɩtɩŋnɩ tisuu mbʋ ɛɛwɛna alɩwaatʋ ndʋ ɛɛkɛ kɩdɩbɛlʋʋ yɔ pɩ-yɔɔ, se pɩsa nɛ ɛkɛ mba payɩ pɛwɛnɩ tisuu ɛlɛ patɩpɛlɩ-wɛ yɔ pa-caa, nɛ papɩzɩ pakpaɣ-wɛ ɛzɩ ɛyaa siɣsiɣ tɩnaa yɔ; 12 nɛ pɩsa ɖɔɖɔ nɛ ɛkɛ liɖe nɖɩ pɛpɛlɩ-ɖɩ yɔ ɖɩ-caa, pɩtɩkɛ mba pɔñɔnɩ pɛlɩtʋ yɔ pe-ɖeke pa-caa ɛlɛ mba pɔɖɔŋ ɖɔnɛ nɖɩ ɖɩtʋʋzaa nɛ pamaɣzɩɣnɩ tisuu mbʋ ɖa-caa Abraham kaawɛna alɩwaatʋ ndʋ ɛɛkɛ kɩdɩbɛlʋʋ yɔ. 13 Mbʋ pʋyɔɔ yɔ pɩtɩkɛ paɣtʋ yɔɔ pɩtɩŋnaa nɛ peheyi Abraham yaa e-liɖe lidaʋ tɔm se pakaɣ-ɩ cɛlʋʋ ɛjaɖɛ naɖɩyɛ nɛ ɖɩpɩsɩ ɛ-ñɩm, ɛlɛ siɣsiɣ wɛtʋ yɔɔ pɩtɩŋnaa, tisuu yɔɔ. 14 Mbʋ pʋyɔɔ yɔ ye mba pɔñɔʋnɩ paɣtʋ yɔ mba pɛcɛlɩɣ ñɩm yɔ, pɩwɩlɩɣ se tisuu tɩtasɩ wɛʋ wazaɣ nɛ paɖɩzɩ lidaʋ tɔm. 15 Toovenim taa lɛ, Paɣtʋ lʋlʋʋ pana, ɛlɛ ɖenɖe paɣtʋ natʋyʋ fɛyɩ yɔ, paɣtʋ yɔɔ maʋ fɛyɩ ɖɔɖɔ.
18-24 FÉVRIER
ÑƖM MBƲ PƖWƐ ƐSƆTƆM TAA YƆ | ROMA MBA 7-8
“[Ŋɖaŋ] kpam?”
(Roma mba 8:19) Mbʋ pʋyɔɔ yɔ wondu kɩlɩzɩtʋ ɖaŋ kpam se pokuli Ɛsɔ pɩyalaa yɔɔ nɛ pawɩlɩ.
w12 15/7 11 § 17
Yele nɛ Yehowa woni-ŋ tɩ-yɔɔ wɛʋ siŋŋ taa
17 Alɩwaatʋ ndʋ Pɔɔlɩ yɔɔdaɣ tɩ-yɔɔ wɛʋ mbʋ Yehowa kaɣ haʋ ɛ-sɛyaa mba pɛwɛ tɛtʋ yɔɔ yɔ pɩ-tɔm lɛ, ɛmawa se: “Wondu kɩlɩzɩtʋ ɖaŋ kpam se pokuli Ɛsɔ pɩyalaa yɔɔ nɛ pawɩlɩ.” Nɛ pʋwayɩ lɛ, ɛsɔzɩ se: “Wondu kɩlɩzɩtʋ maɣmaɣ kaɣ lɩʋ ɖɔɖɔ mbʋ pɩɖazaa yɔ pi-yomiye taa nɛ tɩwɛɛnɩ Ɛsɔ piya tɩ-yɔɔ wɛʋ sɔsɔm.” (Roma 8:19-21) Wondu kɩlɩzɩtʋ kɛnɩ ɛyaa mba pɛwɛnɩ lidaʋ se pakaɣ caɣʋ wezuu maatɛŋ tɛtʋ yɔɔ yɔ, mba kaɣnɩ hiɣu wazasɩ nzɩ Ɛsɔ pɩyalaa patam numwaa yɔɔ ‘kuluu’ kaɣ kɔnʋʋ yɔ. Ɛsɔ “pɩyalaa” yɔɔ kuluu mbʋ, pɩkaɣ paɣzʋʋ alɩwaatʋ ndʋ pefeziɣ-wɛ nɛ sɩm taa nɛ papɩsɩ feziŋ nɛ pasɩnɩ Krɩstʋ nɛ paɖɩzɩ kɩdɛkɛdɩm tɛtʋ yɔɔ nɛ paya samaɣ sɔsɔɔ ñʋʋ nɛ kasʋʋ ɛjaɖɛ kɩfaɖɛ taa yɔ.—Natʋ 7:9, 14.
