Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
3-9 JANVIER
ÑƖM MBƲ PƖWƐ ƐSƆTƆM TAA YƆ | TƆM HƲYAA 15-16
“Ɛyʋ lɛlʋ wayɩ lɩʋ kɛ kɩdɛkɛdɩm mbʋ pɩfɛyɩ ɖeu kpem yɔ!”
w12 15/4 8 § 4
Ɛyʋ lɛlʋ wayɩ lɩʋ kɛ alɩwaatʋ tɛ yʋsasɩ!
4 Kajalaɣ lɛ, iyele nɛ ɖɩyɔɔdɩ Daliila weyi Tɔm Hʋyʋ Samsɔɔ kaasɔɔlaa yɔ ɛ-tɔm. Samsɔɔ kaañɩnaɣ se eyooni Filistii mba nɛ ɛkandɩyɩ Ɛsɔ samaɣ yɔɔ. Pɩtɩla Filistii ñʋndɩnaa kagbanzɩ kaanawa se toovenim taa lɛ, Daliila taasɔɔlɩ Samsɔɔ, pʋyɔɔ palabɩ-ɩ kʋjɔŋ se eheyi-wɛ mbʋ pɩ-cɔlɔ Samsɔɔ ɖoŋ lɩnaa yɔ nɛ pɩsa nɛ papɩzɩ nɛ pakʋ-ɩ. Daliila tisaa nɛ ɛmʋ kʋjɔŋ ɛnɩ nɛ ɛñaɣ pana tam nabudozo se Samsɔɔ eheyi-i mbʋ pɩ-cɔlɔ e-ɖoŋ lɩnaa yɔ, ɛlɛ ɛtɩpɩzɩ. Ewolo pɩ-yɔɔ nɛ ɛhɔŋ Samsɔɔ nɔɔ nɛ “ɛcɛyɩɣ-ɩ kɩyakɩŋ kpeekpe.” Piyeba nɛ “pɩɖɛɛ-ɩ ɛzɩ ɛsɩ yɔ” nɛ eheyi-i se wiɖiyi hʋnʋʋ titukuni ɛ-ñʋʋ nɛ ye pahʋm ɛ-ñɔsɩ yɔ, elesiɣ e-ɖoŋ. Daliila nɩ mbʋ lɛ, eyele nɛ Samsɔɔ ɖoo ɛ-tala yɔɔ nɛ ɛhʋ ɛ-ñɔsɩ nɛ eyele nɛ e-koyindinaa kɔɔ nɛ pakpa-ɩ nɛ palabɩ-ɩ mbʋ pɔsɔɔlaa yɔ. (Th. 16:4, 5, 15-21) Kɩdɛkɛdɩm mbʋ kpem lɛ mbʋ yɔ! Ɛsa naɣnaɣ yeba nɛ Daliila lɩɩ abalʋ weyi ɛlɛ kaasɔɔlɩ-ɩ yɔ ɛ-wayɩ.
w05 15/1 27 § 5
Tɔm Hʋyaa takayaɣ taa lɩmaɣza sɔsɔna
14:16, 17; 16:16. Ye ɖɩwɛ nɔɔyʋ wayɩ kaŋ kaŋ nɛ wiluu nɛ ɖɩcɛyɩɣ-ɩ kɩyakɩŋ kpeekpe yɔ, pɩpɩzɩɣ nɛ pɩwɛɛkɩ ɖa nɛ ɩ ɖa-taabalɩyɛ.—Aduwa 19:13; 21:19.
w12 15/4 11-12 § 15-16
Ɛyʋ lɛlʋ wayɩ lɩʋ kɛ alɩwaatʋ tɛ yʋsasɩ!
15 Ɛzɩma nesi ɖɔkɩyaa pɩzɩɣ nɛ pɔñɔɔnɩ ɖama? Ɛsɔtɔm yɔɔdʋʋ se: “Nɩɩ leleŋ, ña nɛ ñe-evebitu taa halʋ [yaa walʋ]” nɛ “ña nɛ ña-halʋ [yaa ña-walʋ] kʋsɔɔlʋ ɩnɩɩ wezuu leleŋ.” (Adu 5:18; Ekl 9:9) Abalʋ nɛ ɛ-halʋ pɛwɛɣ nɛ pakpadɩyɩɣ lɛ, pɩpɔzʋʋ se pa-taabalɩyɛ ɛwɛɛ nɛ ɖɩcɛyɩsɩɣ tomnaɣ yɔɔ nɛ lɩmaɣza taa. Pʋ-tɔbʋʋ lɛ se pɩwɛɛ se pekeŋni ɖama camɩyɛ, pamʋʋ helim nɛ pɔñɔtʋʋnɩ ɖama nɛ pɩkɩlɩɣ! Pɩpɔzʋʋ se pañaɣ pana nɛ pakandɩyɩ pe-nesi ɖɔkʋʋ nɛ pa nɛ Yehowa pa-taabalɩyɛ yɔɔ. Pʋyɔɔ pɩwɛɛ se nesi ɖɔkɩyaa ɩkpɛndɩɣ nɛ pɛkpɛlɩkɩɣ Bibl, pɛkpɛndɩɣ nɛ posusuu tɔm ɖoŋ ɖoŋ nɛ pɛkpɛndɩɣ ɖɔɖɔ nɛ patɩmɩɣnɩ Yehowa se ɛwazɩ-wɛ.
ÐƆKƖ ÑE-SIƔSIƔ WƐTƲ YEHOWA ƐSƖNDAA KPAM
16 Krɩstʋ mba nabɛyɛ labɩ kɩwɛɛkɩm sɔsɔm nɛ ‘pekizini-wɛ tɔm nɛ ɛsɩyɛ kɩsɛɛmɩyɛ’ se pɩsa nɛ pakpa ɖoŋ tisuu taa.” (Tit 1:13) Halɩ nabɛyɛ lakasɩ yeba nɛ palɩzɩ-wɛ ɛgbɛyɛ taa. Pa-taa mba nɩŋgbaŋʋʋ hɔm ‘falɩsɩ-wɛ’ yɔ, papɩzaa nɛ paɖaɣnɩ hiɣu pe-fezuu taa wɛtʋ kɩbandʋ. (Ebr 12:11) Ɛbɛ pɩwɛɛ se ŋla ye palɩzɩ ñɔ-hɔʋ taa tʋ nɔɔyʋ yaa ña-taabalʋ nɔɔyʋ ɛgbɛyɛ taa yɔ? Ɛsɔ pɩpɔzʋʋ se ɖɩñɔɔna, pɩtɩkɛ ɛyʋ ɛnʋ. Yehowa wɛɛ nɛ ɛcɔŋnɩ-ɖʋ se ɛna se ɖɩkaɣ ñam paɣtʋ ndʋ ɛɖʋwa se ɖise mba payɩ palɩzɩ-wɛ ɛgbɛyɛ taa yɔ.—Kalɩ 1 Kɔrɛntɩ mba 5:11-13.
Fezuu taa ñɩm
w05 15/3 27 § 6
Yehowa ɖoŋ taa Samsɔɔ wɛɛ nɛ ɛwakɩ!
Samsɔɔ kaakam ɛ-lɩmaɣza ɛ-kaɖʋwa yɔɔ, ŋga lɛ se eyooni Filistii mba. Ɛɛcaɣ halʋ acɛyɛ laɖʋ nɔɔyʋ ɖɩɣa taa Gaazaa se pɩsa nɛ eyooni Ɛsɔ koyindinaa. Pɩɩwɛɛ se Samsɔɔ eɖoo e-koyindinaa tɛtʋ natʋyʋ taa nɛ halʋ acɛyɛ tʋ ɖɩɣa taa ɛpɩzaɣ se ehiɣ lone. Samsɔɔ taawɛɛnɩ kʋzʋʋ kɩdɛkɛdʋʋ lɩmaɣza ɛ-ñʋʋ taa. Pɩtalɩ ɖoo hɛkʋ lɛ, ɛlɩɩ halʋ ɛnʋ ɛ-ɖɩɣa taa nɛ ewolo ɛkpɛzɩ tɛtʋ nɔnɔɔ pɩkpɛndɩnɩ tilima naalɛ wena awɛ hɔɔlɩŋ yɔɔ yɔ nɛ ɛkpanɩ pʋʋ ŋgʋ kɩñɔtɩnɩ Ebrɔŋ tɛtʋ yɔ kɩ-ñʋʋ taa. Pʋʋ ŋgʋ kiiposini peeɖe ɛzɩ kilomɛtawaa 60 mbʋ yɔ. Ɛsɔ kaasɩnɩ Samsɔɔ nɛ ɛpɩzɩ nɛ ɛla mbʋ.—Th. 16:1-3.
