Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
© 2023 Watch Tower Bible and Tract Society of Pennsylvania
4-10 SEPTEMBRE
ÑƖM MBƲ PƖWƐ ƐSƆTƆM TAA YƆ | ƐSƖTƐƐRƖ 1-2
«Ñaɣ pana nɛ ŋwɛɛnɩ tɩ luzuu ɛzɩ Ɛsɩtɛɛrɩ yɔ»
Ðɩpɩzɩɣ nɛ ɖɩɖɔkɩ tɩ luzuu paa pɩwɛ kaɖɛ yɔ
11 Ye pasaŋ-ɖʋ kadadayaɣ yɔ, pɩpɩzɩɣ nɛ pɩtakɩ tɩ luzuu mbʋ ɖɩwɛna yɔ. Iyele nɛ ɖɩna kɩɖaʋ kɩbaŋʋ ŋgʋ Ɛsɩtɛɛrɩ hawa alɩwaatʋ ndʋ ɛ-wɛtʋ kɔm nɛ tɩlɛɣzɩ yɔ. Eeɖe pɩdɩɩfɛyɩ, nɛ paaha-ɩ sɔzɩŋ num ndɩ ndɩ se ɛcanɩnɩ ɛ-tɩ pɩnaɣ kʋɖʋmaɣ. Paa evemiye nɖɩ lɛ, ɛ nɛ Pɛrɩsɩ Kewiyaɣ taa pɛlaa paawɛna; nɛ pa-taa paa weyi lɛ, ɛñakaɣ pana se eɖe nɛ ɛkɩlɩ lalaa wiyaʋ ɛsɩndaa. Paa mbʋ yɔ, Ɛsɩtɛɛrɩ kaawɛnɩ ñamtʋ nɛ hɛɛɛ wɛtʋ. Pʋwayɩ ɛkɔm nɛ ɛpɩsɩ abiɖe lɛ, ɛtɩkpazɩ ɛ-tɩ ɖɔɖɔ.—Ɛst. 2:9, 12, 15, 17.
Ɛlʋbɩ Ɛsɔ samaɣ yɔɔ
15 Alɩwaatʋ talaa se pasʋnɩ Ɛsɩtɛɛrɩ wiyaʋ cɔlɔ lɛ, paha-ɩ waɖɛ se ɛlɩzɩ wondu ndʋ ɛmaɣzɩɣ se tɩpɩzɩɣ nɛ tɩsɩnɩ-ɩ nɛ ɛñɔɔzɩ ɛ-tɩ nɛ eɖe nɛ pɩkɩlɩ yɔ. Ɛlɛ ɛfɛyɩnɩ ɛsa naɣ naɣ, mbʋ yebina nɛ mbʋ Egaayi kaatɔma se ɛcɛlɩɣ-ɩ yɔ, pi-ɖeke ɛpɔzaa. (Ɛst. 2:15) Pʋtɔma yɔ, ɛɛnawa se keɖeɣa ɖeke taayeki se ɛ-tɔm ɛkɛdɩnɩ wiyaʋ; ɛlɛ pɩɩpɔzɩ-ɩ ti-luzuu, mbʋ pʋyɔɔ yɔ wɛtʋ ndʋ tɩtaatɔyɩ wiyaʋ ɖɩɣa taa. Ɛɛwɛnɩ toovenim na?
Ðɩpɩzɩɣ nɛ ɖɩɖɔkɩ tɩ luzuu paa pɩwɛ kaɖɛ yɔ
12 Tɩ luzuu sɩɣnɩ-ɖʋ se paa ɛzɩmtaa lɛ, ɖo-wondu suu, ɖa-tɩ ñɔɔzʋʋ, nɛ ɖa-lakasɩ ɩmʋna nɛ pɩwɩlɩ se ɖɩwɛnɩ ñamtʋ. Ðɩnawa se ɖɔ-tɔm ɛɛkɛdɩɣnɩ ɛyaa alɩwaatʋ ndʋ ɖɩkpazɩɣ ɖa-tɩ yaa ɖɩcaɣ se pana-ɖʋ yɔ. Ɛlɛ ye ‘ɖɩwɛnɩ maɣzɩm kɩbam hɛɛɛ’ yɔ, pitukuuni-wɛ nɛ pɩkɩlɩ. (Kalɩ 1 Pɩyɛɛrɩ 3:3, 4; Yer. 9:23, 24) Ye ɖɩkpazɩɣ ɖa-tɩ ɖa-laŋɩyɛ taa yɔ, wiɖiyi pɩkaɣ naʋ ɖa-lakasɩ taa kaɣlaa. Pʋtɔma yɔ, ɖa-lakasɩ yaa ɖɔ-yɔɔdaɣ yeki nɛ ɛyaa maɣzɩɣ se ɖɩwɛnɩ ŋgee wala naayɛ, yaa ɖɩsɩm tɔm ndʋ paasɩŋ yɔ, yaa ɖɩwɛnɩ taabalaa mba pɛwɛnɩ wala sɔsɔna yɔ. Yaa pɩtɩla ɖɔɖɔ yɔ, ɖɔ-yɔɔdaɣ pɩzɩɣ nɛ kawɩlɩ se ɖe-ɖeke ɖɩlabɩnɩ tʋmɩyɛ sɔsɔɖɛ naɖɩyɛ, ŋgʋ lalaa sɩnɩnɩ-ɖʋ nɛ ɖɩlabɩ-ɖɩ. Yesu tasɩ-ɖʋ haʋ kɩɖaʋ kɩbaŋʋ hɔɔlʋʋ ŋgʋ kɩ-taa. Tɔm ndʋ ɛyɔɔdaɣ yɔ, ɛlɩzɩ tɩ-taa sakɩyɛ nɛ Ebree Masɩ taa. Yesu kaayɔɔdɩnɩ tɩ luzuu, mbʋ pʋyɔɔ yɔ ɛñɩnaɣ se ɛ-tɔm welisiyaa ɩna se tɔm ndʋ ɛyɔɔdaɣ yɔ, tɩtɩlɩɩnɩ ɛ-maɣmaɣ ɛ-cɔlɔ ɛlɛ tɩlɩnɩ Yehowa cɔlɔ na.—Yoh. 8:28.
Fezuu taa ñɩm
Ŋŋsɩm-tʋ?
Ñɩnɩyaa lɩ Pɛrɩsɩ mba tɔm kɩmamatʋ natʋyʋ yɔɔ, nɛ abalʋ weyi payaɣaɣ se Marduka (Kabɩyɛ taa lɛ Mɔrɩdekayɩ) yɔ ɛ-hɩɖɛ wɛ tɩ-taa. Ɛɛkɛ ageeta yɔɔ cɔnɩyʋ, pɩtɩla yɔ ɛɛkɛ akɔnta laɖʋ Suuzaŋ. Palɩ tɔm ndʋ tɩ-yɔɔ lɛ, egeetiye nɖɩ ɖɩ-taa caanaʋ taa tɔm taa tazɩyʋ weyi payaɣaɣ se Arthur Ungnad yɔ, ɛma se kajalaɣ ɖeɖe lɛ palɩɣ Mɔrɩdekayɩ hɩɖɛ yɔɔ wonuu ŋgʋ kɩtɩkɛ Bibl hɔɔlʋʋ nakʋyʋ yɔ kɩ-yɔɔ yɔ.
Kpaɣnɩ alɩwaatʋ ndʋ Ungnad ma tɔm ndʋ yɔ, Bibl taa tazɩyaa ɖɛzɩ Pɛrɩsɩ mba tɔm kɩmamatʋ lɛɛtʋ kudokiŋ sakɩyɛ. Wondu ndʋ tɩ-yɔɔ tɔm kɩmamatʋ ndʋ tɩɩwɛɛ yɔ tɩ-taa natʋyʋ lɛ pɩtaahalanzɩ nzɩ sɩ-yɔɔ palɩ Ñɩm ɖɩzɩyɛ nɖɩ ɖɩpɩsɩ njɛyɛ nɛ ɖɩñɔtɩnɩ Persépolis tɛtʋ kolonzi yɔ ɖɩ-taa yɔ. Sɛrzɛɛsɩ I kewiyitu tɔɔʋ alɩwaatʋ taa pɩtaahalanzɩ pɩkɛnaa. Sɩɩwɛ Elamite kʋnʋŋ taa nɛ Ɛsɩtɛɛrɩ takayaɣ taa hɩla sakɩyɛ wɛ sɩ-yɔɔ.
Hɩɖɛ Marduka wɛ pɩtaahalanzɩ nzɩ sɩ-yɔɔ palɩ Persépolis tɛtʋ taa yɔ sɩ-taa sakɩyɛ yɔɔ. Marduka kaakɛ wiyaʋ takayaɣ taa mayʋ wiyaʋ ɖɩɣa taa Suuzaŋ Sɛrzɛɛsɩ I kewiyitu tɔɔʋ alɩwaatʋ taa. Pɩtaahalanzɩ nzɩ sɩ-taa kʋɖʋmaɣ yɔɔdaa se Marduka kɛ tɔm ɖɛzɩyʋ. Tɔm ndʋ tɩlakɩ nɔɔ kʋɖʋmaɣ nɛ tɔm ndʋ Bibl yɔɔdʋʋ Mɔrɩdekayɩ yɔɔ yɔ. Kɩyɔɔdʋʋ se ɛɛkɛ Wiyaʋ Asiyeruusi (Sɛrzɛɛsɩ I) kewiyaɣ ɖɩɣa taa tʋmlaɖʋ nɔɔyʋ, nɛ kʋnʋmɩŋ weyi ɛyɔɔdaɣ yɔ paa ɩtɩɖɔɔ yɔ ɩtalɩɣ naalɛ. Ðoŋ ɖoŋ lɛ, Mɔrɩdekayɩ cakaɣ wiyaʋ ɖɩɣa nɔnɔɔ taa Suuzaŋ. (Ɛst. 2:19, 21; 3:3) Nɔnɔɔ ŋga kaakɛ kuduyuu sɔsɔʋ nakʋyʋ nɛ wiyaʋ ɖɩɣa taa tʋmlaɖaa lakaɣ tʋmɩyɛ peeɖe.
Hɔɔlɩŋ sakɩyɛ taa lɛ, nɔɔ kʋɖʋmaɣ wɛ Marduka weyi ɛ-tɔm pɔyɔɔdɩ pɩtaahalanzɩ nzɩ sɩ-yɔɔ yɔ nɛ Mɔrɩdekayɩ weyi ɛ-tɔm pɔyɔɔdɩ Bibl taa yɔ pɛ-hɛkʋ taa. Paacaɣ wezuu alɩwaatʋ kʋɖʋmtʋ taa nɛ lone kʋɖʋmɖɩyɛ taa, nɛ paakɛ wiyaʋ ɖɩɣa taa tʋmlaɖaa lone kʋɖʋmɖɩyɛ taa. Toovenim tɔm ndʋ tɩ-tɩŋa tɩwɩlɩɣ se pɩwɛ ɛzɩ ɛyʋ kʋɖʋm ɛnʋ payaɣaɣ se Marduka nɛ Mɔrɩdekayɩ yɔ.
