Ini Bafakazi ba Jehova ba si Nga Nginilile mu Dzingwe Dziholideyi?

• Bafakazi ba Jehova ba no ziba chini kuti ingwe holideyi ha i zo lulwama?

• A Bafakazi ba Jehova ba si nga kitike dziholideyi dzingwe, ba cha da be misha yabo?

• A Bafakazi ba Jehova ba no dwa bangwe kuti ba sitongo kitika dziholideyi dzingwe?

Bafakazi ba Jehova ba no ziba chini kuti dziholideyi dzingwe ha dzi dzo lulwama?

Kuti Bafakazi ba Jehova ba zibe kuti holideyi ingwe ha izo lulwama kuti ba i kitike, ba no shakisisa mu Baibili. Dziholideyi dzingwe ne mizano ingwe ha i to dumana choselele ne milayontewo ye Baibili. Mu khani i nonga iyeyi, Bafakazi ba Jehova ha ba to be ne gobe choselele. Ngono ha ku zha mu dzingwe dziholideyi, Nfakazi nngwe ne nngwe wa ka fanila ku zwishalulila, ngono e gwisa kwazo kuti a sala a na “hana mbuyanana mbeli kwe Ndzimu na mbeli kwe bathu.”​—Mishingo 24:16.

Bafakazi ba Jehova ba no zwibudza dzibuzo dzingwe dzi nonga idzidze dzi no tobela kuti ba bone kuti a ba nga kitika holideyi kene chini.a

• A holideyi iyeyi ya ka teiwa muna chi si nga diyiwe ne Baibili?

  Nlayontewo we Baibili: “‘Bhudani mubali, muthubukane nabo,’ kojalo [Jehova], ‘musibhate tjimwe tjakatemapala.’”​—2 Bakorinta 6:15-17.

  Kuti ba thubukane choselele ne zwidiyo zwi na shambga, zwi si nga dumane ne chi mu Baibili, Bafakazi ba Jehova ha ba to kitika dziholideyi dzi na zwieto zwi no tobela.

  Dziholideyi dza ka teiwa mu dumilo kene mu namato ye midzimu ingwe. Jesu wa kati: “Namata [Jehova] Ndzimu uwo ushingile iye ega.” (Matewu 4:10) Be tobela ndaulo iyeyi, Bafakazi ba Jehova ha ba to kitika Christmas, Easter, kene May Day, ne kuti dziholideyi idzedzi dza ka teiwa mu namato ye midzimu ingwe ngono kusi Jehova. Kakale, ha ba to shanganila mu dziholideyi dzi nonga dzi no tobela ipapa.

  • Kwanzaa. Zina Kwanzaa “lo dwa mu matama e Chi-Swahili a noyi matunda ya kwanza, a no dwa ‘michelo ye kutanga’ ngono ichechi cho lakidza kuti holideyi iyeyi ya ka teiwa mu mizano ye kutanga ye ku vuna ya ka kwagwa mu histori ye Africa.” (Encyclopedia of Black Studies) Nenguba bangwe be ti nzano we Kwanzaa ha te we budumili, Encyclopedia of African Religion i nowo fanidzanya ne nzano we Chi-Afrika “we ku dusila bathu ba ka fa ne midzimu michelo ye kutanga ili zila ye ku ba boka,” i no paphidzi iti: “kakale iyeyi ndiyo zwawo zila ye ku lakidza ku bokela masego e buchilo a no zhisiwa ne bathu ba ka fa ba no pa zibiso mu holideyi ye Kwanzaa ye African American.”

    

  • Mid-Autumn Festival (Mizano i no kititikiwa pakati kwe September kene October.) “Nzano iwoyo ndiwo u no kudza ndzimu we chikadzi we ngwedzi.” (Holidays, Festivals, and Celebrations of the World Dictionary) “Ko lakidziwa bakadzi ba li mu ngumba be namata, bali mbeli kwe ndzimu we chikadzi ne Chi-China ku no dangwa kuyi kowtow.”​—Religions of the World​—A Comprehensive Encyclopedia of Beliefs and Practices.

