Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
1er-7 MARS
ÑƖM MBƲ PƖWƐ ƐSƆTƆM TAA YƆ | KƖGALƲƲ 7-8
“Lɔŋ weyi Izrayɛɛlɩ mba maalika kpɛlɩkɩɣ-ɖʋ?”
it-1 508 § 5
Ɛgbɛyɛ
Izrayɛɛlɩ ɛjaɖɛ taa lɛ, ɖoŋ ɖoŋ lɛ, palɩzaɣ mba pamʋnaa yɔ se pɛɖɛɛ nɔɔ nɛ pala tʋmɩyɛ samaɣ hɩɖɛ taa. (Ɛsd 10:14) Pʋyɔɔ lɛ, alɩwaatʋ ndʋ pesiɣ Ɛsɔ sɛtʋ kɩɖanɖʋʋ nɛ pɩtɛ yɔ, “cejewe ñʋndɩnaa” laɣaɣ kɩlaŋ. (Kɩg 7:1-11) Mbʋ ɖɔɖɔ Nehemiya alɩwaatʋ taa, cɔjɔnaa, Leevi mba nɛ ‘samaɣ awiya’ kaañɩɣnɩ niye “ɛgbɛyɛ ɖʋʋ” takayaɣ taa samaɣ hɩɖɛ taa. (Neh 10:1–28) Alɩwaatʋ ndʋ Izrayɛɛlɩ mba kaawɛ kañɩmbusuu taa yɔ, paalɩzɩ “cejewiye taa sɔsaa, mba payaɣ-wɛ se pʋyʋ kediɣzaɣ taa yɔ.” Nɛ pa-taa ɛyaa 250 kaakpɛndɩnɩ Kora, Dataanɩ, Abiram nɛ Oni pɔ-yɔɔ nɛ pakaɖɩnɩ Moyizi nɛ Aarɔɔnɩ. (Kɩg 16:1-3) Pɩtasɩ lɛ, Moyizi ɖɔm Ɛsɔ paɣtʋ yɔɔ nɛ ɛlɩzɩ Izrayɛɛlɩ ɛzʋtʋyaa taa ɛyaa 70 se pɔcɔnɩ tʋma yɔɔ nɛ pasɩnɩ-ɩ sɩɣlʋʋ “samaɣ sʋʋtʋ” ndʋ ɛtaapɩzɩɣ se ɛsɩɣlɩ e-yeke yɔ. (Kɩg 11:16, 17, 24, 25) Levitiki 4:15 yɔɔdʋʋ ‘samaɣ taa sɔsaa’ tɔm, nɛ pɩwɛ ɛzɩ samaɣ taa ɛzʋtʋyaa, ka-ñʋndɩnaa, kɔ-tɔm hʋyaa nɛ ka-tʋma yɔɔ cɔnɩyaa kaakɛnɩnɩ ko-lone taa caɣyaa yɔ.—Kɩg 1:4, 16; Yoz 23:2; 24:1.
it-2 835 § 9
Rubɛɛnɩ
Izrayɛɛlɩ maalika taa lɛ, Rubɛɛnɩ cejewiye taa mba kaawɛ Ɛsɔ sɛtʋ kɩɖanɖʋʋ hadɛ kiŋ, Siimeyɔɔ nɛ Gaadɩ cejewe taa mba kaawɛ pa-hʋyʋʋ taa. Alɩwaatʋ ndʋ pakʋyʋʋ se pɛlɛɣzɩ lone yɔ, Rubɛɛnɩ cejewe ɖɛɣnɩ nɔɔ cejewe ana a-naadozo, nɛ cejewe naadozo lɛɛna tɩŋɩɣ a-wayɩ, ana lɛ Yuuda, Isakaarɩ nɛ Zebulɔɔnɩ. (Kɩg 2:10-16; 10:14-20) Mbʋ cejewe ana aatɩŋ ɖama wayɩ nɛ alaa a-kɩlaŋ kɩyakʋ ŋgʋ patʋlɩ Ɛsɔ sɛtʋ kɩɖanɖʋʋ nɔnɔsɩ yɔ.—Kɩg 7:1, 2, 10-47.
w04 1/8 25 § 1
Kɩgalʋʋ takayaɣ taa lɩmaɣza sɔsɔna
8:25, 26. Pɩsa nɛ Leevi mba la tʋma wena paɖʋʋ-wɛ yɔ camɩyɛ, nɛ pawɩlɩ ɖɔɖɔ se pañaŋ mba pakpadɩyaa yɔ lɛ, paaɖʋ pɩnzɩ nasɩyɩ; nɛ mba pɛcɛzɩ-sɩ yɔ, pɩtɩtasɩ cɛyʋʋ se pala tʋma naayɛ. Ɛlɛ papɩzaɣ se paha pa-tɩ faaa nɛ paɖʋ nesi Leevi mba lalaa. Sɔnɔ paa ɖɩɩmʋʋ hɛzʋʋ Kewiyaɣ tɔm susuu taa yɔ, Bibl paɣtʋ kiɖe ɖɩnɛ ɖɩkpɛlɩkɩɣ-ɖʋ lɔŋ nɩɩyɩ. Ye Krɩstʋ tʋ nɔɔyʋ pɩnzɩ yɔɔ lɛ, ɛɛpɩzɩɣ se ɛla tʋma naayɛ yɔ, ɛpɩzɩɣ nɛ ɛla tʋma lɛɛna wena e-ɖoŋ haɣ-ɩ nʋmɔʋ se ɛla yɔ.
Fezuu taa ñɩm
it-2 637 § 5
Kajalaɣ pɩɣa
Izrayɛɛlɩ mba kajalaɣ abalɩbiya kaawɛnɩnɩ waɖɛ se sɩpɩsɩ hɔŋ ñʋndɩnaa, pʋyɔɔ lɛ nzɩ cakaɣnɩ samaɣ kpeekpe lone taa. Halɩ Yehowa ya samaɣ kpeekpe se ‘ɛ-pɩyalʋ kɔɔnɔɔ tʋ,’ mbʋ pʋyɔɔ yɔ, ŋga kɛnɩnɩ ɛ-kajalaɣ samaɣ pɩtɩŋnɩ ɛgbɛyɛ nɖɩ ɛ nɛ Abraham paɖʋwa yɔ ɖɩ-yɔɔ. (Ejl 4:22) Yehowa yabɩ pe-weziŋ nɛ pʋyɔɔ lɛ, ɛɖʋ paɣtʋ se “paa kɔɔnɔɔ pɩɣa ŋga palʋlʋʋ Izrayɛɛlɩ piya taa yɔ, ɛyaa taa nɛ kpɩna taa” yɔ, kapɩsɩɣ ɛ-pʋyʋ. (Ejl 13:2) Pʋyɔɔ pakpakaɣ kajalaɣ abalɩbiya nɛ pahaɣ Ɛsɔ.