10-16 JANVIER
ÑƖM MBƲ PƖWƐ ƐSƆTƆM TAA YƆ | TƆM HƲYAA 17-19
“Ɛsɔ paɣtʋ yɔɔ maʋ kɔŋnɩ kala”
it-2 278-279
Mikee
1. Ɛɛkɛ Efrayim cejewiye taa abalʋ nɔɔyʋ. Mikee kaamanɩ Paɣtʋ Hiu taa paɣtʋ lutozo ñɩndʋ yɔɔ (Ejl 20:15), nɛ ɛmɩlɩ e-ɖoo liidiye pɔɔyɩsɩ 1 100. Ɛkɔm nɛ ɛyɔɔdɩ mbʋ ɛlaba nɛ pɩfɛyɩ ɖeu yɔ nɛ ɛpɩsɩnɩ liidiye nɖɩ e-ɖoo nɛ ɛlɛ heyi-i se: “Mansɩwa nɛ maha liidiye nɖɩ Kɩbaɣlʋ: ɛmʋ-ɖɩ me-nesi tɛɛ man-pɩyalʋ yɔɔ, nɛ paasaɣnɩ ɖasɩ sɩʋ kpeliɣa nɛ ñɩɣyʋʋ sɩʋ kpeliɣa. Nɛ lɛɛlɛɛyɔ mɛncɛlɩɣ-ŋ ɖɩ.” Pʋwayɩ lɛ ewoni liidiye pɔɔyɩsɩ 200 nɛ ɛcɛlɩ kolu nɔɔyʋ se ɛlɛ elubini “ɖasɩ sɩʋ kpeliɣa, nɛ ñɩɣyʋʋ sɩʋ kpeliɣa,” nɛ pasɩɩ-sɩ Mikee ɖɩɣa taa. Mikee ɛnʋ ɛɛwɛnɩ ‘ɛsɔnaa ɖɩɣa’ nɛ ɛɛlabɩ Efood nɛ Terafim nɛ ɛlɩzɩ ɛ-pɩyalʋ nɔɔyʋ nɛ ɛha-ɩ ɖoŋ se ɛkɛ cɔjɔ. Pɩtʋʋ fɛyɩ se ɛlabɩ ɖʋtʋ ndʋ se ɛɖʋ hɩɖɛ Yehowa. Paa mbʋ yɔ, pɩɩkɛ ɖʋtʋ kɩdɛkɛdɩtʋ mbʋ pʋyɔɔ yɔ tɩkaɖɩnɩ Yehowa paɣtʋ ndʋ tɩtɔŋ se pataalaa sɩɩnaa yɔ. (Ejl 20:4-6) Pɩtasɩ lɛ, pɩwɩlɩɣ se ɛkɛzɩ kɩjaʋ Ɛsɔ sɛtʋ kɩɖanɖʋʋ nɛ cɔjɔnaa ɖʋtʋ ndʋ Yehowa kaalaba yɔ. (Th 17:1-6; Wp 12:1-14) Pʋwayɩ Mikee kɔma nɛ ɛkpa Yonataanɩ weyi ɛkɛ Moyizi pɩyalʋ Gɛrɩsɔɔm liɖe taa tʋ yɔ ɛ-ɖɩɣa taa se Leevi pɩɣa evelaɣ ŋga kɛkɛ-ɩ cɔjɔ. (Th. 18:4, 30) Paa mbʋ Mikee kaalaba yɔ pɩtaawɛɛ ɖeu yɔ, ɛ-taa kaalabɩ leleŋ nɛ ɛyɔɔdɩ se: “Lɛɛlɛɛyɔ . . . Kɩbaɣlʋ kaɣ-m labʋ kɩbandʋ.” (Th. 17:7-13) Ɛlɛ Yonataanɩ taakɛ Aarɔɔnɩ liɖe taa tʋ, nɛ pʋyɔɔ lɛ ɛtaamʋna se ɛla cɔjɔtʋ tʋmɩyɛ. Piyeba nɛ Mikee kɩdɛkɛdɩm tɛzɩ paɣlʋʋ.—Kɩg. 3:10.
it-2 278 § 3
Mikee
Pɩlabɩ pazɩ lɛ, Mikee nɛ ɛ-taabalaa paɖʋ Daanɩ cejewiye taa mba wayɩ. Pehiɣ-wɛ lɛ, pɔpɔzɩ Mikee se ɛbɛ laba, nɛ ɛlɛ cosi-wɛ se: “Molubi man-tɩ ɛsɔnaa mba yɔ, ɩkpaɣ-wɛ nɛ ɩkpɛndɩnɩ cɔjɔ nɛ mbʋ mɛwɛna yɔ pi-kpeekpe.” Nɛ Daanɩ pɩyalaa heyi-i se ye ewobi pɩ-yɔɔ nɛ ɛkaɖɩɣnɩ-wɛ yɔ, poyouni-i. Mikee nawa se Daanɩ pɩyalaa kpaɖɩ-ɩ ɖoŋ lɛ, ɛpɩsɩ. (Th. 18:22-26) Pʋwayɩ lɛ, Daanɩ pɩyalaa kɔma nɛ paɖɩzɩ Layiisi tɛtʋ nɛ pañaɣzɩ-tʋ miŋ nɛ pama Daanɩ tɛtʋ pi-lone taa. Yonataanɩ nɛ e-piya pɔkɔma nɛ papɩsɩ Daanɩ mba cɔjɔnaa; mba kaayebina “nɛ Mikee sɩʋ kpelisi caɣ pɔ-cɔlɔ wɛɛ kpeekpe wena a-taa Ɛsɔ ɖɩɣa [Ɛsɔ sɛtʋ kɩɖanɖʋʋ] kaawɛ Siiloo yɔ.”—Th. 18:27-31.
Fezuu taa ñɩm
w15 1/12 15 § 6
Bibl ŋgʋ pɛɖɛzɩ-kʋ camɩyɛ yɔ
6 Sɔnɔ, mbʋ pɩwɩlɩɣ se pɩpɔzʋʋ se pama Ɛsɔ hɩɖɛ Bibl taa yɔ, pɩɖɔwa. Traduction du monde nouveau kɩfalʋʋ ŋgʋ palɩzɩ pɩnaɣ 2013 taa Aŋglɛɛ taa yɔ, pama kɩ-taa Ɛsɔ hɩɖɛ tam 7216. Pɩwɩlɩɣ se Ɛsɔ hɩɖɛ wɛ kɩ-taa lona loɖo taa nɛ pɩkɩlɩ kɩbɩnʋʋ taa. Teŋgu Kɩsɩbʋʋ taa takayɩsɩ kikpiyisi taa tɔm kɩfatʋ natʋyʋ yebina nɛ pɔsɔzɩ Ɛsɔ hɩɖɛ masɩ kagbanzɩ taa.a (Cɔnɩ pɩ-tɛɛ tɔm.) Masɩ nzɩ yɔ: 1 Samɩyɛɛlɩ 2:25; 6:3; 10:26; 23:14, 16. Bibl takayɩsɩ kɩbɩnzɩ taa tɔm lɛɛtʋ yebina nɛ pɔsɔzɩ Ɛsɔ hɩɖɛ ɖɔɖɔ Tɔm Hʋyaa 19:18 taa.
17-23 JANVIER
ÑƖM MBƲ PƖWƐ ƐSƆTƆM TAA YƆ | TƆM HƲYAA 20-21
“Wolo pɩ-yɔɔ nɛ ŋñɩnɩɣ Yehowa lɩmaɣza”
w11 15/9 32 § 2
Ŋpɩzɩɣ nɛ ŋmaɣzɩnɩ Fineyaasɩ alɩwaatʋ ndʋ ŋkatɩɣ kala yɔ?
