MWBR19 05 Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
6-12 MAI
ÑƖM MBƲ PƖWƐ ƐSƆTƆM TAA YƆ | 2 KƆRƐNTƖ MBA 4-6
“Ðɩɩlɔʋ lidaʋ”
(2 Kɔrɛntɩ mba 4:16) Pʋyɔɔ lɛ, ɖɩɩlɔʋ lidaʋ, ɛlɛ paa ɛyʋ weyi ɖɩkɛ ɛsa yɔɔ yem yɔ ɛpʋkɩ yɔ, toovenim taa lɛ ɛyʋ weyi ɖɩkɛ pɩ-taa kiŋ yɔ ɛpɩsɩɣ kɩfalʋ kɩyakʋ kɩyakʋ.
w04 15/8 25 § 16-17
Pɩnɩ-ɖʋ ɛlɛ ɖɩɩlɔʋ lidaʋ
16 Pɩcɛyɩ siŋŋ se ɛyʋ ɛcɔnɩ e-fezuu taa alaafɩya ɖeɖe. Ye taabalɩyɛ kɩbanɖɛ ɛwɛ ɖa nɛ Ɛsɔ Yehowa ɖɛ-hɛkʋ taa yɔ, nabʋyʋ taa pɩpɩzɩɣ nɛ pɩnɩɩ-ɖʋ tomnaɣ yɔɔ, ɛlɛ pɩɩnɩɣ-ɖʋ nɛ Yehowa sɛʋ kaaʋ. Yehowa “[kpazɩɣnɩ] weyi ehowa yɔ ɖoŋ nɛ ɛsɔzʋʋ ɖoŋ weyi ɛkɛ ɛjam yɔ.” (Izaayii 40:28, 29) Apostoloo Pɔɔlɩ maɣmaɣ kaana ɛzɩma Yehowa kaakpazɩ-ɩ ɖoŋ yɔ, pʋyɔɔ ɛmawa se: “Ðɩɩlɔʋ lidaʋ, ɛlɛ paa ɛyʋ weyi ɖɩkɛ ɛsa yɔɔ yem yɔ ɛpʋkɩ yɔ, toovenim taa lɛ ɛyʋ weyi ɖɩkɛ pɩ-taa kiŋ yɔ ɛpɩsɩɣ kɩfalʋ kɩyakʋ kɩyakʋ.”—2 Kɔrɛntɩ mba 4:16.
17 Yʋsɩ tɔm loyaɣ “kɩyakʋ kɩyakʋ.” Tɔm loyaɣ ŋga kawɩlɩɣ se pɩwɛɛ se ɛyʋ eyele ɛ-tɩ nɛ fezuu taa ɖʋtʋ ndʋ Yehowa laba yɔ tɩwazɩ-ɩ paa evemiye nɖɩ. Koobu halɩñɩnʋ nɔɔyʋ labɩ Ɛsɔtɔm tiyiyu tʋmɩyɛ siɣsiɣ pɩnzɩ 43. Pɩnzɩ nzɩ sɩ-taa, nabʋyʋ taa pɩnɩɣaɣ-ɩ nɛ pitiki-i yɔɔɔ. Ɛlɛ ɛtɩlɔ lidaʋ. Ɛkɛdaa se: “Mamalɩsɩ man-tɩ, nɛ paa tanaŋ ŋgʋ lɛ, menfeŋ lɔŋ nɛ mankpakɩɣ alɩwaatʋ nɛ mantɩmɩɣnɩ Yehowa nɛ mankalɩɣ ɛ-Tɔm nɛ pʋcɔ manpaɣzɩ man-tʋma. Ɛzɩma mamalɩsɩ man-tɩ mbʋ yɔ, mbʋ sɩnɩnɩ-m nɛ mɔnɖɔkɩ man-tɩ halɩ nɛ sɔnɔ.” Ɛɛɛ, ye ɖɩtɩmɩɣnɩ Yehowa “kɩyakʋ kɩyakʋ” nɛ ɖɩmaɣzɩɣ ɛ-wɛtʋ kɩbandʋ nɛ lidaʋ tɔm ndʋ eheyi-ɖʋ yɔ tɩ-yɔɔ yɔ, ɖɩpɩzɩɣ nɛ ɖɩtaa liu se ɛkaɣ-ɖʋ ɖoŋ kpazʋʋ.
(2 Kɔrɛntɩ mba 4:17) Mbʋ pʋyɔɔ yɔ paa kʋñɔŋ ɛwɛ alɩwaatʋ pazɩ nɛ kɩtɩpaɣlɩ yɔ, kɩkɔŋnɩ-ɖʋ samtʋ ndʋ tɩwɛɛ nɛ tɩpaɣlɩɣ paɣlʋʋ yɔɔ nɛ pɩkɩlɩ nɛ tɩwɛɛ tamtam yɔ;
it-1 759
Tɩ ɖɔkʋʋ
Pɩcɛyaa ɖɔɖɔ se ɛyʋ ɛsɩyɛ ɛwɛɛ Krɩstʋ mba lidaʋ yɔɔ; ɛyʋ kaɣ lɩʋ kɩwɛɛkɩm yomiye taa nɛ ɛcaɣ wezuu maatɛŋ. Halɩ paa pɩlaba se ɛyʋ hiɣ sɩm koyindinaa nesi tɛɛ yɔ, eelesiɣ lidaʋ ŋgʋ. (Rom 5:4, 5; 1Te 1:3; Nat 2:10) Ye ɖɩkpaɣ mbʋ mbʋ ɖɩkaɣ hiɣu cee wayɩ yɔ, nɛ ɖɩmaɣzɩnɩ sɔnɔ sɔnɔ kʋñɔmɩŋ weyi ɩ-taa ɖɩwɛɛ yɔ, ɖɩnaɣ se kʋñɔmɩŋ ɩnɩ ɩtɩtɩɩlɩʋ pʋyʋ. (Rom 8:18-25) Kʋñɔmɩŋ weyi ɩ-taa ɖɩwɛ sɔnɔ yɔ, paa ɩtɩɩwɛ ɛzɩma nɛ ɩcɛzɩɣ-ɖʋ nabʋyʋ taa yɔ, ye ɖɩkpaɣ-ɩ nɛ ɖɩmaɣzɩnɩ tamtam wezuu ŋgʋ kɩwɛ ɖɛ-ɛsɩndaa yɔ, ɖɩnaɣ se kʋñɔmɩŋ ɩnɩ ɩwɛ ‘alɩwaatʋ pazɩ nɛ ɩtɩpaɣlɩ.’ (2Kɔ 4:16-18) Ye ɛyʋ ɛtɔzʋʋ se kʋñɔmɩŋ weyi ɩwɛ sɔnɔ yɔ, alɩwaatʋ pazɩ yem ɩwɛɛ, nɛ pɩ-tɛ ɛyʋ ɛnʋ ɛñɔɔnɩ Krɩstʋ mba lidaʋ kpam yɔ, pɩsɩɣnɩ-ɩ nɛ ɛɖɔkɩ e-siɣsiɣ wɛtʋ Yehowa ɛsɩndaa nɛ ɛɛlɔʋ lidaʋ.
(2 Kɔrɛntɩ mba 4:18) mbʋ yebina nɛ ɖɩɩkaŋ ɖɛ-ɛsa mbʋ pɩnaɣ yɔ pɩ-yɔɔ, ɛlɛ ɖɩkaŋ ɖɛ-ɛsa mbʋ pɩɩnaɣ yɔ pɩ-yɔɔ. Mbʋ pʋyɔɔ yɔ, mbʋ pɩnaɣ yɔ, pɩwɛ alɩwaatʋ pazɩ na, ɛlɛ mbʋ pɩɩnaɣ yɔ, pʋbʋ ñɛwɛ tamtam.
Ðɩñɩnɩ fezuu taa ñɩm
(2 Kɔrɛntɩ mba 4:7) Ɛlɛ ɖɩwɛnɩ ñɩm mbʋ cʋʋ ñanzɩ taa, se pɩsa nɛ ɖoŋ weyi ɩcɛzɩ ɛyʋ ɖoŋ yɔ, ɩkɛ Ɛsɔ ñɩŋ nɛ ɩtaalɩɩnɩ ɖɔ-cɔlɔ.
w12 1/2 28-29
“Yele nɛ Yehowa mʋʋyɩ”
Nɔɔɖɛyaa ɛgbɛyɛ taa tʋ David Splane lɩzɩnɩ tɔm ñʋʋ ŋgʋ kɩ-taa. (2 Kɔrɛntɩ mba 4:7) Ɛbɛ ñɩm mbʋ, pɩkɛnaa? Pɩkɛ sɩmtʋ yaa lɔŋsɩnɖɛ na? Tɔm yɔɔdɩyʋ cosaa se, “Aayɩ. Ñɩm mbʋ pɩ-tɔm apostoloo Pɔɔlɩ yɔɔdʋʋ yɔ, mbʋ lɛ, ‘lɩm ɖʋʋ tʋmɩyɛ’ nɖɩ ɖɩ-yɔɔ ɖɩtɩŋɩɣna nɛ ‘ɖɩlɩzɩɣ toovenim nɛ ɖɩwɩlɩɣ yɔ.’” (2 Kɔrɛntɩ mba 4:1, 2, 5) Koobu Splane heyi sukulibiya se sɩtɔzɩ se fenasɩ kagbanzɩ nzɩ sɩkpaɣaa sɩkpɛlɩkɩ sukuli taa yɔ, pɩñɔɔzɩ-sɩ se sɩla ŋgee Ɛsɔ sɛtʋ tʋmɩyɛ naɖɩyɛ. Nɛ Ɛsɔ sɛtʋ tʋmɩyɛ nɖɩ pɩwɛɛ se ɖɩmʋ ñɩm siŋŋ sɩ-ɛsɩndaa.
Tɔm yɔɔdɩyʋ lɩzɩ pɩ-taa se “cʋʋ ñanzɩ” sɩŋnɩ ɖo-tomnasɩ. Ɛwɩlɩ tʋkaɣ ŋga kɛwɛ cʋʋ ñɩnaɣ nɛ sika ñɩnaɣ pɛ-hɛkʋ taa yɔ. Paalakɩnɩ tʋmɩyɛ sika ñanzɩ ɖoŋ ɖoŋ. Ɛlɛ cʋʋ ñanzɩ pakɩlɩɣ tʋmɩyɛ labɩnʋʋ. Ye ɖɩɖʋ ñɩm nabʋyʋ sika ñɩnaɣ taa nɛ ɖɩtɩtɩlɩ labʋ yɔ, ɖɛ-ɛsɩyɛ wɛɣ sika ñɩnaɣ ŋga kɔ-yɔɔ nɛ pɩkɩlɩ ñɩm mbʋ pɩwɛ ka-taa yɔ pɩ-yɔɔ. Koobu Splane heyi sukulibiya se: “Mɩ lɛ, ɩtaahɔ ɛyaa lɩmaɣza nɛ ɩkɔnɩ mɩ-yɔɔ. Mɩ, Ɛsɔtɔm tiyiyaa, pɩwɛɛ se ɩhɔ ɛyaa lɩmaɣza nɛ iwoni Yehowa yɔɔ. Ɩkɛ cʋʋ ñanzɩ yem.”