(Roma mba 8:20) Mbʋ pʋyɔɔ yɔ poluzi wondu kɩlɩzɩtʋ mbʋ pɩɩwazɩɣ pʋyʋ yɔ pɩ-tɛɛ, pɩtɩkɛ tɩ-maɣmaɣ tɩ-sɔɔlɩm taa, ɛlɛ pɩtɩŋnɩ weyi eluzi-tʋ yɔ ɛ-yɔɔ, pɩtɩŋnɩ lidaʋ kʋnɛ kɩ-yɔɔ
w12 15/3 23 § 11
Ðɩnɩɩ leleŋ ɖe-lidaʋ yɔɔ
11 Yehowa ha ɛyaa “lidaʋ” alɩwaatʋ ndʋ ɛlabɩ tamaɣ se ɛkaɣ tɩŋnʋʋ “pʋlʋlaɣ” yɔɔ nɛ ɛlɩzɩ-ɖʋ “ɖooo kiɖe tɛɛ ɖʋm,” yaa Sataŋ Eleeu nesi tɛɛ yɔ. (Natʋ 12:9; Kiɖe 3:15) Yesu Krɩstʋ kɛnɩ “pʋlʋlaɣ” ŋga kɔ-hɔɔlʋʋ ŋgʋ kɩ-tɔm kɩlɩ cɛyʋʋ yɔ. (Gal. 3:16) Yesu tɩŋnɩ ɛ-sɩm nɛ e-femtu yɔɔ nɛ ɛha ɛyaa lidaʋ se pakaɣ lɩʋ kɩdɛkɛdɩm nɛ sɩm po-yomiye taa. Pɩsa nɛ lidaʋ ŋgʋ kɩla lɛ, pɩpɔzʋʋ se “pokuli Ɛsɔ pɩyalaa yɔɔ nɛ pawɩlɩ.” Patam numwaa mba paɖʋ-wɛ hɩɖɛ yɔ mba kɛnɩnɩ “pʋlʋlaɣ” ŋga kɔ-hɔɔlʋʋ naalɛ ñɩŋgʋ. Pakaɣ pɔ-yɔɔ ‘kuluu’ alɩwaatʋ ndʋ pasɩɣnɩ Yesu se paɖɩzɩ Sataŋ ɛjaɖɛ kɩdɛkɛdɩyɛ ɖɩnɛ yɔ. (Natʋ 2:26, 27) Mbʋ kaɣnɩ kɔnʋʋ ñʋʋ yabɩtʋ heŋ lɛɛŋ weyi ɩlɩnɩ kʋñɔŋ sɔsɔʋ taa yɔ.—Natʋ 7:9, 10, 14.
(Roma mba 8:21) se wondu kɩlɩzɩtʋ maɣmaɣ kaɣ lɩʋ ɖɔɖɔ mbʋ pɩɖazaa yɔ pi-yomiye taa nɛ tɩwɛɛnɩ Ɛsɔ piya tɩ-yɔɔ wɛʋ sɔsɔm.
w12 15/3 23 § 12
Ðɩnɩɩ leleŋ ɖe-lidaʋ yɔɔ
12 Maɣzɩ kpem nɛ ŋna ɛzɩma “wondu kɩlɩzɩtʋ” kaɣ tɩ-tɩ yɔɔ wɛʋ Krɩstʋ Pɩnzɩ Kudoku Kewiyitu Tɔɔʋ alɩwaatʋ taa yɔ! Pʋbʋ taa lɛ, pakaɣ tasʋʋ “Ɛsɔ pɩyalaa” mba paɖʋ-wɛ hɩɖɛ yɔ pɔ-yɔɔ kuluu. Alɩwaatʋ ndʋ tɩ-taa lɛ, pa nɛ Krɩstʋ pakaɣ labʋ tʋmɩyɛ ɛzɩ cɔjɔnaa yɔ, nɛ pɔkɔnɩ Yesu kɩhɛyʋʋ pʋ-ñʋʋ taa wazasɩ ɛjaɖɛ kpeekpe yɔɔ. “Wondu kɩlɩzɩtʋ” yaa ɛyaa mba ɛsɔdaa Kewiyaɣ kaɣ ɖiyuu yɔ, pakaɣ paɣzʋʋ lɩʋ mbʋ kɩwɛɛkɩm nɛ sɩm pɩkɔnaa yɔ pi-yomiye taa. Pazɩ pazɩ lɛ, ɛyaa mba pañaŋ Ɛsɔ yɔ, pakaɣ lɩʋ “mbʋ pɩɖazaa yɔ pi-yomiye taa.” Ye pɔɖɔkɩ pe-siɣsiɣ wɛtʋ kpam Pɩnzɩ Kudoku Kewiyitu Tɔɔʋ alɩwaatʋ taa nɛ kɛdɛzaɣ takɩm mbʋ pɩkaɣ kɔm pɩnzɩ kudoku kewiyitu tɔɔʋ wayɩ yɔ pɩ-taa yɔ, pakaɣ maʋ pa-hɩla “wezuu takayaɣ kikpiyaɣ” taa tam. Pakaɣ sʋʋ “Ɛsɔ piya tɩ-yɔɔ wɛʋ sɔsɔm” taa. (Natʋ 20:7, 8, 11, 12) Lidaʋ sɔsɔʋ siŋŋ pɩkɛnaa!
Ðɩñɩnɩ fezuu taa ñɩm
(Roma mba 8:6) Mbʋ pʋyɔɔ yɔ mba pakaŋ pa-maɣzɩm tomnaɣ yɔɔ yɔ, piwokini-wɛ sɩm taa, ɛlɛ mba pakaŋ pa-maɣzɩm fezuu yɔɔ yɔ, piwokini-wɛ wezuu nɛ laŋhɛzɩyɛ pa-taa;
Ŋtɔzʋʋ?
