MWBR19 07 Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
1er-7 JUILLET
ÑƖM MBƲ PƖWƐ ƐSƆTƆM TAA YƆ | KOLOOSI MBA 1-4
“Ɩhɔzɩ ɛyʋtʋ kɩbɩndʋ nɛ isuu ɛyʋtʋ kɩfatʋ”
(Koloosi mba 3:5-9) Pʋyɔɔ lɛ, ɩkʋ mi-tomnaɣ pilinzi nzɩ sɩwɛ tɛtʋ yɔɔ yɔ hɔɔlɩŋ ɛnɛ ɩ-taa: kʋzʋʋ kɩdɛkɛdʋʋ, azuluma, kʋzʋʋ kɔɖɛyɩ kadadayaɣ, kɔɖɛyɩ ŋgʋ kɩkɔŋnɩ ɛyʋ kaɖɛ yɔ, nɛ ɛsa naɣ naɣ, mbʋ pɩkɛ sɩɩnaa latʋ yɔ. 6 Lakasɩ nzɩ sɩ-yɔɔ Ɛsɔ pana kɔŋ. 7 Ðɔnɛ nɖɩ ɖeyi ɖeyi mɩ ɖɔɖɔ ɩɖɔŋaɣ mi-wezuu caɣʋ kɩbɩnʋʋ taa. 8 Ɛlɛ lɛɛlɛɛyɔ lɛ, pɩwɛɛ se ɩlɔ lakasɩ sɩnɛ sɩ-tɩŋa ɖooo poliŋ: ɖɩwɩzɩyɛ, pana, lakasɩ kɩdɛkɛdɩsɩ, nɛ tɔm ndʋ tɩɖʋʋ ɖɩwɩzɩyɛ yɔ, nɛ ɛzaɣtʋ tɔm yɔɔdʋʋ ɛtaalɩɩnɩ mɩ-nɔɔ taa. 9 Ɩtaacɛtɩ ɖama. Ɩhɔzɩ ɛyʋtʋ kɩbɩndʋ nɛ tɩ-lakasɩ,
w11 15/3 10 § 12-13
Mʋ Ɛsɔ fezuu, taamʋ ɛjaɖɛ yɔɔ ñɩŋgʋ
12 Ma-lakasɩ wɩlɩɣ se fezuu ŋgʋ wɛnɩ ɖoŋ mɔ-yɔɔ? (Kalɩ Koloosi mba 3:8-10, 13.) Ɛjaɖɛ yɔɔ fezuu ɖɛzɩɣ tomnaɣ lakasɩ nɔɔ. (Gal. 5:19-21) Alɩwaatʋ ndʋ tɩ-taa pɩɩɖɔŋnɩ-ɖʋ camɩyɛ yɔ, tɩ-taa ɛjaɖɛ yɔɔ fezuu wɛɣnɩ ɖoŋ ɖɔ-yɔɔ. Pɩpɩzɩɣ pɩkɛ alɩwaatʋ ndʋ koobu Krɩstʋ tʋ nɔɔyʋ eekeŋni-ɖʋ, ɛɖʋʋ-ɖʋ ɖɩwɩzɩyɛ yaa ɛlakɩ-ɖʋ kɩwɛɛkɩm nabʋyʋ yɔ. Pɩtasɩ lɛ, alɩwaatʋ ndʋ ɖɩwɛɣ ɖe-ɖeke ɖɩɣa yɔ, tɩ-taa pɩnaɣ kaɣlaa fezuu ŋgʋ kɩwɛnɩ ɖoŋ ɖɔ-yɔɔ yɔ. Pɩwɛɣ ɖeu se ɖa-taa paa weyi lɛ, ɛtazɩ ɛ-lakasɩ taa nɛ tɔm pɔzʋʋ pʋnɛ: Fenasɩ loɖo nzɩ sɩɖɛwa yɔ sɩ-taa, mɛ-ɛyʋtʋ ɖewa nɛ pɩkɩlɩ nɛ pɩmʋnɩ Krɩstʋ tʋ na? Yaa mantɩŋnɩ mɔ-yɔɔdaɣ nɛ ma-lakasɩ pɔ-yɔɔ nɛ mɔntɔlɩ kɩdɛkɛdɩm mbʋ malakaɣ yɔ pɩ-taa?
13 Ɛsɔ fezuu pɩzɩɣ kɩsɩnɩ-ɖʋ nɛ ‘ɖɩhɔzɩ ɛyʋtʋ kɩbɩndʋ nɛ tɩ-lakasɩ’ nɛ ‘ɖisuu ɛyʋtʋ kɩfatʋ.’ Nɛ ye ɖisu ɛyʋtʋ kɩfatʋ yɔ, pɩsɩɣnɩ-ɖʋ se ɖɩwɩlɩ sɔɔlɩm nɛ camɩyɛ lakasɩ nɛ pɩkɩlɩ. Ðɩsɔɔlʋʋ kpaɣʋ nɛ kpeɣu faaa paa ɖɩwɛnɩ toovenim yɔ. Ðɩɩtɩŋɩɣnɩ ‘ɛyaa caɣnʋʋ, pana, ɖɩwɩzɩyɛ, hola nɛ tɔm ndʋ tɩɖʋʋ ɖɩwɩzɩyɛ yɔ’ pɔ-yɔɔ nɛ ɖɩcɔnɩ mulum lakasɩ nzɩ palabɩ-ɖʋ yɔ si-ɖeɖe, ɛlɛ ɖɩñakɩ pana nɛ ɖɩpɩsɩ “pʋtɔdɩyɛ nayaa siŋŋ”—Efɛz 4:31, 32.
(Koloosi mba 3:10-14) nɛ isuu ɛyʋtʋ kɩfatʋ, ndʋ toovenim sɩmtʋ yeba nɛ tɩpɩsɩɣ kɩfatʋ nɛ tɩlakɩ nɔɔ kʋɖʋmaɣ nɛ Weyi ɛlɩzɩ-tʋ yɔ ɛ-lɛzʋʋ yɔ, 11 ɖenɖe Grɛɛkɩ tʋ yaa Yuuda tʋ fɛyɩ, pɛlɩtʋ yaa kɩdɩbɛlɩtʋ fɛyɩ, ɛgɔm, Siitɩ tʋ, yom, yaa ɛyʋ weyi ɛwɛ ɛ-tɩ yɔɔ yɔ pɛfɛyɩ yɔ; ɛlɛ Krɩstʋ kɛ pɩtɩŋa payɩ nɛ ɛwɛ pɩtɩŋa pɩ-taa. 12 Pʋyɔɔ lɛ, ɛzɩ ɛyaa mba Ɛsɔ lɩzɩ-wɛ nɛ pɛkɛ kiɖeɖema nɛ ɛsɔɔlɩ-wɛ yɔ, isuu pʋtɔdɩyɛ naʋ tɛ sɔɔlɩm sɔsɔm, camɩyɛ lakasɩ, tɩ luzuu, hɛɛɛ wɛtʋ, nɛ suuɖu. 13 Iwolo pɩ-yɔɔ nɛ mɩ-tɔm ɛtaanɩɩ ɖama nɛ ikpeɣ ɖama faaa paa nɔɔyʋ taa ɛwɛnɩ lɛlʋ yɔ. Ɛzɩ Yehowa kpeɣu-mɩ faaa yɔ, pɩwɛɛ se mɩ ɖɔɖɔ ɩla mbʋ. 14 Ɛlɛ pɩtasɩnɩ pɩtɩŋa payɩ mbʋ yɔ lɛ, isuu sɔɔlɩm, mbʋ pʋyɔɔ yɔ pɩkɛ nɔɔ kʋɖʋmaɣ tomiye nɖɩ ɖɩtalɩ pilim yɔ.
w13 15/9 21 § 18-19
Ñe-wezuu caɣʋ lɛɣzaa?
18 Nɩŋgbaŋaɣ kajalaɣ ñɩŋga ŋga ɛyʋ kpɛzɩɣ se pɩsa nɛ Ɛsɔtɔm wɛɛnɩ ɖoŋ ɛ-yɔɔ nɛ ɛla lɛɣzɩtʋ ndʋ pɩpɔzʋʋ yɔ lɛ Bibl kalʋʋ nɛ kɩ-kpɛlɩkʋʋ ɖoŋ ɖoŋ. Ɛyaa sakɩyɛ kalɩɣ Bibl ɖoŋ ɖoŋ nɛ halɩ patɩlɩɣ kɩ-taa tɔm pee pa-ñʋŋ taa. Pɩtɩla, ŋkatɩ ɛyaa mba pa-taa nabɛyɛ ñɔ-tɔm susuu taa. Halɩ pa-taa nabɛyɛ ɖɔkɩ Bibl hɔɔlɩŋ nɩɩyɩ pa-ñʋŋ taa nɛ pɔyɔɔdʋʋ ɩ-taa tɔm kɛlɛʋ yem. Paa mbʋ yɔ, Ɛsɔtɔm fɛyɩnɩ ɖoŋ siŋŋ pa-maɣzɩm nɛ pe-wezuu caɣʋ yɔɔ. Ɛbɛ pɩkazɩ-wɛ? Pɩsa nɛ Ɛsɔtɔm wɛɛnɩ ɖoŋ ɛyʋ nɔɔyʋ yɔɔ lɛ, pɩcɛyaa se ɛyʋ ɛnʋ eyele ɛ-tɩ nɛ Ɛsɔtɔm tii ɖooo ɛ-laŋɩyɛ taa. (Gal. 6:6) Ye mbʋ, pɩcɛyaa se ɖɩkpakɩɣ alɩwaatʋ nɛ ɖɩmaɣzɩɣ tɔm ndʋ ɖɩkpɛlɩkɩɣ Bibl taa yɔ tɩ-yɔɔ. Pɩwɛɣ ɖeu se ɖɩpɔzɩ ɖa-tɩ tɔm tʋnɛ: ‘Man-taa tɛma se tɔm ndʋ mɛnkpɛlɩkɩɣ Bibl taa yɔ, tɩtɩkɛ Ɛsɔ sɛtʋ ɛgbɛyɛ naɖɩyɛ wɩlɩtʋ yem? Man-taa tɛma se toovenim tɔm tɩkɛnaa? Pɩtasɩ lɛ, mamaɣzɩɣ se ye mawɩlɩɣ-tʋ ɛyaa lalaa yɔ pɩmaɣ, yaa mañɩnɩɣ nʋmɔŋ weyi ɩ-yɔɔ mantɩŋna nɛ malabɩnɩ-tʋ tʋmɩyɛ ma-maɣmaɣ me-wezuu caɣʋ taa yɔ? Alɩwaatʋ ndʋ mankalɩɣ Bibl lɛ, manɩɣ pɩ-taa se ma Yehowa ɖiɣni yɔɔdɩnʋʋ na?’ Ye ɖɩmaɣzɩɣ tɔm pɔzʋʋ pʋnɛ pɩ-yɔɔ yɔ, pɩsɩɣnɩ-ɖʋ nɛ sɔɔlɩm mbʋ ɖɩwɛnɩ Yehowa yɔɔ ɖooo ɖa-laŋa taa yɔ, pilimi. Ðɩnɛ lɛ, ɖɩtasɩɣ-ɩ sɔɔlʋʋ nɛ pɩkɩlɩ. Nɛ ye Ɛsɔtɔm etukuni ɖa-laŋɩyɛ yɔ, ɖɩlakɩ lɛɣzɩtʋ kɩbandʋ.—Adu. 4:23; Luka 6:45.
19 Ɛzɩ ɖɩɩtɛm paɣzʋʋ yɔ, ye ɖɩkalɩɣ Ɛsɔtɔm nɛ ɖɩmaɣzɩɣ tɩ-yɔɔ ɖoŋ ɖoŋ yɔ, pɩkaɣ-ɖʋ seɣtuu nɛ ɖiwolo pɩ-yɔɔ nɛ ɖɩɖɛɛnɩ ɛsɩndaa nɛ pɩkɩlɩ nɛ ‘ɖɩhɔzɩ ɛyʋtʋ kɩbɩndʋ nɛ tɩ-lakasɩ, nɛ ɖisuu ɛyʋtʋ kɩfatʋ, ndʋ toovenim sɩmtʋ yeba nɛ tɩpɩsɩɣ kɩfatʋ yɔ.’ (Kol. 3:9, 10) Toovenim, ye ɖɩnɩɣ Ɛsɔtɔm taa camɩyɛ nɛ tɩwɛɛnɩ ɖoŋ kɩbaŋ ɖɔ-yɔɔ yɔ, pɩsɩɣnɩ-ɖʋ nɛ ɖɩwɛɛ ɖɛ-ɛyʋtʋ ñɔɔzʋʋ yɔɔ. Ɛyʋtʋ kɩfatʋ wɛnaʋ kandɩyɩɣ ɖɔ-yɔɔ se ɖɩtaatɔlɩ Sataŋ mɛsaɣ tɛɛ kpacanaa taa.
