THUTO 23

Chingwe Chi no Tolegwa Pezhugwi Chi Nga ku Shathisa—Zwimisile ku Dubikiwa!

Ya ka Tshambisiwa

Jesu wa ka diya kuti Bakirisiti ba ka fanila ku dubikiwa. (Bala Matewu 28:19, 20.) Ngono ku dubikiwa ini? Pezhugwi kwa ikoko nthu wa ka fanila ku thamani kuti a dubikiwe?

1. Ku dubikiwa ko dwani?

“Dubika” i dama li no dwa ku longa kwa ka pelela mu vula. Ha Jesu e dubikiwa, wa ka longwa kwa ka pelela mu gwizi gwe Jorodani, ku dwa ipapo a ka “bhuda mu vula.” (Mako 1:9, 10) Ne zila i no fanana, Bakirisiti be malebeswa ba no dubikiwa ne ku longwa kwa ka pelela mu vula.

2. Ku dubikiwa ko lakidzani?

Ha nthu e dubikiwa, u no lakidza kuti wa zwipa Jehova Ndzimu. Nthu u no zwipa chini? A sathu a ka dubikiwa, ne ntembezelo ali yega, u no budza Jehova kuti u no shaka ku nshingila cha chose. U no thembesa ku namata Jehova koga ne ku thama kuti ku da kwe Ndzimu i be chithu chi no tolegwa pezhugwi mu buchilo gugwe. U no shalula kuti a ‘zwilandule . . . ne ku dwilila e tobela’ zwidiyo zwa Jesu ne mishingo iye. (Matewu 16:24) Ku zwipa kukwe ne ku dubikiwa ko thama kuti a khone ku be ne bukhwinya na Jehova ne ba a no namata nabo.

3. Nthu wa ka fanila ku thamani kuti a dubikiwe?

Kuti u zwibaakanyile ku dubikiwa, zwidiye ne kwa Jehova ne ku be ne dumilo mu nli. (Bala Bahebera 11:6.) Ha u dwilila u be ne luzibo, ne ku simisa dumilo iyo, u nowo da Jehova ne ku pinda. Ichecho chowo thama kuti u shake ku rera ne kukwe ne ku chila ne zila ya a no shaka. (2 Timoti 4:2; 1 Johani 5:3) Ha nthu e shalula “butjilo gwakalulwamila She, gunonshathisa nge buzhalo” u ngana a ka zwipa mu Ndzimu ne ku dubikiwa.—Bakolosa 1:9, 10.a

ZWIDIYE KWA KA NGINILILA

Bona cha ti nga zwidiya mu ku dubikiwa kwa Jesu ne se kwa nthu a nga zwibaakanyila ku dubikiwa.

4. Ti nga zwidiya mu ku dubikiwa kwa Jesu

Bala Matewu 3:13-17 ku zwidiya kwa ka paphidzika ne kwe ku dubikiwa kwa Jesu. Ku dwa ipapo mu be mu lebesana ne kwe buzo dzi no tobela:

A Jesu wa ka dubikiwa ali ngwana ntukununu?
Wa ka dubikiwa chini? A wa ka gasiwa ne vula?

Jesu wa ka tangisa nshingo uwe nkulu wa a ka piwa ne Ndzimu mu shango shule kwe ku dubikiwa. Bala Luka 3:21-23 na Johani 6:38, mu be mu lebesana ne kwe buzo i no tobela:

Jesu wa ka tolela pezhugwi nshingo upi mu buchilo gugwe shule kwe ku dubikiwa?

5. U nga khona ku shingikadza mazwimisilo e ku dubikiwa

Kutanga, ku kumbula ku zwipa ne ku dubikiwa ku nga lingika ili chingwe chi no lema cha u si ngake u ka khona. Ngono u nga zwibaakanya ku swikilila u be mu chimo cha u no zwiwa kuti u nga shingikadza mazwimisilo awo e ku dubikiwa. Kuti u bone bangwe ba ka thama ichecho, zana VIDIYO.

Ku Tangisa Bukhwinya na Jehova (1:11)

Bala Johani 17:3 na Jakuba 1:5, mu be mu lebesana ne kwe buzo i no tobela:

Ini chi nga batsha nthu ku zwibaakanyila ku dubikiwa?