Bɛnjamɛɛ cejewiye taa abalaa nabɛyɛ kpa Gibeyaa tʋ nɔɔyʋ ɖaŋ nɛ pasʋʋnɩ-ɩ nɛ pakʋ-ɩ nɛ pɩtɛ lɛ, cejewe lɛɛna taa mba lɩɩ se poyouni Bɛnjamɛɛ cejewiye taa mba. (Th. 20:1-11) Pʋcɔ nɛ papaɣzɩ you lɛ, patɩmnɩ Yehowa se ɛsɩnɩ-wɛ. Paa mbʋ yɔ pawabɩ-wɛ tam nabʋlɛ nɛ pɩkɔnɩ-wɛ asɛyʋʋ siŋŋ. (Th. 20:14-25) Ɛzɩ paamaɣzaa se Yehowa tiwelisi pa-adɩma na? Yehowa kaasɔɔlɩ toovenim se pakpa kɩmɩyɛ na?
w05 15/1 27 § 9
Tɔm hʋyaa takayaɣ taa lɩmaɣza sɔsɔna
20:17-48—Ɛbɛ yɔɔ Yehowa kaaha nʋmɔʋ nɛ Bɛnjamɛɛ cejewiye taa mba wa cejewe lɛɛna taa mba tam nabʋlɛ, ŋgʋ paba pɩɩwɛɛ se pawa nɛ pɔhɔ Bɛnjamɛɛ cejewiye taa mba nɩŋgbaaŋ? Yehowa yeba nɛ kajalaɣ taa lɛ, pawa cejewe wena a-taa mba wɛ siɣsiɣ yɔ se pɩsa nɛ ɛtakɩ-wɛ nɛ ɛna se pɛtɛm pa-taa se paɖɩzɩɣ kɩwɛɛkɩm Izrayɛɛlɩ ɛjaɖɛ taa?
w11 15/9 32 § 4
Ŋpɩzɩɣ nɛ ŋmaɣzɩnɩ Fineyaasɩ alɩwaatʋ ndʋ ŋkatɩɣ kala yɔ?
Ɛbɛ ɖɩkpɛlɩkɩɣ kɛdaɣ kanɛ ka-taa? Nabʋyʋ taa kala naayɛ wɛɣ ɛgbɛyɛ taa pɩnzɩ sakɩyɛ paa ɛgbɛyɛ taa ɛzʋtʋyaa ɩtɩmɩɣ nɛ pañakɩ pana siŋŋ se pɔcɔnɩ a-ɖeɖe yɔ. Ye mbʋ, pɩwɛɛ se ɛzʋtʋyaa ɩtɔzʋʋ Yesu tɔm tʋnɛ tɩ-yɔɔ: “Ɩwɛɛ pɔzʋʋ yɔɔ, nɛ pakaɣ-mɩ haʋ; ɩwɛɛ ñɩnʋʋ yɔɔ, nɛ ɩkaɣ hiɣu; ɩwɛɛ kɔtʋʋ yɔɔ, nɛ pakaɣ-mɩ tʋlʋʋ.” (Luka 11:9) Paa pɩlakɩ ɛzʋtʋyaa ɛzɩ Yehowa eecosuu pa-adɩma ana a-yɔɔ yɔ, pa-taa pɩzɩɣ nɛ pɩtɛ se ɛkaɣ-wɛ cosuu alɩwaatʋ ndʋ tɩmʋnaa yɔ tɩ-yɔɔ.
Fezuu taa ñɩm
w14 1/5 31 § 4-6
Ŋŋsɩm-tʋ?
Ɛzɩma caanaʋ taa mba lakaɣnɩ tayaanaa tʋmɩyɛ you taa?
Tayaa yaa kpataŋa Daviid kaakpaɣaa nɛ ɛkʋnɩ Filistii mba sɔdʋʋ Gooliyaatɩ. Pʋtɔma yɔ alɩwaatʋ ndʋ Daviid kaakɛ pɩɣa nɛ eɖiyiɣ ɛ-caa heŋ yɔ, ɛkpɛlɩkɩ tayaa tɔʋ nɛ pɩmalɩnɩ-ɩ camɩyɛ.—1 Samɩyɛɛlɩ 17:40-50.
Bibl alɩwaatʋ taa, Ejipiti mba nɛ Asiirii mba lɩzaɣ kɩlɛmɩŋ weyi yɔ, tayaanaa kɩlɛmɩŋ kaawɛ pɩ-taa. Ɛzɩma palakaɣ you nɛ wonuu ŋgʋ? Pakpakɩɣ tɔnɛ yaa pɩsaʋ kpɩzɩŋ ñɩŋgʋ nɛ palabɩnɩ kabʋa nakɛyɛ. Nɛ pʋwayɩ lɛ, patam-kɛ nimasɩ naalɛ ceemenje. Tayaa tɔyʋ ɖʋwaɣ kabʋa ŋga ka-taa pɩyɛ nɖɩ ɖɩwɛ solo solo yaa kulukulu yɔ. Pɩyɛ nɖɩ ɖɩpaɣlɩɣ ɛzɩ leemuu cikpeluu yɔ, nɛ ɖi-yuŋ maɣnɩ ɛzɩ kɩɖamnaa 250 mbʋ yɔ. Nɛ pʋwayɩ lɛ, ɛcɔzɩ tayaa ŋgʋ ɛ-ñʋʋ yɔɔ nɛ eyele nimaɣ kʋɖʋmaɣ nɛ pɩyɛ lɩɩ ɖoŋ nɛ ɖɩɖɛɛ ɖɩmʋ mbʋ ɛtɔwa yɔ.
Ñɩnɩyaa huyi tɛtɛɛ Izrayɛɛlɩ cɔlɔ ajɛɛ naayɛ taa lɛ, palɩɩ pɛɛ sakɩyɛ wena paɖʋwaɣ tayaanaa taa nɛ palakɩnɩ you caanaʋ taa yɔ, a-yɔɔ. Pɩtɩla, sɔɔjanaa mba paawɛ niye yɔ, pɔtɔwaɣ tayaanaa pɛɛ nɛ aseɣ ɛzɩ kilomɛtawaa 160 nɛ piwolo 240 mbʋ yɔ ñɩɣyʋʋ kʋyʋmʋʋ taa. Lɔŋsɩnɖaa nabɛyɛ iitisiɣ se tayaa pɩyɛ pɩzɩɣ nɛ ɖɩtalɩ ɖenɖe tɔʋ ñɩmɩyɛ talɩɣ yɔ, paa mbʋ yɔ tayaa pɩyɛ pɩzɩɣ nɛ ɖɩkʋ ɛyʋ ɛzɩ tɔʋ ñɩmɩyɛ yɔ.—Tɔm Hʋyaa 20:16.
24-30 JANVIER
ÑƖM MBƲ PƖWƐ ƐSƆTƆM TAA YƆ
“Wolo pɩ-yɔɔ nɛ ŋwɛɣnɩ sɔɔlɩm siɣsiɣ ñɩmbʋ”
Ðɩmaɣzɩnɩ Yehowa taabalaa
5 Ruti hɔʋ taa ñɩma kaawɛ Mowaabʋ tɛtʋ taa. Ɛpɩzaɣ se ɛpɩsɩ pɔ-cɔlɔ nɛ pɔcɔnɩ ɛ-yɔɔ. Ɛɛsɩm Mowaabʋ tɛtʋ taa ɛyaa, pa-kʋnʋŋ nɛ pɔ-sɔnzɩ. Nawomii taapɩzɩɣ se eheyi Ruti se ye ɛkɔm Bɛtɩlɛhɛm yɔ, ɛwɛɣnɩ wala ana. Pɩtasɩ lɛ, sɔɔndʋ kpaɣaɣ Nawomii se ɛɛkaɣ pɩzʋʋ nɛ ɛñɩnɩ-ɩ walʋ yaa ɖɩzʋyɛ. Pʋyɔɔ Nawomii heyi Ruti se ɛpɩsɩ Mowaabʋ tɛtʋ taa. Ɛzɩ ɖɩtɛm naʋ yɔ, Orpa “pɩsɩ ɛ-ɛyaa samaɣ cɔlɔ nɛ ɛ-agɔlɩma cɔlɔ.” (Ruti 1:9-15) Ɛlɛ ɛbɛ Ruti ñalaba? Ɛkpaɣ lɩmaɣzɩyɛ se ɛɛpɩsɩɣ ɛ-ɛyaa samaɣ cɔlɔ nɛ ɛ-agɔlɩma cɔlɔ.