Ðɩñɩnɩ fezuu taa ñɩm
(Koloosi mba 1:13, 14) Eholi-ɖʋ cɩkpɛndʋʋ ɖoŋ nesi tɛɛ nɛ ewoni-ɖʋ ɛ-Pɩyalʋ kʋsɔɔlʋ kewiyaɣ taa, weyi ɛ-yɔɔ pɩtɩŋnaa nɛ poholi-ɖʋ pɩtɩŋnɩ kɩhɛyʋʋ pʋ-ñʋʋ taa yɔɔ yɔ, pʋ-tɔbʋʋ se pekpeɣ-ɖʋ ɖa-kɩwɛɛkɩm.
it-2 833 § 4-6
Ɛsɔ Kewiyaɣ
“Ɛ-Pɩyalʋ kʋsɔɔlʋ kewiyaɣ.” Yesu kpa ɛsɔdaa nɛ pɩla kɩyakɩŋ 10 lɛ, eyele nɛ fezuu kiɖeɖeu tii ɛ-wayɩ tɩŋɩyaa yɔɔ pɩnaɣ 33 Pantekooti wiye, nɛ peɖiɣzini kaɣlaa se “pakpazɩ-ɩ nɛ ɛwɛɛ Ɛsɔ nɩwaŋ yɔɔ.” (Tʋm 1:8, 9; 2:1-4, 29-33) Peeɖe pasʋ “ɛgbɛyɛ kɩfaɖɛ” taa nɛ papɩsɩ “ɛjaɖɛ kiɖeɖee,” pɩ-tɔbʋʋ se fezuu taa Izrayɛɛlɩ tigiɖe.—Ebr 12:22-24; 1Pɩ 2:9, 10; Gal 6:16.
Lɛɛlɛɛyɔ Krɩstʋ wɛ ɛ-Caa nɩwaŋ yɔɔ nɛ ɛnʋ kɛnɩnɩ ɛgbɛyɛ Ñʋʋdʋ. (Efɛ 5:23; Ebr 1:3; Fil 2:9-11) Masɩ wɩlɩɣ se kpaɣnɩ pɩnaɣ 33 Pantekooti wiye ɛ-tɔmkpɛlɩkɩyaa wɛ fezuu taa kewiyaɣ ŋga eɖiyiɣ yɔ ka-taa. Pʋyɔɔ apostoloo Pɔɔlɩ maɣaɣ takayaɣ kajalaɣ pɩnzɩ mɩnʋʋ taa Krɩstʋ ñɩma mba paawɛ Koloosi yɔ lɛ, ɛyɔɔdaa se Krɩstʋ tɛm mʋʋ Kewiyaɣ nɛ ɛtɔ se: Ɛsɔ holi-ɖʋ “cɩkpɛndʋʋ ɖoŋ nesi tɛɛ nɛ ewoni-ɖʋ ɛ-Pɩyalʋ kʋsɔɔlʋ kewiyaɣ taa.”—Kol 1:13; kpaɣ-tʋ nɛ ŋmaɣzɩnɩ Tʋm 17:6, 7.
Kpaɣnɩ pɩnaɣ 33 tɛ Pantekooti wiye Krɩstʋ Kewiyaɣ wɛɛ nɛ keɖiyiɣ fezuu taa Izrayɛɛlɩ, pɩ-tɔbʋʋ se Krɩstʋ ñɩma mba Ɛsɔ kpaɣ e-fezuu nɛ ɛtaa-wɛ num nɛ papɩsɩ e-fezuu taa piya yɔ. (Yoh 3:3, 5, 6) Alɩwaatʋ ndʋ Krɩstʋ ñɩma patam numwaa mba pamʋʋ pa-kɩhɛyʋʋ ɛsɔdaa yɔ, paatasɩɣ kɛʋ Krɩstʋ fezuu taa kewiyaɣ tɛɛ ñɩma mba pɛwɛ tataa yɔ, ɛlɛ papɩsɩɣ awiya nɛ pa nɛ Krɩstʋ pɔtɔɔ kewiyitu ɛsɔdaa.—Nat 5:9, 10.
(Koloosi mba 2:8) Ɩkpa mɩ-tɩ nɛ nɔɔyʋ ɛtaasʋzɩ-mɩ yomiye taa pɩtɩŋnɩ ɛjaɖɛ yɔɔ lɔŋsɩnɖɛ nɛ pɔbɔtʋ tɔm ndʋ tɩɩwazɩɣ pʋyʋ yɔ tɩ-yɔɔ, ɛzɩ ɛyaa sɔnzɩ pɔzʋʋ yɔ, ɛzɩ ɛjaɖɛ yɔɔ kajalaɣ wondu pɔzʋʋ yɔ nɛ pɩtɩkɛ ɛzɩ mbʋ pɩlabɩ nɔɔ kʋɖʋmaɣ nɛ Krɩstʋ yɔ;
w08 15/8 28 § 8
Galaatii mba, Efɛɛzɩ mba, Filiipi mba nɛ Koloosi mba takayɩsɩ taa lɩmaɣza sɔsɔna
2:8—Ɛbɛ kɛnɩ “ɛjaɖɛ yɔɔ kajalaɣ wondu” ndʋ Pɔɔlɩ paɣ-ɖʋ se ɖɩkpa ɖa-tɩ nɛ tʋ yɔ? Pɩkɛ Sataŋ ɛjaɖɛ yɔɔ wondu, kɔzɩ kɔzɩ wondu yaa mbʋ payɩ pɩwɛnɩ ɖoŋ ɛyaa yɔɔ nɛ piɖiyiɣ-wɛ yɔ. (1 Yohanɛɛsɩ 2:16) Pɩ-taa nabʋyʋ lɛ, ɛjaɖɛ yɔɔ lɔŋsɩnɖɛ, tomnaɣ yɔɔ ñɩm laɣzaɣ nɛ cɛtɩm Ɛsɔ sɛtʋ wɩlɩtʋ.
Bibl kalʋʋ
(Koloosi mba 1:1-20) Ma Pɔɔlɩ, Krɩstʋ Yesu tɛ apostoloo pɩtɩŋnɩ Ɛsɔ sɔɔlɩm yɔɔ, nɛ ɖo-koobu Timootee, 2 ɖetiyiɣni takayaɣ kanɛ ɛyaa kiɖeɖema nɛ koobiya siɣsiɣ tɩnaa mba pa nɛ Krɩstʋ pɛwɛ nɔɔ kʋɖʋmaɣ Koloosi yɔ: Tɛtɛ nɛ ɩwɛɛnɩ lootiye nɛ laŋhɛzɩyɛ nɖɩ ɖɩlɩnɩ ɖa-Caa Ɛsɔ cɔlɔ yɔ. 3 Ðɩsɛɣ Ɛsɔ, ɖa-Kɩbaɣlʋ Yesu Krɩstʋ Caa paa ɛzɩmtaa se ɛlabaɣ lɛ, alɩwaatʋ ndʋ ɖɩtɩmɩɣ mɩ-yɔɔ yɔ, 4 mbʋ pʋyɔɔ yɔ, ɖɩnɩ tisuu mbʋ ɩwɛnɩ Krɩstʋ Yesu yɔɔ nɛ sɔɔlɩm mbʋ ɩwɛnɩ ɛyaa kiɖeɖema tɩŋa yɔɔ yɔ pɩ-tɔm, 5 lidaʋ ŋgʋ peɖiɣni-mɩ ñɔɔzʋʋ ɛsɔdaa yɔ kɩ-yɔɔ. Ɩɩnɩ lidaʋ ŋgʋ kɩ-tɔm nɛ pɩɖɛɛ pɩtɩŋnɩ tɔm kɩbandʋ tɛ toovenim tɔm, 6 ndʋ tɩtalɩ mɩ-cɔlɔ yɔ tɩ-yɔɔ. Ɛzɩ tɔm kɩbandʋ wɛʋ nɛ tɩlʋlʋʋ pee nɛ tihukuu ɛjaɖɛ kpeekpe yɔɔ yɔ, mbʋ ɖɔɖɔ tiɖiɣni labʋ mɩ-hɛkʋ taa kpaɣnɩ kɩyakʋ ŋgʋ ɩnɩ Ɛsɔ lootiye tɔm nɛ ɩtɩlɩ-ɖɩ camɩyɛ toovenim taa yɔ. 7 Mbʋ ɩkpɛlɩkɩ ɖa-kʋsɔɔlʋ Epafraasɩ, weyi ɛkɛ yom ɛzɩ ɖa ɖɔɖɔ yɔ ɛ-cɔlɔ, ɛnʋ weyi ɛkɛ Krɩstʋ lɩmɖʋyʋ siɣsiɣ tʋ ɖo-lone taa yɔ. 8 Eyeba ɖɔɖɔ nɛ ɖɩtɩlɩ sɔɔlɩm mbʋ ɩwɛnɩ fezuu taa yɔ. 9 Mbʋ yebina ɖɔɖɔ nɛ kpaɣnɩ kɩyakʋ ŋgʋ ɖɩnɩ pɩ-tɔm yɔ, ɖitiyele mɩ-yɔɔ tɩmʋʋ kpa nɛ ɖɩpɔzʋʋ se Ɛsɔ sɔɔlɩm tɛ toovenim sɩmtʋ esu mɩ-taa, lɔŋsɩnɖɛ tɩŋa taa nɛ fezuu taa tɔm taa nɩʋ tɩŋa taa, 10 se ɩpɩzɩ nɛ ɩɖɔ ɖɔnɛ nɖɩ ɖɩmʋnɩ Yehowa yɔ, se pɩsa nɛ mɩ-tɔm kɛdɩnɩ-ɩ pɩtɩŋa pɩ-taa alɩwaatʋ ndʋ ɩwɛɣ nɛ ɩlʋlʋʋ pee paa tʋmɩyɛ kɩbanɖɛ nɖɩ lɛ ɖɩ-labʋ taa yɔ nɛ alɩwaatʋ ndʋ ɩwɛɣnɩ Ɛsɔ yɔɔ toovenim sɩmtʋ nɛ pɩkɩlɩ yɔ; 11 nɛ ɩkpa ɖoŋ pɩtɩŋnɩ ɖoŋ kpeekpe yɔɔ ɛzɩ e-ɖoŋ sɔsɔŋ pɔzʋʋ yɔ, se pɩsa nɛ ɩɖɔkɩ mɩ-laŋa nɛ suuɖu nɛ taa leleŋ pɩtɩŋa pɩ-taa, 12 alɩwaatʋ ndʋ ɩsɛɣ Caa se ɛlabaɣ lɛ yɔ, ɛnʋ weyi eyeba nɛ ɩmʋna se mɩ nɛ ɛyaa kiɖeɖema ɩkaa ñɩm ñalɩmɩyɛ taa yɔ. 13 Eholi-ɖʋ cɩkpɛndʋʋ ɖoŋ nesi tɛɛ nɛ ewoni-ɖʋ ɛ-Pɩyalʋ kʋsɔɔlʋ kewiyaɣ taa, 14 weyi ɛ-yɔɔ pɩtɩŋnaa nɛ poholi-ɖʋ pɩtɩŋnɩ kɩhɛyʋʋ pʋ-ñʋʋ taa yɔɔ yɔ, pʋ-tɔbʋʋ se pekpeɣ-ɖʋ ɖa-kɩwɛɛkɩm. 15 Ɛkɛ Ɛsɔ weyi paanaɣ-ɩ yɔ ɛ-lɛzʋʋ, wondu kɩlɩzɩtʋ tɩŋa taa kajalaɣ pɩɣa; 16 mbʋ pʋyɔɔ yɔ ɛ-yɔɔ pɩtɩŋnaa nɛ palɩzɩ wondu lɛɛtʋ tɩŋa ɛsɔdaa nɛ tɛtʋ yɔɔ, ndʋ panaɣ nɛ ndʋ paanaɣ yɔ, paa pɩtɩɩkɛ kewiyaɣ kpelisi yaa kɩbaɣlaa yaa kominawaa yaa ñʋndɩnaa yɔ. Ɛ-yɔɔ pɩtɩŋnaa nɛ palɩzɩ wondu lɛɛtʋ tɩŋa payɩ nɛ ɛnʋ palɩzɩ-tʋ. 17 Pɩtasɩ lɛ, ɛlɛyɩ wondu lɛɛtʋ tɩŋa wɛʋ, nɛ ɛ-yɔɔ pɩtɩŋnaa nɛ wondu lɛɛtʋ tɩŋa wɛɛ, 18 nɛ ɛnʋ kɛnɩ tomnaɣ ñʋʋ, pʋ-tɔbʋʋ se ɛgbɛyɛ ñʋʋ. Ɛkɛ ɖɩbazɩyɛ, sɩɖaa taa kajalaɣ pɩɣa, se pɩsa nɛ ɛpɩsɩ weyi ɛkɛ kajalaɣ tʋ wondu tɩŋa taa yɔ; 19 mbʋ pʋyɔɔ yɔ, pɩɩkɛdɩnɩ Ɛsɔ se eyele nɛ pilim wɛtʋ tɩŋa wɛɛ ɛ-taa, 20 nɛ ɛtɩŋnɩ ɛ-yɔɔ se ɛ nɛ wondu lɛɛtʋ tɩŋa peceɣ, paa pɩtɩɩkɛ wondu ndʋ tɩwɛ tɛtʋ yɔɔ yaa wondu ndʋ tɩwɛ ɛsɔdaa yɔ. Calɩm mbʋ ɛ-Pɩyalʋ kpɛdɩ nazɩm sizika yɔɔ yɔ, pɩ-yɔɔ ɛtɩŋnaa nɛ ɛla laŋhɛzɩyɛ nɖɩ.
