Taa leleŋ weyi mantaaɖʋna yɔ nɛ lɔŋ weyi mɛnkpɛlɩkɩ Yehowa sɛtʋ taa yɔ

Ma-lʋlɩyaa kʋyɩ Ɛsɩtoonii ɛjaɖɛ taa Caama you II ñɩŋgʋ alɩwaatʋ taa nɛ powolo pacaɣ Caama ɛjaɖɛ taa, nɛ peeɖe palʋlɩ-m. Palʋlɩ-m nɛ pɩtɛ lɛ, papaɣzɩ pa-tɩ ñɔɔzʋʋ se pakʋyɩ nɛ powolo Kanadaa ɛjaɖɛ taa. Ðɩɣa kajalaɣ ñɩŋga ŋga ka-taa ɖɩɩwɛ Kanadaa yɔ kaañɔtɩnɩ Ottawa tɛtʋ, nɛ pɩɩkɛ ɖɩɣa cikpelaɣ ŋga ka-taa kalimee kaawɛɛ ɖɔɖɔ yɔ. Ðɩɩkɛ kʋñɔndɩnaa kpem, paa mbʋ yɔ ɖɩɩwɛnɩ yala nɛ ɖɩlakɩnɩ tɔɔnaɣ ŋga ɖɩlɩzɩɣnɩ sɔntɔ yɔ.

Kɩyakʋ nakʋyʋ lɛ, Yehowa Aseɣɖe tɩnaa kɔɔ nɛ pakalɩ mon-ɖoo Natʋ 21:3, 4. Tɔm ndʋ ɛkpɛlɩkaa yɔ, tiitukuni-i siŋŋ nɛ ɛpaɣzɩ wiu. Man-caa nɛ mon-ɖoo powobi pɩ-yɔɔ nɛ pɛkpɛlɩkɩɣ Bibl, nɛ pitileɖi lɛ pamʋna nɛ pamɩyɩsɩ-wɛ lɩm.

Ma-lʋlɩyaa taanɩɣ Aŋglɛɛ kʋnʋŋ camɩyɛ, ɛlɛ pataaleɣyiɣni toovenim. Man-caa lakaɣ tʋmɩyɛ ɖenɖe poyolusuu ñɩɣyʋʋ ŋgʋ payaɣ se nickel yɔ Sudbury tɛtʋ taa Ontario; paa mazaɣ ŋga ɛkpakaɣ ma nɛ me-neu halɩñɩnʋ Sylvia nɛ ɖɩlɩɣ tɔm susuu, paa ɛɛlabɩ tʋmɩyɛ ɖoo pilim yɔ. Nɛ paa kpɩtaʋ ŋgʋ lɛ ɖɔ-hɔʋ kpɛndaɣ nɛ kɩkpɛlɩkɩɣ Feŋuu Tilimiye. Man-caa nɛ mon-ɖoo peseɣti-m nɛ mɔnsɔɔlɩ Yehowa. Piyeba nɛ pɩnaɣ 1956 taa, maawɛnɩ pɩnzɩ 10 lɛ, maha man-tɩ Yehowa nɛ pamɩyɩsɩ-m lɩm. Alɩwaatʋ ndʋ payɩ mamaɣzɩɣ ɛzɩma pɔsɔɔlɩ Yehowa yɔ pɩ-yɔɔ yɔ, piseɣtiɣ-m se mowolo pɩ-yɔɔ nɛ mɛnsɛɣ Yehowa.

Alɩwaatʋ ndʋ mɛntɛm liisee yɔ, mantaaka ñʋʋ nɛ Yehowa sɛtʋ ɖeyi ɖeyi. Mamaɣzaɣ se ye manpɩsɩ nʋmɔʋ lɩzɩyʋ yɔ maakaɣ pɩzʋʋ nɛ mehiɣ liidiye sakɩyɛ nɛ mansʋʋ ɛsɔdaa lɔɔɖɩyɛ nɛ mowolo ajɛɛ ndɩ ndɩ taa ɛzɩ maasɔɔlʋʋ yɔ. Maahiɣ tʋmɩyɛ raadiyoo nakʋyʋ tʋmɩyɛ ɖɩlaɖɛ, nɛ maɖʋwaɣnɩ minziikiwaa raadiyoo ŋgʋ kɩ-taa. Maasɔɔlɩ tʋmɩyɛ nɖɩ. Malakaɣ tʋmɩyɛ ɖanasɩ yɔɔ; piyekaɣ nɛ mɛnfɛɣ kediɣzisi ɖoŋ ɖoŋ nɛ manɖʋwaɣ taabalɩyɛ nɛ ɛyaa mba patɩsɔɔlɩ Yehowa yɔ. Pʋwayɩ lɛ, mɛ-ɛhʋyɛ nɖɩ manfalɩsɩ-ɖɩ nɛ Bibl yɔ ɖiseɣti-m nɛ mala lɛɣzɩtʋ.