11-17 SEPTEMBRE
ÑƖM MBƲ PƖWƐ ƐSƆTƆM TAA YƆ | ƐSƖTƐƐRƖ 3-5
«Sɩnɩ lalaa nɛ palabɩnɩ po-ɖoŋ nɛ pɛ-lɛɣtʋ tʋmɩyɛ camɩyɛ»
it-2 345 § 5
Mɔrɩdekayɩ
Ekizaa se eeluŋuu Hamaanɩ tɛɛ. Pʋwayɩ lɛ, Asiyeruusi kpazɩ Agaagɩ tʋ Hamaanɩ awumbiya lalaa yɔɔ nɛ ɛɖʋ paɣtʋ mba payɩ pacakɩ wiyaʋ nɔnɔɔ tɛɛ yɔ se poluŋ ɛ-tɛɛ. Ɛlɛ Mɔrɩdekayɩ kizi se ɛɛlakɩ mbʋ nɛ ɛlɩzɩ pɩ-taa se ɛkɛ Yuuda tʋ. (Ɛst. 3:1-4) Lɩmaɣzɩyɛ nɖɩ ɖɩ-yɔɔ Mɔrɩdekayɩ kizaa se ɛɛlakɩ mbʋ yɔ ɖɩwɩlɩɣ se taabalɩyɛ kɩbanɖɛ wɛ ɛ-nɛ Yehowa pɛ-hɛkʋ taa. Ɛkɛ Yuuda tʋ nɛ ɛkpaɣ ɛ-tɩ nɛ ɛha Ɛsɔ ɛnʋ na. Ɛnɩ pɩ-taa se ye eluŋ Hamaanɩ tɛɛ yɔ, pɩtɩkɛ ñamtʋ tɔm ɖeke ɛzɩ Izrayɛɛlɩ mba kaatɛm luŋuu ñʋndɩnaa nabɛyɛ tɛɛ nɛ pɩɖɛɛ se pawɩlɩ se pahaɣ-wɛ ñamtʋ yɔ. (2Sam 14:4; 18:28; 1Awi 1:16) Lɩmaɣzɩyɛ kɩbanɖɛ naɖɩyɛ yɔɔ Mɔrɩdekayɩ kaakizaa se eeluŋuu Hamaanɩ tɛɛ. Pɩtʋʋ fɛyɩ se Hamaanɩ kaakɛ Amaleki tʋ nɛ Yehowa maɣmaɣ kaayɔɔdaa se ɛkaɣ yonuu Amaleki mba «kpaɣ kpaɖʋʋ nɛ piwolo kpaɖʋʋ.» (Ejl. 17:16; cɔnɩ HAMÂN.) Pɩtɩkɛ politiki tɔm natʋyʋ yɔɔ Mɔrɩdekayɩ kizaa se eeluŋuu Hamaanɩ tɛɛ, ɛlɛ ɛɛsɔɔlaa se ɛwɛɛ siɣsiɣ Ɛsɔ ɛsɩndaa.
it-2 345 § 7
Mɔrɩdekayɩ
Tʋmɩyɛ nɖɩ ɛlaba nɛ ɛya Izrayɛɛlɩ ñʋʋ yɔ. Paɖʋ paɣtʋ se pakʋ Izrayɛɛlɩ mba kpeekpe Pɛrɩsɩ kewiyaɣ taa lɛ, Mɔrɩdekayɩ wɩlɩ se ɛɛpɩtɩɣ se Ɛsɩtɛɛrɩ pɩsɩ Abiɖe se pɩsa nɛ ɛya Yuuda mba ñʋʋ. Eheyi Ɛsɩtɛɛrɩ sʋʋtʋ sɔsɔtʋ ndʋ ɛwɛna yɔ nɛ ɛwɩlɩ-ɩ mbʋ pɩwɛɛ se ɛla nɛ piyele nɛ wiyaʋ na pa-pʋtɔdɩyɛ yɔ. Paa pɩɩpɩzaɣ se pɩkɔnɩ-ɩ sɩm yɔ, Ɛsɩtɛɛrɩ tisaa nɛ ɛla ɛzɩ Mɔrɩdekayɩ kaaheyuu-i yɔ.—Ɛst 4:7–5:2.
Ɛlʋbɩ Ɛsɔ samaɣ yɔɔ
22 Ɛsɩtɛɛrɩ nɩ tɔm ndʋ lɛ, pɩtʋʋ fɛyɩ se sɔɔndʋ kpa-ɩ siŋŋ. Wiɖiyi pɩtaatakɩ e-tisuu mbʋ nɛ ɛna. Ecosi Mɔrɩdekayɩ nɛ eheyi-i kpayɩ se sɔɔndʋ kpaɣ-ɩ. Ɛtɔzɩ-ɩ wiyaʋ paɣtʋ yɔɔ. Ye ɛyʋ ɛsʋ wiyaʋ cɔlɔ nɛ wiyaʋ tɩyaa-ɩ yɔ, pakʋʋ-ɩ. Ɛlɛ ye wiyaʋ ɛwɩlɩ-ɩ e-sika ɖaʋ yɔ, ɖɩnɛ ɛlɛ pɩɩya ɛ-ñʋʋ. Ɛsɩtɛɛrɩ wɛnɩ lidaʋ nakʋyʋ se ɛmaɣzɩ se wiyaʋ kaɣ ɛ-pʋtɔdɩyɛ naʋ, kɔzɩ kɔzɩ ɛtɔzʋʋ mbʋ pɩtalɩ Vasɩti yɔ, pɩ-yɔɔ lɛ? Ɛsɩtɛɛrɩ heyi Mɔrɩdekayɩ se wiyaʋ tɩyaa-ɩ pɩlabɩ kɩyakɩŋ 30 yɔ. Ye mbʋ, Ɛsɩtɛɛrɩ wɛnɩ toovenim se ɛmaɣzɩ se ye patɩyaa-ɩ kɩyakɩŋ sakɩyɛ yɔ, pɩwɩlɩɣ se ɛzɩma wiyaʋ ɛnʋ ɛ-lɩmaɣza lɛɣzɩɣ yem yem yɔ, pʋtɔma ɛtɩtasɩ-ɩ sɔɔlʋʋ.—Ɛst. 4:9-11.
23 Mɔrɩdekayɩ cosi Ɛsɩtɛɛrɩ nɛ kpekpeka se pɩpɩzɩ nɛ pɩsɩnɩ e-tisuu. Eheyi-i se ɛtɩlɩ nɛ ɛsɩɩ se ye ekizaa se ɛɛsɩɣnɩ-wɛ yɔ, Yuuda mba ñʋʋ yabʋ kaɣ lɩnaʋ ɖoli nɔɔyʋ. Ɛlɛ ɛtaamaɣzɩ se ɛkaɣ lɩʋ pɩ-taa alɩwaatʋ ndʋ nazɩm kaɣ miŋ saʋ yɔ. Cɩnɛ Mɔrɩdekayɩ wɩlaa se ɛwɛnɩ tisuu siŋŋ Yehowa yɔɔ. Yehowa ɛɛkaɣ yebu kpa nɛ paɖɩzɩ ɛ-samaɣ nɛ lidaʋ tɔm ndʋ ɛyɔɔdaa yɔ, tɩtɛŋɛlɩ yem. (Yos. 23:14) Peeɖe Mɔrɩdekayɩ pɔzɩ Ɛsɩtɛɛrɩ se: «Ŋnanɩ we se pɩtɩla yɔ alɩwaatʋ ɛzɩ tʋnɛ yɔ tɩ-yɔɔ yɔɔ ŋpɩsɩ abiɖe?» (Ɛst. 4:12-14) Mɔrɩdekayɩ tɩmʋna se pamaɣzɩnɩ-ɩ yaa we? Ɛɛta ɛ-Ɛsɔ Yehowa liu nɛ ɛ-laŋɩyɛ pilim. Ða yɔ?—Ad. 3:5, 6.
Fezuu taa ñɩm
Ðɩlʋba se pɩha-ɖʋ nʋmɔʋ nɛ ɖɩsɛɛ Ɛsɔ
14 Ɛzɩ Ɛsɩtɛɛrɩ nɛ Mɔrɩdekayɩ paalabʋ caanaʋ taa yɔ, sɔnɔ ɖɔɖɔ Yehowa samaɣ lʋkɩ se pɩha-kɛ waɖɛ nɛ kɛsɛɛ-ɩ ɛzɩ ɛsɔɔlʋʋ yɔ. (Ɛstɛɛrɩ 4:13-16) Ña yɔ, ɛbɛ ŋpɩzɩɣ nɛ ŋla? Ŋpɩzɩɣ nɛ ŋtɩmɩ ɖoŋ ɖoŋ ɖo-koobiya mba panazɩɣ-wɛ ɖulum yɔ pɔ-yɔɔ. Ña-adɩma ana apɩzɩɣ nɛ asɩnɩ koobiya mba pɛwɛ kʋñɔmɩŋ nɛ nazɩm taa yɔ. (Kalɩ Yakubu 5:16.) Yehowa pɩzɩɣ nɛ ecosi ña-adɩma ana a-yɔɔ? Ɛzɩma Yehowa samaɣ wakɩ ko-koyindinaa tɔm ɖɩhʋyɛ yɔ, pɩwɩlɩɣ se toovenim lɛ Yehowa cosuu adɩma ana a-yɔɔ.—Ebree 13:18, 19.
18-24 SEPTEMBRE
ÑƖM MBƲ PƖWƐ ƐSƆTƆM TAA YƆ | ƐSƖTƐƐRƖ 6-8
«Lɔŋ tasʋʋ pɩlɩɩnɩ ɛzɩma pɩmʋnaa se ɖɩyɔɔdɩ yɔ pɩ-yɔɔ»
Ɛlabɩ lɛɣtʋ, abalɩtʋ nɛ ɛtɩñɩnɩ e-ɖeke ɛ-kɛzɛɣa
15 Ɛzɩma Ɛsɩtɛɛrɩ ɖʋ suuɖu nɛ ɛɖaŋ kɩyakʋ lɛɛkʋ se pʋcɔ nɛ eheyi wiyaʋ tɔm yɔ, pɩha Hamaanɩ alɩwaatʋ se ehuyi ɛ-maɣmaɣ ɛ-pɩlaʋ. Nɛ anawa se ɛzʋnɔ pɩtɩkɛ Yehowa Ɛsɔ yebina nɛ wiyaʋ ñɩnɩɣ ɖom nɛ ɛɛnaɣ? (Ad. 21:1) Pʋyɔɔ Ɛsɔtɔm sazɩɣ-ɖʋ se ɖɩtaa Ɛsɔ liu nɛ ɖɩɖaŋɩ-ɩ. (Kalɩ Mikee 7:7.) Ye ɖɩta Ɛsɔ liu nɛ ɖɩɖaŋɩ-ɩ yɔ, ɖɩkaɣ naʋ se ɛzɩma ɛcɔŋnɩ ɖa-tɩlasɩ ɖeɖe yɔ, pɩcɛzɩɣ mbʋ payɩ ɖɩɩmaɣzaa yɔ, pɩ-yɔɔ.
Ɛyɔɔdɩnɩ abalɩtʋ
16 Ɛsɩtɛɛrɩ tɩtasɩ katʋʋ se eyele nɛ wiyaʋ ɖaŋ nɛ pɩtasɩ leɖuu; pɩwɛɛ se eheyi-i pɩtɩŋa alɩwaatʋ ndʋ ɛkɔŋ kazandʋ ɖɩdɔɔyɛ nabʋlɛ ɖeɖe yɔ. Ɛlɛ ɛzɩma tɩyɛ ɛkaɣ-ɩ tʋ heyuu? Nɛ pɩkɔɔ pɩla se wiyaʋ tasɩ-ɩ haʋ waɖɛ se ɛpɔzɩ mbʋ e-liu wɛɛ yɔ. (Ɛst. 7:2) Lɛɛlɛɛyɔ lɛ, alɩwaatʋ talaa se Ɛsɩtɛɛrɩ ɛyɔɔdɩ.