(2 Kɔrɛntɩ mba 6:13) Pʋyɔɔ lɛ, ɩlabɩ-ɖʋ ɛzɩ ɖɩlabʋ-mɩ yɔ—Mɔyɔɔdʋʋnɩ-mɩ ɛzɩ men-piya yɔ—ikuli mɩ-laŋa wamm.
w09 15/11 21 § 7
Iwolo pɩ-yɔɔ nɛ ɩpaɣlɩɣ koobiɖe sɔɔlɩm taa
7 Nɛ ɖa yɔ? Ɛzɩma ɖɩpɩzɩɣ ‘ɖɩwalɩsɩ ɖa-tɩ’ nɛ ɖɩwɩlɩ koobiɖe sɔɔlɩm? Ye ɛyaa ɩkɛ kpanɖaʋ kʋɖʋmʋʋ taa ɛyaa yaa pɔyɔɔdʋʋ kʋnʋŋ kʋɖʋmʋʋ yɔ, pɔ-tɔm pɩzɩɣ pɩkɛdɩnɩ ɖama kɛlɛʋ yem. Nɛ ɛyaa mba pɔsɔɔlɩ aleɣya kʋɖʋma naayɛ yɔ, ɖoŋ ɖoŋ lɛ, pɛwɛɣ ɖama cɔlɔ. Ɛlɛ ye ɖa nɛ koobiya nabɛyɛ ɖɩɩñɔtʋʋnɩ ɖama, mbʋ pʋyɔɔ yɔ, ɖɩtɩkaa nabʋyʋ yɔ, pɩpɔzʋʋ se ‘ɖɩwalɩsɩ ɖa-tɩ.’ Pɩwɛɣ ɖeu se ɖɩpɔzɩ ɖa-tɩ se: ‘Kaɖɛ nɛ kaɖɛ nɛ pʋcɔ koobiya mba ma nɛ wɛ ɖɩtɩkaa nabʋyʋ yɔ, ɖɩlɩɩ tɔm susuu yaa ɖɩlɩɩ ɖɩmʋ helim yaa ɖɩla aleɣya naayɛ? Kewiyaɣ Kpaaŋ taa lɛ, maaɖʋʋ taabalɩyɛ nɛ ɛyaa kɩfama mba pɔkɔma yɔ, mbʋ pʋyɔɔ yɔ mamaɣzɩɣ se pɩwɛɛ se pɩkpaɣ alɩwaatʋ pʋcɔ? Nɛ ɛgbɛyɛ taa ñɩma mba pɛkɛ akpadɩyaa, evebiya nɛ pɛlaa yɔ, mɛnsɛɣ pa-tɩŋa na?’
Bibl kalʋʋ
(2 Kɔrɛntɩ mba 4:1-15) Mbʋ yebina nɛ ɛzɩma pana ɖa-pʋtɔdɩyɛ nɛ pɛcɛlɩ-ɖʋ lɩm ɖʋʋ tʋmɩyɛ ɖɩnɛ yɔ pʋyɔɔ lɛ, ɖiiyeki-ɖɩ labʋ. 2 Ɛlɛ ɖiyebi fɛyɛ lakasɩ, mɛsaɣ tɛɛ lakasɩ, ɖɩɩɖɔŋnɩ ajitu yaa ɖɩɩlɛɣzɩɣ Ɛsɔ tɔm; ɛlɛ alɩwaatʋ ndʋ ɖɩlɩzɩɣ toovenim nɛ ɖɩwɩlɩɣ yɔ, Ɛsɔ ɛsɩndaa lɛ ɖɩpɩsɩ kɩɖaʋ kɩbaŋʋ ɛyaa kpeekpe cɔlɔ se pitukuni pɛ-ɛhʋyɛ. 3 Toovenim taa lɛ, ye tɔm kɩbandʋ ndʋ ɖisusuu yɔ tɩ-yɔɔ ehuuzaa yɔ, mba peleki yɔ, pɔ-cɔlɔ tɩ-yɔɔ huuzaa, 4 mba pɛfɛyɩnɩ tisuu yɔ, mba ɛjaɖɛ yɔɔ ɖʋtʋ tʋnɛ tɩ-ɛsɔ yʋlʋsɩ pa-maɣzɩm, se Krɩstʋ weyi ɛkɛ Ɛsɔ lɛzʋʋ yɔ, ɛ-yɔɔ tɔm kɩbandʋ sɔsɔtʋ ñalɩmɩyɛ ɛtaañandɩ pɔ-yɔɔ yɔ. 5 Mbʋ pʋyɔɔ yɔ pɩtɩkɛ ɖa-maɣmaɣ ɖɔ-yɔɔ tɔm ɖisusuu, ɛlɛ ɖisusuu Yesu Krɩstʋ yɔɔ tɔm se ɛkɛ Kɩbaɣlʋ nɛ ɖa-maɣmaɣ se ɖɩkɛ mi-yomaa Yesu yɔɔ. 6 Mbʋ pʋyɔɔ yɔ Ɛsɔ yɔɔdɩna se: “Ñalɩmɩyɛ ɛñandɩ cɩkpɛndʋʋ taa,” nɛ ɛñandɩ ɖa-laŋa yɔɔ se pɩsa nɛ ɛkpaɣ Ɛsɔ sɩmtʋ sɔsɔtʋ nɛ ɛñandɩnɩ-yɛ pɩtɩŋnɩ Krɩstʋ ɛsɩndaa. 7 Ɛlɛ ɖɩwɛnɩ ñɩm mbʋ cʋʋ ñanzɩ taa, se pɩsa nɛ ɖoŋ weyi ɩcɛzɩ ɛyʋ ɖoŋ yɔ, ɩkɛ Ɛsɔ ñɩŋ nɛ ɩtaalɩɩnɩ ɖɔ-cɔlɔ. 8 Pañɩɣ-ɖʋ hɔɔlɩŋ tɩŋa taa, ɛlɛ pɩtɩtalɩ ɖenɖe pɩɩsaŋ se ɖiciɣdi yɔ; pisidi ɖa-ñʋŋ taa, ɛlɛ pɩtɩtalɩ ɖenɖe ɖɩɩsɩŋ mbʋ ɖɩla yɔ; 9 panazɩ-ɖʋ, ɛlɛ Ɛsɔ tɩlɔ-ɖʋ; payaɣ-ɖʋ nɛ tɛtʋ, ɛlɛ patɩɖɩzɩ-ɖʋ. 10 Paa ɛzɩmtaa lɛ, ɖɩɖɔkʋʋ ɖa-laŋɩyɛ kʋñɔmɩŋ weyi Yesu kaatɔwaa yɔ ɩ-taa ɖo-tomnaɣ taa, se pɩsa nɛ palɩzɩ ɖɔɖɔ Yesu wezuu nɛ pawɩlɩ ɖo-tomnaɣ taa. 11 Mbʋ pʋyɔɔ yɔ ɖa mba ɖɩwɛ wezuu yɔ, ɖɩwɛ sɩm nɔɔ taa paa ɛzɩmtaa Yesu yɔɔ, se pɩsa nɛ palɩzɩ ɖɔɖɔ Yesu wezuu nɛ pawɩlɩ ɖo-tomnaɣ kɩsɩbaɣ taa. 12 Pʋyɔɔ lɛ, sɩm ɖiɣni labʋ tʋmɩyɛ ɖa-taa, ɛlɛ mɩ lɛ, wezuu ɖiɣni labʋ tʋmɩyɛ mɩ-taa. 13 Nɛ ɛzɩma ɖɩwɛnɩ tisuu fezuu kʋɖʋmʋʋ ŋgʋ, ɛzɩ ŋgʋ paama kɩ-tɔm se: “Mɛwɛnɩ tisuu, pʋyɔɔ mɔyɔɔdaa” yɔ pʋyɔɔ lɛ, ɖa ɖɔɖɔ ɖɩwɛnɩ tisuu nɛ pʋyɔɔ ɖɩyɔɔdʋʋ, 14 mbʋ pʋyɔɔ yɔ ɖɩnawa se Weyi efezi Yesu yɔ, ɛkaɣ-ɖʋ fezuu ɖɔɖɔ se ɖa nɛ Yesu ɖɩwɛɛ, nɛ ɛkaɣ ɖa nɛ mɩ wonuu Yesu ɛsɩndaa. 15 Mbʋ pʋyɔɔ yɔ mɩ-yɔɔ yɔɔ pɩtɩŋa payɩ mbʋ yɔ pɩwɛɛ, se pɩsa nɛ ɛzɩma lootiye wɛɛ nɛ ɖihukuu yɔ, pɩɖɔɔ nɛ pɩkɩlɩ, mbʋ pʋyɔɔ yɔ ɛyaa mba pɔɖɔwa nɛ pɩkɩlɩ yɔ, pɛwɛɛ nɛ pɛsɛɣ Ɛsɔ se ɛlabaɣ lɛ se pɩkɛnɩ-ɩ samtʋ.
13-19 MAI
ÑƖM MBƲ PƖWƐ ƐSƆTƆM TAA YƆ | 2 KƆRƐNTƖ MBA 7-10
“Sɩnʋʋ tʋmɩyɛ nɖɩ ɖɩlakɩ yɔ”
(2 Kɔrɛntɩ mba 8:1-3) Lɛɛlɛɛyɔ koobiya, ɖɩsɔɔlaa se ɩtɩlɩ lootiye nɖɩ Ɛsɔ labɩ Masedonii agbaa yɔ. 2 Alɩwaatʋ ndʋ pɔtɔɔ kʋñɔŋ takɩm sɔsɔm nabʋyʋ taa yɔ, pa-taa leleŋ sɔsɔŋ nɛ pa-kʋñɔndʋtʋ sɔsɔtʋ peyeba nɛ pa-kʋjɔŋ labʋ ɖɔɔ nɛ pɩkɩlɩ. 3 Mbʋ pʋyɔɔ yɔ, paha mbʋ pɛwɛna yɔ na, ɛɛɛ, malɩzɩɣ aseɣɖe se halɩ pahawa nɛ pɩcɛzɩ mbʋ pɛwɛna yɔ,
w98 1/11 25 § 1
“Ɛsɔ sɔɔlɩ weyi ɛhaɣnɩ taa leleŋ yɔ”
Kajalaɣ taa lɛ, Pɔɔlɩ heyi Masedonii mba tɔm Kɔrɛntɩ mba. Masedonii mba kaaha kɩɖaʋ kɩbaŋʋ nɛ pokuli pe-nesi tɛɛ nɛ paɖʋ nesi po-koobiya. Pɔɔlɩ mawa se: “Alɩwaatʋ ndʋ pɔtɔɔ kʋñɔŋ takɩm sɔsɔm nabʋyʋ taa yɔ, pa-taa leleŋ sɔsɔŋ nɛ pa-kʋñɔndʋtʋ sɔsɔtʋ peyeba nɛ pa-kʋjɔŋ labʋ ɖɔɔ nɛ pɩkɩlɩ.” Masedonii mba taaɖaŋ se nɔɔyʋ ewolo nɛ eseɣti-wɛ nɛ pʋcɔ. Ɛlɛ Pɔɔlɩ yɔɔdaa se: “Pa-maɣmaɣ paawɛɛ nɛ petendiɣ-ɖʋ siŋŋ se ɖɩha-wɛ waɖɛ nɛ pala kʋjɔʋ faaa.” Masedonii mba kaalabɩ kʋjɔŋ weyi faaa nɛ taa leleŋ yɔ, itukuuni ɛyʋ laŋɩyɛ siŋŋ, mbʋ pʋyɔɔ yɔ pa-maɣmaɣ paawɛ “kʋñɔndʋtʋ sɔsɔtʋ” taa.—2 Kɔrɛntɩ mba 8:2-4.
