Taalesi ña-taa leleŋ alɩwaatʋ ndʋ ŋcɔŋnɩ akpadɩyʋ yaa kʋdɔndʋ nɔɔyʋ yɔɔ yɔ

1-2. Suwe Yehowa maɣzɩɣ mba pɔcɔŋnɩ akpadɩyʋ yaa kʋdɔndʋ nɔɔyʋ yɔɔ yɔ pɔ-yɔɔ? (Aduwa 19:17) (Cɔnɩ ɖɔɖɔ kɩlɛmɩŋ.)

PAYAƔ Kooree ɛjaɖɛ taa koobu abalɩñɩnʋ nɔɔyʋ se Jin-yeol. Ɛyɔɔdaa se: «Ma nɛ ma-halʋ ɖɩɖɔkʋʋ nesi yɔ pɩcɛzɩɣ pɩnzɩ 32 yɔ. Pɩnzɩ 5 nzɩ sɩɖɛwa yɔ sɩ-taa, mɛwɛna nɛ mɔncɔŋnɩ ɛ-yɔɔ. Ɛwɛnɩ kʋdɔŋ ŋgʋ payaɣ se maladie de Parkinson yɔ, nɛ pɩwɛ-ɩ kaɖɛ se eciɣdiɣ e-tomnaɣ pilinzi. Mɔnsɔɔlɩ ma-halʋ nɛ mɛhɛndɩɣnɩ-ɩ, nɛ mɔnsɔɔlaa se mɔncɔnɩ ɛ-yɔɔ. Kaɖʋ ŋgʋ kɩ-yɔɔ ɛhɩnɩɣ yɔ kɩwɛ ŋgee, paa ɖoo wena lɛ mahɩnɩɣ ɛ-cɔlɔ nɛ ɖɩɖɔkɩ ɖama nesi.»

² Ŋwɛɛ nɛ ŋcɔŋnɩ akpadɩyʋ yaa kʋdɔndʋ nɔɔyʋ yɔɔ? Pɩpɩzɩɣ nɛ pɩkɛ ña-lʋlɩyʋ nɔɔyʋ, ñɛ-tɛŋga, ña-pɩɣa yaa ña-taabalʋ nɔɔyʋ. Ye mbʋ yɔ, pɩtʋʋ fɛyɩ se ña-taa wɛ leleŋ se ŋwɛɛ nɛ ŋcɔŋnɩ ɛ-yɔɔ, mbʋ pʋyɔɔ yɔ ŋsɔɔlɩ-ɩ. Nɛ ŋwɛɛ nɛ ŋlakɩ mbʋ ɖɔɖɔ mbʋ pʋyɔɔ yɔ ŋsɔɔlɩ Yehowa. (1 Tim. 5:​4, 8; Yak. 1:27) Paa mbʋ yɔ, ŋkatɩɣ kala wena ɖoŋ ɖoŋ lɛ ɛyaa lalaa ɩɩnaɣ yɔ. Nabʋyʋ taa, pɩpɩzɩɣ nɛ pɩlabɩ-ŋ ɛzɩ nɔɔyʋ ɛɛnaɣ kʋñɔŋ ŋgʋ ŋwɛɛ nɛ ŋlakɩ yɔ. Pɩtɩla, ɛyaa ɛsɩndaa lɛ ŋwoŋuu, ɛlɛ ŋwɛɣ ñe-ɖeke lɛ ŋtisiɣ ɛsɩtɛɣlɩm. (Keɣ. 6:6) Paa ɛyaa lalaa ɩɩnaɣ kʋñɔŋ ŋgʋ ŋwɛɛ nɛ ŋlakɩ yɔ, paa ɛzɩmtaa lɛ Yehowa ñanaɣ nɛ ɛnɩɣ ɛzɩma pɩlakɩ-ŋ yɔ pɩ-taa. (Kpaɣ-tʋ nɛ ŋmaɣzɩnɩ Ejipiti Lɩʋ 3:7.) Ɛsɩtɛɣlɩm mbʋ ŋtisiɣ yɔ nɛ kɩlaŋ weyi ŋlaɣ yɔ ɩmʋ ñɩm ɛ-ɛsɩndaa. (Keɣ. 56:8; 126:5) Ɛnaɣ mbʋ payɩ ŋlakɩ nɛ ŋsɩɣnɩ ñɛ-ɛyʋ kʋsɔɔlʋ ɛnʋ yɔ. Mbʋ ŋlakɩ nɛ ŋcɔŋnɩ ñɛ-ɛyʋ kʋsɔɔlʋ ɛnʋ ɛ-yɔɔ yɔ, Yehowa kpakɩɣ-pʋ se kɩmɩyɛ ɛtɔɔ-ŋ nɛ ɛlabɩ tamaɣ se ɛkaɣ-ŋ ɖɩ hɛyʋʋ.—Kalɩ Aduwa 19:17.