Ɛlabɩ lɛɣtʋ, abalɩtʋ nɛ ɛtɩñɩnɩ e-ɖeke ɛ-kɛzɛɣa
17 Ðɩpɩzɩɣ nɛ ɖɩmaɣzɩ se Ɛsɩtɛɛrɩ tɩmnɩ Ɛsɔ ɛ-laŋɩyɛ taa pʋcɔ nɛ ɛyɔɔdɩ tɔm tʋnɛ: «Oo wiyaʋ, ye mɔn-tɔm ɛkɛdɩnɩ-ŋ nɛ ye pɩkɛdɩnɩ wiyaʋ yɔ, mbʋ mɔnpɔzʋʋ yɔ, mbʋ yɔ se ŋya me-wezuu ñʋʋ, nɛ mbʋ mɔnsɔɔlaa yɔ mbʋ yɔ se ŋholi man-samaɣ.» (Ɛst. 7:3) Ɛsɩtɛɛrɩ hɛzɩ wiyaʋ laŋɩyɛ se paa lɩmaɣzɩyɛ nɖɩ ɛkpaɣaa yɔ, ɛñaŋ-ɖɩ. Ɛsɩtɛɛrɩ kaawɛ ndɩ kpem nɛ wiyaʋ halʋ kɩbɩnʋ Vasɩti, weyi ɛɛtɛm ɛ-taa nɛ ɛpɛ ɛ-walʋ tɛtɛ yɔ. (Ɛst. 1:10-12) Pɩtasɩ lɛ, Ɛsɩtɛɛrɩ tɩkalɩ wiyaʋ se pʋyɔɔ ɛlabɩ kɩmɛlɛndʋ nɛ ɛtaa Hamaanɩ liu. Ɛlɛ, etendi wiyaʋ kitenduu se eholi-i mbʋ pʋyɔɔ yɔ, e-wezuu wɛ kaɖɛ taa.
Ɛlabɩ lɛɣtʋ, abalɩtʋ nɛ ɛtɩñɩnɩ e-ɖeke ɛ-kɛzɛɣa
18 Pɩtʋʋ fɛyɩ se mbʋ Ɛsɩtɛɛrɩ pɔzaa yɔ, pɩlabɩ wiyaʋ yɔɔ tʋmɩyɛ nɛ pɩɖɩɣzɩ-ɩ. Akataa nɛ ɛkpɛzɩɣ ɛ-tɛ abiɖe? Ɛsɩtɛɛrɩ wolo pɩ-yɔɔ nɛ ɛtɔ se: «Pɛpɛdɩ-ɖʋ, ma nɛ man-samaɣ, se pɔtɔyɩtɩ-ɖʋ, pakʋ-ɖʋ nɛ paɖɩzɩ-ɖʋ. Ye paapɛdɩ-ɖʋ kɩpɛdʋ yem se ɖɩkɛ yomaa abalɩñɩma nɛ halɩñɩma yɔ, maasum tamɩyɛ. Ɛlɛ asɛyʋʋ ŋgʋ kɩtɩmʋna, mbʋ pʋyɔɔ yɔ kɩkaɣ ɖʋzʋʋ wiyaʋ.» (Ɛst. 7:4) Ɛsɩtɛɛrɩ yɔɔdɩ tɔm ndʋ tɩcɛyaɣ-ɩ yɔ nɛ laŋɩyɛ kpayɩ. Nɛ ɛtasɩ se ye paakpa-wɛ kɩkpaʋ yem se papɩsɩ-wɛ yomaa yɔ, eesum tamɩyɛ. Ɛlɛ ɛzɩma paɖʋwa se paɖɩzɩɣ Yuuda mba yɔ, pɩkaɣ ɖʋzʋʋ wiyaʋ maɣmaɣ, pʋyɔɔ lɛ pɩfɛyɩ se esu.
19 Ɛsɩtɛɛrɩ kɩɖaʋ kpɛlɩkɩɣ-ɖʋ lɔŋ sakɩyɛ, ɛzɩma ɖɩtɩlɩ yɔɔdʋʋ nɛ petisi ɖɔ-tɔm yɔɔ yɔ. Ye pɩlaba se wiɖiyi ŋwɛnɩ tɔm kɩcɛyɩtʋ natʋyʋ se ŋɖʋʋ ña-kʋsɔɔlʋ nɔɔyʋ yaa ɛyʋ sɔsɔ nɔɔyʋ ɛsɩndaa yɔ, wɛɛnɩ suuɖu nɛ ñamtʋ nɛ ŋyɔɔdɩ toovenim ɛzɩ Ɛsɩtɛɛrɩ yɔ.—Ad. 16:21, 23.
Fezuu taa ñɩm
w06 1/3 11 § 1
Ɛsɩtɛɛrɩ takayaɣ taa lɩmaɣza sɔsɔna
7:4—Ɛzɩma Yuuda mba ɖɩzʋʋ «kaɣ ɖʋzʋʋ wiyaʋ»?
Ɛsɩtɛɛrɩ labɩ lɛɣtʋ nɛ ɛyɔɔdɩ se mbʋ ɛzɩ paaɖɩzɩ Yuuda mba lɛ, papɩzɩɣ nɛ pɛpɛdɩ-wɛ nɛ papɩsɩ yomaa, nɛ ɛtɩŋnɩ pɩ-yɔɔ nɛ ɛwɩlɩ wiyaʋ se ye paɖɩzɩ Yuuda mba yɔ, pɩɖʋzʋʋ wiyaʋ. Liidiye pɔɔyɩsɩ 10000 nɖɩ Hamaanɩ yɔɔdaa se ɛɖʋzʋʋ liidiye koozaɣ taa yɔ, ɖɩtɩlɩɩ pʋyʋ ye pakpaɣ-ɖɩ nɛ pamaɣzɩnɩ liidiye nɖɩ wiyaʋ pɩzaɣ se ehiɣ ye ɛpɩzaa nɛ ɛpɛdɩ Yuuda mba nɛ papɩsɩ Yomaa yɔ. Pɩtasɩ lɛ, ye Hamaanɩ kaapɩzaa nɛ ɛtalɩ ɛ-kaɖʋwa yɔ, kewiyaɣ taatasɩ wɛnʋʋ abiɖe.
25 SEPTEMBRE–1er OCTOBRE
ÑƖM MBƲ PƖWƐ ƐSƆTƆM TAA YƆ | ƐSƖTƐƐRƖ 9-10
«Ɛtɩlabɩnɩ e-ɖoŋ tʋmɩyɛ se ɛñɩnɩ ɛ-maɣmaɣ ɛ-kɛzɛɣa»
it-2 346 § 1
Mɔrɩdekayɩ
Lɛɛlɛɛyɔ Mɔrɩdekayɩ pɩsɩ kewiyaɣ yɔɔ cɔnɩyʋ Hamaanɩ lone taa. Nɛ wiyaʋ cɛlɩ-ɩ ɛ-maɣmaɣ e-kokooye nɖɩ ɖɩhaɣ-ɩ waɖɛ se ɛñɩɣ nesi kewiyaɣ takayɩsɩ taa yɔ. Ɛsɩtɛɛrɩ sɩɩ Mɔrɩdekayɩ se ɛcɔŋnɩ Hamaanɩ ɖɩɣa ŋga wiyaʋ cɛlɩ-ɩ yɔ, kɔ-yɔɔ. Pʋwayɩ lɛ, Wiyaʋ ha nʋmɔʋ Mɔrɩdekayɩ se ɛɖʋ paɣtʋ ndʋ tɩhaɣ Yuuda mba waɖɛ se pakandɩyɩ pa-tɩ yɔɔ yɔ. Pɩɩkɛnɩ ñʋʋ yabʋ nɛ taa leleŋ alɩwaatʋ Yuuda mba. Pɛrɩsɩ kewiyaɣ taa ɛyaa sakɩyɛ ɖʋ nesi Yuuda mba. Yuuda mba ñɔɔzɩ pa-tɩ nɛ paɖaŋ Adaarɩ kɩyakʋ 13 ñɩŋgʋ. Kɩyakʋ ŋgʋ ki-wiye pɩwɛɛ se palabɩnɩ paɣtʋ ndʋ tʋmɩyɛ. Waɖɛ sɔsɔɖɛ nɖɩ Mɔrɩdekayɩ kaawɛna yɔ ɖɩ-yɔɔ lɛ, kewiyaɣ taa tʋmlaɖaa kaasɩnɩ Yuuda mba. Suuzaŋ tɛtʋ taa lɛ, patasɩ suyuu kɩyakʋ kʋɖʋmʋʋ se pɩsa nɛ powolo you yɔɔ. Yuuda mba koyindinaa mba pakʋ Pɛrɩsɩ kewiyaɣ kpeekpe taa yɔ, pɛcɛzɩ 75000 nɛ Hamaanɩ pɩyalaa 10 kaawɛ pɩ-taa. (Ɛst 8:1–9:18) Nɛ Ɛsɩtɛɛrɩ ha nʋmɔʋ Mɔrɩdekayɩ se ɛɖʋ paɣtʋ se paa pɩnaɣ ŋga lɛ, Adaarɩ kɩyakʋ 14 nɛ 15 ñɩŋgʋ ɛkɛnɩ taa leleŋ, kazandʋ nɛ amɛya kɩyakɩŋ. Paya kɩyakɩŋ ɛnɩ se «Puurim kɩyakɩŋ.» Kɩyakɩŋ ɛnɩ i-wiye Yuuda mba tiyiɣni ɖama tɔɔnasɩ nɛ palakɩ kʋjɔŋ ndɩ ndɩ kʋñɔndɩnaa. Yuuda mba tisaa nɛ pala kazandʋ ndʋ nɛ paɖʋ paɣtʋ se pa-sayɩnaa nɛ mba payɩ pɔkɔŋ kpɛndʋʋ pɔ-yɔɔ yɔ palakɩ-tʋ. Wiyaʋ wayɩ lɛ Mɔrɩdekayɩ tɩŋɩɣna, nɛ Yuuda mba kaawɛnɩ ñamtʋ siŋŋ ɛ-yɔɔ. Eewobi pɩ-yɔɔ nɛ ɛlakɩ tʋmɩyɛ nɖɩ ɖɩwazɩɣ-wɛ yɔ.—Ɛst 9:19-22, 27-32; 10:2, 3.
it-2 628 § 4
Puurim
Kaɖʋwa. Nabɛyɛ yɔɔdʋʋ se Puurim kazandʋ ndʋ Yuuda mba tɔkɩ sɔnɔ yɔ tɩtɩkɛ Ɛsɔ sɛtʋ kazandʋ, ɛlɛ pɩkɛ ɛjaɖɛ yɔɔ kazandʋ natʋyʋ yem nɛ pɛɖɛlɛsɩɣ niye hɔɔlɩŋ nɩɩyɩ taa alɩwaatʋ ndʋ pɔtɔkɩ-tʋ yɔ. Ɛlɛ pɩtaawɛɛ mbʋ alɩwaatʋ ndʋ paaɖʋ paɣtʋ se pɔtɔɔ kazandʋ ndʋ yɔ. Mɔrɩdekayɩ nɛ Ɛsɩtɛɛrɩ paakɛ Ɛsɔ toovenim tʋ sɛyaa nɛ pɔtɔkaɣ kazandʋ ndʋ nɛ paɖʋʋnɩ hɩɖɛ Yehowa. Ðɩpɩzɩɣ nɛ ɖɩyɔɔdɩ se Yehowa kaayabɩnɩ Yuuda mba ñʋʋ, mbʋ pʋyɔɔ yɔ ɛzɩma Mɔrɩdekayɩ kaawɛ cɩŋgɩlɩm Yehowa ɛsɩndaa nɛ ɛñɩnɩɣ se ɛsɛɛ e-ɖeke koŋ yɔ, pʋyɔɔ pañɩnaɣ se paɖɩzɩ Yuuda mba. Pɩtʋʋ fɛyɩ se Hamaanɩ kaakɛ Amalɛɛkɩ tʋ nɛ Yehowa kaalɔ nɔɔ kɩdɛkɛdaɣ Amalɛɛkɩ ɛjaɖɛ yɔɔ se paɖɩzɩ-ɖɩ. Mɔrɩdekayɩ kaañam Ɛsɔ paɣtʋ nɛ ekizi se eeluŋuu Hamaanɩ tɛɛ. (Ɛst 3:2, 5; Ejl 17:14-16) Pɩtasɩ lɛ tɔm ndʋ Mɔrɩdekayɩ heyi Ɛsɩtɛɛrɩ yɔ, (Ɛst 4:14) tɩwɩlɩɣ se ɛtaɣaɣ liu ɖoŋ sɔsɔŋ nɩɩyɩ se ɛnɩ kaɣnɩ yabʋ Yuuda mba ñʋʋ. Pɩtasɩ ɖɔɖɔ lɛ, pʋcɔ nɛ Ɛsɩtɛɛrɩ katɩ wiyaʋ nɛ eheyi-i mbʋ pɩɩwɛ ɛ-laŋɩyɛ taa yɔ lɛ, ɛhɔkɩ nɔɔ nɛ pɩwɩlɩɣ se Ɛsɔ ɛtaɣaɣ liu se ɛsɩnɩ-ɩ.—Ɛst 4:16.
