Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
6-12 SEPTEMBRE
ÑƖM MBƲ PƖWƐ ƐSƆTƆM TAA YƆ | WAYƖ WAYƖ PAƔTƲ 33-34
“Mɛlɩ Yehowa ‘tamtam nesi’ tɛɛ”
it-2 1200
Yesurun
Pɩɩkɛ ñamtʋ hɩɖɛ nɖɩ payaɣaɣnɩ Izrayɛɛlɩ yɔ. Septante taa lɛ, palabɩnɩ-ɖɩ tʋmɩyɛ ɛzɩ sɔɔlɩm tɔm piye yɔ nɛ pɛɖɛzɩ-ɖɩ se “kʋsɔɔlʋ”. Hɩɖɛ Yesurun tɔzaɣ Izrayɛɛlɩ piya ɛzɩma Yehowa ɖʋ-sɩ nɛ ɛgbɛyɛ nɛ pʋyɔɔ lɛ pɩpɔzʋʋ se sɩ-ɖɔnɛ ɛtʋʋzɩ yɔ pɩ-yɔɔ. (Wp. 33:5, 26; Iza. 44:2) Wayɩ Wayɩ Paɣtʋ 32:15 taa lɛ palabɩnɩ-ɖɩ tʋmɩyɛ ɛzɩ eduuye yɔ. Ðenɖe ɛzɩ Izrayɛɛlɩ kaacaɣ wezuu nɛ pɩla nɔɔ kʋɖʋmaɣ nɛ hɩɖɛ Yesurun nɖɩ payaɣ-kʋ yɔ lɛ, kiyeba nɛ kɩla ñʋʋ taa ɖoŋ nɛ kɩlɔ kɩ-Laɖʋ nɛ kini kɩ-Ñʋʋ Yaɖʋ.
rr 120, aɖakaɣ
Yehowa sɩɣnɩ-ɖʋ se ɖɩɖaɣnɩ sɩŋʋʋ ɖa-nɩŋgbanzɩ yɔɔ
Pɩtɩla ɖɩtɔzʋʋ se pɩnzɩ mɩnɩŋ sakɩyɛ pʋcɔ nɛ pɩtalɩɣ Ezekɩyɛɛlɩ alɩwaatʋ lɛ, nayʋ Moyizi kaayɔɔdaa se pɩtasɩna se Yehowa wɛnɩ ɖoŋ lɛ, ɛsɔɔlɩ ɖɔɖɔ siŋŋ se ɛlabɩnɩ-ɩ tʋmɩyɛ nɛ ɛsɩnɩ ɛ-samaɣ. Moyizi mawa se: “Ðooo lɔndaa Ɛsɔ ɖɩjaɣyɛ, nɛ hadɛ cɩnɛ yɔ, ɛnʋ kɛnɩ tamtam nesi.” (Wp. 33:27) Ɛɛɛ pɩtʋʋ fɛyɩ se ye ɖɩpɩsɩnɩ ɖɛ-Ɛsɔ Yehowa yɔɔ kaɖɛ alɩwaatʋ taa yɔ, ɛkaɣ e-nesi lɩzʋʋ nɛ ɛsɩnɩ-ɖʋ nɛ ɛkʋsɩ-ɖʋ nɛ sɔɔlɩm nɛ eyele nɛ ɖɩɖaɣnɩ sɩŋʋʋ ɖa-nɩŋgbanzɩ yɔɔ.—Ezek. 37:10.
w11 15/9 19 § 16
Se seya nɛ tɩ ɖɔkʋʋ
16 Ɛzɩ Abraham yɔ, Moyizi tɩna lidaʋ tɔm ndʋ Ɛsɔ kaayɔɔdaa yɔ nɛ ɛ-ɛsa. Izrayɛɛlɩ mba caɣaɣ sʋʋ lidaʋ tɛtʋ taa lɛ, Ɛsɔ heyi Moyizi se: “Ŋkaɣ tɛtʋ losuu poliŋ taa, ɛlɛ ŋŋkaɣ sʋʋ tɩ-taa, tɛtʋ ndʋ mɔnkɔŋ haʋ Izrayɛɛlɩ piya yɔ.” Mbʋ pʋyɔɔ yɔ samaɣ ñʋʋ taa ɖoŋ yɔɔ lɛ, ɛ nɛ Aarɔɔnɩ ‘paɖʋ-ɩ ɖɩwɩzɩyɛ Meriba lɩm cɔlɔ.’ (Wp. 32:51, 52) Piyeba nɛ Moyizi caɣnɩ samaɣ na? Aayɩ. Ɛwazaɣ samaɣ lɛ, tɔm tʋnɛ ɛtɛzɩna: “Ŋkɛ koboyaɣ tʋ, Izrayɛɛlɩ! Awɛ ɛzɩ ña yɔ, samaɣ, ñɛ weyi ŋyakɩ ña-ñʋʋ Kɩbaɣlʋ taa yɔ? Ɛnʋ kɛnɩ ñɔ-tɔɖɛ nɛ ño-ɖoŋ laɣɖɛ.”—Wp. 33:29.
Fezuu taa ñɩm
it-2 312 § 4
Moyizi
Moyizi kaawɛnɩ pɩnzɩ 120 alɩwaatʋ ndʋ ɛsɩba yɔ. Bibl yɔɔdaɣ ɛzɩma ɛɛwɛnɩ tomnaɣ kɩbaŋa yɔ, pɩ-tɔm lɛ, kɩyɔɔdaa se: “Ɛ-ɛsa tɩcamɩ nɛ e-ɖoŋ [tɩhʋʋ].” Yehowa pimi-i lone nɖɩ ɖɩ-taa nɔɔyʋ tɩpɩzɩ nɛ ɛtɩlɩ kaaʋ yɔ. (Wp. 34:5-7) Pɩtʋʋ fɛyɩ se ɛlabɩ mbʋ se Izrayɛɛlɩ piya ɩtaapɩsɩ Moyizi pɩlaʋ ɛgɔlɩmɩyɛ nɛ sɩtɔlɩ cɛtɩm Ɛsɔ sɛtʋ kpaca taa. Pɩwɩlɩɣ se Eleeu kaasɔɔlaa se Izrayɛɛlɩ piya ɩkpaɣ Moyizi tomnaɣ nɛ sɩla mbʋ, pʋyɔɔ Yuudi mawa se: “Alɩwaatʋ ndʋ tɔm kaakɔm Ɛsɔ tiyiyu sɔsɔ Mikayɛɛlɩ nɛ Eleeu pɛ-hɛkʋ taa nɛ pɔhɔŋ tɔm Moyizi tomnaɣ yɔɔ yɔ, ɛtɩkatɩ nɛ eheyi-i tɔm kɩdɛkɛdɩtʋ se ɛhʋʋnɩ-ɩ tɔm; ɛlɛ ɛyɔɔdaa se: ‘Yehowa ɛhʋnɩ-ŋ tɔm.’” (Yud. 9) Pʋcɔ nɛ Yozuwee ɖiyi Izrayɛɛlɩ piya nɛ sɩsʋʋ Kanaŋ ɛjaɖɛ taa lɛ, sɩcaɣ kʋñɔwiye avema 30 kañɩmbusuu taa.—Wp. 34:8.
13-19 SEPTEMBRE
ÑƖM MBƲ PƖWƐ ƐSƆTƆM TAA YƆ | YOZUWEE 1–2
“Mbʋ pɩwɛɛ se ŋla nɛ pɩɖɔmnɩ-ŋ camɩyɛ yɔ”
w13 15/1 8 § 7
Wɛɛ abalɩtʋ mbʋ pʋyɔɔ yɔ Yehowa wɛ ñɔ-cɔlɔ!