Koobiya sɩnʋʋ kɛ Ɛsɔ sɛtʋ tʋmɩyɛ ɖɔɖɔ
ÐƖWƐ pɩnaɣ 46 taa mbʋ yɔ. Haŋaɣ sa miŋ Yudee taa. Krɩstʋ wayɩ tɩŋɩyaa mba pɛkɛ Yuda mba yɔ, pɛfɛyɩnɩ liidiye se paya tɔɔnaɣ, mbʋ pʋyɔɔ yɔ pakpazɩ tɔɔnasɩ yɔɔ liidiye kaŋ kaŋ. Pɛ-ɛzɩdaa maɣmaɣ wɩlɩɣ se ñɔɔsɩ kɩlɩ-wɛ. Ɛlɛ pɩkazɩ pazɩ, ɛzɩma Yehowa kaɣ huuzuu pɔ-yɔɔ yɔ, wiɖiyi etihuuzi nabɛyɛ yɔɔ mbʋ. Ɛzɩ ɛbɛ kaɣ labʋ kpem?
(2 Kɔrɛntɩ mba 8:4) alɩwaatʋ ndʋ pa-maɣmaɣ paawɛɛ nɛ petendiɣ-ɖʋ siŋŋ se ɖɩha-wɛ waɖɛ nɛ pala kʋjɔʋ faaa, nɛ paɖʋ nesi sɩnʋʋ tʋmɩyɛ nɖɩ palakɩ ɛyaa kiɖeɖema yɔ.
Koobiya sɩnʋʋ kɛ Ɛsɔ sɛtʋ tʋmɩyɛ ɖɔɖɔ
4 Apostoloo Pɔɔlɩ ma Kɔrɛntɩ mba takayaɣ naalɛ ñɩŋga lɛ, ɛlɩzɩ pɩ-taa se Krɩstʋ mba Ɛsɔ sɛtʋ tʋmɩyɛ wɛ tindima naalɛ taa. Toovenim, Krɩstʋ mba patam numwaa Pɔɔlɩ kaama tɔm ndʋ; ɛlɛ titukuuni “heŋ lɛɛŋ” ɖɔɖɔ. (Yohanɛɛsɩ 10:16, nwt) Ðɛ-Ɛsɔ sɛtʋ hɔɔlʋʋ kʋyʋmʋʋ lɛ “ceɣu tʋmɩyɛ” yaa tɔm susuu nɛ tɔm wɩlʋʋ tʋmɩyɛ. (2 Kɔrɛntɩ 5:18-20; 1 Timootee 2:3-6) Naalɛ ñɩŋgʋ lɛ se “pasɩnɩ ɛyaa kiɖeɖema” ɛzɩ Pɔɔlɩ kaayɔɔdʋʋ yɔ. (2 Kɔrɛntɩ 8:4) Grɛɛkɩ kʋnʋŋ taa lɛ, tɔm piye diakonia pɛɖɛzɩ cɩnɛ se “ceɣu tʋmɩyɛ” nɛ “pasɩnɩ ɛyaa kiɖeɖema;” nɛ tɔm piye nɖɩ ɖɩ-tɔbʋʋ lɛ se “Ɛsɔ sɛtʋ tʋmɩyɛ.” Ɛbɛ tɔm tʋnɛ tɩkpɛlɩkɩɣ-ɖʋ?
5 Ye Pɔɔlɩ ɛlabɩnɩ tʋmɩyɛ tɔm piye kʋyʋmɖɩyɛ tʋma ana a-naalɛ a-taa yɔ, ɛcaɣ ɛwɩlɩ se koobiya sɩnʋʋ tʋmɩyɛ nɛ tʋma lɛɛna wena palakɩ ɛgbɛyɛ taa yɔ, awɛ kɩmaŋ. Pɔɔlɩ kaamawa se: “Tʋma wɛ ndɩ ndɩ, pɩtɛ lɛ Kɩbaɣlʋ kɛ kʋyʋm ɛnʋ. Lakasɩ ndɩ ndɩ wɛɛ, pɩtɛ lɛ fezuu kʋyʋmʋʋ ŋgʋ kɩlakɩna.” (1 Kɔrɛntɩ 12:4-6, 11) Toovenim taa lɛ, Pɔɔlɩ ñɩnaɣ wɩlʋʋ se nɔɔ kʋyʋmaɣ wɛ ɛgbɛyɛ taa tʋma lɛɛna nɛ wezuu “ŋgʋ kiɖeni Ɛsɔ yɔ” yaa “tʋmɩyɛ kele kele ñɩnɖɛ” pɛ-hɛkʋ taa. (Roma 12:1, 6-8) Pʋbʋ pɩɩlakɩ-ɖʋ piti se ɛ-maɣmaɣ ɛkpaɣ ɛ-alɩwaatʋ hɔɔlʋʋ nakʋyʋ nɛ ɛsɩnɩ “ɛyaa kiɖeɖema.”—Roma 15:25, 26.
6 Pɔɔlɩ kaasɩnɩ Kɔrɛntɩ mba se patɩlɩ mbʋ pʋyɔɔ ɛtɔŋ se koobiya sɩnʋʋ tʋmɩyɛ kɛ pɛ-Ɛsɔ sɛtʋ tʋmɩyɛ hɔɔlʋʋ nakʋyʋ yɔ. Yʋsɩ tɔm ndʋ ɛyɔɔdaa yɔ: Ɛyɔɔdaa se Krɩstʋ ñɩma sɩɣnɩ po-koobiya ‘pa-ñamtʋ yɔɔ Krɩstʋ tɛ tɔm kɩbandʋ yɔɔ.’ (2 Kɔrɛntɩ 9:13) Ye mbʋ Krɩstʋ mba sɩɣnɩ po-koobiya lalaa, mbʋ pʋyɔɔ yɔ pɔsɔɔlaa se pɔɖɔ Krɩstʋ wɩlɩtʋ yɔɔ. Pɔɔlɩ yɔɔdaa se camɩyɛ lakasɩ nzɩ palakɩ po-koobiya yɔ, sɩkɛ “kʋjɔʋ sakɩyɛ ŋgʋ Ɛsɔ pɩyɩ” pɔ-yɔɔ yɔ. (2 Kɔrɛntɩ 9:14; 1 Pɩyɛɛrɩ 4:10) Pama 1er mars 1976 tɛ Feŋuu Tilimiye taa ɛzɩma ɖɩsɩɣnɩ ɖo-koobiya mba pɛwɛ kɩcɛyɩm taa yɔ pɩ-tɔm. Pamawa se: “Ðɩɩpɩtɩɣ kpa se tʋmɩyɛ nɖɩ, ɖɩ-tɔm cɛyɩ Yehowa nɛ ɛ-Pɩyalʋ Yesu Krɩstʋ pɛ-ɛzɩdaa.” Toovenim taa lɛ, koobiya sɩnʋʋ kɛ tʋmɩyɛ kele kele ñɩnɖɛ hɔɔlʋʋ nakʋyʋ.—Roma 12:1, 7; 2 Kɔrɛntɩ 8:7; Ebree 13:16.
(2 Kɔrɛntɩ mba 9:7) Paa weyi lɛ, ɛla ɛzɩ ɛɖʋʋ ɛ-laŋɩyɛ taa yɔ, ɛtaalabɩnɩ agbiɖa yaa pɩtaawɛɛ ɛzɩ pakpa-ɩ nɛ ɖoŋ yɔ, mbʋ pʋyɔɔ yɔ Ɛsɔ sɔɔlɩ weyi ɛhaɣnɩ taa leleŋ yɔ.
Le palɩɣ liidiye yɔɔ nɛ palakɩ Kewiyaɣ tʋma?
10 Kajalaɣ lɛ, ɖɩlakɩ sɔɔlɩm haɖɛ mbʋ pʋyɔɔ yɔ ɖɩsɔɔlɩ Yehowa nɛ ɖɩñɩnɩɣ se ɖɩla “mbʋ piɖeni-i [yaa pɩkɛdɩnɩ-ɩ] yɔ.” (1 Yohanɛɛsɩ 3:22) Ɛsɔ sɛyʋ weyi ɛhaɣ Yehowa nɛ ɛ-laŋɩyɛ pilim yɔ, ɛ-haɖɛ kɛdɩɣnɩ-ɩ pɩdɩɩfɛyɩ. Apostoloo Pɔɔlɩ ma tɔm natʋyʋ haɖɛ nɖɩ Krɩstʋ mba lakɩ yɔ, ɖɩ-yɔɔ. (Kalɩ 2 Kɔrɛntɩ 9:7.) Paakpaɣ Krɩstʋ tʋ toovenim tʋ nɛ ɖoŋ se ɛha haɖɛ. Nɛ ɛɛhaɣ haɖɛ naɖɩyɛ nɛ pʋwayɩ lɛ ekpiɖiɣ. Ɛlɛ ɛhaɣ “ɛzɩ ɛmaɣzʋʋ ɛ-taa yɔ” yaa ɛzɩ ɛɖʋʋ ɛ-laŋɩyɛ taa yɔ. Pʋ-tɔbʋʋ lɛ se ɛnaɣ kɩcɛyɩm nabʋyʋ lɛ, ɛmaɣzɩ pɩ-yɔɔ nɛ ɛna se ɛzɩma ɛpɩzɩɣ nɛ ɛsɩna nɛ pɔcɔnɩ pi-ɖeɖe. Weyi ɛhaɣ mbʋ yɔ, ɛ-tɔm kɛdɩɣnɩ Yehowa, mbʋ pʋyɔɔ yɔ “Ɛsɔ sɔɔlɩ weyi ɛhaɣ nɛ laŋɩyɛ leleŋ yɔ.” Bibl nakʋyʋ ñɔyɔɔdaa se: “Ɛsɔ sɔɔlɩ weyi ɛsɔɔlɩ haʋ yɔ.”
