Ña-taa pɩzɩɣ nɛ pɩtɛ se Yehowa kpaɣaa nɛ ekpeɣ-ŋ

1-2. Alɩwaatʋ ndʋ ɖɩnaɣ se Yehowa kpeɣ-ɖʋ ɖa-kɩwɛɛkɩm yɔ ɛzɩma pɩlakɩ-ɖʋ? (Cɔnɩ ɖɔɖɔ kɩlɛmʋʋ.)

WIYAƲ Daviid kaasɩm laŋwɛɛkɩyɛ nɖɩ ɖɩ-taa ɛyʋ wɛɣ alɩwaatʋ ndʋ ɛtɔzʋʋ kɩwɛɛkɩm mbʋ ɛlaba nɛ pɩɖɛɛ yɔ pɩ-yɔɔ yɔ. (Keɣ. 40:12; 51:3; kajalaɣ tɔm) Ɛɛlabɩ kɩwɛɛkɩm sɔsɔm sakɩyɛ e-wezuu caɣʋ taa. Paa mbʋ yɔ ɛwɩlaa se ekpiɖi siŋŋ, nɛ Yehowa kpaɣaa nɛ ekpeɣ-i. (2 Sam. 12:13) Piyeba nɛ Daviid tɩlɩ ɖɔɖɔ laŋhɛzɩyɛ nɖɩ ɖɩ-taa ɛyʋ wɛɣ alɩwaatʋ ndʋ Yehowa kpeɣu-i ɛ-kɩwɛɛkɩm yɔ.—Keɣ. 32:1.

² Ɛzɩ Daviid yɔ, ɖɩpɩzɩɣ nɛ ɖihiɣ laŋhɛzɩyɛ nɖɩ Yehowa pʋtɔdɩyɛ naʋ kɔŋna yɔ. Paa ɖɩlabɩ kɩwɛɛkɩm sɔsɔm nabʋyʋ yɔ, ye ɖɩtɩlaa se Yehowa sɔɔlɩ faaa se ekpeɣ-ɖʋ pʋ alɩwaatʋ ndʋ ɖikpiɖiɣ pɩ-yɔɔ siŋŋ, ɖiheyiɣ-pʋ ɛgbɛyɛ taa ɛzʋtʋyaa nɛ ɖɩlakɩ mbʋ ɖɩpɩzɩɣ yɔ se ɖɩtaatasɩ-pʋ labʋ yɔ, pɩhɛzɩɣ ɖa-laŋɩyɛ siŋŋ. (Adu. 28:13; Tʋma 26:20; 1 Yoh. 1:9) Nɛ alɩwaatʋ ndʋ ɖɩnaɣ se Yehowa kpeɣ-ɖʋ ɖa-kɩwɛɛkɩm caɣ caɣ nɛ pɩwɛɛ ɛzɩ ɖɩtɩlabɩ-pʋ wiɖiyi nɛ ɖɩna yɔ, pɩhɛzɩɣ ɖɔɖɔ ɖa-laŋɩyɛ.—Ezek. 33:16.

3-4. (a) Pamɩyɩsɩ koobu halɩñɩnʋ nɔɔyʋ lɩm nɛ pɩtɛ lɛ, ɛzɩma pɩlakaɣ-ɩ? (b) Ɛbɛ ɖɩkaɣ naʋ tɔm ñʋʋ kʋnɛ kɩ-taa?

³ Paa mbʋ yɔ nabʋyʋ taa, pɩwɛ nabɛyɛ kaɖɛ se petisi se Yehowa kpeɣ-wɛ pa-kɩwɛɛkɩm. Iyele nɛ ɖɩna koobu halɩñɩnʋ Jennifer kɩɖaʋ, ɛpaɣlɩ toovenim taa. Ɛɛkɛ pɩɣa peleɣa lɛ ɛcakaɣ wezuu kɩdɛkɛdʋʋ mɛsaɣ tɛɛ. Pɩnzɩ nasɩyɩ wayɩ lɛ, ɛlɛɣzɩ e-wezuu caɣʋ nɛ ɛha ɛ-tɩ Yehowa nɛ eyele nɛ pamɩyɩsɩ-ɩ lɩm. Ɛyɔɔdaa se: «Ðooo lɛ, mancakaɣ kʋzʋʋ kɩdɛkɛdʋʋ wezuu, mankpaŋaɣ sʋlʋm, mɔnkɔwaɣ pana kadadayaɣ nɛ liidiye tɔm kaakɩlɩnɩ cɛyʋʋ mɛ-ɛsɩndaa. Maanawa se Bibl yɔɔdʋʋ se ye ɖikpiɖi ɖa-kɩwɛɛkɩm yɔɔ yɔ, Yehowa tɩŋɩɣnɩ Krɩstʋ kɩlaʋ yɔɔ nɛ ekpeɣ-ɖʋ. Paa mbʋ yɔ man-taa taatɛ se Yehowa kpeɣ-m man-kɩwɛɛkɩm.»