Maakʋyaa nɛ mowolo Oshawa, Ontario. Peeɖe mankatɩ Ray Norman nɛ e-neu halɩñɩnʋ Lesli nɛ nʋmɔʋ lɩzɩyaa lalaa. Pa-tɩŋa paamʋ-m camɩyɛ. Mana ɛzɩma panɩɣ leleŋ yɔ lɛ, piseɣti-m nɛ manɖaɣnɩ maɣzʋʋ man-kaɖʋsɩ yɔɔ. Peseɣti-m se manpaɣzɩ nʋmɔʋ lɩzʋʋ tʋmɩyɛ, nɛ mbʋ malabɩ septembre 1966 taa. Me-wezuu caɣʋ haɣaɣ-m taa leleŋ. Ɛlɛ lɛɣzɩtʋ ndʋ mantaaɖʋna me-wezuu caɣʋ taa yɔ tɩɩɖaŋɩ-m.

YE YEHOWA ƐÐƲ-Ŋ TƲMƖYƐ NAÐƖYƐ YƆ, ÑAƔ PANA NƐ ŊLABƖ-ÐƖ

Alɩwaatʋ ndʋ maawɛ liisee yɔ, maañɩɣ niye takayaɣ taa se paha-m waɖɛ nɛ mala tʋmɩyɛ Betɛɛlɩ Toronto tɛtʋ taa Kanadaa ɛjaɖɛ taa. Pʋwayɩ manpɩsɩ nʋmɔʋ lɩzɩyʋ lɛ paya-m se mowolo nɛ mala tʋmɩyɛ Betɛɛlɩ pɩnzɩ 4. Ɛlɛ maasɔɔlɩ Lesli kpem nɛ sɔɔndʋ kpaɣaɣ-m se ye mentisaa nɛ mowolo Betɛɛlɩ yɔ maakaɣ-ɩ tasʋʋ naʋ wiɖiyi. Mantɩmɩ tam sakɩyɛ nɛ pɩtɛ lɛ, mankpaɣ lɩmaɣzɩyɛ se mowoki Betɛɛlɩ, ɛlɛ man-taa taawɛɛ leleŋ se mɛnɖɛɛ nɛ meyele Lesli.

Maalabɩ tʋmɩyɛ Betɛɛlɩ wondu ɖɩcɔtɩyɛ taa nɛ pʋwayɩ lɛ mɛnkɛ takayaɣ taa mayʋ. Alɩwaatʋ ndʋ tɩ-taa lɛ, Lesli ñapɩsɩ nʋmɔʋ lɩzɩyʋ kiya Gatineau, Keebɛɛkɩ egeetiye taa. Mɔnpɔzaɣ man-tɩ ɖoŋ ɖoŋ se ɛzɩ ɛbɛ ɛwɛɛ nɛ ɛlakɩ nɛ ɛzɩ lɩmaɣzɩyɛ kɩbanɖɛ mankpaɣaa? Pʋwayɩ lɛ nabʋyʋ la me-wezuu caɣʋ taa nɛ mantaaɖʋna; nɛ mbʋ pɩɩkɩlɩ-m haʋ taa leleŋ me-wezuu caɣʋ taa yɔ pɩ-taa nabʋyʋ lɛ. Paya Lesli ɖalʋ Ray se ɛkɔɔ Betɛɛlɩ. Ɛkɔma lɛ, ma nɛ ɩ ɖɩɩwɛnɩ ɖaŋ kʋɖʋmʋʋ tɛɛ! Piyeba nɛ ma nɛ Lesli ɖɩɖaɣnɩ pazʋʋ taabalɩyɛ ɖʋʋ. Ma nɛ ɩ ɖɩɖɔkɩ nesi 27 février 1971, puwiye mɛntɛm pɩnzɩ 4 nzɩ paatɔm se mowolo nɛ mala Betɛɛlɩ yɔ.