Ðɩmaɣzɩnɩ Yehowa taabalaa
6 Pʋtɔma yɔ, Ruti walʋ yaa ɛ-waŋ Nawomii kaasɩnɩnɩ-ɩ nɛ ɛtɩlɩ Yehowa. Ɛɛkpɛlɩkaa se Yehowa wɛ ndɩ nɛ Mowaabʋ agɔlɩma. Ɛɛsɔɔlɩ Yehowa nɛ ɛɛnawa se Yehowa kɛ Ɛsɔ weyi ɛmʋnaa se pɔsɔɔlɩ-ɩ nɛ pɛsɛɛ-ɩ yɔ. Pʋyɔɔ Ruti kpaɣ lɩmaɣzɩyɛ kɩbanɖɛ. Eheyi Nawomii se: “Ñɛ-ɛyaa samaɣ kɛ mɛ-ɛyaa samaɣ nɛ ñɛ-Ɛsɔ kɛ ɖɔɖɔ mɛ-Ɛsɔ.” (Ruti 1:16) Alɩwaatʋ ndʋ ɖɩmaɣzɩɣ ɛzɩma Ruti kaasɔɔlɩ Nawomii yɔ pɩ-yɔɔ lɛ, pitukuuni ɖa-laŋa siŋŋ. Ɛlɛ ɛzɩma Ruti kaasɔɔlɩ Yehowa yɔ, mbʋ tukuuni-ɖʋ kpem nɛ pɩkɩlɩ. Piitukuni Bowaazɩ ɖɔɖɔ siŋŋ pʋyɔɔ ɛsamɩ-ɩ pʋwayɩ nɛ ɛtɔ se ‘ɛkɔm Yehowa cɔlɔ nɛ ɛɖʋ-ɩ kʋyʋʋ.’ (Kalɩ Ruti 2:12.) Tɔm ndʋ Bowaazɩ yɔɔdaa yɔ, tɩtɔzʋʋ-ɖʋ ɛzɩma sumaɣ pɩɣa seɣ se kɛmɛlɩ ko-ɖoo keŋ tɛɛ kaɖɛ alɩwaatʋ taa yɔ. (Keɣsi 35:8; 90:1-4) Mbʋ ɖɔɖɔ Yehowa kandɩyɩ Ruti yɔɔ nɛ sɔɔlɩm nɛ ɛwazɩ-ɩ e-tisuu yɔɔ. Wiɖiyi Ruti tikpiɖi lɩmaɣzɩyɛ nɖɩ ɛɛkpaɣaa yɔ ɖɩ-yɔɔ kpa.
Fezuu taa ñɩm
w05 1/3 27 § 1
Ruti takayaɣ taa lɩmaɣza sɔsɔna
1:13, 21—Ɛzɩ Yehowa yebina nɛ Nawomii nɩɩ siziŋ e-wezuu caɣʋ taa nɛ ɛ-cɔlɔ ɛ-kʋñɔmɩŋ lɩnaa? Aayɩ. Nawomii tɩyɔɔdɩ se Ɛsɔ labɩ-ɩ kɩdɛkɛdɩm nabʋyʋ. Ɛlɛ ɛnaɣaɣ mbʋ payɩ pɩtalɩ-ɩ yɔ lɛ, ɛmaɣzɩ se ɛ-tɔm tɩkɛdɩnɩ Ɛsɔ. Ɛɛnɩ siziŋ siŋŋ nɛ pitibi-i yɔɔɔ. Alɩwaatʋ ndʋ tɩ-taa lɛ, piya nzɩ ɛyʋ lʋlʋʋ yɔ, sɩkɛ Ɛsɔ wazaɣ; nɛ ye halʋ ɛɛlʋlʋʋ yɔ, pɩwɛ ɛzɩ pɔlɔ ɛ-yɔɔ nɔɔ kɩdɛkɛdaɣ yɔ. Nawomii taawɛnɩ sayɩnaa nɛ abalɩbiya naalɛ nzɩ ɛɛwɛna yɔ sɩsɩba. Pɩpɩzaɣ se piyele nɛ ɛmaɣzɩ se Yehowa ɖʋnɩ-ɩ fɛyɛ.
31 JANVIER–6 FÉVRIER
ÑƖM MBƲ PƖWƐ ƐSƆTƆM TAA YƆ | RUTI 3–4
“Wɛɛnɩ hɩɖɛ kɩbanɖɛ nɛ ŋkandɩyɩ ɖɩ-yɔɔ nɛ nabʋyʋ etaapisi-ɖɩ”
w12 1/10 22 § 5
‘Halʋ kɩbanʋ siŋŋ’
Pɩtʋʋ fɛyɩ se ɛzɩma Bowaazɩ yɔɔdɩnɩ Ruti yɔ, pɩhɛzɩ ɛlɛ laŋɩyɛ siŋŋ; ɛyɔɔdaa se: “[Yehowa] ɛwazɩ ñɔ-yɔɔ, pɛlɛ; ñe-hendu sɔɔlɩm nɛ laŋɩyɛ yɔɔ yɔɔ kpaɖɩ kajalaɣ mbʋ, mbʋ yɔ, ŋtɩtɩŋ evebiya kʋñɔndɩnaa yaa ñɩm tɩnaa.” (Ruti 3:10) “Kajalaɣ” lɛ, Ruti lɩzɩ sɔɔlɩm siɣsiɣ ñɩmbʋ nɛ ɛwɩlɩ alɩwaatʋ ndʋ ɛtɩŋ Nawomii wayɩ nɛ ɛpɩsɩ Izrayɛɛlɩ se ɛcɔnɩ ɛlɛ yɔɔ yɔ. Nɛ lɛɛlɛɛyɔ lɛ ewobi pɩ-yɔɔ nɛ ɛwɩlɩ sɔɔlɩm mbʋ nɛ pɩkpaɖɩ. Bowaazɩ nawa se Ruti kɛ asɛyɩbɩɣa nɛ ɛpɩzaɣ se ɛñɩnɩ se ɛwalɩ evebu nɔɔyʋ paa ɛlɛ ɛkɛ ñɩm tʋ yaa kʋñɔndʋ nɔɔyʋ yɔ. Ɛlɛ ɛsɔɔlaa se ɛla kɩbandʋ Nawomii nɛ ɛlɛ walʋ weyi ɛsɩba yɔ; ɛɛsɔɔlaa se ɛla nɛ Nawomii walʋ weyi ɛsɩba yɔ, ɛ-hɩɖɛ etaale ɛ-ɛjaɖɛ taa. Nɛ pɩnaɣ kpayɩ kpayɩ se ɛzɩma asɛyɩbɩɣa ŋga kamaɣzaɣ lalaa yɔɔ yɔ, piitukuni Bowaazɩ siŋŋ.
