Kpaɣ tisuu mbʋ ŋwɛna yɔ nɛ ŋmaɣzɩnɩ ndʋ Bibl wɩlɩɣ yɔ

ŊMAƔZƖƔ se ŋkɛ Krɩstʋ tʋ na? Ye mbʋ yɔ, ŋwɛ ɛyaa mba pɛcɛzɩ miiliyaarɩwaa naalɛ nɛ pamaɣzɩɣ se pɛkɛ Krɩstʋ mba yɔ pa-taa. Pʋ-tɔbʋʋ lɛ se ɛyaa ɛzɩ 3 yɔɔ lɛ 1 kɛ weyi ɛtɔŋ se ɛkɛ Krɩstʋ tʋ yɔ. Sɔnɔ agbaa wena ayaɣ a-tɩ se Krɩstʋ agbaa yɔ acɛzɩ kudokiŋ sakɩyɛ, ɛlɛ a-wɩlɩtʋ kaɖɩɣnɩ ɖama hɔɔlɩŋ sakɩyɛ taa. Pɩwɩlɩɣ se tisuu mbʋ ŋwɛna yɔ, pɩtɩla pɩwɛ ndɩ siŋŋ nɛ mba pɔtɔŋ se pɛkɛ Krɩstʋ mba ɖɔɖɔ yɔ pa-taa sakɩyɛ tisuu. Ɛlɛ tisuu mbʋ ŋwɛna yɔ pɩ-tɔm cɛyaa? Ɛɛɛ pɩ-tɔm cɛyɩ siŋŋ ye ŋsɔɔlaa se ŋɖɔ Krɩstʋ nɩŋgbanzɩ taa ɛzɩ Bibl maɣmaɣ wɩlʋʋ yɔ.

Payaɣaɣ kajalaɣ ñɩma mba patɩŋaɣ Yesu Krɩstʋ yɔ se “Krɩstʋ tɩnaa” yaa Krɩstʋ ñɩma. (Tʋma Labʋ 11:26) Krɩstʋ ɛgbɛyɛ kʋɖʋmɖɩyɛ kaawɛna, ye mbʋ pɩtaacɛyɩ se patasɩ-ɖɩ hɩɖɛ naɖɩyɛ yaʋ. Krɩstʋ ñɩma tɩŋa kaalabɩ nɔɔ kʋɖʋmaɣ nɛ pɔɖɔŋ Yesu Krɩstʋ weyi ɛsɩ Krɩstʋ ɛgbɛyɛ tigiɖe yɔ, ɛ-paɣtʋ tɩŋa yɔɔ. Ɛgbɛyɛ nɖɩ ɖɩ-taa ŋwɛɛ yɔ, suwe ŋmaɣzɩɣ ɖɩ-yɔɔ? Ŋmaɣzɩ se tɔm ndʋ ɖɩwɩlɩɣ yɔ tɩlabɩ nɔɔ kʋyʋmaɣ ɖeyi ɖeyi nɛ tɔm ndʋ Krɩstʋ wɩlaa yɔ nɛ tɩla nɔɔ kʋyʋmaɣ ɖɔɖɔ nɛ kajalaɣ Krɩstʋ ñɩma tisuu na? Ɛbɛ pɩwɛɛ se ŋla nɛ ŋtɩlɩ toovenim? Nʋmɔʋ kʋɖʋmʋʋ yɔɔ yeke ŋpɩzɩɣ nɛ ŋtɩŋna: Labɩnɩ tʋmɩyɛ Bibl ɛzɩ kɩmaɣzʋʋ yɔ nɛ ŋmaɣzɩnɩ tisuu mbʋ ŋwɛna yɔ.