Tʋkaɣ ŋga wɛ lɩmaɣza ɖʋʋ “tomnaɣ sɔɔlɩm” yɔɔ nɛ lɩmaɣza ɖʋʋ “fezuu sɔɔlɩm” yɔɔ, pɛ-hɛkʋ taa? (Roma 8:6)
Ye ɛyʋ ɛɖʋ lɩmaɣza tomnaɣ sɔɔlɩm yɔɔ yɔ, pɩwɩlɩɣ se ɛkam ɛ-lɩmaɣza kpeekpe tomnaɣ ŋga katɩtalɩ pilim yɔ kɔ-sɔɔlɩm labʋ yɔɔ nɛ ɛyɔɔdʋʋ pɩ-tɔm tam. Ɛlɛ ɛyʋ weyi ɛ-lɩmaɣza wɛ fezuu sɔɔlɩm yɔɔ yɔ, ɛkaŋ ɛ-lɩmaɣza mbʋ pɩkɛ Ɛsɔ sɔɔlɩm yɔ pɩ-yɔɔ e-wezuu caɣʋ taa paa ɛzɩmtaa. Krɩstʋ tʋ weyi ɛlakɩ mbʋ yɔ, ɛwɩlɩɣ se fezuu kiɖeɖeu ɖiyiɣni-i. Tomnaɣ sɔɔlɩm labʋ kɔŋnɩ sɩm ɛlɛ fezuu sɔɔlɩm labʋ ñɔkɔŋnɩ laŋhɛzɩyɛ nɛ wezuu.—w16.12, h. 15-17.
(Roma mba 8:26, 27) Mbʋ ɖɔɖɔ, fezuu ɖɔɖɔ sɩɣnɩ-ɖʋ ɖɛ-ɛjandʋ taa; mbʋ pʋyɔɔ yɔ tɔm lɛ se ɖɩɩsɩŋ mbʋ pɩwɛɛ se ɖɩpɔzɩ adɩma taa ɛzɩ pɩpɔzʋʋ se ɖɩtɩmɩ yɔ, ɛlɛ fezuu maɣmaɣ tendiɣ ɖɔ-yɔɔ alɩwaatʋ ndʋ ɖimuzuu yɔ paa ɖɩtɩyɔɔdɩ yɔ. 27 Ɛlɛ weyi ɛtazɩɣ laŋa taa yɔ, ɛsɩm mbʋ fezuu kaɖʋwa kɛnaa yɔ, mbʋ pʋyɔɔ yɔ kitendiɣ ɛyaa kiɖeɖema yɔɔ nɛ pɩlakɩ nɔɔ kʋɖʋmaɣ nɛ Ɛsɔ sɔɔlɩm.
w09 15/11 7 § 20
Ɛbɛ ña-adɩma wɩlɩɣ ñɔ-yɔɔ?
20 Alɩwaatʋ natʋyʋ taa lɛ, pɩtɩla ɖɩɩnaɣ ndʋ ɖɩyɔɔdɩ ɖa-adɩma taa yɔ. Pɔɔlɩ mawa se: “Tɔm lɛ se ɖɩɩsɩŋ mbʋ pɩwɛɛ se ɖɩpɔzɩ adɩma taa ɛzɩ pɩpɔzʋʋ se ɖɩtɩmɩ yɔ, ɛlɛ fezuu maɣmaɣ tendiɣ ɖɔ-yɔɔ alɩwaatʋ ndʋ ɖimuzuu yɔ paa ɖɩtɩyɔɔdɩ yɔ. Ɛlɛ [Ɛsɔ] weyi ɛtazɩɣ laŋa taa yɔ, ɛsɩm mbʋ fezuu kaɖʋwa kɛnaa yɔ.” (Roma 8:26, 27) Yehowa yeba nɛ pama adɩma sakɩyɛ Masɩ taa. Ɛkpakɩɣ adɩma wena ɛtɩŋnɩ e-fezuu yɔɔ nɛ eyele nɛ pama-yɛ Masɩ taa yɔ ɛzɩ adɩma wena ɖɩcaɣaɣ labʋ yɔ nɛ ecosuu-ɖʋ a-yɔɔ. Ɛsɔ sɩm-ɖʋ, nɛ tɔm ndʋ ɛtɩŋnɩ e-fezuu kiɖeɖeu yɔɔ nɛ eyele nɛ pama yɔ, ɛnɩɣ tɩ-tɔbʋʋ. Yehowa cosuu ɖa-adɩma yɔɔ alɩwaatʋ ndʋ fezuu “tendiɣ” ɖɔ-yɔɔ yɔ. Ɛlɛ alɩwaatʋ ndʋ Ɛsɔtɔm kɔŋ nɛ tɩmalɩnɩ-ɖʋ camɩyɛ lɛ, ndʋ pɩwɛɛ se ɖɩpɔzɩ ɖa-adɩma taa yɔ, tɩpɩzɩɣ tɩkɔɔ ɖa-maɣzɩm taa kɛlɛʋ yem.