Ðɩñɩnɩ fezuu taa ñɩm
(2 Kɔrɛntɩ mba 9:15) Pɛsɛɛ Ɛsɔ se ɛlabaɣ lɛ ɛ-kʋjɔʋ falaa ŋgʋ kɩ-wayɩ fɛyɩ yɔ kɩ-yɔɔ.
Ðiyele nɛ ‘Ɛsɔ kʋjɔʋ ŋgʋ kɩ-wayɩ fɛyɩ yɔ’ kiseɣti-ɖʋ
2 Pɔɔlɩ kaanawa se pɩtɩŋnɩ Yesu kɩlaʋ yɔɔ lɛ, lidaʋ tɔm ndʋ payɩ Ɛsɔ yɔɔdaa yɔ tɩkaɣ labʋ. (Kalɩ 2 Kɔrɛntɩ 1:20.) Pɩwɩlɩɣ se Ɛsɔ “kʋjɔʋ ŋgʋ kɩ-wayɩ fɛyɩ yɔ,” ŋgʋ lɛ Yesu kɩlaʋ, camɩyɛ lakasɩ nɛ sɔɔlɩm sɔsɔm mbʋ Yehowa wɩlɩɣ-ɖʋ yɔ. Ye ɖɩtɔm se ɖɩyɔɔdʋʋ Ɛsɔ kʋjɔʋ sɔsɔʋ ŋgʋ kɩ-tɔm tete yɔ, ɖɩɩkaɣ tɛm. Ɛzɩma kʋjɔʋ sɔsɔʋ ŋgʋ kitukuuni-ɖʋ? Nɛ ɛzɩma kɩkaɣ-ɖʋ seɣtuu se ɖɩñɔɔzɩ ɖa-tɩ nɛ ɖɩɖaŋ Yesu sɩm yɔɔ tɔzʋʋ sɔnzɩ nzɩ ɖɩkaɣ labʋ Cɩla 23 mars 2016 wiye yɔ?
(2 Kɔrɛntɩ mba 10:17) “Ɛlɛ weyi ɛkʋndʋʋ yɔ, ɛkʋndɩ Yehowa yɔɔ.”
g99 8/7 20-21
Pɩwɛɛkaa se ɛyʋ ɛkʋndɩ?
Krɩstʋ mba Grɛɛkɩ masɩ taa lɛ, pɛɖɛzɩɣ lakaɣ kaukhaʹomai nɛ tɔm pee “tɩ kpazʋʋ, leleŋ nɩʋ, kʋndʋʋ.” Nɛ kapɩzɩɣ kawɩlɩ mbʋ pɩkɛ kɩdɛkɛdɩm yaa mbʋ pɩkɛ kɩbam yɔ. Kɩɖaʋ nakʋyʋ yɔ: Pɔɔlɩ yɔɔdaa se: “Iyele nɛ ɖa-taa la leleŋ lidaʋ ŋgʋ ɖɩwɛnɩ Ɛsɔ samtʋ yɔɔ yɔ kɩ-yɔɔ.” Ɛtasɩ yɔɔdʋʋ ɖɔɖɔ se: “Weyi ɛkʋndʋʋ yɔ, ɛkʋndɩ Yehowa yɔɔ.” (Roma mba 5:2; 2 Kɔrɛntɩ mba 10:17) Pɩwɩlɩɣ se ɛyʋ taa ɛla leleŋ yaa ɛkpazɩ ɛ-tɩ se Yehowa kɛnɩ ɛ-Ɛsɔ, nɛ ɛ-taa la leleŋ nɛ hɩɖɛ kɩbanɖɛ nɖɩ Yehowa wɛna yɔ.
Bibl kalʋʋ
(2 Kɔrɛntɩ mba 7:1-12) Ye mbʋ, ɛzɩma ɖɩwɛnɩ lidaʋ tɔm tʋnɛ yɔ pʋyɔɔ lɛ, koobiya kʋsɔɔlaa, ɖɩñalɩ ɖo-tomnaɣ yɔɔ nɛ ɖa-maɣzɩm taa azuluma tɩŋa, nɛ ɖɛ-wɛtʋ kiɖeɖetu wɛɛ pilim Ɛsɔ sɔɔndʋ seu taa. 2 Ɩha-ɖʋ ɖɩjaɣyɛ mɩ-laŋa taa. Ðɩtɩla nɔɔyʋ kɩdɛkɛdɩm nabʋyʋ, ɖɩtɩɖʋzɩ nɔɔyʋ, ɖitimuli nɔɔyʋ se ɖihiɣ kɛzɛɣa. 3 Maayɔɔdʋʋ mbʋ se mankʋ mɩ-tɔm. Mbʋ pʋyɔɔ yɔ maatɛm yɔɔdʋʋ se ɩwɛ ɖa-laŋa taa se ɖa nɛ mɩ ɖɩsɩ nɛ ɖa nɛ mɩ ɖɩwɛɛ wezuu. 4 Mɔyɔɔdʋʋnɩ-mɩ kaalɛyɩtʋ siŋŋ. Mankʋndʋʋ mɩ-yɔɔ siŋŋ. Laŋɩyɛ hɛzʋʋ su man-taa ɖo; man-taa lakɩ leleŋ nɛ pɩɖɛlɛsɩɣ ɖa-kʋñɔmɩŋ tɩŋa taa. 5 Toovenim taa lɛ, alɩwaatʋ ndʋ ɖɩtalɩ Masedonii yɔ, ɖo-tomnasɩ tɩhɛzɩ, ɛlɛ ɖɩwɛ kʋñɔŋ tɔɔʋ yɔɔ hɔɔlɩŋ tɩŋa taa—yoŋ kaawɛ awayɩ, nɛ sɔɔndʋ ñɛwɛɛ pɩ-taa. 6 Ɛlɛ Ɛsɔ weyi ɛhɛzɩɣ mba pitibi-wɛ yɔɔɔ yɔ pa-laŋa yɔ, ɛtɩŋnɩ ɛzɩma Tiiti kaawɛ ɖɔ-cɔlɔ yɔ pɩ-yɔɔ nɛ ɛhɛzɩ ɖa-laŋa; 7 nɛ pɩtɩsɩɩnɩ ɛzɩma ɛɛwɛ ɖɔ-cɔlɔ yɔ pi-ɖeke, ɛlɛ pɩtɩŋnɩ ɖɔɖɔ laŋɩyɛ hɛzʋʋ mbʋ iyeba nɛ ehiɣ yɔ pɩ-yɔɔ, mbʋ pʋyɔɔ yɔ, ɛkɛdɩ-ɖʋ ɛzɩma mi-liu kaawɛɛ kpem se ɩna-m yɔ, ɛzɩma ɩcaɣ kʋñɔwiye yɔ, nɛ ɛzɩma ɩmaɣzɩɣ mɔ-yɔɔ siŋŋ yɔ; pʋyɔɔ lɛ, man-taa labɩ leleŋ kpem nɛ pɩkɩlɩ. 8 Mbʋ pʋyɔɔ yɔ, paa man-takayaɣ ɛkɔnɩ-mɩ laŋwɛɛkɩyɛ yɔ, maakpiɖiɣ pɩ-yɔɔ. Paa maakpiɖi pɩ-yɔɔ kajalaɣ taa kɔyɔ (manawa se takayaɣ ŋga kɔkɔnɩ-mɩ laŋwɛɛkɩyɛ, ɛlɛ alɩwaatʋ pazɩ yem na), 9 lɛɛlɛɛyɔ lɛ man-taa lakɩ leleŋ, pɩtɩkɛ ɛzɩma pɩkɔnɩ-mɩ laŋwɛɛkɩyɛ yɔ pʋyɔɔ yem, ɛlɛ ɛzɩma pɩkɔnɩ-mɩ laŋwɛɛkɩyɛ nɛ ikpiɖi mɩ-kɩwɛɛkɩm yɔɔ yɔ pʋyɔɔ. Mbʋ pʋyɔɔ yɔ pɩkɔnɩ-mɩ laŋwɛɛkɩyɛ nɖɩ ɖɩlabɩ nɔɔ kʋɖʋmaɣ nɛ Ɛsɔ sɔɔlɩm yɔ, se pɩtaala nɛ ɖɔ-yɔɔ yɔɔ lɛ, pɩkɔnɩ-mɩ kaɖɛ. 10 Mbʋ pʋyɔɔ yɔ laŋwɛɛkɩyɛ nɖɩ ɖɩlabɩ nɔɔ kʋɖʋmaɣ nɛ Ɛsɔ sɔɔlɩm yɔ, ɖɩkɔŋnɩ kɩwɛɛkɩm yɔɔ kpiɖuu mbʋ piwokini ñʋʋ yabɩtʋ taa yɔ, nɛ pɩɩkɔŋnɩ agbiɖa; ɛlɛ ɛjaɖɛ yɔɔ laŋwɛɛkɩyɛ kɔŋnɩ sɩm. 11 Mbʋ pʋyɔɔ yɔ ɩna pee kɩbana wena mɩ-pana ñaɣʋ lʋlɩ mɩ-taa alɩwaatʋ ndʋ ɩwɛ laŋwɛɛkɩyɛ nɖɩ ɖɩlabɩ nɔɔ kʋɖʋmaɣ nɛ Ɛsɔ sɔɔlɩm yɔ ɖɩ-taa yɔ, ɛɛɛ, piyeba nɛ ɩñalɩ mɩ-tɩ; ɛɛɛ, piyeba nɛ ɩpaɖɩ mbʋ pɩfɛyɩ ɖeu yɔ; ɛɛɛ, piyeba nɛ sɔɔndʋ kpa-mɩ; ɛɛɛ, piyeba nɛ mi-liu wɛɛ siŋŋ se ikpiɖi mɩ-kɩwɛɛkɩm yɔɔ; ɛɛɛ, piyeba nɛ ɩwɛɛ kpekpeka; ɛɛɛ, piyeba nɛ ɩñɔɔzɩ mbʋ pɩwɛɛkaa yɔ! Paa hɔɔlʋʋ ŋgʋ kɩ-taa lɛ, ɩwɩlaa se ɩwɛ kele kele tɔm tʋnɛ tɩ-taa. 12 Paa mama-mɩ takayaɣ yɔ, pɩtɩkɛ weyi ɛlabɩ kɩdɛkɛdɩm, yaa weyi palabɩ-ɩ kɩdɛkɛdɩm yɔ mama-kɛ, ɛlɛ mama-kɛ se pɩsa nɛ pana wena ɩñakɩ ɖɔ-yɔɔ yɔ, pana-yɛ kaɣlaa mɩ-hɛkʋ taa, Ɛsɔ ɛsɩndaa.