w12 1/10 23 § 1
‘Halʋ kɩbanʋ siŋŋ’
Alɩwaatʋ ndʋ Ruti nɩ Bowaazɩ yɔɔdaa se ɛyaa sakɩyɛ sɩmɩ-ɩ se ɛkɛ ‘halʋ kɩbanʋ siŋŋ’ yɔ, pɩɩhɛzɩ ɛ-laŋɩyɛ siŋŋ. Pɩtʋʋ fɛyɩ se ɛzɩma Ruti kaasɔɔlɩ siŋŋ se ɛtɩlɩ Yehowa nɛ ɛsɛɛ-ɩ yɔ, mbʋ yebina nɛ patɩlɩ-ɩ nɛ wɛtʋ kɩbandʋ ndʋ. Pɩtasɩ lɛ, ɛzɩma etisi Nawomii nɛ ɛ-samaɣ pe-wezuu caɣʋ nɛ pɔ-sɔnzɩ nzɩ sɩwɛ ndɩ nɛ ɛ-samaɣ ñɩnzɩ yɔ sɩ-yɔɔ yɔ, pɩwɩlɩɣ se ɛsɔɔlɩ Nawomii nɛ ɛ-samaɣ siŋŋ. Pɩsa nɛ ɖɩmaɣzɩnɩ Ruti tisuu lɛ, pɩpɔzʋʋ se ɖɩwɛɛnɩ ñamtʋ lalaa yɔɔ paa wɛtʋ ndʋ yaa sɔnzɩ nzɩ pɛwɛna yɔ. Ye ɖɩlakɩ mbʋ yɔ, pɩtʋʋ fɛyɩ se ɖɩwɛɣnɩ wɛtʋ kɩbandʋ siŋŋ.
w12 1/10 24 § 3
‘Halʋ kɩbanʋ siŋŋ’
Bowaazɩ kpaɣ Ruti nɛ ɛlabɩ-ɩ halʋ. Nɛ pɔyɔɔdɩ pʋwayɩ se: “Kɩbaɣlʋ yele se pɩlabɩ-ɩ ɖeu nɛ ɛlʋlɩ pɩɣa evelaɣ.” Peeɖe Bɛtɩlɛhɛm halaa ɖʋ hɩɖɛ Nawomii nɛ pasa Ruti mbʋ pʋyɔɔ yɔ ɛmʋ ñɩm Nawomii ɛsɩndaa nɛ pɩkɩlɩ abalɩbiya lʋbɛ. (Ruti 4:11-22) Nɛ pʋwayɩ lɛ Ruti pɩyalʋ kɔma nɛ ɛkɛ wiyaʋ Daviid cɔzɔ.
Fezuu taa ñɩm
w05 1/3 29 § 3
Ruti takayaɣ taa lɩmaɣza sɔsɔna
4:6—Ɛzɩma tɩyɛ weyi ɛwɛnɩ waɖɛ se ɛɖaɣnɩ yabʋ nabʋyʋ yɔ ɛpɩzɩɣ nɛ ‘elesi’ ɛ-hɔʋ ñɩm alɩwaatʋ ndʋ ɛɖaɣnɩɣ-pʋ yabʋ yɔ? Kajalaɣ lɛ, weyi ɛsʋ kʋñɔndʋtʋ taa yɔ, ye ɛpɛdɩ tɛtʋ ndʋ tɩkɛ ɛ-hɔʋ ñɩm yɔ, pɩkaɣ pɔzʋʋ se weyi ɛwɛnɩ waɖɛ se ɛyabɩ-tʋ yɔ, ɛkpaɣ e-liidiye nɛ pɩla nɔɔ kʋɖʋmaɣ nɛ pɩnzɩ nzɩ pɩkazaa pʋcɔ nɛ ahɛnɛɛ pɩnaɣ talɩ yɔ, nɛ ɛɖaɣnɩ-tʋ yabʋ. (Levitiki 25:25-27) Piyeki nɛ ɛ-maɣmaɣ ɛ-hɔʋ ñɩm pasɩ. Pɩtasɩ lɛ ye Ruti ɛwɛnɩ abalɩbɩɣa yɔ, ŋga kaɣnɩ mʋʋ tɛtʋ ndʋ paɖaɣnɩ yabʋ yɔ, pɩɩkɛɣnɩ weyi ɛɖaɣnɩ-tʋ yabʋ yɔ, ɛ-hɔʋ taa tʋ.
7-13 FÉVRIER
ÑƖM MBƲ PƖWƐ ƐSƆTƆM TAA YƆ | 1 SAMƖYƐƐLƖ 1-2
“Tɩmnɩ Yehowa nɛ ŋheyi-i ña-laŋɩyɛ taa tɔm”
Ɛtɩmnɩ Ɛsɔ nɛ eheyi-i mbʋ pɩwɛ ɛ-laŋɩyɛ taa yɔ
12Ye mbʋ, Hana ha kɩɖaʋ kɩbaŋʋ Ɛsɔ sɛyaa kpeekpe adɩma nʋmɔʋ taa. Yehowa ha ɛ-sɛyaa waɖɛ faaa se pɔyɔɔdɩnɩ-ɩ kaalɛyɩtʋ nɛ peheyi-i mbʋ pɩcɛyɩɣ-wɛ yɔ, ɛzɩ pɩɣa heyuu ka-lʋlɩyʋ kʋsɔɔlʋ mbʋ pɩcɛyɩɣ-kɛ nɛ sɔɔndʋ ɛɛkpaɣ-kɛ yɔ. (Kalɩ 1 Yohanɛɛsɩ 5:14; 1 Tesalooniiki 5:17.) Fezuu kiɖeɖeu sɩnɩ apostoloo Pɩyɛɛrɩ nɛ ɛma tɔm kɩbandʋ tʋnɛ adɩma wena ɖɩlakɩ Yehowa yɔ, a-yɔɔ: “Ɩkpaɣ lɩmaɣza wena a-tɩŋa payɩ akʋʋ-mɩ yɔ nɛ ɩɖʋzɩ e-nesi taa, mbʋ pʋyɔɔ yɔ, ɛnʋ cɔŋnɩnɩ mɩ-yɔɔ.”—1 Pɩy. 5:7.
w07 15/3 16 § 4
Adɩma hɛzɩ Hana laŋɩyɛ
Ɛbɛ tɔm tʋnɛ tɩkpɛlɩkɩɣ-ɖʋ? Alɩwaatʋ ndʋ ɖɩtɩmɩɣnɩ Yehowa ɖa-kɩcɛyɩm yɔɔ yɔ, pɩpɔzʋʋ se ɖɩtɩmnɩ-ɩ nɛ ɖa-laŋɩyɛ pilim nɛ ɖiheyi-i ɛzɩma pɩlakɩ-ɖʋ yɔ. Ye ɖɩlabɩ mbʋ payɩ ɖɩpɩzɩɣ yɔ se ɖɩcɔnɩ kaɖɛ naɖɩyɛ ɖeɖe, ɛlɛ kaɖɛ nɖɩ ɖɩtɩsɩɩ tɩnaɣ yɔ, pɩwɛɛ se ɖɩpɛɖɩ mbʋ pɩkazaa yɔ Yehowa nesi tɛɛ. Ðɩlabɩ mbʋ yɔ, pɩkɩlɩɣ ɖeu.—Aduwa 3:5, 6.
Fezuu taa ñɩm
w05 15/3 21 § 5
Samɩyɛɛlɩ takayaɣ kajalaɣ ñɩŋga taa lɩmaɣza sɔsɔna
2:10 Ɛbɛ yɔɔ Hana tɩmnɩ Yehowa se ɛha “wiyaʋ ñazɩtʋ ɖoŋ” ŋgʋ alɩwaatʋ ndʋ tɩ-taa wiyaʋ nɔɔyʋ taawɛɛ Izrayɛɛlɩ ɛjaɖɛ taa? Paayɔɔdɩ Moyizi Paɣtʋ taa se Izrayɛɛlɩ mba kaɣ wɛnʋʋ wiyaʋ nɔɔyʋ. (Wayɩ Wayɩ Paɣtʋ 17:14-18) Natʋ tɔm ndʋ Yakɔɔb yɔɔdɩ ɛ-sɩm ñalʋʋ yɔɔ yɔ tɩ-taa ɛtɔm se: “Kewiyaɣ ɖooka [kewiyitu tɔɔʋ ɖoŋ yʋsaɣ] ɛɛkaɣ lɩʋ Yuuda nee tɛɛ.” (Kiɖe Tɛɛ Tɔm 49:10) Pɩtasɩ lɛ Yehowa yɔɔdaɣ Saara weyi ɛkɛ Izrayɛɛlɩ mba neze yɔ ɛ-tɔm lɛ, ɛyɔɔdaa se: “Ajɛɛ awiya kaɣ lɩɣnɩ ɛ-taa.” (Kiɖe Tɛɛ Tɔm 17:16) Ye mbʋ wiyaʋ weyi alɩwaatʋ ndʋ tɩ-taa paaɖaŋaa se ɛkaɣ kɔm yɔ, ɛ-tɔm Hana yɔɔdaɣ ɛ-adɩma taa.