8-14 JUILLET
ÑƖM MBƲ PƖWƐ ƐSƆTƆM TAA YƆ | 1 TESALOONIIKI MBA 1-5
“Iwolo pɩ-yɔɔ nɛ iseɣti ɖama nɛ ɩkpazɩ ɖama ɖoŋ”
(1 Tesalooniiki mba 5:11-13) Pʋyɔɔ lɛ, iwolo pɩ-yɔɔ nɛ iseɣti ɖama nɛ ɩkpazɩ ɖama ɖoŋ, ɛzɩ toovenim taa ɩwɛʋ nɛ ɩlakɩ yɔ. 12 Lɛɛlɛɛyɔ lɛ, koobiya, ɖɩpɔzʋʋ-mɩ se ɩña mba palakɩ tʋmɩyɛ nɛ kpekpeka mɩ-hɛkʋ taa nɛ peɖiyiɣ-mɩ Kɩbaɣlʋ taa nɛ papakɩ-mɩ yɔ; 13 nɛ pa-tʋmɩyɛ yɔɔ lɛ, ɩɖʋ-wɛ hɩɖɛ siŋŋ sɔɔlɩm taa. Iyele nɛ laŋhɛzɩyɛ wɛɛ mɩ-hɛkʋ taa.
w11 15/6 26 § 12
“Ɩña mba palakɩ tʋmɩyɛ nɛ kpekpeka mɩ-hɛkʋ taa” yɔ
12 Ɛgbɛyɛ ‘ɖiyuu’ tɩkɛ tɔm wɩlʋʋ ɖeke. Pɔɔlɩ labɩnɩ tʋmɩyɛ tɔm piye nɖɩ ɖɔɖɔ 1 Timootee 3:4 taa. Pɔɔlɩ yɔɔdɩ peeɖe se pɩpɔzʋʋ se ɛgbɛyɛ yɔɔ cɔnɩyʋ “ɛkɛ ɛyʋ weyi eɖiyiɣ ɛ-maɣmaɣ ɛ-ɖɩɣa taa mba camɩyɛ yɔ, nɛ e-piya iluzuu sɩ-tɩ ɛzɩ pɩmʋnaʋ yɔ.” Mayaɣ kanɛ ka-taa lɛ, tɔm piye ‘ɖiyuu’ wɩlɩɣ se pɩtasɩnɩ tɔm wɩlʋʋ piya lɛ, pɩpɔzʋʋ se hɔʋ caja ɛɖɛɛ nɔɔ ɛ-hɔʋ taa ñɩma nɛ eyele nɛ ‘e-piya luzuu sɩ-tɩ ɛzɩ pɩmʋnaʋ yɔ.’ Ye mbʋ, pɩwɛɛ se ɛzʋtʋyaa ɩɖɛɛ nɔɔ ɛgbɛyɛ taa ñɩma nɛ pasɩnɩ-wɛ nɛ poluzuu pa-tɩ Yehowa tɛɛ.—1 Tim. 3:5.
w11 15/6 28 § 19
“Ɩña mba palakɩ tʋmɩyɛ nɛ kpekpeka mɩ-hɛkʋ taa” yɔ
19 Ɛzɩma pɩlakɩ-ŋ ye nɔɔyʋ ɛñɔɔzɩ kʋjɔʋ nakʋyʋ camɩyɛ nɛ ɛha-ŋ? Ŋŋlakɩnɩ-kʋ tʋmɩyɛ nɛ pɩwɩlɩ se kɩkɛdɩnɩ-ŋ? Yehowa tɩŋnɩ Yesu yɔɔ nɛ ɛha-ɖʋ “ɛyaa se pɛkɛ kʋjɔŋ.” Nʋmɔŋ weyi ɩ-yɔɔ ŋpɩzɩɣ nɛ ŋtɩŋna nɛ ŋwɩlɩ ñɛ-ɛsɩmɩyɛ kʋjɔŋ ɛnɩ ɩ-yɔɔ yɔ, ɩ-taa lɛɛkʋ lɛ se ŋwelisiɣ ɛzʋtʋyaa tɔm yɔɔdʋʋ camɩyɛ nɛ ŋlakɩnɩ tʋmɩyɛ lɔŋ weyi patasɩɣ-ŋ pɔ-tɔm yɔɔdʋʋ taa yɔ. Ŋpɩzɩɣ ɖɔɖɔ nɛ ŋwɩlɩ ñɛ-ɛsɩmɩyɛ pɩtɩŋnɩ ɛzɩma ŋcosuu tɔm yɔɔ camɩyɛ kediɣzisi taa yɔ, pɩ-yɔɔ. Ðʋ nesi tʋma wena a-taa ɛzʋtʋyaa ɖɛɣ nɔɔ yɔ, ɛzɩ tɔm susuu tʋmɩyɛ mbʋ yɔ. Ye ɛzʋtʋyʋ nɔɔyʋ ɛtasɩ-ŋ lɔŋ nɩɩyɩ nɛ ɩwazɩ-ŋ yɔ, pɩɩwɛɣ ɖeu se ŋheyi-i? Pɩtasɩ lɛ, pɩɩwɛɣ ɖeu se ŋwɩlɩ ñɛ-ɛsɩmɩyɛ ɛzʋtʋyaa hɔŋ taa ñɩma na? Taasɔɔ se alɩwaatʋ ndʋ pɩpɔzʋʋ se ɛzʋtʋyʋ ɛkpaɣ nɛ ɛcaɣ ɛ-hɔʋ taa ñɩma cɔlɔ yɔ, tɩ-taa natʋyʋ ɛkpakɩɣ nɛ ɛlakɩnɩ ɛgbɛyɛ taa tʋma.
(1 Tesalooniiki mba 5:14) Hɔɔlʋʋ lɛɛkʋ taa lɛ, koobiya, ɖiseɣtiɣ-mɩ se ɩpaɣ mba pesidiɣ pɩtɩŋa yem yɔ, ɩyɔɔdɩnɩ nɔɔ kɩbaŋa mba pa-laŋa wɛɛkaa yɔ, ɩsɩnɩ ajamaa, ɩwɛɛ suuɖu nɛ ɛyaa tɩŋa.
“Ðɩtaasɔɔlɩnɩ nɔɔ yem, ɖɩsɔɔlɩ nɛ pɩlɩɩ ɖa-lakasɩ taa”
13 Sɩnɩ ajamaa. Nabʋyʋ taa pɩpɩzɩɣ nɛ pɩwɛɛ-ɖʋ kaɖɛ se ɖɩɖɔ Bibl lɔŋ tasʋʋ mbʋ pɩtɔŋ se ‘ɖɩɖɔkɩ ajamaa nɛ ɖɩɖɔkɩ ɖa-laŋa nɛ ɛyaa kpeekpe’ yɔ pɩ-yɔɔ. (1 Tes. 5:14) Mba pɛkɛ ajamaa yɔ, paa pʋwayɩ pa-taa sakɩyɛ ɩpɩsɩɣ mba pɛcɛyɩ camɩyɛ fezuu taa yɔ, pa-taa lalaa lɛ pɩpɔzʋʋ se ɖɩwɛɛnɩ suuɖu nɛ ɖɩsɩɣnɩ-wɛ tam. Pɩsa nɛ ɖɩsɩnɩ-wɛ lɛ, ɖɩpɩzɩɣ nɛ ɖɩkalɩ-wɛ Bibl hɔɔlɩŋ nɩɩyɩ yaa ɖɩla ɖʋtʋ nɛ ɖa nɛ wɛ ɖisusi tɔm yaa ɖɩkpaɣ alɩwaatʋ nɛ ɖiwelisini-wɛ. Pɩtasɩ lɛ, paa ɖo-koobu nɔɔyʋ ɛkɛ ɛjam yaa ɛwɛ ɖoŋ fezuu taa yɔ, ɖɩtaasɔɔ se paa weyi lɛ, ɛwɛ “ɖoŋ” hɔɔlɩŋ nɩɩyɩ taa nɛ ɛwɛɛnɩ ɖɔɖɔ “ɛjandʋ” hɔɔlɩŋ lɛɛŋ taa. Halɩ apostoloo Pɔɔlɩ kasɩm ɖɔɖɔ ɛ-maɣmaɣ ɛ-ɛjandʋ. (2 Kɔr. 12:9, 10) Ye mbʋ ɖa-tɩŋa payɩ pɩpɔzʋʋ se ɖo-koobiya Krɩstʋ mba lalaa ɩkpazɩɣ-ɖʋ ɖoŋ.
w15 15/2 9 § 16
Maɣzɩnɩ Yesu tɩ luzuu nɛ ɛ-pʋtɔdɩyɛ naʋ
16 Ðɩwɛɛnɩ pʋtɔdɩyɛ naʋ yɔɔdaɣ. Ye ɖɩnaɣ lalaa pʋtɔdɩyɛ yɔ, pɩkaɣ-ɖʋ seɣtuu se “ɖɩtasɩ tɔm mba pitibi po-toma taa yɔ.” (1 Tes. 5:14, ABT) Tɔm ndʋ ɖɩpɩzɩɣ ɖiheyi-wɛ nɛ pɩkpazɩ-wɛ ɖoŋ? Ðɩpɩzɩɣ nɛ ɖiheyi-wɛ se ɖɩwɛɛ nɛ ɖɩmaɣzɩɣ pɔ-yɔɔ siŋŋ. Ðɩpɩzɩɣ ɖɩsam-wɛ nɛ ɖɩsɩnɩ-wɛ nɛ pana se pɛwɛnɩ wɛtʋ kɩbandʋ nɛ pɛwɛɛ wazaɣ. Ðɩpɩzɩɣ nɛ ɖɩtɔzɩ-wɛ se ye Yehowa ɛsɩnɩ-wɛ nɛ patɩlɩ toovenim kɔyɔ, pɩwɩlɩɣ se pɛwɛ ñɩm siŋŋ ɛ-ɛzɩdaa. (Yoh. 6:44) Ðɩpɩzɩɣ nɛ ɖɩhɛzɩ pa-laŋɩyɛ se Yehowa cɔŋnɩ ɛ-sɛyaa mba ‘pa-laŋa pɛlaa’ yaa mba pɩɖɛ-wɛ yɔ, pɔ-yɔɔ. (Keɣa 33:19) Ye ɖɩwɛnɩ pʋtɔdɩyɛ naʋ yɔɔdaɣ kɔyɔ, pɩpɩzɩɣ nɛ pɩhɛzɩ mba pɛwɛ kɩcɛyɩm taa yɔ pa-laŋa siŋŋ.—Ad. 16:24.
Ðɩñɩnɩ fezuu taa ñɩm
(1 Tesalooniiki mba 4:3-6) Mbʋ pʋyɔɔ yɔ, Ɛsɔ sɔɔlɩm kɔyɔ se ɩkɛ kiɖeɖema nɛ ikizi kʋzʋʋ kɩdɛkɛdʋʋ. 4 Pɩwɛɛ se mɩ-taa paa weyi lɛ, ɛtɩlɩ ɛzɩma ɛɖɔkɩ ɛ-maɣmaɣ e-tomnaɣ kele kele wɛtʋ nɛ hɩɖɛ ɖʋʋ pa-taa yɔ, 5 pɩtaakɛnɩ kʋzʋʋ kɔɖɛyɩ ŋgʋ kɩ-taa ɛyaa ɩɩpɩzɩɣ pa-tɩ ɖɔkʋʋ, ŋgʋ paañɩɣzɩɣ yɔ kɩ-taa ɛzɩ ajɛɛ wena aasɩŋ Ɛsɔ yɔ alakʋʋ yɔ. 6 Pɩtɩpɔzɩ se nɔɔyʋ ɛmaa kamasɩ nzɩ paɖʋwa yɔ nɛ emuli e-koobu tɔm tʋnɛ tɩ-taa, mbʋ pʋyɔɔ yɔ, Yehowa kɔŋnɩ lakasɩ nzɩ sɩ-tɩŋa sɩ-yɔɔ nɩŋgbaŋʋʋ hɔm, ɛzɩ ɖɩɩtɛm-mɩ heyuu nɛ ɖɩpaɣ-mɩ siŋŋ ɖɔɖɔ yɔ.
it-1 921
Kʋzʋʋ kɩdɛkɛdʋʋ
Papɩzɩɣ palɩzɩ nɔɔyʋ Krɩstʋ ɛgbɛyɛ taa ye ɛlakɩ kʋzʋʋ kɩdɛkɛdʋʋ yɔ. (1Kɔ 5:9-13; Ebr 12:15, 16) Apostoloo Pɔɔlɩ lɩzɩ pɩ-taa se Krɩstʋ tʋ weyi ɛlakɩ kʋzʋʋ kɩdɛkɛdʋʋ yɔ, ɛlakɩ ɛ-maɣmaɣ e-tomnaɣ kɩwɛɛkɩm, ɛkpakɩɣ lʋlʋʋ pilinzi nɛ ɛlakɩnɩ mbʋ pɩwɛ kʋzɔɔtʋ yɔ. Pɩcamɩɣ-ɩ fezuu taa siŋŋ, episiɣ Ɛsɔ ɛgbɛyɛ hɩɖɛ, nɛ kʋdɔmɩŋ weyi ɩlɩɣnɩ kʋzʋʋ kɩdɛkɛdʋʋ labʋ taa yɔ, ɩpɩzɩɣ nɛ ɩkpa-ɩ. (1Kɔ 6:18, 19) Ɛkɔŋnɩ ɖɔɖɔ kaɖɛ e-koobiya Krɩstʋ ñɩma yɔɔ (1Te 4:3-7) mbʋ pʋyɔɔ yɔ (1) ɛsʋzʋʋ kʋzɔɔtʋ lakasɩ ɛgbɛyɛ taa nɛ episiɣ-ɖɩ (Ebr 12:15, 16), (2) episiɣ weyi ɛ nɛ ɩ palabɩ kʋzʋʋ kɩdɛkɛdʋʋ yɔ, nɛ ye ɛlɛ ɛkɛ ɛɖanɛ yɔ, ɛɛkaɣ wɛnʋʋ waɖɛ se ɛwɛɛ kele kele alɩwaatʋ ndʋ ɛɖɔkʋʋ nesi yɔ, (3) episiɣ ɛ-maɣmaɣ ɛ-hɔʋ hɩɖɛ nɛ (4) ɛ-kɩwɛɛkɩm tukuuni ɖɔɖɔ weyi ɛ nɛ ɩ palabɩ kʋzʋʋ kɩdɛkɛdʋʋ yɔ ɛ-lʋlɩyaa, ɛ-walʋ yaa ɛ-ɖaŋ. Pɩtasɩ lɛ, pɩtɩkɛ ɛyaa mba papɩzɩɣ nɛ pamaɣzɩ se kʋzʋʋ kɩdɛkɛdʋʋ wɛ ɖeu yaa pɩfɛyɩ ɖeu yɔ, pɔ-yɔɔ ɛlabɩ kɩwɛɛkɩm, ɛlɛ Ɛsɔ maɣmaɣ, weyi ɛkaɣ-ɩ tɔm hʋnʋʋ yɔ, ɛ-yɔɔ ɛlabɩ kɩwɛɛkɩm.—1Te 4:8.