Bibl kalʋʋ
(Roma mba 7:13-25) Ye mbʋ, mbʋ pɩwɛ ɖeu yɔ, mbʋ pɩsɩnɩ-m sɩm na? Kpa! Ɛlɛ kɩwɛɛkɩm yebina nɛ mansɩkɩ, se pɩna se kɩwɛɛkɩm kɔnɩnɩ sɩm man-taa pɩtɩŋnɩ mbʋ pɩwɛ ɖeu yɔ pɩ-yɔɔ, se pɩsa nɛ pɩtɩŋnɩ tɔm ndʋ pɔyɔɔdɩ paɣtʋ taa yɔ tɩ-yɔɔ lɛ, kɩwɛɛkɩm pɩsɩ kɩwɛɛkɩm nɛ pɩkɩlɩ. 14 Mbʋ pʋyɔɔ yɔ ɖɩnawa se Paɣtʋ kɛ fezuu taa pʋyʋ, ɛlɛ ma lɛ, mɛnkɛ tomnaɣ taa ɛyʋ, pɛpɛdɩ-m nɛ kɩwɛɛkɩm. 15 Mbʋ pʋyɔɔ yɔ maanɩɣ mbʋ menɖiɣni labʋ yɔ pɩ-taa. Mbʋ pʋyɔɔ yɔ maalakɩ mbʋ mɔnsɔɔlaa yɔ, ɛlɛ mbʋ manpaɖɩɣ yɔ, mbʋ malakɩ. 16 Ɛlɛ ye mbʋ mantɩsɔɔlɩ yɔ, mbʋ malakɩ yɔ, mentisiɣ se Paɣtʋ wɛ ɖeu. 17 Ɛlɛ lɛɛlɛɛyɔ lɛ, mantɩtasɩ kɛʋ weyi ɛlakɩ-pʋ yɔ, ɛlɛ kɩwɛɛkɩm mbʋ pɩwɛ man-taa yɔ mbʋ lakɩnɩ-pʋ. 18 Mbʋ pʋyɔɔ yɔ mansɩm mbʋ se man-taa, pʋ-tɔbʋʋ se mon-tomnaɣ taa lɛ, pʋyʋ kɩbanʋ nɔɔyʋ fɛyɩ; mbʋ pʋyɔɔ yɔ me-liu wɛɛ se mala mbʋ pɩwɛ ɖeu yɔ, ɛlɛ mɛnfɛyɩnɩ ɖoŋ se malabɩ-pʋ. 19 Mbʋ pʋyɔɔ yɔ maalakɩ kɩbandʋ ndʋ mɔnsɔɔlaa yɔ, ɛlɛ kɩdɛkɛdɩm mbʋ mantɩsɔɔlɩ yɔ mbʋ malakɩ. 20 Ye mbʋ, ye mbʋ mantɩsɔɔlɩ yɔ mbʋ malakɩ yɔ, mantɩtasɩ kɛʋ weyi ɛlakɩ-pʋ yɔ, ɛlɛ kɩwɛɛkɩm mbʋ pɩwɛ man-taa yɔ mbʋ lakɩnɩ-pʋ. 21 Pʋyɔɔ lɛ, manaɣ paɣtʋ tʋnɛ mɔ-hɔɔlʋʋ taa: Alɩwaatʋ ndʋ mancaɣ se mala mbʋ pɩtʋʋzaa yɔ lɛ, mbʋ pɩfɛyɩ ɖeu yɔ, pɩwɛ mɔn-cɔlɔ. 22 Man-taa lakɩ leleŋ siŋŋ Ɛsɔ paɣtʋ yɔɔ pɩlɩɩnɩ ɛyʋ weyi mɛnkɛnɩ pɩ-taa kiŋ yɔ ɛ-yɔɔ, 23 ɛlɛ manaɣ mon-tomnaɣ taa paɣtʋ lɛɛtʋ nɛ tiyouni ma-maɣzɩm paɣtʋ nɛ tiwokini-m kɩwɛɛkɩm paɣtʋ ndʋ tɩwɛ mon-tomnaɣ taa yɔ ti-yomiye taa. 24 Mɛnkɛ ɛyʋ weyi ɛcaɣ pʋtɔdɩyɛ kpem yɔ! Akaɣ-m holuu tomnaɣ ŋga kowokini-m sɩm pʋnɛ pɩ-taa yɔ ke-nesi tɛɛ? 25 Mɛnsɛɣ Ɛsɔ se ɛlabaɣ lɛ, pɩtɩŋnɩ ɖa-Kɩbaɣlʋ Yesu Krɩstʋ yɔɔ! Ye mbʋ, ma-maɣzɩm taa lɛ, ma-maɣmaɣ mɛnkɛ Ɛsɔ paɣtʋ yom, ɛlɛ mon-tomnaɣ taa lɛ, mɛnkɛ kɩwɛɛkɩm paɣtʋ yom.
25 FÉVRIER–3 MARS
ÑƖM MBƲ PƖWƐ ƐSƆTƆM TAA YƆ | ROMA MBA 9-11
“Oliivi tɩʋ eduuye”
(Roma mba 11:16) Pɩtasɩ lɛ, ye mʋtʋ hɔɔlʋʋ ŋgʋ pakpaɣ-kʋ ɛzɩ kajalaɣ pee yɔ kɩkɛ kiɖeɖeu yɔ, mʋtʋ tɩŋa kɛ kiɖeɖetu ɖɔɖɔ; nɛ ye liɖe ɛkɛ kiɖeɖee yɔ, pilinzi ɖɔɖɔ kɛ kiɖeɖesi.
w11 15/5 23 § 13
‘Hayɩ, Ɛsɔ lɔŋsɩnɖɛ wɛ cukaŋ mbʋ suwe!’