3. Alɩwaatʋ ndʋ Abraham nɛ Saara pɔcɔŋnaɣ Teera yɔɔ yɔ, pɩtɩla kala wena paakataa?

³ Bibl taa kɛdɛsɩ sakɩyɛ yɔɔdʋʋ ɛyaa mba paacɔnɩ akpadɩyʋ yaa kʋdɔndʋ nɔɔyʋ yɔɔ yɔ pɔ-tɔm. Iyele nɛ ɖɩna Abraham nɛ Saara pa-kɩɖaʋ. Alɩwaatʋ ndʋ pakʋyɩ Uuri tɛtʋ taa yɔ, pɛkpɛndɩnɩ pa-caa Teera, nɛ ɛlɛ kaawɛnɩ ɛzɩ pɩnzɩ 200 mbʋ yɔ. Paaɖɔm nʋmɔʋ ɛzɩ kilomɛtanaa 960 mbʋ yɔ nɛ powolo Haraanɩ tɛtʋ taa. (Kiɖe 11:​31, 32) Pɩtʋʋ fɛyɩ se Abraham nɛ Saara paasɔɔlɩ Teera, ɛlɛ pɩtaawɛɛ-wɛ kɛlɛʋ se pɔcɔnɩ ɛ-yɔɔ kɔzɩ kɔzɩ alɩwaatʋ ndʋ pɔɖɔŋaɣ nʋmɔʋ yɔ. Pɩtɩla aɖaaɖaanaa yaa kpaŋasɩ yɔɔ paacaɣaa nɛ pɔɖɔ nʋmɔʋ. Nɛ pɩtɩla pɩɩlabɩ Teera kaɖɛ siŋŋ se ɛcaɣ kpɩna ana a-yɔɔ nɛ ɛɖɔ nʋmɔʋ alɩwaatʋ sakɩyɛ. Pɩtɩla ɖɔɖɔ, alɩwaatʋ natʋyʋ pɩnɩɣaɣ Abraham nɛ Saara siŋŋ. Paa pɩtɩɩkɛ suwe yɔ, pɩtʋʋ fɛyɩ se Yehowa ha-wɛ ɖoŋ weyi pɩpɔzaɣ-wɛ yɔ. Ɛzɩ Yehowa kaasɩnʋʋ-wɛ yɔ, ɛkaɣ-ŋ sɩnʋʋ nɛ ɛkpazɩ-ŋ ɖoŋ ɖɔɖɔ nɛ ŋwolo pɩ-yɔɔ nɛ ŋcɔnɩ ñɛ-ɛyʋ weyi ɛkpadɩyaa yaa pɩwɩɣ-ɩ yɔ ɛ-yɔɔ.—Keɣ. 55:22.

4. Ɛbɛ ɖɩkaɣ naʋ tɔm ñʋʋ kʋnɛ kɩ-taa?

⁴ Ye ŋwɛ taa leleŋ taa yɔ, pɩkaɣ-ŋ wɛʋ kɛlɛʋ se ŋcɔŋnɩ ñɛ-ɛyʋ kʋsɔɔlʋ weyi ɛkpadɩyaa yaa pɩwɩɣ-ɩ yɔ ɛ-yɔɔ. (Adu. 15:13) Ɛyʋ weyi ɛwɛ taa leleŋ taa yɔ, ɛpɩzɩɣ nɛ ewolo pɩ-yɔɔ nɛ ehiɣ taa leleŋ paa ɛkatɩɣ kala yɔ. (Yak. 1:​2, 3) Ɛbɛ pɩzɩɣ pɩsɩnɩ-ŋ nɛ ŋtaalesi ña-taa leleŋ? Mbʋ pɩpɩzɩɣ pɩsɩnɩ-ŋ yɔ pɩ-taa nabʋyʋ lɛ se ŋtɩmɩɣnɩ Yehowa se ɛsɩnɩ-ŋ nɛ ŋwɛɛnɩ lɩmaɣza kɩbana. Ŋpɩzɩɣ ɖɔɖɔ nɛ ŋtasɩ nabʋyʋ labʋ nɛ pɩsɩnɩ-ŋ nɛ ŋwɛɛ taa leleŋ taa. Ðɩkaɣ pɩ-taa nabʋyʋ tɔm yɔɔdʋʋ tɔm ñʋʋ kʋnɛ kɩ-taa. Ðɩkaɣ naʋ ɖɔɖɔ mbʋ ɛyaa lalaa pɩzɩɣ pala nɛ pasɩnɩ-ŋ yɔ. Ɛlɛ kajalaɣ lɛ, iyele nɛ ɖɩna mbʋ pʋyɔɔ pɩwɛɛ se mba pɔcɔŋnɩ akpadɩyaa yaa kʋdɔndɩnaa yɔɔ yɔ powolo pɩ-yɔɔ nɛ pɛwɛɛ taa leleŋ taa yɔ, nɛ mbʋ pɩpɩzɩɣ piyele nɛ pelesi pa-taa leleŋ yɔ.

MBƲ PƖPƖZƖƔ PIYELE NƐ WEYI ƐCƆŊNƖ AKPADƖYƲ YAA KƲDƆNDƲ YƆƆ YƆ ELESI Ɛ-TAA LELEŊ YƆ

5. Ɛbɛ yɔɔ pɩcɛyaa se mba pɔcɔŋnɩ akpadɩyaa yaa kʋdɔndɩnaa yɔɔ yɔ, pɛwɛɛ taa leleŋ taa?

⁵ Ye mba pɔcɔŋnɩ akpadɩyaa yaa kʋdɔndɩnaa yɔɔ yɔ pelesi pa-taa leleŋ yɔ, pɩpɩzɩɣ nɛ pɩnɩɩ-wɛ nɛ paatasɩɣ wɛnʋʋ ɖoŋ se powolo pɩ-yɔɔ nɛ pala pa-tʋmɩyɛ camɩyɛ. (Adu. 24:10) Nɛ ye pɩnɩ-wɛ yɔ, pɩtɩla paatasɩɣ pɩzʋʋ nɛ pala camɩyɛ lakasɩ mba pɔ-yɔɔ pɔcɔŋna yɔ yaa paacɔŋnɩ pɔ-yɔɔ ɛzɩ pɩpɔzʋʋ yɔ. Kala wena pɩzɩɣ ayele nɛ mba pɔcɔŋnɩ akpadɩyaa yaa kʋdɔndɩnaa yɔɔ yɔ pelesi pa-taa leleŋ?

