THUTO 13
Se Kwa Budumili Gwe Manyepkhwa gu Diya Manyepkhwa Ne Kwe Ndzimu
Ha ili kuti Ndzimu ludo, ini dzikereke dzi noti dzo milila Ndzimu dza ka thama zwithu zwinjinji zwa ka bipa? Dzikereke idzedzi ndi dze manyepkhwa, cha ba no leba ne cha ba no thama cho thama kuti bathu ba dumile manyepkhwa ne kwe Ndzimu. Ba ka diya manyepkhwa api ne kukwe? Ndzimu iye u no zwiwa chini? Ngono u nowo thamani?
1. Budumili gwe manyepkhwa go diya manyepkhwa chini ne kwe Ndzimu?
Be dzikereke dze manyepkhwa “banotenganya malebeswa ngekwe Ndzimu nge manyepkhwa.” (Baroma 1:25) Ha ti lakidzila, dzikereke dzinjinji ha dzi zo diya bathu badzo zina le Ndzimu. Ne kwa ka jalo, Baibili ikati ta ka fanila ku dana Ndzimu ne zina lile. (Juwele 2:32) Badiyi bangwe ba kati ha ku shingikala chingwe cha ka bipa, i ku da kwe Ndzimu. Ngono ichecho i manyepkhwa. Ndzimu ha te ili iye u no thama kuti zwa ka bipa zwi shingikale. (Bala Jakuba 1:13.) Chi no gwadza wuti, manyepkhwa e dzikereke a ka thama kuti bathu ba simigwe ne ku da Ndzimu.
2. I mishingo ipi ye budumili gwe manyepkhwa i si nga dumilane ne kuda kwe Ndzimu?
Budumili gwe manyepkhwa ha gu to tola bathu sa Jehova. Ha Baibili i leba ne kwago i noti “zwibi zwizwe zwakabutitikwa kunoswika kudzimu.” (Zumbunulo 18:5) Mu makole manjinji, dzikereke dza ka zwilonga mu dzipolotiki, dza ka be ne chiabe mu dzinghwa, kakale dza ka bulaya kene ku dumilila ku bulawa kwe bathu banjinji. Bangwe badiyi ba no da fungwa kwazo kakale ba no shaka kuti batobeli babo ibe ibo ba no ba pa mari. Mishingo iyeyi i no lakidza kuti ha ba to ziba Ndzimu, ku no thama kuti ba si be ne fanilo ye ku mmilila.—Bala 1 Johani 4:8.
3. Ndzimu u no zwiwa chini ne kwe budumili gwe manyepkhwa?
Ha ili kuti zwithu zwi no thamiwa ne dzikereke dze manyepkhwa ha zwi to ku shathisa, u no kumbula kuti Jehova iye u no zwiwa chini? U no da bathu, ngono ha a to shathisiwa ne badiyi ba no diya bathu manyepkhwa ne kukwe kakale ba si nga bate batobeli babo zwibuyanana. U no thembesa kuti budumili gwe manyepkhwa gowo chinyiwa ngono ‘agutowofa gwabong’wa kakale.’ (Zumbunulo 18:21) Mu chibaka chifutshwanana, Ndzimu u nowo pedzisa dzikereke dzose dze manyepkhwa.—Zumbunulo 18:8.
ZWIDIYE KWA KA NGINILILA
Zwidiye kwa ka paphidzika kuti Ndzimu u no zwiwa chini ne kwe budumili gwe manyepkhwa. Bona kuti budumili gwe manyepkhwa gwa ka thamani kakale, ne kuti ini ichecho chi sa ka fanila ku ku misa ku zwidiya ne kwa Jehova.
4. Ndzimu ha a to amuchila dzikereke dzose
Bathu banjinji ba no dumila kuti dzikereke dzi nga fanisiwa ne zila dzi si nga fanane dzi no yesa ku Ndzimu. A ichecho malebeswa? Bala Matewu 7:13, 14, mu be mu lebesana ne kwe buzo i no tobela:
Baibili i no tini ne kwe zila i no yesa ku buchilo?
Zana VIDIYO, mu be mu lebesana ne kwe buzo i no tobela.
A Baibili i no diya kuti kuna budumili gunjinji gu no shathisa Ndzimu?
