BATSHWA BA NO BUZWA

A Ndi Nga Dubikiwa?—Ipithu 1: Ku Dubikiwa ko Dwani?

Gole ne gole, batshwa banjinji ba no kudziwa se Bafakazi ba Jehova ba no dubikiwa. A u no shaka ku tola thambo iyeyi? Ha kwa ka jalo, kutanga ko sheteka kuti u hwisise kuti ku zwipa ne ku dubikiwa ko dwani.

Ku dubikiwa ko dwani?

Ku dubikiwa ku no lebgwa mu Baibili wu dubikiwa choselele mu vula—isi ku nyasiwa ne vula koga—ngono chifaniso chikulu kwazo.

Ku dubikiwa mu vula ko lakidza bose kuti ha u cha chilila ku zwishathisa koga.
Ku buda mu vula ko lakidza kuti wa chi tangisa ku chilila ku shathisa Ndzimu.

Ha u dubikiwa, u no be u lakidza bose kuti Jehova ndiye u na ndaulo ye ku biga zwilidzanyo zwe cha ka lulwama ne chi sa ka lulwama, ngono u no zibisa thembiso iyo ye ku thama ne ku da cha a no shaka kuti u chi thame.

Cha u nga kumbula ne kwacho: Ini wa ka fanila lakidza bose kuti u no shaka chilila ku hwa Jehova? Bona 1 Johani 4:19 ne Zumbunulo 4:11.

Ku zwipa ko dwani?

Ha u sathu u ka dubikiwa, wa ka fanila ku zwipa Jehova mu iphiri. Chini?

Mu ntembezelo uwo uli woga, u no budza Jehova u nthembesa kuti, u nowo nshingila chachose ne kuti u nowo thama cha a no shaka ne u nga lingisana ne mamo a ka tini.

Ku dubikiwa ku lakidza bose kuti wa ka zwipa mu iphiri. Ku lakidza bangwe kuti wa ka zwilandula ne bukuko ngono ngwenu u nthu wa Jehova.—Matewu 16:24.

Cha u nga kumbula ne kwacho: Ini buchilo gugo gu li butuka ha uli nthu wa Jehova? Bona Izaya 48:17, 18 na Bahebera 11:6.

Ini ku dubikiwa ili chithu chikulu?

Jesu wa ka leba kuti ku dubikiwa kwa ka fanila thamiwa ne badiyiwana babe. (Matewu 28:19, 20) Ndizo wale, ku dubikiwa kwa ka fanila thamiwa ne Bakirisiti. Malebeswa wu kuti Baibili i kati, i chithu chi no sheteka kuti ti chidziwe.—1 Pita 3:21.

Ne kwa kajalo, mazwimisilo awo e ku dubikiwa wu da ne ku boka Jehova. Mazwiwo awo a ka fanila fanana ne e mpisalema wa ka kwala eti: “Apa ndowopani Yahwe pezhugwi kwe bubuya gose gwabakandithamila kene? . . . ngono adana zina la Yahwe. Ndowoshingikadza tuna kwangu kuna Yahwe.”—Pisalema 116:12-14.

Cha u nga kumbula ne kwacho: Jehova wa ka ku thamila bubuya gupi, ngono u nga nruwela chini? Bona Ditironomi 10:12, 13 ne Baroma 12:1.

Ngano ne malebeswa

LINGANO — Bakulu ndibo ba chi kula zwibuyanana ba nga dubikiwa.

LEBESWA — Ku kula zwibuyanana ha ku to bongwa ne makole koga, ngono ko bongwa ne ku da Jehova ne ku zwimisila ku nhwa. Ha ba chi bachechana, Josefa, Samuele, na Josiya ba ka lakidza ku kula kwa kajalo. Batshwa banjinji ngwenu ba no thama chi no fanana.

Baibili ikati: “Na iye mwana unozwizibisa nge zwiyito zwizwe, kene zwili zwibuyanana kene zwakalulwama.”—Zwiani 20:11.

LINGANO — Ha ili kuti bakhwinya babo ba no dubikiwa nawe bo wa ka fanila dubikiwa bo.

LEBESWA — Thambo ye ku zwipa ne ku dubikiwa i no thamiwa ne nthu ali yega ngono ya ka fanila thamiwa ne moyo u no da. Ha te chithu che budumili kene chi no thamiwa ku yenda ne chilenje ha nthu e ngina mu makole a ka tini, cha wa ka fanila thama bo koga ne kuti bangwe ba ka chi thama kene u kumbula kuti bangwe ba ka lingilila kuti u chi thame.

Baibili ikati: “Bathu [be Ndzimu] banowozwipa.”—Pisalema 110:3.

LINGANO — Ha u sa ka dubikiwa, ha u to zwidabilila mu na cha u no thama.

LEBESWA — Ha u to zwidabilila mu na Jehova koga ha u dubikiwa, ngono u no zwidabilila mu nli ha u ziba cha ka lulwama ne chi sa ka lulwama mu mesho awe.

Baibili ikati: “Iye unoziba tjakalulwama tjaakafanila thama koga kasitjithame, unothama jinyo.”—Jakuba 4:17.

GUMBULUDZO: Ha ili kuti u no lemegwa ne ku tola thambo ye ku zwipa ne ku dubikiwa se Nkirisiti, ini u si nga tole thambo ye ku lingisana ne ku pedzisa ku cha kuko? U nga thama u jalo ne ku bala Kgaolo 37 ye buka ye Dipotso Tse Basha ba di Botsang—Dikarabo Tse di Nang le Tharabololo, Bolomo 2.