8-14 MARS
ÑƖM MBƲ PƖWƐ ƐSƆTƆM TAA YƆ | KƖGALƲƲ 9-10
“Ɛzɩma Yehowa ɖiyiɣ ɛ-samaɣ yɔ”
it-1 386 § 5
Maalika
Ɛzɩma samaɣ sɔsɔɔ ŋga kakʋyaɣnɩ lone naɖɩyɛ taa nɛ kowoki lone lɛɛɖɛ taa yɔ (Kɩgalʋʋ 33 taa Moyizi kalɩ maalikasɩ ɛzɩ 40 mbʋ yɔ) pɩwɩlaɣ se kalakaɣ ɖʋtʋ camɩyɛ. Alɩwaatʋ ndʋ mɩndʋ wɛɣ Ɛsɔ sɛtʋ kɩɖanɖʋʋ ñʋʋ taa yɔ, samaɣ wɛɣ ke-ɖeɖe. Alɩwaatʋ ndʋ mɩndʋ kʋyʋʋ yɔ samaɣ kʋyʋʋ ɖɔɖɔ. Ye “[Yehowa] ɛɖʋ-wɛ paɣtʋ se pakʋyɩ pɛɖɛɛ lɛ, pakʋyɩ pɛɖɛɛ, nɛ ɛɖʋ-wɛ paɣtʋ se pasɩŋ lɛ, pasɩŋ.” (Kɩg 9:15-23) Ñɩɣlɩm ɖɔfɩɩ aganda naalɛ yɔɔ patɩŋaɣnaɣ nɛ peheyiɣ samaɣ se Yehowa sɔɔlaa se kakʋyɩ yaa kataakʋyɩ. (Kɩg 10:2, 5, 6) Ɛzɩma pahʋlaɣ aganda yɔ, pɩsɩɣaɣnaɣ samaɣ se kana se pɩwɛɛ se kakʋyɩ yaa kataakʋyɩ. Pahʋlɩ kajalaɣ aganda ana “pɩnaɣ naalɛ ñɩŋga taa [1512 P.P.Y], fenaɣ naalɛ ñɩŋga nɛ kɩyakʋ nɛɛlɛ ñɩŋgʋ wiye.” Pakʋyʋʋ lɛ, Ɛgbɛyɛ ɖʋʋ aɖakaɣ wɛɣ ɛsɩndaa. Yuuda, Isakaarɩ nɛ Zebulɔɔnɩ cejewe wɛɣ ka-wayɩ. Nɛ paba wayɩ lɛ, Gɛrɩsɔɔnɩ mba nɛ Merarii mba sɩɣlɩɣ Ɛsɔ sɛtʋ kɩɖanɖʋʋ tɛɛ wondu nɛ patɩŋ pa-wayɩ. Cejewe naadozo tɩŋɩɣ paba wayɩ; ana lɛ, Rubɛɛnɩ, Siimeyɔɔ nɛ Gaadɩ, nɛ Rubɛɛnɩ ɖɛɣnɩ-yɛ nɔɔ. Kehaatɩ mba sɩɣlɩɣ kediɣzaɣ kizinziku nɛ patɩŋ pa-wayɩ. Paba wayɩ lɛ, cejewe naadozo pʋ-tɔbʋʋ se Efrayim, Manaasee nɛ Bɛnjamɛɛ patɩŋɩɣna. Daanɩ nɛ Asɛɛrɩ nɛ Naftalii cejewe wɛɣnɩ ɖooo wayɩ. Ye mbʋ, cejewe naalɛ wena akpaɖɩ ɖɔʋ nɛ akpaɖɩ ɖoŋ yɔ, a-taa kʋɖʋmɖɩyɛ wɛɣnɩ ɛsɩndaa nɛ lɛɛɖɛ ñɛwɛɛ wayɩ.—Kɩg 10:11-28.
w11 15/4 4-5
Ŋwɛɛ ŋnaɣ mbʋ pɩwɩlɩɣ se Ɛsɔ wɛɛ nɛ eɖiyiɣ-ɖʋ yɔ?
Ɛbɛ pɩwɛɛ se ɖɩla nɛ ɖɩwɩlɩ ɖɛ-ɛsɩmɩyɛ Ɛsɔ ɛzɩma eɖiyiɣ-ɖʋ yɔ pɩ-yɔɔ? Apostoloo pɔɔlɩ yɔɔdaa se: “Ɩña mba pɛɖɛɣ nɔɔ mɩ-hɛkʋ taa yɔ nɛ iluzi mɩ-tɩ pɛ-tɛɛ.” (Ebr 13:17) Nabʋyʋ taa, pɩwɛ kaɖɛ se ɖɩɖɔ lɔŋ taasʋʋ pʋnɛ pɩ-yɔɔ. Kɩɖaʋ nakʋyʋ yɔ: Kpaɣ se ŋkɛ Izrayɛɛlɩ tʋ Moyizi alɩwaatʋ taa. Ɩwɛɛ nɛ ɩɖɔŋ nɛ pɩtalɩ alɩwaatʋ natʋyʋ lɛ mɩndʋ tilimiye sɩŋ. Alɩwaatʋ ɛzɩma mɩndʋ ndʋ tɩkaɣ sɩŋʋʋ? Evemiye na? kpɩtaʋ na? fenasɩ na? Ŋwɛɛ nɛ ŋhʋʋ ña-ñʋʋ taa se: ‘Ɛzɩ pɩcɛyaa se malɩzɩ mo-wondu kpeekpe yaa mantaalɩzɩ?’ Pɩtɩla ŋcalɩɣ lɩzʋʋ wondu ndʋ pɩpɔzʋʋ yɔ ti-ɖeke. Ɛlɛ pɩlaba avema naayɛ nɛ pɩnɩ-ŋ nɛ wondu ñɩnʋʋ lɛ, ŋpaɣzɩ ño-wondu kpeekpe lɩzʋʋ. Ɛlɛ ŋñɩtaa nɛ ŋtɛ ño-wondu tɩŋa lɩzʋʋ ca lɛ, ŋnaɣ se mɩndʋ paɣzɩ kʋyʋʋ nɛ pɩwɛɛ se ŋtasɩ paɣzʋʋ ño-wondu kpeɣluu. Pɩtʋʋ fɛyɩ se pɩɩwɛɣ-ŋ kɛlɛʋ. Paa mbʋ yɔ, pɩɩwɛɛ se ‘Izrayɛɛlɩ piya ɩkʋyɩ nɛ sɩɖɛɛ.’—Kɩg 9:17-22.
Ɛzɩma ɖɩlakɩ alɩwaatʋ ndʋ patasɩɣ lɔŋ weyi ɩlɩnɩ Ɛsɔtɔm taa yɔ? Ðɩñakɩ pana nɛ ɖɩɖɔŋ ɩ-yɔɔ “kpaagbaa”? Yaa ɖiwoki pʋyɔɔ nɛ ɖɩlakɩ ɛzɩ ɖɩtɩɩlakʋʋ yɔ? Patasɩɣ-ɖʋ lɔŋ ɛzɩma ɖɩkpɛlɩkɩnɩ ɛyaa Bibl pa-ɖɩsɩ taa, ɛzɩma ɖisusuu tɔm kʋnʋmɩŋ kɩfaŋ taa, ɛzɩma pɩwɛɛ se ɖɩlakɩ hɔʋ taa Ɛsɔ sɛtʋ ɖoŋ ɖoŋ, ɛzɩma pɩwɛɛ se ɖɩɖʋ nesi Ðama nɩnʋʋ nɛ ɖɔkɔtɔnaa kɔɔmiite nɛ wɛtʋ kɩbandʋ ndʋ pɩwɛɛ se ɖɩwɛɛnɩ Kigbeɣliŋ taa yɔ. Ɛzɩ ɖɩlakɩnɩ tʋmɩyɛ lɔŋ kɩfaŋ ɛnɩ? Ðɩwɩlɩɣ se ɖɩwɛnɩ ɛsɩmɩyɛ ɖɔɖɔ se Ɛsɔ wɛɛ nɛ eɖiyiɣ-ɖʋ, ye ɖitisiɣ nɛ ɖɩmʋʋ lɔŋ tasʋʋ yɔ. Alɩwaatʋ ndʋ pɩpɔzʋʋ se ɖɩkpaɣ lɩmaɣza sɔsɔna naayɛ yɔ, ɖɩɩtaɣ ɖa-maɣmaɣ ɖɔ-lɔŋ liu, ɛlɛ ɖɩñɩnɩɣ lɔŋ tasʋʋ Yehowa nɛ ɛ-ɛgbɛyɛ pɔ-cɔlɔ. Nɛ ɛzɩ pɩɣa ñɩnʋʋ se ka-lʋlɩyaa ɛkandɩyɩɣ kɔ-yɔɔ alɩwaatʋ ndʋ tɛʋ sɔsɔʋ nakʋyʋ nɩɣ yɔ, mbʋ ɖɔɖɔ ɖɩñɩnɩɣ se Yehowa ɛgbɛyɛ ɛkandɩyɩ ɖɔ-yɔɔ alɩwaatʋ ndʋ ɛjaɖɛ yɔɔ kʋñɔmɩŋ kɔŋ ɖɔ-yɔɔ ɛzɩ tɛʋ sɔsɔʋ nakʋyʋ yɔ.