Paɖʋ ma nɛ Lesli tʋmɩyɛ se ɖiwolo nɛ ɖɩɖʋ nesi Fransɩɩ ɛgbɛyɛ naɖɩyɛ Keebɛɛkɩ. Pɩlabɩ pɩnzɩ pazɩ lɛ, peheyi-m se manpɩsɩ egeetiye yɔɔ cɔnɩyʋ, pɩɩɖɩɣzɩɣ-m kpem; alɩwaatʋ ndʋ lɛ, maawɛnɩ pɩnzɩ 28. Mamaɣzaɣ se mɛnkɛ evebu yem nɛ mɛnfɛyɩnɩ lɛɣtʋ sakɩyɛ se mɛnkɛ egeetiye yɔɔ cɔnɩyʋ, ɛlɛ Yereemii 1:7, 8 taa tɔm kpazɩ-m ɖoŋ. Ɛlɛ lɔɔɖɩyɛ kɛgbɛdɩsaɣ kaatalɩ Lesli tam nabʋlɛ nɛ pɩɩwɛ-ɩ kaɖɛ se eɖou. Ye mbʋ, ɛzɩma ɖɩkaɣ pɩzʋʋ nɛ ɖɩla egeetiye yɔɔ cɔnʋʋ tʋmɩyɛ? Paa mbʋ yɔ, Lesli yɔɔdaa se: «Ye Yehowa ɛɖʋ-ɖʋ tʋmɩyɛ naɖɩyɛ yɔ, pɩpɔzʋʋ se ɖɩñaɣ pana nɛ ɖɩlabɩ-ɖɩ.» Ðitisaa nɛ ɖɩla tʋmɩyɛ nɖɩ, nɛ ɖɩlabɩ-ɖɩ pɩnzɩ 17; nɛ ɖihiɣ taa leleŋ ɖɩ-taa.

Maakɛ egeetiye yɔɔ cɔnɩyʋ lɛ, pɩɖɔkaɣnɩ-m kpem nɛ mantaawɛɣnɩ alɩwaatʋ paa ɛzɩmtaa nɛ menkeŋni Lesli. Pɩpɔzaɣ se mɛnkpɛlɩkɩ lɔŋ lɛɛŋ. Hodo nakʋyʋ tanaŋ tɛɛ cu, ɖɩnɩ pɔkɔtɩ ɖɔ-nɔnɔɔ. Ðɩlɩwa lɛ ɖɩtɩna nɔɔyʋ, ɛlɛ ɖɩna ɖɔkʋ nakʋyʋ kɩ-taa nɛ pɩsaʋ ŋgʋ pohuuzuu taabɩlɩ yɔɔ yɔ, tɩŋ pee, waagaasɩ, vɛɛ kpalɩba taa, vɛɛrɩwaa, nɛ takayaɣ nakɛyɛ pama kɔ-yɔɔ se: «Woni ña-halʋ pikiniiki taa.» Pɩɩkɛ evemiye nɖɩ wɩsɩ ñakaɣ camɩyɛ yɔ. Ɛlɛ meheyi Lesli se mɛwɛnɩ samaɣ taa tɔm se mɔñɔɔzʋʋ nɛ pʋyɔɔ lɛ maapɩzɩɣ nɛ mowolo. Ɛɛnɩ pɩ-taa, ɛlɛ pɩɩcɛyɩ-ɩ pazɩ. Mowoba nɛ mancaɣ taabɩlɩ yɔɔ lɛ, mɛ-ɛhʋyɛ paɣzɩ-m cɛyʋʋ. Mamaɣzɩ Efɛɛzɩ mba 5:25, 28 taa tɔm yɔɔ. Mamaɣzɩɣ se Yehowa tɩŋnɩ masɩ nzɩ sɩ-yɔɔ nɛ ɛtɔzɩ-m se pɩpɔzʋʋ se mamaɣzɩ ma-halʋ kɩcɛyɩm yɔɔ. Mantɩmaa nɛ pɩtɛ lɛ, meheyi Lesli se: «Ðiwolo.» Pɩɩlabɩ-ɩ leleŋ kpem. Ðɩsaa lɔɔɖɩyɛ nɛ ɖiwolo pɔɔ nakɛyɛ nɔɔ, lone nɖɩ ɖɩɩwɛ cɔnʋʋ kpem. Ðɩtalɩ peeɖe lɛ, ɖɩpɔ pɩsaʋ ŋgʋ paaɖʋ ɖɔkʋ taa yɔ nɛ ɖɩcaɣ nɛ ɖɩmʋ helim; pɩɩkɛ evemiye kɩbanɖɛ kpem. Paa mbʋ yɔ, manpɩzaa nɛ mɔñɔɔzɩ samaɣ taa tɔm ndʋ pɩɩwɛ se mɔñɔɔzɩ yɔ.

