KPƐLƖKƲƲ 4

Masɩ yɔɔ kɔɔnɔɔ tɔm kɩbandʋ

Maatiyee 22:41-45

LƖMAƔZƖYƐ SƆSƆÐƐ: Ñɔɔzɩ ñɔ-tɔm welisiyaa lɩmaɣza pʋcɔ nɛ ŋkalɩ mayaɣ nakɛyɛ.

ƐZƖMA PƖWƐƐ SE ŊLA YƆ:

Maɣzɩ mbʋ pʋyɔɔ ŋkalɩɣ mayaɣ ŋga yɔ pɩ-yɔɔ. Pʋcɔ nɛ ŋkalɩ paa mayaɣ ŋga lɛ, pɩwɛɛ se ŋyɔɔdɩ tɔm ndʋ tɩhɔŋ ñɔ-tɔm welisiyaa lɩmaɣza nɛ tiwokini lɩmaɣzɩyɛ kɩcɛyɩyɛ nɖɩ ɖɩ-yɔɔ ŋñɩnɩɣ se ŋñɩɣ niye mayaɣ ŋga ka-taa yɔ ɖɩ-yɔɔ.

Maɣzɩ mbʋ pɩcɔ mayaɣ ŋga nɛ pɩta yɔ pɩ-yɔɔ. Ye ŋcaɣ se ŋwɩlɩ weyi ɛyɔɔdɩ mayaɣ nakɛyɛ taa tɔm yaa weyi ɛma Bibl taa takayaɣ nakɛyɛ yɔ, cɔnɩ camɩyɛ nɛ tɔm ndʋ ŋyɔɔdʋʋ yɔ tɩkɛ toovenim.
Yele nɛ tɔm ndʋ ŋyɔɔdʋʋ yɔ tɩlɩɩnɩ Bibl taa. Ye ŋyɔɔdʋʋnɩ mba petisiɣ Ɛsɔ yɔɔ yɔ, hɔ pa-lɩmaɣza nɛ ŋwoni Bibl yɔɔ se kɩkɛ Ɛsɔtɔm; ye ŋlakɩ mbʋ yɔ ŋwɩlɩɣ se kɩ-taa lɔŋsɩnɖɛ lɩnaa.
Yele nɛ ñɔ-tɔm welisiyaa liu tɛɛ kɔtɩnɩ mayaɣ ŋga ŋcaɣ kalʋʋ yɔ. Pɔzɩ tɔm ndʋ tɩ-yɔɔ mayaɣ ŋga kakaɣ cosuu yɔ; ye mayaɣ ŋga kakaɣ-wɛ sɩnʋʋ se pana ɛzɩma papɩzɩɣ nɛ pɔcɔnɩ kaɖɛ naɖɩyɛ ɖeɖe yɔ, yɔɔdɩ kaɖɛ nɖɩ ɖɩ-tɔm nɛ pʋcɔ, yaa ye Masɩ taa kɛdaɣ nakɛyɛ ɛkaɣ-wɛ sɩnʋʋ se panɩɩ paɣtʋ kiɖe naɖɩyɛ taa yɔ, yɔɔdɩ paɣtʋ kiɖe nɖɩ ɖɩ-tɔm nɛ pʋcɔ.

Maɣzɩ mbʋ ñɔ-tɔm welisiyaa tɛm sɩm tɔm ndʋ ŋcaɣ yɔɔdʋʋ nɛ mayaɣ ŋga ŋcaɣ kalʋʋ yɔ pɔ-yɔɔ yɔ. Mayaɣ ŋga ŋcaɣ kalʋʋ yɔ paa ñɔ-tɔm welisiyaa ɩsɩm-kɛ camɩyɛ yɔ, yɔɔdɩ tɔm ndʋ tiyeki se pe-liu tɛɛ ɛkɔtɩ yɔ; nɛ ŋsɩnɩ-wɛ nɛ paɖaɣnɩ lɩʋ tɔm kɩfatʋ natʋyʋ yɔɔ mayaɣ ŋga ka-taa.