Fezuu taa ñɩm
it-1 207 § 7
Kigbeɣliŋ
Kigbeɣliŋ wazaɣ. Ɛzɩma palakaɣ Paska kazandʋ yɔ, pɩwɩlɩɣ se pɩcɛyaa se ɖɩñakɩ pana nɛ ɖikpeɣliɣ nɛ ɖɩtɔkɩ fezuu taa tɔɔnasɩ nzɩ Yehowa haɣ-ɖʋ yɔ. Ye abalʋ nɔɔyʋ ɛwɛ kele kele nɛ etiwolo ɖoli Paska wiye, ɛlɛ ɛtɩla Paska kazandʋ yɔ, pɩwɛɛ se pakʋ-ɩ. (Kɩg 9:9-14) Alɩwaatʋ ndʋ wiyaʋ Ezekiyaasɩ ya Yuuda nɛ Izrayɛɛlɩ ɛjaɖɛ taa mba se pɔkɔɔ Yeruzalɛm nɛ pala Paska kazandʋ yɔ, ɛyɔɔdɩ tɔm tʋnɛ se: “Izrayɛɛlɩ, ɩpɩsɩ ɩkɔɔ [Yehowa] . . . cɔlɔ. . . ɩtaala laŋkpɩzɩyɛ ɛzɩ mɩ-caanaa yɔ. Ɩha nesi [Yehowa] nɛ ɩkɔɔ e-kooka taa, ŋga ɛpɩsɩ-kɛ kiɖeɖeɣa tam yɔ; ɩɖʋ lɩm [Yehowa] mɩ-Ɛsɔ nɛ ɛ-pana miŋ ɛtaatɔlɩ mɩ-yɔɔ. . . [Yehowa] mɩ-Ɛsɔ kɛ pʋtɔdɩyɛ naʋ nɛ laŋɩyɛ kɩbanɖɛ tʋ, nɛ ɛɛkaɣ-mɩ siɣye haʋ, ye ɩpɩsɩ ɛ-cɔlɔ yɔ.” (4Aw 30:6-9) Ye Izrayɛɛlɩ pɩɣa nakɛyɛ ɛɖʋ ka-taa faŋŋ nɛ katiwolo Paska kazandʋ taa yɔ, pɩwɩlɩɣ kpayɩ kpayɩ se kekizi Ɛsɔ. Pɩkɛ toovenim se Krɩstʋ mba ɩɩtɔkɩ Paska nɛ kazandʋ lɛɛtʋ ndʋ Izrayɛɛlɩ mba lakaɣ yɔ. Paa mbʋ yɔ, Pɔɔlɩ heyi-wɛ se pataayeki ɖama kpeɣluu alɩwaatʋ ndʋ ɛyɔɔdaa se: “Iyele nɛ ɖɩmaɣzɩ ɖama yɔɔ nɛ pɩsa nɛ ɖiseɣti ɖama se ɖɩwɩlɩ sɔɔlɩm nɛ ɖɩla tʋma kɩbana, ɖitaayeki ɖama kpeɣluu ɛzɩ nabɛyɛ lakʋʋ yɔ, ɛlɛ ɖɩkpazɩɣ ɖama ɖoŋ, nɛ ɖɩla mbʋ nɛ pɩkɩlɩ, ɛzɩma ɩnaɣ se kɩyakʋ ɖiɣni ñɔtʋʋ yɔ.”—Ebr 10:24, 25; kalɩ CONGRÉGATION.
15-21 MARS
ÑƖM MBƲ PƖWƐ ƐSƆTƆM TAA YƆ | KƖGALƲƲ 11–12
“Ɛbɛ yɔɔ pɩwɛɛ se ɖikizi miduu?”
w01 15/6 17 § 20
Ɩtaakɛ mba pewelisiɣ nɛ pɔsɔʋ yɔ
20 Krɩstʋ mba sakɩyɛ ɩɩtɔlʋʋ kʋzʋʋ kɩdɛkɛdʋʋ wezuu caɣʋ kpaca taa. Ɛlɛ pɩwɛɛ se ɖɩkpa ɖa-tɩ nɛ ɖɩtaaha nʋmɔʋ lakasɩ nzɩ sɩpɩzɩɣ nɛ siyele nɛ ɖimidiɣ ɖe-liŋ tɛɛ yɔ. Mbʋ pʋyɔɔ yɔ siyeki nɛ ɖɩyʋsɩnɩ Yehowa. Pɔɔlɩ paɣ-ɖʋ se: “Ðɩtaatakɩ ɖɔɖɔ Yehowa, ɛzɩ pa-taa nabɛyɛ takʋʋ-ɩ, nɛ ɖʋmaa ñasɩ-wɛ nɛ pasɩ yɔ. Itaamidi mɩ-mɔɔŋ tɛɛ ɖɔɖɔ, ɛzɩ pa-taa nabɛyɛ miduu pɔ-mɔɔŋ tɛɛ, nɛ ɖɩzɩyʋ kʋ-wɛ yɔ.” (1 Kɔrɛntɩ mba 10:9, 10) Izrayɛɛlɩ mba midi pe-liŋ tɛɛ Moyizi nɛ Aarɔɔnɩ pɔ-yɔɔ.—Toovenim taa lɛ, Ɛsɔ maɣmaɣ pemidinaa—Pemidaɣ Maana ŋgʋ Ɛsɔ labɩ piti lakasɩ nɛ ɛha-wɛ yɔ, kɩ-yɔɔ. (Kɩg 16:41; 21:5) Ɛzɩ Izrayɛɛlɩ piya miduu pe-liŋ tɛɛ yɔ, pɩtɩwɩzɩ Yehowa nɛ pɩtalɩ kʋzʋʋ kɩdɛkɛdʋʋ wezuu ŋgʋ paacaɣaa yɔ? Bibl wɩlɩɣ se mba pemidaɣ yɔ, ɖʋmaa kʋ pa-taa sakɩyɛ. (Kɩg 21:6) Pʋcɔ nɛ pɩtalɩɣ mbʋ lɛ, ɛyaa 14 700 sɩba mbʋ pʋyɔɔ yɔ, pemidaɣ pe-liŋ tɛɛ. (Kɩg 16:49) Pʋyɔɔ lɛ, paa Yehowa ɛwɛ suuɖu yɔ, ɖitaaniŋ mbʋ ɛhaɣ-ɖʋ yɔ nɛ ɖɩɖʋ-ɩ ɖɩwɩzɩyɛ.
w06 15/7 15 § 7
Ɩkpa mɩ-tɩ nɛ miduu
7 Izrayɛɛlɩ mba wɛtʋ lɛɣzɩ kpem! Kiɖe tɛɛ lɛ, Izrayɛɛlɩ mba na ɛzɩma Yehowa lɩzɩ-wɛ Ejipiti nɛ ɛya pa-ñʋʋ Teŋgu kɩsɛɛmʋʋ taa yɔ lɛ, piiseɣti-wɛ nɛ petee-i samtʋ hendu. (Ejipiti Lɩʋ 15:1-21) Pɔkɔm nɛ pakatɩ kala kañɩmbusuu taa nɛ sɔɔndʋ kpa-wɛ nɛ Kanaŋ mba lɛ, pelesi ɛsɩmɩyɛ nɖɩ paawɛnɩ Ɛsɔ yɔɔ yɔ, nɛ pa-taa paɣzɩ wɩʋ. Mbʋ ɛzɩ paasɛ Yehowa ɛzɩma ɛlɩzɩ-wɛ yomiye taa yɔ pɩ-yɔɔ lɛ, pa-taa kaawɩnɩ Yehowa mbʋ pʋyɔɔ yɔ, pamaɣzaɣ se ɛɛhaɣ-wɛ mbʋ pɔsɔɔlaa yɔ. Miduu kɛ lakasɩ nzɩ sɩwɩlɩɣ se ɖɩfɛyɩnɩ ɛsɩmɩyɛ mbʋ Yehowa haɣ-ɖʋ yɔ pɩ-yɔɔ yɔ. Pʋyɔɔ Yehowa yɔɔdaa se: “Samaɣ kɩdɛkɛdaɣ kanɛ kɛwɛɣ nɛ kemidiɣ kɔ-mɔɔŋ tɛɛ nɛ-m nɛ pɩkɔɔ pɩsɩɩnɩ ɖooye?”—Kɩgalʋʋ 14:27; 21:5.
it-2 715 §1
Tɔm caʋ
Miduu. Miduu ɛɛkpazɩɣ ɛyʋ ɖoŋ, ɛlɛ piyeki nɛ pitiki ɛyʋ yɔɔɔ. Izrayɛɛlɩ mba lɩnɩ Ejipiti nɛ pitileɖi lɛ, papaɣzɩ miduu mbʋ pʋyɔɔ yɔ, Yehowa tɩŋɩɣnɩ Moyizi nɛ Aarɔɔnɩ pɔ-yɔɔ nɛ eɖiyiɣ-wɛ. (Ejl 16:2, 7) Pitileɖi lɛ, ɛzɩma pemidaɣ yɔ, piyeba nɛ pitii Moyizi yɔɔɔ nɛ ɛñɩnɩɣ se ɛsɩ. (Kɩg 11:13-15) Weyi emidiɣ e-liu tɛɛ yɔ, ɛpɩzɩɣ elesi e-wezuu. Mba pemidaɣni Moyizi nɛ Aarɔɔnɩ yɔ, Yehowa yɔɔdaa se ɛ-maɣmaɣ pemidaɣnaɣ. (Kɩg 14:26-30) Sakɩyɛ lesi pe-weziŋ mbʋ pʋyɔɔ yɔ, pemidi pe-liu tɛɛ.
