Zwidiyo Zwe Gubungano Zwe Videoconferencing

Mibuso mi njinji mu shango yose i no shaka kuti bathu ba si tongo sezelana ngono ba ka misa ku shangana kwe bathu. Bafakazi ba Jehova ba ka zwimisila ku hwa milayo iyeyi ngono be dwilila be namata bose ba ka bakilika. Ku thama saikoko, makubungano a no shingisa dzi app dze videoconferencing, dzi nonga Zoom, ku bata zwidiyo zwe gubungano.

Kuti zwidiyo zwe gubungano zwi dwilile zwi liyapo, Gubungano li no Laula la ka dumila kuti zwipo zwe mari zwi shingisiwe ku tengela makubungano dzi Zoom account. Ichecho cha ka be batsho kwazo mu makubungano a si nga khone ku be ne mari e videoconference account a ngapa P170.55-P227.40 kene kupinda. Ka njinji makubungano a ka be e shingisa dzi app dzi si nga ruelegwe dzi no lizanyidza palo ye bashingisi kene dzi sa ka bakililika ne zila ya ka lulwama. Makubungano ose a no shingisa dzi Zoom account idzedzi a bona mbayilo we bulelo gwe ku dzi shingisa ne bakililika kwadzo ne ku dumila palo njinji ye bathu ku ngina mu zwidiyo zwi nngwe ne nngwe. Ku noti ngwenu, makubungno a no pinda 65,000 mu shango dzi no pinda 170 a no shingisa dzi account idzedzi.

Gubungano le Kairagi, ku Manado, North Sulawesi, Indonesia, la ka misa ku shingisa app ye videoconferencing i singa ruelegwe le be e tangisa ku shingisa Zoom account ye Gubungano. Nzwalani Hadi Santoso u no chenesa: “Dumbu ne bazwalani ne dziazwadzi ba singa zibe ku shingisa zwi shingisiwa zwe electronic ngwenu bano shathila zwidiyo, mu chibaka chi lefu ne kuti ha ku to sheteka kuti ba ngine ka njinji ha ba li mu zwidiyo.”

Lester Jijón, Jr., mdala mu Gubungano le Guayacanes Oeste ku Guayaquil, Ecuador, u no chenesa: “Ha ta ka linga chimo che ikhonomi che bazwalani ne dziazwadzi njinji, kwa ku nga sima kuti makubungano mangwe a khone ku ruelela license ye Zoom i nga thama kuti gubungano lose li ngine mu zwidiyo. Ngwenu toboka Gubungano, kuti pa dzi Zoom account, dzi no thama kuti ti khone ku koka bangwe ku ngina mu zwidiyo zwi singa ruelegwe ku sina palo ino lizanyidziwa.”

Johnson Mwanza, mdala mu Gubungano le Ngwerere North ku Lusaka, Zambia, u no kwala: “Bazwalani ne dziazwadzi ba njinji ba ka leba ka njinji be ti, ‘ndongoloso ye Zoom ye gubungano ha i to thama koga kuti ti zwiwe ti li pejo ne bazwalani ne dziazwadzi dzedu ngono i no thama kuti ti zwiwe ti diwa ne thokomegwa na Jehova.’”

Dzi account idzedzi dze gubungano dzo tengwa ne mari a ka be a kobegwa disaster relief. Mari a nonga iyawo a no dusiwa ne bathu ne ku da ku batsha mu nshingo we shango yose. Bunji gwe zwipo izwezwe go dusiwa mu donate.jw.org. Tobokela zwipo zwinyu zwi no dusiwa ne moyonchena, zwi no batsha kakale mu nshingo we ku batsha mu shango yose.—2 Bakorinta 8:14.