THUTO 14
Ti Nga Namata Ndzimu Chini ne Zila ya a no Amuchila?
Se kwa ta ka zwidiya mu thuto ya ka pinda, ha te ili dzikereke dzose dzi no shathisa Ndzimu. Ne kwa ka jalo, ti nga khona ku namata Mbumbi wedu ne zila i no nshathisa. “Kunamata kwakalulwama” ku no nshathisa ndi kupi? (Jakuba 1:27) Bona chi no diyiwa ne Baibili.
1. Ku namata kwedu kwa ka fanila ku teyiwa mu ni?
Ta ka fanila ku namata Ndzimu ku dumilana ne Baibili. Jesu wa ka dwa Ndzimu eti: “Dama lenyu li malebeswa.” (Johani 17:17) Dzingwe dzikereke ha dzi to diya malebeswa a mu Dama le Ndzimu la ka dothedzegwa, Baibili. Ba ka misila malebeswa ne zwidiyo ne zwilenje kene ngwao dze bathu. Ngono Jehova ha a to shathisiwa ne bathu ba no “bigila ntome milayo ye Ndzimu.” (Bala Mako 7:9.) Ne kwa ka jalo, ha ti zwidiya ne ku shingikadza cha ti no zwidiya mu Baibili to nshathisa.
2. Ta ka fanila ku namata Jehova chini?
Ta ka fanila ku namata Jehova koga ne kuti ndiye Mbumbi wedu. (Zumbunulo 4:11) Ichecho cho dwa kuti ta ka fanila ku da ne ku namata iye koga, ti si nga shingise midzingwana kene zwitshwantsho.—Bala Izaya 42:8.
Ta ka fanila ku namata Jehova ne zila ‘yakayengemala inoamutjilika’ mu nli. (Baroma 12:1) Ichecho cho dwa kuti ta ka fanila ku chila ne milayo iye. Ha ti lakidzila, bathu ba no da Jehova ba no chila ne milayo iye ye ndobolo. Kakale ha ba to thama zwithu zwi nga longa machilo abo ne e bathu bangwe mu mbatsha, se ku thuta fojo, ku ja dzi-drugs, kene ku sa shingise busukwa zwibuyanana.a
3. Ini ta ka fanila ku namata Jehova ti na bangwe?
Zwidiyo zwedu zwe viki ne viki zo ti pa chibaka che ku ‘kudza Jehova mu gubungano.’ (Pisalema 111:1, 2) Zila ingwe ya ti no nkudza nayo ndi ne ku mba. (Bala Pisalema 104:33.) Jehova u no ti kumbila kuti ti be po ku zwidiyo ne kuti u no ti da, kakale u no ziba kuti zowo ti batsha ku shathila buchilo cha chose. Ha ti li ku zwidiyo to batshana.
ZWIDIYE KWA KA NGINILILA
Zwidiye kuti ini Jehova a si nga shake kuti ti shingise zwitshwantsho mu ku namata. Zwidiye zila dzi no tolegwa pezhugwi dza ti nga kudza Ndzimu nadzo.
4. Ha ti zo fanila ku shingisa zwitshwantsho mu ku namata kwedu
To ziba chini kuti Ndzimu ha a to shathila ku shingisiwa kwe zwitshwantsho? Zana VIDIYO, mu be mu lebesana ne kwe buzo i no tobela.
Kwa ka shingikalani ha bathu bangwe be Ndzimu ba ntolo be lika ku nnamata be shingisa ndzingwana?
Bathu bangwe ba no kumbula kuti ku shingisa zwitshwantsho kowo ba batsha ku be bakhwinya be Ndzimu. A dumbu kowo ba batsha kene kowo thama kuti ba thubukane ne Ndzimu? Bala Ekezodo 20:4-6 ne Pisalema 106:35, 36, mu be mu lebesana ne kwe buzo dzi no tobela:
I zwitshwantsho kene zwithu zwipi zwa wa ka bona bathu be zwi shingisa ha be namata?
Jehova u no zwiwa chini ne kwe ku shingisiwa kwe zwitshwantsho?
Iwe u no zwiwa chini?
5. Ku namata Jehova koga ko ti sunungula mu zwidiyo zwe manyepkhwa
Bona kuti ku namata Jehova ne zila ya a no amuchila ku nga ti sunungula chini mu zwidiyo zwe manyepkhwa. Zana VIDIYO.
Bala Pisalema 91:14, mu be mu lebesana ne kwe buzo i no tobela:
Jehova u no ti thembesani ha ti lakidza kuti to nda ne ku namata iye koga?
6. Ha ti li ku zwidiyo zwe gubungano to namata Ndzimu
Ha ti li ku zwidiyo zwe gubungano to kudza Jehova ne ku bakana ha ti mba ne ku dabila. Bala Pisalema 22:22, mu be mu lebesana ne kwe buzo dzi no tobela:
A wa ka shathila ku hwa bangwe be dabila ku zwidiyo zwe gubungano?
A u nga da ku zwibaakanyila ku dabila?
7. Jehova u no shathisiwa ne ku bona ti budza bangwe cha ta zwidiya
Ti na zwibaka zwinjinji zwe ku budza bangwe ne kwe malebeswa a mu Baibili. Bala Pisalema 9:1 ne 34:1, mu be mu lebesana ne kwe buzo i no tobela:
Ini cha wa ka zwidiya mu Baibili cha u nga shathila ku budza nngwe ne kwacho?
BATHU BANGWE BA KATI: “Kwa ka sima ku shathisa Ndzimu.”
Iwe u no kumbulani?
CHA WA ZWIDIYA
To shathisa Mbumbi wedu ha ti namata iye koga, ti nkudza ku zwidiyo zwe gubungano, ne ha ti budza bangwe ne kwe cha ta ka zwidiya.
U Nga Tini?
Ti nga zwidiya ngayi ne kwe ku namata Ndzimu ne zila ya a no amuchila?
Ini ta ka fanila ku namata Jehova koga?
Ini ta ka fanila ku namata Ndzimu ti na bangwe ba no shaka ku nshathisa?
SHAKISISA
Mu mbiko inoti, “A Ndi Cha Shingila Midzingwana,” bala se kwa nkadzi nngwe a ka lecha ku namata midzingwana.
“Baibili i no Shandula Machilo” (Thungamakole, July 1, 2011)
Zwidiye kuti ini chi nga ku batsha ku dabila ku zwidiyo zwe gubungano.
Bona se kwa nlume nngwe nchechana a ka batshiwa ne zwidiyo zwe gubungano nenguba kwa ka be ku nsimila ku be po ko.
Bathu banjinji ba no kumbula kuti chileyanyo (chiphambaano) cho milila Bukirisiti, ngono a ta ka fanila ku chi shingisa mu ku namata?
“Ini Bafakazi ba Jehova ba Si Nga Shingise Chileyanyo mu ku Namata?” (Web article)
a Khani idzedzi dzowo chenesiwa mu thuto dzi nowo tobela.