14-20 FÉVRIER
ÑƖM MBƲ PƖWƐ ƐSƆTƆM TAA YƆ | 1 SAMƖYƐƐLƖ 3-5
“Yehowa maɣzɩɣ ɛ-sɛyaa yɔɔ camɩyɛ”
Paa Ɛsɔ ɛkɛ Ðoŋ Tɩŋa Tʋ yɔ, ɛmaɣzɩɣ lalaa yɔɔ
3 Samɩyɛɛlɩ paɣzɩ ‘ɖʋʋ Yehowa lɩm’ kpaaŋ taa alɩwaatʋ ndʋ ɛɛkɛ pɩɣa evelaɣ yem yɔ. (1 Sam. 3:1) Samɩyɛɛlɩ hɩnɩ ɖoo naayɛ taa nɛ eɖou lɛ, piti lakasɩ nasɩyɩ la. (Kalɩ 1 Samɩyɛɛlɩ 3:2-10.) Ɛnɩ nɔɔ nakɛyɛ taŋ, kɛwɛɛ nɛ kayaɣ ɛ-hɩɖɛ. Samɩyɛɛlɩ maɣzaɣ se Cɔjɔ Sɔsɔ Elii yaɣnɩ-ɩ, pʋyɔɔ ese lɛɛ lɛɛ nɛ ewolo ɛ-cɔlɔ nɛ eheyi-i se: “Ma yɔ, mbʋ yɔ ŋya-m.” Nɛ Elii cosi-i se ɛnʋ tɩyaa-ɩ. Pɩtasɩ labʋ mbʋ tam nabʋlɛ lɛ, Elii ɖiɣzina se Ɛsɔ wɛna nɛ ɛyaɣ Samɩyɛɛlɩ. Nɛ eheyi Samɩyɛɛlɩ ɛzɩma ecosi yɔ, nɛ ɛlɛ la mbʋ ɖɔɖɔ. Ðɩpɩzɩɣ nɛ ɖɩpɔzɩ ɖa-tɩ se alɩwaatʋ ndʋ Yehowa tɩŋnɩ tiyiyu yɔɔ nɛ ɛyɔɔdɩnɩ Samɩyɛɛlɩ kajalaɣ ɖeɖe yɔ, ɛbɛ yɔɔ etiyele se ɛlɛ ɛtɩlɩ se ɛnʋ yɔɔdaɣnɩ-ɩ? Bibl tɩyɔɔdɩ mbʋ pʋyɔɔ yɔ, ɛlɛ ɛzɩma tɔm ɖɔma yɔ, pɩwɩlɩɣ se paa pɩɩla ɛzɩma yɔ, lɩmaɣza naayɛ yɔɔ Yehowa labɩ mbʋ. Ɛbɛ yɔɔ ɖɩyɔɔdʋʋ mbʋ?
Paa Ɛsɔ ɛkɛ Ðoŋ Tɩŋa Tʋ yɔ, ɛmaɣzɩɣ lalaa yɔɔ
4 Kalɩ 1 Samɩyɛɛlɩ 3:11-18. Yehowa kaaɖʋ paɣtʋ se piya ɩña sɔsaa, kɔzɩ kɔzɩ awiya. (Ejl. 22:27; Lev. 19:32) Ŋmaɣzɩɣ se Samɩyɛɛlɩ pɩzɩɣ nɛ ɛkʋyɩ tanaŋ ŋgʋ kɩ-tɛɛ nɛ ɛɖɔmnɩ cajayɛ se ewolo nɛ eheyi Elii nɩŋgbaŋʋʋ hɔm tɔm ndʋ? Aayɩ! Bibl heyiɣ-ɖʋ se “sɔɔndʋ kpaɣaɣ Samɩyɛɛlɩ nɛ Elii heyuu ndʋ ɛnawa yɔ.” Ɛlɛ Ɛsɔ yeba nɛ Elii nɩɩ pɩ-taa kpayɩ kpayɩ se ɛnʋ wɛna nɛ ɛyaɣ Samɩyɛɛlɩ. Pʋyɔɔ Elii heyi Samɩyɛɛlɩ se sɔɔndʋ ɛtaakpa-ɩ ɛlɛ ɛyɔɔdɩ tɔm ndʋ payɩ ɛnawa yɔ. Elii heyi-i se: “[Taamɛsɩ-m] tɔm ndʋ ndʋ peheyi-ŋ yɔ tɩ-taa natʋyʋ.” Nɛ Samɩyɛɛlɩ “heyi-i tɔm kpeekpe.”
Fezuu taa ñɩm
w05 15/3 21 § 6
Samɩyɛɛlɩ takayaɣ kajalaɣ ñɩŋga taa lɩmaɣza sɔsɔna
3:3—Ɛzɩ Samɩyɛɛlɩ kaahɩnɩ Lone Kiɖeɖeye nɖɩ ɖɩkpaɖaa yɔ ɖɩ-taa? Aayɩ. Samɩyɛɛlɩ kaakɛ Leevi tʋ ɛlɛ ɛɛlɩnɩ Kehaatɩ mba hɔʋ taa nɛ hɔʋ ŋgʋ kɩtaakɛ cɔjɔtʋ hɔʋ. (3 Awiya 6:33-38) Nɛ pʋyɔɔ lɛ ɛtaawɛɛnɩ waɖɛ se ‘ɛsʋʋ nɛ ɛcɔnɩ wondu kiɖeɖetu sɔsɔtʋ.’ (Kɩgalʋʋ 4:17-20) Kediɣzaɣ kizinziku hɔɔlʋʋ kʋɖʋmʋʋ taa ɖeke ɛpɩzaɣ se ewolo nɛ hɔɔlʋʋ ŋgʋ lɛ, Ɛsɔ sɛtʋ kɩɖanɖʋʋ kadaɣ taa. Peeɖe ɛpɩzaɣ se ɛhɩnɩ. Paa pɩɩla ɛzɩma yɔ, Elii ɖɔɖɔ hɩnaɣ kadaɣ ŋga ka-taa. Pɩtʋʋ fɛyɩ se Ɛsɔ sɛtʋ kɩɖanɖʋʋ kpeekpe tɔm pɔyɔɔdaɣ alɩwaatʋ ndʋ pɔtɔm se eɖowaɣ “ɖenɖe Ɛsɔ aɖakaɣ kaawɛɛ yɔ.”
21-27 FÉVRIER
ÑƖM MBƲ PƖWƐ ƐSƆTƆM TAA YƆ | 1 SAMƖYƐƐLƖ 6–8
“Akɛ ñe-wiyaʋ?”