  • Nauruz (Nowruz). “Nzano iwoyo wa ka teiwa mu budumili gwe Zoroastrianism, u no lakidziwa ili zhuba la ka yengemala kwazo mu khalendara ya ntolo ye Zoroastrian. . . . Kwazokwazo, ndzimu we masikati, u no dangwa kuyi [Rapithwin], kwa ka ku togwa kuti u no yenda ali kusi kwe shango e piwa masimba ne ndzimu we mbaba mu mingwedzi ino pota, kwa ka ku bakhwa mizano we ku buya kukwe mu zhuba le Nowruz ku yenda ne ngwao ye Zoroastrian.”​—United Nations Educational, Scientific and Cultural Organization.

  • Shab-e Yalda. Nzano iwoyo u no thamiwa mu shuba le gole li na masikati mafutshwanana ku Northern Hemisphere, “wa ka teiwa mu namato ya Mithra,” ndzimu we chedza, ku yenda ne buka ya Sufism in the Secret History of Persia. Kakale ku legwa kuti holideyi iyeyi i nga na i kabe i yendidzana ne namato ye midzimu ye zhuba ye Roma ne Giriki.b

  • Ku Boka. Koga se holideyi ye Kwanzaa, holideyi iyeyi ya ka teiwa mu mizano ya ntolo ye ku vuna ya ka i boka midzimu ya ka siyasiyana. Shule kwe nako, “dzingwao idzezi dza ntolo dza ka amuchigwa mu dzikereke dze bukirisiti.”​—A Great and Godly Adventure​—The Pilgrims and the Myth of the First Thanksgiving.

  Dziholideyi dza ka teiwa mu buthodi kene mu ku dumila kuti nthu u phazha kene laki. Baibili ikati bathu ba no “teyela tafuli ndzimu . . . we phazha” bangwe be bathu ba “nofupatila Yahwe.” (Izaya 65:11) Ndizo wale, Bafakazi ba Jehova ba singa kitike dziholideyi dzi no tobela:

  • Ivan Kupala. Buka inoyi The A to Z of Belarus ikati “Bathu ba kati mu zhuba la [Ivan Kupala] lubumbo gu na masimba manjinji e masalamusi, ngono ha u na chibindi kakale u na laki u nga bona angwe e masimba iyawo. Kutanga, nshingo iwoyo ya ka be ili holideyi ye baheitani ye ku kitika summer solstice. Ne kwa kajalo, Encyclopedia of Contemporary Russian Culture, ikati: “Shule kwe kuti baheitani ba amuchile dumilo ye bukirisiti holideyi iyeyi ye chiheitani ya ka tangisa ku kitikiwa mu nako ingompela ne holideyi ye kereke i no keteka nzano we holideyi ya [Johani we Mdubiki].”

  • Lunar New Year (Gole dzwa le Ma-China kene Ba-Korea-Chinese New Year or Korean New Year). “Mu nako iyeyi ye gole ku pinda dzinako dzose bathu ba no thama kose kwa ba nga khona, be namata midzimu, ko se ne bathu ba ka fa kuti ba shingikaligwe ne zwithu zwa ka lulwama mu gole li no zha.” (Mooncakes and Hungry Ghosts​—Festivals of China) Ne zila i no fanana, nzano we goledzwa we Korea “u no shanganyila ku namatiwa kwe bafi, ku thama zwieto zwi no tata meya ya ka ipa kose ne thama kose kwa ba nga khona kuti gole li no zha li be la ka lulwama, ne thama zwieto ku lakidza kuti gole li no zha lowo be la katini.”​—Encyclopedia of New Year’s Holidays Worldwide.

    

  Dziholideyi dza ka teiwa mu nkumbulo we kuti nthu u na meya i si nga fe. Baibili i no lakidza zwibuyanana kuti meya i no fa. (Ezekieli 18:4) Ndizoke, Bafakazi ba Jehova ha ba to kitika dziholideyi dza ka longolosiwa pasi ipapa, dzi na dumilo ye kuti nthu u na meya i si nga fe:

  • All Souls’ Day (Zhuba le Bafi). Zhuba ileli nde le ku kumbula bathu bose ba ka fa,” ku yenda ne New Catholic Encyclopedia. “Ku tangisa ku ngabe 500 C.E. ku noti ku ngabe 1500 C.E. kwa ka ku dumigwa kwazo kuti meya ye bathu ba ka fa i mu purgatory mu zhuba ileli i no boneka se zwipoko, baloi, mahula, kene zwingwe zwi poga, i boneka mu bathu ba ka be tshwenya bafi i baba ha cha chila.”