Yesu kaawɛnɩ ñamtʋ siŋŋ Ɛsɔtɔm yɔɔ. Ɛtaasɔɔlɩ mba pacaɣaɣ lɩm Bibl wɩlɩtʋ taa se tɩla nɔɔ kʋɖʋmaɣ nɛ pɔ-sɔnzɩ yɔ, pɔ-tɔm. (Maarkɩ 7:9-13) Ye mbʋ, pɩwɛɛ se Krɩstʋ wayɩ tɩŋɩyaa toovenim ñɩma tisuu ɛla nɔɔ kʋɖʋmaɣ ɖeyi ɖeyi nɛ tɔm ndʋ Bibl wɩlɩɣ yɔ. Pɩwɛɣ ɖeu se paa Krɩstʋ tʋ weyi lɛ, ɛpɔzɩ ɛ-tɩ tɔm tʋnɛ: ‘Tɔm ndʋ mɛ-Ɛsɔ sɛtʋ ɛgbɛyɛ wɩlɩɣ yɔ, tɩlakɩ nɔɔ kʋɖʋmaɣ ɖeyi ɖeyi nɛ Bibl wɩlɩtʋ na?’ Pɩsa nɛ ŋcosi ña-tɩ tɔm ndʋ lɛ, pɩwɛɣ ɖeu se ŋkpaɣ ndʋ ñɛ-Ɛsɔ sɛtʋ ɛgbɛyɛ wɩlɩɣ yɔ nɛ ŋmaɣzɩnɩ ndʋ Bibl wɩlɩɣ ɖeyi ɖeyi yɔ.

Yesu tɔm se pɩwɛɛ se ɖɛ-Ɛsɔ sɛtʋ ɛla nɔɔ kʋɖʋmaɣ nɛ toovenim tɔm ndʋ tɩwɛ Bibl taa yɔ. (Yohanɛɛsɩ 4:24; 17:17) Apostoloo Pɔɔlɩ yɔɔdaa se pʋcɔ nɛ ɖihiɣ ñʋʋ yabʋ lɛ, pɩwɛɛ se ɖɩtɩlɩ “tʋtʋyɛ tɔm” yaa ɖɩtɩlɩ Bibl taa toovenim. (1 Timootee 2:4) Pɩwɩlɩɣ se, pɩcɛyɩ siŋŋ se tisuu mbʋ ɖɩwɛna yɔ, pɩla nɔɔ kʋɖʋmaɣ ɖeyi ɖeyi nɛ toovenim tɔm ndʋ tɩwɛ Bibl taa yɔ. Mbʋ kaɣnɩ ɖa-ñʋʋ yabʋ!

ƐZƖMA ÐƖPƖZƖƔ NƐ ÐƖKPAƔ TISUU MBƲ ÐƖWƐNA YƆ, NƐ ÐƖMAƔZƖNƖ NDƲ BIBL WƖLƖƔ YƆ?

Kalɩ tɔm pɔzʋʋ loɖo mbʋ pɩkɔŋ yɔ, nɛ ŋna ɛzɩma Bibl cosuu tɔm pɔzʋʋ mbʋ pɩ-yɔɔ yɔ. Kuli ñe-Bibl nɛ ŋkalɩ hɔɔlɩŋ weyi palabɩnɩ tʋmɩyɛ yɔ nɛ ŋmaɣzɩ tɔm cosuu mbʋ pɩ-yɔɔ camɩyɛ. Pʋwayɩ lɛ, ŋpɔzɩ ña-tɩ se: ‘Mankpaɣʋ mɛ-Ɛsɔ sɛtʋ ɛgbɛyɛ wɩlɩtʋ nɛ mamaɣzɩnɩ Bibl wɩlɩtʋ yɔ, ɛbɛ pɩwɩlɩɣ?’

Tɔm pɔzʋʋ pʋnɛ pɩpɩzɩɣ nɛ pɩsɩnɩ-ŋ nɛ ŋna se tisuu mbʋ ŋwɛna yɔ pɩlabɩ nɔɔ kʋɖʋmaɣ nɛ Bibl wɩlɩtʋ na? Pɩtasɩnɩ hɔɔlɩŋ weyi pɔyɔɔdɩ ɩ-tɔm tɔm pɔzʋʋ pʋnɛ pɩ-taa yɔ lɛ, ŋsɔɔlaa ɖɔɖɔ se ŋkpaɣ tɔm ndʋ ñɛ-Ɛsɔ sɛtʋ ɛgbɛyɛ wɩlɩɣ hɔɔlɩŋ lɛɛŋ taa yɔ nɛ ŋmaɣzɩnɩ tɔm ndʋ Bibl wɩlɩɣ hɔɔlɩŋ ɛnɩ ɩ-taa yɔ? Pɩkɛdɩɣnɩ Yehowa Aseɣɖe Tɩnaa se ña nɛ wɛ ɩtazɩ toovenim tɔm ndʋ Bibl wɩlɩɣ yɔ, tɩ-taa. Pɩɩwɛɣ ɖeu se ŋyele nɛ Yehowa Aseɣɖe Tʋ nɔɔyʋ kɔɔ nɛ ña nɛ ɩ ɩkpɛlɩkɩ Bibl? Ŋŋkaɣ pʋyʋ hɛyʋʋ pʋcɔ nɛ pɛkpɛlɩkɩnɩ-ŋ. Ŋpɩzɩɣ ɖɔɖɔ nɛ ŋwolo ɖɛ-tɛ intɛrnɛɛtɩ lone jw.org yɔɔ.

