Ŋpɩzɩɣ nɛ ŋwɛɛ laŋhɛzɩyɛ taa paa yoŋ ɩwɛɛ yɔ
Gary kaakɛ sɔɔja, ɛyɔɔdaa se: «Pʋcɔ nɛ mɛnkpɛlɩkɩɣ Bibl lɛ, mantaatɩlɩ mbʋ pʋyɔɔ kañatʋ lakasɩ, mulum nɛ ñam ñam lakasɩ kaawɛ ɛjaɖɛ yɔɔ yɔ. Ɛlɛ lɛɛlɛɛyɔ lɛ, mɛwɛnɩ maɣzɩm taa laŋhɛzɩyɛ. Manawa se Yehowa Ɛsɔ kaɣ yebu nɛ laŋhɛzɩyɛ wɛɛ tɛtʋ yɔɔ.»
Pɩtɩkɛ Gary ɖeke wɛnɩ wɛtʋ ndʋ tɩ-taa. Iyele nɛ ɖɩna ɛzɩma Bibl sɩnɩ ɛyaa lalaa yɔ.
BIBL YƆƆDƲƲ SE: «Oo Yehowa, ŋwɛ ɖeu nɛ ŋsɔɔlɩ kpeɣu.»—Keɣa 86:5.
ƐZƖMA TƆM TƲNƐ TƖWAZƖƔ-ÐƲ?: «Mayaɣ kanɛ keyeba nɛ man-taa tɛ se Yehowa kɛ pʋtɔdɩyɛ nayʋ. Manawa se ɛsɔɔlaa se ekpeɣ-m mbʋ payɩ malaba alɩwaatʋ ndʋ malabɩ you yɔ.»—Wilmar, Kolombii.
BIBL YƆƆDƲƲ SE: «Menɖiɣni lɩzʋʋ ɛsɔdaa kɩfalʋʋ nɛ tɛtʋ kɩfatʋ; nɛ paakaɣ tɔzʋʋ mbʋ pɩɖɛwa yɔ pɩ-yɔɔ, nɛ pɩɩkaɣ ɖɔɖɔ tasʋʋ kpaʋ laŋɩyɛ taa.»—Izaayii 65:17.
ƐZƖMA TƆM TƲNƐ TƖWAZƖƔ-ÐƲ?: «Mbʋ mana you taa yɔ, piyeba nɛ mɛwɛɛnɩ maɣzɩm taa kʋdɔŋ. Ɛlɛ mayaɣ kanɛ kɔtɔzʋʋ-m se piileɖiɣ lɛ, Yehowa kaɣ yebu nɛ mɔnsɔɔ mbʋ mana you taa nɛ mɔntɔzʋʋ pɩ-yɔɔ yɔ pɩ-yɔɔ. Pɩɩkaɣ tasʋʋ kpaʋ ma-maɣzɩm yaa ma-laŋɩyɛ taa. Pɩkɛnɩ kʋjɔʋ kɩbaŋʋ kpem.»—Zafirah, Etaazuunii.
BIBL YƆƆDƲƲ SE: «Ɛ-kɩyakɩŋ taa lɛ, ɛyaa siɣsiɣ tɩnaa kaɣ nɛɣdʋʋ, nɛ laŋhɛzɩyɛ kaɣ tɔyʋʋ nɛ pɩkɔɔ nɛ pɩsɩɩnɩ alɩwaatʋ ndʋ fenaɣ ɛɛtasɩɣ wɛʋ yɔ.»—Keɣa 72:7.
ƐZƖMA TƆM TƲNƐ TƖWAZƖƔ-ÐƲ?: «Mamaɣzɩɣ mayaɣ ŋga kɔ-yɔɔ ɖoŋ ɖoŋ. Piileɖiɣ lɛ, lakasɩ kɩdɛkɛdɩsɩ nzɩ mana you taa nɛ mɔntɔzʋʋ sɩ-yɔɔ yɔ maakaɣ tasʋʋ sɩ-yɔɔ tɔzʋʋ. Nɛ ɖɩɩkaɣ tasʋʋ seu sɔɔndʋ se nabʋyʋ kaatalɩ ɖɛ-ɛyaa kʋsɔɔlaa.»—Oleksandra, Ukrɛɛnɩ.
BIBL YƆƆDƲƲ SE: «Ña-sɩɖaa kaɣ caɣʋ wezuu. . . . Ife nɛ ɩma kubusi nɛ taa leleŋ, mɩ mba ɩwɛ mʋzʋʋ taa yɔ!»—Izaayii 26:19.
