Ku Dubula Bangwe ne Dzithobolo ku no Chenamisa ku no Shingikala mu Shango Yose—Baibili Ikatini?

Ne July 2022, kwa ka be ne ku dubula bangwe ne dzithobolo ku no chenamisa kwa ka shingikala mu shango yose:

• “Ku bulawa kwe lepolotiki li no zibgwa kwazo ku Japan [Shinzo Abe, wa ka tongo be Prime Minister] kwa ka zunguza shango yabo kakale ku ka chenamisa bathu mu shango yose, ne kuti Japan ha i na bugebenga gunjinji kakale i na milawo ye ku shingisa dzithobolo ya ka gagamala.”—July 10, 2022, The Japan Times.

• “Shango ye Denmark ya ka chenama ha nlume wa ka bata thobolo e bulaya bathu bali batatu ku Copenhagen shopping mall.”—July 4, 2022, Reuters.

• “Ku South Africa: Bathu bali 15 ba ka fa shule kwe kuti balume ba dubule dzithobolo mu bara ku Soweto.”—July 10, 2022, The Guardian.

• “Bathu ba no pinda 220 ba ka dubugwa ne ku bulawa ku United States ku shingisiwa dzithobolo mu wikenti ye dziholideyi dze viki ye July 4.”—July 5, 2022, CBS News.

A kuna thembo ye kuti ku da nghwa kwa ka jalo kowo pela? Baibili ikatini?

Ku Pela Kwe ku Da Nghwa

Baibili i no dana chibaka cha ti no chila mu chili iti “mazhuba e bupelo,” chibaka cha ku nowobe bathu bali bugali, ba ka bipa kakale bali bushongola. (2 Timoti 3:1, 3) Mazwibato a kajalo e ku da nghwa, ano thama kuti bathu ba chile ba sa ka sungunuka. (Luka 21:11) Ne kwa kajalo, Baibili i no thembesa chibaka cha ku nowo pedzisiwa ku da ngwa kakale “bathu banowogala mu magalo ana mbakiso, mu magalo akabakililika, mu magalo ana kunyaluluka kusina tjingabatshonyonga.” (Izaya 32:18) Ku da nghwa kowo pela chini?

Ndzimu u nowo dusa bathu babi ne ku chinya zwibayano zose.

• “Ngono babiibi banowodusiwa mu shango.”—Zwiani 2:22.

• “[Ndzimu] banothama kuti ngwa dzime ne kunopelela shango; banovuna dati bakathubulila thumo banopisa zwivikili nge moto.”—Pisalema 46:9.

Ndzimu u nowo diya bathu ku chila ne mbakiso ngono ne zila iyeyo u nowo misa ku da nghwa kose.

• “Azwingakubadze kene kuli kutjinya mu dombo langu lose lakayengemala, ngoti shango inowobe ili zhele kuziba Yahwe se vula yakaanga gungwa.”—Izaya 11:9.

• Na ngwenu, Ndzimu u no diya bathu mu shango yose ku lamba ku da nghwa ne ku shingisa zwibayano, ndizo “banowothula makanu abo bethama zwikara zwe mapadza ne mathumo abo bethama mipanga inosunulila.”—Mika 4:3.

Ku zwidiya kwa ka paphidzika ne kwe thembeso ye Baibili ye ku chila mu shango ya ti nowo be ti si nga che chingwe, bala nsholo u noti “Go Tshela o sa Boife Sepe—A go Ka Kgonega?”

Ku zwidiya ne kwe chi nga pedzisa ku da nghwa cha chose, bala nsholo u noti “Kgabagare Lefatshe la Nna mo Kagisong!”