THUTO 41
Chi no Lebgwa ne Baibili ne Kwe ku Shanganila Ngubo
Bathu banjinji habazo sungunuka ku leba ne kwe ku shanganila ngubo. Ne kwa ka jalo, ha Baibili i leba ne kwe ku shanganila ngubo i no leba ya ka tambunuka ngono ne zila i no amuchilika. Cha i no leba cho ti batsha. Kakale cho hwikala. Ne kuti Jehova i Mbumbi wedu, u no ziba cha ka ti fanila. U no ti lakidza kuti mishingo yedu i nga nshathisa chini kakale kuti ini chi nga ti batsha ku shathila buchilo cha chose.
1. Jehova u no linga ku shanganila ngubo chini?
Ku shanganila ngubo i chipo chi no dwa ku na Jehova. U no shaka kuti nlume ne nkadzi ba ka lobolana ibe ibo ba no shanganila ngubo. Chipo ichechi a chi to ba batsha koga kuti ba be ne bana, ngono kakale cho thama kuti ba khone ku lakidzana ludo ne zila i no shathisa. Ndizo Dama le Ndzimu liti: “Ushathile nkadzi we buzhuzha gugo.” (Zwiani 5:18, 19) Jehova wa ka lingilila kuti Bakirisiti ba ka lobolana ba thembeke mu na wa ba ka lobolana naye, ku no dwa kuti, habazo fanila ku shanganila ngubo ne nthu wa ba sa ka lobolana naye.—Bala Bahebera 13:4
2. Ku shanganila ngubo ku sa ka lingisana ko dwani?
Baibili i no ti budza kuti: “Banowalilana kuzhe kwe ndobolo . . . akuna wabo unowongina mu bushe gwe Ndzimu.” (1 Bakorinta 6:9, 10) Bakwali be Baibili ba ka kwala ne Chigiriki, ba ka shingisa dama por·neiʹa ku chenesa ku shanganila ngubo ku sa ka lingisana. Ichecho chi nga dwa (1) ku shingidzanaa kwe bathu ba sa ka lobolana, (2) ku shanganila ngubo kwe nlume ne nlume kene nkadzi ne nkadzi, ne (3) ku shanganila ngubo ne phuka. To shathisa Jehova kakale to batshika ha ti lamba “kuwalilana thobo kuzhe kwe ndobolo.”—1 Bathesalonika 4:3.
ZWIDIYE KWA KA NGINILILA
Bona se kwa u nga lamba ku shanganila ngubo ku sa ka lingisana kakale ne se kwa ku dwilila u na mazwibato mabuyanana ku nga ku batsha.
3. Lamba ku shanganila ngubo ku sa ka lingisana
Nlume u no thembeka Josefa wa ka gwisa kuti a dwilile a na mazwibato mabuyanana. Bala Genesisi 39:1-12, mu be mu lebesana ne kwe buzo dzi no tobela:
Ini cha ka thama kuti Josefa a tizhe?—Bona ndimana 9.
A u no kumbula kuti Josefa wa ka shalula cha ka lulwana? Ini u jalo?
Bathu bachechana ba nga yedza Josefa ne ku lamba ku shanganila ngubo ku sa ka lingisana chini? Zana VIDIYO.
Jehova u no shaka kuti bathu bose ba lambe mazwibato a si mabuyanana. Bala 1 Bakorinta 6:18, mu be mu lebesana ne kwe buzo dzi no tobela:
I zwimo zwipi zwi nga pelela zwi thama kuti nthu a wile mu ku shanganila ngubo ku sa ka lingisana?
U nga lamba chini mazwibato a si mabuyanana?
4. U nga mililana ne ku kwebegwa
Ini chi nga thama kuti ku sime ku mililana ne ku kwebegwa ku shanganila ngubo ku sa ka lingisana? Zana VIDIYO, mu be mu lebesana ne kwe buzo i no tobela.
Ha nzwalani u mu vidiyo e bona kuti mikumbulo iye ne mishingo iye i nga pelela ya thama kuti a si thembeke mu nkadzi uwe, wa ka thamani?
Mu zwingwe zwibaka, ne Bakirisiti ba no thembeka dumbu ba no gwisa kuti ba be ne mikumbulo mibuyanana. Ini cha ti nga thama kuti ti si be ne mikumbulo isi mibuyanana? Bala Bafilipi 4:8, mu be mu lebesana ne kwe buzo dzi no tobela:
I zwithu zwipi zwa ta ka fanila ku kumbula ne kwazo?