(1 Tesalooniiki mba 4:15-17) Mbʋ pʋyɔɔ yɔ, tɔm ndʋ ɖɩtɩŋɩɣnɩ Yehowa tɔm yɔɔ nɛ ɖiheyiɣ-mɩ yɔ, ndʋ yɔ: ɖa ɛsadɩnaa mba ɖɩwɛɣnɩ ɖɛ-ɛsa nɛ pɩtalɩ Kɩbaɣlʋ wɛʋ alɩwaatʋ taa yɔ, ɖɩɩkaɣ ɖɛʋ mba poɖo sɩm taa yɔ pɔ-nɔɔ kaaʋ; 16 mbʋ pʋyɔɔ yɔ, Kɩbaɣlʋ maɣmaɣ kaɣ lɩnʋʋ ɛsɔdaa nɛ kubuka sɔsɔɔ nɛ Ɛsɔ tiyiyu sɔsɔ nɔɔ nɛ Ɛsɔ ɛgandɩyɛ nɛ etii, nɛ mba pasɩbɩ pa nɛ Krɩstʋ pɔ-nɔɔ kʋɖʋmaɣ labʋ taa yɔ, mba calɩɣnɩ fem. 17 Pʋwayɩ lɛ, ɖa ɛsadɩnaa mba ɖɩwɛɣnɩ ɖɛ-ɛsa yɔ, pɩkaɣ ɖa nɛ wɛ kpazʋʋ ɛsɔmɩndʋ taa se ɖɩkatɩ Kɩbaɣlʋ helim taa; nɛ ɖɩnɛ ɛlɛ, ɖɩkaɣ wɛʋ Kɩbaɣlʋ cɔlɔ paa ɛzɩmtaa.
w15 15/7 18-19 § 14-15
Ða-ñʋʋ yabɩtʋ ñɔtɩ kpam
14 Gɔɔgɩ weyi ɛlɩnɩ Maagɔɔgɩ yɔ ɛpaɣzɩɣ labʋ you nɛ Ɛsɔ samaɣ lɛ, ɛbɛ kaɣ labʋ? Bibl tɔŋ se ɛyʋ Pɩyalʋ kaɣ “tiyuu e-tiyiyaa nɛ peketi ɛ-ɛyaa kiɖeɖema ɛjaɖɛ hɔɔlɩŋ naanza taa, ɖooo tɛtʋ kamaɣ yɔɔ nɛ ɛsɔdaa kamaɣ yɔɔ.” (Maarkɩ 13:27; Maatiyee 24:31) Pɔyɔɔdʋʋ cɩnɛ se pakaɣ kpeɣluu ɛyaa kiɖeɖema yɔ, pɩtɩkɛ alɩwaatʋ ndʋ papaɣzɩ kpeɣluu patam numwaa yɔ, pɩ-tɔm pɔyɔɔdʋʋ. Nɛ pɩtɩkɛ ɖɔɖɔ alɩwaatʋ ndʋ patam numwaa mba pakazɩ tɛtʋ yɔɔ yɔ, pakaɣ mʋʋ pɛ-kɛdɛzaɣ mayaɣ yɔ, pɩ-tɔm pɔyɔɔdʋʋ. (Maatiyee 13:37, 38) Pɩkazɩɣ alɩwaatʋ pazɩ se kʋñɔŋ sɔsɔʋ ɛpaɣzɩ lɛ, pakaɣ mʋʋ pɛ-kɛdɛzaɣ mayaɣ ŋga. (Natʋ 7:1-4) Ye mbʋ, ɛyaa kpeɣluu tʋmɩyɛ nɖɩ tɔm Yesu yɔɔdʋʋ? Alɩwaatʋ ndʋ tɩ-taa patam numwaa mba pakazɩ tɛtʋ yɔɔ yɔ, pakaɣ mʋʋ pa-kɩhɛyʋʋ nɛ pakpa ɛsɔdaa yɔ, pɩ-tɔm Yesu yɔɔdaɣ. (1 Tesalooniki 4:15-17; Natʋ 14:1) Gɔɔgɩ weyi ɛlɩnɩ Maagɔɔgɩ yɔ ɛpaɣzɩɣ labʋ you nɛ Ɛsɔ samaɣ nɛ pɩla pazɩ lɛ, pakaɣ-wɛ kpeɣluu nɛ pakpa ɛsɔdaa. (Ezekɩyɛɛlɩ 38:11) Ðɩnɛ ɛlɛ, ɛzɩ Yesu kaayɔɔdʋʋ yɔ, “ɛyaa siɣsiɣ tɩnaa kaɣ ñɩlɩsʋʋ ɛzɩ wɩsɩ yɔ, pa-Caa Kewiyaɣ taa.”—Maatiyee 13:43.
15 Pɩwɩlɩɣ se pakaɣ patam numwaa kpaɣʋ nɛ po-tomnasɩ nɛ pakpanɩ ɛsɔdaa? Cooci woɖaa sakɩyɛ maɣzɩɣ se Krɩstʋ mba kaɣ kpaʋ ɛsɔdaa nɛ po-tomnasɩ. Nɛ pamaɣzɩɣ ɖɔɖɔ se pakaɣ naʋ Yesu nɛ pɛ-ɛza alɩwaatʋ ndʋ ɛpɩsɩɣ ɛkɔɔ se eɖiyi tɛtʋ yɔ. Ɛlɛ Bibl ñawɩlɩɣ kpayɩ kpayɩ se alɩwaatʋ ndʋ Yesu kɔŋ yɔ paapɩzɩɣ nɛ pana-ɩ nɛ ɛza maɣmaɣ. Pʋyɔɔ kɩtɔŋ se pakaɣ naʋ “ɛyʋ Pɩyalʋ kawɩlɩsɩ ɛsɔdaa” nɛ Yesu kaɣ kɔm “ɛsɔmɩndʋ yɔɔ.” (Maatiyee 24:30, ABT) Bibl tɔŋ ɖɔɖɔ se “tomnaɣ nɛ calɩm paakaɣ hiɣu Ɛsɔ tɛ Kewiyaɣ.” Ye mbʋ, pʋcɔ nɛ patam numwaa kpa ɛsɔdaa lɛ, “ɖɛkɛlɛʋ yem, nɔɔ kʋyʋmaɣ kpɛlɩ yem ɛzɩ ɛzɩyɛ piɖuu yɔ lɛ, wayɩ wayɩ ɛgandɩyɛ wiɣ lɛ,” pakaɣ “lɛɣzʋʋ wɛtʋ.” (Kalɩ 1 Kɔrɛntɩ 15:50-53.) Paakaɣ kpaɣʋ patam numwaa nɛ po-tomnasɩ se pakpanɩ ɛsɔdaa ɛzɩ coocinaa wɩlʋʋ yɔ. Ɛlɛ patam numwaa mba pakazɩ tɛtʋ yɔɔ yɔ, pakaɣ lɛɣzʋʋ nɔɔ kʋyʋmaɣ kpɛlɩ yem nɛ pakpa ɛsɔdaa.
Bibl kalʋʋ
(1 Tesalooniiki mba 3:1-13) Pʋyɔɔ alɩwaatʋ ndʋ ɖɩtaatasɩ pɩzʋʋ se ɖɩɖɔkɩ ɖa-tɩ yɔ, ɖɩmaɣzaa se pɩkɩlɩɣ ɖeu se ɖe-ɖeke ɖɩcaɣ Atɛɛnɩ; 2 nɛ ɖitiyi Timootee, ɖo-koobu nɛ Ɛsɔ lɩmɖʋyʋ Krɩstʋ yɔɔ tɔm kɩbandʋ taa, se ɛla nɛ ɩka camɩyɛ nɛ ɛhɛzɩ mɩ-laŋa nɛ pɩwazɩ mi-tisuu, 3 nɛ pɩsa nɛ kʋñɔmɩŋ ɛnɩ ɩtaañamsɩ nɔɔyʋ. Mbʋ pʋyɔɔ yɔ mɩ-maɣmaɣ ɩsɩm mbʋ se ɖɩɩpɩzɩɣ nɛ ɖiyele kʋñɔmɩŋ ɛnɩ tɔɔʋ. 4 Mbʋ pʋyɔɔ yɔ, alɩwaatʋ ndʋ ɖɩɩwɛ mɩ-cɔlɔ yɔ, ɖɩlɛyaɣ-mɩ heyuu se ɖɩkaɣ tɔɔʋ kʋñɔŋ, nɛ mbʋ talɩna, ɛzɩ ɩsɩm yɔ. 5 Pʋyɔɔ alɩwaatʋ ndʋ mantaatasɩ pɩzʋʋ se mɔnɖɔkɩ man-tɩ yɔ, mentiyaa se pɩsa nɛ mantɩlɩ mi-siɣsiɣ wɛtʋ, ye pɩlaba se hɔɔlʋʋ nakʋyʋ taa, Takɩyʋ takɩ-mɩ, nɛ ɖa-tʋmɩyɛ ɖoŋ ñɩnɖɛ pɩsɩ falaa yɔ. 6 Ɛlɛ lɛɛlɛɛyɔ Timootee lɩnɩ mɩ-tɛ nɛ ɛkɔɔ, nɛ ɛkɔnɩ-ɖʋ mi-siɣsiɣ wɛtʋ nɛ mɩ-sɔɔlɩm pɔ-yɔɔ tɔm kɩbandʋ; eheyi-ɖʋ se paa ɛzɩmtaa lɛ, ɩwɛɛ nɛ ɩtɔzʋʋ ɖɔ-yɔɔ nɛ sɔɔlɩm, nɛ mi-liu wɛɛ siŋŋ se ɩna-ɖʋ ɛzɩ ɖa ɖɔɖɔ ɖe-liu wɛʋ siŋŋ se ɖɩna-mɩ yɔ. 7 Pʋyɔɔ lɛ, koobiya, ɖe-siziŋ nɩʋ nɛ ɖa-kʋñɔŋ tɩŋa taa lɛ, ɖihiɣ laŋɩyɛ hɛzʋʋ mɩ-yɔɔ nɛ siɣsiɣ wɛtʋ ndʋ ɩlɩzɩɣ nɛ ɩwɩlɩɣ yɔ tɩ-yɔɔ. 8 Mbʋ pʋyɔɔ yɔ, ɛzɩma ɩɖɔkʋʋ kpam Kɩbaɣlʋ taa yɔ, piyeba nɛ ɖɩɖaɣnɩ wɛʋ wezuu. 9 Mbʋ pʋyɔɔ yɔ, ɛzɩma ɖɩpɩzɩɣ nɛ ɖɩwɩlɩ Ɛsɔ ɖɛ-ɛsɩmɩyɛ mɩ-yɔɔ nɛ pɩtalɩ taa leleŋ sɔsɔŋ weyi iyeba nɛ ɖɩwɛɛnɩ ɖɛ-Ɛsɔ ɛsɩndaa yɔ? 10 Ðoo nɛ wɩsɩ lɛ, ɖitendiɣ Ɛsɔ siŋŋ ɛzɩ ɖɩpɩzʋʋ yɔ, se ɖɩna mɩ-ɛsɩndaa nɛ ɖɩsɔzɩ mi-tisuu yɔɔ mbʋ pɩtɛɖɩɣ yɔ. 11 Lɛɛlɛɛyɔ, tɛtɛ nɛ ɖa-Caa Ɛsɔ maɣmaɣ nɛ ɖa-Kɩbaɣlʋ Yesu, patʋlɩ-ɖʋ nʋmɔʋ nɛ ɖɩkɔɔ mɩ-cɔlɔ. 12 Pɩtasɩ lɛ, Kɩbaɣlʋ eyele nɛ sɔɔlɩm mbʋ ɩwɛnɩ ɖama yɔɔ nɛ ɛyaa tɩŋa yɔɔ yɔ pihuu, ɛɛɛ, pɩwadɩ, ɛzɩ ɖɩsɔɔlʋʋ-mɩ yɔ, 13 se pɩsa nɛ ɛla nɛ mɩ-laŋa ka camɩyɛ, ataawɛɛnɩ kɩwɛɛkɩtʋ natʋyʋ kele kele wɛʋ nʋmɔʋ taa ɖa-Caa Ɛsɔ ɛsɩndaa, nɛ ɖa-Kɩbaɣlʋ Yesu wɛʋ alɩwaatʋ taa, ɛ nɛ ɛ-ɛyaa kiɖeɖema tɩŋa.