Fezuu taa ñɩm
it-2 207 §3
Maana
Mbʋ kɩkɛwa yɔ. Ye ŋna-kʋ ɛsa yɔɔ yɔ, kɩwɛ ɛzɩ ɖɩyalɩm yɔ; pɩhʋlʋmaa, pɩwɛ ɛzɩ kakayɩsɩ nzɩ peli-sɩ tʋŋ num taa yɔ. Nɛ ye ŋɖɩŋaa yɔ, kɩwɛ leleŋ ɛzɩ kakayɩsɩ nzɩ palabɩnɩ tʋŋ num yɔ yaa nzɩ palabɩnɩ num yɔ. Panaŋɩɣ Maana namɩyɛ yɔɔ yaa pɔsɔkɩ-kʋ nɛ pɩtɛ lɛ, patɩzɩ yaa pɔhɔbɩ-kʋ kpɔnɔ kpou tɛɛ.—Ejl 16:23, 31; Kɩg 11:7, 8.
22-28 MARS
ÑƖM MBƲ PƖWƐ ƐSƆTƆM TAA YƆ | KƖGALƲƲ 13-14
“Ɛzɩma tisuu sɩɣnɩ-ɖʋ se ɖɩwɛɛ abalɩtʋ yɔ”
w06 1/10 16-17 § 5-6
Ɛsɔ sɔɔndʋ seu nɛ tisuu yeba nɛ pɛwɛɛnɩ abalɩtʋ
5 Cɔŋɩyaa naalɛ, Yozuwee nɛ Kalɛɛb ñaaɖaŋaa kpam se pasʋʋ Lidaʋ Tɛtʋ taa. Pɔyɔɔdɩ Kanaŋ mba tɔm se: “Ðɩpɩzɩɣ nɛ ɖɩtɔɔ-wɛ ɛzɩ tɔɔnaɣ yɔ. Po-ɖoŋ kpeekpe lɩ pa-taa; Kɩbaɣlʋ wɛ ɖɔ-cɔlɔ, itaase sɔɔndʋ.” (Kɩgalʋʋ 14:9) Ɛzɩ Yozuwee nɛ Kalɛɛb paaɖɛlɩsɩ niye na? Aayɩ! Pa nɛ Izrayɛɛlɩ samaɣ kpeekpe paana ɛzɩma Yehowa tɩŋnɩ kɩjɩkpɩŋ hiu yɔɔ nɛ ɛɖʋ fɛyɛ Ejipiti ɛjaɖɛ nɛ ɖɩ-ɛsɔnaa yɔ. Pana ɖɔɖɔ ɛzɩma Yehowa ɖɩzɩ Farawɔɔ nɛ ɛ-sɔɔjanaa Teŋgu Kɩsɛɛmʋʋ taa yɔ. (Keɣa 135:15) Pɩwɩlɩɣ kpayɩ kpayɩ se pɩtaapɔzɩ se sɔɔndʋ ɛkpa cɔŋɩyaa hiu nɛ mba patɩnɩ pɔ-yɔɔ yɔ. Pa-lakasɩ nzɩ sɩɖʋ Yehowa ɖɩwɩzɩyɛ nɛ ɛyɔɔdɩ se: “Pɩkɔŋ pɩsɩɩnɩ ɖooye paatisiɣ mɔ-yɔɔ, kawɩlɩsɩ kpeekpe nzɩ mawɩlɩ pɛ-ɛsɩndaa yɔ, sɩ-yɔɔ?”—Kɩgalʋʋ 14:11.
6 Yehowa na mbʋ pɩcɛyaɣ samaɣ yɔ. Eeɖiɣzinaa se samaɣ tisuu tɩpaɣlɩ pʋyɔɔ sɔɔndʋ kpaɣaɣ-kɛ. Toovenim, nɔɔ kʋɖʋmaɣ wɛ tisuu nɛ abalɩtʋ pɛ-hɛkʋ taa. Pʋyɔɔ alɩwaatʋ ndʋ apostoloo Yohanɛɛsɩ yɔɔdaɣ you ŋgʋ Krɩstʋ ɛgbɛyɛ lakɩ yɔ kɩ-tɔm lɛ, ɛtɔm se: “Wabɩtʋ ndʋ tɩwabɩ ɛjaɖɛ yɔ, ndʋ lɛ ɖe-tisuu.” (1 Yohanɛɛsɩ 5:4) Sɔnɔ, mba pɛwɛnɩ tisuu ɛzɩ Yozuwee nɛ Kalɛɛb yɔ, pɛwɛɛ nɛ paɖʋʋ nesi Kewiyaɣ tɔm susuu tʋmɩyɛ ɛjaɖɛ kpeekpe yɔɔ. Pɛkɛ Yehowa Aseɣɖe Tɩnaa mba pɛcɛzɩ miiliyɔɔwaa loɖo yɔ, nɛ evebiya nɛ pɛlaa, akpadɩyaa, mba pɛwɛ ɖoŋ yɔ nɛ ajamaa wɛ pa-taa. Koyindu nɔɔyʋ tɩpɩzɩ nɛ ɛsɩnzɩ tʋmɩyɛ nɖɩ ɛyaa panɛ palakɩnɩ abalɩtʋ yɔ.—Roma mba 8:31.
Fezuu taa ñɩm
it-1 740 §1
Tɛtʋ ndʋ Ɛsɔ cɛlɩ Izrayɛɛlɩ yɔ
TƐTƲ ndʋ Ɛsɔ cɛlɩ Izrayɛɛlɩ mba yɔ, tɩɩkɛ tɛtʋ kɩbandʋ. Moyizi tiyi cɔŋɩyaa se powolo nɛ pana Lidaʋ Tɛtʋ nɛ pɛkpɛndɩnɩ peeɖe tɩŋ pee naayɛ nɛ pɔkɔna. Cɔŋɩyaa kɔŋaɣ lɛ, pɛkpɛndɩnɩ fiigi nɛ girenaadɩ pee naayɛ nɛ viiñi piliŋa nakɛyɛ nɛ pɔkɔna. Viiñi piliŋa kaapaɣlɩ kpem, pʋyɔɔ ɛyaa naalɛ kaahɔɔlɩ-kɛ pa-hazasɩ yɔɔ. Paa sɔɔndʋ kaakpa-wɛ mbʋ pʋyɔɔ yɔ pe-tisuu tɩpaɣlɩ yɔ, pɔyɔɔdɩ mbʋ pana peeɖe yɔ, pɩ-tɔm se: “Ðiwobi tɛtʋ ndʋ ŋtiyi-ɖʋ yɔ tɩ-taa, nɛ ɖɩna se tɩtɩm taa naalɩm nɛ tɩŋ num pekpeŋ yem cɔɔɔ.”—Kɩg 13:23, 27.
29 MARS-4 AVRIL
ÑƖM MBƲ PƖWƐ ƐSƆTƆM TAA YƆ | KƖGALƲƲ 15-16
“Kpa ña-tɩ nɛ agʋnda nɛ ɛzɩma ɛyʋ taɣ ɛ-tɩ liu kadadayaɣ yɔ”
w11 15/9 27 § 12
Ɛzɩ Yehowa sɩmɩ-ŋ?