Egeetiye yɔɔ cɔnʋʋ tʋmɩyɛ kaaha-ɖʋ taa leleŋ kpem nɛ ɖɩlabɩ tʋmɩyɛ nɖɩ ageeta sakɩyɛ taa: pɩkpaɣnɩ Colombie-Britannique nɛ piwolo Terre-Neuve. Piyeba nɛ mɛyɛlɩ mowolo ajɛɛ sakɩyɛ taa ɛzɩ maasɔɔlʋʋ man-pɩjatʋ taa yɔ. Maasɔɔlaa se mowolo Galaadɩ sukuli, ɛlɛ mantaasɔɔlɩ se manpɩsɩ Ɛsɔtɔm tiyiyu ɛjaɖɛ naɖɩyɛ taa. Pɩwɛ ɛzɩ Ɛsɔtɔm tiyiyaa kaakɛ ɛyaa mba pɛwɛ ŋgee yɔ nɛ mamaɣzaɣ se mantaamʋna se mɛnkɛ Ɛsɔtɔm tiyiyu. Pɩtasɩ lɛ, menseɣaɣ sɔɔndʋ se pɩtɩla petiyiɣni-ɖʋ Afrika ɛjaɖɛ naɖɩyɛ taa ɖenɖe kʋdɔmɩŋ nɛ you wɛɛ yɔ. Man-taa kaawɛ leleŋ nɛ Kanadaa ɖenɖe mɛwɛɛ yɔ.

PAYA-M SE MOWOLO ƐSƖTOONII NƐ BALTES AJƐƐ TAA NƐ MANTAAÐƲNA

Pɩnaɣ 1992 taa, alɩwaatʋ ndʋ paha-ɖʋ nʋmɔʋ se ɖɩpaɣzɩ ɖa-tʋma labʋ ajɛɛ wena aawɛ Iniyɔɔ Soviyetiiki taa yɔ a-taa yɔ, pɔpɔzɩ-ɖʋ se ɖɩsɔɔlaa se ɖiwolo Ɛsɩtoonii nɛ ɖɩla Ɛsɔtɔm tiyiyu tʋmɩyɛ peeɖe na. Pɩɩɖɩɣzɩ-ɖʋ kpem, ɛlɛ ɖɩtɩmɩ tɔm ndʋ tɩ-yɔɔ. Ðɩtasɩ yɔɔdʋʋ se: ‘Ye Yehowa ɛɖʋ-ɖʋ tʋmɩyɛ naɖɩyɛ yɔ pɩpɔzʋʋ se ɖɩñaɣ pana nɛ ɖɩlabɩ-ɖɩ. Ðitisaa se ɖɩlakɩ tʋmɩyɛ nɖɩ, nɛ mɔyɔɔdɩ se: ‘Pɩwɛ ɖeu, pɩtɩkɛ Afrika taa ɖiwoki.’

Ðɩpaɣzɩ Ɛsɩtoonii kʋnʋŋ kpɛlɩkʋʋ kpaagbaa. Ðɩlabɩ fenasɩ 2 ɛjaɖɛ nɖɩ ɖɩ-taa lɛ, pɔpɔzɩ-ɖʋ se ɖɩla egeetiye yɔɔ cɔnʋʋ tʋmɩyɛ. Pɩɩwɛɛ se ɖikilimi agbaa nɛ agbaa cikpena 46 yɔɔ; awɛ Ɛsɩtoonii, Letonii, Lituyaanii ajɛɛ taa, nɛ Rusii tɛtʋ ndʋ payaɣ se Kaliningrad yɔ tɩ-taa. Pɩwɩlɩɣ se pɩwɛɛ se ɖɩkpɛlɩkɩ Ɛsɩtoonii, Letonii, Lituyaanii nɛ Rusii kʋnʋmɩŋ. Pɩɩwɛ-ɖʋ kaɖɛ. Koobiya taa kaalabɩ leleŋ se ɖɩɩwɛɛ nɛ ɖɩñakɩ pana se ɖɩkpɛlɩkɩ pa-kʋnʋŋ, piyeba nɛ pasɩnɩ-ɖʋ. Pɩnaɣ 1999 lɛ paɖʋ ɛgbɛyɛ piliŋa Ɛsɩtoonii ɛjaɖɛ taa, nɛ paha-m waɖɛ se mɛnkɛ ɛgbɛyɛ piliŋa kɔɔmitee taa tʋ; ma nɛ Toomas Edur, Lembit Reile, nɛ Tommi Kauko ɖɩɩwɛnɩ kɔɔmitee ŋgʋ kɩ-taa.

Ðɩkɔm nɛ ɖɩtɩlɩ Yehowa Aseɣɖe tɩnaa mba paawoni Siiberii yɔ pa-taa sakɩyɛ. Paa paanazɩ-wɛ salaka taa nɛ poposi-wɛ nɛ pɔ-hɔŋ yɔ patɩkɔ pana nɛ patɩcaɣnɩ nɔɔyʋ. Patilesi pa-taa leleŋ nɛ powobi pɩ-yɔɔ posusuu tɔm nɛ kpekpeka. Pa-kɩɖaʋ sɩnɩ-ɖʋ nɛ ɖɩna se paa ɖɩkatɩɣ kala yɔ ɖɩpɩzɩɣ nɛ ɖɩɖɔkɩ ɖa-laŋɩyɛ nɛ ɖɩwɛɛ taa leleŋ taa.