7 Pɩsa nɛ ɖɩwɛɛnɩ abalɩtʋ ndʋ pɩpɔzʋʋ-ɖʋ yɔ nɛ ɖɩla Ɛsɔ sɔɔlɩm lɛ, pɩwɛɛ se ɖɩkpɛlɩkɩ Ɛsɔtɔm nɛ ɖɩɖɔ tɩ-yɔɔ. Mbʋ paaheyi Yozuwee se ɛla alɩwaatʋ ndʋ ɛlɛɣzɩ Moyizi lone taa yɔ. Peheyi-i se: “Ñɩtɩ ŋkpa ɖoŋ nɛ ŋɖɔkɩ camɩyɛ kpam, nɛ ŋɖɔkɩ nɛ ŋla paɣtʋ kpeekpe yɔɔ, ndʋ ma-lɩmɖʋyʋ Moyizi ɖʋ-ŋ yɔ. . . . Paɣtʋ takayaɣ kanɛ yɔ kataalɩɩ ñɔ-nɔɔ taa, ɛlɛ ŋŋmaɣzɩɣ kɔ-yɔɔ wɩsɩ nɛ ɖoo, nɛ ŋɖɔkɩ nɛ ŋla ndʋ ndʋ pama ka-taa yɔ tɩ-yɔɔ: Ðɩnɛ ɛlɛ ŋkaɣ ɖɔkʋʋ ñe-wezuu camɩyɛ pɩŋŋ nɛ ɖɩnɛ ɛlɛ ŋkaɣ ña-tɩ leleŋ nɩʋ nɛ pɩkaɣ-ŋ ɖɔmnʋʋ ɖeu.” (Yoz. 1:7, 8) Yozuwee ɖɔm lɔŋ tasʋʋ mbʋ pɩ-yɔɔ nɛ ‘pɩɖɔmnɩ-ɩ ɖeu.’ Ye ɖa ɖɔɖɔ ɖɩlabɩ mbʋ yɔ, ɖɩkaɣ wɛnʋʋ abalɩtʋ nɛ pɩɖɔmnɩ-ɖʋ ɖeu ɖɛ-Ɛsɔ sɛtʋ taa.
w13 15/1 11 § 20
Wɛɛ abalɩtʋ mbʋ pʋyɔɔ yɔ Yehowa wɛ ñɔ-cɔlɔ!
20 Ðɩwɛ ɛjaɖɛ kɩdɛkɛdɩyɛ taa nɛ ɖɩkatɩɣ kala ndɩ ndɩ; pʋyɔɔ lɛ, pɩwɛ ɛyʋ kaɖɛ se ɛpɩzɩ nɛ ɛla Ɛsɔ sɔɔlɩm. Paa mbʋ yɔ ɖɩfɛyɩ ɖe-ɖeke. Ɛsɔ wɛ ɖɔ-cɔlɔ. Nɛ ɛ-Pɩyalʋ weyi ɛkɛ ɛgbɛyɛ Ñʋʋdʋ yɔ ɛwɛ ɖɔ-cɔlɔ ɖɔɖɔ. Ðɩwɛnɩ ɖɔɖɔ ɖo-koobiya Yehowa Aseɣɖe Tɩnaa ɛjaɖɛ kpeekpe yɔɔ. Koobiya mba pɛcɛzɩ 7 000 000. Pɛwɛ ɖɔ-hɔɔlʋʋ yɔɔ, ye mbʋ ɖiwolo pɩ-yɔɔ nɛ ɖɩcɛyɩsɩɣ ɖe-tisuu nɛ ɖisusuu tɔm kɩbandʋ; nɛ ɖɩɩlakɩ mbʋ lɛ, ɖɩtɔzʋʋ 2013 pɩnaɣ taa mayaɣ yɔɔ: “Kpa ɖoŋ nɛ ŋɖɔkɩ kpam. . . . [Yehowa] ñɛ-Ɛsɔ wɛ ñɔ-cɔlɔ.”—Yozuwee 1:9.
Fezuu taa ñɩm
w04 1/12 9 § 1
Yozuwee takayaɣ taa lɩmaɣza sɔsɔna
2:4, 5—Ɛbɛ yɔɔ Rahaabɩ kaapeɣzi ɛyaa mba wiyaʋ tiyaa se pañɩnɩ cɔŋɩyaa yɔ? Rahaabɩ ɖʋ e-wezuu kaɖɛ taa nɛ ehuuzi cɔŋɩyaa yɔɔ mbʋ pʋyɔɔ yɔ ɛwɛnɩ tisuu Yehowa yɔɔ. Pʋyɔɔ lɛ, pɩtaakɛnɩ-ɩ kɩjɛyʋʋ se ɛwɩlɩ mba pañɩnaɣ cɔŋɩyaa yɔ nʋmɔʋ nɛ powolo pala Ɛsɔ samaɣ kɩdɛkɛdɩm. (Maatiyee 7:6; 21:23-27; Yohanɛɛsɩ 7:3-10) Toovenim taa lɛ paya Rahaabɩ se ɛkɛ ɛyʋ “siɣsiɣ tʋ pɩtɩŋnɩ tʋma yɔɔ” nɛ a-taa naɖɩyɛ lɛ, ɛzɩma ɛtɩwɩlɩ nʋmɔʋ kɩbaŋʋ wiyaʋ lɩmɖʋyaa yɔ.—Yakubu 2:24-26.
20-26 SEPTEMBRE
ÑƖM MBƲ PƖWƐ ƐSƆTƆM TAA YƆ | YOZUWEE 3-5
“Yehowa wazɩɣ tʋma wena tisuu tuyuu-ɖʋ nɛ ɖɩlakɩ yɔ”
it-2 63 § 5
Yɔɔrdaŋ
Ðoŋ ɖoŋ lɛ, Yɔɔrdaŋ pɔɔ hɔɔlʋʋ ŋgʋ kɩwɛnɩ Galilee teŋgu nɛ pɩ-tɛɛ kiŋ yɔ, ki-limaŋ kɛ kpaɣnɩ mɛta kʋɖʋmʋʋ nɛ piwolo mɛtanaa 3 mbʋ yɔ, nɛ kɩ-walanzɩ ñɛkɛ kpaɣnɩ mɛtanaa 27 nɛ piwolo mɛtanaa 30 mbʋ yɔ. Ɛlɛ yolum alɩwaatʋ taa lɛ, Yɔɔrdaŋ taa lɩm suu nɛ pɩwadɩɣ kidiilimiŋ yɔɔ, nɛ pʋyɔɔ lɛ, ka-walanzɩ nɛ ka-limaŋ suyuu. (Yoz 3:15) Ye Yɔɔrdaŋ pɔɔ kaasuwa yɔ, Izrayɛɛlɩ piya abalaa, halaa nɛ piya cikpesi taapɩzɩ nɛ pɛtɛzɩ-kɛ, kɔzɩ kɔzɩ Yeriikoo tɛtʋ cɔlɔ. Lɩm wɛ hoɖe peeɖe siŋŋ nɛ pitileɖi yɔ, nabɛyɛ sɔwaɣ lɩm peeɖe nɛ lɩm kpaɣ-wɛ nɛ pɩɖɛna. Paa mbʋ yɔ, Yehowa ɖɩɣ Yɔɔrdaŋ pɔɔ taa lɩm nʋmɔʋ nɛ Izrayɛɛlɩ mba pɩzɩ nɛ pɛtɛzɩ-kɛ nɛ lɩm titukuni pa-nɩŋgbanzɩ. (Yoz 3:14-17) Pɩnzɩ mɩnɩŋ sakɩyɛ wayɩ lɛ, piti ŋgʋ kɩ-ɖaɣʋ labɩ Eliya alɩwaatʋ taa, alɩwaatʋ ndʋ ɛ nɛ Eliizee paawɛɛ yɔ; nɛ kɩtasɩ labʋ alɩwaatʋ ndʋ Eliizee kaawɛ e-ɖeke yɔ.—2Aw 2:7, 8, 13, 14.