it-2 827 § 1
Ɛsɔ Kewiyaɣ
Pɔpɔzaa se palɩzɩ nɔɔyʋ nɛ ɛkɛ wiyaʋ. Izrayɛɛlɩ mba lɩnɩ Ejipiti nɛ pɩla pɩnzɩ 400, pʋ-tɔbʋʋ se Ɛsɔ nɛ Abraham paɖʋ ɛgbɛyɛ nɛ pɩla pɩnzɩ 800 lɛ, pɔpɔzaa se palɩzɩ nɔɔyʋ nɛ eɖiyi-wɛ ɛzɩ ajɛɛ lɛɛna wɛnaʋ awiya ɖɔɖɔ yɔ. Pɔpɔzʋʋ se palɩzɩ nɔɔyʋ nɛ ɛkɛ pe-wiyaʋ yɔ, pɩwɩlɩɣ se patɩtasɩ sɔɔlʋʋ se Yehowa maɣmaɣ ɛtɔɔ kewiyitu pɔ-yɔɔ. (1 Sam. 8:4-8) Toovenim, samaɣ kaaɖaŋaa se Ɛsɔ ɛsɩɩ kewiyaɣ nakɛyɛ ɛzɩ ɛɛlabʋ tamaɣ Abraham nɛ Yakɔɔb yɔ, ɛzɩ ɖɩɩtɛm yɔɔdʋʋ nɛ pɩɖɛɛ yɔ. Tɔm ndʋ Yakɔɔb kaayɔɔdɩ ɛ-sɩm ñalʋʋ yɔɔ pɩlɩɩnɩ Yuuda yɔɔ yɔ (Kiɖe 49:8-10), tɔm ndʋ Yehowa kaaheyi Izrayɛɛlɩ ñɩma mba palɩnɩ Ejipiti yɔ (Ejl 19:3-6), ɛgbɛyɛ aɖakaɣ taa tɔm (Wp 17:14, 15), nɛ halɩ tɔm ndʋ Ɛsɔ kaayeba nɛ nayʋ Baalam yɔɔdɩ yɔ, pɩtɩŋa mbʋ yɔ piiyebina nɛ samaɣ wɛɛnɩ lidaʋ ŋgʋ. (Kɩg 24:2-7, 17) Samɩyɛɛlɩ ɖoo Hana weyi ɛwɛ siɣsiɣ yɔ, ɛɛyɔɔdɩ lidaʋ ŋgʋ kɩ-tɔm adɩma taa. (1 Sam. 2:7-10) Paa mbʋ yɔ, Yehowa taakuli Kewiyaɣ yɔɔ “mɛsaɣ tɛɛ tɔm” kpeekpe yɔɔ nɛ ɛtaayɔɔdɩtɩ alɩwaatʋ ndʋ ɛɖʋwa se ɛsɩɣ-kɛ yɔ pɩ-tɔm. Pɩtasɩ lɛ, ɛtaatɩɩwɩlɩtɩ ɛzɩma komina ŋgʋ kɩkaɣ wɛʋ yɔ, mba pakaɣ wɛʋ kɩ-taa yɔ; nɛ ɛzɩ kɩkaɣ wɛʋ tataa yaa ɛsɔdaa. Ye mbʋ alɩwaatʋ ndʋ tɩ-taa lɛ, pɩtaamʋna se samaɣ ɛpɔzɩ se palɩzɩ nɔɔyʋ nɛ ɛkɛ ke-wiyaʋ.
w11 1/1 27 § 1
Ɛɖɔkɩ kpam paa ɛɛwɛ laŋwɛɛkɩyɛ taa yɔ
Na ɛzɩma Yehowa cosi Samɩyɛɛlɩ alɩwaatʋ ndʋ ɛlɛ heyi-i tɔm ndʋ adɩma taa yɔ: “Welisi ɛyaa samaɣ nɔɔ, ndʋ ndʋ kɔpɔzʋʋ-ŋ yɔ tɩ-taa, pɩtɩkɛ ñɛ kɔlɔwa ɛlɛ ma kɔlɔwa se mantaatɔɔ kewiyaɣ kɔ-yɔɔ.” Pɩɩhɛzɩ Samɩyɛɛlɩ laŋɩyɛ kpem, ɛlɛ samaɣ lakasɩ nzɩ sɩɩwɩlaa se kɛfɛyɩnɩ ñamtʋ paa ññɩɩ Ɛsɔ Ðoŋ Tɩŋa Tʋ yɔɔ. Yehowa heyi ɛ-nayʋ se ɛpaɣ samaɣ nɛ eheyi-kɛ mbʋ pɩkaɣ-kɛ talʋʋ alɩwaatʋ ndʋ palɩzɩɣ nɔɔyʋ nɛ ɛkɛ ke-wiyaʋ yɔ. Samɩyɛɛlɩ labɩ ɛzɩ Yehowa kaaheyuu-i yɔ, ɛlɛ samaɣ tɛ ka-taa nɛ kɔyɔɔdɩ se: “Paa nɛ mbʋ: Wiyaʋ kaɣ wɛʋ ɖɛ-hɛkʋ taa.” Samɩyɛɛlɩ ña ɛ-Ɛsɔ ɛzɩ ɛtɩɩlakʋʋ yɔ nɛ ewolo nɛ ɛtaa num wiyaʋ weyi Yehowa lɩzaa yɔ.—1 Samɩyɛɛlɩ 8:7-19.
w10 15/1 30 § 9
Yehowa wɛnɩnɩ waɖɛ se ɛtɔɔ kewiyitu!
9 Caanaʋ taa tɔm wɩlaa se Yehowa kaawɛnɩ toovenim se ɛpaɣ ɛ-samaɣ. Ɛyaa mba pɔtɔɔ kewiyitu Izrayɛɛlɩ yɔɔ yɔ, pe-kewiyitu tɔɔʋ kɔnɩ tɩlasɩ sakɩyɛ samaɣ; kɔzɩ kɔzɩ awiya kɩdɛkɛda alɩwaatʋ taa. Alɩwaatʋ ndʋ ɖɩmaɣzɩɣ Izrayɛɛlɩ kɩɖaʋ yɔɔ yɔ, pɩɩɖɩɣzɩɣ-ɖʋ se pɩnzɩ sakɩyɛ nzɩ sɩɖɛwa yɔ sɩ-taa, ɛyaa kominawaa tɩpɩzɩ nɛ pɔkɔnɩ mba peɖiyiɣ-wɛ yɔ koboyaɣ ŋga keleɖiɣ yɔ; mbʋ pʋyɔɔ yɔ kominawaa mba paasɩŋ Yehowa. Pɩkɛ toovenim se politiki laɖaa nabɛyɛ tɩmɩɣnɩ Ɛsɔ se ɛwazɩ pana wena pañakɩ se pɔkɔnɩ laŋhɛzɩyɛ nɛ pɛɛyɛ yɔ a-yɔɔ. Ɛlɛ ɛzɩ Ɛsɔ pɩzɩɣ nɛ ɛwazɩ ɛyaa mba pekiziɣ se paaluzuu pa-tɩ e-kewiyitu tɔɔʋ tɛɛ yɔ?—Keɣa 2:10-12.
Fezuu taa ñɩm
w02 1/4 12 § 13
Ɛbɛ yɔɔ lɩm mɩyɩsʋʋ tɔm cɛyaa?
13 Pɩwɛɛ se ɛyʋ ɛlɛɣzɩ ɛ-laŋɩyɛ pʋcɔ nɛ pamɩyɩsɩ-ɩ lɩm nɛ ɛpɩsɩ Yehowa Aseɣɖe Tʋ. Weyi ɛkpakɩɣ lɩmaɣzɩyɛ se ɛtɩŋɩɣ Yesu Krɩstʋ nɛ ɛ-laŋɩyɛ faaa yɔ, ɛnʋ pɩwɛɛ se ɛsɛtɩ ɛ-tɩ tɔm se ɛlɛɣzɩɣ ɛ-laŋɩyɛ. Pɩwɛɛ se ɛha siɣye wezuu kɩdɛkɛdʋʋ ŋgʋ ɛcakaɣ yɔ nɛ ɛla mbʋ pɩtʋʋzɩ Ɛsɔ ɛsɩndaa yɔ. Masɩ taa lɛ, Ebree nɛ Grɛɛkɩ tɔm pee wena palakɩnɩ tʋmɩyɛ alɩwaatʋ ndʋ pɔyɔɔdʋʋ laŋɩyɛ lɛɣzʋʋ tɔm yɔ, awɩlɩɣ se pɩpɔzʋʋ se ɛyʋ eyele nabʋyʋ labʋ yaa ɛpɩsɩnɩ ɛ-tɩ. Laŋɩyɛ pɩsʋʋ tɔbʋʋ lɛ se ɛyʋ ekizi wezuu ŋgʋ ɛcakaɣ yɔ nɛ ɛpɩsɩnɩ Ɛsɔ yɔɔ. (1 Awiya 8:33, 34) Pɩsa nɛ ɛyʋ wɩlɩ se ɛlɛɣzɩ ɛ-laŋɩyɛ lɛ, pɩwɛɛ se ɛlakɩ ‘tʋma wena awɩlɩɣ se ekpiɖi ɛ-kɩwɛɛkɩm yɔɔ yɔ.’ (Tʋma Labʋ 26:20) Pɩwɛɛ se ekizi cɛtɩm Ɛsɔ sɛtʋ, ɛcakɩ wezuu ŋgʋ kɩlakɩ nɔɔ kʋyʋmaɣ nɛ Ɛsɔ paɣtʋ yɔ, nɛ ɛha ɛ-tɩ Yehowa nɛ ɛsɛɣ e-ɖeke koŋ. (Wayɩ Wayɩ Paɣtʋ 30:2, 8-10; 1 Samɩyɛɛlɩ 7:3) Weyi ɛlɛɣzɩ ɛ-laŋɩyɛ yɔ ɛlɛɣzɩɣ ɛ-lɩmaɣza, ɛ-kaɖʋsɩ nɛ ɛ-maɣzɩm. (Ezekɩyɛɛlɩ 18:31) Alɩwaatʋ ndʋ ɖɩlɛɣzɩɣ ɖɛ-wɛtʋ ndʋ tɩɩkɛdɩɣnɩ Ɛsɔ yɔ nɛ ɖɩwɛɛnɩ ɛyʋtʋ kɩfatʋ yɔ, ɖɩpɩzɩɣ nɛ ɖɩyɔɔdɩ se ɖɩpɩsɩnɩ Ɛsɔ yɔɔ.—Tʋma Labʋ 3:19; Efɛɛzɩ mba 4:20-24; Koloosi mba 3:5-14.