Ðɩlabɩ tʋmɩyɛ siŋŋ pɩnzɩ sakɩyɛ nɛ ɖɩtɩkpaɣ alɩwaatʋ sakɩyɛ nɛ ɖɩhɛzɩ piyeba nɛ Lesli paɣzɩ ñɩŋanzɩ taŋ nɩʋ siŋŋ. Ðitaaɖiɣzina se kʋdɔŋ ŋgʋ kiyeki nɛ pɩnɩɣ ɛyaa siŋŋ yɔ kɩ-cɔlɔ pɩlɩnaa; payaɣ-kʋ se fibromyalgie. Peeɖe ɖɩpaɣzɩ maɣzʋʋ siŋŋ se ɖɩpɩsɩɣ Kanadaa. Alɩwaatʋ ndʋ paya-ɖʋ se ɖiwolo ɛgbɛyɛ piliŋa kɔɔmitee taa mba sukuli Patɛrsɔɔnɩ Niyuu Yɔrɩkɩ, Etaazuunii ɛjaɖɛ taa yɔ, mamaɣzaɣ se ɖɩɩpɩzɩɣ nɛ ɖiwolo. Ɛlɛ ɖɩtɩmɩ siŋŋ nɛ pɩtɛ lɛ, ɖitisi se ɖiwoki-kʋ. Yehowa wazɩ lɩmaɣzɩyɛ nɖɩ ɖɩkpaɣaa yɔ. Alɩwaatʋ ndʋ ɖiwobi sukuli ŋgʋ yɔ, papɩzaa nɛ pawaa Lesli kʋdɔŋ ŋgʋ. Pɩtɛmnaa se ɖɩpɩzaa nɛ ɖiwolo ɖa-tʋma yɔɔ camɩyɛ.

PAÐƲ-ÐƲ TƲMƖYƐ KƖFAÐƐ NÐƖ ÐƖTƖÐƲNA YƆ—PETIYINI-ÐƲ AFRIKA

Ðɩpɩsɩ Ɛsɩtoonii nɛ pɩtɛ lɛ, pɩnaɣ 2008 taa ɖanaɣ nakɛyɛ yɔɔ, paya-m nɛ ɖa-tʋmɩyɛ ɖɩlaɖɛ sɔsɔɖɛ taa nɛ pɔpɔzɩ-m se ɖitisiɣ nɛ ɖiwolo Kɔŋgoo yaa we? Pɩɩɖɩɣzɩ-m kpem, mbʋ pʋyɔɔ yɔ kɔzɩ kɔzɩ lɛ pɩɩpɔzaa se moncosi tɛʋ kifemuu. Kajalaɣ taa lɛ, mantiheyi-tʋ Lesli, mbʋ pʋyɔɔ yɔ maanawa se ye meheyi-i tʋ yɔ eeɖou ɖoo ana. Ɛlɛ matiɖooni ɖoo ana mbʋ pʋyɔɔ yɔ maawɛɛ nɛ mantɩmɩɣnɩ Yehowa sɔɔndʋ ndʋ tɩkpaɣaɣ-m nɛ Afrika wobu yɔ tɩ-yɔɔ.

Tɛʋ fema nɛ meheyi Lesli lɛ, ɖɩyɔɔdɩ se: «Yehowa sɔɔlaa se ɖiwolo Afrika taa. Ɛzɩma ɖɩlaba nɛ ɖɩna se ɖɩɩpɩzɩɣ nɛ ɖiwolo nɛ ɖiihikiɣ taa leleŋ peeɖe ye ɖitiwolo nɛ ɖɩna yɔ?» Pʋyɔɔ ɖɩkʋyɩ Ɛsɩtoonii nɛ ɖiwolo Kinsaasaa, Kɔŋgoo ɛjaɖɛ taa; ɖɩɩwɛʋ Ɛsɩtoonii yɔ pɩlakɩ pɩnzɩ 16 lɛ. Kaɖaɣ kɩbaŋa nakɛyɛ kaawɛ Kɔŋgoo ɛgbɛyɛ piliŋa taa nɛ ka-taa kaahɛ niɣ niɣ. Wondu ndʋ Lesli calɩ ɖʋʋ ɖe-kuduyuu tɛɛ yɔ tɩ-taa nakʋyʋ lɛ carte ŋgʋ ɛɛkpaɣ Kanadaa, alɩwaatʋ ndʋ ɖɩkʋyaɣ peeɖe yɔ. Pama kɩ-yɔɔ se: «Nɩɩ leleŋ ɖenɖe ŋwɛɛ yɔ.» Ðɩkatɩ ɖo-koobiya, ɖɩkpɛlɩkɩnɩ ɛyaa Bibl, nɛ ɖɩna taa leleŋ weyi Ɛsɔtɔm tiyiyu tʋmɩyɛ haɣaɣ-ɖʋ yɔ lɛ, ɖihiɣ taa leleŋ Yehowa sɛtʋ taa nɛ pɩkɩlɩ. Alɩwaatʋ wɛɛ nɛ tɩɖɛɣ lɛ, paha-ɖʋ waɖɛ nɛ ɖikilimi Afrika ɛgbɛyɛ pilinzi 13 yɔɔ. Pɩha-ɖʋ waɖɛ nɛ ɖɩna ɛyaa mba peɖewa nɛ pɛwɛnɩ wɛtʋ ndɩ ndɩ yɔ. Sɔɔndʋ ndʋ tɩkpaɣaɣ-m nɛ Afrika taa wobu yɔ tɩcɛba. Nɛ ɖɩsɛɣ Yehowa se etiyini-ɖʋ Afrika taa.