15-21 JUILLET
ÑƖM MBƲ PƖWƐ ƐSƆTƆM TAA YƆ | 2 TESALOONIIKI MBA 1-3
“Pokuli paɣtʋ yɔɔ mayʋ yɔɔ”
(2 Tesalooniiki mba 2:6-8) Nɛ lɛɛlɛɛyɔ, ɩsɩm mbʋ pɩɖɩkɩ-ɩ nʋmɔʋ yɔ, se pɩsa nɛ pikuli ɛ-yɔɔ nɛ pɩwɩlɩ, ɛ-maɣmaɣ ɛ-alɩwaatʋ talɩɣ lɛ. 7 Toovenim taa lɛ, paɣtʋ yɔɔ maʋ pʋnɛ, pɩ-mɛsaɣ tɛɛ tɔm tɛm paɣzʋʋ tʋmɩyɛ labʋ, ɛlɛ pɩwɛɣ mbʋ nɛ pɩkɔɔ pɩsɩɩnɩ alɩwaatʋ ndʋ weyi ɛɖɩkɩ nʋmɔʋ lɛɛlɛɛyɔ yɔ ɛɛtasɩɣ wɛʋ yɔ. 8 Ðɩnɛ ɛlɛ, pɩkaɣ paɣtʋ yɔɔ mayʋ yɔɔ kuluu, ɛnʋ weyi Kɩbaɣlʋ Yesu kaɣ tɩŋnʋʋ ɛ-nɔɔ taa fezuu yɔɔ nɛ ɛkʋ-ɩ nɛ ɛtɩŋnɩ ɛ-wɛʋ alɩwaatʋ ndʋ tɩkaɣ naʋ kaɣlaa yɔ tɩ-yɔɔ nɛ ɛɖɩzɩ-ɩ yɔ.
it-1 221
Ɛsɔ ñɔnʋʋ
Mɛsaɣ tɛɛ tɔm lɛɛtʋ wɛɛ, tɩkɛ cɛtɩm tɔm nɛ tɩwɛ ndɩ kpem nɛ Yehowa tɛ “mɛsaɣ tɛɛ tɔm kiɖeɖetu.” Mɛsaɣ tɛɛ tɔm ndʋ lɛ “paɣtʋ yɔɔ maʋ pʋnɛ, pɩ-mɛsaɣ tɛɛ tɔm.” Tɩɩkɛnɩ mɛsaɣ tɛɛ tɔm toovenim Krɩstʋ mba, mbʋ pʋyɔɔ yɔ, apostoloo Pɔɔlɩ alɩwaatʋ taa lɛ, pataatɩɩsɩmtɩ ɛgbɛyɛ nɖɩ ɖeyi ɖeyi “paɣtʋ yɔɔ mayʋ” sɩŋnaa yɔ. Halɩ alɩwaatʋ ndʋ “paɣtʋ yɔɔ mayʋ” ɛnʋ ɛlɩɣ yɔ, ɛkɛɣnɩ “mɛsaɣ tɛɛ tɔm” ɛyaa sakɩyɛ mbʋ pʋyɔɔ yɔ, paa ɛlakɩ kɩwɛɛkɩm mɛsaɣ tɛɛ yɔ, ɛyaa ɛsɩndaa lɛ, ɛwɩlɩɣ ɛ-tɩ se ɛñɔnɩ Ɛsɔ nɛ Ɛsɔ hɩɖɛ wɛ ɛ-yɔɔ. Toovenim taa lɛ, “paɣtʋ yɔɔ mayʋ” ɛnʋ ɛkɛnɩ tisuu yebiyu weyi ɛlɩnɩ Ɛsɔ ñɔnʋʋ toovenim mbʋ taa yɔ. Pɔɔlɩ yɔɔdaa se “paɣtʋ yɔɔ maʋ pʋnɛ, pɩ-mɛsaɣ tɛɛ tɔm” kaatɛm paɣzʋʋ tʋmɩyɛ labʋ ɛ-alɩwaatʋ taa, mbʋ pʋyɔɔ yɔ paɣtʋ yɔɔ maʋ kaatɔyɩ Krɩstʋ ɛgbɛyɛ taa, nɛ mbʋ kɔmna nɛ pɩlʋlɩ tisuu yebiyaa ɛgbɛyɛ nɖɩ. Ɛlɛ Yesu Krɩstʋ wɛʋ alɩwaatʋ ndʋ tɩkaɣ naʋ kaɣlaa yɔ tɩ-taa lɛ, ɛkaɣ ɖɩzʋʋ “paɣtʋ yɔɔ mayʋ” ɛnʋ. Tisuu yebiyu ɛnʋ, Sataŋ wɛnɩnɩ ɖoŋ ɛ-yɔɔ, nɛ ɛkpazɩɣ ɛ-tɩ “mbʋ payɩ payaɣ-pʋ se ɛsɔ yɔ pɩ-yɔɔ yaa wonuu ŋgʋ poluŋuu kɩ-tɛɛ yɔ kɩ-ñʋʋ yɔɔ” (Grɛɛkɩ: sébasma). Ɛsɔ koyindu sɔsɔ nɛ Sataŋ tʋmlaɖʋ ɛnʋ ɛkaɣ peɣzuu ɛyaa siŋŋ nɛ mba patɩŋɩɣ ɛ-wayɩ nɛ palakɩ ɛ-lakasɩ yɔ pakaɣ-wɛ ɖɩzʋʋ. “Paɣtʋ yɔɔ mayʋ” kaɣ pɩzʋʋ nɛ ɛcɛtɩ ɛyaa sakɩyɛ, mbʋ pʋyɔɔ yɔ, ɛlakɩ kɩwɛɛkɩm mɛsaɣ tɛɛ nɛ ɛwɩlɩɣ ɛyaa ɛsɩndaa se ɛñɔnɩ Ɛsɔ.—2Te 2:3-12; kpaɣ-tʋ ŋmaɣzɩnɩ Mt 7:15, 21-23.
(2 Tesalooniiki mba 2:9-12) Ɛlɛ Sataŋ ɖoŋ taa paɣtʋ yɔɔ mayʋ wɛɛ, pɩkpɛndɩnɩ maamaaci lakasɩ ndɩ ndɩ, nɛ cɛtɩm yʋsasɩ nɛ piti lakasɩ 10 nɛ ajitu cɛtɩm tɔm tɩŋa se epeɣzi mba peɖiɣni lebu yɔ, se pɩkɛnɩ-wɛ kɩhɛyʋʋ, mbʋ pʋyɔɔ yɔ petitisi toovenim sɔɔlɩm se pɩsa nɛ paya pa-ñʋʋ. 11 Mbʋ yebina nɛ Ɛsɔ yele se ɖoŋ weyi epeɣziɣ yɔ, epeɣzi-wɛ se pɩsa nɛ petisi cɛtɩm tɔm yɔɔ, 12 nɛ pahʋʋnɩ pa-tɩŋa tɔm, mbʋ pʋyɔɔ yɔ petitisi toovenim yɔɔ, ɛlɛ pa-taa labɩ leleŋ nɛ mbʋ pɩfɛyɩ siɣsiɣ yɔ.
it-2 255 § 7
Cɛtɩm
Yehowa Ɛsɔ ha nʋmɔʋ “ɖoŋ weyi epeɣziɣ yɔ” se ɩsʋʋ mba pɔsɔɔlɩ cɛtɩm yɔ pa-taa se “pɩsa nɛ petisi cɛtɩm tɔm yɔɔ” nɛ pekizi Yesu Krɩstʋ yɔɔ tɔm kɩbandʋ. (2Te 2:9-12) Mbʋ pɩɩlabɩ Izrayɛɛlɩ Wiyaʋ Ahaabɩ alɩwaatʋ taa yɔ, pɩñɩkɩɣ niye tɔm ndʋ tɩ-yɔɔ. Cɛtɩm nayaa heyi Ahaabɩ se ye ɛlabɩ you nɛ Ramɔɔtɩ Gileyaadɩ mba yɔ, ɛwakɩ-wɛ, ŋgʋ Yehowa tɛ nayʋ Mikayiya ñaaheyi-i se pakaɣ-ɩ wabʋ. Ɛzɩ Mikayiya naʋ natʋ natʋyʋ taa yɔ, Yehowa ha nʋmɔʋ e-tiyiyu nɔɔyʋ se ɛpɩsɩ “fezuu cɛtɩyʋ” Ahaabɩ nayaa nɔsɩ taa. Tiyiyu ɛnʋ, etuyi-wɛ nɛ tɔm ndʋ pɔyɔɔdaa yɔ, tɩtɩkɛ toovenim, ɛlɛ tɩkɛ ndʋ pa-maɣmaɣ paasɔɔlɩ yɔɔdʋʋ nɛ ndʋ Ahaabɩ kaasɔɔlaa se ɛnɩɩ yɔ. Paa paapaɣ Ahaabɩ se etaawolo you yɔ, ɛlɩzaa se ewelisiɣ pɛ-cɛtɩm tɔm, nɛ pɩkɔnɩ-ɩ sɩm.—1Aw 22:1-38; 4Aw 18.
Ðɩñɩnɩ fezuu taa ñɩm
(2 Tesalooniiki mba 1:7, 8) Ɛlɛ mɩ mba ɩtɔkɩ kʋñɔŋ yɔ, pakaɣ yebu nɛ ɖa nɛ mɩ ɖɩhɛzɩ, alɩwaatʋ ndʋ pokuluu Kɩbaɣlʋ Yesu yɔɔ nɛ ɛsɔdaa kiŋ nɛ pawɩlɩ, ɛ nɛ e-tiyiyaa ɖoŋ tɩnaa 8 miŋ pelu pelu nɩɩyɩ taa yɔ, alɩwaatʋ ndʋ ɛkpaɣ kɩmɩyɛ mba paasɩŋ Ɛsɔ nɛ mba paañaŋ ɖa-Kɩbaɣlʋ Yesu yɔɔ tɔm kɩbandʋ yɔ.
it-1 890 § 6
Miŋ
Pɩyɛɛrɩ mawa se “pasɩ ɛsɔdaa nɛ tɛtʋ ndʋ tɩwɛ lɛɛlɛɛyɔ yɔ nɛ paɖaŋnɩ miŋ.” Tɔm lɛɛtʋ ndʋ tɩcɔ tɔm tʋnɛ nɛ tɩta yɔ, nɛ Bibl taa masɩ lɛɛsɩ wɩlɩɣ kpayɩ kpayɩ se pɩtɩkɛ miŋ maɣmaɣ tɔm pɔyɔɔdʋʋ ɛlɛ tam tam ɖɩzʋʋ tɔm pɔyɔɔdʋʋ. Noowa alɩwaatʋ taa Tɛʋ Sɔsɔʋ taaɖɩzɩ ɛsɔdaa nɛ tɛtʋ maɣmaɣ, ɛlɛ kɩɩɖɩzɩ ɛyaa mba paañaŋ Ɛsɔ yɔ. Mbʋ ɖɔɖɔ ɛyaa mba paañaŋ Ɛsɔ yɔ, pe-ɖeke Yesu Krɩstʋ nɛ e-tiyiyaa ɖoŋ tɩnaa mba pakaɣ pɔ-yɔɔ kuluu miŋ pelu pelu taa yɔ pakaɣ ɖɩzʋʋ, pɩkpɛndɩnɩ ɛjaɖɛ kɩdɛkɛdɩyɛ ɖɩnɛ ɖɩ-tɛ ɖʋtʋ.—2Pɩ 3:5-7, 10-13; 2Te 1:6-10; kpaɣ-tʋ ŋmaɣzɩnɩ Iza 66:15, 16, 22, 24.