12 Izrayɛɛlɩ samaɣ wɛ nʋmɔʋ taa nɛ kowoki Lidaʋ Tɛtʋ taa lɛ, Kora yɔɔdɩ se nabʋyʋ ɛɛɖɔŋ camɩyɛ ɛzɩ pɩpɔzʋʋ yɔ. Ɛmaɣzaɣ se paaɖiyiɣ samaɣ camɩyɛ. Ñʋndɩnaa 250 lalaa tɩnɩ ɛ-yɔɔ nɛ pañɩnɩ se pala lɛɣzɩtʋ natʋyʋ. Kora nɛ ɛ-wayɩ tɩŋɩyaa pamaɣzaɣ se nabʋyʋ ɛɛpɩzɩɣ nɛ pɩtalɩ-wɛ mbʋ pʋyɔɔ yɔ, taabalɩyɛ kaawɛ pa nɛ Yehowa pɛ-hɛkʋ taa. Peheyi Moyizi se: “Ɩkɩlɩɣ tadɩyʋʋ, mbʋ pʋyɔɔ yɔ cejewiye kpeekpe kɛ ɛyaa kiɖeɖema cejewiye, nɛ [Yehowa] wɛ pɛ-hɛkʋ taa.” (Kɩg 16:1-3) Pata pa-tɩ liu kadadayaɣ nɛ pakpazɩ pa-tɩ. “[Yehowa] kaɣ labʋ nɛ peɖiɣzina ɛtɩnɩ weyi yɔ” (Kalɩ Kɩgalʋʋ 16:5.) Tɛʋ fema lɛ, Kora nɛ mba pa-tɩŋa payɩ patɩnɩ ɛ-yɔɔ yɔ pasɩ.—Kɩg. 16:31-35.
w11 15/9 27 § 11
Ɛzɩ Yehowa sɩmɩ-ŋ?
11 Moyizi kaawɛnɩ ñamtʋ siŋŋ Yehowa ɖʋtʋ nɛ ɛ-lɩmaɣza pɔ-yɔɔ. Kora ñataawɛɛnɩ ñamtʋ ndʋ. Pʋyɔɔ, lɩmaɣza wena Yehowa kaawɛnɩ Moyizi yɔɔ yɔ, aawɛ ndɩ kpem nɛ wena ɛɛwɛnɩ Kora yɔɔ yɔ. Kora kɛ Leevi tʋ, Kehaatɩ tʋ, nɛ ɛɛwɛnɩ wala sakɩyɛ. Wala ana, a-taa naayɛ yɔ: Ɛna alɩwaatʋ ndʋ tɩ-taa Yehowa yabɩ ɛ-samaɣ ñʋʋ Teŋgu Kɩsɛɛmʋʋ taa yɔ. Ɛɛwɛ Yehowa hɔɔlʋʋ yɔɔ, alɩwaatʋ ndʋ ɛlɛ hɔm Izrayɛɛlɩ mba kaañamtʋ tɩnaa nɩŋgbaŋʋʋ Sinayii pʋʋ cɔlɔ yɔ, nɛ ɛɛwɛ mba pasɩɣlaɣ ɛgbɛyɛ ɖʋʋ aɖakaɣ yɔ pa-taa. (Ejl. 32:26-29; Kɩg. 3:30, 31) Pɩtʋʋ fɛyɩ se ɛɛɖɔkɩ e-siɣsiɣ wɛtʋ Yehowa ɛsɩndaa pɩnzɩ sakɩyɛ, nɛ pʋyɔɔ ɛyaa sakɩyɛ kaañaŋaɣ-ɩ.
Fezuu taa ñɩm
w98 1/9 20 § 1-2
Sɩɩ wondu ndʋ tɩ-tɔm cɛyaa yɔ kajalaɣ lone taa!
Tɔm ndʋ, tɩcɛyɩ Yehowa ɛsɩndaa siŋŋ. Bibl yɔɔdaa se pitileɖi lɛ Yehowa heyi Moyizi se: “Ɛyʋ ɛnʋ yɔ, ɛsɩ sɩm.” (Kɩgalʋʋ 15:35) Ɛbɛ yɔɔ Yehowa yɔɔdaa se ɛyʋ ɛnʋ ɛlabɩ kɩwɛɛkɩm sɔsɔm kpem nɛ ɛhʋʋnɩ-ɩ tɔm?
Samaɣ wɛnɩ kɩyakɩŋ loɖo se kañɩnɩɣnɩ ɖasɩ nɛ kalabɩnɩ tɔɔnaɣ, kɔcɔnɩ ka-kɩcɛyɩm ɖeɖe ɛzɩ wondu kususutu nɛ ɖɩzʋyɛ mbʋ yɔ. Pɩɩwɛɛ se kakpaɣ kɩyakʋ lʋbɛ ñɩŋgʋ nɛ kɔcɔnɩ fezuu taa kɩcɛyɩm ɖeɖe. Ðasɩ ñɩnʋʋ tɩkɛ kɩwɛɛkɩm, ɛlɛ pɩfɛyɩ ɖeu se ɛyʋ ɛkpaɣ alɩwaatʋ ndʋ pɩwɛɛ se ɛsɛɛnɩ Yehowa yɔ nɛ ɛñɩnɩɣnɩ ɖasɩ. Paa Krɩstʋ mba ɩfɛyɩ Moyizi paɣtʋ tɛɛ yɔ, tɔm tʋnɛ tɩkpɛlɩkɩɣ-ɖʋ se pɩwɛɛ se ɖɩsɩɩ mbʋ pɩ-tɔm kɩlɩ cɛyʋʋ yɔ pi-lone taa ɖa-alɩwaatʋ tʋnɛ tɩ-taa.—Filiipi mba 1:10.
5-11 AVRIL
ÑƖM MBƲ PƖWƐ ƐSƆTƆM TAA YƆ | KƖGALƲƲ 17-19
“Mɛkɛnɩ . . . ñe-ɖeɖe”
w11 15/9 13 § 9
Ŋwɛɛ nɛ ŋyeki se Yehowa ɛkɛ ñe-ɖeɖe na?
9 Maɣzɩ Leevi mba, mba pataawɛɛnɩ tɛtʋ yɔ pɔ-yɔɔ nɛ ŋna. Paa kele kele Ɛsɔ sɛtʋ kaakɛ mbʋ pɩ-tɔm kɩlɩ cɛyʋʋ Leevi mba ɛsɩndaa yɔ, pɩɩwɛ se pataa liu Yehowa weyi eheyi-wɛ se: “Mɛkɛnɩ ña-ñɩm” yɔ se ɛcɔŋnɩ pa-kɩcɛyɩm ɖeɖe. (Kɩg 18:20) Mbʋ ɖɔɖɔ paa ɖɩfɛyɩ Ɛsɔ tɛ templo taa ɛzɩ Leevi mba nɛ cɔjɔnaa yɔ, ɖɩpɩzɩɣ nɛ ɖɩmaɣzɩnɩ-wɛ nɛ ɖa-taa tɛ se Yehowa kaɣ cɔnʋʋ ɖa-kɩcɛyɩm ɖeɖe. Ðɩwɛɛ nɛ ɖɩñɔtʋʋnɩ ɛjaɖɛ tɛm; pʋyɔɔ lɛ, pɩwɛɛ se ɖiyele nɛ lidaʋ ŋgʋ ɖɩwɛnɩ Yehowa yɔɔ se ɛcɔŋnɩ ɖɔ-yɔɔ yɔ, kɩkpa ɖoŋ nɛ pɩkɩlɩ.—Natʋ 13:17.
w11 15/9 7 § 4
Yehowa kɛ ma-ñɩm
4 Pɔtɔm se Yehowa kɛ Leevi mba ñɩm yɔ, pʋ-tɔbʋʋ lɛ suwe? Leevi mba taawɛɛnɩ tɛtʋ, ɛlɛ Yehowa yɔɔdʋʋ se ɛkɛɣ pa-ñɩm yɔ, pʋ-tɔbʋʋ lɛ se ɛhaɣ-wɛ ŋgee wala naayɛ ɛ-tʋmɩyɛ taa. “Kɩbaɣlʋ kʋjɔʋ” kɛnɩ pa-ñɩm. (Yoz 18:7) Tɔm ndʋ pɔyɔɔdɩ kɩgalʋʋ 18:20 taa yɔ, tɩwɩlɩɣ se tʋmɩyɛ nɖɩ Leevi mba lakaɣ yɔ, ɖɩɩkaɣ yebu nɛ pɛkɛ kʋñɔndɩnaa tomnaɣ yɔɔ. (Kalɩ Kɩgalʋʋ 18:19, 21, 24.) Pɩɩwɛɛ se Leevi mba ɩmʋ Izrayɛɛlɩ piya cɔlɔ ‘hɔɔlɩŋ hiu weyi ɛcɛlɩ-wɛ se pɩkɛ pe-ɖeɖe’ pa-tʋmɩyɛ yɔɔ yɔ. Pɩɩwɛɛ se Izrayɛɛlɩ mba ɩkɔnɩ pa-hayɩm taa tɔɔnasɩ nɛ pa-kpɩna hɔɔlʋʋ nakʋyʋ nɛ paha-wɛ. Pɩɩkɛ hɔɔlʋʋ hiu mɩnʋʋ yɔɔ. Nɛ pɩɩwɛɛ se Leevi mba ɖɔɖɔ ɩkɔyɩ hɔɔlʋʋ hiu ñɩŋgʋ ŋgʋ paha-wɛ yɔ, kɩ-yɔɔ mbʋ “pɩkpaɖɩ ɖeu” yɔ nɛ paɖʋnɩ nesi cɔjɔtʋ tʋmɩyɛ. (Kɩg. 18:25-29) Nɛ pɩɩwɛɛ ɖɔɖɔ se paha cɔjɔnaa ‘ɖeɖe kiɖeɖee’ nɖɩ Izrayɛɛlɩ mba kɔŋnaɣ Ɛsɔ sɛtʋ lone taa se paha Ɛsɔ yɔ. Ðʋtʋ tʋnɛ tɩ-yɔɔ lɛ, mba palakɩ cɔjɔtʋ tʋmɩyɛ yɔ, pa-taa tɛma se Yehowa kaɣ pa-kɩcɛyɩm ɖeɖe cɔnʋʋ.