  • Qingming Festival (Ch’ing Ming) ne Hungry Ghost Festival. Mizano iyeyi mibili i no batigwa ku kudza bathu ba ka fa. Buka ye Celebrating Life Customs Around the World​—From Baby Showers to Funerals, ikati: “Mu nzano we Ch’ing Ming, zojiwa, dzidirinki, ne mari e pampiri zo pisiwa ku thama kuti bathu ba ka fa ba si tongo bulawa ne zhala kene nyota kakale ba si tongo sheta mari.” Kakale buka iyeyi ikati, “mu ngwedzi we Hungry Ghost, kwazokwazo mu busiku gwe ngwedzi nchena kwazo, bathu ba no kitika nzano iwoyo, ba no duma kuti bathu ba ka fa ne ba no chila ba no amana kwazo mu busiku i gogu ku pinda mu masiku angwe, ndizo wale ili chithu chi kulu kuti bathu ba ka fa ba shathisiwe kakale ba kudziwe.”

  • Chuseok. Korean Tradition of Religion, Society, and Ethics, ikati “meya ye bathu ba ka fa i no piwa zojiwa ne wine.” Zwithu izwezwi zwi no piwa bafi zo lakidza “dumilo ye kuti ha nthu a fa meya i no dwilila i chila.”

  Dziholideyi dze dumilo ye masalamusi. Baibili ikati: “Unopisa nkololo uwe kene nkololokadzi uwe ili tjibhayilo, unokandila kene mashabi zwinozha kene unotjenesa mashula kene nloyi, kene malipa kene unowonga bathu nge miti kene nloyilume kene unolebeleka ne bafi.  . . unoshimika kuna Yahwe.” (Ditironomi 18:10-12) Kuti ba si tongo ba amana ne masalamusi kose ne ku namata nyenyedzi (ku no fanana koga ne budimoni)​—Bafakazi ba Jehova ha ba to kitika nzano we Halloween kene dziholideyi dzi no tobela ipapa:

  • Goledzwa le Ba-Sinhala ne Ba-Tamil. “Mu holideyi iyeyi ko thamiwa zwieto zwa ngwao . . . ne mishingo i no thamiwa mu nako dza ka bigwa ne ba no lipa dzinyenyedzi ya ba no tola kuti i nowo zhisa zwithu zwa ka lulwama.”​—Encyclopedia of Sri Lanka.

  • Songkran. Zina le nzano iwoyo we Chi-Asia “lo dwa mu dama le Sanskrit . . . lo no dwa ‘yenda’ kene ‘shanduka,’ ngono nzano iwoyo u no lakidza ku yenda kwe zhuba mu na chi no dangwa kuyi zodiacal constellation of Aries.”​—Food, Feasts, and Faith​—An Encyclopedia of Food Culture in World Religions.

  Mikiti ya kabe ili yapo ha ku shingisiwe nlawo wa Mushe, Ngono ya ka misiwa ne chibayilo cha Jesu. Baibili ikati: “Kirisiti ndiye bhelelo le nlayo.” (Baroma 10:4) Bakirisiti ba nga zwidiya chingwe mu milayomitewo ye nlawo wa Mushe wa ka wa piwa Baisiraela. Ne kwa kajalo, ha ba to kitika mizano yawo, kwazokwazo mikiti i no lingisa ku na Mesiya, Bakirisiti wa ba no dumila kuti wa ka chi buya. Baibili ikati “Ezwi mitutshi ye zwithu zwinozha, ngono koga lebeswa lowang’wa muna Kirisiti.” (Bakolosa 2:17) Ne kuti mazwimisilo e mizano ya ka lakidziwa pasi ipapa a ka shingikala, kakale i na dzingwao dzi si nga dumilane ne chi mu Baibili, Bafakazi ba Jehova ha ba i to kitika:

  • Hanukkah. Nzano iwoyo u no batigwa ku piwa kakale kwe tempele ye Bajuta ku Jerusalema. Ngono, Baibili ikati Jesu wa ka be Mpirisiti u Pezhugwi we “nshasha nkulu [kene tente kene tempele] wakapelela usakathamiwa nge maboko, usi we lubumbo guno.” (Bahebera 9:11) Bakirisiti ba no ziba kuti, tempele ye chimeya ya ka misa tempele dumbu ya ka be ili ku Jerusalema.

