Tɔm ndʋ ɖa-takayɩsɩ kalɩyaa pɔzʋʋ yɔ
Piileɖiɣ lɛ, «lɩmaɣzɩyɛ» nɖɩ Yehowa kaɣ ɖʋʋ ajɛɛ laŋa taa?
Natʋ 17:16, 17 yɔɔdɩ ɛzɩma kʋñɔŋ sɔsɔʋ paɣzɩɣ yɔ pɩ-tɔm ɛzʋnɔ: «Hɩŋ 10 weyi ŋnawa yɔ, nɛ tɛtɛgbɩnɛ, pakaɣ paɖʋʋ halʋ hayitu laɖʋ nɛ pakaɣ wɛɛkʋʋ ɛ-ñɩm tɩŋa nɛ peyebi-i ndaakpeɖe, nɛ pakaɣ tɔɔʋ e-tomnaɣ nɛ pañaɣzɩ-ɩ miŋ caɣ caɣ. Mbʋ pʋyɔɔ yɔ Ɛsɔ ɖʋ pa-laŋa taa se pala ɛ-lɩmaɣzɩyɛ yɔɔ, ɛɛɛ, se patɩŋnɩ ɛzɩma pɛcɛlɩɣ tɛtɛgbɩnɛ pe-kewiyaɣ yɔ pɩ-yɔɔ nɛ pala pa-lɩmaɣzɩyɛ kʋɖʋmɖɩyɛ yɔɔ.» Ðooo lɛ, ɖa-takayɩsɩ yɔɔdaɣ se lɩmaɣzɩyɛ nɖɩ Yehowa kaɣ ɖʋʋ ajɛɛ laŋa taa yɔ nɖɩ lɛ se paɖɩzɩ cɛtɩm Ɛsɔ sɛtʋ.
Ɛlɛ pɩpɔzʋʋ se ɖɩla lɛɣzɩtʋ. Lɩmaɣzɩyɛ nɖɩ Yehowa kaɣ ɖʋʋ ajɛɛ laŋa taa yɔ nɖɩ lɛ se pɛcɛlɩ «tɛtɛgbɩnɛ pe-kewiyaɣ.» Pɩsa nɛ ɖɩna ɛzɩma tɔm ndʋ tɩkaɣ labʋ yɔ lɛ, ɖɩkaɣ cosuu tɔm pɔzʋʋ mbʋ pɩkɔŋ yɔ pɩ-yɔɔ.
Mba tɔm pɔyɔɔdɩ natʋ ndʋ tɩ-taa? «Halʋ hayitu laɖʋ,» ɛnʋ payaɣ ɖɔɖɔ se «Babilɔɔnɩ Sɔsɔʋ.» Ɛsɩŋnɩ ɛjaɖɛ kpeekpe yɔɔ cɛtɩm Ɛsɔ sɛtʋ agbaa. ‘Tɛtɛgbɩnɛ nɖɩ ɖɩsɛ cɩɩɩ’ yɔ ɖɩsɩŋnɩ Ajɛɛ Kɩkpɛndʋʋ Ɛgbɛyɛ nɖɩ payaɣ se SDN yɔ. Palɩzɩ-ɖɩ pɩnaɣ 1919 taa se ɖiyele nɛ laŋhɛzɩyɛ wɛɛ ɛjaɖɛ yɔɔ; nɛ lɛɛlɛɛyɔ lɛ nɖɩ pɩsɩnɩ ONU. (Natʋ 17:3-5) «Hɩŋ 10» sɩŋnɩ kominawaa mba payɩ paɖʋʋ tɛtɛgbɩnɛ nɖɩ nesi yɔ.
Taabalɩyɛ nɖɩ wɛ halʋ hayitu laɖʋ nɛ tɛtɛgbɩnɛ nɖɩ ɖɩsɛ cɩɩɩ yɔ pɛ-hɛkʋ taa? Halʋ hayitu laɖʋ ‘caɣ’ tɛtɛgbɩnɛ yɔɔ, pʋ-tɔbʋʋ lɛ se ɛwɛɛ nɛ ɛɖʋʋ-ɖɩ nesi nɛ ɛñakɩ pana se ɛwɛɛnɩ ɖoŋ ɖɩ-yɔɔ.
