« Nɔɔ kʋɖʋmaɣ ŋga fezuu yeba nɛ ɩwɛɛna yɔ, kɛwɛɛ mbʋ tam»

«Nɔɔ kʋɖʋmaɣ» ŋga kɛwɛ ɖɛ-hɛkʋ taa yɔ, ‘fezuu yebina’ nɛ kɛwɛɛ. Pɩwɩlɩɣ se Ɛsɔ ɖoŋ yebina nɛ ɖɩwɛɛ nɔɔ kʋɖʋmaɣ taa. Ɛlɛ ɛzɩ Pɔɔlɩ yɔɔdʋʋ yɔ pɩpɔzʋʋ pana ñaɣʋ pʋcɔ nɛ nɔɔ kʋɖʋmaɣ ŋga kɛwɛɛ mbʋ tam. Anɩ pɩwɛɛ se ɛñaɣ pana ana? Toovenim taa lɛ, paa Krɩstʋ tʋ weyi lɛ pɩpɔzʋʋ se ɛñaɣ pana nɛ ‘nɔɔ kʋɖʋmaɣ ŋga fezuu yeba nɛ ɖɩwɛɛna yɔ, kɛwɛɛ mbʋ tam.’

Pɩsa nɛ ɖɩnɩɩ pɩ-taa lɛ, ɖɩkpaɣ se nɔɔyʋ yabɩ lɔɔɖɩyɛ kɩfaɖɛ naɖɩyɛ nɛ ɛha-ŋ. Akaɣ cɔnʋʋ lɔɔɖɩyɛ nɖɩ ɖɩ-yɔɔ nɛ ɖɩtaawɛɛkɩ? Pɩtʋʋ fɛyɩ se ña pɩwɛɛ se ŋcɔnɩ ɖɩ-yɔɔ. Ye ŋtɩcɔnɩ ɖɩ-yɔɔ camɩyɛ nɛ ɖɩwɛɛkɩ yɔ, ŋŋpɩzɩɣ nɛ ŋyɔɔdɩ se weyi ɛha-ŋ lɔɔɖɩyɛ nɖɩ yɔ ɛ-cɔlɔ pɩlɩnaa.

Mbʋ ɖɔɖɔ, nɔɔ kʋɖʋmaɣ ŋga kɛwɛ Krɩstʋ mba hɛkʋ taa yɔ kɛkɛ kʋjɔʋ ŋgʋ kɩlɩnɩ Ɛsɔ cɔlɔ yɔ. Ɛlɛ ɖa-taa paa weyi pɩwɛɛ se eyele nɛ nɔɔ kʋɖʋmaɣ ŋga kɛwɛɛ mbʋ tam. Ye pɩlaba se tɔm natʋyʋ kɔm ɖa nɛ koobu nɔɔyʋ ɖɛ-hɛkʋ taa yɔ, pɩwɛɛ se ɖɩpɔzɩ ɖa-tɩ se: «Mɛwɛɛ nɛ malakɩ mbʋ manpɩzɩɣ yɔ se mɔncɔnɩ tɔm ndʋ ti-ɖeɖe se pɩsa nɛ nɔɔ kʋɖʋmaɣ ŋga fezuu yeba nɛ ɖɩwɛɛna yɔ, kɛwɛɛ mbʋ tam?»

‘ƖÑAƔ PANA SIŊŊ NƐ NƆƆ KƲÐƲMAƔ WƐƐ MBƲ TAM’

Ɛzɩ Pɔɔlɩ yɔɔdʋʋ yɔ, nabʋyʋ taa pɩpɩzɩɣ nɛ pɩpɔzɩ se ɖɩñaɣ pana siŋŋ pʋcɔ nɛ nɔɔ kʋɖʋmaɣ ŋga fezuu yeba nɛ kɛwɛɛ ɖɛ-hɛkʋ taa yɔ, kɛwɛɛ mbʋ tam; kɔzɩ kɔzɩ alɩwaatʋ ndʋ koobu nɔɔyʋ ɖʋʋ-ɖʋ ɖɩwɩzɩyɛ yɔ. Pɩsa nɛ nɔɔ kʋɖʋmaɣ wɛɛ ɖɛ-hɛkʋ taa lɛ, ɛzɩ pɩcɛyaa se ɖiwolo nɛ ɖɩna koobu ɛnʋ nɛ ɖɩyɔɔdɩ mbʋ pɩlaba yɔ pɩ-tɔm na? Pɩtɩcɛyɩ se ɖɩla mbʋ paa ɛzɩmtaa. Pʋyɔɔ lɛ pɔzɩ ña-tɩ se: «Ye mowoba nɛ mana koobu ɛnʋ, piyeki nɛ tɔm ñɔɔzɩ yaa piyeki nɛ tɩtɛzɩ wɛɛkʋʋ?» Nabʋyʋ taa, pɩkɩlɩɣ ɖeu se ɖɩkpaɣ nɛ ɖikpeɣ yaa ɖɩsɔɔ mbʋ pɩlaba yɔ pɩ-yɔɔ.—Adu. 19:11; Mark. 11:25.

