A Zwichaba Zwi Nga Shingidzana ku Misa Kuti ku si Tongo be ne Mathatha a no Chinya e Climate?—Baibili Ikatini?

Ne Sunday, November 20, 2022, Conference inoyi COP27, United Nations Climate Change ya ka pela. Nenguba kwa ka thamiwa chidumano che ku batsha ne mari shango dzi no amiwa ne ku chinyiwa ne climate, ngono banjinji ha ba to duma kuti ichecho chowo misa mathatha e ku shanduka kwe climate.

• Ne November 19, 2022, António Guterres, secretary-general we United Nations wa ka leba eti: “Ndo shathila kuti ta dumilana ku bigila ntome mari a nowo batsha bathu ba no sokodziwa ne climate change. Ku pachena kuti a ko zo lizana . . . planeti yedu i china mathatha.”

• Ne November 20, 2022, Mary Robinson, wa ka tongo be ali president we Ireland kakale wa ka tongo be UN High Commissioner for Human Rights wa ka leba eti: “Shango i ngana i ka lingisana ne ku shanduka ku kulu kwe climate, ku nowo ama nngwe ne nngwe ne zila i sa ka lulwama.”

Batshwa ndibo kwazo kwazo ba no tshwenyiwa ne chi nowo shingikalila planeti yedu. Ne kwa kajalo, a zwichaba zwi nga shingidzana dzose kuti zwi thame chingwe ne kwa ichecho? Baibili ikatini?

A zwichaba zowo shangana ngono zwi ka khona?

Baibili i no lakidza kuti ne ku ka shinga kwazo ne masimba, ngono ba no shanganyigwa ba nga shinga ne malebeswa, zwichaba ha zwi nga khone ku pedzisa mathatha wose e climate. Elanjele mabaka mabili a no lakidza kuti ini ba singake ba ka khona:

• “Tjakakombama atjingatambunudziwe.”—Nreri 1:15.

  Chi no dwa kuti: Bohurumente ba no kongwa ne kuti bathu ha ba zo thamigwa kuti ba zwibuse. (Jeremiya 10:23) Dumbu ne zwichaba zwi ka shangana, a zwi ngake zwi ka khona ku pedzisa mathatha e shango, ne ba ka gwisa kuli ku ngapani.

• “Ngobe bathu banowobe nge kuzwida ne kuda mari . . . ne kusazwiibhatigwana.”—2 Timoti 3:2, 3.

  Chi no dwa kuti: Baibili ya ka lebela mbeli ne malebeswa kuti bathu mu mazhuba iyawa a ngwenu ba nowo be ba na bugovu ba singa shake ku shingidzana ne bangwe ku thama cha ka lulwama.

Libaka gwe kube ne thembo

Ne kwa kajalo, mazhuba e planeti yedu a no zha ha a to laugwa ne chi no thembesiwa ne buhurumente be bathu. Ndzimu wa ka biga Mbusi we shango u na bukhoni, Jesu Kirisiti. Baibili i no leba iti ne kukwe:

• “Mbuso unowobe mu mathudzi awe. Unowodang’wa Nkumbuludzi Unotjenamisa, Ndzimu Wakasima, Tate nge kusingapele, Mambo we Kunyalala.”—Izaya 9:6.

Jesu i She we Bushe gwe Ndzimu, kene hurumente we kudzimu. (Matewu 6:10) U na masimba, ne buchenjedu, kakale u no yemula ku thokomela planeti yedu kose ne ba no gala mu ili. (Pisalema 72:12, 16) Ha e busa, hurumente iwoyo we kudzimu u nowo chinya ibabo ‘ba no chinya shango’ ne ku lulwamisa chimo che planeti yedu.—Zumbunulo 11:18, Izaya 35:1, 7.

Ku zwidiya kwa ka paphidzika ne kwe ku pedzisiwa choselele kwe chinya kwe ku shanduka kwe climate, bala nsholo u noti “Ku Shanduka Kwe Climate ne Zwi Chowo Shingikala—Baibili Ikatini.”