w13 15/9 16 § 17
Yele Ɛsɔ paɣtʋ kɛnɩ mbʋ pʋyɔɔ ña-laŋɩyɛ nɩɣ leleŋ yɔ
17 Ɛzɩma tʋma wena ɖɩlakɩnɩ tisuu yɔ, asɩɣnɩ-ɖʋ se ɖɩtaa Yehowa liu? Maɣzɩ kɛdaɣ ŋga kɔyɔɔdʋʋ ɛzɩma Izrayɛɛlɩ mba sʋ lidaʋ tɛtʋ taa yɔ kɔ-yɔɔ nɛ ŋna. Yehowa kaaheyi cɔjɔnaa mba pakpaɣ ɛgbɛyɛ ɖʋʋ aɖakaɣ yɔ se pɔɖɔ Yɔɔrdaŋ pɔɔ taa nɛ pɛtɛzɩ. Ɛlɛ samaɣ talɩ pɔɔ cɔlɔ lɛ, kana se yolum tɛʋ yeba nɛ pɔɔ su nɛ kawadɩ. Ɛzɩma Izrayɛɛlɩ mba kaɣ labʋ? Pacakɩ pɔɔ nɔɔ kpɩtaŋ sakɩyɛ yaa alɩwaatʋ ndʋ tɩcɛzɩ mbʋ yɔ nɛ lɩm kɔɔ nɛ pɩpasɩ yaa we? Aayɩ, pata liu Yehowa nɛ pa-laŋɩyɛ pilim nɛ pala ɛzɩ ɛpɔzʋʋ yɔ. Ɛbɛ lɩ pɩ-taa? Pamawa se: “Cɔjɔnaa nɩŋgbanzɩ tiitibi lɩm taa lɛ pɔɔ yele kpem, . . . nɛ cɔjɔnaa sɩŋ pɔɔ hɛkʋ taa ɖenɖe pɩwɩlaa yɔ Yeriikoo tɛtʋ cɔlɔ nɛ ɛyaa tɩŋa kɔɔ nɛ pɛtɛzɩ-kɛ.” (Yoz. 3:12-17, Contemporary English Version) Maɣzɩ nɛ ŋna ɛzɩma pɩɩlabɩ pɔ-yɔɔ tʋmɩyɛ siŋŋ alɩwaatʋ ndʋ pana lɩm mbʋ pɩkpeŋaɣ lɛɛlɛɛ yɔ pɩsɩŋaa yɔ. Toovenim tisuu mbʋ Izrayɛɛlɩ mba kaawɛnɩ Yehowa yɔɔ yɔ, pɩɖaɣnɩ cɛyɩsʋʋ mbʋ pʋyɔɔ yɔ, pata Yehowa liu nɛ pɔɖɔ ɛ-tɔm yɔɔ.
w13 15/9 16 § 18
Yele Ɛsɔ paɣtʋ kɛnɩ mbʋ pʋyɔɔ ña-laŋɩyɛ nɩɣ leleŋ yɔ
18 Toovenim se Yehowa ɛɛlakɩ piti lakasɩ nzɩ sɔnɔ nɛ ɛsɩɣnɩ ɛ-samaɣ, paa mbʋ yɔ, ɛwazɩɣ tʋma wena kalakɩnɩ tisuu yɔ. Ɛsɔ haɣ-wɛ e-ɖoŋ se pala kewiyaɣ tɔm susuu tʋmɩyɛ nɖɩ ɛɖʋ-wɛ yɔ kedeŋa kpeekpe yɔɔ. Nɛ Yehowa Aseɣɖe Tɩnaa taa weyi ɛkpaɖaa yɔ, Yesu Krɩstʋ weyi pefezi-i yɔ, eheyi ɛ-tɔmkpɛlɩkɩyaa se ɛkaɣ-wɛ ɖʋʋ nesi tʋmɩyɛ sɔsɔɖɛ nɖɩ ɖɩ-labʋ taa. “Iwolo ɩpɩsɩ ajɛɛ kpeekpe tɔm mʋyaa . . . Piyele nɛ mɛwɛ mɩ-cɔlɔ kɩyakɩŋ kpeekpe nɛ pɩkɔɔ pɩtalɩ ɛjaɖɛ tɛm wiye.” (Mat. 28:19, 20) Yehowa Aseɣɖe Tɩnaa sakɩyɛ mba paawɛ fɛyɛ yɔ, pana kpayɩ kpayɩ pa-maɣmaɣ pe-wezuu caɣʋ taa se Ɛsɔ fezuu kiɖeɖeu ha-wɛ abalɩtʋ nɛ papɩzɩ nɛ pɔyɔɔdɩnɩ ɛyaa mba paasɩŋ-wɛ yɔ, tɔm susuu taa.—Kalɩ Keɣa 118:46; 2 Kɔrɛntɩ mba 4:7.
Fezuu taa ñɩm
w04 1/12 9 § 2
Yozuwee takayaɣ taa lɩmaɣza sɔsɔna
5:14, 15—Akɛ “[Yehowa] sɔɔjanaa taa sɔsɔ”? Sɔsɔ weyi ewoba nɛ ɛkpazɩ Yozuwee ɖoŋ alɩwaatʋ ndʋ papaɣzɩ lidaʋ tɛtʋ mʋʋ yɔ, pɩtʋʋ fɛyɩ se ɛnʋ paya ɖɔɖɔ se “Tɔm”, pʋ-tɔbʋʋ se Yesu Krɩstʋ, alɩwaatʋ ndʋ ɛtaatɩɩkɔmtɩ tɛtʋ yɔɔ yɔ. (Yohanɛɛsɩ. 1:1; Danɩyɛɛlɩ. 10:13) Alɩwaatʋ ndʋ ɖɩnaɣ se Yesu weyi efema nɛ paɖaɣnɩ-ɩ haʋ ɖoŋ ɛsɔdaa yɔ, ɛwɛ Ɛsɔ samaɣ cɔlɔ fezuu taa you taa yɔ, pɩkpazɩɣ-ɖʋ ɖoŋ pɩdɩɩfɛyɩ!
27 SEPTEMBRE–3 OCTOBRE
ÑƖM MBƲ PƖWƐ ƐSƆTƆM TAA YƆ | YOZUWEE 6–7
Posi ña-tɩ nɛ mbʋ pɩɩwazɩɣ pʋyʋ yɔ!
w10 15/4 20 § 5
Kɛzɩ ñɛ-ɛsa nɛ ataacɔnɩ mbʋ pɩɩwazɩɣ pʋyʋ yɔ
5 Pɩnzɩ mɩnɩŋ sakɩyɛ wayɩ lɛ, Izrayɛɛlɩ tʋ Akaŋ ɛsa seɣti-i nɛ ɛmɩlɩ wondu natʋyʋ Yeriikoo tɛtʋ ndʋ pɔyɔkaa yɔ tɩ-taa. Ɛsɔ kaaɖʋ paɣtʋ se paɖɩzɩ mbʋ payɩ pɩɩwɛ tɛtʋ ndʋ tɩ-taa yɔ, nɛ pakazɩ wondu ndʋ paɖʋʋ Ɛsɔ koozaɣ taa yɔ ti-ɖeke. Paapaɣ Izrayɛɛlɩ piya se: “Ɩɖaŋ mɩ-tɩ nɛ ɩtaakpɛndɩnɩ mbʋ puyo-pʋ yɔ pɩ-taa pʋyʋ nɔɔyʋ kaaʋ.” Akaŋ manɩ paɣtʋ yɔɔ lɛ, pawa Izrayɛɛlɩ piya alɩwaatʋ ndʋ powoba nɛ poyooni Ayi tɛtʋ nɛ pa-taa nabɛyɛ sɩ yɔ. Akaŋ tɩyɔɔdɩ kɩwɛɛkɩm mbʋ ɛlaba yɔ, pɩkɔɔ nɛ pɩtalɩ alɩwaatʋ ndʋ pokuli kɩwɛɛkɩm mbʋ pɩ-yɔɔ yɔ. Akaŋ yɔɔdaa se: “Mana” wondu ndʋ lɛ, “pɩlabɩ-m liu nɛ mankpaɣ”. Ɛ-ɛsa seɣti-i nɛ piwoni ɛ-maɣmaɣ ɛ-ɖɩzʋʋ nɛ pɩkpɛndɩnɩ “mbʋ payɩ ɛwɛna yɔ.” (Yoz. 6:18, 19; 7:1-26) Ðooo ɛ-laŋɩyɛ taa lɛ, Akaŋ liu tɛɛ wɛɛ nɛ pɩkɔtʋʋnɩ mbʋ pekizini-i yɔ.
w97 15/8 28 § 2
Ɛbɛ yɔɔ pɩwɛɛ se nɔɔyʋ ɛlabɩ nabʋyʋ nɛ pɩfɛyɩ ɖeu yɔ, ɖɩyɔɔdɩ?