1 TƆM PƆZƲƲ: Akɛ Ɛsɔ toovenim tʋ?

TƆM COSUU: Yehowa, Yesu Caa kɛnɩ tamtam Ɛsɔ nɛ Ðoŋ Tɩŋa Tʋ weyi ɛlɩzɩ wondu tɩŋa payɩ yɔ.

NDƲ BIBL WƖLƖƔ YƆ:

“Ðiiyeki sɛʋ Ɛsɔ, ɖa-Kɩbaɣlʋ Yesu Krɩstʋ Caa, nɛ ɖɩmaɣzɩɣ mɩ-yɔɔ ɖa-adɩma taa.”—Koloosi 1:3.

“Ŋŋheyi Izrayɛɛlɩ piya se Yahve [yaa Yehowa] . . . mɩ-caanaa tɛ Ɛsɔ, Abraham tɛ Ɛsɔ, Izaakɩ tɛ Ɛsɔ, Yakɔɔb tɛ Ɛsɔ tiyini-m mɩ-cɔlɔ; ma-hɩɖɛ lɛ mbʋ tam, nɖɩ pakaɣ-m yaʋ pɩnzɩ nɛ pɩnzɩ.”—Egipiti Lɩʋ 3:15.

Kalɩ ɖɔɖɔ Natʋ 4:11, Roma 10:13; 1 Timootee 1:17.

2 TƆM PƆZƲƲ: Anɩ Yesu Krɩstʋ kɛnaa?

TƆM COSUU: Yesu kɛnɩ Ɛsɔ Pɩyalʋ kajalaɣ ñɩnʋ. Palɩzɩ Yesu ɖɔɖɔ ɛzɩ wondu lɛɛtʋ yɔ. Ye mbʋ, ɛwɛnɩ ɖɩbazɩyɛ. Yesu luzuu ɛ-tɩ Ɛsɔ tɛɛ nɛ ɛlakɩ ɛ-sɔɔlɩm.

NDƲ BIBL WƖLƖƔ YƆ:

“Caa kɩlɩ-m.”—Yohanɛɛsɩ 14:28.

“[Yesu] kɛ Ɛsɔ weyi paanaɣ-ɩ yɔ ɛ-lɛzʋʋ, weyi palʋlɩ-ɩ kɔɔnɔɔ tʋ wondu kɩlɩzɩtʋ kpeekpe taa yɔ.”—Koloosi 1:15.

Kalɩ ɖɔɖɔ Maatiyee 26:39; 1 Kɔrɛntɩ 15:28.

3 TƆM PƆZƲƲ: Ɛbɛ fezuu kiɖeɖeu kɛnaa?

TƆM COSUU: Fezuu kiɖeɖeu kɛnɩ ɖoŋ weyi Ɛsɔ lakɩnɩ tʋmɩyɛ se ɛ-sɔɔlɩm ɛla yɔ. Kɩtɩkɛ ɛyʋ. Nabʋyʋ taa, Ɛsɔ haɣ ɛyaa e-fezuu kiɖeɖeu se pehiɣ ɖoŋ.

NDƲ BIBL WƖLƖƔ YƆ:

“Nɛ ɛlɛ tɩɩnɩ Maarɩɩ sɛtʋ ndʋ lɛ, ɛ-pɩɣa sʋʋ mɛyʋʋ yɔɔ e-lotu taa nɛ [fezuu kiɖeɖeu] su Elizaabɛɛtɩ taa ɖo.”—Luka 1:41.

“Ɛlɛ, ɩkaɣ mʋʋ [fezuu kiɖeɖeu] ɖoŋ, kɩkaɣ mɩ-yɔɔ tibu nɛ ɩkɛ ma-aseɣɖe tɩnaa Yerusalɛm, Yudee tɩŋa taa, Samaarɩɩ nɛ puwolo pɩtalɩ tɛtʋ kamaɣ yɔɔ.”—Tʋma Labʋ 1:8.