(2 Tesalooniiki mba 2:2) itaayele nɛ tɔm ndʋ tɩlɩnɩ fezuu nakʋyʋ cɔlɔ yaa tɔm ndʋ pɔyɔɔdɩnɩ nɔɔ yaa takayaɣ nakɛyɛ ŋga pamaɣzɩɣ se kalɩnɩ ɖɔ-cɔlɔ yɔ, kala nɛ pisidi mɩ-maɣzɩm lɛɛ lɛɛ yaa sɔɔndʋ kpa-mɩ se Yehowa kɩyakʋ talaa.
it-1 1188 § 1
Fezuu taa tɔm
“Tɔm ndʋ tɩlɩnɩ fezuu nakʋyʋ cɔlɔ”: Tɩpɩzɩɣ tɩkɛ toovenim tɔm yaa cɛtɩm tɔm. Takayɩsɩ nzɩ apostoloowaa mawa yɔ, sɩ-taa lɛ, ɛzɩma palabɩnɩ tʋmɩyɛ Grɛɛkɩ tɔm piye pneuʹma (fezuu) yɔ, pɩwɛ ndɩ. Ðɩkpaɣ ɛzɩ 2 Tesalooniiki mba 2:2 mbʋ yɔ, apostoloo Pɔɔlɩ seɣti e-koobiya mba pɛwɛ Tesalooniiki yɔ se “itaayele nɛ tɔm ndʋ tɩlɩnɩ fezuu nakʋyʋ cɔlɔ [ye pɛɖɛzɩ-tʋ piye piye yɔ, pɩwɩlɩɣ “fezuu”] yaa tɔm ndʋ pɔyɔɔdɩnɩ nɔɔ yaa takayaɣ nakɛyɛ ŋga pamaɣzɩɣ se kalɩnɩ ɖɔ-cɔlɔ yɔ, kala nɛ pisidi mɩ-maɣzɩm lɛɛ lɛɛ yaa sɔɔndʋ kpa-mɩ se Yehowa kɩyakʋ talaa.” Pɩtʋ kpayɩ kpayɩ se “tɔm ndʋ tɩlɩnɩ fezuu nakʋyʋ cɔlɔ” yɔ tɩpɩzɩɣ nɛ tɩkɛ “tɔm ndʋ pɔyɔɔdɩnɩ nɔɔ” yaa “takayaɣ nakɛyɛ” taa tɔm, pʋyɔɔ Pɔɔlɩ labɩnɩ tʋmɩyɛ tɔm piye pneuʹma (fezuu). Pʋyɔɔ Bibl nakʋyʋ (Theologisch-homiletisches Bibelwerk, Die beiden Briefe Pauli an die Thessalonicher, par J.P.Lange, 1864, p. 110) yɔɔdaa se: “Tɔm ndʋ Pɔɔlɩ yɔɔdaa yɔ, tɩpɩzɩɣ tɩwɩlɩ tɔm ndʋ pamaɣzɩɣ se tɩkɛ fezuu taa tɔm, natʋ tɔm, yaa nayʋ nɔɔyʋ tɔm yɔ. C.Masson, (Neuchâtel, 1957, p. 93, 94) yɔɔdaa se takayɩsɩ nzɩ Pɔɔlɩ ma Tesalooniiki koobiya yɔ, ye Pɔɔlɩ ɛlabɩnɩ tʋmɩyɛ tɔm piye fezuu yɔ, pɩwɩlɩɣ fezuu taa tɔm yaa natʋ tɔm ndʋ kajalaɣ Krɩstʋ mba lakaɣnɩ tʋmɩyɛ agbaa taa yɔ. Pʋyɔɔ lɛ, ye pɛɖɛzɩ tɔm piye pneuʹma se fezuu yɔ, Biblwaa nabɛyɛ taa lɛ, pɛɖɛzɩ-ɖɩ se “fezuu nakʋyʋ tɔm” (The Bible—An American Translation), “natʋ tɔm” (Bible de Jérusalem) “fezuu taa tɔm” (D’Ostervald; Segond [fransɩɩ taa]) “tɔm ndʋ tɩlɩnɩ fezuu nakʋyʋ cɔlɔ” yɔ (nwt).
Bibl kalʋʋ
(2 Tesalooniiki mba 1:1-12) Ma Pɔɔlɩ, Silɩvɛɛ nɛ Timootee, ɖetiyiɣni takayaɣ kanɛ Tesalooniiki mba ɛgbɛyɛ nɖɩ ɖɩ nɛ ɖa-Caa Ɛsɔ nɛ Kɩbaɣlʋ Yesu Krɩstʋ pɛwɛ nɔɔ kʋɖʋmaɣ yɔ: 2 Tɛtɛ nɛ ɩwɛɛnɩ lootiye nɛ laŋhɛzɩyɛ nɖɩ ɖɩlɩnɩ Caa Ɛsɔ nɛ Kɩbaɣlʋ Yesu Krɩstʋ pɔ-cɔlɔ yɔ. 3 Koobiya, pɩwɛnɩ-ɖʋ paa ɛzɩmtaa se ɖɩsɛɛ Ɛsɔ mɩ-yɔɔ se ɛlabaɣ lɛ. Pɩmʋnɩ mbʋ, mbʋ pʋyɔɔ yɔ mi-tisuu wɛɛ nɛ pɩpaɣlɩɣ siŋŋ nɛ sɔɔlɩm mbʋ mɩ-tɩŋa ɩsɔɔlɩnɩ ɖama yɔ, pɩwɛɛ nɛ pɩpaɣlɩɣ. 4 Piyeba nɛ ɖa-maɣmaɣ ɖɩkʋndʋʋ mɩ-yɔɔ Ɛsɔ agbaa tɩŋa hɛkʋ taa, mbʋ pʋyɔɔ yɔ ɩwɩlɩ laŋɩyɛ ɖɔkʋʋ nɛ tisuu nazɩm tɩŋa taa nɛ kaɖɛ wɛtʋ ndʋ ɩkatɩɣ yɔ tɩ-taa. 5 Mbʋ wɩlɩɣna se Ɛsɔ tɔm hʋʋ wɛ siɣsiɣ, nɛ piyeki se pakpaɣ-mɩ se ɩmʋnɩ Ɛsɔ Kewiyaɣ, ŋga kɔ-yɔɔ toovenim taa lɛ, ɩwɛɛ nɛ ɩtɔkɩ kʋñɔŋ yɔ. 6 Pɩwɛ mbʋ, mbʋ pʋyɔɔ yɔ pɩwɛ siɣsiɣ Ɛsɔ ɛsɩndaa se ɛkpaɣ kʋñɔŋ nɛ ɛhɛyɩ mba peyeki nɛ ɩtɔkɩ kʋñɔŋ yɔ. 7 Ɛlɛ mɩ mba ɩtɔkɩ kʋñɔŋ yɔ, pakaɣ yebu nɛ ɖa nɛ mɩ ɖɩhɛzɩ, alɩwaatʋ ndʋ pokuluu Kɩbaɣlʋ Yesu yɔɔ nɛ ɛsɔdaa kiŋ nɛ pawɩlɩ, ɛ nɛ e-tiyiyaa ɖoŋ tɩnaa 8 miŋ pelu pelu nɩɩyɩ taa yɔ, alɩwaatʋ ndʋ ɛkpaɣ kɩmɩyɛ mba paasɩŋ Ɛsɔ nɛ mba paañaŋ ɖa-Kɩbaɣlʋ Yesu yɔɔ tɔm kɩbandʋ yɔ. 9 Pakaɣ hɔm ɛyaa mba pa-nɩŋgbaaŋ nɛ paɖɩzɩ-wɛ tamtam, Kɩbaɣlʋ nɛ e-ɖoŋ samtʋ pɛ-ɛsɩndaa, 10 alɩwaatʋ ndʋ ɛkɔŋ se pasamɩ-ɩ ɛ-ɛyaa kiɖeɖema yɔɔ, nɛ mba payɩ petisiɣ ɛ-yɔɔ yɔ pɔcɔnɩ-ɩ kɩyakʋ ŋgʋ nɛ pɩɖɩɣzɩ-wɛ yɔ, mbʋ pʋyɔɔ yɔ aseɣɖe nɖɩ ɖɩlɩzɩ mɩ-hɛkʋ taa yɔ, itisi ɖɩ-yɔɔ. 11 Pʋyɔɔ ɖeyi ɖeyi ɖɩtɩmɩɣ mɩ-yɔɔ paa ɛzɩmtaa, se ɖɛ-Ɛsɔ ɛkpaɣ-mɩ se ɩmʋnɩ ɛ-yatʋ nɛ ɛtɩŋnɩ e-ɖoŋ yɔɔ nɛ ɛla kɩbandʋ ndʋ tɩkɛdɩnɩ-ɩ yɔ tɩ-tɩŋa caɣ caɣ, nɛ ɛla ɖɔɖɔ paa tisuu tʋmɩyɛ nɖɩ lɛ caɣ caɣ. 12 Pɩlakɩ mbʋ se pɩsa nɛ pasa ɖa-Kɩbaɣlʋ Yesu hɩɖɛ mɩ-taa nɛ pasam-mɩ, mɩ nɛ ɩ mɩ-nɔɔ kʋɖʋmaɣ labʋ taa, ɛzɩ ɖɛ-Ɛsɔ nɛ ɖa-Kɩbaɣlʋ Yesu Krɩstʋ po-lootiye pɔzʋʋ yɔ.
22-28 JUILLET
ÑƖM MBƲ PƖWƐ ƐSƆTƆM TAA YƆ | 1 TIMOOTEE 1-3
“Ɩñaɣ pana nɛ ɩla ɛgbɛyɛ taa tʋma”
(1 Timootee 3:1) Tɔm tʋnɛ tɩmʋnaa se pataa-tʋ liu: Ye abalʋ nɔɔyʋ ɛñɩnɩɣ se ɛkɛ ɛgbɛyɛ yɔɔ cɔnɩyʋ yɔ, ɛsɔɔlɩ tʋmɩyɛ kɩbanɖɛ.
Ɛbɛ yɔɔ pɩcɛyaa se ŋwobini ɛsɩndaa fezuu taa?
3 Kalɩ 1 Timootee 3:1. Grɛɛkɩ tɔm piye nɖɩ pɛɖɛzɩ-ɖɩ se ‘liu tɛɛ kɔtʋʋ’ yɔ, ɖɩ-tɔbʋʋ lɛ se ɛyʋ esezi e-nesi nɛ ɛkpaɣ nabʋyʋ, mbʋ piposini-i yɔ. Pɔɔlɩ labɩnɩ tɔm piye nɖɩ tʋmɩyɛ nɛ ɛwɩlɩ se pɩpɔzʋʋ pana ñaɣʋ siŋŋ pʋcɔ nɛ ɛyʋ wobini ɛzɩdaa fezuu taa. Kpaɣ se koobu nɔɔyʋ sɔɔlaa se ɛɖɛɛnɩ ɛzɩdaa ɛgbɛyɛ taa. Ye ɛtɩkɛtɩ ɛgbɛyɛ taa tʋmlaɖʋ yɔ, ɛkaɣ ɖiɣzinuu se pɩpɔzʋʋ se ɛñaɣ pana nɛ ɛwɛɛnɩ fezuu taa wɛtʋ kɩbandʋ. Kajalaɣ lɛ, ɛñakɩ pana se ɛpɩsɩ ɛgbɛyɛ taa tʋmlaɖʋ. Nɛ pʋwayɩ lɛ, ɛñaɣ pana ɖɔɖɔ se ɛwɛɛnɩ fezuu taa wɛtʋ kɩbandʋ ndʋ tɩhaɣ-ɩ waɖɛ se ɛpɩsɩ ɛgbɛyɛ taa ɛzʋtʋyʋ yɔ. Paa pɩtɩɩkɛ waɖɛ nɖɩ ɛñɩnɩɣ kɔyɔ, pɩwɛɛ se ɛñaɣ pana nɛ ɛwɛɛnɩ wɛtʋ ndʋ tɩsɩɣnɩ-ɩ se ɛpɩzɩ nɛ ɛla ɛgbɛyɛ taa tʋma yɔ.
(1 Timootee 3:13) Mbʋ pʋyɔɔ yɔ, abalaa mba palakɩ lɩm ɖʋʋ tʋmɩyɛ camɩyɛ yɔ, pɛwɛɣnɩ hɩɖɛ kɩbanɖɛ nɛ papɩzɩɣ pɔyɔɔdɩ tɔm kaalɛyɩtʋ siŋŋ, tisuu mbʋ pɩwɛ Krɩstʋ Yesu taa yɔ pɩ-taa.
km 9/78 4 § 7
Mba ‘pɛwɛnɩ hɩɖɛ kɩbanɖɛ yɔ’
7 Ye mbʋ pɩwɛ kɛlɛʋ se ɛyʋ ɛnɩɩ mbʋ pʋyɔɔ Pɔɔlɩ yɔɔdaa se ‘abalaa mba pɛwɛɛnɩ hɩɖɛ kɩbanɖɛ’ yɔ pɩ-taa. Pɩtɩkɛ lone sɔsɔɖɛ naɖɩyɛ ñɩnʋʋ cooci taa tɔm Pɔɔlɩ yɔɔdaɣ ɛzɩ nabɛyɛ maɣzʋʋ yɔ. Ɛgbɛyɛ taa tʋmlaɖaa mba ‘pɛwɛnɩ hɩɖɛ kɩbanɖɛ yɔ,’ pa-taa tɛma se Yehowa nɛ Yesu wazaɣ wɛ pɔ-yɔɔ, ɛgbɛyɛ taa mba kpeekpe ñaŋ-wɛ nɛ paɖʋʋ-wɛ nesi. Nɛ patɩlɩ ɛzɩma “papɩzɩɣ pɔyɔɔdɩ tɔm kaalɛyɩtʋ siŋŋ, tisuu mbʋ pɩwɛ Krɩstʋ Yesu taa yɔ.” Pamʋnaa se pɛwɛɛnɩ lone nɖɩ, nɛ pʋyɔɔ paɖʋʋ-wɛ hɩɖɛ pa-tʋmɩyɛ yɔɔ. Pe-tisuu kam camɩyɛ nɛ sɔɔndʋ ɛɛkpaɣ-wɛ nɛ pe-tisuu tɔm yɔɔdʋʋ.