⁴ Pɩwɛ-ŋ kaɖɛ nabʋyʋ taa se ŋtisi se Yehowa kpeɣ-ŋ kɩwɛɛkɩm mbʋ ŋlaba nɛ pɩɖɛɛ yɔ? Yehowa kɛ pʋtɔdɩyɛ nayʋ siŋŋ. Daviid taa kaatɛma se Yehowa kpeɣ-i ɛ-kɩwɛɛkɩm, nɛ Yehowa sɔɔlaa se ɖihiɣ taa leleŋ weyi Daviid kaahiɣaa alɩwaatʋ ekpeɣ-i ɛ-kɩwɛɛkɩm yɔ. Tɔm ñʋʋ kʋnɛ kɩ-taa, ɖɩkaɣ naʋ mbʋ pʋyɔɔ pɩcɛyaa se ɖa-taa ɛtɛ se Yehowa kpeɣu-ɖʋ ɖa-kɩwɛɛkɩm yɔ, nɛ mbʋ pɩpɩzɩɣ pɩsɩnɩ-ɖʋ nɛ ɖa-taa tɛmnɩ tɔm ndʋ yɔ.

ƐBƐ YƆƆ PƖCƐYAA SE ÐA-TAA ƐTƐ SE YEHOWA KPEƔ-ÐƲ ÐA-KƖWƐƐKƖM?

5. Suwe Sataŋ ñɩnɩɣ se ɖɩmaɣzɩ? Ha kɩɖaʋ nakʋyʋ.

⁵ Ye ɖa-taa ɛtɛma se Yehowa kpeɣ-ɖʋ ɖa-kɩwɛɛkɩm yɔ piyeki se ɖɩtaatɔlɩ Sataŋ kpacanaa taa. Tɔzɩ se Sataŋ kaɣ labʋ mbʋ payɩ ɛpɩzɩɣ yɔ se pɩsa nɛ ɖiyele Yehowa sɛʋ. Pɩsa nɛ ɛtalɩ ɛ-kaɖʋwa lɛ, ɛpɩzɩɣ eyele nɛ ɖɩmaɣzɩ se Yehowa ɛɛkaɣ-ɖʋ kpeɣu ɖa-kɩwɛɛkɩm kpa. Iyele nɛ ɖɩna Kɔrɛntɩ abalʋ weyi ɛɛcaɣ kʋzʋʋ kɩdɛkɛdʋʋ wezuu nɛ palɩzɩ-ɩ ɛgbɛyɛ taa yɔ ɛ-kɩɖaʋ. (1 Kɔr. 5:​1, 5, 13) Pʋwayɩ abalʋ ɛnʋ ekpiɖi ɛ-kɩwɛɛkɩm yɔɔ, ɛlɛ Sataŋ ñɩnaɣ se ɛgbɛyɛ taa mba itaakpeɣ-i nɛ pataatasɩ-ɩ mʋʋ ɛgbɛyɛ taa. Alɩwaatʋ kʋɖʋmtʋ ndʋ tɩ-taa lɛ, Sataŋ ñɩnaɣ se abalʋ ɛnʋ ɛmaɣzɩ se Yehowa ɛɛkaɣ-ɩ kpeɣu ɛ-kɩwɛɛkɩm kpa nɛ piyele nɛ ɛwɛɛ «laŋwɛɛkɩyɛ sɔsɔɖɛ taa» nɛ eyele Yehowa sɛʋ. Sataŋ kaɖʋwa tɩlɛɣzɩ, nɛ ɛ-ajitu nʋmɔŋ tɩlɛɣzɩ ɖɔɖɔ. Ɛlɛ «ɖɩtɩkɛ mba paasɩŋ ɛ-lɩmaɣza yɔ.»—2 Kɔr. 2:​5-11.

6. Ɛbɛ pɩzɩɣ pɩsɩnɩ-ɖʋ nɛ ɖɩtaawɛɛ laŋwɛɛkɩyɛ taa tam?

