GALANI MA KA LINDA!
Batizhi ba li Dzimiliyoni ku Dwa ku Ukraine—Ba mu Mathatha
Chisole che Russia cha ka tangisa ku nginilila Ukraine ne February 24, 2022, ichechi chi ka thama kuti bathu ba lingisane ne zwimo zwa ka bangalala kwa ba no gwisa ku tizha chinyolocho.a
“Dzibomu dza ka dzi phutuka. Kwa ka be ku chisa dumbu, kwa ka sima ku shaka matama a no ku chenesa. Ha ti hwa kuti ku na tirina dzi no tizhisa bathu, ta ka bona kuti ti yende bo. Ta ka ta fanila siya chingwe ne chingwe ne kuti nthu wa ka a nga tola begi li ngompela koga. Ta ka ti nga tola dzipampiri dzi no sheteka, miti, vula, ne zojiwanyana zwitukununu koga. Ta ka siya zwithu zwingwe zose ti ko yenda ku tirina, dzibomu dza ka bata dzi phutuka ku ti poteleka.”—Nataliia, ku dwa ku Kharkiv, Ukraine.
“Mu chibaka chose zwacho, ta ka ti tola kuti a ku nga be ne nghwa. Nda ka hwa ku phutuka mu ntha ingwe ye toropo, ngono ma-fensetere a ka be e zunguzika. Nda ka bona kuti ndi tizhe, nda ka bata zwithu zwi no sheteka koga. Nda ka milika mu nzi ne 8:00 maphakela ndi ko tatha tirina i no yenda ku Lviv, ku dwa po a bata bazi i no yenda ku Poland.”—Nadija, ku dwa ku Kharkiv, Ukraine.
Mu nsholo iwoyi
Ini chi no thama kuti ku be ne batizhi ba mu mathatha?
Mathatha e batizhi ku Ukraine a ka tangisa ne mabaka e ku nginilila kwe masole e Russia. Ne kwa ka jalo, Baibili i no lakidza mabaka aka nginilila a no thama kuti ku be ne batizhi ba mu mathatha:
Mibuso ye bathu mu shango yose ya ka kongwa batsha bathu. Ba no busa ba no shingisa masimba abo ku tshambilidza bathu.—Nreri 4:1; 8:9.
Satani Diabulu, “mbusi we shango ino,” uno sendedzela bathu ne bubi sekwa Baibili iti: “Shango yose imu simba le mbiimbi.”—Johani 14:30; 1 Johani 5:19.
Pezhugwi kwe mathatha a ka wila bathu ne makole manjinji, ngwenu to chila mu chibaka cha ka lebegwa mbeli ne Baibili kuti: “Kowobe nge misi yakabangalala mu mazhuba e bupelo.” (2 Timoti 3:1) Kakale, mazhuba iyawa a nowobe ne dzi nghwa, ngozi dzi sa ka lingiligwa, bhamba, ne magwele—mamo a no thama kuti bathu ba tizhe.—Luka 21:10, 11.
Batizhi ba nga bona thembo ngayi?
Baibili i no lakidza kuti Mbumbi wedu, Jehova,b i Ndzimu u na ludo ne mahwilazogwadza mu batizhi ne bathu ba ka pelela ba lecha mizi yabo. (Ditironomi 10:18) U no thembesa ku misa mathatha e batizhi e shingisa mbuso we kudzimu, u no dangwa Bushe gwe Ndzimu, gu nowobe mu bumo gwe mibuso ye bathu. (Daniele 2:44; Matewu 6:10) Jehova u nowo shingisa Bushe gugwe ku pedzisa Satani Diabulu. (Baroma 16:20) Bushe igogu gowo busa shango yose, gu ka pedzisa ku thubukana ku no yetiwa ne dzi bodara dze shango. Bathu bose mu shango ba nowobe nsha u ngompela. A kuna u nowo fanigwa ne tizha mu nzi uwe, ne kuti Baibili i no thembisa kuti: “Mmwe ne mmwe unowogala kusi kwe nzhambi uwe na kusi kwe mpaya uwe ngono akuna ungabatjisa ngoti Yahwe Masimbawose balebeleka.”—Mika 4:4.
Bushe gwe Ndzimu koga gu nga pedzisa cha chose mathatha e batizhi a ti nawo ngwenu. Jehova u nowo shingisa Bushe gugwe ku pedzisa mathatha a no thama kuti bathu ibe batizhi. Bona zwilakidzilo:
Nghwa. “[Jehova] banothama kuti ngwa dzime.” (Pisalema 46:9) Ku bona kuti u nowo pedzisa chini ku sa hwanana, bala nsholo u noti “Kagiso mo Lefatsheng—E Tla Tla Jang?”
