BATSHWA BA NO BUZWA
Ini Nda ka Fanila ku Tembezela?
Mu ku shakisisiwa kungwe kwa ka tongo thangwa, 80 phesente ye batshwa be America ba no tembezela, ngono mu na i babo ipithu che palo yabo ndicho koga chi no tembezela mazhuba wose. Ndizo, bangwe be zwibuzwa: ‘Apa ntembezelo i chingwe chi mu nkumbulo koga, kene i chingwe chi no pinda ichecho?’
Ntembezelo ini?
Ntembezelo wu lebesana dumbu ne mbumbi we zwithu zose. Kumbula kuti ikoko ko dwani! Jehova u no pinda nthu ne zila dzose, ngono a si “kule kule ne mmwe ne mmwe wedu.” (Mishingo 17:27) Iko dumbu, Baibili i no koka ne zila i no shathisa i ti: “Muzwisedzedze ku Ndzimu ndizo na iwobo unowozwisedzedza kumuli.”—Jakuba 4:8.
U nga zwi sedzedza chini ku Ndzimu?
Zila ingwe wu ku ntembezela—ndiko se kwa u no lebesana ne Ndzimu.
Zila ingwe wu ku zwidiya Baibili—ndiko se kwa Ndzimu e “lebeleka” nawe.
Ku lebesana ikoko kwa ka jalo—ntembezelo ne ku zwidiya Baibili—kowo ku batsha ku be ne bukhwinya gu kulukulu ne Ndzimu.
“Ku lebeleka na Jehova—ku lebesana ne we Masimba Ose—i chingwe che zwithu zwikulu nthu cha a nga be nacho.”—Jeremy.
“Ku dusila Jehova mazwiwo angu ne ntembezelo ko ndi thama kuti ndi zwisedzedze mu nli.”—Miranda.
Apa Ndzimu wa ka teedza?
Ne u ka be u dumila mu Ndzimu—na iko ku ntembezela—ku ngana ku ka ku simila ku duma kuti wa ka ku teedza. Ne kwa ka jalo, Baibili i no lakidza kuti Jehova “Unodabila ntembezelo.” (Pisalema 65:2) Kakale i no ti koka kuti “ti lashile mitolo yedu mu nli.” Ne kutini? “Nge kuti ndiwo unomutjengeta.”—1 Pita 5:7.
Cha u nga kumbula ne kwacho: Apa u no zwipa chibaka che ku lebeleka ne bakhwinya babo mu misi yose? U nga thama u jalo kose ne mu Ndzimu. Lebeleka naye ne ntembezelo mu misi yose, u shingisa zina lile, Jehova. (Pisalema 86:5-7; 88:9) Kwa ka jalo, Baibili i no ku kulumbidza kuti “mugale mutembezela.”—1 Bathesalonika 5:17.
“Ntembzelo wu lebesana na Tate bangu ba kudzimu, ba ndi no ba dusila chi pa moyo.”—Moises.
“Ndo lebeleka na Jehova ne zila ya ka nginilila, koga se kwa ndi nga lebeleka na mme kene nkhwinya wangu nkulu.”—Karen.
Ndi nga tembezela ne kweni?
Baibili i noti: “Koga kumbilani tjimwe ne tjimwe mu Ndzimu nge mitembezelo nenge kuboka.”—Bafilipi 4:6.
Apa ichecho cho dwa kuti kwa ka lulwama ku tembezela ne kwe mathatha edu? Ee! Dumbu, Baibili i noti: “Tola mitolo iyo uyibige muna Yahwe; ndizo banowokumilidza.”—Pisalema 55:22.
Malebeswa kuti, mu mitembezelo iyo, ha u zo fanila lebeleka ne kwe mathatha awo koga. “kowo be ku si bukhwinya gwa ka lulwama ha ndi nga kumbila Jehova ku ndi batsha koga,” ko jalo nkadzi u noyi Chantelle. Ndo duma kuti ku boka kwa ka fanila zha gwe kutanga, kakale zwithu zwa ndi no bokela zwa ka fanila ku be zwinjinji.”
Cha u nga kumbula ne kwacho: I zwithu zwipi mu buchilo gugo zwa u no bokela? U nga kumbula zwithu zwipi zwitatu zwa u nga bokela Jehova mu zhuba la nasi?
“Ne i ka be chithu chi si cha chingwe, chi nonga maluba a ka naka, chi nga ti sundidzila ku tembezela ti boka Jehova.”—Anita.
“Kumbulila chingwe mu lubumbo chi no ku khata kene ndimana ye Baibili i no ku kutha moyo, u bo u boka Jehova ne kwayo.”—Brian.