⁶ Ye ɖa-taa ɛtɛma se Yehowa kpeɣ-ɖʋ ɖa-kɩwɛɛkɩm yɔ, piyeki se ɖɩtaawɛɛ laŋwɛɛkɩyɛ sɔsɔɖɛ taa. Alɩwaatʋ ndʋ ɖɩlakɩ kɩwɛɛkɩm yɔ ɖɩwɛɣ laŋwɛɛkɩyɛ taa. (Keɣ. 51:17) Nɛ pɩkɛnɩ wɛtʋ kɩbandʋ. Mbʋ pʋyɔɔ yɔ ɖɛ-ɛhʋyɛ pɩzɩɣ nɛ ɖiseɣti-ɖʋ nɛ ɖɩla mbʋ pɩpɔzʋʋ yɔ nɛ ɖɩñɔɔzɩ ɖɛ-wɛtʋ. (2 Kɔr. 7:​10, 11) Paa mbʋ yɔ ye ɖikpiɖi ɖa-kɩwɛɛkɩm yɔɔ, ɛlɛ ɖɩwɛ laŋwɛɛkɩyɛ taa mbʋ yɔ, pɩpɩzɩɣ pitibi-ɖʋ yɔɔɔ nɛ ɖiyele Yehowa sɛʋ. Ɛlɛ ye ɖa-taa ɛtɛma se Yehowa kpeɣ-ɖʋ ɖa-kɩwɛɛkɩm yɔ, piyeki se ɖɩtaawɛɛ laŋwɛɛkɩyɛ taa tam. Ðɩnɛ ɛlɛ ɖɩpɩzɩɣ nɛ ɖɩsɛɛ Yehowa ɛzɩ ɛsɔɔlʋʋ yɔ, pʋ-tɔbʋʋ se ɖɩsɛɣ-ɩ nɛ ɛhʋyɛ kele kele ñɩnɖɛ nɛ taa leleŋ. (Kol. 1:​10, 11; 2 Tim. 1:3) Ɛlɛ ɛbɛ ɖɩpɩzɩɣ ɖɩla nɛ ɖa-taa tɛ se Yehowa kpeɣ-ɖʋ ɖa-kɩwɛɛkɩm?

ƐBƐ PƖZƖƔ PƖSƖNƖ-ÐƲ NƐ ÐA-TAA TƐ SE YEHOWA KPEƔ-ÐƲ ÐA-KƖWƐƐKƖM?

7-8. (a) Yehowa heyi Moyizi se ɛnʋ kɛ Ɛsɔ weyi? (b) Nɛ piyeki se ɖa-taa ɛtɛmnɩ tɔm ndʋ? (Ejipiti Lɩʋ 34:​6, 7)

⁷ Maɣzɩ tɔm ndʋ Yehowa yɔɔdɩ ɛ-maɣmaɣ ɛ-tɩ yɔɔ yɔ tɩ-yɔɔ. Iyele nɛ ɖɩkpaɣ tɔm ndʋ Yehowa heyi Moyizi Sinayii Pʋʋ yɔɔ yɔ tɩ-kɩɖaʋ.a (Kalɩ Ejipiti Lɩʋ 34:​6, 7.) Paa Yehowa ɛwɛnɩ wɛtʋ kɩbandʋ sakɩyɛ yɔ, ɛkpaɣ lɩmaɣzɩyɛ se eheyiɣ Moyizi se ɛnʋ kɛ «Ɛsɔ weyi ɛnaɣ ɛyaa pʋtɔdɩyɛ nɛ ɛnɩɣ ɛyaa wɩzasɩ yɔ.» Ye mbʋ, ŋmaɣzɩɣ se Ɛsɔ weyi ɛwɛnɩ wɛtʋ kɩbandʋ ndʋ yɔ, ɛpɩzɩɣ nɛ ekizi se eekpeɣu ɛ-sɛyʋ weyi ekpiɖi siŋŋ yɔ ɛ-kɩwɛɛkɩm na? Aayɩ, mbʋ pʋyɔɔ yɔ ye ɛlabɩ mbʋ yɔ pɩwɩlɩɣ se ɛɛnaɣ ɛyaa pʋtɔdɩyɛ nɛ ɛwɛ kañatʋ, ŋgʋ Yehowa fɛyɩ mbʋ.