Fezuu taa ñɩm
g02 6/8 14 § 2
Ðɔm kɛ pʋyʋ kɩbanʋ
Ðɔm kɛ ɖɔɖɔ mbʋ piyeki se nabʋyʋ ɛtaawɛɛkɩ, ɛlɛ pɩcaɣ nɛ pileɖi. Pʋyɔɔ Bibl taa lɛ, ye paɖʋ ɛgbɛyɛ naɖɩyɛ nɖɩ ɖɩ-tɔm cɛyɩ siŋŋ yɔ, payaɣ-ɖɩ se “ɖɔm ɛgbɛyɛ.” Ðoŋ ɖoŋ lɛ, mba paɖʋʋ ɛgbɛyɛ nɖɩ yɔ, pɛkpɛndaɣ nɛ pɔtɔkɩ tɔɔnaɣ nɛ ɖɔm se pañɩɣnɩ niye ɛgbɛyɛ nɖɩ ɖɩ-yɔɔ. (Kɩg 18:19) Moyizi paɣtʋ tɛɛ lɛ, paɖʋwaɣ ɖɔm kɩlaŋ weyi palaɣaɣ altaaru yɔɔ yɔ ɩ-taa, nɛ pɩtʋʋ fɛyɩ se pɩwɩlaɣ se kɩlaŋ ɛnɩ ɩsɩŋnɩ mbʋ pɩtɩɖazɩ yaa pɩtɩwɛɛkɩ yɔ.
12-18 AVRIL
ÑƖM MBƲ PƖWƐ ƐSƆTƆM TAA YƆ | KƖGALƲƲ 20-21
“Ðɔkɩ hɛɛɛ wɛtʋ ndʋ ŋwɛna yɔ kpam alɩwaatʋ ndʋ pañɩkɩɣ ñɔ-yɔɔ yɔ”
Wɛɛnɩ tɩ luzuu nɛ ñɔ-tɔm kɛdɩnɩ Yehowa
19 Pɩsɩɣnɩ-ɖʋ se ɖɩtaala kɩwɛɛkɩm. Ðaɣnɩ maɣzʋʋ Moyizi kɩɖaʋ yɔɔ. Eluzi ɛ-tɩ nɛ ɛ-tɔm kɛdɩnɩ Yehowa pɩnzɩ hiŋ sakɩyɛ. Pʋwayɩ, pɩnzɩ 40 nzɩ Moyizi kpaɣaa nɛ ɛɖɔmnɩ nʋmɔʋ kaɖɛ ñɩŋgʋ kañɩmbusuu taa yɔ sɩwɩzɩ tɛm lɛ, elesi ɛ-tɩ luzuu. Alɩwaatʋ ndʋ tɩ-taa lɛ, ɛ-kɔɔ sɩba nɛ pepimi-i Kadɛɛsɩ pitileɖita. Pɩtʋʋ fɛyɩ se ɛ-kɔɔ ɛnʋ ɛɛɖʋnɩ nesi nɛ paya ɛ-ñʋʋ Ejipiti. Nɛ lɛɛlɛɛyɔ ɖɔɖɔ lɛ, Izrayɛɛlɩ piya ɖaɣnɩ paɣzʋʋ kalʋʋ se paacɔŋnɩ sɩ-yɔɔ camɩyɛ. ‘Sɩkʋyɩ’ Moyizi yɔɔ mbʋ pʋyɔɔ yɔ sɩtaanaɣ lɩm se sɩñɔɔ. Paa Yehowa kaatɩŋnɩ Moyizi yɔɔ nɛ ɛla piti lakasɩ sakɩyɛ, nɛ Moyizi ñeɖiyi-sɩ alɩwaatʋ sakɩyɛ nɛ ɛtɩñɩnɩ ɛ-maɣmaɣ ɛ-kɛzɛɣa yɔ, sɩɩwɛɛ nɛ simidiɣ sɩ-mɔɔŋ tɛɛ. Pɩtɩkɛ lɩm kɛdɛɖaɣ yɔɔ ɖeke simidaɣ sɩ-mɔɔŋ tɛɛ, ɛlɛ Moyizi ɖɔɖɔ simidaɣnɩ sɩ-mɔɔŋ tɛɛ. Sɩ-lakasɩ taa lɛ, pɩɩwɛ ɛzɩ Moyizi kaayebina nɛ lɔkɔtʋ ɖɛɛ-sɩ yɔ.—Kɩg. 20:1-5, 9-11.
Wɛɛnɩ tɩ luzuu nɛ ñɔ-tɔm kɛdɩnɩ Yehowa
20 Moyizi mʋ pana siŋŋ nɛ elesi hɛɛɛ wɛtʋ ndʋ ɛɛwɛna yɔ. Ɛtɩyɔɔdɩnɩ kaaʋ nɛ tisuu ɛzɩ Yehowa ɖʋʋ-ɩ paɣtʋ yɔ, ɛlɛ ɛyɔɔdɩnɩ samaɣ nɛ pana nɛ ɛwɩlɩ se ɛpɩzɩɣ nɛ ɛla piti lakasɩ. Pʋwayɩ lɛ, ɛma kaaʋ tam nabʋlɛ nɛ lɩm lɩɩ. Tɩ kpazʋʋ nɛ pana tuzi-i nɛ ɛla kɩwɛɛkɩm sɔsɔm. (Keɣa 105:32, 33) Ɛzɩma Moyizi tɩpɩzɩ nɛ eluzi ɛ-tɩ alɩwaatʋ ndʋ tɩ-taa yɔ pʋyɔɔ lɛ, patɩha-ɩ nʋmɔʋ se ɛsʋʋ Lidaʋ Tɛtʋ taa.—Kɩg. 20:12.
21 Kɩɖaʋ kʋnɛ kɩkpɛlɩkɩɣ-ɖʋ lɔŋ kɩbaŋ nɩɩyɩ. Kajalaɣ lɛ, pɩwɛɛ se ɖɩñaɣ pana nɛ ɖɩwɛɛnɩ tɩ luzuu paa ɛzɩmtaa. Ye ɖɩlabɩ kaakendu alɩwaatʋ pazɩ yɔ, tɩ kpazʋʋ pɩzɩɣ nɛ pɩñɔ ɖa-taa nɛ piyele nɛ ɖɩyɔɔdɩ kɩmɛlɛndʋ tɔm yaa ɖɩla mbʋ pɩtɩmʋna yɔ. Nabʋlɛ lɛ, alɩwaatʋ ndʋ ɖɩwɛɣ nɩɣzɛ taa yɔ, pɩpɩzɩɣ nɛ pɩwɛɛ-ɖʋ kaɖɛ se ɖɩwɛɛnɩ tɩ luzuu. Pʋyɔɔ lɛ, pɩwɛɛ se ɖɩñakɩ pana tam se ɖɩwɛɛnɩ tɩ luzuu, halɩ pɩkpɛndɩnɩ alɩwaatʋ ndʋ ɖɩkatɩɣ kaɖɛ naɖɩyɛ yɔ.