  • Rosh Hashanah. Ileli i zhuba le kutanga le gole le Bajuta. Mu chibaka cha ntolo, kwa ka be ku na zwibayilo zwa ka shalulika zwi no dusigwa Ndzimu. (Palo 29:1-6) Ne kwa ka jalo, Jesu Kirisiti se Mesiya, wa ka thama kuti “zwibhayilo ne zwipo kuti zwisitjadusiwe,” e thama kuti zwi si tongo amuchigwa ne Ndzimu.​—Daniele 9:26, 27.

• A holideyi iyeyi i no thama kuti kube ne ku shanganila kwe budumili?

  Nlayontewo we Baibili: “N’galimoyo uneni tjaakashanganyila ne usingagalemoyo kene? Ng’umba ye Ndzimu inodumana poni ne midzimu?”​—2 Bakorinta 6:15-17.

  Nenguba Bafakazi ba Jehova be chila ba na mbakiso ne babakisani nabo kakale be hlonipha fanilo ye bathu bangwe ye ku zwishalulila cha ba no dumila, ha ba to be ne chiabe mu mizano i no thama kuti kube ne ku shanganila mu budumili ne zila dzi no tobela.

  Mizano ye budumili kene mishingo i no rutuetsa kuti bathu ba shangane ku namata bali bose ne ba le be budumili gu si nga fanane. Ndzimu wa kati e tungamila bathu babe ba ntolo ku shango ptshwa ya ka i na bathu ba na budumili gu si nga fanane ne gwabo, wa ka ba dwa eti: “Usitongo thama tjidumano nabo kene ne midzimu yabo. . . . ngoti ha munganamata midzimu yabo, lowobe labe bhuzhu kumuli.” (Ekezodo 23:32, 33) Ndizoke, Bafakazi ba Jehova ha ba to shanganila mu dziholideyi dzi nonga dzi no tobela ipapa.

  • Loy Krathong. Mu nzano iwoyo we Thai, “bathu ba no thama mabavo ne mazhani be be longa dzikhendele kene shamu dze maswalo mu ali, ku dwapo be be lashila mabavo iawa mu vula. Ku kayi mabavo iawa a no yenda ne zwithu zwa ka bipa. Nzano iwoyo dumbu chikumbuludzo che matshambo a ka yengemala e makumbu a Buddha.”​—Encyclopedia of Buddhism.

  • National Repentance Day. Pampiri ye dzikhani inoyi The National, ye ku Papua New Guinea ikati nngwe u no shinga mu na hurumente wa ka leba eti “bathu ba no be yapo mu nzano iwoyo ba no dumila mu dumilo ye ntewo ye Bukirisiti.” Akati ku keteka National Repentance Day “ko batsha kuti kube ne milayontewo ye Bukirisiti mu shango.”

  • Vesak. “Zhuba ileli i zhuba la ka yengemala ku pinda wose e mazhuba e Chi-Buddha, i nzano we ku zwagwa kwa Buddha, li na buchenjedu, ne lufu, kene Nirvana.”​—Holidays, Festivals, and Celebrations of the World Dictionary.

    

  Mizano ya ka teiwa mu dzingwao dze budumili dzi si nga dumilane ne chi no diyiwa ne Baibili. Jesu wa ka dwa batungamili be budumili eti: “Molandulila dama le Ndzimu tjilenje tjenyu.” Kakale wa ka leba kuti namato yabo ha ina suli eti “banodiya milayo ye bathu se banodiya nlayo wangu.” (Matewu 15:6, 9) Ne kuti Bafakazi ba Jehova ba no hwa matama iyawa ku dwa mo moyo, ku na mizano minjinji ya ba si nga kitike.