⁸ Ða-taa pɩzɩɣ nɛ pɩtɛ se ye Yehowa ɛtɔma se ɛnaɣ ɛyaa pʋtɔdɩyɛ yɔ, toovenim pɩkɛnaa mbʋ pʋyɔɔ yɔ ɛɛcɛtɩɣ. (Keɣ. 31:5) Ye mbʋ ɖɩpɩzɩɣ nɛ ɖitisi tɔm ndʋ ɛyɔɔdaa yɔ tɩ-yɔɔ. Ye pɩwɛ-ŋ kaɖɛ se ŋtisi se toovenim taa lɛ, Yehowa kpeɣ-ŋ ña-kɩwɛɛkɩm yɔ, pɔzɩ ña-tɩ se: «Ɛzɩ mentisiɣ se toovenim taa lɛ Yehowa kpeɣu ɛyaa pa-kɩwɛɛkɩm nɛ ɛnaɣ pa-pʋtɔdɩyɛ, nɛ ekpeɣu kɩwɛɛkɩm laɖaa mba payɩ pekpiɖiɣ yɔ? Ye mentisiɣ tɔm ndʋ tɩ-yɔɔ yɔ, ɛzɩ pɩtɩmʋna se man-taa ɛtɛ se Yehowa kpeɣ ma ɖɔɖɔ man-kɩwɛɛkɩm na?»

9. Ye pɔtɔma se pekpeɣ-ɖʋ ɖa-kɩwɛɛkɩm yɔ, pʋ-tɔbʋʋ lɛ suwe? (Keɣa 32:5)

⁹ Maɣzɩ tɔm ndʋ Yehowa yeba nɛ Bibl mayaa yɔɔdɩ ɛ-kpaɣʋ nɛ kpeɣu yɔɔ yɔ tɩ-yɔɔ. Yele nɛ ɖɩna tɔm ndʋ Daviid yɔɔdɩ Yehowa kpaɣʋ nɛ kpeɣu yɔɔ yɔ. (Kalɩ Keɣa 32:5.) Ɛyɔɔdaa se: «Ŋkpeɣ-m man-kɩwɛɛkɩm, man-kɩdɛkɛdɩm.» Ebree tɔm piye nɖɩ pɛɖɛzaa se «kpeɣu» yɔ papɩzɩɣ nɛ pɛɖɛzɩ-ɖɩ ɖɔɖɔ se «kʋsʋʋ» yaa «kpaɣʋ.» Alɩwaatʋ ndʋ Yehowa kpeɣ Daviid ɛ-kɩwɛɛkɩm yɔ, pɩɩwɛ ɛzɩ ɛkʋsɩ sʋʋtʋ sɔsɔtʋ natʋyʋ Daviid yɔɔ nɛ ɛɖɛna yɔ. Piyeba nɛ Daviid hiɣ laŋhɛzɩyɛ mbʋ pʋyɔɔ yɔ ɛnawa se Yehowa kʋsɩ sʋʋtʋ sɔsɔtʋ ɛ-yɔɔ. (Keɣ. 32:​2-4) Ða ɖɔɖɔ ɖɩpɩzɩɣ nɛ ɖihiɣ laŋhɛzɩyɛ nɖɩ. Ye ɖikpiɖi ɖa-kɩwɛɛkɩm yɔɔ siŋŋ yɔ, pɩfɛyɩ se ɖɩwɛɛ laŋwɛɛkɩyɛ taa tam, mbʋ pʋyɔɔ yɔ Yehowa tɛm kʋsʋʋ ɖa-kɩwɛɛkɩm sʋʋtʋ ɖɔ-yɔɔ nɛ ɛkpaɣ-tʋ nɛ ɛɖɛna.

10-11. Ɛbɛ tɔm loyaɣ «ŋsɔɔlɩ kpeɣu» kpɛlɩkɩɣ-ɖʋ Yehowa yɔɔ? (Keɣa 86:5)

¹⁰ Kalɩ Keɣa 86:5. Mayaɣ kanɛ ka-taa, Daviid yɔɔdaa se Yehowa ‘sɔɔlɩ kpeɣu.’ Bibl taa tazɩyʋ nɔɔyʋ yɔɔdaɣ tɔm loyaɣ ŋga kɔ-tɔm lɛ, ɛyɔɔdɩ Yehowa yɔɔ se: ‘Ɛkɛ Ɛsɔ weyi ɛkpakɩɣ nɛ ekpeɣu yɔ; ɛ-wɛtʋ lɛ.’ Ɛbɛ yɔɔ ɛsɔɔlɩ kpeɣu? Mayaɣ ŋga kɔ-hɔɔlʋʋ naalɛ ñɩŋgʋ yɔɔdʋʋ se: «Mba payɩ payaɣ-ŋ yɔ, ŋwɩlɩɣ-wɛ sɔɔlɩm siɣsiɣ ñɩmbʋ kpem.» Ɛzɩ ɖɩnaʋ tɔm ñʋʋ ŋgʋ kɩɖɛwa yɔ kɩ-taa yɔ, sɔɔlɩm siɣsiɣ ñɩmbʋ seɣtiɣ Yehowa se ɛñɔɔnɩ ɛ-sɛyaa siɣsiɣ tɩnaa tam. Ɛ-sɔɔlɩm siɣsiɣ ñɩmbʋ yɔɔ lɛ, kɩwɛɛkɩm laɖaa mba payɩ pekpiɖiɣ yɔ ‘ɛkaɣ-wɛ kpeɣu faaa.’ (Iza. 55:​7, pɩ-tɛɛ tɔm) Ye pɩwɛ-ŋ kaɖɛ se ŋtisi se Yehowa kpeɣ-ŋ ña-kɩwɛɛkɩm yɔ, pɔzɩ ña-tɩ se: «Mentisiɣ se Yehowa kɛ Ɛsɔ weyi ɛkpakɩɣ nɛ ekpeɣu, pʋ-tɔbʋʋ se weyi ɛsɔɔlɩ kpeɣu kɩwɛɛkɩm laɖaa mba payɩ patɩmɩɣnɩ-ɩ se ɛna pa-pʋtɔdɩyɛ yɔ? Ye mentisiɣ tɔm ndʋ tɩ-yɔɔ yɔ, ɛzɩ pɩtɩmʋna se man-taa ɛtɛ se ekpeɣ ma ɖɔɖɔ man-kɩwɛɛkɩm alɩwaatʋ ndʋ mentendi-i se ɛna man-pʋtɔdɩyɛ yɔ?»