w09 1/9 19 § 5
Tɔm hʋyʋ weyi ɛhʋʋ tɔm siɣsiɣ yɔ
Kajalaɣ lɛ, Yehowa taaheyi Moyizi se ɛyɔɔdɩnɩ Izrayɛɛlɩ mba nɛ halɩ pɩcandɩnɩ se ɛtɔ se pɛkɛ kaañamtʋ tɩnaa. Nabʋlɛ lɛ, Moyizi nɛ Aarɔɔnɩ patɩsa Ɛsɔ. Ɛsɔ yɔɔdaa se: ‘Ɩtɩsamɩ-m.’ (Kalɩtʋ 12) Moyizi yɔɔdʋʋ se “ɛzɩ ɖɩɩpɩzɩɣ ɖɩlɩzɩ-mɩ lɩm” yɔ, pʋ-tɔbʋʋ lɛ se ɛ nɛ Aarɔɔnɩ, mba kaɣnɩ tɩŋnʋʋ piti lakasɩ nasɩyɩ yɔɔ nɛ paha Izrayɛɛlɩ mba lɩm, pɩtɩkɛ Ɛsɔ kaɣnɩ-wɛ haʋ lɩm. Nabudozo lɛ, tɔm loyaɣ ŋga ɛlabɩnɩ tʋmɩyɛ yɔ, kawɩlɩɣ se ɛkɔ pana nɛ samaɣ pɩlɩɩnɩ mbʋ mbʋ kaalaba nɛ pɩɖɛɛ yɔ pɩ-yɔɔ. Ɛsɔ taaha kaañamtʋ tɩnaa waɖɛ se pasʋʋ Kanaŋ tɛtʋ taa. Ɛtɩha waɖɛ nɖɩ ɖɔɖɔ Moyizi nɛ Aarɔɔnɩ. (Kɩgalʋʋ 14:22, 23) Nabʋnaza lɛ, Ɛsɔ kaaha Moyizi nɛ Aarɔɔnɩ waɖɛ se peɖiyi Izrayɛɛlɩ mba. Nɛ mba Ɛsɔ haɣ-wɛ wala sakɩyɛ yɔ, ɛpɔzʋʋ-wɛ akɔnta pɩlɩɩnɩ wala ana a-yɔɔ.—Luka 12:48.
Fezuu taa ñɩm
w14 15/6 20 § 12
Ŋwɛnɩ Ɛsɔ lɩmaɣza ɛyaa lalaa ɛjandʋ yɔɔ?
12 Wɛtʋ ndʋ tɩ-tɩŋa tɩ-taa lɛ, Yehowa kaapɩzaɣ se ɛhɔ Aarɔɔnɩ nɩŋgbaaŋ kpaagbaa. Ɛlɛ eɖiɣzinaa se Aarɔɔnɩ tɩkɛ ɛyʋ kɩdɛkɛdʋ yaa pɩtɩkɛ ɛ-cɔlɔ ɖeyi ɖeyi pɩlɩnaa. Toovenim taa lɛ, pɩwɛ ɛzɩ Aarɔɔnɩ yeba nɛ wɛtʋ kɩdɛkɛdɩtʋ yaa ɛyaa lalaa lakasɩ wɛɛnɩ ɖoŋ ɛ-yɔɔ nɛ eyele nʋmɔʋ kɩbaŋʋ taa ɖɔm. Ɛlɛ alɩwaatʋ ndʋ eɖiɣzinaa se ɛlabɩ mbʋ yɔ pɩfɛyɩ ɖeu yɔ lɛ, etisi kpaagbaa se ɛwɛɛkaa nɛ ɛpɩsɩnɩ Yehowa yɔɔ. (Ejl. 32:26; Kɩg. 12:11; 20:23-27) Yehowa kaakam ɛ-lɩmaɣza Aarɔɔnɩ tisuu nɛ ɛzɩma ekpiɖaa yɔ, pɩ-yɔɔ. Pɩnzɩ mɩnɩŋ sakɩyɛ wayɩ, Izrayɛɛlɩ piya kaawɛɛ nɛ sɩtɔzʋʋ Aarɔɔnɩ nɛ e-liɖe taa mba yɔɔ se paakɛ mba pañaŋ Yehowa yɔ.—Keɣa 113B:10-12; 134:19, 20.
19-25 AVRIL
ÑƖM MBƲ PƖWƐ ƐSƆTƆM TAA YƆ | KƖGALƲƲ 22-24
“Yehowa yeba nɛ kɩdɛkɛdɩm pɩsɩ wazaɣ”
“Yesu yɔɔ tɔm kɩbandʋ” susuu
5 Panazaɣ kajalaɣ pɩnzɩ mɩnʋʋ taa Krɩstʋ mba, ɛlɛ paawobi tɔm susuu yɔɔ. Mbʋ ɖɔɖɔ, nazɩm tiyele nɛ ɖa-alɩwaatʋ taa Krɩstʋ mba yele tɔm susuu. Pɛlɛɣzɩ ɖo-koobiya lona nɛ salakanaa tam sakɩyɛ se pasɩnzɩ tɔm susuu. Ɛlɛ piyeba nɛ Kewiyaɣ tɔm talɩ lona kɩfana taa. Kɩɖaʋ nakʋyʋ yɔ: Yehowa Aseɣɖe Tɩnaa lɩzɩ aseɣɖe siŋŋ Naazii mba salakanaa taa, Caama you naalɛ ñɩŋgʋ alɩwaatʋ taa. Yuuda tʋ nɔɔyʋ weyi ɛkatɩ Aseɣɖe Tɩnaa peeɖe yɔ, ɛyɔɔdaa se: “Yehowa Aseɣɖe Tɩnaa wɛtʋ kɩbandʋ sɩnɩ-m nɛ mana se tisuu mbʋ pɛwɛna yɔ, pɩlɩnɩ Bibl taa. Piyeba nɛ ma ɖɔɖɔ manpɩsɩ Yehowa Aseɣɖe tʋ.”
it-1 909 § 5
kpaanzɩyɩtʋ
Ɛyʋ lakʋʋ kpaanzɩyɩtʋ nɛ ɛkaɖɩɣnɩ Yehowa yɔ. Nayʋ Baalam labɩ ñʋʋ taa ɖoŋ nɛ ɛñɩnɩ se ɛlɔ nɔɔ kɩdɛkɛdaɣ Izrayɛɛlɩ mba yɔɔ se pɩsa nɛ Mowaabʋ mba wiyaʋ Baalaakɩ ha-ɩ liidiye. Ɛlɛ Yehowa tiyele nɛ pɩla mbʋ. Apostoloo Pɩyɛɛrɩ yɔɔdaɣ Baalam tɔm lɛ, ɛtɔm se: “Kpɩnɛ nɖɩ ɖɩsɩɣlɩɣ sʋʋtʋ nɛ ɖɩɩyɔɔdʋʋ yɔ, ɖɩyɔɔdɩnɩ ɛyʋ nɔɔ nɛ ɖɩɖaŋ nayʋ ɛ-kpaanzɩyɩtʋ nʋmɔʋ taa.” Baalam kpaanzɩyɩtʋ lakasɩ nzɩ sɩ-yɔɔ lɛ, Apostoloo Pɩyɛɛrɩ labɩnɩ tʋmɩyɛ Grɛɛkɩ tɔm piye paraphronia, ɖɩ-tɔbʋʋ lɛ se “ɛyʋ weyi pisidi ɛ-lɩmaɣza taa yɔ.”—2Pɩ 2:15, 16; Kɩg 22:26-31.
Fezuu taa ñɩm
w04 8/1 27 § 2
Kɩgalʋʋ takayaɣ taa lɩmaɣza sɔsɔna
22:20-22—Ɛbɛ yɔɔ Yehowa kɔ pana nɛ Baalam? Yehowa kaaheyi nayʋ Baalam se pɩfɛyɩ se ɛlɔ nɔɔ kɩdɛkɛdaɣ Izrayɛɛlɩ mba yɔɔ. (Kɩgalʋʋ 22:12) Paa mbʋ yɔ, ɛtɩŋ Baalaakɩ ɛyaa se ewolo nɛ ɛlɔ nɔɔ kɩdɛkɛdaɣ Izrayɛɛlɩ mba yɔɔ. Baalam kaasɔɔlaa se ɛla mbʋ pɩkɛdɩɣnɩ Mowaabʋ mba wiyaʋ yɔ nɛ ɛlɛ labɩ-ɩ kʋjɔʋ. (2 Pɩyɛɛrɩ 2:15, 16; Yuudi 11). Halɩ paa Ɛsɔ kaañɩɣ Baalam yɔɔ se ɛwazɩ Izrayɛɛlɩ mba nɛ ɛtaalɔ nɔɔ kɩdɛkɛdaɣ pɔ-yɔɔ yɔ, ɛñaɣ pana nɛ ɛla mbʋ wiyaʋ sɔɔlaa yɔ. Eheyi-i se eyele nɛ Baalɩ sɛyaa halɩñɩma peɣzi Izrayɛɛlɩ abalaa nɛ payʋsɩnɩ Ɛsɔ. (Kɩgalʋʋ 31:15, 16) Ye mbʋ, Baalam kaawɛnɩ ɛsa naɣnaɣ nɛ pʋyɔɔ Yehowa kaakɔ-ɩ nɛ pana.