Mbʋ pʋyɔɔ pɩwɛɛ se ɖɩyɔɔdɩ ye nɔɔyʋ ɛlabɩ nabʋyʋ nɛ pɩfɛyɩ ɖeu yɔ, pɩ-taa nabʋyʋ lɛ se pɩkandɩyɩɣ ɛgbɛyɛ tɛ cɩɖɩ cɩɖɩ wɛtʋ yɔɔ. Yehowa kɛ Ɛsɔ weyi ɛwɛ kele kele yɔ, Ɛsɔ weyi ɛkɛ kiɖeɖeu yɔ. Ɛpɔzʋʋ mba payɩ pɔsɔɔlaa se pɛsɛɛ-ɩ yɔ se pɛwɛɛ kele kele fezuu taa nɛ pe-wezuu caɣʋ taa. Bibl tasɩɣ-ɖʋ lɔŋ se: “Ɛzɩ piya nzɩ sɩñaŋ yɔ, ɩtaatasɩ yebu nɛ kɔɖɛyɩ ŋgʋ ɩɩwɛnɩ ɖooo lɔŋ mɩ-kɩɩsɩŋɩyɩtʋ taa yɔ, kɩwɛɛnɩ ɖoŋ mɩ-yɔɔ, ɛlɛ ɛzɩ Kiɖeɖeu weyi ɛya-mɩ yɔ, mɩ-maɣmaɣ ɩpɩsɩ kiɖeɖema mɩ-ɖɔnɛ kpeekpe taa, mbʋ pʋyɔɔ yɔ pamawa se: ‘Pɩwɛɛ se ɩkɛ kiɖeɖema, mbʋ pʋyɔɔ yɔ mɛnkɛ kiɖeɖeu’.” (1 Pɩyɛɛrɩ 1:14-16) Ɛyaa mba palakɩ kʋzɔɔtʋ lakasɩ yaa mba palakɩ kɩdɛkɛdɩm yɔ, pepisiɣ ɛgbɛyɛ nɛ pɔkɔŋnɩ Yehowa pana ɖɩ-yɔɔ; nɛ ye palabɩ mbʋ pɩpɔzʋʋ yɔ nɛ pɔñɔɔzɩ wɛtʋ ndʋ yaa ye palɩzɩ-wɛ ɛgbɛyɛ taa yɔ, kalɩ pi-yeke.—Kpaɣ-tʋ nɛ ŋmaɣzɩnɩ Yozuwee, ñʋʋ 7.
w10 15/4 21 § 8
Kɛzɩ ñɛ-ɛsa nɛ ataacɔnɩ mbʋ pɩɩwazɩɣ pʋyʋ yɔ
8 Krɩstʋ mba toovenim mba pɩzɩɣ ɖɔɖɔ nɛ pɔtɔlɩ ɛsa nɛ tomnaɣ kɔɖɛyɩ kpaca taa. Pʋyɔɔ lɛ, Ɛsɔtɔm seɣtiɣ-ɖʋ se ɖɩñaɣ pana nɛ ɖɩwɛɛnɩ tɩ ɖɔkʋʋ, mbʋ ɖɩnaɣ nɛ mbʋ ɖɩsɔɔlaa yɔ, pɩ-hɔɔlʋʋ taa. (1 Kɔr. 9:25, 27; kalɩ 1 Yohanɛɛsɩ 2:15-17) Ɛyʋ siɣsiɣ tʋ Yɔɔb kaayɔɔdɩ kpayɩ nɔɔ kʋɖʋmaɣ ŋga kɛwɛ mbʋ ɛyʋ naɣ nɛ mbʋ ɛyʋ sɔɔlʋʋ yɔ pɛ-hɛkʋ taa yɔ pɩ-tɔm. Ɛyɔɔdaa se: “Maaɖʋ mɛ-ɛsa paɣtʋ se ataawolo pɛlɛ nɔɔyʋ yɔɔ kaaʋ.” (Yɔɔb 31:1) Pɩtasɩna se Yɔɔb taasɔɔlɩ se etukuni halʋ nɔɔyʋ nɛ ɛ nɛ ɩ pala kɩwɛɛkɩm lɛ, ɛtaatɩɩsɔɔlʋʋ ɖɔɖɔ se wɛtʋ ndʋ tɩwɛɛ ɛ-lɩmaɣza taa. Yesu ñɩɣ niye se pɩcɛyaa se ɖa-lɩmaɣza ɛwɛɛ kele kele nɛ wezuu kɩdɛkɛdʋʋ caɣʋ etaapisi-yɛ alɩwaatʋ ndʋ ɛyɔɔdaa se: “Nɔɔyʋ ɛwɛɛ nɛ ɛcɔŋnɩ halʋ nɔɔyʋ nɛ e-liu tɛɛ kɔtʋʋnɩ-ɩ yɔ, ɛtɛm labʋ acɛyɛ nɛ halʋ ɛnʋ ɛ-laŋɩyɛ taa.”—Mat. 5:28.
Fezuu taa ñɩm
w15 15/11 13 § 2-3
Tɔm ndʋ ɖa-takayɩsɩ kalɩyaa pɔzʋʋ yɔ
Caanaʋ taa lɛ, ɖoŋ ɖoŋ lɛ, ɛtɛlɛmwaa wokaɣ nɛ pɛñɛyɩɣ tɛtʋ ɖoŋ ñɩndʋ. Paa alɩwaatʋ ɛzɩma pɩtɩɩkpakɩɣ-wɛ yɔ, pañakɩ pana se palazɩ tɛtʋ taa mba ñɩm, pɩkpɛndɩnɩ pɔ-tɔɔnasɩ nzɩ sɩkazɩ-wɛ yɔ. Ɛlɛ Yeriikoo njɛyɛ taa lɛ, tɛtɛɛ ñɩm huyiyaa lɩ tɔɔnasɩ sakɩyɛ yɔɔ. Pɩ-nʋmɔʋ taa lɛ, takayaɣ nakɛyɛ (Biblical Archaeology Review) yɔɔdʋʋ se: Wondu sakɩyɛ ndʋ palɩ tɩ-yɔɔ njɛyɛ nɖɩ taa yɔ, pɩtasɩnɩ cʋʋ ñanzɩ lɛ, pana ɖɔɖɔ tɔɔnasɩ pee. . . . Nɛ wɛtʋ tʋnɛ tɩwɛ ŋgee kpem tɔm ndʋ Palɛstiini egeetiye taa tɛtɛɛ ñɩm huyiyaa mawa yɔ tɩ-taa. Papɩzɩɣ pana ŋgbɔʋ kʋɖʋmʋʋ yaa ŋgbaŋ naalɛ, ɛlɛ pɩlabɩ piti se papɩzaa nɛ palɩɩ tɔɔnasɩ sakɩyɛ nzɩ sɩ-yɔɔ.”
Ɛzɩ Masɩ yɔɔdʋʋ yɔ, Izrayɛɛlɩ mba kaawɛnɩ toovenim se pataalazɩ Yeriikoo mba tɔɔnasɩ pee. Yehowa ɖʋ-wɛ paɣtʋ se pataala mbʋ. (Yoz. 6:17, 18) Izrayɛɛlɩ mba wobi Yeriikoo tɛtʋ wayɩ yolum alɩwaatʋ taa, patɩɩtɛm tɔɔnasɩ kpaɣʋ nɛ tɔɔnasɩ tɔyɩ tɛtʋ taa lɛ. (Yoz. 3:15-17; 5:10) Ɛzɩma palɩ tɔɔnasɩ sakɩyɛ yɔɔ Yeriikoo njɛyɛ taa yɔ, pɩwɩlɩɣ se alɩwaatʋ pazɩ yem Izrayɛɛlɩ mba kpaɣaa nɛ pɛñɛyɩnɩ tɛtʋ ndʋ ɛzɩ Bibl yɔɔdʋʋ yɔ.