20-26 MAI
ÑƖM MBƲ PƖWƐ ƐSƆTƆM TAA YƆ | 2 KƆRƐNTƖ MBA 11-13
“Pɔɔlɩ kaawɛnɩ sɔɔyɛ naɖɩyɛ e-tomnaɣ taa”
(2 Kɔrɛntɩ mba 12:7) cɛɛkɛ maamaaci natʋ ndʋ mamʋwa yɔ tɩ-yɔɔ. Pɩsa nɛ paɖɩɣ-m nʋmɔʋ se mantaakpazɩ man-tɩ kadadayaɣ lɛ, paɖʋ sɔɔyɛ naɖɩyɛ mon-tomnaɣ taa, Sataŋ tiyiyu nɔɔyʋ, se ɖɩwɛɛ nɛ ɖɩcɛkɩ-m kadanzɩ, se pɩsa nɛ mantaakpazɩ man-tɩ kadadayaɣ.
w08 15/6 3-4 § 3
Ðɩkɛ ajamaa, ɛlɛ ɖɩwɛ ɖoŋ
Yehowa sɛyʋ siɣsiɣ tʋ lɛlʋ tendi Yehowa se ɛlɩzɩ “sɔɔyɛ naɖɩyɛ [e]-tomnaɣ taa.” Sɔɔyɛ nɖɩ ɖɩɩsɩŋnɩ kaɖɛ nɖɩ ɛlʋkaɣnɩ tam yɔ. Apostoloo Pɔɔlɩ tendi Yehowa tam nabudozo se ɛlɩzɩ-ɩ kaɖɛ nɖɩ ɖɩ-taa. Paa ɛbɛ kaɖɛ nɖɩ ɖɩtɩɩkɛnaa kɔyɔ, ɛzɩma ɖɩcɛyaɣ apostoloo Pɔɔlɩ ɛzɩ sɔɔyɛ wɛɣʋ ɛyʋ tomnaɣ taa nɛ ɖɩcɛyɩɣ-ɩ yɔ, pɩpɩzaɣ se piyele nɛ elesi taa leleŋ weyi ɛɛwɛnɩ Yehowa sɛtʋ taa yɔ. Pɔɔlɩ kpaɣ sɔɔyɛ nɖɩ nɛ ɛmaɣzɩnɩ kadanzɩ cɛbʋ ɛyʋ. Yehowa cosi Pɔɔlɩ se: “Mo-lootiye ɖɔ-ŋ, mbʋ pʋyɔɔ yɔ mon-ɖoŋ wɛɛ nɛ ɩlakɩ tʋmɩyɛ pilim ɛjandʋ taa.” Yehowa tɩlɩzɩ sɔɔyɛ nɖɩ e-tomnaɣ taa. Pɩɩwɛɛ se Pɔɔlɩ ɛwɛɛ sɔɔyɛ nɖɩ lʋbɩnʋʋ yɔɔ, ɛlɛ ɛyɔɔdaa se: “Alɩwaatʋ ndʋ mɛnkɛ ɛjam yɔ, ɖɩnɛ ɛlɛ mɛwɛ ɖoŋ.” (2 Kɔr. 12:7-10) Suwe ɛñɩnaɣ yɔɔdʋʋ?
(2 Kɔrɛntɩ mba 12:8, 9) Mentendi Kɩbaɣlʋ tam nabudozo pɩ-yɔɔ, se eposini-m ɖɩ. 9 Ɛlɛ eheyi-m se: “Mo-lootiye ɖɔ-ŋ, mbʋ pʋyɔɔ yɔ mon-ɖoŋ wɛɛ nɛ ɩlakɩ tʋmɩyɛ pilim ɛjandʋ taa.” Mbʋ yebina nɛ mankaɣ kʋndʋʋ mɛ-ɛjandʋ yɔɔ nɛ taa leleŋ nɛ pɩkɩlɩ, se pɩsa nɛ Krɩstʋ ɖoŋ wɛɛ mɔ-yɔɔ ɛzɩ kizinziku yɔ.
w06 15/12 24 § 17-18
Yehowa haɣ “fezuu kiɖeɖeu mba pɔpɔzʋʋ-ɩ kʋ yɔ”
17 Ɛsɔ cosi Pɔɔlɩ adɩma yɔɔ nɛ eheyi-i se: “Mo-lootiye ɖɔ-ŋ, mbʋ pʋyɔɔ yɔ mon-ɖoŋ wɛɛ nɛ ɩlakɩ tʋmɩyɛ pilim ɛjandʋ taa.” Pɔɔlɩ yɔɔdaa se: “Mbʋ yebina nɛ mankaɣ kʋndʋʋ mɛ-ɛjandʋ yɔɔ nɛ taa leleŋ nɛ pɩkɩlɩ, se pɩsa nɛ Krɩstʋ ɖoŋ wɛɛ mɔ-yɔɔ ɛzɩ kizinziku yɔ.” (2 Kɔrɛntɩ mba 12:9; Keɣa 146:5) Ye mbʋ, Pɔɔlɩ tɩlaa se pɩtɩŋnɩ Yesu yɔɔ lɛ, Yehowa ɖoŋ kandɩyɩɣ ɛ-yɔɔ ɛzɩ kizinziku yɔ. Mbʋ ɖɔɖɔ Yehowa cosuu ɖa-adɩma yɔɔ sɔnɔ. Ɛsɔ wɛ ɛzɩ ɖɩmɛlɩyɛ yɔ ɛ-sɛyaa nɛ ehuuzuu pɔ-yɔɔ.
18 Pɩkɛ toovenim se kizinziku ɛpɩzɩɣ kɩɖaŋ tɛʋ se kɩtaanɩɩ yaa helim se pɩtaama, ɛlɛ kizinziku kandɩyɩɣ ɛyʋ yɔɔ se tɛʋ yaa helim ɛtaakɔnɩ kaɖɛ naɖɩyɛ ɛ-yɔɔ. Mbʋ keekee ɖɩmɛlɩyɛ nɖɩ ɖɩkɛ “Krɩstʋ ɖoŋ” yɔ, ɖɩɩpɩzɩɣ nɛ ɖɩɖaŋ tɩlasɩ yaa kʋñɔmɩŋ se ɩtaakɔɔ ɖɔ-yɔɔ. Ɛlɛ “Krɩstʋ ɖoŋ” kandɩyɩɣ ɖɔ-yɔɔ fezuu taa se ɛjaɖɛ yɔɔ wɛtʋ kaɖɛ ñɩndʋ nɛ ɖɩ-ñʋʋdʋ Sataŋ pataalabɩ-ɖʋ kɩdɛkɛdɩm nabʋyʋ. (Natʋ 7:9, 15, 16) Pʋyɔɔ lɛ, kʋñɔmɩŋ weyi ŋwɛɛ ŋlʋkɩna yɔ, paa ɩtɩsɩɩ tɩnaɣ yɔ, ña-taa pɩzɩɣ nɛ pɩtɛ se Yehowa wɛɛ nɛ ɛnaɣ pana wena ŋwɛɛ nɛ ŋñakɩ yɔ nɛ ecosi “kubuka” ŋga ŋwɛɛ nɛ ŋmakɩ yɔ kɔ-yɔɔ. (Izaayii 30:19; 2 Kɔrɛntɩ mba 1:3, 4) Pɔɔlɩ mawa se: “Takɩm nabʋyʋ tɩkɔɔ mɩ-yɔɔ nɛ pɩtɩkɛ mbʋ pɩtalɩɣ ɛyaa yɔ. Ɛlɛ Ɛsɔ wɛ siɣsiɣ, nɛ ɛɛkaɣ yebu se pɩtakɩ-mɩ nɛ pɩcɛzɩ mbʋ ɩpɩzɩɣ nɛ ɩkaɖɩna yɔ, ɛlɛ alɩwaatʋ ndʋ takɩm kɔŋ yɔ, ɛkaɣ-mɩ wɩlʋʋ nʋmɔʋ ŋgʋ kɩ-yɔɔ pɩwɛɛ se ɩtɩŋna yɔ nɛ ɩpɩzɩ ɩɖɔkɩ mɩ-laŋɩyɛ pɩ-taa.”—1 Kɔrɛntɩ mba 10:13; Filiipi mba 4:6, 7.
(2 Kɔrɛntɩ mba 12:10) Pʋyɔɔ lɛ, man-taa lakɩ leleŋ ɛjandʋ taa, tʋtʋ taa, kɛdɛɖaɣ alɩwaatʋ taa, nazɩm nɛ kala taa Krɩstʋ yɔɔ. Mbʋ pʋyɔɔ yɔ alɩwaatʋ ndʋ mɛnkɛ ɛjam yɔ, ɖɩnɛ ɛlɛ mɛwɛ ɖoŋ.
‘Ɛkpazɩɣ weyi ehowa yɔ ɖoŋ’
8 Kalɩ Izaayii 40:30. Paa ɖɩwɛ niye ɛzɩma yɔ, ɖɩɩpɩzɩɣ nɛ ɖɩla pɩtɩŋa mbʋ pʋyɔɔ yɔ ɖo-ɖoŋ wɛnɩ kamaɣ. Pɩwɛɛ se ɖa-taa paa anɩ ɛkpɛlɩkɩ lɔŋ tɔm tʋnɛ tɩ-taa. Apostoloo Pɔɔlɩ kaakɛ ɛyʋ weyi ɛwɛ niye yɔ, ɛlɛ e-ɖoŋ kaawɛnɩ kamaɣ nɛ ɛtaapɩzɩɣ se ɛla mbʋ payɩ ɛɛsɔɔlaa se ɛla yɔ. Eheyi mbʋ pɩcɛyaɣ-ɩ yɔ Ɛsɔ alɩwaatʋ natʋyʋ lɛ, Ɛsɔ cosi-i se: “Mon-ɖoŋ lakɩ tʋmɩyɛ ɛjandʋ taa na.” Pɔɔlɩ nɩ pɩ-taa, pʋyɔɔ ɛkɔ tɔm ñʋʋ se: “Mɛnkɛ ɛjam lɛ, mɛwɛ ɖoŋ.” (2 Kɔr. 12:7-10) Ɛbɛ tɔm Pɔɔlɩ ñɩnaɣ yɔɔdʋʋ?
9 Pɔɔlɩ ɖiɣzinaa se Ðoŋ Tɩŋa Tʋ pɩzaɣna se ɛsɩnɩ-ɩ nɛ ɛla tʋma sɔsɔna. Ɛsɔ fezuu kiɖeɖeu pɩzaɣ se kɩsɩnɩ Pɔɔlɩ nɛ ɛwɛɛnɩ ɖoŋ weyi ɛfɛyɩna yɔ. Pɩtasɩ lɛ, Ɛsɔ fezuu kiɖeɖeu pɩzaɣ ɖɔɖɔ se kɩkpazɩ Pɔɔlɩ ɖoŋ nɛ ɛla tʋma wena ɛtaapɩzɩɣ kaaʋ se ɛlabɩ-yɛ nɛ ɛ-maɣmaɣ e-ɖoŋ yɔ. Mbʋ ɖɔɖɔ pɩwɛ ɖɔ-hɔɔlʋʋ taa. Pɩtʋʋ fɛyɩ se ye Yehowa ɛhanɩ-ɖʋ ɖoŋ yɔ, piyeki nɛ ɖɩwɛɛ ɖoŋ siŋŋ!