Kalɩ ɖɔɖɔ Kiɖe Tɛɛ Tɔm 1:2; Tʋma Labʋ 2:1-4; 10:38.

4 TƆM PƆZƲƲ: Ɛbɛ Ɛsɔ Kewiyaɣ kɛnaa?

TƆM COSUU: Ɛsɔ Kewiyaɣ kɛnɩ komina ŋgʋ kɩwɛ ɛsɔdaa yɔ. Yesu kɛnɩnɩ Ɛsɔ Kewiyaɣ Wiyaʋ. Pɩzaɣ pazɩ lɛ, Kewiyaɣ ŋga, kakaɣ yebu nɛ Ɛsɔ sɔɔlɩm la tɛtʋ yɔɔ paa le.

NDƲ BIBL WƖLƖƔ YƆ:

“Tiyiyu lʋbɛ tʋ hʋlɩ. Ðɩnɛ ɛlɛ nɔsɩ ma kubusi ɛsɔdaa se: ‘Ða-Kɩbaɣlʋ nɛ ɛ-tɛ Krɩstʋ patɩna ɛjaɖɛ kewiyaɣ, ɛkaɣ kewiyaɣ tɔɔʋ pɩnzɩ nɛ pɩnzɩ.’”—Natʋ 11:15.

Kalɩ ɖɔɖɔ Danɩyɛɛlɩ 2:44; Maatiyee 6:9, 10.

5 TƆM PƆZƲƲ: Ɛyaa kɩbama tɩŋa kpaɣ ɛsɔdaa?

TƆM COSUU: Aayɩ. Ɛyaa siɣsiɣ ñɩma cabɩ mba payaɣ se ‘mba patɩɖɔɔ yɔ’ yaa ewiɖe cikpeɖe yɔ, mba Ɛsɔ lɩzaa se pakpa ɛsɔdaa. Pa nɛ Yesu pakaɣ kɛʋ awiya kedeŋa kpeekpe yɔɔ.

NDƲ BIBL WƖLƖƔ YƆ:

“Sɔɔndʋ ɛtaakpa-mɩ [mba mɩ ɩtɩɖɔɔ yɔ; ABT], mbʋ pʋyɔɔ yɔ mɩ-Caa nawa se pɩwɛ ɖeu se ɛcɛlɩ-mɩ kewiyaɣ.”—Luka 12:32.

“Koboyaɣ tʋ nɛ kiɖeɖeu lɛ weyi ɛfa kajalaɣ femtu yɔ! Sɩm nabʋlɛ mbʋ fɛyɩ ɖoŋ pɔ-yɔɔ, ɛlɛ pakaɣ kɛʋ Ɛsɔ nɛ Krɩstʋ pa-layaa, weyi pa nɛ ɩ pakaɣ tɔɔʋ kewiyaɣ pɩnzɩ ɛgbɔʋ yɔ.”—Natʋ 20:6.

Kalɩ ɖɔɖɔ Natʋ 14:1, 3.

6 TƆM PƆZƲƲ: Tamaɣ ŋga Ɛsɔ labɩ pɩlɩɩnɩ tɛtʋ yɔɔ?

TƆM COSUU: Ɛsɔ Kewiyaɣ kaɣ yebu nɛ tɛtʋ kpeekpe pɩsɩ paradisuu nɛ ɛyaa mba pɛwɛ siɣsiɣ yɔ, pɛwɛɛ tɩ-yɔɔ laŋhɛzɩyɛ taa tam nɛ pɛwɛɛnɩ tomnaɣ taa kpeetaɣ ŋga katalɩ pilim yɔ.

NDƲ BIBL WƖLƖƔ YƆ:

Ðɛfɛɛ tɩnaa hikiɣ tɛtʋ nɛ pɛwɛɛ tam tam ɖɩhɛzɩyɛ taa.”—Keɣsi 36:10, 11.

“Ɛkaɣ hɩzʋʋ pɛ-ɛzɩdaa ɛzɩtɛɣlɩm kpeekpe, nɛ sɩm ɛɛtasɩɣ wɛʋ; nɛ paatasɩɣ wiu, paatasɩɣ kubusi mabʋ, kʋñɔŋ ɛɛtasɩɣ wɛʋ, mbʋ yɔ ɛjaɖɛ kɩbɩnɖɛ ɖɛwa.”—Natʋ 21:3, 4.

Kalɩ ɖɔɖɔ Keɣsi 36:29; 2 Pɩyɛɛrɩ 3:13.