13 Apostoloo Pɔɔlɩ kpaɣ mba papɩsɩ Abraham pʋlʋlaɣ taa mba yɔ, nɛ ɛmaɣzɩnɩ fezuu taa Oliivi tɩʋ pilinzi. (Roma 11:21) Oliivi tɩʋ ŋgʋ pɔsɔ-kʋ kɩsɔʋ yɔ, kɩsɩŋnɩ ɛzɩma Ɛsɔ nɛ Abraham pɛ-ɛgbɛyɛ tamaɣ kaɣ labʋ yɔ. Tɩʋ ŋgʋ ki-liɖe kɛ kiɖeɖee nɛ ɖɩsɩŋnɩ Yehowa, mbʋ pʋyɔɔ yɔ ɛnʋ hanɩ wezuu fezuu taa Izrayɛɛlɩ. (Iza. 10:20; Roma 11:16) Tɩʋ hɔɔyɛ sɩŋnɩ Yesu mbʋ pʋyɔɔ yɔ, ɛnʋ kɛnɩ Abraham pʋlʋlaɣ hɔɔlʋʋ ŋgʋ kɩ-tɔm kɩlɩ cɛyʋʋ yɔ. Pilinzi tɩŋa sɩŋnɩ Abraham pʋlʋlaɣ hɔɔlʋʋ naalɛ ñɩŋgʋ taa mba “tɩŋa.”
(Roma mba 11:17) Ɛlɛ ye paasɛtɩ pilinzi nasɩyɩ, nɛ ña weyi ŋkɛ ñɩtʋ taa oliivi yɔ, patamɩ-ŋ nzɩ sɩkazaa yɔ sɩ-hɛkʋ taa nɛ ŋhiɣ ɖɔɖɔ ñɩm mbʋ pɩwɛ oliivi liɖe taa yɔ,
(Roma mba 11:20, 21) Pɩkɛ toovenim! Pataawɛɛnɩ tisuu, pʋyɔɔ pɛsɛtɩ-wɛ; ɛlɛ ña lɛ, tisuu yɔɔ ŋsɩŋaa. Taakpazɩ ña-tɩ, ɛlɛ wɛɛ sɔɔndʋ taa. 21 Mbʋ pʋyɔɔ yɔ, ye Ɛsɔ ɛtɩfɛɛ oliivi tɩʋ ŋgʋ pɔsɔ-kʋ kɩsɔʋ yɔ ki-pilinzi yɔ, ɛɛkaɣ-ŋ fɛʋ ɖɔɖɔ.
w11 15/5 24 § 15
‘Hayɩ, Ɛsɔ lɔŋsɩnɖɛ wɛ cukaŋ mbʋ suwe!’
15 Ɛbɛ Yehowa laba se eyele nɛ ɛ-kaɖʋwa pɩzɩ nɛ kala? Pɔɔlɩ lɩzɩ pɩ-taa se pɛsɛtɩ ñɩtʋ taa Oliivi pilinzi nɛ pata oliivi tɩʋ ŋgʋ pɔsɔ-kʋ kɩsɔʋ yɔ, ki-pilinzi nzɩ pɛsɛtaa yɔ si-lone taa. (Kalɩ Roma mba 11:17, 18.) Pʋyɔɔ lɛ, Krɩstʋ mba patam numwaa mba palɩnɩ ajɛɛ taa ɛzɩ patam numwaa mba paawɛ Room ɛgbɛyɛ taa yɔ, paatam-wɛ kɩtam fezuu taa oliivi tɩʋ yɔɔ. Nʋmɔʋ ŋgʋ kɩ-yɔɔ pɩtɩŋnaa nɛ papɩsɩ Abraham pʋlʋlaɣ taa mba. Kiɖe tɛɛ lɛ, paawɛ ɛzɩ ñɩtʋ taa oliivi tɩʋ pilinzi yɔ, nɛ pataawɛɛnɩ waɖɛ se pɛkɛnɩ ŋgee ɛgbɛyɛ ɖɩnɛ ɖɩ-taa mba. Ɛlɛ Yehowa ha-wɛ waɖɛ se papɩsɩ Yuuda mba fezuu taa.—Roma 2:28, 29.
