Jesu Kirisiti ali she ye Bushe gwe Ndzimu

Bushe Gwe Ndzimu Ini?

Dabilo ye Baibili

Bushe gwe Ndzimu i hurumente dumbu wa ka thamiwa na Jehova Ndzimu. “Bushe gwe Ndzimu” kakale go dangwa “bushe gwe kudzimu” mu Baibili, ne kuti go busa ku dwa kudzimu. (Mako 1:14, 15; Matewu 4:17, King James Version) Gu na zwinjinji zwi no fanana ne bohurumente be bathu, ne kwa ka jalo go pinda mibuso ye bathu ne zila dzose.

Babusi. Ndzimu wa ka biga Jesu Kirisiti se She we Bushe kakale ha kuna mbusi we nthu wa ka tongo piwa ndaulo i pezhugwi se ya Jesu. (Matewu 28:18) Jesu u no shingisa masimba iyawa mu na zwa ka lulwama, ne kuti i Ntungamili wa ka zwilakidza kuti u no thembeka kakale u na ngoni. (Matewu 4:23; Mako 1:40, 41; 6:31-34; Luka 7:11-17) A ka tungamigwa ne Ndzimu, Jesu wa ka shalula bathu ku dwa mu njudzi dzose “banowobusa shango” ba naye kudzimu.—Zumbunulo 5:9, 10.
Chibaka. Ku leyana ne bohurumente be bathu, ba no zha be pinda, Bushe gwe Ndzimu a gu towo ‘kolomogwa.’—Daniele 2:44.
Ba no busiwa. Nngwe ne nngwe u no thama chi no shakiwa ne Ndzimu, u nowo busiwa ne Bushe gwe Ndzimu ku sa ka lingwa ludzi kene ndawo ya a ka zwaligwa mu ili.—Mishingo 10:34, 35.
Milayo. Milayo (kene dzindaelo) dze Bushe gwe Ndzimu dzo thama chi no pinda ku dzibila mazwibato a sa ka lulwama koga. Dzo milidza mazwibato e ba gu no busa. Ha ti lakidzila, Baibili ikati: “‘Ida [Jehova] Ndzimu uwo nge moyo uwo wose nenge meya iyo yose nenge nkumbulo uwo wose.’ Oyu ndiwo nlayo nkulu tjose kakale we kutanga. Ne we bubili unonga iwo, unoti, ‘Ida mmwe nthu sekwa unozwida.’” (Matewu 22:37-39) Ludo gwe Ndzimu ne gwe mbakisani go sendedzela ba no busiwa ne Bushe ku thamila bangwe cha ka lulwama.
Ku diyiwa. Nenguba Bushe gwe Ndzimu gu biga milayo i pezhugwi ye ba gu no busa, kakale go diya bathu kuti ba nga shingisa milayo iyeyo chini.—Izaya 48:17, 18.
Mazwimisilo. Bushe gwe Ndzimu ha gu to fumisa ba no busa gu shingisa ba no busiwa. Ku leyana na ichecho, gowo shingikadza kuda kwe Ndzimu, ku shanganyila thembiso ye kuti ibabo ba no da Ndzimu ba nowo chilila chose mu shango ye paradaisi.—Izaya 35:1, 5, 6; Matewu 6:10; Zumbunulo 21:1-4.