6. Mba pɔcɔŋnɩ akpadɩyaa yaa kʋdɔndɩnaa yɔɔ yɔ, nabʋyʋ taa ɛbɛ yɔɔ pɩnɩɣ-wɛ siŋŋ?

⁶ Mba pɔcɔŋnɩ akpadɩyaa yaa kʋdɔndɩnaa yɔɔ yɔ, nabʋyʋ taa pɩnɩɣ-wɛ siŋŋ. Payaɣ koobu halɩñɩnʋ nɔɔyʋ se Leah, ɛyɔɔdaa se: «Ðoŋ ɖoŋ lɛ, paa mankʋyɩ camɩyɛ yɔ, evemiye kaatɛŋ lɛ mɛwɛ nɩɣzɛ taa, nɛ maatasɩɣ wɛnʋʋ ɖoŋ se mala nabʋyʋ. Halɩ nabʋyʋ taa, maapɩzɩɣ maɣzʋʋ camɩyɛ se manpɩzɩ nɛ moncosi message nakʋyʋ yɔɔ.» Lalaa lɛ, pɩwɛ-wɛ kaɖɛ se pehiɣ alɩwaatʋ nɛ poɖoo camɩyɛ yaa pɛhɛzɩ ɛzɩ pɩpɔzʋʋ yɔ. Payaɣ koobu halɩñɩnʋ nɔɔyʋ se Inés, ɛyɔɔdaa se: «Maapɩzɩɣ nɛ monɖou camɩyɛ. Paa ɖoo wena, pɩpɔzʋʋ se mankʋyʋʋ paa ñɩɣtʋ 2 ndʋ lɛ tɩ-wayɩ nɛ mɔncɔŋnɩ ma-waŋ yɔɔ. Nɛ pɩlakɩ pɩnzɩ sakɩyɛ yɔ, ma nɛ ma-walʋ ɖɩtɩpɩzɩ nɛ ɖɩmʋ hɛzʋʋ nɛ ɖiwolo ɖoli.» Halɩ nabɛyɛ lɛ, paapɩzɩɣ nɛ pakpaɣ alɩwaatʋ nɛ pa nɛ pa-taabalaa palɩɩ nɛ pamʋ helim, yaa paapɩzɩɣ nɛ pala teokrasɩ tʋma naayɛ mbʋ pʋyɔɔ yɔ pɩpɔzʋʋ se pɛwɛɛ pɛ-ɛyaa kʋsɔɔlaa mba pakpadɩyaa yaa pɩwɩɣ-wɛ yɔ pɔ-cɔlɔ alɩwaatʋ kpeekpe nɛ pɔcɔŋnɩ pɔ-yɔɔ. Piyeba nɛ nabʋyʋ taa pɩlakɩ-wɛ ɛzɩ pɛwɛ pe-ɖeke yɔ, nɛ pɛwɛɣ laŋwɛɛkɩyɛ taa mbʋ pʋyɔɔ yɔ paapɩzɩɣ nɛ pala mbʋ payɩ pɔsɔɔlaa yɔ.

7. Mba pɔcɔŋnɩ akpadɩyaa yaa kʋdɔndɩnaa yɔɔ yɔ, nabʋyʋ taa, ɛbɛ yɔɔ pakʋʋ pa-tɩ tɔm yaa pɛwɛɣ laŋwɛɛkɩyɛ taa?

⁷ Mba pɔcɔŋnɩ akpadɩyaa yaa kʋdɔndɩnaa yɔɔ yɔ, nabʋyʋ taa palakɩ-wɛ ɛzɩ paalakɩ pa-tʋmɩyɛ camɩyɛ yɔ, yaa pɛwɛɣ laŋwɛɛkɩyɛ taa. Payaɣ koobu halɩñɩnʋ nɔɔyʋ se Jessica, ɛyɔɔdaa se: «Mɛwɛɛ nɛ malʋkɩnɩ kala wena ma-maɣmaɣ mankatɩɣ yɔ. Nɛ alɩwaatʋ ndʋ mañɩnɩɣ se mɛhɛzɩ pazɩ yɔ, pɩlakɩ-m ɛzɩ mɛwɛnɩ piɖeni men-ɖeke lakasɩ yɔ.» Nabɛyɛ lɛ, panɩɣzɩɣ mbʋ pʋyɔɔ yɔ pɩlakɩ-wɛ ɛzɩ paalakɩ sakɩyɛ se pɔcɔnɩ pɛ-ɛyaa kʋsɔɔlaa yɔɔ yɔ. Yaa nabʋyʋ taa, pɩlakɩ-wɛ ɛzɩ paakaɣ pɩzʋʋ nɛ powolo pɩ-yɔɔ nɛ pɔcɔŋnɩ ɛyaa mba pɔ-yɔɔ yɔ. Yaa pɩtɩla yɔ, alɩwaatʋ natʋyʋ pɩnɩ-wɛ nɛ pɔyɔɔdɩ tɔm natʋyʋ yaa pala nabʋyʋ nɛ pɩcɛyɩ mba pɔ-yɔɔ pɔcɔŋna yɔ. Pɩtɩŋa mbʋ yɔ, pɩpɩzɩɣ piyele nɛ pakʋʋ pa-tɩ tɔm. (Yak. 3:2) Nabɛyɛ ɖɔɖɔ lɛ, pɛwɛɣ laŋwɛɛkɩyɛ taa alɩwaatʋ ndʋ panaɣ ɛzɩma ɛyʋ weyi ɛ-yɔɔ pɛwɛɛ nɛ pɔcɔŋna yɔ e-ɖoŋ wɛɛ nɛ ɩtɛŋ yaa ɛ-kʋdɔŋ wɛɛ nɛ kɩtɛzɩɣ kpaʋ ɖoŋ yɔ. Payaɣ koobu halɩñɩnʋ nɔɔyʋ se Barbara, ɛyɔɔdaa se: «Pɩwɛ-m kaɖɛ se manaɣ ɛzɩma ɛyʋ weyi mɔnsɔɔlɩ-ɩ yɔ e-ɖoŋ wɛɛ nɛ ɩtɛŋ paa evemiye nɖɩ yɔ.»

