Buka i no Batsha ku Zwidiya Baibili i Singa Fanane ne Dzingwe Choselele

Ne January 2021, Gubungano li no Laula la ka zibisa ku hulugwa kwe buka i no batsha ku zwidiya Baibili ptshwa inoyi, Shathila Buchilo Cha Chose!a Wa ka toleka chini ha u hwa zibiso iyeyi? Matthew, we Canada, akati: “Nda ka shatha! Ngono ku shatha kwangu kwa ka paphidzika ha dzindebo ne dzividiyo dzi no chenesa kuti ini tshambiso iyeyi ya ka thamiwa ne kuti ya ka amuchigwa chini. Nda ka be nda ka lingilila kwazo ku i bona ne ku tangisa ku i shingisa.”

Shathila Buchilo Cha Chose! i no lakidza zila ptshwa ye ku bata dzithuto dze Baibili. Ne kwa kajalo, ha te icho chi no thama kuti buka iyeyi ptshwa i si fanane ne dzibuka dzingwe dza ta ka tongo shingisa ku bata dzithuto dze Baibili. Ha ili kuti u no shingisa khopi ya ka printiwa ye Shathila Buchilo Cha Chose! pangwe wa ka elanjele kuti ha izo thamiwa se dzingwe. Ku bona kuti ini kwa kajalo, a ti lingisise buka iyeyi kwazo kuti ya ka thamiwa chini.

Buka Ptshwa ya ka Thamiwa ne Zila i Singa Fanane ne Dzingwe

Phepha godu. Ini la ka shingisiwa? Shathila Buchilo Cha Chose! ina zwitshwantsho zwina mibala i singa fanane zwino pinda 600, ko dwa kuti zwayo zo pinda zwe buka ye Baebele e re Ruta Eng? ku ngabe ka 10. Kakale buka iyeyi ptshwa i na ndawo chena ya ka paphidzika, i sa ka kwagwa chingwe kene doroiwa mu zebe dzayo. Zwithu izwezwi zwibili zo thama kuti ku be ne buthatha. Ha phepha lili thechanana kwazo u nga khona ku bona zwitshwantsho zwi kusi kwe zebe. Kuti ichechi chi si shingikale, bazwalani be International Printing Department (IPD), ku Wallkill, New York, U.S.A., ba ka lekeletsa maphepha a singa fanane ali 4 a no shingisiwa ngwenu mu dziprintara dzedu. Komiti i no Kwala ye Gubungano li no Laula, ya ka lingisisa lingwe ne lingwe le maphepha iyawa, ngono i ka shalula li singa be ne ngele kwazo. Nenguba phepha ileli li tengwa ne mari a pezhugwi kwe a no tenga phepha li no shingisiwa mu dzingwe dzitshambiso dzedu ne 16 phesente, lo thama kuti ba no zwidiya Baibili ba khone ku bala zebe ingwe ne ingwe ye Shathila Buchilo Cha Chose! ba singa bone zwitshwantsho zwi kusi kwe zebe iyeyo.

Khavara i singa fanane ne dzingwe. Khavara ye buka iyeyi ptshwa, haito lingika se khavara ye dzingwe dzibuka, ne kuti haizo khavariwa se dzingwe dzibuka kene ya ka khavariwa ne polasitiki. Pana kuti khavara ye buka iyeyi ptshwa i penye, ya ka thamiwa ne zila i no thama kuti cha ka doroiwa mu khavara chi boneke kwazo. Kakale khavara iyeyi i no batsha kuti buka i si tongo palugwa ne ku shingisiwa kwazo. Ne kwa kajalo, khavara iyeyi ya ka shingisiwa, i no tura ku ngabe ka 5 ku pinda khavara i no penya. Ndizo matabi manjinji a ka shingidzana kuti ku pelele kwa tengwa khavara ye matte i singa ture.

Ini kwa ka shingisiwa zwithu izwezwi zwi no tura? Nzwalani u no shingidzana ne IPD u no thalusa eti: “To kumbula kuti buka iyeyi i nowo shingisiwa kwazo, ndizo to shaka kuti i dwilile i lingika zwibuyanana ne i shingisiwa kwazo.” Eduardo, u no shingila ku Ofisi ye Printery ye litabi gwe Brazil, akati: “To shathila se kwa gubungano la Jehova la ka shingisa material we mamo a pezhugwi ku thama kuti buka iyeyi i nake, ya ka sima, ne shathisa ku i shingisa, ngono kakale ku shingisiwa zwipo zwe mari ne buchenjedu.”

