KPƐLƖKƲƲ 11

Yɔɔdɩ tɔm nɛ kpekpeka

Roma mba 12:11

LƖMAƔZƖYƐ SƆSƆÐƐ: Yɔɔdɩnɩ kpekpeka nɛ pɩsa nɛ ŋsazɩ ñɔ-tɔm welisiyaa nɛ ŋseɣti-wɛ.

Yele nɛ tɔm ndʋ ŋcaɣ yɔɔdʋʋ yɔ titukuni ña-laŋɩyɛ. Ŋŋñɔɔzʋʋ ña-tɩ se ŋyɔɔdɩ ñɔ-tɔm lɛ, maɣzɩ ɛzɩma tɔm ndʋ ŋkaɣ yɔɔdʋʋ yɔ tɩ-tɔm cɛyaa yɔ pɩ-yɔɔ siŋŋ. Ñaɣ pana nɛ ŋtɩlɩ tɔm ndʋ ŋkaɣ yɔɔdʋʋ yɔ camɩyɛ nɛ ŋpɩzɩ ŋyɔɔdɩnɩ ña-laŋɩyɛ.
Maɣzɩ ñɔ-tɔm welisiyaa yɔɔ. Maɣzɩ ɛzɩma tɔm ndʋ ŋkaɣ kalʋʋ yaa ndʋ ŋkaɣ yɔɔdʋʋ yɔ tɩkaɣ wazʋʋ lalaa yɔ pɩ-yɔɔ. Maɣzɩ nʋmɔŋ weyi ɩ-yɔɔ ŋpɩzɩɣ nɛ ŋtɩŋna nɛ ŋyɔɔdɩ tɔm ndʋ nɛ tɩpɩzɩ nɛ tɩkɛdɩnɩ ñɔ-tɔm welisiyaa nɛ pɩkɩlɩ yɔ.
Yɔɔdɩ ñɔ-tɔm nɛ kpekpeka. Yɔɔdɩnɩ kpekpeka. Labɩnɩ ño-tomnaɣ pilinzi nɛ ñɛ-ɛsɩndaa wɛtʋ tʋmɩyɛ nɛ ŋwɩlɩ lɩmaɣza wena ŋwɛna yɔ, ɛlɛ taaɖɛlɛsɩ niye.

Kpa ña-tɩ nɛ ŋtaawɛɛ ŋlakɩnɩ ño-tomnaɣ piliŋa nakɛyɛ tʋmɩyɛ alɩwaatʋ tɩŋa nɛ pɩkɛzɩ ñɔ-tɔm welisiyaa lɩmaɣza. Yele nɛ ɛzɩma ŋlakɩnɩ ño-tomnaɣ pilinzi tʋmɩyɛ yɔ pɩwɛɛnɩ tɔbʋʋ nɩʋ. Yɔɔdɩnɩ kpekpeka kɔzɩ kɔzɩ alɩwaatʋ ndʋ ŋyɔɔdʋʋ lɩmaɣza sɔsɔna tɔm nɛ alɩwaatʋ ndʋ ŋseɣtiɣ ñɔ-tɔm welisiyaa se pɔɖɔ tɔm ndʋ ŋyɔɔdʋʋ yɔ tɩ-yɔɔ yɔ. Taakɩlɩ yɔɔdʋʋ nɛ kpekpeka ñɔ-tɔm yɔɔdʋʋ tɩŋa taa nɛ ŋyele nɛ pɩnɩɩ ñɔ-tɔm welisiyaa.