8. Ɛzɩma pɩlabɩ ɛyaa nabɛyɛ alɩwaatʋ ndʋ mba pɔ-yɔɔ pɔcɔŋna yɔ pawɩlɩ-wɛ pɛ-ɛsɩmɩyɛ yɔ?

⁸ Mba pɔcɔŋnɩ akpadɩyaa yaa kʋdɔndɩnaa yɔɔ yɔ, nabʋyʋ taa pɩlakɩ-wɛ ɛzɩ lalaa fɛyɩnɩ ɛsɩmɩyɛ mbʋ palakɩ yɔ pɩ-yɔɔ yɔ. Ɛbɛ yɔɔ? Mbʋ pʋyɔɔ yɔ paasɛɣ-wɛ yaa paasaŋ-wɛ tʋmɩyɛ ɖoŋ ñɩnɖɛ nɖɩ palakɩ yɔ nɛ kɩlaŋ weyi palaɣ yɔ ɩ-yɔɔ. Alɩwaatʋ ndʋ nɔɔyʋ saŋ ɛyʋ weyi ɛcɔŋnɩ akpadɩyʋ yaa kʋdɔndʋ nɔɔyʋ yɔɔ yɔ pɩkpazɩɣ-ɩ ɖoŋ. (1 Tes. 5:18) Payaɣ koobu halɩñɩnʋ nɔɔyʋ se Melissa, ɛyɔɔdaa se: «Nabʋyʋ taa, mewiɣ mbʋ pʋyɔɔ yɔ pɩnɩ-m yaa pitibi-m yɔɔɔ. Ɛlɛ alɩwaatʋ ndʋ mba pɔ-yɔɔ mɔncɔŋna yɔ pa-taa nɔɔyʋ sɛɣ-m se: “Ŋlabaɣ lɛ mbʋ payɩ ŋlakɩ-m yɔ pɩ-yɔɔ” yɔ, pɩhaɣ-m taa leleŋ kpem. Pɔ-tɔm ndʋ, tɩkpazɩɣ-m ɖoŋ nɛ tiseɣtiɣ-m se mowolo pɩ-yɔɔ nɛ mɔncɔnɩ pɔ-yɔɔ.» Payaɣ koobu abalɩñɩnʋ nɔɔyʋ se Ahmadu, ɛyɔɔdɩ ɖoŋ weyi ɛsɩmɩyɛ nɖɩ pawɩlɩɣ-ɩ yɔ ɖɩwɛnɩ ɛ-yɔɔ yɔ ɩ-tɔm. Ɛ-halʋ koou wɛ pɔ-cɔlɔ nɛ pɔcɔŋnɩ ɛ-yɔɔ, ɛlɛ wɛnɩ kʋdɔŋ kɩtɔlʋʋ. Ɛyɔɔdaa se: «Ðo-koou ɛnʋ, ɛɛsɩŋ ɛzɩma ɖeyi ɖeyi ɖɩlakɩ nɛ ɖɩcɔŋnɩ ɛ-yɔɔ yɔ, ɛlɛ ɖa-taa lakɩ leleŋ siŋŋ alɩwaatʋ ndʋ ɛsɛɣ-ɖʋ se ɖɩlabaɣ lɛ yaa eheyiɣ-ɖʋ se ɛsɔɔlɩ-ɖʋ yɔ.»

ƐBƐ ŊPƖZƖƔ ŊLA NƐ ŊWƐƐ TAA LELEŊ TAA?

9. Ɛzɩma ɛyʋ weyi ɛcɔŋnɩ akpadɩyʋ yaa kʋdɔndʋ nɔɔyʋ yɔɔ yɔ ɛpɩzɩɣ nɛ ɛwɩlɩ se ɛsɩm e-ɖoŋ kamaɣ?