Palakaɣ-ɖʋ tɔɔnasɩ ndɩ ndɩ Kɔŋgoo ɛjaɖɛ taa; sɩ-taa nasɩyɩ lɛ tɛtɛ wondu cikpetu ndʋ tɩwɛnɩ keŋ yɔ, nɛ ɖɩmaɣzaɣ se ɖɩɩkaɣ pɩzʋʋ nɛ ɖɩtɔɔ-sɩ. Ɛlɛ ɖɩna ɖo-koobiya wɛɛ nɛ pɔtɔkɩ-sɩ lɛ, ɖɩɖɩŋ-sɩ se ɖɩna nɛ ɖɩsɔɔlɩ-sɩ.

Ðɩɖɔm nʋmɔʋ nɛ ɖiwolo Kɔŋgoo wɩsɩ ɖɩlɩyɛ taa nɛ ɖɩkpazɩ ɖoŋ ɖo-koobiya nɛ ɖiwoni-wɛ wondu ndʋ pɩpɔzaɣ-wɛ yɔ. Ɛjaɖɛ hɔɔlʋʋ ŋgʋ kɩ-taa, sɔɔjanaa mba pakʋyʋʋ komina yɔɔ yɔ, powoki tɛtʋ cikpetu ndɩ ndɩ taa nɛ palakɩ halaa nɛ piya kɩdɛkɛdɩm. Koobiya hɔɔlʋʋ sɔsɔʋ fɛyɩnɩ tomnaɣ yɔ ñɩm. Paa mbʋ yɔ, lidaʋ ŋgʋ pɛwɛnɩ sɩɖaa femtu yɔɔ yɔ, sɔɔlɩm mbʋ pɛwɛnɩ Yehowa yɔɔ yɔ, nɛ ɛzɩma pɔñɔnɩ ɛ-ɛgbɛyɛ kpam yɔ pitukuni ɖa-laŋɩyɛ siŋŋ. Pa-kɩɖaʋ yeba nɛ ɖɩɖaɣnɩ maɣzʋʋ mbʋ piseɣtiɣ-ɖʋ nɛ ɖɩsɛɣ Yehowa yɔ pɩ-yɔɔ nɛ piyeba nɛ ɖe-tisuu kpa ɖoŋ nɛ pɩkɩlɩ. Koobiya nabɛyɛ lesi pɛ-ɖɩsɩ nɛ pɔ-tɔɔnasɩ. Pɩtɔzɩ-m se ɖɩpɩzɩɣ nɛ ɖilesi ɖo-tomnaɣ yɔɔ ñɩm kɛlɛʋ yem nɛ pɩtɔzɩ-m ɖɔɖɔ se ɖa nɛ Yehowa ɖa-taabalɩyɛ tɔm kɩlɩnɩ cɛyʋʋ. Paa koobiya ɩkatɩɣ kala sɔsɔna yɔ, paakɩlɩɣ nɩɣzʋʋ. Pɛ-wɛtʋ seɣtiɣ-ɖʋ se ɖɩwɛɛ abalɩtʋ nɛ ɖɩlʋbɩnɩ kala wena ɖɩkatɩɣ yɔ nɛ ɖa-kʋdɔmɩŋ.

