7 Mazwibato a no Tolegwa Pezhugwi

CHA KU NO DWA

Mazwibato a no tolegwa pezhugwi i zila nthu ya a no zwishalulila ku chila nayo. Ha ti lakidzila, apa u no zwimisila ku be ne malebeswa mu zwithu zose? Ndizo ku sheteka kuti u diye bana babo zwithu izwezwi zwi no tolegwa pezhugwi.

Mazwibato a no tolegwa pezhugwi a no shanganyila ku ziba cha ka lulwama ne chi sa ka lulwama. Ha ti lakidzila, nthu u no ziba cha ka lulwama u no shinga ne masimba, a ka tambunuka, e alakanila bangwe—mikumbulo i no kudziwa mu nthu ha a chi nchechana.

NLAYONTEWO WE BAIBILI: “Diya mwana zila ya a ka fanila ku tobela, ndizo ha a kula a a to bhuda mu ili.”—Zwiani 22:6.

INI KU FANILA

Mu makole a ngwenu e technology, mazwibato a no tolegwa pezhugwi a no sheteka. “Mikumbulo i sa ka lulwama i nga bongwa mu zwithu zwe electronic mu zwibaka zose,” ko jalo mme Karyn. “Bana bedu ba no khona lingilila zwithu zwa ka bipa ti nabo koga ipapa!”

NLAYONTEWO WE BAIBILI: Bathu “ba kulukulu. . . ba na njalakang’wa dza ka wolobeleka ngo shingisiwa ku thubukanya tja ka lulwama ne tji sa ka lulwama.”—Bahebera 5:14.

Mazwibato e ku ziba cha ka lulwama ne chi sa ka lulwama a no sheteka bo. Woku ko dwa ndebeleko ye buthu (i nonga “ndo kumbila” na “nda boka”) ne ku lakidza mahwilangoni mu bangwe—mazwibato a si chipo, ne kuti bathu ba chi lingilila zwithu zwe electronic koga mu na kuti ba shingidzane ne bangwe bathu.

NLAYONTEWO WE BAIBILI: “Itilani bamwe se kwa mu no da be mu yitila.”—Luka 6:31.

CHA U NGA THAMA

Chenesa mazwibato awo a no tolegwa pezhugwi. Ha ti lakidzila, bashakisisi ba no lakidza kuti batshwa ba no zwidziba mu ndalo i kuzhe kwe ndobolo ha ba lakidziwa ne zila ya ka tambunuka kuti mazwibato iyawo ha a zo lulwama .

GUMBULUDZO: Shingisa chi no shingikala ngwenu ku tangisa ndebeleko i no leba ne kwe mazwibato. Ha ti lakidzila, Ha dzikhani dzi leba ne kwe nlandu we libengo, u ngana u kati: “I chithu cha ka bipa dumbu kuti bathu ba be bushongola mu bangwe. U no kumbula kuti ini bathu be zwibata ne zila ya ka jalo?”

“Kwa ka simila bana ku thubukanya cha ka lulwama ne chi sa ka lulwama ha ba singa zibe cha ka lulwama ne chi sa ka lulwama.”—Brandon.

Diya mazwibato e ziba cha ka lulwama ne chi sa ka lulwama. Bana ba chechana na ibo ba nga zwidiya kuti“ndo kumbila” na “ndo boka” ne ku kumbulila bangwe. “Ha bana be bona kuti ba na gobe mu chingwe chikulu mu bali—se nsha, ikwele, bathu mu nzi—ba nga be ne buthu gwa ka lulwamila nngwe ne nngwe, ku si ibo koga,” ko jalo buka ye Parenting Without Borders.

GUMBULUDZO: Pa bana babo mishingo ku ba batsha ku zwidiya mazwibato e ku shingila bangwe.

“Ha bana bedu be wolobela ku shinga ngwenu, ha ba nga lemegwe ha bo chi gala ba li boga. Ku zwithamila zwithu ne bukwabo i no wo be ya chi be zila ye buchilo gwabo.”—Tara.