4-10 OCTOBRE
ÑƖM MBƲ PƖWƐ ƐSƆTƆM TAA YƆ | YOZUWEE 8–9
“Lɔŋ weyi Gabawɔɔ Mba yɔɔ tɔm kpɛlɩkɩɣ-ɖʋ yɔ”
it-1 1046
Gabawɔɔ
Kɩ nɛ Yozuwee pɔ-tɔm. Yozuwee alɩwaatʋ taa lɛ, Kanaŋ ajɛɛ lʋbɛ wena pɩɩwɛɛ se ɛɖɩzɩ-yɛ yɔ, a-taa naɖɩyɛ lɛ Hivi mba ɛjaɖɛ nɖɩ payaɣ se Gabawɔɔ yɔ. (Wp. 7:1, 2; Yoz. 9:3-7) Payaɣaɣ Gabawɔɔ mba ɖɔɖɔ se Amoori mba, mbʋ pʋyɔɔ yɔ hɩɖɛ nɖɩ payaɣaɣnaɣ ɖoŋ ɖoŋ Kanaŋ mba tɩŋa. (2Sam. 21:2; kpaɣ-tʋ nɛ ŋmaɣzɩnɩ Kiɖe 10:15-18; 15:16) Gabawɔɔ mba tɩla ɛzɩ Kanaŋ mba yɔ mbʋ pʋyɔɔ yɔ, panɩ pɩ-taa se paa paawɛnɩ sɔɔjanaa mba pɛwɛ ɖoŋ yɔ nɛ pɛ-tɛtʋ kaapaɣlɩ siŋŋ yɔ, paakaɣ pɩzʋʋ nɛ pakaɖɩnɩ Izrayɛɛlɩ mbʋ pʋyɔɔ yɔ, pɛ-Ɛsɔ Yehowa wɛɛ nɛ ɛlakɩ you po-lone taa. Pʋyɔɔ lɛ, alɩwaatʋ ndʋ Izrayɛɛlɩ mba ɖɩzɩ Yeriikoo tɛtʋ nɛ Ayi tɛtʋ yɔ, Gabawɔɔ mba, pɩtʋʋ fɛyɩ se pɩkpɛndɩnɩ Hivi mba tɛtʋ naadozo lɛɛtʋ, pʋ-tɔbʋʋ se Kefira, Beerɔɔtɩ nɛ Kiriyatɩ-Yeyarim mba ɖɔɖɔ (Yoz. 9:17) tiyi ɛyaa Yozuwee cɔlɔ Gilgaalɩ se pa nɛ Izrayɛɛlɩ, pala laŋhɛzɩyɛ. Mba petiyaa yɔ, paasu wondu ndʋ tɩpɩnaa nɛ tɩcɩyɩ nɛ pa-naataŋgbala ñɛwɛɛ ɖɔɖɔ mbʋ. Peɖiɣzinaa se Yehowa nesi kaawɛ mbʋ pɩɩtalɩ Ejipiti mba, nɛ Amoori mba awiya Sihɔɔnɩ nɛ Oogi yɔ pɩ-taa. Ɛlɛ palabɩ lɛɣtʋ nɛ patɩyɔɔdɩ mbʋ pɩtalɩ Yeriikoo tɛtʋ nɛ Ayi tɛtʋ yɔ, mbʋ pʋyɔɔ yɔ piyeki nɛ ɛyaa maɣzɩ se tɔm ndʋ tɩtɩtalɩtɩ “ɖooo poliŋ taa ɛjaɖɛ” nɖɩ ɖɩ-taa pɔyɔɔdʋʋ se palɩnaa yɔ. Mba paaɖɛ Izrayɛɛlɩ samaɣ nɔɔ yɔ, patazɩ tɔm taa lɛ, petisi nɛ paɖʋ-wɛ nɛ ɛgbɛyɛ se paalɩzɩɣ pe-weziŋ.—Yoz. 9:3-15.
w11 15/11 8 § 14
“Taataa liu ña-maɣmaɣ ñɔ-lɔŋsɩnɖɛ”
14 Ðɩtɩtalɩ pilim; pʋyɔɔ lɛ ɖa-tɩŋa payɩ halɩ pɩkpɛndɩnɩ ɛzʋtʋyaa mba papɩ fezuu taa yɔ, pɩwɛɛ se ɖɩkpa ɖa-tɩ nɛ ɖitaayele Yehowa ñɩnʋʋ se eɖiyi-ɖʋ alɩwaatʋ ndʋ ɖɩcaɣ lɩmaɣzɩyɛ naɖɩyɛ kpaɣʋ yɔ. Yele nɛ ɖɩyɔɔdɩ Yozuwee, weyi ɛlɛɣzɩ Moyizi lone taa yɔ nɛ Izrayɛɛlɩ taa ɛyaa mba pasʋtʋyaa yɔ pa-kɩɖaʋ tɔm. Gabawɔɔ mba labɩ lɛɣtʋ nɛ pɩwɛɛ ɛzɩ ɖooo poliŋ ɛjaɖɛ naɖɩyɛ taa palɩnaa yɔ nɛ powolo pɔ-cɔlɔ. Patɩpɔzɩ se patɩlɩ Yehowa lɩmaɣza, ɛlɛ pala laŋhɛzɩyɛ nɛ Gabawɔɔ mba nɛ pa nɛ wɛ paɖʋ ɛgbɛyɛ. Paa Yehowa ɛɖʋ nesi pa-ɖama nɩnʋʋ mbʋ yɔ, eyeba nɛ pama ɛzɩma patɩñɩnɩ se patɩlɩ ɛ-lɩmaɣza yɔ pɩ-tɔm Bibl taa se pɩkpɛlɩkɩ-ɖʋ lɔŋ.—Yoz. 9:3-6, 14, 15.
w04 15/10 18 § 14
“Kilimi tɛtʋ yɔɔ”
14 Gabawɔɔ mba tiyi ɛyaa mba yɔ, pɔyɔɔdaa se: “Ðooo poliŋ taa ɛjaɖɛ taa ña-lɩmɖʋyaa lɩnaa nɛ pɔkɔɔ Kɩbaɣlʋ ñɛ-Ɛsɔ hɩɖɛ taa.” (Yoz. 9:3-9) Po-wondu ndʋ posuwa yɔ nɛ tɔɔnaɣ ŋga pɔɖɔkaa yɔ, pɩwɩlaɣ se pɩwɛ ɛzɩ palɩnɩ poliŋ taa yɔ ɛlɛ toovenim taa lɛ, Gabawɔɔ kaaposini Gilgaalɩ nɛ kilomɛtanaa 30 mbʋ yɔ. Yozuwee nɛ samaɣ ñʋndɩnaa pa-taa kaatɛmnɩ tɔm ndʋ peheyi-wɛ yɔ, pʋyɔɔ pa nɛ Gabawɔɔ mba nɛ ajɛɛ wena aañɔtɩnɩ-kʋ yɔ paɖʋ ɛgbɛyɛ. Ɛzɩma pataakɔɔ nɛ pehiɣ sɩm yɔ pi-ɖeke pʋyɔɔ Gabawɔɔ mba labɩ ajitu ndʋ? Pɩtɩkɛ pi-ɖeke pʋyɔɔ, ɛlɛ paasɔɔlaa se pɔ-tɔm ɛkɛdɩnɩ Izrayɛɛlɩ mba tɛ Ɛsɔ. Yehowa tisi tʋmɩyɛ nɖɩ paɖʋ Gabawɔɔ mba yɔ ɖɩ-yɔɔ nɛ papɩsɩ mba “pacaɣ ɖasɩ nɛ poluu lɩm ɛyaa samaɣ” yɔ. (Yozuwee 9:11-27) Gabawɔɔ mba wobi pɩ-yɔɔ nɛ poluzuu pa-tɩ nɛ pɔsɔɔlɩ faaa se palakɩ paa tʋmɩyɛ nɖɩ Yehowa sɛtʋ taa. Pɩtʋʋ fɛyɩ se pa-taa nabɛyɛ kaawɛ Netiinim waa mba palɩnɩ Babilɔɔnɩ nɛ papɩsɩ nɛ pala tʋmɩyɛ kpaaŋ ŋgʋ paɖaɣnɩ maʋ yɔ kɩ-tɛɛ yɔ. (Ɛsdrasɩ 2:1, 2, 43-54; 8:20) Ðɩpɩzɩɣ nɛ ɖɩmaɣzɩnɩ pɛ-wɛtʋ ye ɖɩñakɩ pana se laŋhɛzɩyɛ ɛwɛɛ ɖa nɛ Ɛsɔ ɖɛ-hɛkʋ taa nɛ ɖitisiɣ faaa se ɖiluzi ɖa-tɩ nɛ ɖɩla paa tʋmɩyɛ nɖɩ lɛ ɛ-sɛtʋ taa yɔ.