(Roma mba 11:25, 26) Mbʋ pʋyɔɔ yɔ koobiya, mantɩsɔɔlɩ se ɩwɛɛ nɛ ɩɩsɩŋ mɛsaɣ tɛɛ tɔm kiɖeɖetu tʋnɛ, nɛ ɩtaapɩsɩ lɔŋsɩnɖaa mɩ-maɣmaɣ mɩ-ɛsɩndaa: Izrayɛɛlɩ hɔɔlʋʋ nakʋyʋ laŋɩyɛ sʋ kpɩzɩŋ nɛ pɩkɔɔ pɩsɩɩnɩ alɩwaatʋ ndʋ ajɛɛ taa mba tɩŋa sʋwa yɔ, 26 nɛ pɩtɩŋɩɣnɩ pɩ-yɔɔ lɛ, Izrayɛɛlɩ kpeekpe kaɣ hiɣu ñʋʋ yabʋ. Ɛzɩ pamaʋ yɔ: “Holiyu kaɣ lɩnʋʋ Siyɔŋ nɛ ɛlɩzɩ lakasɩ nzɩ sɩɩɖʋʋ Ɛsɔ hɩɖɛ yɔ Yakɔɔb tɛ.
w11 15/5 25 § 19
‘Hayɩ, Ɛsɔ lɔŋsɩnɖɛ wɛ cukaŋ mbʋ suwe!’
19 Ɛɛɛ, Yehowa ɖiɣni tɩŋnʋʋ piti nʋmɔʋ nakʋyʋ yɔɔ nɛ eyeki nɛ kaɖʋwa ŋga ɛwɛnɩ “Ɛsɔ tɛ Izrayɛɛlɩ yɔɔ” yɔ, kalakɩ. (Gal. 6:16) Ɛzɩ Pɔɔlɩ yɔɔdʋʋ yɔ, “Izrayɛɛlɩ kpeekpe kaɣ hiɣu ñʋʋ yabʋ.” (Roma 11:26) Alɩwaatʋ ndʋ Yehowa ɖʋwa yɔ tɩtalɩɣ lɛ, “Izrayɛɛlɩ kpeekpe,” pʋ-tɔbʋʋ se fezuu taa Izrayɛɛlɩ taa mba tɩŋa kaɣ kɛʋ awiya nɛ cɔjɔnaa ɛsɔdaa. Nabʋyʋ ɛɛpɩzɩɣ nɛ pɩɖɩɣ Yehowa kaɖʋwa nʋmɔʋ se kataala.
Ðɩñɩnɩ fezuu taa ñɩm
(Roma mba 9:21-23) Suwe? Ɛzɩ cʋʋ mayʋ fɛyɩnɩ ɖoŋ cʋʋ yɔɔ se ɛkpaɣ cʋʋ ŋgʋ enuutaa yɔ nɛ ɛlabɩnɩ ñanaɣ ŋga palakɩnɩ mbʋ pɩwɛ wazaɣ siŋŋ yɔ, nɛ ɛkpaɣ cʋʋ kʋɖʋmʋʋ ŋgʋ nɛ ɛlabɩnɩ ñanaɣ ŋga palakɩnɩ mbʋ pɩfɛyɩ wazaɣ siŋŋ yɔ? 22 Nɛ ye Ɛsɔ ɛsɔɔlaa se ɛwɩlɩ ɛ-pana nɛ eyele nɛ patɩlɩ e-ɖoŋ, nɛ pʋyɔɔ lɛ, ɛwɩlɩ e-suuɖu pana ñanzɩ nzɩ sɩmʋnaa se paɖɩzɩ-sɩ yɔ? 23 Nɛ ye ɛlabɩ mbʋ se patɩlɩ ɛ-samtʋ sɔsɔtʋ ndʋ ɛwɩlɩ pʋtɔdɩyɛ naʋ ñanzɩ, nzɩ ɛlɛyɩ-sɩ ñɔɔzʋʋ nɛ ɛsɩɩ se ɛsam-sɩ yɔ,
w13 15/6 25 § 5
Yele nɛ Yehowa nɩŋgbaŋʋʋ hɔm ñɔɔzɩ-ŋ
5 Nɛ ye ɛyaa ɩlabɩ ñʋʋ taa ɖoŋ nɛ pekizi se Cʋʋ Mayʋ Sɔsɔ ɛtaañɔɔzɩ-wɛ? Ɛzɩma Cʋʋ Mayʋ Sɔsɔ ɛnʋ ɛlakɩnɩ e-ɖoŋ tʋmɩyɛ? Maɣzɩ nɛ ŋna! Ye cʋʋ ɛtɩtasɩ wɛnʋʋ wazaɣ, nɛ pɩɩtasɩɣ sam se kɩ-tʋ ɛkpaɣ-kʋ nɛ ɛlabɩnɩ mbʋ ɛɖʋwa yɔ, ɛbɛ pɩtɛŋnɩ-kʋ? Cʋʋ mayʋ pɩzɩɣ nɛ ɛkpaɣ-kʋ nɛ ɛlabɩnɩ ñanaɣ kɩfalaɣ nakɛyɛ ŋga ɛtaaɖʋna yɔ, yaa ɛlɔ-kʋ. Ye cʋʋ ɛwɛɛkaa nɛ kɩtɩtasɩ wɛnʋʋ wazaɣ kɔyɔ, sakɩyɛ taa lɛ, pɩlɩɣnɩ cʋʋ mayʋ cɔlɔ. Ɛlɛ ɖa-Mayʋ yaa Cʋʋ Mayʋ Sɔsɔ ñaapɩzɩɣ nɛ ɛwɛɛkɩ cʋʋ kpa. (Wp. 32:4) Paa ɛzɩmtaa lɛ, ye ɛyʋ nɔɔyʋ eeyeki ɛ-tɩ se Yehowa ɛñɔɔzɩ-ɩ yɔ, ɛyʋ ɛnʋ ɛ-cɔlɔ pɩlɩnaa. Ɛzɩma Yehowa Cʋʋ Mayʋ Sɔsɔ lakɩnɩ e-ɖoŋ tʋmɩyɛ ɛyaa yɔɔ? Pɩlɩɣnɩ ɛzɩma petisiɣ se ɛñɔɔzɩ-wɛ yaa ɛzɩma paatisiɣ se ɛñɔɔzɩ-wɛ yɔ pɩ-cɔlɔ. Mba peyeki se ɛñɔɔzɩ-wɛ yɔ, ɛñɔɔzʋʋ-wɛ nɛ pɛwɛɣ wazaɣ. Hɔɔlʋʋ kʋnɛ kɩ-taa lɛ, ɖɩkpaɣ Krɩstʋ mba patam numwaa yɔ, pɛkɛ “pʋtɔdɩyɛ naʋ ñanzɩ” nzɩ Ɛsɔ ñɔɔzɩ-sɩ nɛ “ɛsɩɩ se ɛsam-sɩ” yɔ. Hɔɔlʋʋ lɛɛkʋ taa lɛ, mba palakɩ ñʋʋ taa ɖoŋ nɛ pakaɖɩɣnɩ Ɛsɔ yɔ, papɩsɩɣ “pana ñanzɩ nzɩ sɩmʋnaa se paɖɩzɩ-sɩ yɔ.”—Roma 9:19-23.