Ðɩñɩnɩ fezuu taa ñɩm
(1 Timootee 1:4) nɛ pataakemni ɖɔɖɔ mʋya nɛ cɔzɔnaa liɖe tɔm. Tɔm ndʋ, tɩɩkɔŋnɩ mbʋ pɩwazɩɣ yɔ, ɛlɛ tiyeki nɛ ɛyaa yɔɔdʋʋ tɔm ndʋ paapɩzɩɣ nɛ pawɩlɩ se tɩkɛ toovenim yɔ ti-ɖeke na, ŋgʋ pɩɩwɛɛ se tɩkɔnɩ ɛyʋ pʋyʋ nɔɔyʋ mbʋ pɩlɩnɩ Ɛsɔ cɔlɔ nɛ pɩla nɔɔ kʋɖʋmaɣ nɛ tisuu yɔ.
it-1 980
Cɔzɔnaa liɖe tɔm
Cɔzɔnaa liɖe taa tazʋʋ nɛ pɩ-yɔɔ tɔm kpɛlɩkʋʋ fɛyɩnɩ wazaɣ nakɛyɛ. Nɛ alɩwaatʋ ndʋ tɩ-taa Pɔɔlɩ maɣaɣ takayaɣ Timootee yɔ, cɔzɔnaa liɖe taa tazʋʋ nɛ ɖɩ-yɔɔ tɔm kpɛlɩkʋʋ taawɛɛnɩ wazaɣ paa ññɩɩ. Pɩtaacɛyɩ kaaʋ se ɛyʋ ɛtɩlɩ ɛ-cɔzɔnaa yaa liɖe nɖɩ taa ɛ-cɔzɔnaa lɩnaa yɔ, mbʋ pʋyɔɔ yɔ, lɛɛlɛɛyɔ Ɛsɔ tɩɖʋ tʋkaɣ Yuuda mba nɛ sɩɩnaa layaa mba pɛwɛ Krɩstʋ ɛgbɛyɛ taa yɔ pɛ-hɛkʋ taa. (Gal 3:28) Pɩtasɩ lɛ, pɛtɛm sɩm cɔzɔnaa liɖe nɖɩ ɖɩ-taa Krɩstʋ lɩnaa yɔ pɩtɩŋnɩ Daviid liɖe yɔɔ. Pɩtasɩ ɖɔɖɔ lɛ, piileɖiɣ pʋcɔ nɛ pɔtɔyɩtɩ Yeruzalɛm pɩkpɛndɩnɩ cɔzɔnaa liɖe yɔɔ tɔm ndʋ pama takayɩsɩ taa nɛ pasɩɩ yɔ cɩɖɩ cɩɖɩ. Ɛsɔ tɩkandɩyɩ takayɩsɩ nzɩ sɩ-yɔɔ. Pʋyɔɔ sɔɔndʋ kpaɣaɣ Pɔɔlɩ se Timootee nɛ ɛgbɛyɛ taa koobiya ɩtaawɛɛkɩ pa-alɩwaatʋ nɛ patazɩɣ pɔ-cɔzɔnaa liɖe yɔɔ tɔm taa, mbʋ pʋyɔɔ yɔ, tɔm ndʋ tɩɩkaɣ yebu nɛ pɛcɛyɩsɩ pe-tisuu. Papɩzɩɣ nɛ patɩŋnɩ cɔzɔnaa liɖe yɔɔ tɔm ndʋ tɩwɛ Bibl taa yɔ, tɩ-yɔɔ nɛ pawɩlɩ se Krɩstʋ kɛnɩ Mesiya. Nɛ Krɩstʋ mba ɛsɩndaa lɛ, Mesiya liɖe yɔɔ tɔm kɩlɩnɩ cɛyʋʋ. Cɔzɔnaa liɖe yɔɔ tɔm lɛɛtʋ ndʋ tɩwɛ Bibl taa yɔ, tɩñɩkɩɣ niye pɩ-yɔɔ kɩñɩʋ se Bibl taa tɔm kɛ toovenim.
(1 Timootee 1:17) Lɛɛlɛɛyɔ, paɖʋ hɩɖɛ nɛ pasa tamtam Wiyaʋ, weyi ɛɛsɩkɩ, nɛ weyi paanaɣ-ɩ yɔ, ɛnʋ weyi e-ɖeke koŋ ɛkɛ Ɛsɔ yɔ tamtam. Amɛn.
cl 12 § 15
“Ðɛ-Ɛsɔ ɛnʋ yɔ”
15 Hɩɖɛ kɩsɛsɛyɛ lɛɛɖɛ nɖɩ payaɣnɩ Yehowa ɖeke yɔ lɛ “tamtam Wiyaʋ.” (1 Timootee 1:17; Natʋ 15:3) Ðɩ-tɔbʋʋ lɛ suwe? Ɛyʋ maɣzɩm wɛnɩ kamaɣ nɛ pʋyɔɔ lɛ, pɩwɛ-ɩ kaɖɛ se ɛnɩɩ tɔm ndʋ tɩ-taa. Ɛlɛ Yehowa kɛ tamtam Wiyaʋ hɔɔlɩŋ naalɛ taa. Pɩ-tɔbʋʋ se alɩwaatʋ ndʋ tɩɖɛwa yɔ tɩ-taa lɛ, Yehowa wɛ tam, nɛ ndʋ tɩkaɣ kɔm yɔ tɩ-taa lɛ, ɛwɛɣ tam ɖɔɖɔ. Pɔyɔɔdɩ Keɣa 89:2 taa se: “Tam lɛ ŋkɛ Ɛsɔ paa ɛzɩmtaa.” Ye mbʋ Yehowa fɛyɩnɩ ɖɩpaɣzɩyɛ, ɛwɛ tam paa ɛzɩmtaa. Paya-ɩ se “kɩyakɩŋ akpadɩyʋ” nɛ pɩmʋnɩ ɖeyi ɖeyi. Pɩ-tɔbʋʋ se pʋcɔ nɛ ɛyaa yaa mbʋ payɩ pɩwɛ kedeŋa yɔɔ yɔ pɩwɛɣ lɛ, ɛwɛ tam. (Danɩyɛɛlɩ 7:9, 13, 22) Anɩ pʋdʋ pɩzɩɣ nɛ ɛkaɖɩnɩ-ɩ se ɛfɛyɩnɩ waɖɛ se ɛtɔɔ kewiyitu kɩkɩlɩtʋ?
Bibl kalʋʋ
(1 Timothy 2:1-15) Pʋyɔɔ kajalaɣ lɛ, menseɣtiɣ ɛyaa tɩŋa se petendi Ɛsɔ, patɩmnɩ-ɩ, patɩmɩ lalaa yɔɔ, nɛ paha Ɛsɔ sɛtʋ; pala mbʋ ɛyaa ndɩ ndɩ yɔɔ, 2 awiya nɛ mba payɩ pɛwɛ lona sɔsɔna taa yɔ pɔ-yɔɔ, se pɩsa nɛ ɖiwolo pɩ-yɔɔ nɛ ɖɩcaɣ wezuu ɖiɣ ɖiɣ laŋhɛzɩyɛ taa nɛ Ɛsɔ ñɔnʋʋ pilim taa nɛ mbʋ pɩmʋnaa yɔ pɩ-taa. 3 Pɩkɛ mbʋ pɩwɛ ɖeu nɛ pɩmʋnɩ ɖa-Ñʋʋ Yaɖʋ Ɛsɔ ɛsɩndaa yɔ, 4 ɛnʋ weyi ɛsɔɔlaa se ɛyaa ndɩ ndɩ ihiɣ ñʋʋ yabʋ nɛ pɛwɛɛnɩ toovenim tɛ sɩmtʋ siŋŋ yɔ. 5 Mbʋ pʋyɔɔ yɔ Ɛsɔ kʋɖʋm wɛna, nɛ loliyu kʋɖʋm wɛnɩ Ɛsɔ nɛ ɛyaa pɛ-hɛkʋ taa, Krɩstʋ Yesu. Ɛnʋ lɛ ɛyʋ, 6 weyi ɛcɛlɩ ɛ-tɩ nɛ ɛkɛ kɩhɛyʋʋ pʋ-ñʋʋ taa ŋgʋ kɩmʋnaa yɔ ɛyaa tɩŋa yɔɔ yɔ—tɔm ndʋ tɩ-yɔɔ pɩwɛɛ se palɩzɩ aseɣɖe tɩ-maɣmaɣ tɩ-alɩwaatʋ talɩɣ lɛ. 7 Aseɣɖe tɔm ndʋ tɩ-yɔɔ palɩzɩ-m se mɛnkɛ tɔm susuyu nɛ apostoloo—toovenim mɔyɔɔdʋʋ, maacɛtɩɣ—ajɛɛ tɛ wɩlɩyʋ, tisuu nɛ toovenim pɔ-hɔɔlʋʋ taa. 8 Pʋyɔɔ lɛ, me-liu wɛɛ se paa le lɛ, abalaa ɩtɩmɩɣ, nɛ pakpazɩɣ nesi siɣsiɣ ñɩnzɩ nɛ ɛsɔdaa, pana nɛ tɔm hɔm pataawɛɛ. 9 Mbʋ ɖɔɖɔ, pɩwɛɛ se halaa ɩcanɩ pa-tɩ nɛ wondu kususutu ndʋ tɩmʋnaa yɔ, tɩmaɣna nɛ tɩwɩlɩ se pɛwɛnɩ maɣzɩm mbʋ pɩmʋnaa yɔ, pɩtaakɛ pa-tɩ canʋʋ nɛ ajana ñɔsɩ ndɩ ndɩ nɛ sika yaa kijisi yaa wondu kususutu ndʋ tɩwɛ liidiye siŋŋ yɔ, 10 ɛlɛ ɛzɩ pɩmʋnaʋ halaa mba pɔyɔɔdʋʋ se pɔñɔnɩ Ɛsɔ yɔ, pʋ-tɔbʋʋ se pɩtɩŋnɩ tʋma kɩbana yɔɔ. 11 Halʋ esu ɖiɣ ɖiɣ alɩwaatʋ ndʋ ɛkpɛlɩkɩɣ tɔm yɔ, ɛla mbʋ nɛ tɩ luzuu kiya. 12 Maahaɣ halʋ nʋmɔʋ se ɛwɩlɩ tɔm yaa ɛwɛɛnɩ ɖoŋ abalʋ yɔɔ, ɛlɛ pɩwɛɛ se esu ɖiɣ ɖiɣ. 13 Mbʋ pʋyɔɔ yɔ Aɖam pacalɩ labʋ, pʋwayɩ lɛ Ɛva. 14 Pɩtasɩ lɛ, pɩtɩkɛ Aɖam pepeɣzaa, ɛlɛ halʋ pepeɣzaa caɣ caɣ nɛ ɛpɩsɩ paɣtʋ yɔɔ mayʋ. 15 Paa mbʋ yɔ, pakaɣ ɛ-ñʋʋ yabʋ pɩtɩŋnɩ piya lʋlʋʋ yɔɔ, ye ɛñɩtaa nɛ ɛwɛɛ tisuu nɛ sɔɔlɩm nɛ kele kele wɛtʋ, pɩtasɩnɩ maɣzɩm mbʋ pɩmʋnaa yɔ pa-taa yɔ.
29 JUILLET-4 AOÛT
ÑƖM MBƲ PƖWƐ ƐSƆTƆM TAA YƆ | 1 TIMOOTEE 4-6
“Ɛsɔ ŋñɔna yaa tomnaɣ yɔɔ ñɩm?”
(1 Timootee 6:6-8) Toovenim taa lɛ, Ɛsɔ ñɔnʋʋ wɛ wazaɣ siŋŋ, ye ɛyʋ liu ɛsɩbɩnɩ mbʋ ɛwɛna yɔ. 7 Mbʋ pʋyɔɔ yɔ, ɖɩtɩkɔnɩ nabʋyʋ ɛjaɖɛ yɔɔ, nɛ ɖɩɩpɩzɩɣ ɖɔɖɔ nɛ ɖɩkpɛndɩnɩ nabʋyʋ nɛ ɖɩɖɛna. 8 Pʋyɔɔ lɛ, ye ɖɩwɛnɩ tɔɔnaɣ nɛ wondu kususutu yɔ, ɖe-liu kaɣ-pʋ sɩbɩnʋʋ.
w03 1/6 9 § 1-2
Ñe-liu ɛsɩbɩnɩ mbʋ ŋwɛna yɔ
Pɔɔlɩ liu sɩbɩnɩ mbʋ ɛwɛna yɔ nɛ mbʋ pɩɩhanɩ-ɩ taa leleŋ nɛ koboyaɣ. Ɛlɛ ye pɔtɔm se ɛyʋ liu ɛsɩbɩnɩ mbʋ ɛwɛna yɔ, pɩ-tɔbʋʋ lɛ suwe? Tobi lɛ, pɩ-tɔbʋʋ lɛ se ɛyʋ taa ɛla leleŋ nɛ mbʋ pɩ-tɔm cɛyaa yɔ. Pʋyɔɔ Pɔɔlɩ heyi Timootee weyi ɛkɛ ɛ-sɩnɩyʋ tɔm susuu taa yɔ se: “Toovenim taa lɛ, Ɛsɔ ñɔnʋʋ wɛ wazaɣ siŋŋ, ye ɛyʋ liu ɛsɩbɩnɩ mbʋ ɛwɛna yɔ. Mbʋ pʋyɔɔ yɔ, ɖɩtɩkɔnɩ nabʋyʋ ɛjaɖɛ yɔɔ, nɛ ɖɩɩpɩzɩɣ ɖɔɖɔ nɛ ɖɩkpɛndɩnɩ nabʋyʋ nɛ ɖɩɖɛna. Pʋyɔɔ lɛ, ye ɖɩwɛnɩ tɔɔnaɣ nɛ wondu kususutu yɔ, ɖe-liu kaɣ-pʋ sɩbɩnʋʋ.”—1 Timootee 6:6-8.