Ðɩñɩnɩ fezuu taa ñɩm
(2 Kɔrɛntɩ mba 12:2-4) Mansɩm ɛyʋ nɔɔyʋ weyi ɛ nɛ Krɩstʋ pɛwɛ nɔɔ kʋɖʋmaɣ yɔ, pɩlakɩ pɩnzɩ 14 yɔ—ye ɛɛwɛ tomnaɣ taa yaa ɛtaawɛɛ tomnaɣ taa yɔ, maasɩŋ; Ɛsɔ sɩmna—pɩkpaɣ-ɩ nɛ pɩkpazɩ-ɩ ɛsɔdaa naadozo ñɩŋgʋ taa. 3 Ɛɛɛ, mansɩm ɛyʋ ɛnʋ—ye ɛɛwɛ tomnaɣ taa yaa ɛtaawɛɛ tomnaɣ taa yɔ, maasɩŋ; Ɛsɔ sɩmna— 4 weyi pɩkpaɣ-ɩ nɛ piwoni-i paradisuu taa nɛ ɛnɩɩ tɔm ndʋ paapɩzɩɣ pɔyɔɔdɩ yɔ nɛ ndʋ pɩtɩha ɛyʋ nʋmɔʋ se ɛyɔɔdɩ yɔ.
Tɔm ndʋ ɖa-takayɩsɩ kalɩyaa pɔzʋʋ yɔ
“Ɛsɔdaa tozo ŋgʋ” ŋgʋ kɩ-tɔm pɔyɔɔdɩ 2 Kɔrɛntɩ 12:2 taa yɔ, kɩsɩŋnɩ Mesiya Kewiyaɣ ŋga pɛcɛlɩ Krɩstʋ nɛ ɛyaa 144000 yɔ, pʋ-tɔbʋʋ se “ɛsɔdaa kɩfalʋʋ.”—2 Pɩy. 3:13.
Kɛkɛnɩ “Ɛsɔdaa tozo ŋgʋ” mbʋ pʋyɔɔ yɔ, Kewiyaɣ ŋga kakpaɖɩ kewiyisi lɛɛsɩ.
“Paradisuu” ŋgʋ kɩ-taa “pɩkpazɩ” Pɔɔlɩ yɔ, kɩsɩŋnɩ (1) paradisuu ŋgʋ kɩkaɣ wɛʋ tɛtʋ yɔɔ yɔ, (2) fezuu taa paradisuu ŋgʋ kɩwɛnɩ ɛsɩndaa nɛ kɩkaɣ wɛʋ ɖeu nɛ pɩkpaɖɩ ŋgʋ kɩwɛ sɔnɔ yɔ nɛ (3) “Ɛsɔ kajaɣ” yaa paradisuu ŋgʋ kɩwɛ ɛsɔdaa nɛ kɩ nɛ ɛjaɖɛ kɩfaɖɛ pakaɣ wɛʋ alɩwaatʋ kʋɖʋmtʋ taa yɔ.
(2 Kɔrɛntɩ mba 13:12) Ɩsɛɛ ɖama nɛ lɩkpaɣzaɣ yɔɔ mʋzʋʋ mbʋ pɩwɛ kele kele yɔ.
it-1 753
Lɩkpaɣzaɣ yɔɔ mʋzʋʋ
“Lɩkpaɣzaɣ yɔɔ mʋzʋʋ mbʋ pɩwɛ kele kele yɔ.” Kajalaɣ Krɩstʋ mba mʋzaɣ ɖama lɩkpaɣzɩsɩ yɔɔ, pɩpɩzaɣ se pɩkɛ “lɩkpaɣzaɣ yɔɔ mʋzʋʋ mbʋ pɩwɛ kele kele yɔ,” (Rom 16:16; 1Kɔ 16:20; 2Kɔ 13:12; 1Te 5:26) yaa “lɩkpaɣzaɣ yɔɔ mʋzʋʋ mbʋ pɩ-taa sɔɔlɩm wɛɛ yɔ” (1Pɩ 5:14), nɛ pɩtʋʋ fɛyɩ se ɛyaa mba paka kʋzʋʋ piliŋa yɔ, mba pɩzaɣna se pala mbʋ. Ɛzɩma kajalaɣ Krɩstʋ ñɩma panɛ pɛsɛɣaɣ ɖama nɛ lɩkpaɣzaɣ yɔɔ mʋzʋʋ yɔ, pɩnɩɣzɩnɩ ɛzɩma caanaʋ taa Ebree mba ɖɔɖɔ sɛɣaɣ ɖama yɔ. Paa Masɩ ɩtɩtazɩ “lɩkpaɣzaɣ yɔɔ mʋzʋʋ mbʋ pɩwɛ kele kele yɔ” yaa “lɩkpaɣzaɣ yɔɔ mʋzʋʋ mbʋ pɩ-taa sɔɔlɩm wɛɛ yɔ” pɩ-taa kpayɩ kpayɩ yɔ, ɖɩɩpɩtɩɣ se lakasɩ nzɩ sɩwɩlɩɣ se sɔɔlɩm siŋŋ nɛ nɔɔ kʋɖʋmaɣ kaawɛ Krɩstʋ ɛgbɛyɛ taa.—Yoh 13:34, 35.
Bibl kalʋʋ
(2 Kɔrɛntɩ mba 11:1-15) Mantaɣ liu se ɩkaɣ mɩ-tɩ ɖɔkʋʋ man-kɩmɛlɛndʋ lakasɩ cikpesi yɔɔ. Nɛ toovenim taa lɛ, iɖiɣni mɩ-tɩ ɖɔkʋʋ ma-lakasɩ yɔɔ! 2 Mbʋ pʋyɔɔ yɔ mɛwɛnɩ mɩ-yɔɔ Ɛsɔ sʋsɩ, mbʋ pʋyɔɔ yɔ ma-maɣmaɣ manɖanɩ-mɩ walʋ kʋɖʋm se mɩ nɛ ɩ ɩɖɔkɩ nesi, se mɛncɛlɩ-mɩ Krɩstʋ, ɛzɩ pɛlɛ weyi ɛtɩtɩlɩ abalʋ nɛ ɛwɛɛ kele kele yɔ. 3 Ɛlɛ sɔɔndʋ kpaɣ-m se ɛzɩ ɖʋm tɩŋnʋʋ ɛ-ajitu yɔɔ nɛ epeɣzi Ɛva yɔ, pɩtaakɛdɩ nɛ mɩ-maɣzɩm wɛɛkɩ nɛ piposini toovenim nɛ kele kele wɛtʋ ndʋ pɩpɔzʋʋ se pɛcɛlɩ Krɩstʋ yɔ. 4 Mbʋ pʋyɔɔ yɔ ɛzɩ pɩwɛʋ yɔ, ye nɔɔyʋ ɛkɔm nɛ esusuu Yesu nɔɔyʋ tɔm nɛ pɩtɩkɛ weyi ɖisusi-mɩ ɛ-tɔm yɔ, yaa ye ɩmʋ fezuu nakʋyʋ nɛ pɩtɩkɛ ŋgʋ ɩɩmʋwa yɔ, yaa tɔm kɩbandʋ natʋyʋ nɛ pɩtɩkɛ ndʋ tɩ-yɔɔ iitisaa yɔ, ɩɖɔkʋʋ mɩ-tɩ kɛlɛʋ ɛyʋ ɛnʋ ɛ-lakasɩ yɔɔ. 5 Mbʋ pʋyɔɔ yɔ maamaɣzɩɣ se mɩ-tɛ apostoloowaa kɩkɩlaa kɩlɩ-m paa pʋyʋ kʋɖʋm taa. 6 Ɛlɛ paa mɛnfɛyɩ niye tɔm yɔɔdʋʋ taa yɔ, pɩtʋʋ fɛyɩ se mɛwɛ niye sɩmtʋ taa; toovenim taa lɛ, ɖiyeba nɛ ɩtɩlɩ-tʋ kpayɩ kpayɩ hɔɔlɩŋ tɩŋa taa nɛ pɩtɩŋa pɩ-taa. 7 Alɩwaatʋ ndʋ monsusi-mɩ nɛ taa leleŋ Ɛsɔ tɔm kɩbandʋ falaa yɔ, moluzi man-tɩ se pɩkpazɩ-mɩ. Malabʋ mbʋ yɔ, kɩwɛɛkɩm malaba yaa we? 8 Menkpizi agbaa lɛɛna nesi tɛɛ nɛ mamʋ a-haɖɛ se pɩsa nɛ manɖʋ-mɩ lɩm. 9 Paa mbʋ yɔ, alɩwaatʋ ndʋ maawɛ mɩ-cɔlɔ nɛ mɛwɛɛ kɩcɛyɩm taa yɔ, mantɩpɩsɩ nɔɔyʋ sʋʋtʋ, mbʋ pʋyɔɔ yɔ koobiya mba palɩnɩ Masedonii nɛ pɔkɔɔ yɔ, pɔcɔnɩ man-kɩcɛyɩm ɖeɖe siŋŋ. Ɛɛɛ, paa hɔɔlʋʋ ŋgʋ kɩ-taa lɛ, mankpa man-tɩ se mantaapɩsɩ-mɩ sʋʋtʋ nɛ mbʋ mankaɣ wobu pɩ-yɔɔ nɛ mala. 10 Ɛzɩma maapɩtɩɣ se Krɩstʋ toovenim wɛ man-taa yɔ pʋyɔɔ lɛ, maakaɣ yebu agʋnda ana Akayii ageeta taa. 11 Ɛbɛ yɔɔ? Se mantɩsɔɔlɩ-mɩ yaa we? Ɛsɔ nawa se mɔnsɔɔlɩ-mɩ. 12 Ɛlɛ mbʋ menɖiɣni labʋ yɔ, mankaɣ wobu pɩ-yɔɔ nɛ malabɩ-pʋ, se pɩsa nɛ mba pañɩnɩɣ kawanaɣ se ɖa nɛ wɛ ɖɩwɛɛ kɩmaŋ mbʋ pɩ-yɔɔ pakʋndʋʋ yɔ pɩ-taa yɔ, mala nɛ pataahiɣ nakɛyɛ. 13 Mbʋ pʋyɔɔ yɔ, ɛyaa mba pɛkɛ cɛtɩm apostoloowaa, tʋmlaɖaa mba pepeɣziɣ ɛyaa yɔ, palakɩ ɛzɩ pɛkɛ Krɩstʋ apostoloowaa yɔ. 14 Nɛ pɩɩlakɩ-ɖʋ piti, mbʋ pʋyɔɔ yɔ Sataŋ maɣmaɣ lakɩ ɛzɩ ɛkɛ ñalɩmɩyɛ tɛ tiyiyu yɔ. 15 Pʋyɔɔ pɩɩɖɩɣzɩɣ-ɖʋ ye ɛ-lɩmɖʋyaa ɖɔɖɔ ɩwɛɛ nɛ palakɩ ɛzɩ pɛkɛ siɣsiɣ wɛtʋ lɩmɖʋyaa yɔ. Ɛlɛ mbʋ pɩtɛŋnɩ-wɛ yɔ, pɩkaɣ labʋ nɔɔ kʋɖʋmaɣ nɛ pa-lakasɩ.