⁹ Tɩlɩ ño-ɖoŋ kamaɣ. (Adu. 11:2) Ða-taa nɔɔyʋ fɛyɩnɩ alɩwaatʋ nɛ ɖoŋ se ɛla mbʋ payɩ ɛsɔɔlaa se ɛla yɔ. Pʋyɔɔ lɛ, pɩwɛɛ se ŋlɩzɩ mbʋ ŋpɩzɩɣ labʋ yɔ; nɛ nabʋyʋ taa, tʋma naayɛ hɔɔlʋʋ taa lɛ pɩwɛɛ se ŋtɔ se ŋŋpɩzɩɣ. Ye pɩlabɩ mbʋ yɔ, pɩfɛyɩ se pɩcɛyɩ-ŋ, pɩwɩlɩɣ se ŋsɩm ño-ɖoŋ kamaɣ. Ye ɛyaa lalaa ɩñɩnɩɣ se pasɩnɩ-ŋ yɔ, tisi faaa nɛ pasɩnɩ-ŋ. Payaɣ koobu abalɩñɩnʋ nɔɔyʋ se Jay, ɛyɔɔdaa se: «Ðɩɩpɩzɩɣ nɛ ɖɩla pɩtɩŋa alɩwaatʋ kʋɖʋmtʋ taa. Ye ɖɩnɩ pɩ-taa se ɖo-ɖoŋ wɛnɩ kamaɣ nɛ ye ɖɩɩñakɩ pana se ɖɩla nɛ pɩcɛzɩ mbʋ ɖɩpɩzɩɣ labʋ yɔ pɩ-yɔɔ yɔ, pɩkaɣ-ɖʋ sɩnʋʋ nɛ ɖɩwɛɛ taa leleŋ taa.»

10. Ɛbɛ yɔɔ pɩcɛyaa se ŋñɩnɩ nɛ ŋna mbʋ pʋyɔɔ ɛyʋ nɔɔyʋ wɛnɩ wɛtʋ natʋyʋ yɔ? (Aduwa 19:11)

¹⁰ Ñɩnɩ nɛ ŋtɩlɩ mbʋ pʋyɔɔ ɛyʋ nɔɔyʋ wɛnɩ wɛtʋ natʋyʋ yɔ. (Kalɩ Aduwa 19:11.) Ye ɖɩsɩm mbʋ pʋyɔɔ ɛyʋ nɔɔyʋ wɛnɩ wɛtʋ natʋyʋ yɔ, pɩtɩla pɩsɩɣnɩ-ɖʋ nɛ ɖɩɖɔkɩ ɖa-tɩ alɩwaatʋ ndʋ ɛyɔɔdʋʋ tɔm natʋyʋ yaa ɛlakɩ nabʋyʋ nɛ pɩɩkɛdɩɣnɩ-ɖʋ yɔ. Kʋdɔŋ nakʋyʋ pɩzɩɣ kiyele nɛ nɔɔyʋ paɣzɩ labʋ lakasɩ nzɩ ɛtaalakɩ yɔ. (Ekl. 7:7) Ɛyʋ weyi ɛyɔɔdaɣnɩ ɛyaa camɩyɛ nɛ ɛlakɩ camɩyɛ lakasɩ yɔ, ɛpɩzɩɣ nɛ ɛpaɣzɩ tɔm hɔm nɛ ɛkaɖɩɣnɩ ɛyaa. Yaa pɩtɩla yɔ e-liu ɛɛsɩkɩnɩ mbʋ payɩ palakɩ-ɩ yɔ yaa ɛ-taa wɩɣ tam. Ye ŋcɔŋnɩ kʋdɔndʋ nɔɔyʋ yɔɔ yɔ, pɩwɛɣ ɖeu se ŋñɩnɩ nɛ ŋtɩlɩ ɛ-kʋdɔŋ yɔɔ tɔm, ɖɩnɛ ɛlɛ pɩkaɣ-ŋ sɩnʋʋ nɛ ŋnɩɩ ɛ-tɔm taa nɛ pɩkɩlɩ. Pɩkaɣ-ŋ sɩnʋʋ ɖɔɖɔ nɛ ŋna se ɛ-kʋdɔŋ yebina nɛ ɛwɛɛnɩ wɛtʋ ndʋ ɛwɛna yɔ ɛlɛ pɩtɩkɛ mbʋ ɛwɛɛ.—Adu. 14:29.

11. Tʋma wena pɩcɛyaa se mba pɔcɔŋnɩ akpadɩyaa yaa kʋdɔndɩnaa yɔɔ yɔ pañɩnɩ alɩwaatʋ nɛ palakɩ paa evemiye nɖɩ? (Keɣa 132:​4, 5)

¹¹ Ñɩnɩ alɩwaatʋ nɛ ŋcɛyɩsɩ ña nɛ Yehowa mɩ-taabalɩyɛ. Nabʋyʋ taa, pɩpɔzʋʋ se ŋyele tʋma naayɛ nɛ ŋla tʋma wena a-tɔm «kɩlɩ cɛyʋʋ yɔ.» (Filp. 1:10) Tʋma ana, a-taa naɖɩyɛ lɛ se ŋcɛyɩsɩ ña nɛ Yehowa mɩ-taabalɩyɛ. Wiyaʋ Daviid kaasɩ Yehowa sɛtʋ kajalaɣ lone taa. (Kalɩ Keɣa 132:​4, 5.) Mbʋ ɖɔɖɔ paa pɩɖɔkɩnɩ-ɖʋ yɔ, pɩcɛyaa se ɖɩñɩnɩ alɩwaatʋ paa evemiye nɖɩ nɛ ɖɩkalɩɣ Bibl nɛ ɖɩtɩmɩɣ. Payaɣ koobu halɩñɩnʋ nɔɔyʋ se Elisha, ɛyɔɔdaa se: «Alɩwaatʋ ndʋ mantɩmɩɣnɩ Yehowa, mankalɩɣ keɣsi nzɩ sɩ-taa tɔm hɛzɩɣ ɛyʋ laŋɩyɛ yɔ nɛ mamaɣzɩɣ sɩ-yɔɔ yɔ, piyeki nɛ mɛwɛɣ taa leleŋ taa. Alɩwaatʋ ndʋ mantɩmɩɣnɩ Yehowa yɔ pɩsɩɣnɩ-m kpem. Evemiye taa, mantɩmɩɣnɩ Yehowa tam sakɩyɛ se ɛsɩnɩ-m nɛ mɔnɖɔkɩ man-tɩ.»