¹¹ Ye ɖɩtɩlaa se Yehowa sɩm mbʋ ɛkpaɣaa nɛ ɛmanɩ-ɖʋ yɔ, nɛ ɛnawa se ɖɩkɛ kɩwɛɛkɩm laɖaa yɔ, pɩpɩzɩɣ nɛ pɩhɛzɩ ɖa-laŋɩyɛ. (Keɣ. 139:​1, 2) Iyele nɛ ɖɩna tɔm ndʋ Daviid yɔɔdɩ keɣa lɛɛka taa yɔ, nɛ ɛzɩma tɩpɩzɩɣ tɩsɩnɩ-ɖʋ nɛ ɖa-taa tɛ se Yehowa sɔɔlaa se ekpeɣ-ɖʋ ɖa-kɩwɛɛkɩm yɔ.

TAASƆƆ MBƲ PƖ-YƆƆ YEHOWA TƆZƲƲ YƆ PƖ-YƆƆ

12-13. (a) Ɛzɩ Keɣa 103:14 wɩlʋʋ yɔ, ɖɔ-yɔɔ tɔm ndʋ Yehowa tɔzʋʋ? (b) Nɛ ɛbɛ piseɣtiɣ-i se ɛla?

¹² Kalɩ Keɣa 103:14. Daviid yɔɔdaa se Yehowa «[tɔzʋʋ] se mʋzʋʋ ɖɩkɛnaa.» Daviid tɩŋnɩ tɔm ndʋ tɩ-yɔɔ nɛ ɛwɩlɩ lɩmaɣza wena a-yɔɔ Yehowa sɔɔlɩ kpeɣu ɛ-sɛyaa mba pekpiɖiɣ yɔ a-taa naɖɩyɛ. Lɩmaɣzɩyɛ nɖɩ lɛ se ɛtɔzʋʋ se ɖɩtɩtalɩ pilim. Pɩsa nɛ ɖɩnɩɩ tɔm ndʋ tɩ-taa camɩyɛ lɛ, iyele nɛ ɖɩtazɩ tɔm ndʋ Daviid yɔɔdaa yɔ tɩ-taa nɛ pɩkɩlɩ.

¹³ Daviid yɔɔdaa se Yehowa «[sɩm] camɩyɛ mbʋ ɛmanɩ-ɖʋ yɔ.» Ɛkpaɣ «mʋzʋʋ» nɛ ɛmanɩ Aɖam. Ye mbʋ, ɛsɩm mbʋ pɩpɔzʋʋ ɛyaa yɔ. Paa patalɩ pilim yɔ, ɛnawa se pɩpɔzʋʋ se pɔtɔɔ tɔɔnaɣ, poɖoo nɛ pefezi. (Kiɖe 2:7) Ɛlɛ alɩwaatʋ ndʋ Aɖam nɛ Ɛva palabɩ kɩwɛɛkɩm yɔ, hɔɔlʋʋ nakʋyʋ taa lɛ ɛyaa kɛ ɖɔɖɔ mʋzʋʋ. Ðɩkɛ pa-lʋlʋʋ taa mba, nɛ pɛɖɛzɩ-ɖʋ kɩwɛɛkɩm, mbʋ tuyuuni-ɖʋ nɛ ɖɩlakɩ mbʋ pɩfɛyɩ ɖeu yɔ. Pɩtasɩna se Yehowa sɩm ɖa-mantɩtalɩ pilim wɛtʋ lɛ, Daviid yɔɔdaa se «ɛtɔzʋʋ» ɖɔɖɔ tɩ-yɔɔ. Daviid tɔm ndʋ tɩwɩlɩɣ se ɛzɩma Yehowa tɔzʋʋ se ɖɩtɩtalɩ pilim yɔ pʋyɔɔ lɛ, ɛnaɣ ɖa-pʋtɔdɩyɛ paa ɛzɩmtaa. Tobi lɛ, tɔm ndʋ Daviid yɔɔdaa yɔ tɩ-tɔbʋʋ lɛ se Yehowa nawa se pɩkaɣ-ɖʋ coɖuu nabʋyʋ taa, ɛlɛ ye picoɖi-ɖʋ nɛ ɖikpiɖi siŋŋ yɔ, ɛnaɣ ɖa-pʋtɔdɩyɛ nɛ ɛkpaɣ nɛ ekpeɣ-ɖʋ.—Keɣ. 78:​38, 39.