Ku Printa mu Chibaka Che ku Wa Kwe COVID-19

Ta ka tangisa ku printa buka ye Shathila Buchilo Cha Chose! mu na March 2021. Ichechi ya ka ili chibaka che ku wa kwe COVID-19, ngono kwa ka sima kwazo. Bethele ya ka pelela ili mu lockdown, ta ka ti si nga khone batshiwa ne bazwalani ba no shinga be dwa kuzhe mu dzi-printery dzedu, kakale kwa ka be ku singa khoneke kuti ku be ne bazwalani batshwa ba no zha ku shingila ku bethele. Dzi-printery dzedu dzingwe dza ka pelela dzi si na bashingi ba ka lizana, ngono dzingwe dza ka zhaligwa mu chibaka chi futshwanana ne ntata ye milawo ya hurumente.

Mathatha iawa ose a ka khoneka chini? Ha dzi-printery dzedu dzo khona ku shinga, bazwalani ne dziazwadzi ba no dwa mu department dzingwe, ba ka kobegwa ku wo batsha ku printa. Joel u no shingidzana ne IPD akati “Ku zwidusa chibayilo kwabo ne duma ku zwidiya mishingo mitshwa, kwa ka thama kuti ti khone ku thama nshingo wa ko u sheteka.”

Nenguba ta ka lingisana ne mathatha, ta ka khona kale ku printa dzimiliyoni dze dzikhopi dze Shathila Buchilo Cha Chose! Ku dzi thama ko sheta zwithu zwinjinji, zwi nonga printing plates, laminate film, phepha, inki, ne zwi no batshanya. Ku printa koga mu mingwedzi ili 5, kwa ka shingisiwa mari a no pinda P26 486 570.00 mu ku tenga dzi-material koga. Kuti ti buluke mari, to printa koga palo ye dzibuka dzi no shetiwa dumbu ne makubungano.

“Nshingo we Butswiriri”

Ba no diya Baibili kose ne ba no zwidiya ba no zwihwa chini ne kwe buka iyeyi ptshwa i no batsha ku zwidiya Baibili? Paul, nzwalani u ku Australia, akati: “Shathila Buchilo Cha Chose! i no shathisa kwazo kakale ndo kholisa kwazo ha ndi i shingisa ku bata dzithuto dze Baibili. Buka ya ka thamiwa ne zila ya ka naka kwazo kakale i no thama kuti ku lebesaniwe ne malebeswa. I na zibiso ya ka lulwama i no hwikala kwazo, dzibuzo dzi no kutha moyo, dzividiyo, zwitshwantsho, dzi-chart, ne mazwimisilo a nga bigwa ne u no zwidiya. U nshingo we butswiriri u no thama kuti ndi diye ne zila ya ka lulwama kwazo.”

Nngwe u no zwidiya Baibili ku United States akati: “Ndo da buka iyeyi ptshwa kwazo. Zwitshwantsho zo thama kuti ndi hwisise dzikhani wulu zwibuyanana. Dzividiyo dzo kutha moyo wangu ngono dzo ndi sendedzela kuti ndi tole thambo.” Ndiyiwana iwoyo u no zwidiya kabili mu viki ngono u no be yapo mu zwidiyo zwe gubungano mu misi yose.

Dzimiliyoni dze dzikhopi dze Shathila Buchilo Cha Chose! dzi chowo prinitwa mu ndimi dzili dzinjinji. Malebeswa wukuti, Gubungano li no Laula la ka duma kuti ku tshambisiwe buka iyeyi ne ndimi dzili 710, ndimi dzili 340 ku pinda dza ka dza dumiligwa mu buka ye Baebele e re Ruta Eng?

Mari a no shingisiwa mu ku printa a no ruegwa chini? Ne mari a no dusigwa nshingo we shango yose, bunji gwawo a no dusigwa mu donate.jw.org. To bokela zwipo zwa u no dusa ne moyo nchena, zwi no ti batsha kuti ti thame zwi no batsha mu ku zwidiya Baibili, ku batsha ba no shaka ku zwidiya ne kwa Jehova kuti ndizo “bangatjila nge kusingapele.”—Pisalema 22:26.