Fezuu taa ñɩm
it-2 523
Tɩʋ yɔɔ puzuu
Yehowa kaaɖʋ paɣtʋ ndʋ Izrayɛɛlɩ yɔ tɩ-taa lɛ, pɩɩwɛɛ se popuzi kɩwɛɛkɩm laɖaa nabɛyɛ ɖaʋ yɔɔ alɩwaatʋ ndʋ pɛtɛm-wɛ kʋʋ yɔ nɛ pɛkɛnɩ mba ‘Ɛsɔ lɔ pɔ-yɔɔ nɔɔ yɔ’ se samaɣ ɛna-pʋ nɛ pɩkɛnɩ-kɛ niye wɩlʋʋ. Weyi popuzi e-tomnaɣ ɖaʋ yɔɔ mbʋ yɔ, pɩɩwɛɛ se petisi-kɛ pʋcɔ nɛ ɖoo yu nɛ pepim-kɛ; ye peyebi-kɛ ɖaʋ yɔɔ mbʋ ɖoo kpeekpe yɔ, pepisiɣ tɛtʋ ndʋ Ɛsɔ ha Izrayɛɛlɩ mba yɔ. (Wp. 21:22, 23) Izrayɛɛlɩ mba ɖɔŋaɣ paɣtʋ ndʋ tɩ-yɔɔ, paa weyi pakʋwa yɔ ɛtɩkɛ Izrayɛɛlɩ tʋ yɔ.
11-17 OCTOBRE
ÑƖM MBƲ PƖWƐ ƐSƆTƆM TAA YƆ | YOZUWEE 10–11
“Yehowa lakɩ you Izrayɛɛlɩ yɔɔ”
it-1 48
Adoni-Zedɛkɩ
Ɛɛkɛ Yeruzalɛm wiyaʋ alɩwaatʋ ndʋ Izrayɛɛlɩ mba mʋwaɣ lidaʋ tɛtʋ yɔ. Adoni-Zedɛkɩ kpɛndɩ Yɔɔrdaŋ wɩsɩ ɖɩɖʋyɛ taa awiya cikpena lɛɛna yɔɔ nɛ pakaɖɩnɩ Yozuwee weyi ɛlakaɣ-wɛ nɛ you se ɛmʋ pɛ-tɛtʋ yɔ. (Yoz 9:1-3) Paa mbʋ yɔ, Hiivi ñɩma mba paawɛ Gabawɔɔ yɔ paɖʋ laŋhɛzɩyɛ ɛgbɛyɛ nɛ Yozuwee. Pɩsa nɛ ɛkaɖɩnɩ mpa peseɣ nɛ paɖʋʋ kʋyʋʋ koyindu lɛ, Adoni-Zedɛkɩ kpeɣli ɛ-sɔɔjanaa nɛ pɩkpɛndɩnɩ Amoni mba awiya naanza nɛ ewolo nɛ ɛñɛyɩ Gabawɔɔ nɛ ɛlabɩ-kʋ nɛ you. Pɩlabɩ piti kpem ɛzɩma Yozuwee pɩzaa nɛ ɛya Gabawɔɔ mba ñʋʋ nɛ ɛwa ajɛɛ ana a-sɔɔjanaa yɔ, nɛ pʋyɔɔ lɛ, awiya ana ase nɛ aɖɛɛ Makeda nɛ palɩɩ a-yɔɔ peeɖe kaaʋ pɔʋ nakʋyʋ taa. Yozuwee maɣmaɣ kʋ Adoni-Zedɛkɩ nɛ awiya naanza waa lalaa, Adoni-Zedɛkɩ ɛnʋ ɛ-sɔɔjanaa ɛsɩndaa nɛ epuzi-wɛ ɖaŋ yɔɔ. Pʋwayɩ lɛ papɩsɩnɩ po-tomnasɩ nɛ pɛpɛɖɩ kaaʋ pɔʋ ŋgʋ kɩ-taa nɛ kɩpɩsɩ pa-pɩlaʋ.—Yoz 10:1-27.
it-1 1028
Ðɔm pɛɛ
Yehowa labɩnɩ-yɛ tʋmɩyɛ. Ðɔm pɛɛ kɛnɩnɩ ɖoŋ weyi Yehowa labɩnɩ tʋmɩyɛ alɩwaatʋ natʋyʋ taa nɛ eyele nɛ tɔm ndʋ ɛyɔɔdaa yɔ, tɩla nɛ ɛlɩzɩ e-ɖoŋ sɔsɔŋ nɛ ɛwɩlɩ. (Keɣa 141:1, 8; Iza. 30:30) Ɛlabɩnɩ-yɛ tʋmɩyɛ kajalaɣ ɖeɖe alɩwaatʋ ndʋ ɛkɔnɩ kʋñɔŋ lʋbɛ ñɩŋgʋ caanaʋ taa Ejipiti yɔɔ yɔ. Pɩɩkɛ ɖɔm pɛɛ tɛʋ ŋgʋ kɩwɛɛkɩ hayɩm taa ñɩtʋ nɛ tɔɔnasɩ, kɩpʋʋtɩ tɩŋ nɛ kɩkʋ ɛyaa nɛ kpɩna wena aawɛ hayɩm taa yɔ, ɛlɛ kɩtɩla nabʋyʋ Izrayɛɛlɩ ñɩma mba paawɛ Gosɛɛnɩ yɔ. (Ejl. 9:18-26; Keɣa 77:47, 48; 104:32, 33) Pʋwayɩ, Izrayɛɛlɩ ñɩma mba Yozuwee ɖɛ-wɛ nɔɔ yɔ, paawɛ lidaʋ tɛtʋ taa nɛ powolo se paya Gabawɔɔ ñɩma mba Amoni awiya kagbanzɩ kaawoba se poyooni-wɛ yɔ pa-ñʋʋ lɛ, Yehowa labɩnɩ tʋmɩyɛ ɖɔm pɛɛ sɔsɔna nɛ ɛkʋ Amoni ñɩma mba. Puwiye mba pasɩbɩ nɛ ɖɔm pɛɛ yɔ, pɛcɛzɩ mba Izrayɛɛlɩ mba kʋwa yɔ.—Yoz. 10:3-7, 11.
w04 1/12 11 § 1
Yozuwee takayaɣ taa lɩmaɣza sɔsɔna
10:13—Ɛzɩma lakasɩ nzɩ sɩpɩzɩɣ nɛ sɩla? “Ɛzɩ nabʋyʋ kpaɖɩ [Yehowa]”, ɛnʋ weyi ɛlɩzɩ ɛsɔdaa nɛ tɛtʋ yɔ? (Kiɖe Tɛɛ Tɔm 18:14) Yehowa ɛsɔɔlaa yɔ, ɛpɩzɩɣ nɛ ɛtɩŋnɩ lakasɩ nasɩyɩ yɔɔ nɛ eyele nɛ ɛyʋ weyi ɛwɛ tɛtʋ yɔɔ yɔ, ɛnaɣ wɩsɩ nɛ fenaɣ lɛ, pɩlabɩ-ɩ ɛzɩ pasɩŋaa yɔ. Yaa ɛpɩzɩɣ ɖɔɖɔ nɛ ɛɛsɩnzɩɣ ɛzɩma wɩsɩ nɛ fenaɣ pɔcɔʋ yɔ, ɛlɛ eyele nɛ ñalɩmɩyɛ nɖɩ pahaɣ yɔ, ɖɩwɛɛ ñandʋʋ yɔɔ. Paa pɩtɩɩkɛ suwe yɔ, wɛtʋ ndʋ tɩtɩtasɩ labʋ “kɩyakʋ nakʋyʋ” kaaʋ.—Yozuwee 10:14.
Fezuu taa ñɩm
w09 15/3 32 § 5
Tɔm ndʋ ɖa-takayɩsɩ kalɩyaa pɔzʋʋ yɔ
Pɩtɩpɔzɩ se ɖɩmaɣzɩ se fezuu kiɖeɖeu ɖiyina nɛ pama takayɩsɩ nasɩyɩ mbʋ pʋyɔɔ yɔ pɔyɔɔdɩ sɩ-tɔm Bibl taa nɛ palakaɣnɩ-sɩ tʋmɩyɛ alɩwaatʋ ndʋ tɩ-taa. Ɛlɛ Yehowa kandɩyɩ takayɩsɩ nzɩ payɩ sɩ-taa pama “ɖɛ-Ɛsɔ tɔm” yɔ sɩ-yɔɔ; nɛ ‘sɩkaɣ wɛʋ tam’ (Izaayii 40:8) Ɛɛɛ, mbʋ Yehowa lɩzaa se pɩwɛɛ Bibl takayɩsɩ, nzɩ sɩkpɛndɩ 66 nɛ ɖɩlakɩnɩ-sɩ tʋmɩyɛ sɔnɔ yɔ sɩ-taa yɔ, mbʋ ɖeyi ɖeyi pɩpɔzʋʋ-ɖʋ se pɩsa nɛ ‘ɖɩmʋnɩ camɩyɛ, pɔñɔɔzɩ-ɖʋ camɩyɛ nɛ ɖɩpɩzɩ nɛ ɖɩla paa tʋmɩyɛ kɩbanɖɛ nɖɩ.’—2 Tim. 3:16, 17.