cl 101-102 § 12-13
«Ɩmaɣzɩnɩ Yehowa alɩwaatʋ ndʋ ɩlakɩnɩ mi-ɖoŋ tʋmɩyɛ yɔ»
12 Yehowa ha waɖɛ ɛzʋtʋyaa se peɖiyi Krɩstʋ ɛgbɛyɛ. (Ebree mba 13:17) Pɛkɛ koobiya mba pamʋnaa se pala tʋmɩyɛ nɖɩ yɔ, nɛ palakɩnɩ po-ɖoŋ tʋmɩyɛ camɩyɛ nɛ pasɩɣnɩ po-koobiya nɛ peyeki ɖɔɖɔ se heɣsi ɩwɛɛ wɛtʋ kɩbandʋ taa. Pɩwɛɛ se papɩsɩ pa-tɩ kɩbaɣlaa po-koobiya yɔɔ? Aayɩ! Pɩwɛɛ se patɩlɩ po-ɖoŋ kamaɣ nɛ pala pa-tʋmɩyɛ nɛ tɩ luzuu ɛgbɛyɛ taa. (1 Pɩyɛɛrɩ 5:2, 3) Bibl heyi ɛzʋtʋyaa se: «Iɖiyi Ɛsɔ ɛgbɛyɛ, nɖɩ ɛyabɩnɩ ɛ-maɣmaɣ ɛ-Pɩyalʋ calɩm yɔ.» (Acts 20:28) Ye mbʋ, pɩwɛɛ se peɖiyi paa ɛgbɛyɛ taa heɣa ŋga lɛ nɛ sɔɔlɩm.
13 Ðɩkpaɣ kɩɖaʋ nakʋyʋ. Ña-taabalʋ nɔɔyʋ heyi-ŋ se ŋcɔnɩ e-wonuu nakʋyʋ yɔɔ. Ɛyabɩ-kʋ nɛ liidiye sɔsɔɖɛ nɛ kɩmʋ ñɩm siŋŋ ɛ-ɛsɩndaa. Ŋŋlakɩ mbʋ payɩ ŋpɩzɩɣ yɔ nɛ ŋɖɔkɩ wonuu ŋgʋ camɩyɛ na? Mbʋ ɖɔɖɔ Yehowa pɔzɩ ɛgbɛyɛ taa ɛzʋtʋyaa se pɔcɔnɩ ɛgbɛyɛ nɖɩ ɖɩmʋ ñɩm siŋŋ ɛ-ɛsɩndaa yɔ ɖɩ-yɔɔ. Pakpaɣ ɛgbɛyɛ taa mba nɛ pamaɣzɩnɩ heɣsi. (Yohanɛɛsɩ 21:16, 17) Yehowa sɔɔlɩ paa heɣa ŋga lɛ pɩdɩɩfɛyɩ. Pʋyɔɔ ɛkpaɣ mbʋ pɩkɩlɩ mʋʋ ñɩm ɛ-ɛsɩndaa yɔ nɛ ɛyabɩnɩ-kɛ: Mbʋ lɛ ɛ-Pɩyalʋ ɛgbamɩyɛ Yesu Krɩstʋ calɩm. Ɛzʋtʋyaa mba pɛwɛnɩ tɩ luzuu yɔ, pɔtɔzʋʋ tɔm ndʋ tɩ-yɔɔ nɛ pɔcɔŋnɩ Yehowa heɣsi yɔɔ camɩyɛ.
Fezuu taa ñɩm
w06 1/3 11 § 4
Ɛsɩtɛɛrɩ takayaɣ taa lɩmaɣza sɔsɔna
9:10, 15, 16—Ɛbɛ yɔɔ Yuuda mba kizaa se paalazɩɣ po-koyindinaa ñɩm paa paɣtʋ ɛhaɣaɣ-wɛ nʋmɔʋ se pala mbʋ yɔ? Pɩtɩkɛ pa-kaɖʋwa lɛ se papɩsɩ ñɩm tɩnaa, ɛlɛ paasɔɔlaa se pakandɩyɩ pa-samaɣ yɔɔ nɛ pataaɖɩzɩ-kɛ.
2-8 OCTOBRE
ÑƖM MBƲ PƖWƐ ƐSƆTƆM TAA YƆ | YƆƆB 1-3
«Wolo pɩ-yɔɔ nɛ ŋwɩlɩɣ se ŋsɔɔlɩ Yehowa pɩdɩɩfɛyɩ»
Maɣzɩnɩ tisuu nɛ ñamtʋ ndʋ Noowa, Danɩyɛɛlɩ nɛ Yɔɔb paawɛna yɔ
16 Kala wena Yɔɔb kaakataa? Yɔɔb katɩ lɛɣzɩtʋ sɔsɔtʋ e-wezuu caɣʋ taa. Pʋcɔ nɛ ɛsʋʋ takɩm taa lɛ, «ɛɛkɛ wɩsɩ ɖɩlɩyɛ taa sɔsaa kpeekpe taa sɔsɔ.» (Yɔɔb 1:3) Ɛɛkɛ ñɩm tʋ, ɛ-hɩɖɛ kaasɛwa nɛ ɛyaa ñaŋaɣ-ɩ siŋŋ. (Yɔɔb 29:7-16) Paa mbʋ yɔ, Yɔɔb taakpazɩɣ ɛ-tɩ nɛ etaakiziɣ Ɛsɔ paɣtʋ yɔɔ ɖɔm. Toovenim taa lɛ, Ɛsɔ ya-ɩ se ‘ɛ-lɩmɖʋyʋ’ nɛ ɛsɔzɩ se: «Ɛwɛ siɣsiɣ nɛ ɛñaŋ Ɛsɔ nɛ eseɣ kɩdɛkɛdɩm.»—Yɔɔb 1:8.
17 Alɩwaatʋ pazɩ yem taa lɛ, Yɔɔb wezuu caɣʋ lɛɣzɩ yem kpɛlɩ. Ɛɛsʋ kʋñɔndʋtʋ taa siŋŋ nɛ halɩ ɛlɔ lidaʋ. Ayeba nɛ ɛsʋʋ wɛtʋ ndʋ tɩ-taa? Bibl heyiɣ-ɖʋ se Sataŋ, kɔlɔmɔtʋ tʋ weyi ɛcɛtɩnɩ Yɔɔb taa se kɛzɛɣa nakɛyɛ yɔɔ ɛsɛɣaɣ Ɛsɔ yɔ. (Kalɩ Yɔɔb 1:9, 10.) Yehowa tiyele tɔm kɩdɛkɛdɩtʋ ndʋ Sataŋ yɔɔdaa yɔ yem se pɩla se pɩtɛma. Ɛha Yɔɔb waɖɛ se ɛtɩŋnɩ ɛ-cɩŋgɩlɩm wɛtʋ yɔɔ nɛ ɛwɩlɩ se pɩtɩkɛ kɛzɛɣa nakɛyɛ yɔɔ ɛsɛɣ Ɛsɔ; ɛlɛ ɛsɛɣ-ɩ mbʋ pʋyɔɔ yɔ, ɛsɔɔlɩ-ɩ nɛ ɛ-laŋɩyɛ pilim.
Ðɔkɩ ña-cɩŋgɩlɩm wɛtʋ!
10 Sataŋ yɔɔdʋʋ tɔm kʋɖʋmtʋ ndʋ ɖa-taa paa weyi lɛ ɛ-yɔɔ ɖɔɖɔ. Ɛzɩma tɩyɛ? Ɛmaɣzɩɣ se toovenim taa lɛ, ŋtɩsɔɔlɩ Yehowa Ɛsɔ, ŋkaɣ-ɩ yebu sɛʋ se pɩsa nɛ ŋya ña-ñʋʋ alɩwaatʋ ndʋ ŋkatɩɣ kaɖɛ sɔsɔɖɛ naɖɩyɛ yɔ, nɛ ɛmaɣzɩɣ ɖɔɖɔ se ŋŋkaɣ ɖɔkʋʋ ña-cɩŋgɩlɩm wɛtʋ. (Yɔɔb 2:4, 5; Nat 12:10) Tɔm ndʋ, ɛzɩma tɩlakɩ-ŋ? Pɩtʋʋ fɛyɩ se tɩɖʋʋ-ŋ ɖɩwɩzɩyɛ. Ɛlɛ maɣzɩ tɔm tʋnɛ tɩ-yɔɔ: Yehowa taɣ-ŋ liu siŋŋ nɛ halɩ pʋyɔɔ lɛ, ɛha-ŋ waɖɛ sɔsɔɖɛ naɖɩyɛ. Yehowa haɣ Sataŋ nʋmɔʋ se ɛtakɩ ña-cɩŋgɩlɩm wɛtʋ. Ɛtaɣ liu se ŋpɩzɩɣ nɛ ŋɖɔkɩ ña-cɩŋgɩlɩm wɛtʋ nɛ ŋyele nɛ patɩlɩ se Sataŋ kɛ cɛtɩyʋ. Nɛ eheyiɣ-ŋ se ɛkaɣ-ŋ sɩnʋʋ nɛ ŋpɩzɩ nɛ ŋla mbʋ. (Ebr 13:6) Pɩkɛnɩ waɖɛ sɔsɔɖɛ siŋŋ se kedeŋa kpeekpe Kɩlɩm taɣ-ŋ liu! Ŋnaɣ mbʋ pʋyɔɔ pɩcɛyaa se ɖɩɖɔkɩ ɖa-cɩŋgɩlɩm wɛtʋ yɔ? Pɩhaɣ-ɖʋ waɖɛ se ɖɩwɩlɩ se Sataŋ kɛ cɛtɩyʋ, piyeki ɖɔɖɔ se ɖɩlʋ ɖa-Caa hɩɖɛ kɩbanɖɛ yɔɔ nɛ ɖɩtɩnɩ e-kewiyitu tɔɔʋ yɔɔ. Ɛbɛ ɖɩpɩzɩɣ nɛ ɖɩla nɛ ɖɩɖɔkɩ ɖa-cɩŋgɩlɩm wɛtʋ kpam?