ƐZƖMA TƆM TƲNƐ TƖWAZƖƔ-ÐƲ?: «Pakʋ mɔ-hɔʋ taa mba sakɩyɛ alɩwaatʋ ndʋ kʋnʋŋ nakʋyʋ taa mba ñɩnaɣ se paɖɩzɩ Tutsi mba yɔ. Ɛlɛ mayaɣ kanɛ keyeba nɛ man-taa tɛ se mankaɣ-wɛ tasʋʋ naʋ. Manɖaŋ kpam se manɩɩ pɔ-nɔsɩ alɩwaatʋ ndʋ pakaɣ-wɛ fezuu yɔ.»—Marie, Ruwandaa.
BIBL YƆƆDƲƲ SE: «Pɩkazɩ alɩwaatʋ pazɩ yem, kañatʋ tɩnaa ɩɩkaɣ tasʋʋ wɛʋ . . . Ɛlɛ tɛtʋ kaɣ pɩsʋʋ hɛɛɛ tɩnaa ñɩm, nɛ pa-taa kaɣ labʋ leleŋ siŋŋ, mbʋ pʋyɔɔ yɔ laŋhɛzɩyɛ tɔyʋʋ.»—Keɣa 37:10, 11.
ƐZƖMA TƆM TƲNƐ TƖWAZƖƔ-ÐƲ? «Paa you ɛtɛma yɔ, mulum lakasɩ nɛ ɛyaa kɩdɛkɛdaa pɛkpɛndɩ pɛwɛɛ. Masɩ sɩnɛ sɩkpazɩ-m ɖoŋ siŋŋ. Yehowa naɣ pɩtɩŋa nɛ ɛnɩɣ wɛtʋ ndʋ tɩ-taa mɛwɛɛ yɔ tɩ-taa. Ɛlabɩ tamaɣ se pɩkazɩ pazɩ lɛ, kʋñɔmɩŋ tɩŋa kaɣ sɩʋ tɩnaɣ nɛ ɖɩɩkaɣ tasʋʋ tɔzʋʋ ɩ-yɔɔ.»—Daler, Tajikisɩtaŋ.
Ɛyaa mba pɔ-tɔm ɖɩyɔɔdɩ takayaɣ kanɛ ka-taa yɔ, pɛwɛ Yehowa Aseɣɖe Tɩnaa miiliyɔɔwaa mba Bibl sɩnaa nɛ pɛwɛɛ laŋhɛzɩyɛ taa yɔ pa-taa. Pɛkpɛlɩkɩ ɛzɩma papɩzɩɣ nɛ pawa paɖɩyɛ nɖɩ ɖɩwɛ ɛyaa mba patɩkpɛndɩ tomnaɣ tɔlɩm, ɛjaɖɛ yaa kʋnʋŋ yɔ pɛ-hɛkʋ taa yɔ. (Efɛɛzɩ mba 4:31, 32) Yehowa Aseɣɖe Tɩnaa ɩɩɖʋʋ pɔ-nɔsɩ politiki tɔm taa nɛ paalakɩ puuyaɣ lakasɩ.—Yohanɛɛsɩ 18:36.
Yehowa Aseɣɖe Tɩnaa sɩɣnɩ ɖama ɖɔɖɔ nɛ sɔɔlɩm ɛzɩ hɔʋ kʋɖʋmʋʋ taa mba yɔ. (Yohanɛɛsɩ 13:35) Koobu halɩñɩnʋ Oleksandra weyi ɛ-tɔm ɖɩyɔɔdaa nɛ pɩɖɛɛ yɔ, you yɔɔ lɛ, pɩɩpɔzaa se ɛ nɛ e-neu halɩñɩnʋ pese nɛ powolo ɛjaɖɛ lɛɛɖɛ taa. Ɛyɔɔdaa se: «Ðɩtɛzɩ kamaɣ lɛ, ɖɩcaŋ ɖɩna ɛjaɖɛ nɖɩ ɖɩ-taa koobiya, pɔkɔma se pamʋ-ɖʋ. Pasɩnɩ-ɖʋ nɛ ɛjaɖɛ kɩfaɖɛ nɖɩ ɖɩ-taa wezuu caɣʋ malɩnɩ-ɖʋ.»
Yehowa Aseɣɖe Tɩnaa yaɣ-ŋ nɛ taa leleŋ se ŋwolo pe-kediɣzisi, peeɖe pɛkpɛlɩkɩɣ laŋhɛzɩyɛ tɔm ndʋ tɩwɛ Bibl taa yɔ tɩ-tɔm nɛ ɛzɩma papɩzɩɣ nɛ pɔɖɔ tɩ-yɔɔ yɔ. Wolo jw.org yɔɔ nɛ ŋñɩnɩ kediɣzaɣ lone nɖɩ ɖɩñɔtɩnɩ-ŋ nɛ pɩkɩlɩ yɔ yaa ŋpɔzɩ se Yehowa Aseɣɖe Tʋ nɔɔyʋ ɛtɩŋnɩ Nɩɩ wezuu leleŋ tam! takayaɣ yɔɔ nɛ ɛkpɛlɩkɩnɩ-ŋ Bibl.