27 MAI–2 JUIN
ÑƖM MBƲ PƖWƐ ƐSƆTƆM TAA YƆ | GALAATII MBA 1-3
“Mankaɖɩnɩ-ɩ ɛ-ɛsɩndaa”
(Galaatii mba 2:11-13) Ɛlɛ Sefaasɩ kɔm Antɩyɔɔsɩ lɛ, mankaɖɩnɩ-ɩ ɛ-ɛsɩndaa, mbʋ pʋyɔɔ yɔ pɩnaɣaɣ se ɛ-tɔm sɩba. 12 Mbʋ pʋyɔɔ yɔ pʋcɔ nɛ abalaa nabɛyɛ lɩɩnɩ Yakubu cɔlɔ nɛ patalɩ lɛ, ɛ nɛ ajɛɛ taa mba pɔtɔkaɣ; ɛlɛ paba talaa lɛ, eyele labʋ mbʋ nɛ ɛkɛzɩ ɛ-tɩ hɔɔlʋʋ, mbʋ pʋyɔɔ yɔ eseɣaɣ mba pɛpɛlɩ-wɛ yɔ sɔɔndʋ. 13 Yuuda ñɩma mba pakazaa yɔ, paba ɖɔɖɔ pɛkpɛndɩ ɛ-yɔɔ nɛ palakɩ pɩ-tɛɛ nɛ pɩ-yɔɔ lakasɩ nzɩ, piyeba nɛ pɔhɔ Barnaabaasɩ maɣmaɣ nɛ ɛla pɩ-tɛɛ nɛ pɩ-yɔɔ lakasɩ nzɩ ɖɔɖɔ.
Siɣsiɣ wɛtʋ nʋmɔʋ taa lɛ, ŋwɛnɩ Yehowa lɩmaɣza na?
16 Kalɩ Galaatɩ 2:11-14. Pɩyɛɛrɩ tɔlɩ ɛyʋ sɔɔndʋ seu kpaca taa. (Adu. 29:25) Paa Pɩyɛɛrɩ kaasɩm Yehowa lɩmaɣza kpayɩ kpayɩ tɔm ndʋ tɩ-yɔɔ yɔ, alɩwaatʋ ndʋ ɛna Yeruzalɛm tɛtʋ taa Yuuda ñɩma mba pɛpɛlɩ-wɛ yɔ lɛ, sɔɔndʋ kpa-ɩ nɛ ndʋ paba kaamaɣzɩ yɔ. Peeɖe apostoloo Pɔɔlɩ weyi eewobi kediɣzaɣ ŋga palabɩ Yeruzalɛm pɩnaɣ 49 taa yɔ, ɛkʋyaa nɛ eheyi Pɩyɛɛrɩ kpayɩ se ɛwɛɛ nɛ ɛlakɩ pɩ-tɛɛ nɛ pɩ-yɔɔ lakasɩ. (Tʋma 15:12; Gal. 2:13) Ðoŋ weyi Pɩyɛɛrɩ lakasɩ nzɩ sɩɩwɛnɩ sɩɩnaa layaa mba papɩsɩ Krɩstʋ ñɩma yɔ pɔ-yɔɔ? Pakaɣ yebu nɛ ɛ-lakasɩ nzɩ situuli-wɛ? Ɛzɩ Pɩyɛɛrɩ lakasɩ nzɩ sɩ-yɔɔ lɛ, ɛɛkaɣ tasʋʋ wɛnʋʋ waɖɛ naɖɩyɛ?
(Galaatii mba 2:14) Ɛlɛ alɩwaatʋ ndʋ manawa se pataaɖɔŋ tɔm kɩbandʋ tɛ toovenim taa lɛ, meheyi Sefaasɩ pa-tɩŋa pɛ-ɛsɩndaa se: “Ye ña weyi ŋkɛ Yuuda tʋ yɔ, ŋcakɩ wezuu ɛzɩ ajɛɛ taa mba nɛ ŋŋcakɩ wezuu ɛzɩ Yuuda mba yɔ, ɛzɩma ŋpɩzɩɣ nɛ ŋñɩɣ ajɛɛ taa ɛyaa yɔɔ se pacaɣ wezuu ɛzɩ Yuuda mba sɔnzɩ pɔzʋʋ yɔ?”
w13 15/3 5 § 12
Weyi ɛsɔɔlɩ Yehowa yɔ, “eeseɣ se pɩɩpadɩ-ɩ nɛ ɛtɔlɩ”
12 Pɩyɛɛrɩ tɔlɩ ɛyʋ sɔɔndʋ seu kpata taa, pʋyɔɔ pɩpadɩ-ɩ nɛ ɛla mbʋ pɩfɛyɩ ɖeu yɔ tam sakɩyɛ; paa mbʋ yɔ, ɛɖɔkɩ ɛ-siɣsiɣ wɛtʋ kpam Yesu nɛ Yehowa pɛ-ɛsɩndaa. Kɩɖaʋ yɔ: Ɛkpɛzɩ tam nabudozo samaɣ ɛsɩndaa kaɣlaa se ɛɛsɩŋ ɛ-Kɩbaɣlʋ. (Luka 22:54-62) Pʋwayɩ lɛ, Pɩyɛɛrɩ tɩɖɔ camɩyɛ ɛzɩ pɩpɔzʋʋ Krɩstʋ tʋ yɔ. Pɩyɛɛrɩ kaawɛnɩ lɩmaɣza kɩbana Yuuda ñɩma mba papɩsɩ Krɩstʋ mba yɔ pɔ-yɔɔ, ɛlɛ ɛtaawɛɛnɩ lɩmaɣza kɩbana ajɛɛ taa ñɩma mba paapɩsɩ Krɩstʋ mba yɔ pɔ-yɔɔ. Apostoloo Pɔɔlɩ kaasɩm Pɩyɛɛrɩ lɩmaɣza ana kpayɩ kpayɩ. Ŋgʋ pɩfɛyɩ se paɖʋ tʋkaɣ ɛyaa taa ɛgbɛyɛ taa. Pɩyɛɛrɩ lakasɩ taatʋʋzɩ. Pɩsa nɛ Pɩyɛɛrɩ lakasɩ sɩnɛ sɩtaawɛɛkɩ taabalɩyɛ nɖɩ ɖɩwɛ koobiya hɛkʋ taa yɔ lɛ, Pɔɔlɩ ‘kaɖɩnɩ-ɩ ɛ-ɛsɩndaa.’ (Gal. 2:11-14) Pɩɩcɛyɩ Pɩyɛɛrɩ nɛ ɛtɔ se pʋyɔɔ lɛ, ekiziɣ wezuu seya na? Aayɩ. Ɛmʋ Pɔɔlɩ lɔŋ tasʋʋ, ɛlabɩnɩ-pʋ tʋmɩyɛ, nɛ ewolo wezuu seya yɔɔ.
Ðɩñɩnɩ fezuu taa ñɩm
(Galaatii mba 2:20) Pakam ma nɛ Krɩstʋ sizika yɔɔ. Pɩtɩtasɩ kɛʋ ma mɛwɛnɩ wezuu, ɛlɛ Krɩstʋ weyi ɛwɛ wezuu ma nɛ ɩ ɖɔ-nɔɔ kʋɖʋmaɣ labʋ taa yɔ. Toovenim taa lɛ, wezuu ŋgʋ mancakɩ lɛɛlɛɛyɔ tomnaɣ taa yɔ, mancakɩ-kʋ tisuu mbʋ mɛwɛnɩ Ɛsɔ Pɩyalʋ yɔɔ yɔ pɩ-yɔɔ na, ɛnʋ weyi ɛsɔɔlɩ-m nɛ ɛkpaɣ ɛ-tɩ nɛ ɛcɛlɩ mɔ-yɔɔ yɔ.
w14 1/9 16 § 20-21
Paa ɖɩkatɩɣ “kʋñɔmɩŋ” sakɩyɛ Ɛsɔ sɛtʋ taa yɔ, ɖɩɖɔkɩ kpam
20 Ɛzɩma ɖɩpɩzɩɣ nɛ ɖɩlʋbɩnɩ kʋñɔmɩŋ weyi ɩlɩɣ ɖɔ-yɔɔ mɛsaɣ tɛɛ yɔ? Ðɩkpaɣ se pitibi-ɖʋ yɔɔɔ, ɛzɩma ɖɩpɩzɩɣ nɛ ɖɩɖɔkɩ ɖa-tɩ? Ye ɖɩkpaɣ alɩwaatʋ nɛ ɖɩmaɣzɩ kɩhɛyʋʋ pʋ-ñʋʋ taa kɩlaʋ yɔɔ kɔyɔ, pɩsɩɣnɩ-ɖʋ pɩdɩɩfɛyɩ. Mbʋ ɖeyi ɖeyi apostoloo Pɔɔlɩ kaalaba. Nabʋyʋ taa lɛ, pɩlakaɣ-ɩ ɛzɩ ɛkɛ “pɩlabɩm” nɔɔyʋ yɔ. Paa mbʋ yɔ, ɛɛnawa ɖɔɖɔ se pɩtɩkɛ ɛyaa mba patalɩ pilim yɔ pɔ-yɔɔ Krɩstʋ sɩba, ɛlɛ kɩwɛɛkɩm laɖaa yɔɔ. Nɛ ɛɛsɩma se ɛkɛ kɩwɛɛkɩm laɖaa mba, pa-taa nɔɔyʋ. Pʋyɔɔ ɛmawa se: “Me-wezuu kʋnɛ yɔ . . . mɛwɛnɩ-kʋ Ɛsɔ Pɩyalʋ yɔɔ tisuu yɔɔ, weyi ɛsɔɔlɩ-m nɛ ɛcɛlɩ ɛ-tɩ mɔ-yɔɔ yɔ.” (Gal. 2:20) Toovenim taa lɛ, Pɔɔlɩ kaawɛnɩ tisuu kɩhɛyʋʋ pʋ-ñʋʋ taa kɩlaʋ yɔɔ. Ɛɛnɩ pɩ-taa se kɩhɛyʋʋ ŋgʋ, kɩwazɩɣ ɛ-maɣmaɣ.