(Roma mba 10:2) Mbʋ pʋyɔɔ yɔ malɩzɩɣ pɔ-yɔɔ aseɣɖe se pɛwɛnɩ kpekpeka Ɛsɔ yɔɔ, ɛlɛ katɩla nɔɔ kʋɖʋmaɣ nɛ toovenim sɩmtʋ.
it-1 1234 § 3
Sʋsɩ tʋ, sʋsɩ
Kpekpeka ŋga katɩmʋna yɔ. Ɛyʋ nɔɔyʋ pɩzɩɣ nɛ ɛtɛ ɛ-taa nɛ ɛwɛɛnɩ kpekpeka nabʋyʋ labʋ taa yaa ɛla sʋsɩ nabʋyʋ yɔɔ, ɛlɛ ɛɛwɛɣnɩ toovenim nɛ ɛ-tɔm ɛɛkɛdɩɣnɩ Ɛsɔ. Mbʋ kajalaɣ pɩnzɩ mɩnʋʋ taa Yuuda mba sakɩyɛ kaalaba. Pamaɣzaɣ se mbʋ mbʋ palakaɣ Moyizi paɣtʋ tɛɛ yɔ, mbʋ pɩsɩɣnɩ-wɛ siɣsiɣ tɩnaa. Ɛlɛ Pɔɔlɩ wɩlaa se kpekpeka ŋga paawɛna yɔ kataamʋna, mbʋ pʋyɔɔ yɔ katɩla nɔɔ kʋɖʋmaɣ nɛ toovenim sɩmtʋ. Pʋyɔɔ pataawɛɛnɩ siɣsiɣ wɛtʋ ndʋ tɩlɩɣnɩ Ɛsɔ cɔlɔ yɔ. Pɩɩwɛɛ se patɩlɩ se picoɖi-wɛ nɛ patɩŋnɩ Krɩstʋ yɔɔ nɛ papɩsɩnɩ Ɛsɔ yɔɔ nɛ pɛwɛɛnɩ siɣsiɣ wɛtʋ nɛ paɣtʋ ɛtaakʋ pɔ-tɔm. (Rom 10:1-10) Sɔɔlɩ weyi ɛlɩnɩ Taarɩsɩ yɔ, ɛɛwɛ pa-taa. Ɛɛwɛ kpekpeka siŋŋ Yuuda mba Ɛsɔ sɛtʋ taa nɛ halɩ ‘ɛnazaɣ kadadayaɣ Ɛsɔ ɛgbɛyɛ nɛ ɛñɩnaɣ se ɛɖɩzɩ-ɖɩ.’ Ɛɛñɔnɩ Paɣtʋ cɩŋ cɩŋ nɛ ɛɛkɛ ɛyʋ “weyi ɛwɩlaa se ɛfɛyɩnɩ kɩwɛɛkɩtʋ natʋyʋ yɔ.” (Gal 1:13, 14; Fil 3:6) Ɛlɛ sʋsɩ nzɩ ɛlakaɣ Yuuda mba Ɛsɔ sɛtʋ yɔɔ yɔ sɩtaamʋna. Paa mbʋ yɔ, ɛɛwɛnɩ laŋɩyɛ kɩbanɖɛ, pʋyɔɔ Yehowa tɩŋnɩ Krɩstʋ yɔɔ nɛ ɛlabɩ-ɩ lootiye nɛ ɛpɩsɩnɩ-ɩ toovenim Ɛsɔ sɛtʋ nʋmɔʋ taa.—1Ti 1:12, 13.