Fezuu taa ñɩm
Kpɛlɩkɩ lɔŋ kɛdɛzaɣ tɔm ndʋ Yesu yɔɔdaa yɔ tɩ-taa
9 Suwe Yesu yɔɔdaa? Alɩwaatʋ pazɩ pʋcɔ nɛ Yesu sɩkɩ lɛ, ɛmabɩ kubuka se: «Mɛ-Ɛsɔ, mɛ-Ɛsɔ, ɛbɛ yɔɔ ŋlɔ-m?» (Mat. 27:46) Bibl tɩyɔɔdɩ mbʋ pʋyɔɔ Yesu yɔɔdɩ tɔm ndʋ yɔ. Paa mbʋ, na lɔŋ weyi tɔm ndʋ tɩpɩzɩɣ nɛ tɩkpɛlɩkɩ-ɖʋ yɔ. Lɔŋ weyi ɖɩpɩzɩɣ nɛ ɖɩkpɛlɩkɩ yɔ, ɩ-taa nɩɩyɩ lɛ se Yesu yɔɔdʋʋ tɔm ndʋ yɔ, ɛɛwɛɛ nɛ eyeki se natʋ tɔm ndʋ tɩwɛ Keɣa 21:2 taa yɔ tɩla. Pɩtasɩ lɛ, tɔm ndʋ tiyeba nɛ pɩ-taa tʋ kpayɩ kpayɩ se Yehowa taawɛɛ nɛ ‘ehuuzuu’ ɛ-Pɩyalʋ yɔɔ. (Yɔɔb 1:10) Yesu kaanɩ pɩ-taa se ɛ-Caa kaawɛɛ nɛ ɛhaɣ nʋmɔʋ mba papaɖaɣ-ɩ yɔ se patakɩ e-tisuu nɛ pɩtalɩ sɩm taa. Wiɖiyi pɩtɩtakɩ ɛyʋ nɔɔyʋ nɛ pɩtalɩ Yesu kpa. Tɔm ndʋ, tɩwɩlɩɣ ɖɔɖɔ se ɛtɩla kɩwɛɛkɩm nabʋyʋ nɛ pɩpɔzʋʋ se pakʋ-ɩ.
9-15 OCTOBRE
ÑƖM MBƲ PƖWƐ ƐSƆTƆM TAA YƆ | YƆƆB 4-5
«Kpa ña-tɩ nɛ cɛtɩm tɔm»
it-1 725 § 2
Eliifaazɩ
2. Yɔɔb taabalaa naadozo taa lɛlʋ. (Yɔɔb 2:11) Ɛkɛ Temaanɩ tʋ nɛ pɩtʋʋ fɛyɩ se ɛkɛ weyi pɔyɔɔdɩ ɛ-tɔm No. 1 taa yɔ ɛ-sayɩ. Ye mbʋ ɛkɛ Abraham liɖe taa tʋ nɛ ɛkɛ ɖɔɖɔ Yɔɔb koobu, paa pɔ-hɔŋ ɩtaakɩlɩ ɖama ñɔtɩnʋʋ yɔ. (Yer 49:7) Pɩnaɣ se «laŋɩyɛ hɛzɩyaa» naadozo waa mba pa-taa lɛ, Eliifaazɩ pahaɣaɣ ñamtʋ nɛ pɩkɩlɩ nɛ ɛɛkɛ ɖɔɖɔ ɖoŋ tʋ nɔɔyʋ. Ye mbʋ, pɩtʋʋ fɛyɩ se ɛɛkɩlɩ lalaa. Kɛdɛsɩ naadozo nzɩ pa nɛ Yɔɔb palaba yɔ sɩ-taa, ɛnʋ calaɣnɩ yɔɔdʋʋ nɛ tɔm ndʋ ɛyɔɔdaa yɔ, tɩɖaɣlaa nɛ tɩcɛzɩ lalaa ñɩndʋ.
w05 15/9 26 § 2
Kaɖɩnɩ cɛtɩm tɔm!
Piti tɔm natʋyʋ kaatalɩ Eliifaazɩ nɛ ɛtɔzɩ tɩ-yɔɔ lɛ, ɛyɔɔdɩ se : «Nɛ fezuu nakʋyʋ kɔɔ nɛ kɩɖɛɛ mɛ-ɛsɩndaa; nɛ mon-tomnaɣ yɔɔ hʋndʋ kʋyɩ nɛ tɩsɩŋ; pʋwayɩ lɛ kɩsɩŋ ɖiɣ ɖiɣ, ɛlɛ mantɩpɩzɩ nɛ menɖiɣzini kɩ-wɛtʋ. Nabʋyʋ kaawɛ mɛ-ɛsɩndaa; pisu ɖiɣ ɖiɣ nɛ manɩɩ nɔɔ nakɛyɛ.» (Yɔɔb 4:15, 16) Fezuu ŋgʋ kaawɛnɩ ɖoŋ Eliifaazɩ lɩmaɣza yɔɔ? Tɔm kɩdɛkɛdɩtʋ ndʋ ɛyɔɔdaa nɛ ɛzɩma ɛyɔɔdɩ-tʋ nɛ kañatʋ yɔ, pɩwɩlɩɣ se pɩtɩkɛ Ɛsɔ tiyiyu siɣsiɣ tʋ nɔɔyʋ kaawɛnɩnɩ ɖoŋ ɛ-yɔɔ. (Yɔɔb 4:17, 18) Pɩɩkɛ fezuu kɩdɛkɛdʋʋ nakʋyʋ. Ye pɩtaakɛ mbʋ yɔ, Yehowa taaheyi Eliifaazɩ nɛ ɛ-taabalaa naalɛ lalaa pʋwayɩ se pɔyɔɔdɩ cɛtɩm tɔm. (Yɔɔb 42:7) Pɩtʋʋ fɛyɩ se Eliifaazɩ kaayeba nɛ eleeu nɔɔyʋ wɛɛnɩ ɖoŋ ɛ-yɔɔ. Tɔm ndʋ ɛyɔɔdaa yɔ tɩkaɖɩɣnɩ Ɛsɔ lɩmaɣza.
w10 15/2 19 § 5-6
Kaɖɩnɩ cɛtɩm tɔm ndʋ Sataŋ susuu yɔ
Sataŋ tɩŋnɩ abalaa naadozo mba powoba nɛ pana Yɔɔb yɔ pa-taa weyi payaɣ se Eliifaazɩ yɔ ɛ-yɔɔ nɛ ɛyɔɔdɩ se ɛyaa kɛ ajamaa mba pɛfɛyɩnɩ wazaɣ nakɛyɛ yɔ. Ɛyɔɔdɩ ɛyaa tɔm se pɛkɛ «mba pɛwɛ cʋʋ ɖɩsɩ taa yɔ» nɛ pɩtɛ lɛ, eheyi Yɔɔb se pɛkɛ «mba pe-tigiɖe wɛ mʋzʋʋ taa yɔ, mba pɔtɔyɩtʋʋ-wɛ kɛlɛʋ yem ɛzɩ pɔtɔyɩtʋʋ fiidiviu yɔ! Pɔtɔyɩtʋʋ-wɛ caɣ caɣ kpaɣnɩ tanaŋ tɛɛ nɛ piwolo ɖanaɣ; paɖɩŋ kpaagbaa ɖɩm nɛ nɔɔyʋ ɛɛnaɣ.»—Yɔɔb 4:19, 20.
Masɩ taa, pakpaɣ-ɖʋ nɛ pamaɣzɩnɩ «cʋʋ ñanzɩ» nzɩ sɩfɛyɩ ɖoŋ yɔ. (2 Kɔr. 4:7) Kɩwɛɛkɩm mbʋ pɛɖɛzɩ-ɖʋ yɔ pɩ-yɔɔ lɛ, ɖɩwɛnɩ ɛjandʋ. (Rom. 5:12) Ða-maɣmaɣ ɖɩfɛyɩnɩ ɖoŋ se ɖɩpɩzɩ nɛ ɖɩkaɖɩnɩ Sataŋ. Ɛlɛ ɖa mba ɖɩkɛ Krɩstʋ mba yɔ ɖɩfɛyɩ ɖe-ɖeke. Paa ɖɩwɛnɩ ɛjandʋ yɔ, ɖɩmʋ ñɩm Ɛsɔ ɛsɩndaa. (Iz. 43:4) Nɛ ɛhaɣ e-fezuu kiɖeɖeu weyi ɛpɔzʋʋ-ɩ kʋ yɔ. (Luka 11:13) E-fezuu pɩzɩɣ kɩha-ɖʋ «ɖoŋ weyi ɩcɛzɩ ɛyʋ ɖoŋ yɔ,» nɛ ɖɩpɩzɩɣ nɛ ɖɩlʋbɩnɩ kala wena payɩ Sataŋ kɔŋnɩ ɖɔ-yɔɔ yɔ. (2 Kɔr. 4:7; Fil. 4:13) Ye ‘ɖɩɖɔkɩ kpam tisuu taa’ nɛ ɖɩkaɖɩɣnɩ Sataŋ yɔ, Ɛsɔ kaɣ-ɖʋ sɩnʋʋ nɛ ɖɩɖɔkɩ kpam nɛ ɖɩkpa ɖoŋ. (1 Pɩy. 5:8-10) Ye mbʋ, pɩfɛyɩ se sɔɔndʋ ɛkpa-ɖʋ nɛ Sataŋ Eleeu.
mrt 32 § 13-17
Kandɩyɩ ña-tɩ yɔɔ nɛ pataapeɣzi-ŋ nɛ cɛtɩm tɔm
● Tazɩ nɛ ŋna ɖenɖe tɔm ndʋ tɩlɩnaa nɛ mbʋ pɩ-tɔm tɩyɔɔdʋʋ yɔ
Ndʋ Bibl yɔɔdʋʋ yɔ: «Iwili pɩtɩŋa camɩyɛ.»—1 Tesalooniiki mba 5:21.
Pʋcɔ nɛ ŋtisi tɔm natʋyʋ yɔɔ yaa ŋtiyini-tʋ lalaa paa tɩkɛ tɔm ndʋ tɩyɛlaa yaa pɔyɔɔdʋʋ-tʋ ɖoŋ ɖoŋ yɔ, tazɩ nɛ ŋna se tɩkɛ toovenim na. Ɛzɩma ŋpɩzɩɣ nɛ ŋla mbʋ?
Tazɩ nɛ ŋna se ɖenɖe yaa weyi ɛ-cɔlɔ tɩlɩnaa yɔ papɩzɩɣ nɛ pataa-ɩ liu na. Tɔm susuu agbaa yaa agbaa lɛɛna pɩzɩɣ nɛ ayɔɔdɩ tɔm natʋyʋ se pɩsa nɛ piɖeni-yɛ tadɩyɛ yaa politiki nʋmɔʋ taa. Tɔm ndʋ ŋnaɣ ɖoli yaa nɔɔyʋ cɔlɔ yɔ kpaɣ-tʋ nɛ ŋmaɣzɩnɩ ɖama. Nabʋyʋ taa ña-taabalaa pɩzɩɣ nɛ patɩŋnɩ messagewaa yaa mbʋ pasɩɣ réseaux sociaux waa yɔɔ yɔ pɩ-yɔɔ nɛ pɛyɛlɩnɩ cɛtɩm tɔm natʋyʋ, ɛlɛ pa-maɣmaɣ paaɖiɣziɣna. Pʋyɔɔ lɛ taatisi tɔm kɩfatʋ natʋyʋ yɔɔ yem nɛ ŋtɩtazɩ se ŋna ɖenɖe tɩlɩnaa yɔ.
Ñɩnɩ nɛ ŋna se tɔm ndʋ tɩkɛ kɩfatʋ nɛ tɩkɛ toovenim na. Ñɩnɩ nɛ ŋna ɛzɩmtaa pɔyɔɔdɩ tɔm ndʋ yɔ nɛ mbʋ pɩwɩlɩɣ keekee se tɩtɩkɛ pɔbɔtʋ tɔm yɔ. Kɔzɩ kɔzɩ lɛ, kpa ña-tɩ ye patɩŋnɩ nʋmɔʋ kɛlɛʋ ñɩŋgʋ nakʋyʋ yɔɔ nɛ palɩzɩ tɔm kaɖɛ ñɩndʋ natʋyʋ taa, yaa ye pama tɔm natʋyʋ se tituyi ɛyaa nɛ pɛwɛɛnɩ wɛtʋ natʋyʋ yɔ.