12. Ɛbɛ yɔɔ pɩcɛyaa se mba pɔcɔŋnɩ akpadɩyaa yaa kʋdɔndɩnaa yɔɔ yɔ pɔcɔŋnɩ pɔ-tɔnʋʋ taa alaafɩya yɔɔ?

¹² Ñɩnɩ alɩwaatʋ nɛ ŋcɔnɩ ñɔ-tɔnʋʋ taa alaafɩya yɔɔ. Pɩtɩla, mba pɔcɔŋnɩ akpadɩyaa yaa kʋdɔndɩnaa yɔɔ yɔ, pɛfɛyɩnɩ alɩwaatʋ se palɩɩ nɛ paya tɔɔnaɣ kɩbaŋa nɛ patɩzɩ. Pɩsa nɛ ño-tomnaɣ nɛ ña-maɣzɩm pɛwɛɛ alaafɩya camɩyɛ lɛ, pɩcɛyaa se ŋtɔkɩ tɔɔnaɣ kɩbaŋa nɛ ŋlakɩ hola aleɣya ɖoŋ ɖoŋ. Ye mbʋ, pɩcɛyaa se ŋñɩnɩɣ alɩwaatʋ nɛ ŋlakɩ mbʋ, paa ŋfɛyɩnɩ alɩwaatʋ sakɩyɛ yɔ. (Efɛz. 5:​15, 16) Pɩtasɩ lɛ ñaɣ pana nɛ ŋɖou sakɩyɛ. (Ekl. 4:6) Ñɩnɩyaa yɔɔdaa se ye ɛyʋ eɖou camɩyɛ yɔ pɩsɩɣnɩ ɛ-fɩtɩyɩm se pɩlakɩ tʋmɩyɛ camɩyɛ. Ðɔkɔtɔnaa takayaɣ nakɛyɛ yɔɔdaa se alɩwaatʋ ndʋ ɛyʋ ɖou camɩyɛ yɔ, piyeki nɛ ɛɛkɩlɩɣ nɩɣzʋʋ nɛ ɛpɩzɩɣ ɖɔɖɔ nɛ ɛɖɔkɩ ɛ-tɩ kaɖɛ wɛtʋ taa. Pɩcɛyaa ɖɔɖɔ se ŋñɩnɩ alɩwaatʋ nɛ ŋmʋʋ helim. (Ekl. 8:15) Koobu halɩñɩnʋ nɔɔyʋ yɔɔdɩ mbʋ pɩsɩɣnɩ-ɩ nɛ ɛwɛɣ taa leleŋ taa yɔ pɩ-tɔm. Ɛyɔɔdaa se: «Alɩwaatʋ ndʋ wɩsɩ lɩɣ yɔ, malɩɣ awayɩ nɛ mɔncɔŋnɩ kedeŋa kajʋka. Malabɩ ɖʋtʋ nɛ paa fenaɣ ŋga lɛ malɩzɩɣ evemiye kʋɖʋmɖɩyɛ nɛ ma nɛ man-taabalʋ nɔɔyʋ ɖɩlɩɣ nɛ ɖɩmʋʋ helim.»

13. Ɛbɛ yɔɔ pɩwɛ ɖeu se ɖɩlakɩ tanaʋ nɛ ɖihoŋuu? (Aduwa 17:22)

¹³ Lakɩ tanaʋ nɛ ŋhoŋuu. (Kalɩ Aduwa 17:22; Ekl. 3:​1, 4) Ye ŋhoŋuu yɔ, pɩsɩɣnɩ-ŋ nɛ ŋwɛɛ alaafɩya tomnaɣ taa nɛ maɣzɩm taa. Alɩwaatʋ ndʋ ŋcɔŋnɩ akpadɩyʋ yaa kʋdɔndʋ nɔɔyʋ yɔɔ yɔ, pɩtɩkɛ alɩwaatʋ tɩŋa pɩtɩŋa pɩɖɔŋ camɩyɛ. Ɛlɛ alɩwaatʋ ndʋ nabʋyʋ ɛɛɖɔŋ camɩyɛ yɔ, ye ŋlakɩ tanaʋ nɛ ŋhoŋuu yɔ, ŋŋkɔʋ pana lɛɛ lɛɛ. Nɛ ye ŋlakɩ tanaʋ nɛ ña nɛ ɛyʋ weyi ŋcɔŋnɩ ɛ-yɔɔ yɔ ihoŋuu yɔ, piyeki nɛ mɩ-taabalɩyɛ cɛyɩsɩ.

14. Ye ŋheyi ña-taabalʋ nɔɔyʋ ɛzɩma pɩlakɩ-ŋ yɔ, ɛzɩma pɩpɩzɩɣ nɛ pɩsɩnɩ-ŋ?

¹⁴ Heyi ña-taabalʋ nɔɔyʋ ɛzɩma pɩlakɩ-ŋ yɔ. Paa ŋtɩɩñaɣ pana ɛzɩma yɔ, nabʋyʋ taa pɩpɩzɩɣ nɛ pitibi-ŋ yɔɔɔ. Alɩwaatʋ ndʋ tɩ-taa lɛ, pɩwɛɣ ɖeu se ŋyɔɔdɩnɩ ña-taabalʋ weyi ŋnawa se ɛɛkʋʋ ñɔ-tɔm yɔ. (Adu. 17:17) Ɛkaɣ-ŋ welisinuu camɩyɛ nɛ ɛkpazɩ-ŋ ɖoŋ, nɛ pɩtɩla mbʋ ɖeyi ɖeyi pɩpɔzʋʋ-ŋ se pɩsa nɛ ŋɖaɣnɩ hiɣu ña-taa leleŋ.—Adu. 12:25.