18-24 OCTOBRE
ÑƖM MBƲ PƖWƐ ƐSƆTƆM TAA YƆ | YOZUWEE 12–14
“Ña Yehowa nɛ ña-laŋɩyɛ pilim”
w04 1/12 12 § 2
Yozuwee takayaɣ taa lɩmaɣza sɔsɔna
14:10-13. Paa ɛɛwɛnɩ pɩnzɩ 85 yɔ, Kalɛɛb pɔzaa se paɖʋ-ɩ tʋmɩyɛ kaɖɛ ñɩnɖɛ naɖɩyɛ. Nɖɩ lɛ se ɛla you nɛ ɛmʋ Ebrooni egeetiye. Anak ñɩma mba patalɩ ɛyaa kpem yɔ, mba paawɛnɩ egeetiye nɖɩ ɖɩ-taa. Yehowa sɩnɩ-ɩ nɛ ɛpɩzɩ nɛ ɛwa you nɛ Ebrooni pɩsɩ ɖɩjɔzɩyɛ tɛtʋ. (Yozuwee 15:13-19; 21:11-13) Kalɛɛb kɩɖaʋ seɣtiɣ-ɖʋ se ɖitaase sɔndʋ teokrasɩ tʋma wena a-labʋ wɛ-ɖʋ kaɖɛ yɔ.
w06 1/10 18 § 11
Tisuu nɛ Ɛsɔ sɔɔndʋ seu ɩha-ŋ abalɩtʋ
11 Tisuu mbʋ, pɩtɩkɛ mbʋ pɩɩlɛɣzɩɣ yɔ. Pɩwɛɣ nɛ pɩpaɣlɩɣ alɩwaatʋ ndʋ ɖɩcakɩ wezuu nɛ pɩlakɩ nɔɔ kʋɖʋmaɣ nɛ toovenim, alɩwaatʋ ndʋ ‘ɖɩɖɩŋɩɣ’ nɛ ‘ɖɩnaɣ’ toovenim wazasɩ yɔ; alɩwaatʋ ndʋ ɖɩnaɣ se Ɛsɔ cosuu ɖa-adɩma yɔɔ yɔ nɛ alɩwaatʋ ndʋ ɖɩnaɣ se Yehowa wɛɛ nɛ eɖiyiɣ-ɖʋ ɖe-wezuu caɣʋ taa yɔ. (Keɣa 33:9; 1 Yohanɛɛsɩ 5:14, 15). Pɩtʋʋ fɛyɩ se Yozuwee nɛ Kalɛɛb pe-tisuu cɛyɩsɩ camɩyɛ alɩwaatʋ ndʋ paɖɩŋ camɩyɛ lakasɩ nzɩ Ɛsɔ labɩ-wɛ yɔ. (Yozuwee 23:14) Iyele nɛ ɖɩyɔɔdɩ sɩ-taa nasɩyɩ tɔm. Yehowa kandɩyɩ pɔ-yɔɔ nɛ patɩsɩ kañɩmbusuu taa ɛzɩ ɛɛyɔɔdʋʋ yɔ. (Kɩgalʋʋ 14:27-30; 32:11, 12) Paalabɩ tʋma sɔsɔna nɛ abalɩtʋ pɩnzɩ loɖo. Pɩnzɩ nzɩ pakpaɣ nɛ pamʋnɩ Kanaŋ ɛjaɖɛ. Kɛdɛzaɣ ɖeɖe lɛ, pacaɣ wezuu nɛ pɩɖaɣlɩ nɛ pɛwɛɛnɩ tomnaɣ taa alaafɩya nɛ halɩ papɩzɩ nɛ pamʋ tɛtʋ ndʋ pʋwayɩ patayaa nɛ pɛcɛlɩ-wɛ yɔ. Yehowa wazɩɣ mba pɛsɛɣ-ɩ nɛ siɣsiɣ wɛtʋ nɛ abalɩtʋ yɔ kpem!—Yozuwee 14:6, 9-14; 19:49, 50; 24:29.
Fezuu taa ñɩm
it-1 1032
Gebal
Yozuwee alɩwaatʋ taa, Yehowa kaayɔɔdaa se “[Gebal] mba tɛtʋ” wɛ tɛtʋ ndɩ ndɩ ndʋ pɩɩwɛɛ se Izrayɛɛlɩ mba ɩmʋ yɔ tɩ-taa. (Yozuwee 13:1-5) Nabɛyɛ yɔɔdʋʋ se tɔm ndʋ tɩtɩkɛ toovenim mbʋ pʋyɔɔ yɔ, Gebal wɛ ɖooo Izrayɛɛlɩ hayo kiŋ (kiiposini Daanɩ ɛzɩ kilomɛtawaa 100 mbʋ yɔ nɛ hayo kiŋ). Nɛ pɩwɩlɩɣ se wiɖiyi Izrayɛɛlɩ mba tɩtɔɔ tɩ-yɔɔ kewiyitu kaaʋ. Lɔŋsɩnɖaa nabɛyɛ yɔɔdaa se Ebree tɔm pee naayɛ hɩzɩnɩ mayaɣ kanɛ ka-taa. Nɛ kiɖe tɛɛ lɛ, paamawa se “tɛtʋ ndʋ tɩtamnɩ Libaŋ yɔ” yaa ‘piwolo nɛ pɩsɩɩnɩ ɖooo Gebal mba kamaɣ yɔɔ.’ Ɛlɛ pɩwɛɛ se ɖɩtɔzɩ se mbʋ pɩɩwɛɛ se Izrayɛɛlɩ mba ɩla nɛ pamʋ tɛtʋ ndʋ yɔ, pɩ-tɔm Yehowa yɔɔdɩ Yozuwee 13:2-7 taa. Ye mbʋ pɩpɩzɩɣ nɛ pɩla se ɛzɩma kɩtaawɛɛ siɣsiɣ yɔ pʋyɔɔ lɛ, kɩtɩpɩzɩ nɛ kɩmʋ Gebal.—Kpaɣ-tʋ nɛ ŋmaɣzɩnɩ Yozuwee 23:12-13.
25-31 OCTOBRE
ÑƖM MBƲ PƖWƐ ƐSƆTƆM TAA YƆ | YOZUWEE 15–17
“Kandɩyɩ ñɩm sɔsɔm mbʋ pɛcɛlɩ-ŋ yɔ pɩ-yɔɔ”
it-1 1101 § 2
Ebrɔŋ
Alɩwaatʋ ndʋ Izrayɛɛlɩ mba wɛɛ nɛ palakɩnɩ you Kanaŋ mba lɛ, paɖɩzɩ Ebrɔŋ mba pɩkpɛndɩnɩ Kewiyaɣ (pɩkɛɣnɩ wiyaʋ weyi ɛlɛɣzɩ Hoham lone taa yɔ). (Yoz. 10:36, 37) Ɛlɛ paa Izrayɛɛlɩ piya mba Yozuwee ɖiyaa yɔ pacamɩ Kanaŋ mba ɖoŋ yɔ, pataasɩɣ sɔɔjanaa kpaagbaa se pɔcɔŋnɩ mba pawabɩ-wɛ yɔ pɔ-yɔɔ. Pɩtɩla alɩwaatʋ ndʋ Izrayɛɛlɩ mba lakaɣ you hɔɔlʋʋ lɛɛkʋ taa yɔ, Anak mba pɩsaa nɛ pacaɣ Ebrɔŋ. Pʋyɔɔ pɩkɔm nɛ pɩpɔzɩ se Kalɛɛb (yaa Yuuda pɩyalaa mba Kalɛɛb ɖiyaa yɔ) paɖaɣnɩ mʋʋ tɛtʋ ndʋ pʋwayɩ. (Yoz 11:21-23; 14:12-15; 15:13, 14; Th 1:10) Paacalɩ cɛlʋʋ Ebrɔŋ Yuuda cejewiye taa tʋ Kalɛɛb, ɛlɛ pʋwayɩ lɛ, papɩsɩ-tʋ kiɖeɖetu nɛ tɩkɛ ɖɩjɔzɩyɛ tɛtʋ. Tɩɩkɛ ɖɔɖɔ cɔjɔnaa tɛtʋ. Paa mbʋ yɔ, Ebrɔŋ tɛtʋ nɛ ti-lona cikpena pɩɩkɛ Kalɛɛb nɛ ɛ-lʋlʋʋ taa mba pʋyʋ.—Yoz 14:13, 14; 20:7; 21:9-13.
