Dá inkutuvaikila tukulupile mitenga vya mu Ibibiliya?

1. Ibibiliya mwene nyani?

Ntenga wambone uvalanga kenga vanu vandanama mushilambo shapai uvele mu Ibibiliya. (Dimu 37:29) Ibibiliya kwaunapamo lavele mabuku 66 madikidiki. Nnungu andivatumila vanu 40 vakukulupilika pakulota vandike Ibibiliya. Mabuku mwanu latandi landyandikigwa namu Musha mu myaka 3.500 vipitile kunyuma. Libuku lya mwisho lindyandikigwa namu myombe Nshuwau myaka 1.900 vipitile kunyuma. Malove lavele mu Ibibiliya lake nyani? Nnungu ashinatangola na vanu vandike Ibibiliya kupitila imumu wake wanaswe. (2 Samuwele 23:2) Vanavo vandyandika makumbukililo a Nnungu, havandike makumbukililo lavo. Na ivé doni, Yeova ni Mwene Ibibiliya.—Shomya 2 Timoti 3:16; 2 Patulu 1:20, 21.

2. Mwaa shani tunkukulupila kenga Ibibiliyamwene Nnungu?

Tunkukulupila kenga Ibibiliya ni Lilove lya Nnungu mwaa yanavo inkuvalanganga vinu vya mushu, na vinkutandakela momo. Hapali munu aulula kutenda davo. (Yoshuwa 23:14) Nnungu Wadimongo-uti bai ni aulula kuvalanga wakati wa mushu kwa vanu.—Shomya Ishaiya 42:9; 46:10.

Ibibiliya ni libuku lyalakadile kwa Nnungu yanavo indivilingananga na mabuku lanji. Dibibiliya dyoe namene dindijavanikana mu dinangodi dya kuvilingananga. Ata ikava kenga yakala, yanavo inkwigwania na shiyensha. Na yadavo, vanu 40 vandike Ibibiliya havavilinganienge.a Na kavili, Ibibiliya inkulodya shalowa linagwaledyo lya Nnungu kwa vanu, na momo inkuvanavo dimongo dya kubadilisha shinamilo sha vanu, kuva shambone. Kwa vinu avi vinkuvatadya vanu kwamini kenga Ibibiliya ni Lilove lya Nnungu.—Shomya 1 Vateshalonika 2:13.

3. Mitenga shani vitangaleka mu Ibibiliya?

Ibibiliya inkuvalanganga shalowa mitenga vyambone shabaa ya linagwaledyo lya Nnungu kwa ashilá shalota kutenda pameo pa vanu. Ibibiliya yadavo inkuvalanganga mwashi mwavakatakadile vanu litala lya kunama ku Ipalaishu mu shilambo shapai kunantandi, na mwashi mwashilota kuvalela kavili palaishu.—Shomya Maono 21:4, 5.

Lilove lya Nnungu linkuvanavo malamulo, umwiu na midimu. Na yadavo, Ibibiliya inkuvalanga mwashi Nnungu mwavashivatananila vanu kala, na ashi shinkutulodya mavalelo ake Nnungu. Napanelo, Ibibiliya inakupwashela wako kummanya Nnungu. Na yanavo inkuvalanga mwashi mwakuvalela mbodi wake.—Shomya Dimu 19:7, 11; Tiyagu 2:23; 4:8.

4. Ulota kumanya dashi Ibibiliya?

Ibulushula ai inakupwashela wako kumanya Ibibiliya kwa kutumila indila yoyo yatumidile Yesu. Yesu ashinatambula maandiko na kuvalanganga manaake, pakulota vanu “vaigwe shana.”—Shomya Lukashi 24:27, 45.

Mitenga vyambone vya Nnungu vyanavo vinkuva vyambone namene kwa upande wetu kuliko vinu vinji. Na ivé doni, vanu vanji havanalota shinu mitenga vya mu Ibibiliya, mpaka vanji vankwaludyanga. Kanji wako haunaujile kunyuma kwa mwaa awo, pakulota wako upate shingumi shikamalilika indikuvaikila ummanye Nnungu.—Shomya Nshuwau 17:3.