PAÐƲ-ÐƲ TƲMƖYƐ KƖFAÐƐ AAZII

Pʋwayɩ lɛ, mbʋ ɖɩtɩɖʋna yɔ pɩtalɩ-ɖʋ. Peheyi-ɖʋ se ɖɩkʋyɩ nɛ ɖiwolo Hɔŋkɔŋ ɛgbɛyɛ piliŋa taa. Ðɩtaamaɣzɩ kpa se ɖɩkaɣ wobu Aazii taa! Ɛlɛ ɖɩkpaɣ alɩwaatʋ nɛ ɖɩmaɣzɩ ɛzɩma Yehowa ɖʋ-ɖʋ nesi ɖa-tʋma lɛɛna tɩŋa taa yɔ pɩ-yɔɔ lɛ, ɖitisi se ɖiwoki peeɖe. Pɩnaɣ 2013 taa, ɖɩkʋyɩnɩ ɛsɩtɛɣlɩm nɛ ɖiyele ɖa-taabalaa kʋsɔɔlaa nɛ Afrika kajʋka nɛ ɖɩɖɛɛ, nɛ ɖɩtaatɩlɩ mbʋ pɩɖaŋ-ɖʋ nɛ ɛsɩndaa yɔ.

Pɩɩkɛnɩ-ɖʋ lɛɣzɩtʋ sɔsɔtʋ siŋŋ, mbʋ pʋyɔɔ yɔ Hɔŋkɔŋ kɛnɩ tɛtʋ sɔsɔtʋ ndʋ tɩ-taa ajɛɛ ndɩ ndɩ taa ɛyaa wɛɛ yɔ. Kantɔɔnɛɛ kʋnʋŋ pɔyɔɔdʋʋ peeɖe nɛ pɩɩwɛ-ɖʋ kaɖɛ se ɖɩkpɛlɩkɩ-kʋ. Ɛlɛ koobiya mʋ-ɖʋ camɩyɛ nɛ ɖɩɩsɔɔlɩ peeɖe tɔɔnasɩ siŋŋ. Tʋma wena paawɛɛ nɛ palakɩ ɛgbɛyɛ piliŋa taa yɔ, aawɛɛ nɛ aɖɔʋ ɖɔʋ yɔɔ, ɛlɛ alɩwaatʋ kʋɖʋmtʋ ndʋ tɩ-taa lɛ, tɛtʋ nɛ kuduyuŋ yɔɔ kaawɛɛ nɛ pɩkpaɣ liidiye lɛɛ lɛɛ kpem. Piyeba nɛ Nɔɔɖɛyaa ɛgbɛyɛ kpaɣ lɩmaɣza se pɛpɛdɩ ɛgbɛyɛ piliŋa tɛtʋ nɛ ɖi-kuduyuŋ hɔɔlʋʋ sɔsɔʋ. Pɩtalɩ pɩnaɣ 2015 taa lɛ, petiyini-ɖʋ Kooree Hadɛ kiŋ ɛjaɖɛ taa, nɛ peeɖe ɖɩwɛɛ nɛ ɖɩlakɩ ɖɔ-Ɛsɔ sɛtʋ tʋmɩyɛ lɛɛlɛɛyɔ. Pɩpɔzʋʋ se ɖɩkpɛlɩkɩ Kooree kʋnʋŋ nɛ kɩwɛ kaɖɛ, ɛlɛ paa ɖɩɩpɩzɩɣ-kʋ yɔɔdʋʋ camɩyɛ yɔ, koobiya seɣtiɣ-ɖʋ nɛ peheyiɣ-ɖʋ se ɖɩwɛɛ nɛ ɖɩñakɩ pana.

LƆŊ WEYI ÐƖKPƐLƖKAA YƆ

Pɩfɛyɩ kɛlɛʋ paa ɛzɩmtaa se ɛyʋ ehiɣ taabalaa kɩfama, ɛlɛ ɖiɖiɣzinaa se alɩwaatʋ ndʋ ɖɩyaɣ ɛyaa lalaa nɛ pɔkɔŋ ɖɛ-tɛ yɔ, pɩpɩzɩɣ piyele nɛ ɖɩtɩlɩ-wɛ lɔŋ. Ðiɖiɣzinaa se ɖo-koobiya wɛnɩ wɛtʋ kʋɖʋmtʋ nɛ hɔɔlɩŋ pazɩ yem taa pɛ-wɛtʋ wɛ ndɩ, nɛ Yehowa labɩ-ɖʋ camɩyɛ kpem se ɖɩpɩzɩ nɛ ɖikuli ɖa-laŋa nɛ ɖɩwɩlɩ sɔɔlɩm taabalaa sakɩyɛ.—2 Kɔr. 6:11.