Fezuu taa ñɩm
w03 15/5 22 § 5-6
Ðɔkɩ kpam nɛ ŋse wezuu seya nɛ ŋwa
Ðɩnawa se ɖɩwɛ ɛjaɖɛ kpeekpe yɔɔ Ɛsɔ sɛyaa ɛgbɛyɛ sɔsɔɖɛ naɖɩyɛ taa, nɛ pɩhɛzɩɣ ɖa-laŋa pɩdɩɩfɛyɩ. Pɩkɛnɩ-ɖʋ wazaɣ kpem se ɖɩwɛ ɛjaɖɛ kpeekpe yɔɔ koobiya hɔʋ ŋgʋ kɩ-taa sɔɔlɩm wɛɛ yɔ kɩ-taa! (1 Pɩyɛɛrɩ 2:17) Ða ɖɔɖɔ ɖɩpɩzɩɣ nɛ ɖɩhɛzɩɣ ɖo-koobiya laŋa.
Na ɛzɩma Yɔɔb weyi ɛɛkɛ ɛyʋ siɣsiɣ tʋ yɔ, ɛɛsɩnɩ lalaa yɔ. Paa Eliifaazɩ ɛtaahɛzɩ Yɔɔb laŋɩyɛ yɔ, etisi tɔm tʋnɛ tɩ-yɔɔ: «Ñɔ-tɔm pee kʋsaɣ mba payɩ pituulaɣ-wɛ yɔ, nɛ ŋkpazaɣ ɖoŋ mba pa-nʋmbɔla yɔba yɔ.» (Job 4:4) Ða yɔ, ɛzɩma tɩyɛ ɖɩsɩɣnɩ lalaa? Pɩkɛnɩ ɖa-taa paa weyi sʋʋtʋ se ɛsɩnɩ e-koobiya halaa nɛ abalaa nɛ pɔɖɔkɩ Ɛsɔ sɛtʋ kpam. Alɩwaatʋ ndʋ ɖɩmaɣzɩɣ ɖo-koobiya yɔɔ yɔ, ɖɩpɩzɩɣ ɖɩlabɩnɩ tʋmɩyɛ tɔm tʋnɛ: «Ɩkpazɩ ɖoŋ nesi nzɩ sɩfɛyɩ ɖoŋ yɔ, nɛ ɩcɛyɩsɩ nʋmbɔla wena aɖiɣni seluu yɔ.» (Izaayii 35:3) Ðʋ ña-tɩ kaɖʋwa se ŋkpazɩɣ ɖoŋ ño-koobiya Krɩstʋ mba alɩwaatʋ ndʋ ŋwɛɣ pɔ-cɔlɔ yɔ. (Ebree mba 10:24, 25) Ye ŋsaŋ-wɛ, ŋsɛɣ-wɛ nɛ ŋkpazɩɣ-wɛ ɖoŋ pana wena pañakɩ se pɔ-tɔm ɛkɛdɩnɩ Yehowa yɔ a-yɔɔ yɔ, pɩtʋʋ fɛyɩ se pɩsɩɣnɩ-wɛ nɛ pɔɖɔkɩ kpam nɛ pese wezuu seya nɛ pawa.
16-22 OCTOBRE
ÑƖM MBƲ PƖWƐ ƐSƆTƆM TAA YƆ | YƆƆB 6-7
«Alɩwaatʋ ndʋ wezuu caɣʋ lakɩ kaɖɛ yɔ»
w06 15/3 14 § 10
Yɔɔb takayaɣ taa lɩmaɣza sɔsɔna
7:1; 14:14—Ɛbɛ Yɔɔb yawa se «tʋmɩyɛ nɖɩ pakpaɣ ɛyʋ nɛ ɖoŋ nɛ ɛlakɩ yɔ» yaa «tʋmɩyɛ nɖɩ paɖʋ-m yɔ»? Yɔɔb kakatɩ kala ɖama yɔɔ ɖama yɔɔ, pʋyɔɔ ɛkpaɣ e-wezuu caɣʋ nɛ ɛmaɣzɩnɩ tʋmɩyɛ nɖɩ pakpaɣ ɛyʋ nɛ ɖoŋ nɛ ɛlakɩ yɔ yaa ɖoŋ tʋmɩyɛ nɖɩ ɖɩ-labʋ wɛ kaɖɛ siŋŋ yɔ. (Yɔɔb 10:17, pɩ-tɛɛ tɔm) Alɩwaatʋ ndʋ ɛyʋ lakɩ pɩlaʋ taa yɔ.—kpaɣnɩ alɩwaatʋ ndʋ ɛsɩba nɛ piwolo alɩwaatʋ ndʋ pefeziɣ-i yɔ—tɩtɩkɛ alɩwaatʋ ndʋ ɛ-maɣmaɣ ɛlɩzaa se ɛwɛɣ peeɖe yɔ, pʋyɔɔ Yɔɔb kpaɣ-tʋ nɛ ɛmaɣzɩnɩ tʋmɩyɛ nɖɩ pakpaɣ ɛyʋ nɛ ɖoŋ nɛ ɛlakɩ yɔ.
‘Yehowa yakɩ pɩɖɛmwaa ñʋʋ’
NABƲYƲ taa, ɖɩpɩzɩɣ nɛ ɖɩmaɣzɩ nɛ ɖiɖiɣzina se ɛyʋ wezuu caɣʋ tɩɖaɣlɩ nɛ kɩ-taa lɛ «kʋñɔŋ kɩlɩna.» (Yɔɔb 14:1) Nabʋyʋ taa piyeki nɛ pitiki-ɖʋ yɔɔɔ. Piitibi caanaʋ taa Yehowa sɛyaa nabɛyɛ yɔɔɔ ɖɔɖɔ. Halɩ pa-taa nabɛyɛ kaasɔɔlaa se pasɩ. (1 Aw. 19:2-4; Yɔɔb 3:1-3, 11; 7:15, 16) Ɛlɛ, Yehowa hɛzaɣ pa-laŋa nɛ ɛkpazɩɣ-wɛ ɖoŋ paa ɛzɩmtaa. Pama pɔ-tɔm Bibl taa se pɩsa nɛ ɖɩkalɩɣ-tʋ lɛ, pɩhɛzɩ ɖa-laŋa nɛ ɖɩkpɛlɩkɩ lɔŋ pɔ-cɔlɔ.—Roma 15:4.
g 1/12 16-17
Alɩwaatʋ ndʋ wezuu caɣʋ lɩɣ-ŋ sɔŋ yɔ
Paa ŋwɛ kaɖɛ sɔsɔɖɛ naɖɩyɛ taa yɔ, tɔzɩ se ŋfɛyɩ ñe-ɖeke. Pɩkɛ pʋtɔdɩyɛ tɔm, ɛlɛ ɛyaa tɩŋa katɩɣ kala sɔnɔ. Bibl yɔɔdaa se: «Wondu kɩlɩzɩtʋ tɩŋa ɖiɣni muzuu nɛ tɩnɩɣ siziŋ halɩ nɛ sɔnɔ.» (Roma mba 8:22) Alɩwaatʋ ndʋ ŋkatɩɣ kala yɔ, pɩpɩzɩɣ nɛ pɩlabɩ-ŋ ɛzɩ kɩlabɩm fɛyɩ yɔ; ɛlɛ ɖoŋ ɖoŋ lɛ, kala sɩɣ tɩnaɣ pʋwayɩ. Pʋcɔ nɛ asɩɩ tɩnaɣ lɛ, ɛbɛ ŋpɩzɩɣ nɛ ŋla?
Yɔɔdɩnɩ ña-taabalʋ weyi ɛpɩwa nɛ ŋtaɣ-ɩ liu yɔ. Bibl yɔɔdaa se: «Taabalʋ kɩbanʋ wɩlɩɣ sɔɔlɩm paa ɛzɩmtaa, nɛ ɛkɛ koobu weyi palʋlɩ-ɩ se ɛsɩna kʋñɔŋ alɩwaatʋ taa yɔ.» (Aduwa 17:17) Ɛyʋ siɣsiɣ tʋ Yɔɔb weyi pɔyɔɔdɩ ɛ-tɔm Bibl taa yɔ, ɛñɩnɩ sɩnʋʋ lalaa cɔlɔ alɩwaatʋ ndʋ ɛkataɣ kala yɔ. Alɩwaatʋ ndʋ ɛyɔɔdaa se «me-wezuu lɩ-m sɔŋ» yɔ, esuyaa se: «Mankaɣ wiu man-kʋñɔŋ nɛ mɛntɛ man-taa. Mankaɣ yɔɔdʋʋ men-siziŋ sɔsɔŋ taa!» (Yɔɔb 10:1) Ye ŋyɔɔdɩnɩ nɔɔyʋ yɔ, pɩpɩzɩɣ nɛ pɩhɛzɩ ña-laŋɩyɛ nɛ pɩsɩnɩ-ŋ nɛ ŋtaakɩlɩɣ nɩɣzʋʋ.
Tɩmnɩ Ɛsɔ nɛ ŋheyi-i mbʋ pɩ-taa ŋwɛɛ yɔ. Ɛyaa nabɛyɛ yɔɔdʋʋ se adɩma kɛ alɩwaatʋ lesuu mbʋ pʋyɔɔ yɔ, nɔɔyʋ fɛyɩ nɛ ewelisiɣ adɩma, ɛlɛ pɩtɩkɛ tɔm ndʋ Bibl wɩlɩɣ. Bibl yɔɔdɩ Keɣa 65:2 taa se Yehowa Ɛsɔ kɛ «adɩma Welisiyu» nɛ 1 Pɩyɛɛrɩ 5:7 taa se «ɛcɔŋnɩ mɩ-yɔɔ.» Bibl masɩ sakɩyɛ wɩlɩɣ se pɩcɛyaa se ɖɩpɔzɩ nɛ Yehowa sɩnɩ-ɖʋ. Kɩɖaŋ nɩɩyɩ yɔ:
«Taa Yehowa liu nɛ ña-laŋɩyɛ kpeekpe, nɛ taataa ña-maɣmaɣ ñɔ-tɔm taa nɩʋ lɛɣtʋ liu. Maɣzɩ ɛ-yɔɔ ñɔ-ɖɔnɛ kpeekpe taa, nɛ ɛkaɣ labʋ nɛ ña-nʋmɔŋ tʋʋzɩ.»—ADUWA 3:5, 6.
«Mba peseɣ-i sɔɔndʋ yɔ, ɛhaɣzɩɣ-wɛ mbʋ pe-liu wɛɛ yɔ; ɛnɩɣ kubusi nzɩ pamakɩ se ɛsɩnɩ-wɛ yɔ, nɛ eholuu-wɛ.»—KEƔA 145:19.
«Nɛ tɔm tʋnɛ ɖa-taa tɛmnaa, se paa ɛbɛ ɖɩpɔzʋʋ Ɛsɔ nɛ pɩlakɩ nɔɔ kʋɖʋmaɣ nɛ ɛ-sɔɔlɩm yɔ, Ɛsɔ welisiɣni-ɖʋ.»—1 YOHANƐƐSƖ 5:14.
«Yehowa posini kañatʋ tʋ siŋŋ, ɛlɛ ewelisiɣ ɛyʋ siɣsiɣ tʋ adɩma.»—ADUWA 15:29.
Ye ŋheyi Yehowa kala wena a-taa ŋwɛɛ yɔ a-tɔm yɔ, ɛsɩɣnɩ-ŋ. Pʋyɔɔ Bibl seɣtiɣ-ŋ se: «Taa-ɩ liu alɩwaatʋ kpeekpe. Kuli ña-laŋɩyɛ nɛ ŋheyi-i ña-taa tɔm.»—Keɣa 62:8.
