Ɛbɛ Armaagedɔɔ you kɛnaa?

Bibl tɔm cosuu

Armaagedɔɔ you kɛ you kɛdɛzaɣ ñɩŋgʋ ŋgʋ ɛyaa kominawaa nɛ Ɛsɔ pakaɣ labʋ yɔ. Sɔnɔ, kominawaa mba nɛ mba paɖʋʋ-wɛ nesi yɔ pakaɖɩɣnɩ Ɛsɔ nɛ pekiziɣ se paaluzuu pa-tɩ e-kewiyitu tɔɔʋ tɛɛ. (Keɣa 2:2) Armaagedɔɔ you kaɣ yebu nɛ ɛyaa kewiyitu tɔɔʋ sɩɩ tɩnaɣ.—Danɩyɛɛlɩ 2:44.

Natʋ 16:16 taa ɖeke palabɩnɩ tʋmɩyɛ tɔm piye «Armaagedɔɔ» Bibl taa. Natʋ takayaɣ yɔɔdʋʋ se «tɛtʋ kpeekpe yɔɔ awiya» kaɣ kpeɣluu «Ɛsɔ Ðoŋ Tɩŋa Tʋ tɛ kɩyakʋ sɔsɔʋ you taa; . . . lone nɖɩ payaɣ Ebree taa se Armaagedɔɔ yɔ ɖɩ-taa.»—Natʋ 16:14.

Mba kaɣ Armaagedɔɔ you labʋ? Yesu Krɩstʋ kaɣ ɖɛʋ nɔɔ ɛsɔdaa yoyaa nɛ poyooni Ɛsɔ koyindinaa nɛ pawabɩ-wɛ. (Natʋ 19:11-16, 19-21) Koyindinaa mba pa-taa nabɛyɛ lɛ mba pakaɖɩɣnɩ Ɛsɔ kewiyitu tɔɔʋ nɛ peniŋi-i yɔ.—Ezekɩyɛɛlɩ 39:7.

Ɛzɩ Wɩsɩ Ðɩlɩyɛ ajɛɛ taa pakaɣ labʋ Armaagedɔɔ you na? Aayɩ. Pɩtɩkɛ lone kʋɖʋmɖɩyɛ naɖɩyɛ taa pakaɣ labʋ Armaagedɔɔ you ɛlɛ kɩkaɣ tukunuu tɛtʋ kpeekpe.—Yereemii 25:32-34; Ezekɩyɛɛlɩ 39:17-20.

Nabʋyʋ taa lɛ pɛɖɛzɩɣ Armaagedɔɔ se «Harmaagedɔɔnɩ» (Ebree taa lɛ Har Meghiddôn), pʋ-tɔbʋʋ se «Megido Pʋʋ.» Megido kaakɛ caanaʋ taa Izrayɛɛlɩ taa tɛtʋ natʋyʋ. Caanaʋ taa tɔm wɩlɩɣ se paalabɩ yoŋ sɔsɔŋ nɩɩyɩ tɛtʋ ndʋ tɩ-cɔlɔ nɛ pɛkɛdɩ ɩ-taa nɩɩyɩ tɔm Bibl taa. (Tɔm Hʋyaa 5:19, 20; 2 Awiya 9:27; 23:29) Ɛlɛ Armaagedɔɔ ɛɛwɩlɩɣ lone naɖɩyɛ maɣmaɣ nɖɩ ɖɩñɔtɩnɩ caanaʋ taa Megido yɔ. Pʋʋ nakʋyʋ fɛyɩ peeɖe nɛ kɩpaɣlɩ siŋŋ, nɛ halɩ paa pakpaɣ Yizreyɛɛlɩ Fɛɛʋ ŋgʋ kɩñɔtɩnɩ peeɖe yɔ nɛ pɔsɔzɩ kɩ-yɔɔ yɔ, mba payɩ pakaɣ kʋyʋʋ se poyooni Ɛsɔ yɔ paamakɩ peeɖe. Ɛlɛ Armaagedɔɔ wɩlɩɣ ɛjaɖɛ kpeekpe yɔɔ wɛtʋ ndʋ tɩ-taa ajɛɛ kaɣ wɛʋ se akaɖɩnɩ Ɛsɔ kewiyitu tɔɔʋ kɛdɛzaɣ ɖeɖe yɔ.