Ku bala Baibili ne ku batika mu ku shingila Jehova ku nga ti batsha chini ku mililana ne ku chebegwa ku thama chibi?
5. Milayo ya Jehova ye mazwibato i no ti batsha
Jehova u no ziba cha ka ti fanila. U no ti budza kuti ti nga dwilila chini ti na mazwibato mabuyanana, kakale kuti ichecho chowo ti batsha chini. Bala Zwiani 7:7-27 kene zana VIDIYO, mu be mu lebesana ne kwe buzo dzi no tobela.
Nzhuzha wa ka wila mu chimo chi no chebela chini?—Bona Zwiani 7:8, 9.
Ku yenda ne Zwiani 7:23, 26, ku shanganila ngubo ku sa ka lingisana ku nga pelela ne mathatha. Ti nga zwivikila mu mathatha api, ha ti dwilila ti na mazwibato mabuyanana?
Ku be ne mazwibato mabuyanana ku nga ti batsha chini ku shathila buchilo cha chose?
Bangwe ba no kumbula kuti chi no lebgwa ne Baibili ne kwe ku shanganila ngubo kwe nlume ne nlume kene nkadzi ne nkadzi, a chi to lakidza ludo. Ngono Jehova, Ndzimu u na ludo, u no shaka kuti nngwe ne nngwe a shathile buchilo cha chose. Kuti ti fanilike, ta ka fanila ku chila ku yenda ne milayo iye ye mazwibato. Bala 1 Bakorinta 6:9-11, mu be mu lebesana ne kwe buzo i no tobela:
Ku yenda ne zila ye Ndzimu, a ku be ne nkumbulo we ku shanganila ngubo kwe nlume ne nlume kene nkadzi ne nkadzi ndiko koga ku sa ka fanila?
Kuti ti shathise Ndzimu, tose ta ka fanila ku shanduka. A ku nga ti batsha? Bala Pisalema 19:8, 11, mu be mu lebesana ne kwe buzo dzi no tobela:
A u no kumbula kuti milayo ya Jehova ne kwe mazwibato i no hwikala? Ne kutini?
Jehova wa ka batsha banjinji kuti ba shandukile ku milayo iye ye mazwibato. Nawebo u nga ku batsha
BATHU BANGWE BA KATI: “Ku shanganila ngubo i fanilo ye bathu babili ba no danana, a kuna nlandu.”
Iwe u nga tini?
CHA WA ZWIDIYA
Ku shanganila ngubo i chipo chi no dwa ku na Jehova cha ka fanila ku shathigwa ne nlume ne nkadzi ba ka lobolana.
U Nga Tini?
Ku shanganila ngubo ku sa ka lingisana ko shanganyilani?
Ini chi nga ti batsha ku lamba ku shanganila ngubo ku sa ka lingisana?
Ku tobela milayo ya Jehova ye mazwibato ku nga ti batsha chini?
SHAKISISA
Bona kuti ini Ndzimu e tolela pezhugwi khani ye kuti nlume ne nkadzi ba ka fanila ku lobolana kene chini.
“Baibili i no Tini ne Kwe Nlume ne Nkadzi ba no Gala Bose ba sa ka Lobolana?” (Web article)
Bona kuti ini milayo ye Baibili ye mazwibato i si nga sendedzele bathu kuti ba benge balume ba no shanganila ngubo ne balume kene bakadzi ne bakadzi.
“A ku Shanganila Ngubo Kwe Nlume ne Nlume Kene Nkadzi ne Nkadzi ku Nlandu?” (Web article)
Zwidiye se kwa milayo ye Ndzimu ne kwe ku shanganila ngubo, i ti bakilila.
“A ku Shanganila Ngubo ku Shingisiwa Nlomo i ku Shanganila Ngubo Dumbu?” (Web article)
Mu na zwa ka shingikala mu nsholo u noti “Ba ka Ndi Bata ne Buthu,” bona kuti ini cha ka thama kuti nngwe wa ka be e shanganila ngubo ne bathu be bumo gu no fanana ne gugwe, a shandule zila ya a ka be e chila nayo kuti a shathise Ndzimu.
“Baibili i no Shandula Machilo” (Thungamakole, April 1, 2011)
a Ku shingidzana ikoko ku si nga amuchilike, ko shanganyila mishingo ya ka siyasiyana i nonga, ku shanganila ngubo, ku shanganila ngubo ne nlomo, ku shanganila ngubo kwe mapato, ne ku batabata nngwe ne zila i no thama kuti a shake ku shanganila ngubo.