28 FÉVRIER–6 MARS
ÑƖM MBƲ PƖWƐ ƐSƆTƆM TAA YƆ | 1 SAMƖYƐƐLƖ 9-11
“Kiɖe tɛɛ lɛ, Sɔɔlɩ luzaɣ ɛ-tɩ nɛ ɛɛsɩm ɖɔɖɔ e-ɖoŋ kamaɣ”
Wɛɛnɩ tɩ luzuu nɛ ŋtɩlɩ ño-ɖoŋ kamaɣ
11 Maɣzɩ mbʋ pɩɩtalɩ Wiyaʋ Sɔɔlɩ yɔ pɩ-yɔɔ nɛ ŋna. Kiɖe tɛɛ lɛ, ɛɛkɛ evebu weyi ɛsɩm e-ɖoŋ kamaɣ yɔ. Ɛɛsɩm e-ɖoŋ kamaɣ nɛ halɩ ekizi se ɛɛmʋʋ wala sakɩyɛ. (1 Sam. 9:21; 10:20-22) Ɛlɛ alɩwaatʋ wɛɛ nɛ tɩɖɛɣ lɛ, Sɔɔlɩ paɣzɩ ɛ-tɩ kpazʋʋ nɛ ɛla mbʋ ɛtaawɛɛnɩ waɖɛ se ɛla yɔ. Ɛpɩsɩ wiyaʋ nɛ pitileɖi lɛ, ɛpaɣzɩ wɛnʋʋ tɩ kpazʋʋ. Kɩyakʋ nakʋyʋ, elesi suuɖu ŋgʋ ɛɛwɛna yɔ alɩwaatʋ ndʋ ɛɛɖaŋ nayʋ Samɩyɛɛlɩ se ɛlɛ ɛkɔɔ yɔ. Mbʋ ɛzɩ Sɔɔlɩ kaata Yehowa liu se ɛkaɣ nabʋyʋ labʋ nɛ ɛsɩnɩ samaɣ lɛ, ɛkʋyaa nɛ ɛlaa miŋ kɩñaɣzʋʋ kɩlaʋ paa pataaha-ɩ nʋmɔʋ se ɛla mbʋ yɔ. Mbʋ pɩlɩ pɩ-taa yɔ lɛ se Sɔɔlɩ tɔm tɩtasɩ kɛdɩnʋʋ Yehowa, nɛ ɛlɛ kizi se ɛtaatasɩ kɛʋ wiyaʋ. (1 Sam. 13:8-14) Ye ɖɩkpɛlɩkɩ lɔŋ kɩɖaʋ ŋgʋ kɩ-taa nɛ ɖikizi se ɖɩɩlakɩ mbʋ patɩha-ɖʋ waɖɛ se ɖɩla yɔ, pʋbʋ lɛ ɖɩwɩlɩɣ se ɖɩkɛ lɔŋsɩnɖaa.
w14 1/3 9 § 8
Ðɩwɛɛnɩ tɩ laʋ lɩmaɣza
8 Izrayɛɛlɩ Wiyaʋ Sɔɔlɩ kɩɖaʋ pakɩ-ɖʋ. Ɛ-kɩɖaʋ wɩlɩɣ-ɖʋ se piɖeni men-ɖeke wɛtʋ pɩzɩɣ nɛ tɩwɛɛkɩ tɩ laʋ lɩmaɣza wena ɖɩwɛna yɔ caɣ caɣ. Alɩwaatʋ ndʋ Sɔɔlɩ paɣzɩ kewiyitu tɔɔʋ yɔ, etaakuyuu ɛ-taa ɛlɛ eluzaɣ ɛ-tɩ. (1 Sam. 9:21) Ekizaa se ɛɛhɔŋ Izrayɛɛlɩ piya nzɩ sɩkaɖaɣnɩ e-kewiyitu tɔɔʋ yɔ, sɩ-nɩŋgbaaŋ. Ŋgʋ ɛpɩzaɣ se ɛla mbʋ, mbʋ pʋyɔɔ yɔ Ɛsɔ hanɩ-ɩ waɖɛ se ɛkɛ wiyaʋ. (1 Sam. 10:27) Wiyaʋ Sɔɔlɩ yeba nɛ Ɛsɔ fezuu ɖiyi-i alɩwaatʋ ndʋ ɛɖɛ Izrayɛɛlɩ piya nɔɔ you taa nɛ pawa Amooni mba yɔ. Pʋwayɩ lɛ, eluzi ɛ-tɩ nɛ ɛtɔ se Yehowa yebina nɛ pawa you ŋgʋ.—1 Sam. 11:6, 11-13.
w95 15/12 10§ 1
Amooni mba kɛ samaɣ ŋga kɛhɛyaɣ kañatʋ kɩbandʋ lone taa yɔ
Amooni mba tasɩ hɛyʋʋ kañatʋ kɩbandʋ ndʋ Yehowa labɩ-wɛ yɔ, ti-lone taa. Yehowa tihuuzi ɛsa pa-kañatʋ lakasɩ sɩnɛ sɩ-yɔɔ. Ðɩkalɩɣ se: “Kɩbaɣlʋ fezuu titibu Sɔɔlɩ yɔɔ, ɛtɩɩnɩ tɔm [Nahaasɩ tɔm] ndʋ yɔ lɛ, nɛ pɩwɩzɩ-ɩ pɩŋŋ.” Ɛsɔ fezuu ɖiyi Sɔɔlɩ nɛ ɛɖɛɛ nɔɔ sɔɔjanaa 330 000 nɛ pawa Amooni mba “nɛ pɩtɩkazɩ pa-taa naalɛ ɖama cɔlɔ.”—1 Sam. 11:6, 11.
Fezuu taa ñɩm
w05 15/3 22 § 8
Samɩyɛɛlɩ takayaɣ kajalaɣ ñɩŋga taa lɩmaɣza sɔsɔna
9:9—Ɛbɛ yɔɔ pɔyɔɔdaa se “weyi payaɣ sɔnɔ se nayʋ yɔ, payaɣaɣ-ɩ ɖooo lɛ se weyi ɛcɔŋna yɔ”? Pɩtɩla ɛzɩma nayaa kɔma nɛ palakɩ tʋma sɔsɔna Samɩyɛɛlɩ alɩwaatʋ taa nɛ Izrayɛɛlɩ awiya alɩwaatʋ taa yɔ, pʋyɔɔ peyebi-wɛ yaʋ se “mba pɔcɔŋna yɔ” nɛ payaɣ-wɛ se “nayaa.” Samɩyɛɛlɩ kaakɛnɩ nayʋ kajalaɣ tʋ.—Tʋma Labʋ 3:24.
[Footnote]
a Pama Teŋgu Kɩsɩbʋʋ taa takayɩsɩ kikpiyisi pɩcɛzɩ pɩnzɩ kudoku pʋcɔ nɛ pama takayɩsɩ nzɩ payaɣ se Masɔrɛɛtɩ masɩ yɔ.