it-2 1097
Kɩjɛyʋʋ tʋmɩyɛ
Bibl alɩwaatʋ taa lɛ, ɖoŋ ɖoŋ lɛ, paɖʋwaɣ ɛyaa kɩjɛyʋʋ tʋma nɛ ye pamʋ nabɛyɛ tɛtʋ yɔ papɩsɩɣ-wɛ yomaa. (Wp. 20:11; Yoz. 16:10; 17:13; Ɛst. 10:1; Iza. 31:8; Witu 1:1) Izrayɛɛlɩ mba kaakɛ yomaa nɛ paɖʋʋ-wɛ kɩjɛyʋʋ tʋma nɛ Ejipiti ñɩma wɩlaɣ-wɛ ñaŋ alɩwaatʋ ndʋ pamaɣaɣ kpoŋ weyi payaɣ se Pitoom nɛ Raamsɛɛsɩ yɔ. (Ejl. 1:11-14) Pʋwayɩ pɔkɔma nɛ pasʋʋ Lidaʋ Tɛtʋ taa lɛ, ɖenɖe ɛzɩ paaɖɔm Yehowa paɣtʋ yɔɔ nɛ pɔɖɔɔnɩ Kanaŋ mba tɩŋa nɛ paɖɩzɩ-wɛ lɛ, Izrayɛɛlɩ mba yebi-wɛ nɛ pɛwɛɛ wezuu nɛ paɖʋ-wɛ tʋma. Piyeba nɛ pɔkɔɔ nɛ pɛwɛɛnɩ ɖoŋ kɩdɛkɛdɩŋ Izrayɛɛlɩ mba yɔɔ nɛ papaɣzɩ sɛʋ cɛtɩm ɛsɔnaa. (Yoz. 16:10; Th. 1:28; 2:3, 11, 12) Wiyaʋ Salomɔɔ wobi pɩ-yɔɔ nɛ ɛɖʋʋ Kanaŋ mba, Amoori mba, Hiiti mba, Perizi mba, Hivi mba lʋlʋʋ taa piya kɩjɛyʋʋ tʋma.—1 Aw. 9:20, 21.
it-1 390 § 4
Kanaŋ
Paa Kanaŋ mba sakɩyɛ ɩtɩsɩ alɩwaatʋ ndʋ pamʋwaɣ pɛ-tɛtʋ yɔ, papɩzɩɣ nɛ pɔyɔɔdɩ se “[Yehowa] ha Izrayɛɛlɩ tɛtʋ kpeekpe, ndʋ eeɖuuni pa-caanaa se ɛhaɣ-wɛ” yɔ nɛ eyeba nɛ pehiɣ ‘hɛzɩyɛ’ ajɛɛ wena acɔ-wɛ nɛ ata yɔ a-cɔlɔ nɛ “tɔm kɩbandʋ ndʋ Kɩbaɣlʋ kaaheyi Izrayɛɛlɩ ɖɩɣa yɔ tɩ-taa paa kʋɖʋmtʋ tɩɖɛɛ yem falaa, ɛlɛ tɩ-tɩŋa payɩ tɩlaba.” (Yoz. 21:43-45) Ajɛɛ wena acɔ-wɛ nɛ ata yɔ aseɣaɣ-wɛ sɔɔndʋ nɛ pʋyɔɔ lɛ, ataapɩzɩɣ se alabɩ-wɛ kɩdɛkɛdɩm nabʋyʋ. Ɛsɔ kaatɛm-wɛ heyuu se ɛkaɣ ɖɔnʋʋ Kanaŋ mba pɛ-ɛsɩndaa “pazɩ pazɩ” se pɩsa nɛ ñɩtʋ taa kpɩna itaahuu nɛ akʋyɩ pɔ-yɔɔ. (Ejl. 23:29, 30; Wp. 7:22) Paa Kanaŋ mba kaawɛnɩ you kɛɛkɛɛnaa mba pɔ-yɔɔ nɛ sɩsɩ nɛ you wondu ndʋ tɩkpaɖɩ pa-ñɩndʋ yɔ, alɩwaatʋ ndʋ payɩ Izrayɛɛlɩ mba tɩpɩzɩ nɛ pamʋ ageeta naayɛ yɔ, paapɩzɩɣ nɛ pɔyɔɔdɩ se Yehowa cɔlɔ pɩlɩnaa yaa pɔyɔɔdɩ se ɛtɩɖɔ ɛ-tɔm yɔɔ. (Yoz 17:16-18; Th 4:13) Ɛlɛ kɛdɛsɩ wɩlɩɣ se pawabɩ-wɛ mbʋ pʋyɔɔ yɔ patɩɖɔkɩ pe-siɣsiɣ wɛtʋ.—Kɩg 14:44, 45; Yoz 7:1-12.
Fezuu taa ñɩm
w15 15/7 32
Ŋŋsɩm-tʋ?
Ɛzɩ laŋ sakɩyɛ kaawɛɛ Izrayɛɛlɩ ɛzɩ Bibl kɛdɛsɩ wɩlʋʋ yɔ? Bibl yɔɔdʋʋ se laŋ kaawɛ Lidaʋ Tɛtʋ hɔɔlɩŋ nɩɩyɩ taa nɛ tɩŋ ‘kaatɔyaa’. (1 Aw. 10:27; Yoz. 17:15, 18) Ɛlɛ nabɛyɛ pɩtɩɣ nɛ pɔtɔŋ se tɔm ndʋ tɩɩpɩzɩɣ nɛ tɩkɛ toovenim mbʋ pʋyɔɔ yɔ, sɔnɔ hɔɔlɩŋ ɛnɩ ɩ-taa laŋ fɛyɩ nɛ patɩsa se laŋ kaawɛ peeɖe caanaʋ taa.
Takayaɣ nakɛyɛ (Life in Biblical Israel) yɔɔdaa se “laŋ kaawɛ caanaʋ taa Izrayɛɛlɩ taa kpem nɛ pɩkpaɖɩ lɛɛlɛɛyɔ.” Ðoŋ ɖoŋ lɛ, tɩŋ ɩnɛ ɩñɔʋnɩ piyisi yɔɔ: Tɩŋ weyi payaɣ se pin d’Alep (Pinus halepensis) yɔ, Palestine tɩŋ weyi ɩñɔʋ ɖama cɔlɔ yɔ (Quercus calliprinos), nɛ cɔka wena payaɣ se térébinthe (Pistacia palaestina) yɔ. Nɛ sycomores tɩŋ (Ficus sycomorus) ñaatɔyɩ Shéphéla taa, Yuuda piyisi egeetiye nɖɩ ɖɩwɛ Yuuda ɛjaɖɛ hɛkʋ taa pʋŋ nɛ Mediiteraanee kidiiliŋ pɛ-hɛkʋ taa yɔ.
Takayaɣ nakɛyɛ (Les plantes de la Bible) yɔɔdaa se tɩŋ tɩtasɩ wɛʋ Izrayɛɛlɩ hɔɔlɩŋ nɩɩyɩ taa sɔnɔ. Ɛbɛ cɔlɔ pɩlɩnaa? Takayaɣ ŋga kɔyɔɔdaɣ mbʋ pɩ-cɔlɔ pɩlɩnaa yɔ pɩ-tɔm lɛ, kɔtɔm se: “Ɛyʋ kɩlɩ sɛtʋʋ tɩŋ nɛ cɔka kadadayaɣ se pɩsa nɛ ɛwalɩsɩ ɛ-hayɩm nɛ ɛ-kpɩna ñɩtʋ ɖɩdɔɔyɛ yaa ɛmanɩ kuduyuŋ nɛ epuzini miŋ ɖɔɖɔ.