14. (a) Suwe Daviid tasɩ yɔɔdʋʋ Yehowa kpaɣʋ nɛ kpeɣu yɔɔ? (Keɣa 103:12) (b) Ɛzɩma Yehowa kpaɣaa nɛ ekpeɣ Daviid yɔ, ɛbɛ pɩkpɛlɩkɩɣ-ɖʋ? (Kalɩ aɖakaɣ «Ɛzɩma Yehowa kpakɩɣ nɛ ekpeɣu nɛ ɛsɔʋ pɩ-yɔɔ yɔ.»)

¹⁴ Ɛbɛ ɖɔɖɔ pɩzɩɣ pɩsɩnɩ-ɖʋ nɛ ɖa-taa tɛ se Yehowa kpaɣ ɖa-kɩwɛɛkɩm nɛ ekpeɣ-ɖʋ? (Kalɩ Keɣa 103:12.) Daviid yɔɔdaa se Yehowa kpeɣu-ɖʋ lɛ, eposuu-ɖʋ nɛ ɖa-kɩwɛɛkɩm «ɛzɩ wɩsɩ ɖɩlɩyɛ posuu kpem nɛ wɩsɩ ɖɩɖʋyɛ yɔ.» Wɩsɩ ɖɩlɩyɛ posini wɩsɩ ɖɩɖʋyɛ siŋŋ, nɛ lona ana a-naalɛ aakaɣ katʋʋ kpa. Ɛbɛ tɔm ndʋ tɩkpɛlɩkɩɣ-ɖʋ kɩwɛɛkɩm mbʋ Yehowa kpeɣu-ɖʋ yɔ pɩ-yɔɔ? Takayaɣ nakɛyɛ tazɩ mayaɣ ŋga ka-taa nɛ kɔyɔɔdɩ se Ɛsɔ posuu-ɖʋ nɛ ɖa-kɩwɛɛkɩm siŋŋ, nɛ pɩwɛ ɛzɩ nabʋyʋ sɔzɩŋ mʋkʋʋ caɣ caɣ yɔ. Ye mbʋ, ɖa-taa pɩzɩɣ nɛ pɩtɛ se ɛɛkaɣ tasʋʋ maɣzʋʋ pɩ-yɔɔ kpa yaa ɛɛkaɣ-ɖʋ tasʋʋ tɔzʋʋ pɩ-yɔɔ. Nabʋyʋ taa sɔzɩŋ nɩɩyɩ pɩzɩɣ nɛ ɛtɔzɩ-ɖʋ nabʋyʋ yɔɔ. Ɛlɛ alɩwaatʋ ndʋ Yehowa kpeɣu-ɖʋ ɖa-kɩwɛɛkɩm yɔ, nabʋyʋ ɛɛkaɣ yebu se ɛtasɩ maɣzʋʋ pɩ-yɔɔ nɛ ɛkpaɣ lɩmaɣzɩyɛ se ɛkʋʋ ɖɔ-tɔm yaa ɛhɔŋ ɖa-nɩŋgbaŋʋʋ.—Ezek. 18:​21, 22; Tʋma 3:19.