15. Ye ŋmaɣzɩɣ ñe-lidaʋ yɔɔ yɔ, ɛzɩma pɩpɩzɩɣ nɛ pɩsɩnɩ-ŋ?

¹⁵ Maɣzɩɣ mbʋ ña nɛ ñɛ-ɛyaa kʋsɔɔlaa ɩkaɣ labʋ paradisuu taa yɔ pɩ-yɔɔ. Tɔzɩ se ŋŋkaɣ wobu pɩ-yɔɔ nɛ ŋcɔŋnɩ akpadɩyaa yaa kʋdɔndɩnaa yɔɔ mbʋ tam, nɛ tɔzɩ ɖɔɖɔ se kiɖe tɛɛ lɛ pɩtɩkɛ tʋmɩyɛ nɖɩ Yehowa kaasɔɔlaa se ɛyaa ɩla. (2 Kɔr. 4:​16-18) «Wezuu siŋŋ» wɛnɩ ɛsɩndaa. (1 Tim. 6:19) Ye ña nɛ ɛyʋ weyi ɛ-yɔɔ ŋcɔŋna yɔ ɩyɔɔdʋʋ mbʋ ɩkaɣ kpɛndʋʋ nɛ ɩla paradisuu taa yɔ pɩ-tɔm yɔ, pɩtɩla pɩkaɣ yebu nɛ ihiɣ taa leleŋ. (Iza. 33:24; 65:21) Payaɣ koobu halɩñɩnʋ nɔɔyʋ se Heather, ɛyɔɔdaa se: «Ðoŋ ɖoŋ lɛ, meheyiɣ ɛyaa mba pɔ-yɔɔ mɔncɔŋna yɔ se piileɖiɣ lɛ, ɖɩkaɣ kpɛndʋʋ nɛ ɖɩñɛyɩ wondu, ɖise nɛ ɖɩsaa cɛɛcɛnaa. Ðɩkaɣ labʋ ɖɛ-ɛyaa kʋsɔɔlaa mba pefeziɣ-wɛ yɔ kpɔnɔnaa nɛ tɔɔnasɩ. Ðɩkpɛndɩɣ nɛ ɖɩsɛɣ Yehowa se ɛlabaɣ lɛ lidaʋ ŋgʋ ɛha-ɖʋ yɔ kɩ-yɔɔ.»

MBƲ ƐYAA LALAA PƖZƖƔ PALA NƐ PASƖNƖ-Ŋ YƆ

16. Ye ɖɛ-ɛgbɛyɛ taa koobu nɔɔyʋ ɛcɔŋnɩ akpadɩyʋ yaa kʋdɔndʋ nɔɔyʋ yɔɔ yɔ, ɛzɩma ɖɩpɩzɩɣ nɛ ɖɩsɩnɩ-ɩ? (Cɔnɩ ɖɔɖɔ kɩlɛmʋʋ.)

¹⁶ Ɛyaa lalaa pɩzɩɣ pasɩnɩ-ŋ nɛ ŋhiɣ alɩwaatʋ nɛ ŋhɛzɩ. Ɛgbɛyɛ taa koobiya pɩzɩɣ nɛ pakpaɣ lɩmaɣzɩyɛ se pɔkɔŋ nɛ pamʋ-ŋ pazɩ nɛ pacaɣ weyi ɛ-yɔɔ ŋcɔŋna yɔ ɛ-cɔlɔ. Pɩpɩzɩɣ pɩsɩnɩ-ŋ nɛ ŋhɛzɩ pazɩ yaa ŋla ña-tʋma lɛɛna. (Gal. 6:2) Koobiya nabɛyɛ labɩ ɖʋtʋ nɛ pasɩɣnɩ mba pɔcɔŋnɩ akpadɩyaa yaa kʋdɔndɩnaa yɔɔ yɔ paa kpɩtaʋ ŋgʋ. Payaɣ koobu halɩñɩnʋ nɔɔyʋ se Natalya, ɛwɛɛ nɛ ɛcɔŋnɩ ɛ-walʋ yɔɔ, ɛ-walʋ ɛnʋ ɛɛpɩzɩɣ ɖɔm. Ɛyɔɔdaa se: «Ɛgbɛyɛ taa koobu abalɩñɩnʋ nɔɔyʋ kɔŋ tam kʋɖʋm yaa tam nabʋlɛ kpɩtaʋ taa nɛ ɛcakɩ ma-walʋ cɔlɔ. Pɛkpɛndɩɣ nɛ posusuu tɔm, palakɩ kɛdaɣ nɛ halɩ pɔcɔŋnɩ filimwaa. Alɩwaatʋ ndʋ, tɩkɛdɩnɩ ma-walʋ kpem, nɛ pɩsɩɣnɩ-m se mɛhɛzɩ yaa mala mbʋ mɔnsɔɔlaa yɔ ɛzɩ malɩɩ nɛ mɔnɖɔ pazɩ mbʋ yɔ.» Ɛgbɛyɛ taa koobiya nabɛyɛ pɩzɩɣ nɛ paha pa-tɩ se pɔkɔŋ nɛ pacaɣ ɛyʋ weyi ɛ-yɔɔ ŋcɔŋna yɔ ɛ-cɔlɔ ɖoo taa se pɩsa nɛ ŋhiɣ alɩwaatʋ nɛ ŋɖoo camɩyɛ.