Ðiɖiɣzinaa se pɩcɛyaa se ɖɩnaɣ ɛyaa ɛzɩ Yehowa naɣʋ-wɛ yɔ nɛ ɖɩñɩnɩ nɛ ɖɩna mbʋ pɩwɩlɩɣ kpayɩ kpayɩ se Yehowa sɔɔlɩ-ɖʋ nɛ eɖiyiɣ-ɖʋ yɔ. Alɩwaatʋ ndʋ pitiki-ɖʋ yɔɔɔ yaa alɩwaatʋ ndʋ ɖɩpɔzʋʋ ɖa-tɩ se ɛzɩ koobiya sɔɔlɩ-ɖʋ yɔ, ɖɩɖaɣnɩɣ kpaɣʋ takayɩsɩ nzɩ ɖa-taabalaa ma-ɖʋ nɛ pakpazɩnɩ-ɖʋ ɖoŋ yɔ nɛ ɖɩkalɩɣ. Ðɩna ɛzɩma Yehowa cosi ɖa-adɩma yɔɔ yɔ, ɛzɩma eyeba nɛ ɖa-taa tɛ se ɛsɔɔlɩ-ɖʋ yɔ nɛ ɛzɩma ɛkpazɩ-ɖʋ ɖoŋ yɔ.

Pɩnzɩ wɛɛ nɛ sɩɖɛɣ lɛ, ma nɛ Lesli ɖɩkpɛlɩkɩ ɛzɩma pɩcɛyaa se ɖɩkpaɣ alɩwaatʋ nɛ ɖɩcakɩ ɖama cɔlɔ paa pɩɖɔkɩnɩ-ɖʋ siŋŋ yɔ. Ðɩkɔm ɖɔɖɔ nɛ ɖɩnɩɩ pɩ-taa se pɩcɛyaa se ɖiwoŋuu alɩwaatʋ ndʋ piyiɣdiɣ-ɖʋ yɔ, kɔzɩ kɔzɩ ɖɩɩkpɛlɩkɩɣ kʋnʋŋ kɩfalʋʋ nakʋyʋ lɛ. Nɛ paa ɖoo wena ɖɩñakɩ pana se ɖɩmaɣzɩ nɛ ɖɩna mbʋ pɩha-ɖʋ taa leleŋ evemiye taa yɔ nɛ ɖɩsɛɛ Yehowa se ɛlabaɣ lɛ pɩ-yɔɔ.

Toovenim taa lɛ, mamaɣzaɣ se maapɩzɩɣ kpa nɛ mɛnkɛ Ɛsɔtɔm tiyiyu yaa mancaɣ ajɛɛ lɛɛna taa. Ɛlɛ menɖiɣzinaa se ɛyʋ pɩzɩɣ nɛ ɛla pɩtɩŋa payɩ ye Yehowa ɛɖʋʋ-ɩ nesi yɔ, nɛ pɩha-m taa leleŋ. Mɔntɔzʋʋ nayʋ Yereemii tɔm tʋnɛ tɩ-yɔɔ; ɛyɔɔdaa se: «Ŋpeɣzi-m, hayɩ Yehowa.» (Yer. 20:7) Toovenim lɛ, eyeba nɛ ɖihiɣ taa leleŋ nɛ wazasɩ nzɩ ɖɩtaaɖʋna yɔ, halɩ mantalɩ kaɖʋwa ŋga maawɛna se mansʋʋ ɛsɔdaa lɔɔɖɩyɛ nɛ mɛyɛlɩ yɔ. Ðɩsʋ ɛsɔdaa lɔɔɖɩyɛ nɛ ɖiwolo lona sakɩyɛ taa nɛ ɖikilimi agbaa pilinzi yɔɔ ɛjaɖɛ hɔɔlɩŋ ndɩ ndɩ taa, nɛ alɩwaatʋ ndʋ maakɛ pɩɣa yɔ mantaamaɣzɩ kpa se manpɩzɩɣ nɛ mowolo lona ana a-taa. Mɛwɛnɩ ɛsɩmɩyɛ siŋŋ se Lesli tisi faaa nɛ ɛɖʋ-m nesi tʋma wena payɩ paɖʋ-ɖʋ yɔ a-taa.

Paa ɛzɩmtaa ɖɩtɔzʋʋ ɖa-tɩ weyi ɖɩwɛɛ nɛ ɖɩlakɩ tʋmɩyɛ nɛ mbʋ pʋyɔɔ ɖɩwɛɛ nɛ ɖɩlakɩ-ɖɩ yɔ. Wazasɩ nzɩ ɖihikiɣ sɔnɔ yɔ, sɩwɩlɩɣ ɛzɩma wezuu maatɛŋ kaɣ wɛʋ alɩwaatʋ ndʋ Yehowa ‘kuluu e-nikpiɖe nɛ ɛhaɣzɩ mbʋ payɩ pɩwɛ wezuu yɔ pi-liu ɖeɖe yɔ.’—Keɣ. 145:16.