Ku tshambilidza ne bugebenga. “Mukutshambilidzwa nenge kuhwisiwa zogwadza, [Jehova] unobatjidza.” (Pisalema 72:14) Ku hwisisa sekwa bathu ba nga shandula buthu gwabo gu sa ka lulwama bala misholo i noti “Letlhoo le ka Fedisiwa.”
Bushayi. “[Jehova] unotjidza basheti abedana.” (Pisalema 72:12) Ku bona kuti Ndzimu u nowo pedzisa chini, chi no thama kuti ku be ne bushayi, bala nsholo u noti “A go Ka Kgonega Gore go Nne le Tsamaiso e e Siameng ya Ikonomi?”
Ku pela kwe Zojiwa. “Dzene shango ingabe ne mathunde manjinji.” (Pisalema 72:16) Ku bona kuti Ndzimu u nowo thama chini kuti ku si tongobe ne u nowobe ne zhala, bala nsholo u noti “Lefatshe Le le Se Nang Tlala?”
A Baibili i nga batsha batizhi ngwenu?
Ee. Pezhugwi kwe kupa batizhi thembo ye malebeswa, Baibili i nga ba batsha mu mathatha a bano lingisana nawo ngwenu.
Nlawonteyo we Baibili: “Tjilengwe tjoduma tjimwe ne tjimwe, koga ntjenjedu unolinga kwaanoyenda..”—Zwiani 14:15.
Cha u no dwa: Kumbulila mamo a nga ku longa mu ngozi ne sekwa u nga mililana nawo. Zwi thokomele mu zwigebenga zwi no thasela batizhi ba mu ndawo tshwa.
Nlawonteyo we Baibili: “Koga ha kuli kuti tina zojiwa ne zwiambalo, takafanila kugutshiwa ndi ikoko.”—1 Timoti 6:8.
Cha u no dwa: Si kumbule kwazo ne kwe zwithu zwi no boneka. Ha u gutshika nekwe zwa u no sheta, u nowo shatha.
Nlawonteyo we Baibili: “Tjimwe ne tjimwe tjamunoyemula kuti bamwe bamuyitile itjo, mubayitile itjobo, ngobe oyu ndiwo nlayo ne balebesambeli.”—Matewu 7:12.
Cha u no dwa: Ibe ne moyonlefu ne buthu. Ichecho chowo thama kuti ba mu ndawo ya uli mu ili ba ku amuchile ne ku ku hlonipha.
Nlawonteyo we Baibili: “Musibgwilizile nge tjakabipa. Ibeni ne njele kushinga tjakafanila mu mesho e mmwe ne mmwe.”—Baroma 12:17.
Cha u no dwa: U si leche bushongola ku thama kuti u zwi buzuluzile ha u singa bakhwe zwibuyanana. Ne kuti zwithu zwi nga chinyikila mbeli.
Nlawonteyo we Baibili: “Ndingashinga tjimwe ne tjimwe nge simba lile, iye unondisimisa..”—Bafilipi 4:13.
Cha u no dwa: Thama kuti Ndzimu a zhe takhwa mu buchilo gugo kakale u ntembezele. U nowo ku simisa.
Nlawonteyo we Baibili: “Musidziyidzike nge tjimwe, koga kumbilani tjimwe ne tjimwe mu Ndzimu nge mitembezelo nenge kuboka. Ngono kunyalala kwe Ndzimu kopinda hwisiso yose.”—Bafilipi 4:6, 7.
Cha u no dwa: Kumbila Ndzimu ku kupa mbakiso ye nkumbulo, mu chimo cha u li mu chili. Bona nsholo u noti “Philippians 4:6, 7—‘Do Not Be Anxious About Anything.’”
a Zhuba shule kwe ku nginilila ikoku, United Nations High Commissioner for Refugees (UNHCR) ya ka leba kuti chimo yaka ibe ili cha ka bangalala kwazo. Mu mazhuba a li 12, batizhi ba no pinda 2 miliyoni, ba kabe ba tizhila ku shango dzi pejo ne Ukraine, ngono ba li 1 miliyoni baka be ba sina pa ba no gala.
b Jehova i zina le Ndzimu. (Pisalema 83:18) Bona nsholo u noti “Jehova Ndi Yani?”