17. Ɛzɩma ɖɩpɩzɩɣ nɛ ɖɩsɩnɩ mba pɔcɔŋnɩ akpadɩyaa yaa kʋdɔndɩnaa yɔɔ yɔ kediɣzisi taa?

¹⁷ Sɩnɩ mba pɔcɔŋnɩ akpadɩyaa yaa kʋdɔndɩnaa yɔɔ yɔ kediɣzisi taa. Ɛyaa mba pɔcɔŋnɩ akpadɩyaa yaa kʋdɔndɩnaa yɔɔ yɔ, nabʋyʋ taa paapɩzɩɣ nɛ pewelisiɣ kediɣzisi yaa kigbeɣliŋ taa tɔm camɩyɛ, mbʋ pʋyɔɔ yɔ pɛ-ɛsɩyɛ sɛnɩ pɛ-ɛyaa kʋsɔɔlaa yɔɔ cɔnʋʋ. Ɛgbɛyɛ taa koobiya pɩzɩɣ nɛ pasɩnɩ ɛyaa mba, ye pahaɣ pa-tɩ nɛ pacakɩ pɛ-ɛyaa kʋsɔɔlaa mba pɔ-cɔlɔ kediɣzisi taa yɔ. Ye ɛyʋ weyi ɛ-yɔɔ pɔcɔŋna yɔ ɛɛpɩzɩɣ se ɛlɩɩ ɖɩɣa yɔ, ŋpɩzɩɣ nɛ ŋha ña-tɩ nɛ ŋwolo ɛ-cɔlɔ ɖɩɣa nɛ ña nɛ ɩ ɩtɩŋnɩ visioconférence yɔɔ nɛ ɩla kediɣzaɣ se pɩsa nɛ ɛyʋ weyi ɛcɔŋnɩ ɛ-yɔɔ yɔ ɛpɩzɩ nɛ ewolo kediɣzaɣ taa.

18. Ɛbɛ ɖɩpɩzɩɣ ɖɩtasɩ labʋ nɛ ɖɩsɩnɩ koobiya mba pɔcɔŋnɩ akpadɩyaa yaa kʋdɔndɩnaa yɔɔ yɔ?

¹⁸ Saŋ mba pɔcɔŋnɩ akpadɩyaa yaa kʋdɔndɩnaa yɔɔ yɔ nɛ ŋtɩmɩɣ pɔ-yɔɔ. Pɩwɛɛ se ɛgbɛyɛ taa ɛzʋtʋyaa ikilimiɣ mba pɔcɔŋnɩ akpadɩyaa yaa kʋdɔndɩnaa yɔɔ yɔ pɔ-yɔɔ ɖoŋ ɖoŋ nɛ pakpazɩɣ-wɛ ɖoŋ. (Adu. 27:23) Pɩwɛɛ se ɖa-tɩŋa ɖɩsaŋ ɖɛ-ɛgbɛyɛ taa koobiya mba pɔcɔŋnɩ akpadɩyaa yaa kʋdɔndɩnaa yɔɔ yɔ ɖoŋ ɖoŋ. Ðɩpɩzɩɣ ɖɔɖɔ nɛ ɖɩpɔzɩ Yehowa se ɛkpazɩ-wɛ ɖoŋ nɛ ɛsɩnɩ-wɛ nɛ pɛwɛɛ taa leleŋ taa.—2 Kɔr. 1:11.

19. Lidaʋ kɩbaŋʋ ŋgʋ ɖɩɖaŋaa se kɩla?

¹⁹ Pɩkazɩ pazɩ lɛ, Yehowa kaɣ hɩzʋʋ wɩzasɩ ɛsɩtɛɣlɩm paa weyi ɛ-ɛsɩndaa. Kʋdɔmɩŋ nɛ sɩm paakaɣ tasʋʋ wɛʋ. (Natʋ 21:​3, 4) «Kaakalaɣ kaɣ kʋyʋʋ nɛ kamaa ɛzɩ nam yɔ.» (Iza. 35:​5, 6) Kʋñɔmɩŋ weyi akpadɩyɩtʋ kɔŋna yɔ ɩɩkaɣ tasʋʋ wɛʋ, nɛ ɖɩɩkaɣ tasʋʋ labʋ kʋñɔŋ se ɖɩcɔŋnɩ ɖɛ-ɛyaa kʋsɔɔlaa mba pakpadɩyaa yaa pɩwɩɣ-wɛ yɔ pɔ-yɔɔ. Ðɩɩkaɣ tasʋʋ «tɔzʋʋ mbʋ pɩɖɛwa yɔ pɩ-yɔɔ.» (Iza. 65:17) Ɛlɛ pʋcɔ nɛ tamasɩ kɩbanzɩ nzɩ sɩla lɛ, ɖa-taa pɩzɩɣ nɛ pɩtɛ se Yehowa kaɣ-ɖʋ sɩnʋʋ paa ɛzɩmtaa. Ye ɖiwobi pɩ-yɔɔ nɛ ɖɩpɔzʋʋ-ɩ se ɛha-ɖʋ ɖoŋ yɔ, ɛkaɣ-ɖʋ sɩnʋʋ nɛ ɖɩɖɔkɩ ɖa-laŋa «nɛ suuɖu nɛ taa leleŋ pɩtɩŋa pɩ-taa.»—Kol. 1:11.