  • Epiphany (Three Kings’ Day, Timkat, kene Los Reyes Magos). Mu mizano iyeyi ko kitikiwa balepa dzinyenyedzi ba ka etela Jesu kene ku dubikiwa kwa Jesu. Nzano iwoyo wa ka “thamiwa we Bukirisiti ne baheitani bangwe ba ka be namata midzimu ye vula i no wonga, njizi, ne mekukwana.” (The Christmas Encyclopedia) Timkat, nzano u nonga iwoyo “wa ka teiwa mu ngwao.”​—Encyclopedia of Society and Culture in the Ancient World.

  • Nzano we ku Tolegwa Kudzimu kwe Ngwanadi u noyi Mariya. Mu nzano iwoyo ku kitikiwa dumilo ye kuti mmai ba Jesu ba ka tolegwa kudzimu ne mbili wabo we chinyama. “Religion and Society​—Encyclopedia of Fundamentalism ikati: “Dumilo iyeyi ya ka be i si nga zigwe ne Bakirisirti be kutanga kakale ha ku na pa i no legwa ne kwayo mu Baibili.”

  • Nzano we ku Zwisenga u no Pedzisa Chibi. “Ku zwisenga kwa Mariya ku no pedzisa chibi ha ku to diyiwa choselele mu Baibili . . . Kereke ya ka zwithamila thuto iyeyi.”​—New Catholic Encyclopedia.

  • Lent. Ku yenda ne New Catholic Encyclopedia, chibaka che ku be moyonlefu ne ku zwinyima zojiwa cha ka simulula “mu 4th century,” makole a no pinda 200 Baibili i sina ku pedziwa ku kwagwa. Encyclopedia ha i leba ne kwe zhuba le kutanga le Lent ikati: “Nshingo we ku amuchigwa kwe masimbe ku no thembeka mu zhuba le masimbe ne gwe butatu (Wednesday) la ka be le shango yose ne 1091 li simulugwa ne Synod we Benevento.”

  • Meskel (kene, Maskal). Mu nzano iwoyo we Chi-Ethiopia ku kitikiwa “chiphambaano che Malebeswa cha ka bongwa, (Jesu cha a ka bulaigwa mu chili), ko zangwa ku potelekiwa mimoto i no thuta,” ko jalo Encyclopedia of Society and Culture in the Medieval World. Ne kwa kajalo, Bafakazi ba Jehova ha ba to shingisa chiphambaano mu namato yabo.

• A holideyi iyeyi i no kudza nthu, gubungano, kene chingwe chi no milila shango?

  Nlayontewo we Baibili: “Yahwe bakati, “Una bhiso nthu unogalabgwe bathu, unothama nthu simba lile, we moyo unofupatila Yahwe.’”​—Jeremiya 17:5.

  Nenguba Bafakazi ba Jehova be shingidzana ne bangwe bathu zwibuyanana ngono dumbu ne ku ba tembezelela, Bafakazi ba Jehova ha ba to shanganila mu mishingo kene mizano i no tobela ipapa:

  Dziholideyi dzi no kudza nngwe u no busa kene nthu nngwe u na mamo. Baibili ikati: “Letjani kugalabgwe mu nthu, iye una meya yaanofema mu zwimilo. Nthu ungabaligwa muni kene” (Izaya 2:22) Ha ti lakidzila, ndizo wale Bafakazi ba Jehova ba si nga kitike zhuba la ka zwagwa She kene Shenkadzi.

  Mizano ye ku kitika folaga ye ichaba. Bafakazi ba Jehova ha ba to kitika zhuba le fologa. Ne kutini? Ne kuti Baibili ikati: “Bonani kuti mube kutjena nge kunamata midzimu.” (1 Johani 5:21) Bathu bangwe ngwenu ha ba to linga folaga se ndzingwana​—chingwe chi nga namatiwa​—ngono nlume we Histori u noyi Carlton J. H. Hayes wa ka kwala eti: “Chithu chikulukulu kwazo chi no dumigwa ne ichaba kakale ili icho chi no namatiwa kwazo i folaga.”