21 Ye ɖa ɖɔɖɔ ɖɩkpakɩɣ kɩhɛyʋʋ pʋ-ñʋʋ taa ɛzɩ kʋjɔʋ ŋgʋ Yehowa labɩ ɖa-maɣmaɣ kɔyɔ, pɩsɩɣnɩ-ɖʋ pɩdɩɩfɛyɩ. Pɩɩwɩlɩɣ se ɛzɩma pitibi-ɖʋ yɔɔɔ yɔ, pɩtɛŋ kpaagbaa. Pɩtɩla yɔ, ɖa-taa nabɛyɛ kaɣ lʋbɩnʋʋ laŋwɛɛkɩyɛ wiɖii wiɖii nɛ pɩkɔɔ pɩsɩɩnɩ alɩwaatʋ ndʋ ɛjaɖɛ kɩfaɖɛ paɣzaa yɔ. Ɛlɛ, ɖɩtɔzɩ se mba pɔɖɔkʋʋ kpam yɔ, mba kaɣnɩ hiɣu kɩhɛyʋʋ. Ðɩwɛɛ nɛ ɖɩñɔtʋʋnɩ kɩyakʋ ŋgʋ Ɛsɔ Kewiyaɣ kaɣ kɔm yɔ. Nɛ alɩwaatʋ ndʋ tɩ-taa lɛ, laŋhɛzɩyɛ kaɣ wɛʋ tɛtʋ yɔɔ nɛ ɛyaa kpeekpe kaɣ talʋʋ pilim. Ye mbʋ, paa pɩwɛɛ se ɖɩtɔɔ kʋñɔmɩŋ pɩŋŋ kɔyɔ, ɖɩñaɣ pana nɛ ɖɩsʋʋ Ɛsɔ Kewiyaɣ ŋga ka-taa.
(Galaatii mba 3:1) Hayɩ, Galaatii mba kɩmɛlɛmɩŋ mɩ! Awɛnɩ ɖoŋ kɩdɛkɛdɩŋ ɛnɩ mɩ-yɔɔ, mɩ mba pawɩlɩ-mɩ kaɣlaa se pakam Yesu Krɩstʋ sizika yɔɔ yɔ?
it-1 940
Takayaɣ ŋga pama Galaatii mba yɔ
Pɔɔlɩ yɔɔdʋʋ se, “Hayɩ, Galaatii mba kɩmɛlɛmɩŋ mɩ!” yɔ, nabʋyʋ taawɩlɩɣ se ɛyaa mba pa-kʋnʋmɩŋ kaalɩnɩ Gaul kʋnʋŋ taa nɛ pɛwɛɛ Galaatii nɛ hayo kiŋ yɔ pɔ-tɔm Pɔɔlɩ yɔɔdaɣ. (Gal 3:1) Ɛlɛ Pɔɔlɩ kaawɛɛ nɛ ɛkalɩɣ ɛyaa mba paawɛ ɛgbɛyɛ taa, ɛlɛ peyele pa-tɩ nɛ Moyizi Paɣtʋ yɔɔ lʋɖaa wɛɛnɩ ɖoŋ pɔ-yɔɔ yɔ. Ɛgbɛyɛ kɩfaɖɛ taa lɛ, ‘tisuu yɔɔ pɩtɩŋɩɣna nɛ payaa ɛyʋ se siɣsiɣ tʋ,’ ŋgʋ Moyizi Paɣtʋ yɔɔ lʋɖaa panɛ, paakɛ Yuuda ñɩma mba paawɛɛ nɛ pañakɩ pana se ɛyaa ɩmaɣzɩ se Moyizi Paɣtʋ yɔɔ ɖɔm yɔɔ pɩtɩŋɩɣna nɛ payaa ɛyʋ se siɣsiɣ tʋ. (2:15–3:14; 4:9, 10) “Galaatii agbaa” (1:2) taa koobiya mba Pɔɔlɩ ma takayaɣ yɔ, pa-taa nabɛyɛ kaakɛ Yuuda mba nɛ lalaa ñataakɛ Yuuda mba. Nɛ mba pataakɛ Yuuda mba yɔ, pa-taa nabɛyɛ kaakɛ mba pɛpɛlɩ-wɛ nɛ papɩsɩ Yuuda mba yɔ, nɛ lalaa ñaakɛ mba patɩpɛlɩ-wɛ yɔ, nɛ payaɣ-wɛ se ajɛɛ taa mba yɔ, nɛ pɩtʋʋ fɛyɩ se pa-taa nabɛyɛ kaakɛ Sɛlɩtɩ ñɩma (Celtes). (Tʋm 13:14, 43; 16:1; Gal 5:2) Paya Krɩstʋ ñɩma mba pa-tɩŋa se Galaatii mba, mbʋ pʋyɔɔ yɔ payaɣaɣ egeetiye nɖɩ ɖɩ-taa paawɛɛ yɔ se Galaatii. Takayaɣ ŋga, ka-taa tɔm wɩlɩɣ se Pɔɔlɩ ɛyɩsɩmaa mba paawɛnɩ Roma hadɛ kiŋ egeetiye taa yɔ, mba ɛɛma-kɛ, pɩtaakɛ agɔma mba paawɛnɩ hayo kiŋ hɔɔlʋʋ taa yɔ, mbʋ pʋyɔɔ yɔ pɩwɛ ɛzɩ Pɔɔlɩ tɩfɛyɩ nɩŋgbaŋaɣ peeɖe kiŋ nɛ ɛna yɔ.
Bibl kalʋʋ
(Galaatii mba 2:11-21) Ɛlɛ Sefaasɩ kɔm Antɩyɔɔsɩ lɛ, mankaɖɩnɩ-ɩ ɛ-ɛsɩndaa, mbʋ pʋyɔɔ yɔ pɩnaɣaɣ se ɛ-tɔm sɩba. 12 Mbʋ pʋyɔɔ yɔ pʋcɔ nɛ abalaa nabɛyɛ lɩɩnɩ Yakubu cɔlɔ nɛ patalɩ lɛ, ɛ nɛ ajɛɛ taa mba pɔtɔkaɣ; ɛlɛ paba talaa lɛ, eyele labʋ mbʋ nɛ ɛkɛzɩ ɛ-tɩ hɔɔlʋʋ, mbʋ pʋyɔɔ yɔ eseɣaɣ mba pɛpɛlɩ-wɛ yɔ sɔɔndʋ. 13 Yuuda ñɩma mba pakazaa yɔ, paba ɖɔɖɔ pɛkpɛndɩ ɛ-yɔɔ nɛ palakɩ pɩ-tɛɛ nɛ pɩ-yɔɔ lakasɩ nzɩ, piyeba nɛ pɔhɔ Barnaabaasɩ maɣmaɣ nɛ ɛla pɩ-tɛɛ nɛ pɩ-yɔɔ lakasɩ nzɩ ɖɔɖɔ. 14 Ɛlɛ alɩwaatʋ ndʋ manawa se pataaɖɔŋ tɔm kɩbandʋ tɛ toovenim taa lɛ, meheyi Sefaasɩ pa-tɩŋa pɛ-ɛsɩndaa se: “Ye ña weyi ŋkɛ Yuuda tʋ yɔ, ŋcakɩ wezuu ɛzɩ ajɛɛ taa mba nɛ ŋŋcakɩ wezuu ɛzɩ Yuuda mba yɔ, ɛzɩma ŋpɩzɩɣ nɛ ŋñɩɣ ajɛɛ taa ɛyaa yɔɔ se pacaɣ wezuu ɛzɩ Yuuda mba sɔnzɩ pɔzʋʋ yɔ?” 15 Ða mba palʋlɩ-ɖʋ Yuuda mba, nɛ ɖɩtɩkɛ kɩwɛɛkɩm laɖaa mba palɩnɩ ajɛɛ taa yɔ, 16 ɖɩnawa se pɩtɩkɛ paɣtʋ tʋma yɔɔ pɩtɩŋɩɣna nɛ payaa ɛyʋ se siɣsiɣ tʋ, ɛlɛ Yesu Krɩstʋ yɔɔ tisuu ɖeke yɔɔ pɩtɩŋɩɣna. Pʋyɔɔ ɖɩwɛnɩ tisuu Krɩstʋ Yesu yɔɔ, se pɩsa nɛ pɩtɩŋnɩ tisuu mbʋ ɖɩwɛnɩ Krɩstʋ yɔɔ yɔ pɩ-yɔɔ nɛ payaa-ɖʋ se siɣsiɣ tɩnaa, ɛlɛ pɩtaatɩŋnɩ paɣtʋ tʋma yɔɔ; mbʋ pʋyɔɔ yɔ paakaɣ nɔɔyʋ yaʋ se siɣsiɣ tʋ pɩtɩŋnɩ paɣtʋ tʋma yɔɔ. 17 Lɛɛlɛɛyɔ ye pakpaɣ-ɖʋ ɖɔɖɔ ɛzɩ kɩwɛɛkɩm laɖaa alɩwaatʋ ndʋ ɖɩñɩnɩɣ se payaa-ɖʋ se siɣsiɣ tɩnaa pɩtɩŋnɩ Krɩstʋ yɔɔ yɔ, pɩwɩlɩɣ se Krɩstʋ kɛ kɩwɛɛkɩm lɩmɖʋyʋ yaa we? Kpa! 18 Mbʋ ɖeyi ɖeyi maayɔkaa yɔ, ye manɖaɣnɩɣ-pʋ maʋ yɔ, mawɩlɩɣ se mɛnkɛ weyi ɛmaɣnɩ paɣtʋ yɔɔ yɔ. 19 Mbʋ pʋyɔɔ yɔ pɩtɩŋnɩ paɣtʋ yɔɔ lɛ, mansɩbɩ paɣtʋ yɔɔ, se pɩsa nɛ manɖaɣnɩ wɛʋ wezuu Ɛsɔ yɔɔ. 20 Pakam ma nɛ Krɩstʋ sizika yɔɔ. Pɩtɩtasɩ kɛʋ ma mɛwɛnɩ wezuu, ɛlɛ Krɩstʋ weyi ɛwɛ wezuu ma nɛ ɩ ɖɔ-nɔɔ kʋɖʋmaɣ labʋ taa yɔ. Toovenim taa lɛ, wezuu ŋgʋ mancakɩ lɛɛlɛɛyɔ tomnaɣ taa yɔ, mancakɩ-kʋ tisuu mbʋ mɛwɛnɩ Ɛsɔ Pɩyalʋ yɔɔ yɔ pɩ-yɔɔ na, ɛnʋ weyi ɛsɔɔlɩ-m nɛ ɛkpaɣ ɛ-tɩ nɛ ɛcɛlɩ mɔ-yɔɔ yɔ. 21 Maalɔʋ Ɛsɔ lootiye, mbʋ pʋyɔɔ yɔ ye paɣtʋ yɔɔ pɩtɩŋɩɣna nɛ siɣsiɣ wɛtʋ wɛɛ kɔyɔ, ɖɩnɛ ɛlɛ Krɩstʋ sɩbɩ falaa.