26 AVRIL–2 MAI
ÑƖM MBƲ PƖWƐ ƐSƆTƆM TAA YƆ | KƖGALƲƲ 25-26
“Ɛyʋ kʋɖʋm lakasɩ pɩzɩɣ nɛ pɩwazɩ ɛyaa sakɩyɛ?”
‘Ise hayitu!’
KOLAƔ lɔyʋ nɔɔyʋ woba nɛ ɛcaɣ lone nɖɩ ɖɩ-taa ɛnawa se ɛpɩzɩɣ nɛ ɛkpa kpakpasɩ nzɩ ɛsɔɔlaa yɔ. Ɛñɩnɩ nandʋ ndʋ pɩpɔzʋʋ yɔ nɛ ɛtʋʋ kolaɣ nɔɔ taa nɛ ɛlɔ-kɛ lɩm taa. Ɛɖaŋ camm nɛ pɩkɛdaa lɛ, kpakpayaɣ hɔŋ kolaɣ nɛ kasʋʋ lɩm tɛɛ mɩɩ mɩɩ. Ɛhɔ kolaɣ ɛlɩzɩ nɛ ɛkpa kpakpayaɣ.
2 Mbʋ ɖɔɖɔ papɩzɩɣ nɛ pakpa ɛyaa. Mbʋ pɩɩtalɩ Izrayɛɛlɩ piya, alɩwaatʋ ndʋ sɩñɔtɩnɩ Kanaŋ tɛtʋ nɛ sɩwɛɛ Mowaabʋ kɛdɛɛnzɩ taa yɔ. Mowaabʋ Wiyaʋ heyi abalʋ weyi payaɣ se Baalam yɔ se ye ɛpɩzaa ɛlɔ nɔɔ kɩdɛkɛdaɣ Izrayɛɛlɩ piya yɔɔ yɔ, ɛnʋ haɣ-ɩ liidiye sakɩyɛ. Pʋyɔɔ Baalam tɩŋnɩ nʋmɔʋ nakʋyʋ yɔɔ se eyele nɛ Izrayɛɛlɩ piya tɔlɩ kɩwɛɛkɩm taa nɛ Yehowa lɔ nɔɔ kɩdɛkɛdaɣ sɩ-yɔɔ. Ɛñɩnɩ ñɩkɩyʋʋ kɩbaŋʋ. Etiyi Mowaabʋ pɛlaa ɖenɖe Izrayɛɛlɩ piya wɛɛ yɔ se pepeɣzi abalaa nɛ pasʋʋnɩ-wɛ.—Kɩgalʋʋ 22:1-7; 31:15, 16; Natʋ 2:14.
‘Ise hayitu!’
4 Ɛbɛ yɔɔ Izrayɛɛlɩ piya kudokiŋ sakɩyɛ tɔlɩ Baalam Kpaca taa? Paawɛɛ nɛ pamaɣzɩɣ po-tomnaɣ nandʋ sɔɔlɩm ɖeke yɔɔ nɛ pɔsɔɔ mbʋ payɩ Yehowa labɩ-wɛ yɔ pɩ-yɔɔ. Pɩɩpɔzaa se Izrayɛɛlɩ piya ɩwɛɛnɩ ɛsɩmɩyɛ Ɛsɔ yɔɔ. Ɛlɩzɩ-sɩ Ejipiti ñɩma yomiye taa, ɛha-sɩ tɔɔnaɣ kañɩmbusuu taa, nɛ ɛkandɩyɩ sɩ-yɔɔ nɛ sɩkɔɔ sɩtalɩ Kanaŋ tɛtʋ cɔlɔ. (Ebree 3:12) Paa mbʋ yɔ, sɩtɔlɩ kʋzʋʋ kɩdɛkɛdʋʋ kpaca taa. Apostoloo Pɔɔlɩ mawa se: “Ðitaayele ɖa-tɩ nɛ hatiye ɛzɩ pa-taa nabɛyɛ yɔ, nɛ ɛyaa . . . sɩ.”—1 Kɔrɛntɩ 10:8.
Fezuu taa ñɩm
it-1 933 § 5
Kamasɩ
Pɩtʋʋ fɛyɩ se pʋcɔ nɛ patayɩ tɛtʋ cejewe lɛ, pɔlɔ piye nɛ pamaɣzɩ ɖɔɖɔ paa cejewiye nɖɩ lɛ, ɖɩ-paɣlɩka yɔɔ. Pɩtɩla, piye lɔʋ yekaɣ se patɩlɩ tɛtʋ ndʋ papɩzɩɣ nɛ paha cejewiye naɖɩyɛ yɔ, nɛ hɔɔlʋʋ ŋgʋ kɩkɛɣnɩ cejewiye nɖɩ ɖɩ-ñɩm yɔ. Pɩpɩzɩɣ pɩkɛ hayo kiŋ, hadɛ kiŋ, wɩsɩ ɖɩlɩyɛ yaa wɩsɩ ɖɩɖʋyɛ hɔɔlʋʋ taa. Pɩpɩzɩɣ ɖɔɖɔ nɛ pɩkɛ kɛdɛɛŋa taa yaa pʋʋ yɔ. Pɔlɔʋ piye nɛ pɩtɛ lɛ, lɩmaɣzɩyɛ nɖɩ pakpakɩɣ yɔ, ɖɩkɛ Yehowa lɩmaɣzɩyɛ, nɛ piyekaɣ se cejewe ɩtaasʋsɩ ɖama nɛ ataayooni ɖama ɖɔɖɔ. (Adu 16:33) Ɛsɔ tɩŋaɣnɩ pɩ-yɔɔ nɛ eɖiyiɣ-wɛ se pɩsa nɛ paa cejewiye nɖɩ lɛ, ɖɩ-wɛtʋ ɛla nɔɔ kʋɖʋmaɣ nɛ natʋ tɔm ndʋ Yakɔɔb kaayɔɔdɩ alɩwaatʋ ndʋ ɛsɩkaɣ yɔ. Natʋ tɔm ndʋ tɩwɛ Kiɖe Tɛɛ Tɔm 49:1-33 taa.
Pɔlɔʋ piye nɛ patɩlɩ lone nɖɩ pahaɣ cejewiye naɖɩyɛ yɔ nɛ pɩtɛ lɛ, patɩŋnɩ cejewiye ɖɩ-paɣlɩka yɔɔ nɛ patɩlɩ tɛtʋ ndʋ ɖeyi ɖeyi pɩwɛɛ se paha-ɖɩ yɔ. “Ɩkatayɩ-tʋ mi-cejewe hɛkʋ taa. Nɖɩ ɖɩɖɔwa yɔ, ɩha-ɖɩ pɩwalɩ, nɖɩ ɖɩwɛ ññɩɩ yɔ ɩha-ɖɩ ññɩɩ; pɛpɛlɩ kemaɣ lɛ, pɛcɛlɩ paa weyi lɛ e-ɖeɖe; paatayɩ tɛtʋ cejewiye-cejewiye nɛ waʋ-waʋ.” (Kɩg 33:54) Ye mbʋ, paalɛɣzɩɣ lone nɖɩ ɖɩ-taa pɩwɛɛ se pasɩɩ cejewiye naɖɩyɛ ɛzɩ piye lɔʋ wɩlʋʋ yɔ, ɛlɛ papɩzɩɣ papasɩ yaa pɔsɔzɩ cejewiye nɖɩ tɛtʋ pɩlɩɩnɩ ɖɩ-paɣlɩka cɔlɔ. Kɩɖaʋ nakʋyʋ yɔ: Pɔkɔm nɛ peɖiɣzina se tɛtʋ ndʋ paha Yuuda cejewiye yɔ tɩkɩlɩ ɖɔʋ lɛ, papasɩ tɩ-yɔɔ nɛ pɛcɛlɩ tɩ-hɔɔlʋʋ nakʋyʋ Siimeyɔɔ cejewiye.—Yoz 19:9.