Bibl kalʋʋ
(Roma mba 10:1-15) Koobiya, toovenim taa lɛ, mɛwɛnɩ lɩmaɣza kɩbana ma-laŋɩyɛ taa nɛ mentendiɣ Ɛsɔ pɔ-yɔɔ se pehiɣ ñʋʋ yabɩtʋ. 2 Mbʋ pʋyɔɔ yɔ malɩzɩɣ pɔ-yɔɔ aseɣɖe se pɛwɛnɩ kpekpeka Ɛsɔ yɔɔ, ɛlɛ katɩla nɔɔ kʋɖʋmaɣ nɛ toovenim sɩmtʋ. 3 Mbʋ pʋyɔɔ yɔ, ɛzɩma patɩtɩlɩ Ɛsɔ siɣsiɣ wɛtʋ, ɛlɛ pañɩnɩɣ se paɖʋ pa-maɣmaɣ pa-ñɩndʋ yɔ pʋyɔɔ lɛ, patiluzi pa-tɩ Ɛsɔ siɣsiɣ wɛtʋ tɛɛ. 4 Mbʋ pʋyɔɔ yɔ Krɩstʋ kɛnɩ Paɣtʋ tɩnaɣ, se pɩsa nɛ weyi ɛwɛnɩ tisuu ɛ-yɔɔ yɔ, ɛpɩzɩ nɛ ɛwɛɛnɩ siɣsiɣ wɛtʋ. 5 Mbʋ pʋyɔɔ yɔ Moyizi ma siɣsiɣ wɛtʋ ndʋ tɩlɩnɩ Paɣtʋ taa yɔ tɩ-yɔɔ se: “Ɛyʋ weyi ɛɖɔŋ tɔm tʋnɛ tɩ-yɔɔ yɔ, ɛkaɣ wɛʋ wezuu pɩtɩŋnɩ tɩ-yɔɔ.” 6 Ɛlɛ siɣsiɣ wɛtʋ ndʋ tɩlɩnɩ tisuu taa yɔ tɩtɔŋ se: “Taayɔɔdɩ ña-laŋɩyɛ taa se: ‘Akaɣ kpaʋ ɛsɔdaa?’ pʋ-tɔbʋʋ se, akpaɣ se etisi Krɩstʋ, 7 yaa: ‘Akaɣ tibu pɔʋ sɔsɔʋ taa?’ pʋ-tɔbʋʋ se, etiki se ɛkpazɩ Krɩstʋ nɛ sɩɖaa taa.” 8 Ɛlɛ suwe tɩyɔɔdʋʋ? “Tɔm wɛ ñɔ-cɔlɔ, ñɔ-nɔɔ taa maɣmaɣ nɛ ña-laŋɩyɛ taa maɣmaɣ”; pʋ-tɔbʋʋ lɛ se, tisuu “tɔm” ndʋ ɖiɖiɣni susuu yɔ. 9 Mbʋ pʋyɔɔ yɔ, ye ŋyɔɔdʋʋnɩ ñɔ-nɔɔ ɛyaa ɛsɩndaa se Yesu kɛnɩ Kɩbaɣlʋ, nɛ ŋwɛɛnɩ tisuu ña-laŋɩyɛ taa se Ɛsɔ fezi-i nɛ sɩɖaa taa yɔ, ŋkaɣ hiɣu ñʋʋ yabʋ. 10 Mbʋ pʋyɔɔ yɔ laŋɩyɛ ɛyʋ tisiɣna se pɩsa nɛ ɛpɩsɩ siɣsiɣ tʋ, ɛlɛ nɔɔ ɛyʋ yɔɔdʋʋnɩ ɛyaa ɛsɩndaa se pɩsa nɛ ehiɣ ñʋʋ yabɩtʋ. 11 Mbʋ pʋyɔɔ yɔ mayaɣ yɔɔdʋʋ se: “Weyi ɛwɛɣnɩ tisuu ɛ-yɔɔ yɔ, fɛyɛ ɛɛkaɣ-ɩ kpaʋ.” 12 Mbʋ pʋyɔɔ yɔ tʋkaɣ nakɛyɛ fɛyɩ Yuuda tʋ nɛ Grɛɛkɩ tʋ pɛ-hɛkʋ taa. Kɩbaɣlʋ kʋɖʋm pa-tɩŋa pɛwɛna, ɛnʋ weyi ɛlakɩ kʋjɔŋ sakɩyɛ mba payɩ payaɣ-ɩ yɔ. 13 Mbʋ pʋyɔɔ yɔ “weyi ɛyaɣ Yehowa hɩɖɛ yɔ, pakaɣ ɛ-ñʋʋ yabʋ.” 14 Ɛlɛ, ɛzɩma pakaɣ yaʋ ɛ-hɩɖɛ ye pɛfɛyɩnɩ tisuu ɛ-yɔɔ? Nɛ ɛzɩma pakaɣ wɛnʋʋ tisuu weyi patɩnɩɩ ɛ-tɔm yɔ ɛ-yɔɔ? Nɛ ɛzɩma papɩzɩɣ nɛ panɩɩ ye nɔɔyʋ ɛfɛyɩ se esusuu tɔm? 15 Nɛ ɛzɩma pakaɣ tɔm susuu ye petitiyi-wɛ yɔ? Ɛzɩ pamaʋ yɔ: “Mba posusuu mbʋ pɩwɛ ɖeu yɔ pɩ-tɔm kɩbandʋ yɔ, pa-nɩŋgbanzɩ ɖewa pɩdɩɩfɛyɩ!”