Fezuu taa ñɩm
Welisi, kpɛlɩkɩ nɛ ŋwɩlɩ se ŋkɛ pʋtɔdɩyɛ nayʋ
10 Ðɩpɩzɩɣ nɛ ɖɩmaɣzɩnɩ Yehowa ye ɖɩñakɩ pana se ɖɩnɩɩ ɖama tɔm taa yɔ. Ñaɣ pana nɛ ŋtɩlɩ ño-koobiya camɩyɛ. Yɔɔdɩnɩ-wɛ pʋcɔ nɛ kediɣzisi paɣzɩ nɛ ŋla mbʋ ɖɔɖɔ kediɣzisi tɛŋ lɛ, ña nɛ wɛ isusi tɔm nɛ ye pɩsaŋ yɔ, ŋyaa-wɛ nɛ ña nɛ wɛ ɩtɔɔ tɔɔnaɣ. Ye ŋlakɩ mbʋ yɔ, ŋpɩzɩɣ nɛ ŋɖiɣzina se koobu halɩñɩnʋ weyi pɩwɛ ɛzɩ ɛtɩsɔɔlɩ taabalɩyɛ ɖʋʋ yɔ, toovenim taa lɛ, ɛwɛ fɛyɛ. Koobu abalɩñɩnʋ weyi ŋmaɣzɩɣ se ɛwɛ ñɩm laɣzaɣ yɔ, ɛkɛ ɛgɔndʋ mʋyʋ. Yaa hɔʋ ŋgʋ kɩɩkɔŋ kediɣzisi alɩwaatʋ yɔɔ ɖoŋ ɖoŋ yɔ, kɩwɛɛ nɛ kɩkatɩɣ nazɩm. (Yɔɔb 6:29) Pɩkɛ toovenim se pɩtɩpɔzɩ se ɖɩkɛ mba «paɖʋʋ pɔ-nɔsɩ lalaa tɔm taa» yɔ. (1 Tim. 5:13) Paa mbʋ yɔ, pɩwɛɣ ɖeu se ɖɩñɩnɩ nɛ ɖɩtɩlɩ ɖo-koobiya camɩyɛ nɛ ɖɩtɩlɩ ɖɔɖɔ mbʋ piyeba nɛ pɛwɛɛnɩ ɛyʋtʋ natʋyʋ yɔ.
23-29 OCTOBRE
ÑƖM MBƲ PƖWƐ ƐSƆTƆM TAA YƆ | YƆƆB 8-10
«Ɛsɔ sɔɔlɩm siɣsiɣ ñɩmbʋ kandɩyɩɣ ɖɔ-yɔɔ se ɖɩtaatɔlɩ Sataŋ cɛtɩm kpaca taa»
w15 1/7 12 § 3
Ñɔ-tɔm pɩzɩɣ nɛ tɩkɛdɩnɩ Ɛsɔ toovenim na?
Yɔɔb katɩ takɩm sakɩyɛ nɛ ɛmaɣzaɣ se pomulaɣ-i kimuluu. Piyiɣdiɣ-i nɛ ɛkɔ tɔm ñʋʋ se paa ɛnʋ ɛɖɔkɩ yaa ɛtɩɖɔkɩ e-tisuu kpam yɔ, Ɛsɔ ɛɛmaɣzɩɣ ɛ-yɔɔ. (Yɔɔb 9:20-22) Yɔɔb kaawɛ siɣsiɣ ɛ-maɣmaɣ ɛ-ɛsɩndaa. Pʋyɔɔ ɛyɔɔdaɣ tɔm ndʋ tɩwɩlaɣ se ɛmaɣzɩɣ se ɛwɛ siɣsiɣ nɛ pɩkpaɖɩ Ɛsɔ yɔ.—Job 32:1, 2; 35:1, 2.
Ɛzɩma Yehowa sɔɔlɩm siɣsiɣ ñɩmbʋ tukuuni-ŋ?
14 Ɛsɔ sɔɔlɩm siɣsiɣ ñɩmbʋ kandɩyɩɣ ɖɔ-yɔɔ fezuu taa. Daviid tɩmnɩ Yehowa nɛ ɛtɔ se: «Ŋhuuzuu mɔ-yɔɔ kʋñɔŋ taa nɛ mɛwɛɛ ñʋʋ yabɩtʋ kuhulutasɩ taa.. . . Kɩdɛkɛdʋʋ kaɣ nɩʋ siziŋ pɩŋŋ, piyele nɛ Ɛsɔ kʋjɔʋ huuzuu mba pataɣ-ɩ liu yɔ pɔ-yɔɔ.» (Keɣa 31:7, 10, 11a) Caanaʋ taa, kolonzi nzɩ pamaɣaɣ nɛ pɔcɔzʋʋ tɛtʋ yɔ, sɩkandɩyaɣ tɛtʋ taa ɛyaa yɔɔ se koyindinaa ɛtaalabɩ-wɛ nabʋyʋ. Mbʋ ɖɔɖɔ Yehowa sɔɔlɩm siɣsiɣ ñɩmbʋ wɛ ɛzɩ koloŋa ŋga kakandɩyɩɣ ɖɔ-yɔɔ se nabʋyʋ ɛtaawɛɛkɩ ɖa nɛ ɩ ɖa-taabalɩyɛ yɔ. Pɩtasɩ lɛ, Yehowa sɔɔlɩm siɣsiɣ ñɩmbʋ seɣti-i nɛ ɛhɔm-ɖʋ nɛ ɛkɔnɩ ɛ-cɔlɔ.—Yer. 31:3.
Fezuu taa ñɩm
w10 15/10 6-7 § 19-20
«Apɩzaa nɛ ɛtɩlɩ Yehowa maɣzɩm?»
19 Ɛbɛ ɖɩkpɛlɩkɩ «Yehowa maɣzɩm» hɔɔlʋʋ taa? Pɩwɛɛ se ɖiyele nɛ Masɩ sɩnɩ-ɖʋ nɛ ɖɩnɩɩ mbʋ «Jehovah maɣzɩm» kɛnaa yɔ pɩ-taa camɩyɛ. Pɩfɛyɩ se ɖɩlabɩnɩ tʋmɩyɛ ɖa-lɩmaɣza wena atɩtalɩ pilim yɔ nɛ ɖɩhʋʋnɩ Yehowa tɔm nɛ ɖɩyɔɔdɩ se ɛ-paɣtʋ tɩtʋʋzɩ. Yɔɔb yɔɔdɩ Ɛsɔ tɔm se: «Ɛtɩkɛ ɛyʋ ɛzɩ ma yɔ se maapɩzɩ nɛ moncosi-i, se ma nɛ ɩ ɖiwolo tɔm ɖɩhʋyɛ.» (Yɔɔb 9:32) Ye ɖiyeba nɛ Ɛsɔ lɩmaɣza wɛɛnɩ ɖoŋ ɖɔ-yɔɔ yɔ, ɖɩpɩzɩɣ nɛ ɖɩyɔɔdɩ ɛzɩ Yɔɔb yɔ se: «Na! Ɛ-nʋmɔŋ kpɛnzɩ ɖeke lɛ; tɔm ndʋ ɖɩnɩ ɛ-yɔɔ yɔ tɩwɛ yem ɛzɩ pɛwɛɛtʋʋ tɔm yɔ! Ye mbʋ, apɩzɩɣ nɛ ɛnɩɩ ɛ-tɛʋ nazʋʋ sɔsɔm tɔbʋʋ?»—Job 26:14.
20 Ye ɖɩwɛɛ nɛ ɖɩkalɩɣ Bibl nɛ pɩwɛɛ-ɖʋ kaɖɛ se ɖɩnɩɩ Yehowa lɩmaɣzɩyɛ naɖɩyɛ taa yɔ, ɛbɛ pɩwɛɛ se ɖɩla? Pɩwɛɛ se ɖɩñɩnɩ tɔm ɛgbɛyɛ takayɩsɩ taa nɛ ye ɖɩtɩpɩzɩ nɛ ɖɩnɩɩ pɩ-taa yɔ, pɩwɛɛ se ɖɩmaɣzɩ se pɩkɛnɩ-ɖʋ waɖɛ nɖɩ ɖɩ-yɔɔ ɖɩpɩzɩɣ nɛ ɖɩtɩŋna nɛ ɖɩwɩlɩ se ɖɩtaɣ Yehowa liu yɔ. Ðɩtɔzɩ se Bibl hɔɔlɩŋ nɩɩyɩ haɣ-ɖʋ waɖɛ se ɖɩwɩlɩ se Yehowa wɛtʋ kɩbandʋ yɔɔ lɛ, ɖɩtaɣ-ɩ liu. Pɩwɛɛ se ɖiluzi ɖa-tɩ nɛ ɖitisi se ɖɩɩnɩɣ mbʋ payɩ Yehowa lakɩ yɔ pɩ-taa. (Ekl. 11:5) Ye ɖɩlabɩ mbʋ yɔ, ɖitisiɣ apostoloo Pɔɔlɩ tɔm tʋnɛ tɩ-yɔɔ: «Hayɩ, Ɛsɔ ñɩm nɛ ɛ-lɔŋsɩnɖɛ nɛ ɛ-sɩmtʋ wɛ cukaŋ mbʋ suwe! Ɛyʋ ɛɛpɩzɩɣ nɛ ɛnɩɩ ɛzɩma ɛhʋʋ tɔm yɔ pɩtɩŋa pɩ-taa tete nɛ ɛɛpɩzɩɣ nɛ ɛtɩlɩ ɛ-nʋmɔŋ! Mbʋ pʋyɔɔ yɔ ‘apɩzaa nɛ ɛtɩlɩ Yehowa maɣzɩm, yaa apɩsɩ ɛ-lɔŋ tasɩyʋ?’ Yaa ‘acalɩ-ɩ nabʋyʋ haʋ, se pɩsa nɛ ɛhɛyɩ-ɩ pi-lone taa?’ Mbʋ pʋyɔɔ yɔ, ɛ-cɔlɔ wondu tɩŋa lɩnaa, nɛ ɛnʋ labɩnɩ-tʋ nɛ ɛnʋ tɩnɩ-tʋ. Pasamɩ-ɩ tam tam. Amɛn.»—Rom. 11:33-36.
30 OCTOBRE–5 NOVEMBRE
ÑƖM MBƲ PƖWƐ ƐSƆTƆM TAA YƆ | YƆƆB 11-12
«Nʋmɔŋ naadozo weyi ɩ-yɔɔ ɖɩpɩzɩɣ nɛ ɖɩtɩŋna nɛ ɖihiɣ lɔŋsɩnɖɛ nɛ ɖiyele nɛ ɖɩwazɩ-ɖʋ yɔ»
w09 15/4 6 § 17
Yɔɔb sam Yehowa hɩɖɛ
17 Ɛbɛ sɩnɩ Yɔɔb nɛ ɛpɩzɩ nɛ ɛɖɔkɩ ɛ-cɩŋgɩlɩm wɛtʋ? Pɩnaɣ kpayɩ kpayɩ se pʋcɔ nɛ Yɔɔb katɩɣ kala lɛ, ɛɛtɛm yebu nɛ taabalɩyɛ kɩbanɖɛ wɛɛ ɛ nɛ Yehowa pɛ-hɛkʋ taa. Paa ɛtaanɩɩ cɛtɩm tɔm ndʋ Sataŋ yɔɔdɩ ɛ-yɔɔ Yehowa ɛsɩndaa yɔ, ɛɖʋ ɛ-taa se ɛɖɔkʋʋ e-siɣsiɣ wɛtʋ. Ɛyɔɔdaa se: «Maakaɣ yebu man-cɩŋgɩlɩm wɛtʋ pɩkɔɔ nɛ pɩtalɩ alɩwaatʋ ndʋ mansɩba yɔ!» (Yɔɔb 27:5) Ɛbɛ Yɔɔb kaalaba nɛ taabalɩyɛ kɩbanɖɛ wɛɛ ɛ nɛ Ɛsɔ pɛ-hɛkʋ taa? Pɩtʋʋ fɛyɩ se ɛkpaɣkaɣ alɩwaatʋ nɛ ɛmaɣzɩɣ tɔm ndʋ ɛnɩwa pɩlɩɩnɩ ɛzɩma Yehowa kaasɩnɩ Abraham, Izaakɩ nɛ Yakɔɔb yɔ pɩ-yɔɔ. Ɛyaa mba pɛkɛ e-koobiya paa pataakɛ hɔʋ kʋɖʋmʋʋ taa mba yɔ. Pɩtasɩ lɛ, ɛcɔnɩ wondu kɩlɩzɩtʋ nɛ pɩsɩnɩ-ɩ nɛ ɛtɩlɩ Yehowa wɛtʋ.—Kalɩ Yɔɔb 12:7-9, 13, 16.