  Dziholideyi kene mizano i no kudza nngwe u noyi wa ka yengemala. Ini cha ka shingikala ha nlume nngwe u no cha Ndzimu e thigamila mpostolo Pita? Baibili ikati: “Koga Pita kammilidza: Kati kunli, ‘Milika, namibo ndi nthu koga.’” (Mishingo 10:25, 26) Ne kuti Pita kene baapostolo bangwe ba ka lamba ku kudziwa kwa ka pindilila kene ku namatiwa, Bafakazi ba Jehova ha ba to nginilila mu mizano i no kudza bathu ba no togwa se ba ka yengemala, i nonga mizano i no tobela pasi ipapa:

  • All Saints’ Day. “Nzano u no kudza bayengemali bose . . . Ha ku to zigwa kuti nzano iwoyo wa ka tangisa chini.”​—New Catholic Encyclopedia.

  • Fiesta of Our Lady of Guadalupe. Nzano iwoyo u no kudza “nyengemali we chikadzi u no togwa kuti u no bakilila Mexico,” Ngono bangwe ba no dumila kuti ndi Mariya, mmai ba Jesu. Ko legwa kuti ne jenamiso wa ka boneka ku nlimi ne 1531.​—The Greenwood Encyclopedia of Latino Literature.

    

  • Name Day. “Buka ye Celebrating Life Customs Around the World​—From Baby Showers to Funerals ikati Name day i zhuba le nzano we nthu u noyi wa ka yengemala we zina la ka piwa ngwana ha e dubikiwa kene shule ha dumilo iye i thomamisiwa ku na nzano mu kereke.” I no paphidza iti: “Mu zhuba ilile bathu ba no thama zwithu zwi no yendidzana ne budumili.”

  Mizano ye chipolotiki kene mishingo ingwe ye ichaba. Baibili ikati: “Koyita kutizhila muna Yahwe pana kugalabgwe mu nthu.” (Pisalema 118:8, 9) Bafakazi ba Jehova ha ba to kitika Zhuba le Batshwa kene Zhuba le Bakadzi ne kuti ba no ziba kuti mathatha e shango a no pedziwa ne Ndzimu isi bathu. Ne zila i no fanana, ha ba to kitika Emancipation Day kene mizano i nonga iyeyi. Ha ba to thama be jalo ne kuti ba no ziba kuti Bushe gwe Ndzimu ndigo gu no pedzisa mathatha e ku shalulana kwe bathu ne ludzi kose ne ku sa lidzalidzana kwe bathu.​—Baroma 2:11; 8:21.

• A holideyi iyeyi i no thama kuti ku lingike u ngati shango ingwe kene ludzi gungwe go butoka kene go pinda dzingwe?

  Nlayontewo we Baibili: “Ndzimu autoshalaula. Koga mu njudzi dzose, mmwe ne mmwe unotja Ndzimu ethama tjakalulwama, Ndzimu unon’amutjila.”​—Mishingo 10:34, 35.

  Nenguba Bafakazi ba Jehova banjinji be da shango ya bo, ha ba to kitika mizano ino kudza ichaba kene njudzi dzingwe ne zila ya ka lakidziwa ipapa.

  Mizano i no kudza masole. Pana ku lebelekela nghwa, Jesu wa ka dwa batobeli babe eti: “Idani zwita zwenyu kakale mutembezelele banomudziyidza.” (Matewu 5:44) Ndizo wale, Bafakazi ba Jehova ba si nga be ne chiabe mu mizano i no kudza masole, se dziholideyi dzi no tobela pasi ipapa:

  • Anzac Day. “Anzac ko dwiwa zhuba le masole e Australia ne New Zealand,” ngono “zhuba le Anzac la ka chi shalugwa ku be zhuba le ku kumbula ba ka bulawa mu nghwa.”​—Historical Dictionary of Australia.

  • Veterans Day (Remembrance Day, Remembrance Sunday, kene Memorial Day). Dziholideyi idzedzi dzo kudza “bathu ba ka be bali masole kose ne bathu ba ka bulawa mu dzinghwa dze shango.”​—Encyclopædia Britannica.