5. Budumili gwe manyepkhwa ha gu to lakidza ludo gwe Ndzimu
Dzikereke dze manyepkhwa dza ka diya manyepkhwa ne kwe Ndzimu ne zila dzinjinji. Ingwe zila ya ka bipa wu ku nginilila mu dzinghwa. Ku bona chilakidzilo, zana VIDIYO. Mu be mu lebesana ne kwe buzo dzi no tobela.
Dzikereke dzinjinji dza ka thamani mu Nghwa ye Bubili ye Shango?
U no zwiwa chini ne kwe zwa ba ka thama?
Bala Johani 13:34, 35 ne 17:16. Ku dwa ipapo mu lebesane ne kwe buzo dzi no tobela:
U no kumbula kuti Jehova u no zwiwa chini ha dzikereke dzi nginilila mu dzinghwa?
Dzikereke dze manyepkhwa dza ka thama zwithu zwinjinji zwa ka bipa. Wa ka bonani chi no lakidza kuti dzikereke dza ka kongwa ku lakidza ludo gwe Ndzimu?
Budumili gwe manyepkhwa ha gu zo lakidza ludo gwe Ndzimu
6. Ndzimu u no shaka ku batsha bathu ku lecha budumili gwe manyepkhwa
Bala Zumbunulo 18:4,a mu be mu lebesana ne kwe buzo i no tobela:
U no zwiwa chini ne kwe ku ziba kuti Ndzimu u no shaka ku batsha bathu ba ka lashiwa ne budumili gwe manyepkhwa?
7. Dwilila u zwidiya ne kwe Ndzimu we malebeswa
A zwithu zwa ka bipa zwi no lebgwa ne ku thamiwa ne budumili gwe manyepkhwa zwa ka fanila ku ama zila ya u no linga Ndzimu nayo? Kumbula ne kwe ngwana we chilume u no lamba ku hwilila tate babe, a ka buda mu nzi e be e no chila buchilo gwa ka bipa. Tate babe ha ba to amuchila zila iye ye buchilo. Ini u si nga ke u ka bona tate ibaba nlandu ne kwe zila ye buchilo ye ngwana wabo u si nga hwe?
A kowo be kwa ka lulwama ku bona Jehova nlandu ngono u be u misa ku zwidiya ne kukwe koga ne kuti budumili gwe manyepkhwa go thama zwithu zwa ka bipa?
BATHU BANGWE BA KATI: “Ha nto shaka ku ziba ne kwe Ndzimu ne kuti budumili ndigo gu no thama mathatha manjinji.”
A u no zwiwa ne zila iyeyo?
Ini mishingo ye budumili gwe manyepkhwa i sa ka fanila ku ama zila ya ti no linga Jehova nayo?
CHA WA ZWIDIYA
Budumili gwe manyepkhwa gwa ka diya manyepkhwa ne kwe Ndzimu gu shingisa zwidiyo zwago zwe manyepkhwa ne mishingo ya ka bipa. Ndzimu u nowo pedzisa budumili gwe manyepkhwa.
U Nga Tini?
U no zwiwa chini ne kwe zwidiyo ne mishingo ye budumili gwe manyepkhwa?
Jehova u no zwiwa chini ne kwe budumili gwe manyepkhwa?
Ndzimu u nowo thamani ne kwe budumili gwe manyepkhwa?
SHAKISISA
Zwidiye se kwa dzikereke dzinjinji dzi si nga shathise Ndzimu ne zila dzili mbili.
Ini Jehova e shaka kuti ti nnamate ti na bangwe?
“A ko Sheteka ku be Nngwe we be Budumili gu na Ndongoloso?” (Web article)
Mpirisiti wa ka be e dziyidziwa ne kereke iye. Ngono ichecho a chi zo mmisa ku zwidiya malebeswa ne kwe Ndzimu.
“Cha ka Thama Kuti Mpirisiti a Leche Kereke Iye” (Mukani!, February 2015)
Mu makole manjinji, dzikereke dza ka diya manyepkhwa a no thama kuti Ndzimu a lingike a si nga de bathu.
“Manyepkhwa a no Thama Kuti Ndzimu a Lingike a Sina Ludo” (Thungamakole, November 1, 2013)
a Ku bona kuti ini buka ye Zumbunulo i chenesa budumili gwe manyepkhwa se nkadzi u no dangwa Bhabhiloni Nkulu, bona Zibiso ya ka Paphidzika 1.