15. Ye kɩwɛɛkɩm mbʋ ɖɩlaba nɛ pɩɖɛɛ yɔ piyeba nɛ ɖɩwɛɛ laŋwɛɛkɩyɛ taa tam yɔ, ɛbɛ ɖɩpɩzɩɣ nɛ ɖɩla?

¹⁵ Tɔm ndʋ Daviid ma Keɣa 103 taa yɔ, ɛzɩma tɩpɩzɩɣ tɩsɩnɩ-ɖʋ nɛ ɖa-taa tɛ se Yehowa kpeɣu-ɖʋ ɖa-kɩwɛɛkɩm? Ye kɩwɛɛkɩm mbʋ ɖɩlaba nɛ pɩɖɛɛ yɔ piyeba nɛ ɖɩwɛɛ laŋwɛɛkɩyɛ taa tam yɔ, ɖɩpɩzɩɣ nɛ ɖɩpɔzɩ ɖa-tɩ se: «Ɛzɩ mɔnsɔʋ mbʋ pɩ-yɔɔ Yehowa tɔzʋʋ yɔ pɩ-yɔɔ, pʋ-tɔbʋʋ se mɔnsɔʋ se ɛtɔzʋʋ se mantɩtalɩ pilim nɛ ɛkaɣ kpeɣu kɩwɛɛkɩm laɖʋ weyi ekpiɖaa ɛzɩ ma yɔ? Ɛzɩ mɔntɔzʋʋ ɖɔɖɔ mbʋ Yehowa lɩzaa se ɛɛtasɩɣ pɩ-yɔɔ maɣzʋʋ yɔ pɩ-yɔɔ, pʋ-tɔbʋʋ se mɛwɛɛ nɛ mɔntɔzʋʋ kɩwɛɛkɩm mbʋ Yehowa kpaɣaa nɛ ekpeɣ-m nɛ wiɖiyi ɛɛkaɣ-m pɔzʋʋ akɔnta pɩ-yɔɔ yɔ pɩ-yɔɔ?» Yehowa ɛɛkaŋ ɛ-lɩmaɣza kɩwɛɛkɩm mbʋ ɖɩlaba nɛ pɩɖɛɛ yɔ pɩ-yɔɔ. Pɩtɩmʋna se ɖa ɖɔɖɔ ɖɩka ɖa-lɩmaɣza pɩ-yɔɔ. (Keɣ. 130:3) Ye ɖa-taa ɛtɛma se Yehowa kpakɩɣ nɛ ekpeɣu-ɖʋ yɔ, pɩsɩɣnɩ-ɖʋ nɛ ɖɩsɔɔ kɩwɛɛkɩm mbʋ ɖɩlaba nɛ pɩɖɛɛ yɔ pɩ-yɔɔ nɛ ɖiwolo pɩ-yɔɔ nɛ ɖɩsɛɛ-ɩ nɛ taa leleŋ.

16. Ha kɩɖaʋ ŋgʋ kɩwɩlɩɣ se pɩtɩmʋna se ŋwɛɛ laŋwɛɛkɩyɛ taa tam kɩwɛɛkɩm mbʋ ŋlaba nɛ pɩɖɛɛ yɔ pɩ-yɔɔ yɔ. (Cɔnɩ ɖɔɖɔ kɩlɛmʋʋ.)

¹⁶ Iyele nɛ ɖɩkpaɣ kɩɖaʋ nakʋyʋ. Ye kɩwɛɛkɩm mbʋ ŋlaba nɛ pɩɖɛɛ yɔ piyeba nɛ ŋwɛɛ laŋwɛɛkɩyɛ taa tam yɔ, pɩwɛ ɛzɩ ŋsaʋ lɔɔɖɩyɛ nɛ ŋwɛɛ nɛ ŋcɔŋnɩ ñɩnʋʋ ŋgʋ kɩnaɣnɩ wayɩ yɔ kɩ-taa tam yɔ. Pɩtɩwɛɛkɩ pʋyʋ se ŋyakɩ ɛsɩyɛ kɩ-taa nabʋyʋ taa nɛ ŋna mbʋ pɩkɔŋnɩ ña-wayɩ yɔ. Ɛlɛ pɩsa nɛ ŋɖɛɛnɩ ɛsɩndaa nɛ kaɖɛ naɖɩyɛ ɛtaatalɩ-ŋ lɛ, pɩwɛɛ se ŋcɔŋnɩ ɛsɩndaa. Mbʋ ɖɔɖɔ ye nabʋyʋ taa, ɖɩmaɣzɩɣ kɩwɛɛkɩm mbʋ ɖɩlaba nɛ pɩɖɛɛ yɔ pɩ-yɔɔ yɔ, pɩsɩɣnɩ-ɖʋ nɛ ɖɩkpɛlɩkɩ lɔŋ pɩ-taa nɛ ɖɩtɛ ɖa-taa se ɖɩɩtasɩɣ-pʋ labʋ. Ɛlɛ ye ɖɩkaŋ ɖa-lɩmaɣza kɩwɛɛkɩm mbʋ pɩ-yɔɔ tam yɔ, ɖɩpɩzɩɣ nɛ ɖilesi ɖa-taa leleŋ nɛ ɖɩɩtasɩɣ labʋ ɖo-ɖoŋ ɖeɖe Yehowa sɛtʋ taa. Ɛlɛ pɩwɛɛ se ɖiwolo pɩ-yɔɔ nɛ ɖɩka ɖa-lɩmaɣza mbʋ pɩwɛnɩ ɛsɩndaa yɔ pɩ-yɔɔ. Ðɩwɛ nʋmɔʋ ŋgʋ kiwokini ɛjaɖɛ kɩfaɖɛ nɖɩ Ɛsɔ labɩ ɖɩ-tamaɣ yɔ kɩ-taa, nɛ ɖɩ-taa lɛ ‘ɖɩɩkaɣ tɔzʋʋ’ mbʋ pɩɖɛwa yɔ pɩ-yɔɔ.—Iza. 65:17; Adu. 4:25.