Ɛzɩ apostoloo Pɔɔlɩ yɔɔdʋʋ yɔ, ɖiwolo pɩ-yɔɔ nɛ ‘ɖɩɖɔkɩ ɖa-tɩ ɖama lakasɩ yɔɔ nɛ sɔɔlɩm.’ (Efɛz. 4:2) Takayaɣ nakɛyɛ yɔɔdaa se papɩzɩɣ ɖɔɖɔ nɛ pɛɖɛzɩ tɔm loyaɣ ŋga se «ɖɩmʋ ɛyaa lalaa ɛzɩ pɛwɛʋ yɔ.» Tɔm ndʋ, tɩwɩlɩɣ se pɩpɔzʋʋ se ɖitisi se ɖo-koobiya kɛ kɩwɛɛkɩm laɖaa ɛzɩ ɖa yɔ. Toovenim taa lɛ, ɖa-tɩŋa ɖɩwɛɛ nɛ ɖɩñakɩ pana se ɖisuu «ɛyʋtʋ kɩfatʋ.» (Efɛz. 4:​23, 24) Paa mbʋ yɔ, ɖa-taa nɔɔyʋ ɛɛpɩzɩɣ nɛ ɛla mbʋ nɛ pɩtalɩ pilim. (Roma 3:23) Ye ɖitisiɣ toovenim tɔm ndʋ tɩ-yɔɔ yɔ, pɩwɛɣ-ɖʋ kɛlɛʋ se ɖɩɖʋ suuɖu nɛ ɖɩkpaɣ nɛ ɖikpeɣ ɖama nɛ ɖiyele nɛ ‘nɔɔ kʋɖʋmaɣ ŋga fezuu yeba nɛ ɖɩwɛɛna yɔ, kɛwɛɛ mbʋ tam.’

Alɩwaatʋ ndʋ ɖikpeɣu lalaa nɛ ɖɩsɔʋ mbʋ palaba nɛ pɩwɩzɩ-ɖʋ yɔ pɩ-yɔɔ yɔ, piyeki nɛ «laŋhɛzɩyɛ tomiye» wɛɛ ɛgbɛyɛ taa. Grɛɛkɩ tɔm piye nɖɩ pɛɖɛzɩ Efɛɛzɩ mba 4:3 taa se «tomiye» yɔ, pɛɖɛzɩ-ɖɩ Koloosi mba 2:19 taa se «hola.» Hola yekina se mɔɔ ɩtamnɩ ɖama. Mbʋ ɖɔɖɔ laŋhɛzɩyɛ nɛ sɔɔlɩm peyeki se taabalɩyɛ kɩbanɖɛ ɛwɛɛ ɖa nɛ ɖo-koobiya ɖɛ-hɛkʋ taa paa nabʋyʋ taa pa-lakasɩ nasɩyɩ ɩɩkɛdɩɣnɩ-ɖʋ yɔ.

Ye mbʋ, alɩwaatʋ ndʋ koobu nɔɔyʋ lakɩ nabʋyʋ nɛ pɩcɛyɩ-ŋ yaa pɩwɩzɩ-ŋ yɔ, mbʋ ɛzɩ ŋŋkam ña-lɩmaɣza mbʋ ɛlaba nɛ pɩfɛyɩ ɖeu yɔ pɩ-yɔɔ lɛ, ñaɣ pana nɛ ŋna ɛ-pʋtɔdɩyɛ. (Kol. 3:12) Ða-taa nɔɔyʋ tɩtalɩ pilim pʋyɔɔ lɛ, ña ɖɔɖɔ nabʋyʋ taa pɩtɩla ŋlakɩ nabʋyʋ nɛ pɩwɩzɩɣ lalaa. Ye ŋtɔzʋʋ tɔm ndʋ tɩ-yɔɔ yɔ pɩkaɣ-ŋ sɩnʋʋ nɛ ŋyele nɛ ‘nɔɔ kʋɖʋmaɣ ŋga fezuu yeba nɛ ɖɩwɛɛna yɔ, kɛwɛɛ mbʋ tam.’