Yehowa wɛ ñɔ-cɔlɔ paa ɛzɩmtaa, pʋyɔɔ lɛ ŋfɛyɩ ñe-ɖeke kpa
10 Ðʋ taabalɩyɛ nɛ Krɩstʋ ñɩma mba pɛwɛ siɣsiɣ yɔ. Ðʋ taabalɩyɛ nɛ ɛgbɛyɛ taa ñɩma mba pɔ-cɔlɔ ŋpɩzɩɣ nɛ ŋkpɛlɩkɩ lɔŋ yɔ, paa pa-pɩnzɩ yaa pɔ-sɔnzɩ ɩwɛ ndɩ nɛ ña-ñɩnzɩ yɔ. Bibl tɔzʋʋ-ɖʋ se «akpadɩyaa wɛnɩ lɔŋsɩmtʋ.» (Yɔɔb 12:12) Akpadɩyaa ɖɔɖɔ pɩzɩɣ nɛ pɛkpɛlɩkɩ lɔŋ piya evelisi nzɩ sɩwɛ siɣsiɣ yɔ sɩ-cɔlɔ. Yonataanɩ kaakɩlɩ Daviid nɛ pɩnzɩ sakɩyɛ, ɛlɛ pɩtɩɖɩɣ-wɛ nʋmɔʋ se pɛkɛ taabalaa kɩbama. (1 Sam. 18:1) Daviid nɛ Yonataanɩ pasɩnɩ ɖama nɛ pɛsɛɛ Yehowa, paa paakatɩ tɩlasɩ sɔsɔsɩ yɔ. (1 Sam. 23:16-18) Payaɣ koobu halɩñɩnʋ nɔɔyʋ se Irina, e-ɖeke ɛkɛnɩ Aseɣɖe Tʋ ɛ-hɔʋ taa. Ɛyɔɔdaa se: «Toovenim taa lɛ, ɖo-koobiya pɩzɩɣ nɛ papɩsɩ ɖa-lʋlɩyaa yaa ɖɔ-hɔʋ taa mba fezuu taa. Yehowa pɩzɩɣ ɛtɩŋnɩ pɔ-yɔɔ nɛ ɛcɔnɩ ɖa-kɩcɛyɩm ɖeɖe.»
11 Pɩpɩzɩɣ nɛ pɩwɛ-ŋ kaɖɛ se ŋwɛɛnɩ taabalaa kɩfama, kɔzɩ kɔzɩ ye ŋwɛ fɛyɛ yɔ. Payaɣ koobu halɩñɩnʋ nɔɔyʋ se Ratna nɛ ɛwɛ fɛyɛ. Etisaa nɛ ɛmʋ toovenim, paa pakaɖɩnɩ-ɩ yɔ. Ɛyɔɔdaa se: «Menɖiɣzinaa se pɩpɔzʋʋ se ɛgbɛyɛ taa koobiya ɩsɩnɩ-m.» Pɩpɩzɩɣ nɛ pɩwɛ-ŋ kaɖɛ se ŋheyi ɛyʋ lɛlʋ ɛzɩma pɩlakɩ-ŋ yɔ, ɛlɛ ye ŋlabɩ mbʋ yɔ, piyeki nɛ taabalɩyɛ kɩbanɖɛ wɛɛ mɩ-hɛkʋ taa. Ña-taabalaa sɔɔlaa se pakpazɩ-ŋ ɖoŋ nɛ pasɩnɩ-ŋ, ɛlɛ pɩpɔzʋʋ se ŋyele nɛ patɩlɩ ɛzɩma papɩzɩɣ nɛ pala mbʋ yɔ.
12 Nʋmɔŋ kɩbaŋ weyi ɩ-yɔɔ ŋpɩzɩɣ ŋtɩŋna nɛ ŋwɛɛnɩ taabalaa yɔ, ɩ-taa nakʋyʋ lɛ se pɩwɛɛ se ña nɛ ño-koobiya Krɩstʋ ñɩma ɩlɩɣ tɔm susuu. Carol weyi ɛ-tɔm ɖɩyɔɔdaa nɛ pɩɖɛɛ yɔ, ɛtɔm se: «Mankpakɩɣ ma-alɩwaatʋ nɛ ma nɛ koobiya halɩñɩma ɖɩlɩɣ nɛ ɖisusuu tɔm nɛ ɖɩlakɩ teokrasɩ tʋma lɛɛna, mbʋ yebina nɛ mɛwɛɛnɩ taabalaa kɩbama sakɩyɛ. Yehowa tɩŋnɩ taabalaa mba pɔ-yɔɔ nɛ ɛsɩnɩ-m pɩnzɩ sakɩyɛ.» Pɩwɛ ɖeu siŋŋ se ɖɩɖʋ taabalɩyɛ nɛ Krɩstʋ ñɩma mba pɛwɛ siɣsiɣ yɔ. Yehowa tɩŋɩɣnɩ taabalaa mba pɔ-yɔɔ nɛ ɛkpazɩ-ŋ ɖoŋ, alɩwaatʋ ndʋ pitiki-ŋ yɔɔɔ yɔ; ɛzɩ alɩwaatʋ ndʋ pɩlakɩ-ŋ ɛzɩ ŋwɛ ñe-ɖeke yɔ tɩ-taa mbʋ yɔ.—Adu. 17:17.
it-2 851 § 5
Lɔŋsɩnɖɛ
Ɛsɔ lɔŋsɩnɖɛ. Yehowa ɖeke koŋ wɛnɩnɩ lɔŋsɩnɖɛ kiya, pʋyɔɔ Bibl yɔɔdaa se ɛkɛ «Ɛsɔ weyi e-ɖeke ɛkɛ lɔŋsɩnɖʋ yɔ.» (Rom 16:27; Nat 7:12) Ye pɔtɔm se nɔɔyʋ wɛnɩ sɩmtʋ yɔ, pʋ-tɔbʋʋ lɛ se ɛsɩm mbʋ payɩ pɩlakɩ yɔ. Yehowa kɛnɩnɩ Lɩzɩyʋ nɛ ɛwɛɛ «kpaɣnɩ tam tam nɛ piwolo tam tam,» (Ke 90:1, 2), nɛ pʋyɔɔ lɛ ɛsɩm tɔm tɩŋa pɩlɩɩnɩ kedeŋa ŋga ɛlɩzaa yɔ, ɛzɩma ɛlɩzɩ-kɛ yɔ nɛ kɔ-yɔɔ tɔm lɛɛtʋ tɩŋa payɩ. Kedeŋa paɣtʋ ndʋ tɩsɩɣnɩ ɛyaa se pañɩnɩ tɔm ndɩ ndɩ nɛ polu wondu ndɩ ndɩ yɔ, ɛ-cɔlɔ tɩlɩnaa. Ye paɣtʋ ndʋ tɩtaawɛɛ yɔ, ɛyaa taapɩzɩ nɛ patɩlɩ ɛzɩma pakpaɣna nɛ polu wondu yɔ. (Yɔɔb 38:34-38; Ke 104:24; Ad 3:19; Yer 10:12, 13) Ye mbʋ, paɣtʋ ndʋ ɛɖʋ wezuu caɣʋ yɔɔ yɔ, tɩwazɩɣ ɛyaa nɛ pɩkɩlɩ; tɩsɩɣnɩ-wɛ se pacaɣ wezuu ŋgʋ kɩmʋnaa yɔ, pahʋʋ tɔm camɩyɛ nɛ piɖeni-wɛ ɖɔɖɔ pe-wezuu caɣʋ taa. (Wp 32:4-6; cɔnɩ JÉHOVAH [Un Dieu qui a des normes morales]). Nabʋyʋ fɛyɩ se pɩcɛzɩ ɛ-lɔŋsɩnɖɛ. (Iz 40:13, 14) Paa lɛɛlɛɛyɔ ɛha nʋmɔʋ nɛ mbʋ pɩkaɖɩɣnɩ ɛ-paɣtʋ yɔ pɩlakɩ ɛjaɖɛ yɔɔ yɔ, cee wayɩ ɛkaɣ ñɔɔzʋʋ wondu nɛ mbʋ payɩ pɩlakɩ yɔ pɩla nɔɔ kʋɖʋmaɣ nɛ ɛ-sɔɔlɩm; mbʋ payɩ ɛɖʋwa yɔ, ‘pɩkaɣ labʋ ɖeyi ɖeyi.’—Iz 55:8-11; 46:9-11.
Fezuu taa ñɩm
w08 1/8 11 § 5
Ɛzɩma pɩwɛɛ se pɔyɔɔdɩnɩ piya evelisi yɔ
▪ ‘Ɛzɩ manɩɣ lɩmaɣza wena a-yɔɔ pɔyɔɔdʋʋ tɔm natʋyʋ yɔ a-taa?’ Ðɩkalɩɣ Yɔɔb 12:11 taa se: «Nɩŋgbaŋʋʋ ɛɛtakɩɣ tɔm pee se kɩna ɛzɩ nzʋlʋmɩyɛ ɖɩkʋʋ tɔɔnaɣ se ɖɩna yɔ?» Lɛɛlɛɛyɔ kpem pɩcɛyaa se ‘ŋtakɩ’ tɔm ndʋ ña-pɩyalʋ yaa ñɛ-pɛlɛ yɔɔdʋʋ yɔ. Ðoŋ ɖoŋ lɛ, piya evelisi lakɩnɩ tʋmɩyɛ tɔm pee wena aalakɩ nɔɔ kʋɖʋmaɣ nɛ tɔm ndʋ ɖeyi ɖeyi sɩcaɣ yɔɔdʋʋ yɔ. Kɩɖaʋ nakʋyʋ yɔ: ñɛ-pɛlɛ pɩzɩɣ nɛ eheyi-ŋ se: «Paa ɛzɩmtaa lɛ, ŋkpakɩɣ-m ɛzɩ mɛnkɛ pɩɣa yɔ!» yaa «Ŋŋwelisiɣ tɔm ndʋ mɔyɔɔdʋʋ yɔ kpa!» Taaka ña-lɩmaɣza tɔm pee «paa ɛzɩmtaa» nɛ «kpa» yɔ. Tɔm pee ana atɩmʋna. Pɩtɩla tɔm loyaɣ «paa ɛzɩmtaa lɛ, ŋkpakɩɣ-m ɛzɩ mɛnkɛ pɩɣa yɔ», tɔbʋʋ lɛ se «pɩlakɩ-m ɛzɩ ŋŋtaɣ-m liu yɔ.» Nɛ tɔm loyaɣ «ŋŋwelisiɣ tɔm ndʋ mɔyɔɔdʋʋ yɔ kpa» yɔ, tɔbʋʋ lɛ se «Mancaɣ se meheyi-i tɔm ndʋ ɖeyi ɖeyi tɩwɛ ma-laŋɩyɛ taa yɔ.» Ñaɣ pana nɛ ŋnɩɩ lɩmaɣza wena a-yɔɔ sɩyɔɔdʋʋ tɔm natʋyʋ yɔ a-taa.