PAA ƐZƖMTAA LƐ ÑA-TAA ƐTƐ SE YEHOWA KPEƔU-Ŋ ÑA-KƖWƐƐKƖM

17. Ɛbɛ yɔɔ pɩwɛɛ se paa ɛzɩmtaa lɛ, ɖa-taa ɛtɛ se Yehowa sɔɔlɩ-ɖʋ nɛ ekpeɣu-ɖʋ faaa?

¹⁷ Pɩwɛɛ se paa ɛzɩmtaa lɛ, ɖa-taa ɛtɛ se Yehowa sɔɔlɩ-ɖʋ nɛ ekpeɣu-ɖʋ faaa. (1 Yoh. 3:19) Ɛbɛ yɔɔ? Mbʋ pʋyɔɔ yɔ Sataŋ kaɣ wobu pɩ-yɔɔ nɛ ɛlakɩ mbʋ payɩ ɛpɩzɩɣ yɔ se pɩsa nɛ ɖɩmaɣzɩ se ɖɩtɩmʋna se Yehowa ɛsɔɔlɩ-ɖʋ yaa ekpeɣ-ɖʋ ɖa-kɩwɛɛkɩm. Paa pɩtɩɩkɛ suwe yɔ, ɛ-kaɖʋwa lɛ se ɛla nɛ ɖiyele Yehowa sɛʋ. Nɛ ɖɩwɛɣ nɛ ɖɩñɔtʋʋnɩ ɛjaɖɛ tɛm lɛ, Sataŋ kaɣ ñaɣʋ pana se ɛla mbʋ nɛ pɩkɩlɩ. (Natʋ 12:12) Pɩfɛyɩ se ɖiyebi-i nɛ ɛwa.

18. Ɛbɛ ŋpɩzɩɣ ŋla nɛ ña-taa tɛ se Yehowa sɔɔlɩ-ŋ nɛ ekpeɣu-ŋ ña-kɩwɛɛkɩm?

¹⁸ Pɩsa nɛ ña-taa tɛ se Yehowa sɔɔlɩ-ŋ lɛ, ñaɣ pana nɛ ŋɖɔ lɔŋ weyi patasɩ tɔm ñʋʋ ŋgʋ kɩɖɛwa yɔ kɩ-taa yɔ ɩ-yɔɔ. Pɩsa nɛ ña-taa tɛ se Yehowa kpeɣ-ŋ ña-kɩwɛɛkɩm lɛ, maɣzɩ tɔm ndʋ ɛyɔɔdɩ ɛ-maɣmaɣ ɛ-tɩ yɔɔ yɔ tɩ-yɔɔ. Maɣzɩ ɖɔɖɔ tɔm ndʋ eyeba nɛ Bibl mayaa yɔɔdɩ ɛ-kpaɣʋ nɛ kpeɣu yɔɔ yɔ tɩ-yɔɔ. Taasɔɔ se ɛsɩm camɩyɛ se ŋtɩtalɩ pilim nɛ ɛkaɣ naʋ ña-pʋtɔdɩyɛ. Pɩtasɩ lɛ, tɔzɩ se ye ekpeɣ-ŋ ña-kɩwɛɛkɩm yɔ ɛsɔʋ pɩ-yɔɔ caɣ caɣ. Ðɩnɛ ɛlɛ, ña-taa kaɣ tɛm se Yehowa naɣ ɛyaa pʋtɔdɩyɛ, nɛ ɛzɩ Daviid yɔ, ŋkaɣ yɔɔdʋʋ se: «Yehowa, ŋlabaɣ lɛ se “ŋkpeɣ-m man-kɩwɛɛkɩm, man-kɩdɛkɛdɩm.”»—Keɣ. 32:5.