A. Nkadzi u no tembezela ku zwipa mu Ndzimu.

B. U no pelela e dubikiwa se nngwe we Bafakazi ba Jehova, ne ku longwa kwa ka pelela mu vula.

To zwipa ne ku budza Jehova kuti to shaka ku nshingila cha chose
Ha ti dubikiwa to lakidza ba ka lingilila kuti ta zwipa mu Ndzimu

6. Ha ti dubikiwa to tangisa ku be mu nsha wa Jehova

Ha ti dubikiwa, to be mu nsha we shango yose u ngompela. To dumila chi no fanana, to chila ne milayo ye ku zwibata i no fanana, nenguba ti sa ka kudziwa ne zila dzi no fanana. Bala Pisalema 25:14 na 1 Pita 2:17, mu be mu lebesana ne kwe buzo i no tobela:

Ku dubikiwa ko ama chini bukhwinya gwe nthu na Jehova ne bangwe ba no nnamata?

Zwitshwantsho: Azwadzi wa ka dubikiwa u no shathila ku kumbula ne kwe bukhwinya gugwe ne bangwe ba mu gubungano. 1. U no budza azwadzi nngwe mathatha awe. 2. U no batsha azwadzi wa ka kwegula ku yenda. 3. U no ja zojiwa ne bakhwinya be makole a ka siyasiyana. 4. U no rerela nlume e batshiwa ne azwadzi nngwe. 5. U no zwitola itshwantsho ne boazwadzi babili be njudzi dzingwe ku nshangano.

BATHU BANGWE BA KATI: “A ndi to li mu chimo che ku dubikiwa.”

Ha u zwiwa ne zila ya ka jalo, a u no kumbula kuti ku dubikiwa i chingwe chi no tolegwa pezhugwi cha u nga zwimisila icho?

CHA WA ZWIDIYA

Jesu wa ka diya kuti Bakirisiti ba ka fanila ku dubikiwa. Kuti nthu a khone ku dubikiwa, wa ka fanila ku tangisa ku simisa dumilo iye mu na Jehova, ku chila ne milayo Iye, ne ku zwipa mu Nli.

U Nga Tini?

Ku dubikiwa ko dwani, kakale ini ili chithu chi no tolegwa pezhugwi?
Ku zwipa ne ku dubikiwa ko yendidzana chini?
Nthu wa ka fanila ku thamani kuti a pelele a zwipa ne ku dubikiwa?

Thuto ya pela ne:

Zwimisile

Lingisisa zwi no shakika ku bupelo gwe Ipithu 4, “A Ndi mu Chimo Che ku Rera ne Gubungano?” kakale “A Ndi mu Chimo Che ku Dubikiwa?,” ku bona kuti a u nga fanilika mu chibaka cha swika.

Ne:

Your other goal

SHAKISISA

Zwidiye kuti ku dubikiwa ko dwani kakale ha ku to dwani.

“Ku Dubikiwa ko Dwani?” (Web article)

Buyilila zila dzi nga batsha nthu kuti a pelele ali mu chimo che ku dubikiwa.

“Ludo ne Boka Jehova ko Pelela ne Kolobetsiwa” (Thungamakole, March 2020)

Bala ne se kwa ku dubikiwa kwe nlume nngwe kwa ka be ku si koga ne mabaka e mazwiwo awe.

“Ba ka be Shaka Kuti Ndi Zwibonele Malebeswa ne Bukwangu” (Thungamakole, February 1, 2013)

Bona se kwa ku dubikiwa ili chingwe chi no tolegwa pezhugwi cha u nga zwimisila, kakale ne se kwa u nga zwibaakanyila iko.

“A Nda ka Fanila ku Dubikiwa?” (Buzo Dzi no Buzwiwa ne Batshwa—Dabilo Dzi no Shinga, Volume 2, thuto 37)

a Ha nthu a ka tongo dubikiwa mu kereke ingwe, u nowo fanila kuti a dubikiwe kakale. Ne kutini? Ne kuti kereke iyeyo ha izo ndiya malebeswa a mu Baibili.—Bona Mishingo 19:1-5 ne Thuto 13.