Yʋsɩ se Pɔɔlɩ yɔɔdaɣ Ɛsɔ ñɔnʋʋ tɔm lɛ, ɛyɔɔdɩ ɖɔɖɔ ɛzɩma ɛyʋ liu ɛsɩbɩnɩ mbʋ ɛwɛna yɔ pɩ-tɔm. Eɖiɣzinaa se koboyaɣ siŋŋ ɛɛlɩɣnɩ tomnaɣ yɔɔ wondu yaa tomnaɣ yɔɔ ñɩm mbʋ ɖɩwɛna yɔ pɩ-cɔlɔ, ɛlɛ kalɩɣnɩ ɛzɩma ɖɩñɔʋnɩ Ɛsɔ siŋŋ yɔ pɩ-cɔlɔ, pɩ-tɔbʋʋ lɛ se ɛzɩma ɖɩsɩɣ Ɛsɔ sɛtʋ kajalaɣ lone taa yɔ pɩ-cɔlɔ. “Tɔɔnaɣ nɛ wondu kususutu” kɛ wondu ndʋ tɩsɩnɩ-ɩ nɛ ewolo pɩ-yɔɔ nɛ ɛñɔɔnɩ Ɛsɔ yɔ. Ye mbʋ Pɔɔlɩ ɛsɩndaa lɛ, pɩsa nɛ ɛyʋ liu sɩbɩnɩ mbʋ ɛwɛna yɔ lɛ, pɩwɛɛ se ɛtaa Yehowa liu paa wɛtʋ ndʋ tɩ-taa ɛtɩɩwɛɛ yɔ.
(1 Timootee 6:9) Ɛlɛ mba pɛtɛm pa-taa se papɩsɩɣ ñɩm tɩnaa yɔ, pɔtɔlʋʋ takɩm taa nɛ kpaca taa nɛ kɩmɛlɛndʋ kɔɖɛyɩ nɛ kɔɖɛyɩ ŋgʋ kɩkɔŋnɩ ɛyʋ kaɖɛ nɛ kiwokini ɛyaa ɖɩzʋʋ nɛ asɛyʋʋ taa yɔ pa-taa.
g 6/07 6 § 2
Ye ŋtɛm ña-taa se ŋkɛɣnɩ ñɩm tʋ yɔ, ɖoŋ weyi pɩwɛɣnɩ ñɔ-yɔɔ?
Toovenim taa lɛ, pɩtɩkɛ ɛyaa mba pɛwɛ ñɩm wayɩ yɔ, pa-tɩŋa pasɩkɩna. Ɛlɛ papɩzɩɣ pelesi pe-wezuu kɛlɛʋ yem alɩwaatʋ ndʋ pañɩnɩɣ-pʋ kaŋ kaŋ yɔ. Pɩtasɩ lɛ, nɩɣzɛ wena tʋmɩyɛ labʋ kɔŋnɩ-wɛ yaa nɩɣzɛ wena liidiye yɔɔ maɣzʋʋ haɣ-wɛ yɔ, apɩzɩɣ ayele nɛ pañɩnɩ ɖom nɛ pawɩɩ, pa-ñʋŋ holi-wɛ siŋŋ, yaa pɩha-wɛ lotu taa kʋdɔŋ (ulcère), nɛ paapɩzɩɣ panɩɩ leleŋ pe-wezuu caɣʋ taa; nɛ halɩ tɩlasɩ sɩnɛ, sɩpɩzɩɣ nɛ siyele nɛ paacakɩ wezuu nɛ pileɖi. Nɛ halɩ paa pʋwayɩ ye ɛyʋ ɛlɛɣzɩ lɩmaɣza nɛ ɛɖʋ ɛ-taa se ɛɛtasɩɣ ñɩm ñɩnʋʋ siŋŋ yɔ, ɛtɛm kaɖɛ taa sʋʋ. Ɛ-halʋ ɛɛtasɩɣ-ɩ liu taʋ nɛ pe-piya ɖɔɖɔ ñɛtɛɖɩ sɔɔlɩm mbʋ pɩɩmʋnaa se ɛwɩlɩ-sɩ yɔ, nɛ pɩtala yɔ, pɩcamɩɣ ɛ-tɔnʋʋ taa alaafɩya. Pɩtɩla, papɩzɩɣ nɛ pɔcɔnɩ tɩlasɩ nzɩ sɩ-taa nasɩyɩ ɖeɖe ɛlɛ pɩpɔzʋʋ-wɛ pana ñaɣʋ siŋŋ. Ɛyaa mba pañɩnɩɣ ñɩm siŋŋ mbʋ yɔ ‘wɩzasɩ sakɩyɛ tʋlʋʋ-wɛ pɔŋ paa le.’—1 Timootee 6:10.
(1 Timootee 6:10) Mbʋ pʋyɔɔ yɔ liidiye sɔɔlʋʋ kɛ lakasɩ kɩdɛkɛdɩsɩ ndɩ ndɩ liɖe, nabɛyɛ tɔɔlɩ sɔɔlɩm mbʋ pɩ-taa nɛ poposini tisuu, nɛ wɩzasɩ sakɩyɛ tʋlɩ-wɛ pɔŋ paa le.
g 11/08 6 § 4-6
Kpɛzɩ nɩŋgbanzɩ loɖo nɛ pɩha-ŋ koboyaɣ
Ɛzɩ ɖɩtɛm naʋ tɔm ñʋŋ ɛnɛ ɩ-ɖɩpaɣzɩyɛ taa yɔ, ɛyaa mba palʋkɩ se pehiɣ ñɩm nɛ pɩha-wɛ koboyaɣ yɔ, toovenim taa lɛ, falaa lʋbɩyɛ palʋkɩ. Pɩtasɩnɩ se paahikiɣ koboyaɣ ŋga pañɩnɩɣ yɔ lɛ, panɩɣ siziŋ siŋŋ. Ðɩkpaɣ kɩɖaʋ kʋnɛ: Ɛyaa mba pañɩnɩɣ ñɩm kaŋ kaŋ yɔ, ɖoŋ ɖoŋ lɛ, pelesiɣ taabalɩyɛ nɖɩ ɖɩwɛ pa nɛ pɔ-hɔʋ taa mba nɛ pa-taabalaa pɛ-hɛkʋ taa yɔ. Tʋmɩyɛ yaa nɩɣzɛ yeki nɛ pa-taa lalaa iiɖou camɩyɛ ɛzɩ pɩpɔzʋʋ yɔ. Pɔyɔɔdɩ Eklesɩyastɩ 5:11 taa se: “Tʋmɩyɛ laɖʋ ɖom wɛ leleŋ, paa ɛtɔkɩ pazɩ yaa paa ɛtɔkɩ sakɩyɛ yɔ; ñɩm tʋ haɣnaɣ eeyeki-i se eɖoo.”—Verbum Bible.
Pɩtasɩna se liidiye wɛ ɛzɩ ñʋʋdʋ weyi ɛwɛ ñʋʋ taa ɖoŋ yɔ lɛ, ɖɩkɛ peɣziyu ɖɔɖɔ. Yesu Krɩstʋ yɔɔdɩ “ɖoŋ weyi ñɩm wɛna se pipeɣzi ɛyaa yɔ” pɩ-tɔm. (Maarkɩ 4:19) Papɩzɩɣ patasɩ yɔɔdʋʋ ɖɔɖɔ se ñɩm lakɩ ɛyʋ tamaɣ se ehikiɣ koboyaɣ, ɛlɛ pɩɩhaɣ-ɩ kɛ kaaʋ. Pituyuu-ŋ se ŋtasɩ ñɩm sɔɔlʋʋ nɛ pɩkɩlɩ. Pɔyɔɔdɩ Eklesɩyastɩ 5:9 taa se: “Weyi ɛsɔɔlʋʋ liidiye yɔ, ɛɛhakɩ liidiye”—Verbum Bible.
Tobi lɛ, liidiye sɔɔlʋʋ ɖʋzʋʋ kɩɖʋzʋʋ, nɛ weyi ɛñɩnɩɣ-ɖɩ yɔ ɖipeɣziɣ-i, ɖɩkɔŋnɩ-ɩ wɩzasɩ nɛ halɩ ɖɩpɩzɩɣ nɛ ɖɩkɔnɩ sɩm ɖɔɖɔ. (Aduwa 28:20) Mbʋ pɩhaɣ ɛyʋ koboyaɣ nɛ piɖeni-i yɔ lɛ, kʋjɔŋ labʋ, kpaɣʋ nɛ kpeɣu, wezuu kɩbaŋʋ caɣʋ, sɔɔlɩm nɛ fezuu taa ɛyʋtʋ wɛnʋʋ.
Ðɩñɩnɩ fezuu taa ñɩm
(1 Timootee 4:2) pɩtɩŋnɩ ɛyaa mba pɔyɔɔdʋʋ cɛtɩm tɔm yɔ pɛ-tɛ pɩ-tɛɛ nɛ pɩ-yɔɔ lakasɩ yɔɔ, mba pɛ-ɛhʋyɛ sʋ kpɩzɩŋ ɛzɩ pañaɣzɩ-ɖɩ nɛ ñɩɣyʋʋ ŋgʋ paɖʋ-kʋ miŋ taa yɔ.
Ðɩwɛɛnɩ ɛhʋyɛ kɩbanɖɛ Ɛsɔ ɛsɩndaa
17 Apostoloo Pɩyɛɛrɩ mawa se: “Ɩwɛɛnɩ [ɛhʋyɛ] kɩbanɖɛ.” (1 Pɩyɛɛrɩ 3:16) Pɩlabɩ pʋtɔdɩyɛ se mba paaɖɔŋ Yehowa paɣtʋ kila yɔɔ yɔ, pɛ-ɛhʋyɛ ɛɛtasɩɣ-wɛ cɛyʋʋ. Pɔɔlɩ yɔɔdaɣ ɛyaa mba pɔ-tɔm lɛ, ɛtɔm se: “Pama pa-laŋa [yaa pɛ-ɛhʋyɛ] taa mayaɣ nɛ miŋ ñɩɣyʋʋ kɩsɛɛmʋʋ.” (1 Timootee 4:2) Wiɖiyi miŋ tɛmɩ-ŋ ñaɣʋ nɛ pɩpɩ-ŋ nɛ ŋna? Heŋ waɣ lɛ, pɩkazɩɣ tɔndɔlʋʋ nɛ nabʋyʋ etukuni peeɖe yɔ, ŋŋnɩɣ natʋyʋ. Mbʋ ɖɔɖɔ ye ɛyʋ ɛwɛɛ nɛ ewoki pɩ-yɔɔ nɛ ɛlakɩ kɩdɛkɛdɩm yɔ, pɩkɛdɩɣ lɛ, ɛ-ɛhʋyɛ ɛɛtasɩɣ-ɩ cɛyʋʋ.
(1 Timootee 4:13) Wolo pɩ-yɔɔ nɛ ŋka ñʋʋ nɛ tɔm kalʋʋ ɛyaa ɛsɩndaa, nɛ ɛyaa sazʋʋ, nɛ tɔm wɩlʋʋ, pɩkɔɔ pɩtalɩ alɩwaatʋ ndʋ mɔnkɔŋ yɔ.
it-2 122 § 1-2
Tɔm kalʋʋ ɛyaa ɛsɩndaa
Krɩstʋ ɛgbɛyɛ taa. Kajalaɣ pɩnzɩ mɩnʋʋ taa lɛ, ɛyaa pazɩ yem kaawɛnɩnɩ takayɩsɩ kikpiyisi nzɩ sɩ-taa pama Bibl taa tɔm yɔ, nɛ pʋyɔɔ pɩɩcɛyaa se pakalɩɣ sɩ-taa tɔm samaɣ ɛsɩndaa. Apostoloo Pɔɔlɩ seɣti koobiya se pakalɩɣ takayɩsɩ nzɩ ɛma-wɛ yɔ Krɩstʋ agbaa kediɣzisi taa; nɛ halɩ eheyi-wɛ se pɛtɛŋ sɩ-kalʋʋ lɛ, petiyini-si agbaa lɛɛna nɛ pamʋ ɖɔɖɔ nzɩ ɛma agbaa ana yɔ nɛ pakalɩ. (Kol 4:16; 1Te 5:27) Pɔɔlɩ tasɩ lɔŋ evebu Timootee weyi ɛkɛ ɛgbɛyɛ yɔɔ cɔnɩyʋ yɔ se ɛka ñʋʋ nɛ “tɔm kalʋʋ ɛyaa ɛsɩndaa, nɛ ɛyaa sazʋʋ, nɛ tɔm wɩlʋʋ.”—1Ti 4:13.
Pɩwɛɛ se pakalɩ tɔm ɛyaa ɛsɩndaa nɛ pɩ-taa tʋ kpayɩ kpayɩ. (Hab 2:2) Ɛyaa ɛsɩndaa tɔm kalʋʋ kɛ tɔm wɩlʋʋ nɛ pʋyɔɔ lɛ, weyi ɛkalɩɣ tɔm ɛyaa ɛsɩndaa yɔ, pɩwɛɛ se ɛtɩlɩ mbʋ ɛkalɩɣ yɔ camɩyɛ, nɛ ɛtɩlɩ ɖɔɖɔ weyi ɛma-tʋ yɔ ɛ-lɩmaɣza nɛ ɛtɩlɩ ɖɔɖɔ ɛzɩma ɛkalɩ-tʋ camɩyɛ nɛ titaasidi mba pewelisiɣ-tʋ yɔ pa-lɩmaɣza. Pɔyɔɔdɩ Natʋ 1:3 taa se mba pakalɩɣ natʋ tʋnɛ tɩ-taa tɔm nɛ nɔɔ kɩkʋyaɣ, nɛ mba pewelisiɣ tɩ-taa tɔm nɛ pɔɖɔŋ tɩ-yɔɔ yɔ, pɛkɛɣnɩ koboyaɣ tɩnaa.