Brais Seara/Moment via Getty Images
GALANI MA KA LINDA!
Dzizhala Wulu—Baibili Ikatini?
“China i no bika pisa ‘ku kulu kwazo’ ne chilimo che butatu chi si na vula chi sathu chi ka tongo be po.”—The Guardian, September 7, 2022.
“Ko lebegwa mbeli kuti kowo be ne gole lingwe le bo 5 ku si na vula i no na mu shango dzingwe dzi mu Africa.”—UN News, August 26, 2022.
“Shango dze Europe dzi no pinda gaswa dzowo be ne zhala wulu kwazo i sathu i ka tongo be po mu makole a li 500 a ka pinda.”—BBC News, August 23, 2022.
Be sainsi ba no lebela mbeli kuti zhala iyeyi i nowo dwilila i bipila mbeli kwazo. A ti nga themba kuti zwithu zowo lulwama mu chibaka chi no zha? Baibili i ka tini?
Dzizhala ne buporofiti gwe Baibili
Baibili ya ka lebela mbeli ne kwe mazhuba a ti no chila mu ali:
‘Kowobe. . . ne bhamba kene zhala mu dzindawo ne ku tobedzana.’—Luka 21:11.
Ha vula i singa ne kanjinji ko pelela ku si na zojiwa. Ku thayela ikoko kwe zojiwa, ne dziyila ne lufu, zose izwezwi zo shingikadza buporofiti gwe Baibili.—Zumbunulo 6:6, 8.
Ini ku na zhala kwazo ngwenu?
Baibili i no lakidza libaka gwe ntewo gwe ku be ku na zhala kwazo ngwenu. I kati:
“Akute kuli mu nthu kuti alaule thambo dzidze.”—Jeremiya 10:23.
Ichecho cho dwa kuti bathu a ba to khona ku ‘laula thambo’ dzabo, kene ku zwibusa. Ku sa shingisa zwithu zwibuyanana kwabo kanjinji ko pelela ne zhala ne thayela kwe vula.
Bazibi be sainsi banjinji ba no duma kuti mishingo ye bathu ndiyo i no thama kuti zhuba li pise kwazo, ku pelela ne ku paphidzika kwe zhala mu shango yose.
Mishingo ye bathu ye bugovu kose ne milayo i no thamiwa ku si nga kumbuligwe chibaka chi no zha, ndiko ku no thama kuti miti i pele, longa shangwa, ne ku sa shingisa zwithu zwi mu shango zwibuyanana. Kose ikoko ku nga na ku ka thama kuti ti thayelegwe ne vula ya ti no sheta.
Ne kwa ka jalo Baibili i no ti pa thembo.
A ti nga themba kuti zwithu zowo lulwama mu chibaka chi no zha?
Baibili i no thembesa kuti Ndzimu u nowo pedzisa mathatha e vula a yapo ngwenu. Chini?
1. Ndzimu u nowo “lobesa [kene chinya] ibabo banolobesa shango.” (Zumbunulo 11:18) U nowo pedzisa chi no thama kuti vula i thayele—bathu ba sa ka lulwama, ba na bugovu ba no chinya shango ne mishingo yabo ya ka bipa.—2 Timoti 3:1, 2.
2. “Nsetje unopisa unowoshanduka ukabe dziba.” (Izaya 35:1, 6, 7) Ndzimu u nowo thamunula chinya kwa ka thamiwa ne ku pisa e be e thama kuti shango iyeyi i be paradaisi i na vula njinji.
3. “Mokumba [kene mo thokomela] shango mukayidilidzila, moyifumisa kwazo.” (Pisalema 65:9) I segohatsiwa ne Ndzimu, shango i nowo be ne zojiwa zwinjinji zwakanaka kose ne vula mbuyanana.