You wondu ndʋ Ɛsɔ kaɣ labɩnʋʋ tʋmɩyɛ Armaagedɔɔ you taa? Paa ɖɩɩsɩŋ ɛzɩma Ɛsɔ kaɣ labɩnʋʋ e-ɖoŋ tʋmɩyɛ yɔ, you wondu ndʋ ɛɛlabɩnɩ tʋmɩyɛ caanaʋ taa yɔ ɛkpɛndɩ ɛwɛnɩ-tʋ; tɩ-taa natʋyʋ yɔ: Ðɔmbɛɛ, tɛtʋ ñamsʋʋ, tɛʋ sɔsɔʋ nɛ ɖɔmbɛɛ, miŋ nɛ tɩm, tɛʋ ñɩlɩsʋʋ nɛ kʋdɔŋ. (Yɔɔb 38:22, 23; Ezekɩyɛɛlɩ 38:19, 22; Habakuuki 3:10, 11; Zakarii 14:12) Ɛsɔ pɩzɩɣ nɛ eyele nɛ pisidi e-koyindinaa nɛ pakʋ ɖama pa-taa pe-ɖeke; nɛ pakaɣ nɩʋ pɩ-taa se Ɛsɔ wɛna nɛ eyouni-wɛ.—Ezekɩyɛɛlɩ 38:21, 23; Zakarii 14:13.

Armaagedɔɔ you yeki se ɛjaɖɛ ɛtɛ na? You ŋgʋ kɩɩkaɣ ɖɩzʋʋ tɛtʋ, mbʋ pʋyɔɔ yɔ tɩkɛ ɛyaa ɖɩjaɣyɛ tam. (Keɣsi 37:29; 96:10; Eklezɩyasɩtɩ 1:4) Kɩɩkaɣ ɖɩzʋʋ ɛyaa tɩŋa ɛlɛ kɩyakɩ pa-ñʋʋ na mbʋ pʋyɔɔ yɔ Ɛsɔ sɛyaa «samaɣ sɔsɔɔ nakɛyɛ» kaɣ hiɣu ñʋʋ yabʋ.—Natʋ 7:9, 14; Keɣa 37:34.

Nabʋyʋ taa Bibl lakɩnɩ tʋmɩyɛ tɔm piye «ɛjaɖɛ» nɛ kɩwɩlɩɣ ɛyaa mba pakaɖɩɣnɩ Ɛsɔ yɔ. (1 Yohanɛɛsɩ 2:15-17) Ye mbʋ, ɛyaa mba Armaagedɔɔ you kaɣ ɖɩzʋʋ; nɛ mbʋ payaɣ se «ɛjaɖɛ tɛm.»—Maatiyee 24:3.

Ɛzɩmtaa pakaɣ labʋ Armaagedɔɔ you? Alɩwaatʋ ndʋ Yesu yɔɔdaɣ «kʋñɔŋ sɔsɔʋ» ŋgʋ kɩkaɣ tɛmnʋʋ Armaagedɔɔ you yɔ kɩ-tɔm lɛ, ɛyɔɔdaa se: «Piyele nɛ kɩyakʋ ŋgʋ nɛ ñɩɣyʋʋ ŋgʋ lɛ, nɔɔyʋ ɛɛsɩŋ; Ɛsɔ tiyiyaa mba pɛwɛ ɛsɔdaa yɔ nɛ Ɛsɔ Pɩyalʋ ɖɔɖɔ paasɩŋ, ɛlɛ Caa ɖeke sɩmna.» (Maatiyee 24:21, 36) Paa mbʋ yɔ, Bibl wɩlɩɣ se pakaɣ labʋ Armaagedɔɔ you Yesu wɛʋ alɩwaatʋ taa, nɛ tɩpaɣzɩ pɩnaɣ 1914.—Maatiyee 24:37-39.