  Mizano ye cha ka shingikala mu ichaba kene ku zwibusa. Jesu ha e leba ne kwe batobeli babe wa kati: “Ate bali be shango ino sami ndisi we shango ino.” (Johani 17:16) Nenguba be zwidiya ne kwe zwa ka shingikala mu ichaba, Bafakazi ba Jehova ha ba to be ne chiabe mu mizano i no tobela:

  • Australia Day. Ku yenda ne Worldmark Encyclopedia of Cultures and Daily Life, holideyi iyeyi chikumbuludzo “che zhuba masole e England la a ka ngina mu Australia ne 1788 a ka milidza folaga yao, e be e leba kuti Australia yo busiwa ne England.”

  • Guy Fawkes Day. I “zhuba le nzano we ichaba kose ne zhuba le ku kumbula ku gwisa ku bulawa kwa She we kutanga James na Guy Fawkes ne bangwe be mbusi we England ne 1605.”​—A Dictionary of English Folklore.

  • Zhuba le ku Zwibusa. Mu shango njinji, mu “zhuba ileli bathu ba no kitika kuti shango ya ka simulula ku zwibusa lini mu ingwe shango.”​—Merriam-Webster’s Unabridged Dictionary.

• A mu holideyi iyeyi ku na mazwibato a sa ka lulwama kana a ka bipa?

  Nlayontewo we Baibili: “Misi yakapinda makabe mushinga tjinodiwa nge basingagalemoyo, mutjilila mu njemulo dzakabipa ne kulaladza ne mizano ye zwing’o zwinolaladzisa ne kuwalilana thobo kusakalingisana ne kuthigamila midzimu kusi mu nlayo.”​—1 Pita 4:3.

  Ku dumilana ne nlayontewo iwoyo, Bafakazi ba Jehova ha ba to be ne chiabe mu mizano i no ngwiwa busukwa ka ka pindilila kose ne dziphati dzi singa laulike. Bafakazi ba Jehova ba no shathila ku shangana ne bakhwinya babo, ngono ha ba shangana ba ngana ba ka ngwa busukwa ne chilizano cha ka lulwama. Ba no thama kose kwa ba nga khona ku tobela chi no kumbuludziwa ne Baibili ha iti: “Ndizo kene unoja kene ung’wa, kene unothamani koga, thama kose kukudza Ndzimu.”​—1 Bakorinta 10:31.

  Ndizo wale, Bafakazi ba Jehova ba si nga nginilile mu mikiti kene mizano i no rotoetsa mazwibato a si nga dumiligwe ne Baibili. Ichecho cho shanganyila nzano we Bajuta u noyi Purim. Buka i noyi Essential Judaism i kati nenguba nzano u noyi Purim ya ka ili chikumbuludzo ntolo che ku hulugwa kwe Bajuta mu century ye bu 5 B.C.E., ngwenu u “ngana u ka thalusiwa ili nzano we Bajuta wa ka thabulugwa u noyi Mardi Gras kene Carnival.” Bathu banjinji ba no be yapo mu nzano iwo, “ba no mbala thako, ba na mazwibato e butsoulodi, be ngwa busuka kwa ka pindilila, kakale be long zhuba isi shoma.”

A Bafakazi ba Jehova, ba singa kitike dziholideyi dzingwe, ba cha da be misha yabo?

Ee. Baibili i no diya bathu kuti ba de ne ku hlonipha bose ba mu nsha wabo, ne bali be budumili gu poga. (1 Pita 3:1, 2, 7) Ne kwa kajalo, ha nngwe we Bafakazi ba Jehova i misa ku kitika mizano ingwe, bangwe be makamu awe ba ngana ba ka tinega, ba ka hwa zogwadza, kene dumbu ne ku tola kuti wa ba lasha. Ndizo ke, Bafakazi ba Jehova banjinji ba no tola chibaka che ku lakidza be makamu a bo kuti ba no ba da, ne ku ba thalusetsa ne buchenjedu kuti ini ba tola thambo ya ka jalo, kose ne ku etela be makamu a bo mu nako dzingwe.

A Bafakazi ba Jehova ba no budza bangwe kuti ba si tongo kitika dziholideyi dzingwe?

Aa. Ba no duma kuti nthu nngwe ne nngwe wa ka fanila ku zwishalula cha a no shaka thama. (Joshua 24:15) Bafakazi ba Jehova ba no ‘teta bathu bose,’ ne ba na budumili gu si nga fanane ne gwabo.​—1 Pita 2:17.