Ɛbɛ kaɣ talʋʋ halʋ hayitu laɖʋ ɛnʋ? Tɛtɛgbɩnɛ nɛ hɩŋ 10 «pakaɣ paɖʋʋ halʋ hayitu laɖʋ» siŋŋ nɛ pamʋ mbʋ payɩ ɛwɛna yɔ nɛ pokuli ɛ-kɩwɛɛkɩm yɔɔ. Nɛ pʋwayɩ lɛ paɖɩzɩ-ɩ ɛzɩ Yehowa yɔɔdʋʋ yɔ. (Natʋ 17:1; 18:8) Ðɩnɛ ɛlɛ cɛtɩm Ɛsɔ sɛtʋ sɩɣ tɩnaɣ. Ɛlɛ pʋcɔ nɛ pɩla mbʋ lɛ, Yehowa kaɣ yebu nɛ ajɛɛ la nabʋyʋ nɛ wiɖiyi atɩla mbʋ ɛyaa wezuu caɣʋ taa.
Ɛbɛ Yehowa kaɣ yebu se ajɛɛ ɩla? Ɛkaɣ ɖʋʋ ajɛɛ laŋa taa «ɛ-lɩmaɣzɩyɛ.» Lɩmaɣzɩyɛ nɖɩ lɛ se ‘acɛlɩ a-ɖoŋ nɛ a-kewiyitu ɖoŋ tɛtɛgbɩnɛ’ nɖɩ ɖɩsɛ cɩɩɩ yɔ, pʋ-tɔbʋʋ se Ajɛɛ Kɩkpɛndʋʋ Ɛgbɛyɛ nɖɩ payaɣ se ONU yɔ. (Natʋ 17:13) Pɩwɩlɩɣ se pɩtɩkɛ ajɛɛ maɣmaɣ kaɣnɩ kpaɣʋ lɩmaɣzɩyɛ se acɛlɩɣ a-ɖoŋ nɛ a-kewiyitu ɖoŋ tɛtɛgbɩnɛ. Natʋ tɔm wɩlɩɣ se Yehowa maɣmaɣ kaɣnɩ-yɛ tuyuu se ala mbʋ. (Adu. 21:1; kpaɣ-tʋ nɛ ŋmaɣzɩnɩ Izaayii 44:28.) Lɛɣzɩtʋ ndʋ, tɩɩkaɣ kɔm pazɩ pazɩ ɛlɛ tɩkaɣ kɔm tuda. Ðɩnɛ ɛlɛ tɛtɛgbɩnɛ kaɣ ɖɩzʋʋ cɛtɩm Ɛsɔ sɛtʋ agbaa tɩŋa caɣ caɣ.
Ɛbɛ ɖɩpɩzɩɣ nɛ ɖɩɖaŋ se pɩkaɣ labʋ? Pɩfɛyɩ se ɖɩɖaŋ se pakaɣ susuu se ajɛɛ wɛɛ nɛ acɛlɩɣ a-ɖoŋ Ajɛɛ Kɩkpɛndʋʋ Ɛgbɛyɛ nɖɩ payaɣ se ONU yɔ pazɩ pazɩ. Ɛlɛ mbʋ pɩwɛɛ se ɖɩɖaŋ yɔ mbʋ yɔ: Yehowa kaɣ ɖʋʋ ajɛɛ tɩŋa laŋa taa se acɛlɩ a-ɖoŋ ONU, nɛ pɩkaɣ labʋ mbʋ tuda. Alɩwaatʋ ndʋ pɩlakɩ mbʋ yɔ, ɖɩkaɣ ɖiɣzinuu se kʋñɔŋ sɔsɔʋ caɣ paɣzʋʋ. Pʋcɔ nɛ alɩwaatʋ ndʋ tɩtalɩ lɛ, «ɖɩcaɣnɩ ɖɛ-ɛsa nɛ ɖɩɖɔkɩ ɖa-maɣzɩm» mbʋ pʋyɔɔ yɔ piileɖiɣ lɛ, lɛɣzɩtʋ kaɣ kɔm tuda.—1 Tes. 5:6.